» »Unlabelled » Pengereja pengawa perintah patut ngemeratka integriti enggau inovasi maya gawa ninting hari BorneoPost Online | Borneo , Malaysia, Sarawak Daily News » Berita Iban - New 2 Borneo

05:12:00

Pengereja pengawa perintah patut ngemeratka integriti enggau inovasi maya gawa ninting hari BorneoPost Online | Borneo , Malaysia, Sarawak Daily News » Berita Iban - New 2 Borneo

Pengereja pengawa perintah patut ngemeratka integriti enggau inovasi maya gawa ninting hari

Posted: 27 Dec 2013 09:20 AM PST

KAPIT: Residen Kapit, Fedrick John George madah ngagai bala pengereja pengawa di Kapit, 'integriti enggau innovasi' nya ukai semina rambai jaku aja tang patut dikemerat lebuh gawa ninting hari enggau sistem bejalaika pengawa ba organisasyen sida.

"Pengasi resepi integeriti enggau innovasi nya nyengkaum ulih dikearapka, enda bechiping ati, lurus ati sereta chakah gawa bejalaika polisi perintah. Kitai deka nyadi Pengereja Pengawa ti Bekelas Dunya nengah pemanah tikas pengawa ti dipejalaika", ku iya.

"Pengereja pengawa perintah patut landik sereta gawa ngena chara baru lebuh ti bejalaika polisi perintah ngambi tejapaika 'Key Focus Area' nengah chara nempa tikas pengelandik ke tinggi sereta perambu pelin. "

"Kitai enda patut berubah ati ngagai perintah ke diatu. Menua kitai diatu ngemeratka penempa penatai ekonomi ke besai enggau pemansang rama. Pemansang rama pekara ke beguna amat ba semua pemansang. Kitai dekaka semua rayat betambah penatai pemisi nyerumba taun 2020 ngambika ulih nyapai juluk ngembuan besai penatai pemisi",ku iya.

Ku iya, integriti deka nyadika lalau lebuh ti bejalaika pengawa.

"Kitai patut nyingkang serunyut sereta bejalaika pengawa enggau ati ke lurus. Sebut pekara ke beguna sereta ke amat aja.Taja pan kitai tu ba menua pesisir, tang kitai anang ngemaruhka peranak menua tu'.

Iya mega ngelalau bala pengereja pengawa perintah di Kapit gawa begempung nyadi setim sereta nyukung lalu ngemanahka kaul enggau pangan diri.

Fedrick bejaku munyi tu lebuh bejadika 'Hari Integriti enggau Innovasi' renggat menua Kapit, ke diatur ba Kompleks Nengeri Bletih ti digulu ejensi perintah ari opis perintah besai enggau perintah menua, empai lama ke udah.

Atur pengawa ke bisi dipejalaika maya nya nyengkaum belagu Lagu Negara ku, angkat sumpah bala pengereja pengawa opis perintah 'To Serve With Honour', Residen Kapit, Federick John George, nyuaka bup  'Pemansang Sarawak 50 Taun Udah Merdeka',sereta ngemata pemandang ari opis perintah.

Sama bis ngulu pengerami nya, Sapit Resident; Joseph Ikan (Bagi Pemansang) enggau Zul Usop (Pengawa Rama), Venessa Joseph, Awang Nizam, Selmah Apang, Irene Merang, Minggu Jampong engagu Robert Anyaw, Superintenden Opis Tanah enggau Survei, Norlina Ra'ee, Sapit Injiner Kapit , Gerald George, Jurusukat Opis Tanah enggau  Penyukat, Raymond Ngu, Pemesai Opis Pengerara Api enggau Penyah Penusah (Bomba), Erwandy Tugor, Pemesai Opis Kampung, Jugah Ludan, Pemesai Opis JPJ, Desmond Paul enggau beratus iku pengereja pengawa opis perintah.

Bala ketuai raban bansa ke bisi ngulu pengerami nya nyengkaum Temenggung Kenneth Kanyan, Pemancha David Dian, Pengulu Enggin Nyipa, Pengulu Bunsu, Pengulu Sallang Batang, Tuai Rumah Madang, Tuai Rumah Ebong enggau sekeda bala tuai raban bansa bukai.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Pemandang ke diatur mujur ngayanka penerang sejarah pemansang pelilih Miri kandang 50 taun

Posted: 27 Dec 2013 09:19 AM PST

MIRI: Pemandang Ngintu Hari Merdeka ti ke 50 ke diatur ba Dewan Suarah Miri, udah meri penerang ke beguna ngagai mensia mayuh enggau bala nembiak sentang sejarah enggau kronologi pemansang di Bagi menua  enggau Pelilih Mit Miri berengkah ari jeman Rajah Brooke nyentuk ke sida tetemuka minyak dia.

Residen Miri,  Antonio Kahti Galis madah pemandang ke sebaka udah diatur ba Dewan Suarah Marudi berengkah ari 12 nyentuk ke 18  Oktober tu tadi, ke alai  Marudi mega sebedau tu dikelala enggau nama 'Claude Town'  lalu indu opis Bagi menua Miri sebedau tu dikelala enggau nama Bagi Menua Ke-empat di Sarawak.

"Pemandang ke baka tu mega diatur ba genap buah Bagi menua sepengudah ekspo tikas menua  Sarawak ke diatur sereta dipenyadika Kepala Menteri kena 22 Julai taun tu tadi," ku iya ke mega Menteri Muda Penyambung sereta Menteri Muda  Lumba enggau Main, Datuk Lee Kim Shin lebuh bejadika pengerami nya.

Kahti, ke mega chairman komiti pengatuur pengerami udah meransang mensia mayuh ngulu pemandang nya ke mungkur semilan bengkah sektor opis perintah enggau ejensi sereta Sarawak Shell Berhad (1910-2013).

Ku iya, Bagi menua Miri udah jauh bendar mansang lalu penyampau peranak menua nya mega udah betambah ngagai 372, 034 iku naka ke diatu.

"Tu deka ngemujurkla pengawa ngemesaika kandang pasar lebih agi Miri Marina Township deka mali gamal lanskap tebing ai, " ku iya.

Taja pia, iya minta ampun laban model pemansang enda ulih dipandangka maya nya ketegal bisi utai ke deka diubah sereta bisi salah mimit digaga.

Sama bisi ngulu pengerami nya suba, Kaban Kunsil Nengeri Telang Usan, Dennis Ngau, Datuk Bandaraya Miri, Lawrence Lai, Sapit Datuk Bandaraya, Mohd Chee Kadir, Miri OCPD ACP Mun Kock Keong, bala ketuai raban bansa sereta ketuai opis enggau ejensi perintah.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Lima buah rumah panjai ulu entigis Lubok Antu ngasaika penguntung ari program Hope Place

Posted: 27 Dec 2013 09:18 AM PST

KUCHING: Hope nguna 38 buah kerita 4WD bejalaika projek Hope Place ke dikumbai  'Charity Without Borders', begulai enggau Kelab Cabaran Pacuan 4 Roda Bintulu, mantu peranak rumah panjai di ulu entigis, Lubok Antu.

Projek ke dipejalaika ngelama tiga hari dua malam berengkah ari 15 nyentuk 17 November tu tadi mungkur urung 100 iku raban tim nya, nyengkaum dua iku pemesai perubat ngeli enggau tiga iku indu misi.

Ku penengkebang Hope Place, Kelvin Wan, iya suah berandau enggau Robert Chieng, seiku orang ke gerah jari nyaup orang ti tusah, sentang projek ke deka dipejalaika organisasyen nya.

Taja pia, sida betapi enggau penanggul ngangkut barang ngagai ulu entigis di Lubok Antu, ke semina ulih dilawa nengah jalai kayu batang ti mar, besai ungkus sereta pedis ditengah.

Tang pekara nya teputar laban Chieng ke mega pengemun kelab 4WD sereta chairman projek 'Charity Without Borders', nadai penanggul ngangkut barang ke berat 14,000 kg ngagai lima buah rumah panjai di ulu entigis, Lubok Antu.

Ku Wan, iya meri terima kasih ngagai kelab nya laban ke udah melanja perengka pengangkut sereta begempung enggau Hope Place bejalaika projek nya.

Kerita ke dikena sida nya bisi ari Miri, Bintulu, Sibu enggau Kuching. Sebedau bekejang, sida begunaka 6 jam ngisi semua kerita nya enggau barang ke deka diangkut kin.

"Ke bendar, 38 buah kerita 4WD enda muat kena ngangkut semua barang pemeri nya. Kami nyuwa dua buah lori dikena ngangkut sekeda barang sereta naruh barang nya ba Lubok Antu dulu, sekumbang kami mansang ngagai rumah panjai ke pemadu semak dulu," ku Wan.

Ku Wan madah ngagai The Borneo Post, dalam pejalai ngagai Rh Baggai, Rh Bawi Patoh, Rh Bawi Ulu, Rh Bawi Lenggong Isu enggau Rh Bawi Ili, sida betengahka jalai ti renjan, luchak sereta jauh.

"Kami meraka empat batang sungai sebedau ngenataika diri ba Rh Bawi Ili,"  ku Wan.

Nya meh jalai ke ditengah bala nembiak sekula primari lebuh sida mulaika diri ke rumah dalam kandang dua minggu sekali. Enti sida deka ke sekula tauka ke kelinik, sida enggau enda pan bedarat 3 jam ari rumah panjai nya."

Taja pan sida betapi enggau pemar nurun ke sekula, tang nadai seiku pan nembiak ari rumah panjai nya badu besekula, pia ku Wan.

Lebuh nemuai ngagai nya, dia raban sida bisi mai barang pemakai baka beras, garam, gula, minyak makai, sadin, gari  enggau kasut sekula sereta kain tula ungkup 50 buah ruang bilik ba 5 buah rumah panjai nya.

Sida mega bisi mai ubat, berus ngeli ke umbas kena setaun, ungkup nembiak mit enggau orang besai tuai. Tebal agi peranak rumah panjai nya nadai meda berus ngeli pengudah sida  nembuka pelajar ba primari Enam.

Ari semua penyampau peranak ba lima buah rumah panjai nya, 40 peratus bala nembiak nya mengkang belajar ba sekula primari lalu 20 peratus nya orang besai tuai ke ngelui umur 55 taun.

Semua barang ke dibai sereta disadung sida ba lima buah rumah panjai di Lubok Antu nya asil pemeri orang ke gerah jari.

Sesapa ke bisi ati masuk Kelab Cabaran Pacuan 4 Roda Bintulu sereta  enggau sida ba atur pengawa bukai dudi ila, tau betefon ngagai Chieng nengah lumur 019-8141966.

Orang ke ngerejister diri nyadi kaban Kelab nya deka dipinta mayar pala RM250, lalu bayar nyadi kaban ninting taun, iya nya RM150.

Hope Place deka mantu ruang bilik ti begunaka bantu sereta nganjungka sida barang pemakai enggau perengka bukai ke diguna ninting hari.

Sesapa ti bisi ati deka nyuaka bantu, tau betelefon ngagai Hope Place nengah lumur 013-5672775 ari pukul 8.30 pagi nyentuk ke 12.30 tengahari, ari Hari Satu nyentuk ke Hari Lima.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

IKS di SCV bisi nyendiaka palan latih endur belajarka seni enggau main asal

Posted: 27 Dec 2013 09:17 AM PST

SANTUBONG: Institut Kemahiran Seni (IKS) di  'Sarawak Cultural Village' (SCV) nyendiaka palan ke manah ngagai nembiak rebak baru belajarka seni enggau main asal di menua tu.

Sebedau tu, institut nya udah menang gelar Sarawak Hornbill Tourism Award  2011-2012, ti mandangka nembiak rebak baru ulih belajarka seni enggau main asal ba kelas ke moden.

Rebak keterubah nembiak ari IKS udah nerima setipikit sida ba pengerami Konvokesyen ke diatur ba Sarawak Cultural Village (SCV) kena 14 Disember tu tadi.

Udah nya nembika tu belajar ba Tikas 2, Sijil Kemahiran Malaysia (SKM) nengah program ti dipejalaika ari baruh Opis Pemansang Pengelandik, Opis Menteri Pegereja Pengawa.

Menijar institut program nya, Narawi Rashidi madah, pengerami konvokesyen nya digulu Menteri Pengereja Pengawa, Datuk Seri Richard Riot disempulang Menteri Muda Sarawak, Datuk Talib Zulpilip ke mega chairman of Sarawak Economic Development Corporation (SEDC).

Ku Narawi, kos ba tikas diploma bisi endar jalai dipejalaika kelebih agi ngagai sida ke deka nampung pelajar ba bidang seni main asal.

"Berengkah ari taun baru, semua nembiak kami deka nampung pelajar sida ngagai SKM Tikas 3, nangkanka diperansang nampung pelajar ngagai tikas diploma," ku iya seraya madah, naka ke diatu IKS semina muka kos SKM nya berengkah ari tikas 1 , 2 enggau 3.

IKS mega udah bejalaika kos Sijil Latihan Dual Nasional (SLDN) tau national dual training programme dalam kandang dua taun ke udah, ti nagit nembiak ke beumur entara 14 nyentuk ke 14 taun.

"SCV udah ditukuka nyadi Sarawak's Heritage Resource Centredalam taun 1992. Palan Pengelandik Seni mega ditumbuhka ditu dalam taun 2004. IKS ditumbuhka dalam taun tu sereta dikelala ba tikas Antarabansa enggau nama Sarawak Institute of Skill Arts (Saisa) "ku Narawi.

Menijar besai SCV, Jane Lian Labang ngelalau bala nembiak ngambi peluang nya ngerejista diri ba institut nya sereta belajarka Seni enggau Main Asal.

"Kami endang seruran dikelala nyadi  Cultural Paradise  ba mata dunya laban adat enggau main asal ke dikembuan kitai diatu mandangka penyelai ke bisi di menua kitai," ku iya .

"Nengah program tu, nembiak rebak baru ulih nyikap diri enggau penemu ba seni enggau adat seraya ngulihka setipikit ti mandangka sida udah diberi latih ke manah," ku iya.

Ketuai Menijar Ngelaku enggau Dagang SCV, Zaini Zainuddin madah, program SLDN ke dipejalaika ba IKS deka nentuka menua Sarawak nyadi palan manah endur belajarka seni enggau main asal.

"Pekara nya ngasuh kitai berasai tampak dipeda sereta ngembuan penyelai. Program nya mega nyendiaka palan ke manah ngagai orang ari menua tasik ke datai kitu sereta deka belajarka sentang seni enggau main asal," ku iya.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

RTM Kuching mujur ngatur Ngabang Krismas di palan Redeems

Posted: 26 Dec 2013 04:46 PM PST

PROGRAM 'Ngabang Krismas 2013' di Palan Redeems, Kampung Apar, Singai enda jauh ari tu bulih timbal ke manah ari peranak ke diau ngelingi kandang endur nya.

Diatur Unit Rancangan TV RTM, Kuching program ke dirikut nya dipenyadika Sekretari Politik Kepala Menteri ke mega Presiden Seumur Idup Redeems, Datuk Wilfred Rata Nissom.

Dulu ari nya, pengeluar program  'Ngabang Krismas 2013', Lydia Paya madah, Pusat Redeems dipilih nyadi palan alai ngerikut program tu laban ngipak bendar enggau tebal peranak dia ke bansa Bidayuh.

Ngena konsep pemerindang pengawa ngerikut  program tu dibantai maya ngintu Hari Krismas 25 Disember tu tadi di churung TV2 berengkah ari pukul 2 ngagai 3 lemai.

Sekeda artis ke bisi ngambi bagi dalam program tu nya , Lisa Chong enggau Claudia Geres (Bidayuh), Wilfred Vincent Ragam enggau  Stanley Meringai (Iban), 1st August (Nicole & Jessie) enggau Lungan Dennis (Orang Ulu).

Bisi diselit dalam program tu nya pemerindang ari gerup Koir Gereja SDA enggau lakun jenaka Harold Kent Micheal & Stontone James tauka dikelala  agi enggau nama  Bunyau seduai Mujap.

Dikena ngerichahka program bisi diatur mega chabut benasit ungkup orang ke datai lalu sekeda perais nya barang pelanja Nestle enggau Adabi sereta baucher makai tengah hari enggau diau ari Hotel Penview, Kuching.

Bisi datai, Datin Agnes Kiben bini Wilfred Rata Nissom, Ketuai Penulung Direktor  Seksyen TV RTM Kuching Jamal Abdullah, D.O Bau Wong Hee Sieng, Temenggong Austin Dimin sereta mensia mayuh.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Penyampau 420 iku ari genap pisuk Pulau Borneo ngambi bagi ba Program Mutosikal Bekuasa Tinggi

Posted: 26 Dec 2013 04:45 PM PST

PENYAMPAU 420 iku penyereta ari genap pisuk Pulau Borneo ngerichahka Program Mutosikal Bekuasa Tinggi Lawas ke dipenyadi di mua Hotel Seri Malaysia (HSM) Lawas apin lama ke udah.

Tebal agi bala penyereta ari Sarawak, Sabah, Brunei enggau Labuan ke datai temegah enggau mutosikal sida ke bekuasa tinggi.

Ba program nya bala sida bela nguji bunyi rengung mutosikal bekuasa tinggi diri taja pan ngemengalka lubang pending tang sida mujur matak ati mensia mayuh.

Program nya diatur Kelab Motosikal Bahagian Limbang (KMBL).

Maya ke diatu KMBL bisi 50 iku kaban ke direjister nyengkaum lebih 10 iku sida nya indu ke rindu ka pengawa bemutosikal.

Program nya mega ngereja pengawa pengasih dikena nyaup sida ke tasah dalam angus di Kampung Ujong Awat-Awat dipenyadika Kaban Parlimen Lawas Datuk Henry Sum Agong.

Bisi datai Menijer HSM Lawas Mohd Amin Othman, sponsur program Awang Damit Ali Hasan, Chairman KMBL Zamri Seman enggau Sekretari KMBL Rino Musino.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.