» »Unlabelled » Nangika enda laku, penyual nyikap diri tumu nyual ayam Hari Krismas BorneoPost Online | Borneo , Malaysia, Sarawak Daily News » Berita Iban - New 2 Borneo

05:20:00

Nangika enda laku, penyual nyikap diri tumu nyual ayam Hari Krismas BorneoPost Online | Borneo , Malaysia, Sarawak Daily News » Berita Iban - New 2 Borneo

Nangika enda laku, penyual nyikap diri tumu nyual ayam Hari Krismas

Posted: 24 Dec 2013 08:23 AM PST

MIRI: Nyerumba enggau Hari Krismas nyau majak semak tu tadi, penyual udah nyikap diri tumu mandangka pun kayu enggau ayam tauka pemeri Krismas ba sebelah pasar besai bebelika barang ditu.

Berebak enggau nya, pengempu kedai enggau bansal-bansal bukai udah berengkah nudukka sekeda pun kayu Krismas kena narit ati bala pemeli.

Nitihku pengari ari Boulevard Shopping Mall ke semina dikangau nama Chan madah, kelimpah nyendiaka pun kayu Krismas ke udah diias, sida mega bisi nyendiaka ayam Krismas, lampu Krismas enggau utai bukai dikena narit ati mensia mayuh meli tumu ba pun bulan November.

"Baka ke udah-udah, penguna milih meli tumu kena nyeliahka berebut maya deka datai ba hari nyadi Krismas. Nya alai, kami patut nyikap diri dulu kena nukuka peminta penguna ulih dititihka," ku iya.

"Taja pan rega mar, tang penyual mengkang nambahka penyampau tang semina nyual ke nerima sambut ari mensia mayuh aja.

"Ari lampu LED, stokin enggau bungai Krismas, pun kayu Krismas enggau ayam bukai, Chan madah semua barang ke dijual nya mayuh macham pemesai, kualiti enggau rega," ku iya seraya madah sida ngaga baka nya ngambika penguna mayuh pilih.

Kelimpah ari meli sebelah kedai, penguna mega meli nengah online.

Wyjane Lai, seiku penyual ngena chara online ba kedai portal China ke tebilang,  Taobao madah, barang ke dibeli jampat datai, rega murah enggau dianjung nyentuk ke mua pintu kebuah penguna mayuh milih chara online tu.

"Taja aku rindu agi meli ngena chara nya (online) tang aku mengkang bejejaga ari kena tipu," ku iya ke madah diri kala kena tipu ngagai The Borneo Post.

Maya The Borneo Post matau ba portal kedai, mayuh amat barang ke dijual nengah chara online nyerumba hari Krismas ke ngelakuka barang sida nengah rambai jaku baka 'Get ready for Christmas' enggau 'Christmas Trees under $10USD'.

"Aku ulih milih nama bansa barang dikedekaka aku nengah online, nya alai, aku enda deka ngetu begunaka chara Internet," ku Lai.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Rh Grace Itun ngatur pengawa Karoling beserimbai enggau Pengerami Mantar Krismas 2013

Posted: 24 Dec 2013 08:19 AM PST

by Judan Bungap. Posted on December 25, 2013, Wednesday

SIBU: Rumah Grace Itun Upo, Jalai Salim-Stabau ditu udah ngatur pengawa Karoling beserimbai enggau Pengerami Mantar Krismas 2013, empai lama tu tadi.

Pengerami tu betuaika Vicar Gerija Anglikan Saint John Reverend Canon Jamal lalu digulu lebih 200 iku raban gerija nya.

Bela bisi datai maya tu iya nya Sub Deacon Henry Kulis, Sub Deacon Obed George Gomes, Tuai Rumah Grace Itun enggau chairman komiti pengerami Frederick Taip Ledom.

Penanyi tebilang Rosiana Urai enggau Depha Masterpiece bela merindang bala mayuh lemai nya.

Reverend Canon Jamal diberi basa melah kek Hari Krismas kelai bejadi pengerami nya.

Pengerami tu endang diatur peranak rumah panjai nya ninting taun beserimbai enggau mantar Hari Krismas ti deka datai.

Raban 'caroller' tu nyengkaum sida ari bemacham tikas umur ti betuaika Vicar, paderi tauka sapit pederi enggau Sub Deacon.

Suah agi pengawa tu diatur ba ujung bulan November ngerami agi Hari Krismas.

Ba gerija Anglikan Saint John di Sibu, pengawa tu udah berengkah kenyau ujung bulan November tu tadi begintir ari rumah panjai seiti ngagai seiti tauka ba kandang mengeri.

Rumah Grace Itun sekeda ari rumah panjai menua pesisir digulu gerija tu ngatur pengawa nya.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Peranak pengarap Keristin Chapel Tamah Malihah beterima kasih ketegal pemeri Hari Krismas

Posted: 24 Dec 2013 08:16 AM PST

KUCHING: Urung 250 iku peranak pengarap Keristin Chapel Tamah Malihah datai ngulu 'Program Children Chrismas Party' nyerumba Pengerami Mantar Krismas 2013.

Pengerami nya diatur ba mua laman Chapel Anglika Taman Malihah, ditu, kena 15 Disember tu tadi.

Chairman Chapel Taman Malihah Thomas Kana madah, sida berasai ngaga ati laban nyerumba enggau nyambut Hari Krismas taun tu sida bisi nerima buah jari ari perintah nengah Opis Kaunsil Bandar Padawan (MPP) beungkus RM3,550.

"Kami meri besai terima kasih laban MPP udah ngagihka belanja RM3,550 ngagai chapel tu dikena nyambut pengerami mantar Krismas baka ke diatur sehari tu.

"Belanja tu kami tembuka abis ke tau endar mai penguntung ngagai bala raban chapel Tamah Malihah ngatur aktiviti gerija. Kami merambu deka ngatur pengerami baka tu ninting taun.

"Nya alai, kami ngarapka MPP ulih ngagihka belanja ninting taun," ku iya.

Ba pengerami nya, mayuh macham aktiviti diatur baka karaoke ari raban Sunday Scholl, nyuaka pemeri Hari Krismas kelimpah melah kek nyerumba enggau hari pengada Priest In-Charge Revd. Ronnie W. Caniddy enggau seiku nembiak ke sama nyambut hari pengada ba hari bulan ke sama.

Pia mega, mensia mayuh ke datai diasuh ngambu penyampau gula batu dalam kontena kelimpah diperindang penanyi tebilang Andrew Bonny James (ABJ), pemeri perais ari Santa Claus enggau main bukai ti ngerindangka ati.

Sama bisi datai ba pengerami nya, Kaunsilor MPP Hillary Giang sereta bini, layleader Julius Janting enggau raban chapel ke bukai.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Gerija Methodist Iban Mengeri Kuching ngembuan juluk deka bisi pendam ke diri

Posted: 24 Dec 2013 08:13 AM PST

by Rengenyan Labang. Posted on December 25, 2013, Wednesday

KUCHING: Gerija Methodist Iban Mengeri Kuching apin lama udah ngatur pengerami Makai Malam Mantar Krismas 2013.

Pengerami nya diatur raban gerija kena 6 Disember 2013 ti bepalan di Christian Ecumenical Worship Centre (CEWC), Jalai Stampin, Kuching.

Rambai jaku pengerami malam nya "Spreding Scriptural Holiness, Transforming The Nation".

Kelimpah ari sama gempuru makai malam, entara pengerami ti diatur baka Blessed Draw, lagu sepunsa enggau kebukai.

Pengerami malam nya mega dikena meri awak ngagai raban Gerija Methodist Iban Mengeri Kuching ngerapitka agi kaul enggau pangan diri.

Lay Leader Gerija Methodist Iban Mengeri Kuching, Tuai Rumah (WQ1 (B)) Adi Jala dalam jaku pengelalu madahka, gerija nya ngembuan juluk deka bisi pendam ke diri.

Beduduk ari pekara nya, berengkah taun baru gerija nya deka chakah begigaka belanja.

"Berengkah taun 2014 Kaban Komiti Gerija deka chakah ngiga belanja dikena meli tanah ngambika ulih nyadi pendam (gerija)," ku iya.

Nyerumba pengerami nya, Datuk Kristoffer Nyuak Bajok ti nyadi patron malam nya ngungkupka belanja RM7,000 dikena bejalaika atur enggau ngurus gereja.

Antara ke bisi datai ngulu pengerami Makai Malam Mantar Krismas 2013, Rev. Lawi Kulih; Rev. Jonathan Nora – Paderi Gerija; Chairman Gerija Jefri Ngelambai sereta Chairman Pengatur Makai Malam Mantar Krismas 2013 Peter Moni Selat.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Pemidang niang Nyopis diasaika semua peranak S’wak lebih agi bansa Bidayuh

Posted: 23 Dec 2013 02:53 PM PST

BAU: "Pejalaika pengawa gerempung enggau naka ulih," nya jaku ke penudi didinga ari niang Paul Nyopis Noyeat, ngagai Chairman Gerempung Ex-Soldadu Malaysia (PBTM) Tasik Biru, Jossem Daweg sebedau iya mutus seput, pagi hari Minggu tu tadi.

Lebuh ngenang pemidang niang ke balat diasaika rayat Bumi Kenyalang lebih agi ba komuniti Bidayuh, Jossem madah, nadai agi penerima midul Panglima Gagah Berani (PGB) ari komuniti nya ke agi idup diatu.

Lebuh meri basa ngagai niang, pengawa nganjung niang ke pendam diberi basa adat soldadu ari Markas 1 Divisyen ke betuaika Panglima 3 Briged, Briged General Datuk Mohd Nazir Mami.

Sama bisi ngulu meri basa ke penudi ngagai niang kemari, Direktor Opis (Hal Ehwal) Veteran (JHEV) Sarawak Lt. Kol Monday Juhid, Kaban Kunsil Nengeri (ADUN) Ranum Mina, Chairman Warisan Bung Bratak Dato Peter Minos, Yang diPertua Gerempung Ex-Soldadu Malaysia (PBTM) pampang Sarawak, Spencer Birai enggau sida bukai.

Maya nganjung numbak niang kemari, mensia mayuh berasai sinu lebuh Nazir nyerah menira basa ngagai balu niang, Kimen Lambek ke digulu ulih diri sebilik enggau kaban belayan bukai.

Niang Nyopis parai maya umur 71 taun di Sepital Pelilih Mit Bau, pengudah dua bulan Strok.

Nyopis pinchin ari pengawa nyadi soldadu sepengudah gawa dalam timpuh 21 taun dalam Rejimen Renjer Diraja.

Maya gawa nyadi soldadu kelia, Nyopis tebilang enggau pemerani belaban enggau 15 iku kominis ari 'Pasukan Rakyat Kalimantan Utara' (Paraku) di Jalai Sebuku-Tondong, Bau kena 15 April 1972.

Nyopis maya nya nguluka seraban pengelikun ke bejalai ari Kuching ke Bau ngena kerita soldadu.

Maya di Tondong, Bau, raban nya diserang nyelawai ulih munsuh lalu lebuh nya, laban nadai agi runding bukai sereta enda ibuhka pengelikun diri empu, Nyopis malas serang munsuh lalu mujur ngundurka kominis. Tiga iku munsuh ari raban nya parai.

Ba atur pengawa besembiangka niang di Gerija St Mathias, Kampung Rumih ditu kemari, urung 400 iku mensia mayuh sama bisi ngulu atur pengawa nya ditu, lalu ditangkan enggau nganjung niang ngagai pendam Keristin Kampung Rumih.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Pengulih ari inisiatif Pemansang Rama iM: Salang

Posted: 23 Dec 2013 02:52 PM PST

Peranak Rh Michael Jantan keterubah ngasaika penyamai penembu projek tekat Mikro Hidro nya

JULAU: Keterubah dalam pengidup sida serumah, 200 iku peranak Rumah Michael Jantan di Nanga Bekatan, Julau deka ngasaika penyamai ari bekal kuasa karan 24 jam, bepun ari penembu sebuah mikro hidro ungkup menua sida.

Mikro hidro ti mansutka kuasa 10-kilowatt nya, digaga nengah projek komuniti ke mega sebagi ari inisiatif Pemansang Rama iM Sarawak.

Kuasa ke dibekalka mikro hidro chukup kena napi guna ba rumah panjai nya, ke sebedau tu ngulihka kuasa karan ngena injin api diesel, ti begunaka ungkus urung RM4,000 sebulan.

Lebuh bejadika tekat ai Mikro Hidro iM Sarawak kena Hari Lima minggu nyin tadi, Kaban Parlimen Julau Datuk Joseph Salang masang api ba pun kayu Krismas di Rumah Michael ngambika pengerami Hari Krismas taun tu besai agi reti diintu peranak rumah panjai nya.

Sama bela bisi dia maya nya, Sapit Menteri Pemansang Menua Pesisir enggau Pelilih Menua, Datuk Alexander Nanta Linggi.

Salang ke mega Chairman Penyanding Penemu Kaunsil 1Malaysia Sarawak (1MSAC), madahka projek nya murah, beresi sereta manah amat kena mekalka karan ngagai kandang menua di ulu entigis Sarawak.

"iM Sarawak ngerembaika penemu besaup sereta begempung gawa laban projek nya digaga nengah pengawa beripai," ku iya.

Dulu ari nya, sebedau masang api ba pun kayu Krismas, Salang enggau Alexander bedarat urung 15 minit nengah kampung meda gaya tekat ai ke digaga kena mekalka karan nya.

Tembu pengawa bejadika nya, Alexander madah, projek mikro hidro sebuah projek ke manah laban ulih mekalka karan baka ti dikedeka.

Ku iya, nya ulih mekalka kuasa karan ke chukup sereta murah laban ke digaga nengah chara beripai.

"Udah mayuh projek ke baka tu diperambu, tang tebal agi projek nya mar agi ungkus enti dibandingka enggau ke digaga ditu.

Ku iya, sistem solar mega sebengkah ari pemansut karan ke bisi digaga ba kandang menua ulu entigis.

Taja pia, sistem solar nya mar ungkus laban teknologi semampai berubah manah.

Sentang pemansang menua pesisir ari baruh program NKRA, ku iya agi mayuh pemansang deka dipejalaika di Sarawak laban kandang menua tu besai.

"DiSarawak, agi mayuh kandang menua ulu entigis bedau chukup penyikap perengkaguna tu, nya alai kami ngiga chara pemansut bukai ke sida," ku iya.

Naka ke diatu, projek iM Sarawak udah dipejalaika ba sekeda kandang menua di Limbang, Julau, Sibu, Miri, Mas Gading, Santubong, Lundu enggau Kuching nyengkaum kandang menua pesisir baka Lusong Laku enggau Long Uron di Belaga, Long San di Marudi sereta Long Semadoh di Lawas.

Projek tu ngemerat penyendia ai beresi ngagai sekula sereta genturung pendiau, projek kuasa karan mikro hidro, perengkaguna bukai, bantu pemakai, pengelandik, bantu ba pengawa betanam betupi, ngemanahka rumah lalu ngintu nembiak nengah pelajar enggau main.

1MSAC begempung enggau sekeda ejensi sereta organisasyen ngemujurka program pemansang komuniti di Sarawak.

Projek nya mega dipejalaika Yayasan Rakyat 1Malaysia (YR1M) enggau Yayasan 1Malaysia Development Berhad (1MDB) begempung enggau sekeda ejensi perintah di menua tu.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.