» »Unlabelled » Suah agi nyerenih profil genturung pendiau BorneoPost Online | Borneo , Malaysia, Sarawak Daily News » Berita Iban - New 2 Borneo

05:19:00

Suah agi nyerenih profil genturung pendiau BorneoPost Online | Borneo , Malaysia, Sarawak Daily News » Berita Iban - New 2 Borneo

Suah agi nyerenih profil genturung pendiau

Posted: 19 Dec 2013 08:48 AM PST

BINTULU: Profil ba genap buah genturung pendiau enggau rumah panjai di pelilih Bintulu patut suah agi diserenih enggaika bisi ubah, ngambika bantu ari sekeda ejensi perintah ulih diberi.

Sapit Residen (Bagi Pemansang ) Sirai Daha madah, pekara nya beguna amat laban deka nyadika sebengkah ari kereban pemandah ngagai perintah sentang perambu pemansang ti deka dipejalaika sida.

"Bala ketuai raban bansa, ketuai genturung pendiau enggau tuai rumah patut ngemeratka pekara tu.

"Sebarang ubah ke bisi ba profil nya patut dipadah ngagai opis pelilih mit enggau lengkas, ngambi penerang ke baru ulih dipasukka dalam sistem sereta enda meri sebarang penanggul ngagai opis pelilih mit menua," ku iya bejaku ba seminar motivasi begulai enggau 40 ketuai raban bansa sereta tuai rumah ari pelilih Bintulu, ke diatur ba Opis Residen kemari.

Ku Sirai, profil nya patut diisi penuh enggau penerang ke pemadu baru, laban nya deka dikena ejensi perintah ke bekaul ngelala pemansang perengkaguna ba semua genturung pendiau enggau rumah panjai.

Ku iya, enti nadai penerang ke pemadu baru, mar perintah merambu pemansang ungkup sesebengkah kandang menua.

Tuai rumah patut bejalaika pengawa sida enggau manah ngambika Komiti Pemansang enggau Pengelikun Genturung Pendiau (JKKK) pan sama bela ulih bejalaika tanggungpengawa sida enggau lanchar.

"Enti kita bisi Biro Betanam Betupi, ketuai biro nya patut nadai penanggul suah niki ngagai Opis Betanam Betupi.

"Baka nya mega enti kita bisi Biro Pengerai, ketuai biro nya patut nemu utai ke patut dikereja ngambika perintah ulih meri bansa pemansang ngagai sida " ku Sirai ke deka mangku pengawa ba Opis Menteri Pemansang Menua Pesisir, taun baru tu ila.

Kelimpah ari nya, iya mega ngelalau bala nembiak redak bebasaka penemu bala ketuai raban bansa.

"Anang ngasaika diri nemu semua utai, tang beri meh sida awak ngenataika langgur penemu sida ," ku iya.

Sirai udah gawa di Bintulu urung 6 taun. Ku iya, mayuh endar pemar udah ditapi iya sekumbang ke gawa dia enti dibanding enggau sekeda endur bukai ke udah alai iya gawa, kelebih agi ari segi pemansang.

"Ejensi perintah diperansang meri sukung sereta begempung enggau bala ketuai komuniti ba tikas nembiak redak, lalu arapka sukung majak betambah belama," ku iya.

Seminar nya udah dipejalaika seiku tukang licha motivasi, Salleh Abdul Rahman sereta digulu DO Tuah Suni, Temenggung Abang Suhaili Abang Mohammad, Temenggung Barry Yek enggau sekeda bala ketuai raban bansa bukai.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Seraka penyulut nembiak menua pesisir enggau mengeri ba peresa majak mit

Posted: 19 Dec 2013 08:46 AM PST

KUCHING: Ngenyemakka seraka penyulut entara nem­biak tauka sekula di kan­dang mengeri enggau menua pesisir ba pemutus peresa, sebengkah ari pemar ditapi ba pengawa ngemansangka pekara pelajar.

Taja pia bepelasarka pe­mutus peresa diatu, Menteri Pengintu Pengelantang, Pekara Indu enggau Pe­mansang Ruang Bilik, Datuk Fatimah Abdullah madah, takah penyulut entara sekula tauka nembiak ba mengeri enggau menua pesisir majak mit.

"Sebagi ari penapi ba pen­gawa pelajar iya nya chara kitai ngedut seraka penyulut entara menua pesisir enggau kandang mengeri. Bepelasar­ka pemutus peresa Penilaian Menengah Rendah (PMR) ke baru dibantai mandangka seraka nya majak mit.

"Baka ba pemutus peresa (PMR 2013) ti dibantaika tadi (kemari), sekula menua pesisir bisi nunjukka mayuh peniki tauka penyulut ba penyampau Minimum 'D' enggau semua 'A' ba matape­lajar ti diambi, tu mandangka bisi peniki ba kuantiti enggau kualiti.

"Pemutus nya chukup manah sereta patut dike­megahka kitai lalu semua nya asil ari pemendar pengajar, kepala pengajar, direktor, piak sekula, apai indai sereta nembiak," ku iya.

Fatimah mansutka pekara nya lebuh bejaku, pengu­dah ngemata sereta nyuaka setipikit enggau slip pemutus peresa PMR 2013 ba Majlis Pengumuman Keputusan PMR 2013 Renggat Nengeri sarawak ti diatur ba Audi­torium Opis Pelajar Nengeri Sarawak ditu, kemari.

Dulu ari nya, Direktor Opis Pelajar Nengeri Sarawak, Datu Abdillah Adam lebuh mantaika pemutus peresa PMR 2013 pukul 10 pagi kemari madah, pemutus cha­lun sekula menua pesisir niki ari segi Gred Purata Negeri (GPN) iya nya nurun 0.07, ari 3.05 (2012) ngagai 2.98 ba taun 2013.

Chalun sekula menua pesi­sir ba pemutus Minimum 'D' nunjukka pemutus ti niki iya nya 3.88 peratus ari 62.80 peratus (2012) ngagai 66.68 peratus ba taun 2013.

"Dalam pemutus semua 'A' ba semua matapelajar ti diambi ba taun 2013, chalun menua pesisir mega nunjukka pemutus ti niki sepenyampau 0.19 peratus iya nya ari 2.53 peratus ba taun 2012 ngagai 2.72 peratus taun 2013.

"Kitai ngarapka semua piak ulih terus meri kerejasama ba pemansang sekula senggau pelajar.

"Aku arap bendar Sarawak deka terus mansang dalam pekara pelajar. Seraka pe­mutus tauka penyulut pere­sa mega deka majak ulih dikedutka jemah ila," ku Abdillah.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Program Pengerai dikearap nguntungka raban apai indai

Posted: 19 Dec 2013 08:46 AM PST

SRI AMAN: Opis Pengerai Pelilih Sri Aman udah ngatur Kimpin Ngelakuka Pengerai Enggau Pemeresi Pemakai ba KEMAS, Genturung Pendiau Seduku, Sri Aman apin lama ke udah.

Seraban 20 iku apai indai nembiak udah datai ngulu sereta ngemujurka program nya.

Pemesai Ngelakuka Pengerai ari Opis Pengerai Sri Aman, Gabriel Alexis Kibes madah, program tu diatur kena ngiri penemu ngagai bala apai indai sentang pemesai reti nyaga pemeresi enggau pengerai nembiak mit, ngambika sida bepengerai.

"Nengah program tu, kami ngajar bala nembiak sentang chara nyaga pemeresi pemakai nengah chara ke betul," ku iya madah ngagai pengarang berita ari Utusan Borneo.

Kena ngemujurka program nya, sida udah ngatur tiga bengkah licha ngagai bala apai indai enggau nembiak baka Penyakit Jari Kaki Enggau Mulut, Pemesai Reti Nyaga Pemeresi Diri sereta Tepakaika Pemakai Berachun.

Alexis arap program nya meri pemaik sereta mantu sida nyeliahka diri ari penyakit Jari Enggau Kaki sereta penanggul tepakaika pemakai berachun ba mensia mayuh di Sri Aman ila.

"Kami mega arap bala apai indai enggau nembiak ulih nyadung penerang sentang pengerai enggau penyakit ngagai orang bukai ke diau ngelingi sida," ku iya.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Leka jaku ‘Allah’ ukai penanggul jalai pengarap peranak rumah panjai

Posted: 19 Dec 2013 08:46 AM PST

MIRI: Pengelikun ba jalai pengarap di rumah panjai enggau palan pengentap baru di menua pesisir Sarawak patut nyadika terabai ngagai barang sapa ke deka beambi ulih mutarka pasal jalai pengarap ti deka nguntungka jalai politik sida.

Menteri Muda Penyambung Ai, Datuk Sylvester Entri Anak Muran bejaku munyi tu lebuh bejadika Pengerami Mantar Krismas sitak Marudi di Balai Mayuhguna Beluru, urung 76 km ari Miri, ujung minggu nyin tadi.

Leka jaku "Allah" nadai kala nyadi penanggul di rumah panjai, lalu nya mega ukai patut nyadi pekara politik ti tau ngachau pengelikun," ku iya.

Ku Entri, ulah bebasaka pangan diri endang udah lama dikemeranka rayat Sarawak lebih agi di menua pesisir ke alai penyerakup ngenukuka basa bela dikemeratka semua raban bansa.

Ku iya pengerami nya diatur begulai gerija Roman Katolik, SIB enggau Bahai, ke alai bala temuai dikangau datai ari Tinjar, Teru enggau Bakong ngulu pengawa nya.

Pengawa ngatur pengerami nya datai ari langgur penemu Entri sereta disukung Kaban Parlimen Baram, Anyi Ngau ke minta pengerami mantar Krismas nya diatur ninting taun sereta diatur nengah chara begintir ari raban keristin Katolik, SIB enggau Bahai.

Dulu ari nya, Sekretari Politik Kepala Menteri Robert Laing enggau Dr Richard Wil Uban, sama bela bisi bejaku ba pengerami nya.

Seduai sama bela minta pengari Hari Krismas tu diintu enggau chara ke patut sereta dikearapka ulih nyerakupka raban bansa di menua pesisir.

"Jalai pengarap nya ukai petara, laban semina bisi seiku aja petara ke disembah lebuh kitai besembiang sebarang maya tauka ba sebarang endur," ku Robert.

Raban orang ke megai pengarap keristin mih ke pemadu mayuh ba kededua sitak Marudi enggau Telang Usan di Baram.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Lebih 30,000 teulihka A ba semua matapelajar peresa PMR taun 2013

Posted: 19 Dec 2013 08:45 AM PST

PUTRAJAYA: Bisi 30,988 tauka 7.33 peratus ari 462,940 iku chalun ke ngambi peresa Penilaian Menengah Rendah (PMR) 2013 bulih gred A dalam semua mata pelajar, ba pemutus peresa ti dipansutka kemari.

Ketuai Direktor Opis Pelajar, Datuk Dr Khair Mohamad Yusof madah, pemutus nya manah agi enti dibanding enggau 30,474 iku ke ngambi peresa PMR dalam taun 2012, bisi nambah 0.41 peratus tauka 514 iku.

Ku iya, pemutus ba mata pelajar English, Matematik, Sains enggau Pendidikan Islam bisi nambah ari segi Gred Pukurata Mata Pelajar (GPMP).

"Taja pia, GPMP ungkup mata pelajar Bahasa Melayu bisi nurun 0.03 mata ngagai 2.35 mata dalam 2013 enti dibanding enggau taun seiti nyin tadi ke bulih 2.32 mata," ku iya bejaku ba aum media lebuh ke mantaika pemutus peresa PMR 2013 ditu kemari.

Ku Khair baru, penyampau chalun ke bulih gred E dalam semua mata pelajar bisi nambah ngagai 307 iku (0.07 peratus) taun tu enti dibanding enggau 241 iku (0.05 peratus) dalam taun 2012.

Pemutus nya mega mandangka pemujur ke dijapai nembiak ba kandang nengeri enggau menua pesisir nyauka sebaka, enti dipeda ari gred pukul rata iya nya 2.56 enggau 2.81.

Ungkup chalun bepenau nyelai (BK), bisi kurang tiga iku lebuh 11 iku teulihka gred A dalam semua mata pelajar ari 2,300 nembiak ke ngambi peresa nya, enti dibanding enggau 14 iku ti bulih gred A dalam taun 2012, ku iya.

"Penyampau chalun BK ke enda ulih ngelui tikas ke pemadu baruh ditetapka dalam semua mata pelajar bisi nambah ari 22 iku (1.27 peratus) dalam taun 2012 ngagai 49 iku (2.13 peratus) dalam taun 2013, nambah 27 iku (0.86 peratus).

Ku Khair, berengkah ari taun baru (2014), peresa PMR bisi berubah lalu ukai dipejalaika nengah peresa ke sebaka, tang dikemataka ari segi psaikometrik, lumba enggau main, kokurikulum sereta pekara bukai.

Chara nya dikena Opis Menteri Pelajar ngemanahka sistem pelajar di Malaysia, ku iya.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Rh Sarang dilalau ngentak rumah baru besemak jalai

Posted: 19 Dec 2013 08:45 AM PST

KANOWIT: Menteri Muda Pemansang Tanah Datuk Gramong Juna ngelalau peranak Rumah Sarang Unggat di Ulu Mam ditu ngentak rumah panjai baru sida besemak enggau jalai alun.

Ku iya, tu ngambika perintah muntang agi bejalaika projek pemansang ngagai peranak rumah panjai nya.

"Enti ulih, giga palan ke besemak enggau jalai alun ngambika projek pemansang perintah muntang agi dipejalaika," ku iya seraya besemaya deka mantu peranak Rumah Sarang Unggat ti udah dituntung penusah angus, empai lama tu tadi.

Taja pan baka nya, iya ngarapka peranak rumah panjai tu bekerejasama enggau tuai rumah kelimpah enggau piak ti bekaul ke bukai ngemujurka pengawa ngentak baru rumah panjai nya.

"Aku besemaya deka mantu kita (peranak rumah panjai) enti sema kita udah bulih taba alai ngentak tauka berumah baru.

Gramong ti mega Kaban Kunsil Nengeri (ADUN) Machan mantaika jaku nya maya betemu enggau peranak Rumah Sarang, 11 pintu bilik, ke udah angus, empai lama tu tadi.

Gramong mega bisi nyuaka RM2,000 ari kuchik iya empu kena ngelempungka agi penusah ke nating peranak rumah panjai nya.

Berebak enggau nya mega, Gramong bisi ngelalau bala apai indai rumah panjai nya ngambika enda ngelengkaka pekara pelajar anak sida.

Ku iya, penusah ke nating diatu baka bup, ngepan sekula tauka surat beguna bukai ti ambis angus enda tau nyadi ke dalih lembau nganjung anak belajar.

"Kita tau betemu tauka berandau enggau kepala pengajar baka ni chara mutarka pekara ru.

"Pekara baka tu enda tau ngasuh kita mantul nganjung anak belajar baru," ku iya.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.