» »Unlabelled » 26 Dis hari bulan ngelawa orang jil: JPM BorneoPost Online | Borneo , Malaysia, Sarawak Daily News » Berita Iban - New 2 Borneo

05:33:00

26 Dis hari bulan ngelawa orang jil: JPM BorneoPost Online | Borneo , Malaysia, Sarawak Daily News » Berita Iban - New 2 Borneo

26 Dis hari bulan ngelawa orang jil: JPM

Posted: 17 Dec 2013 08:15 AM PST

KUCHING: Opis Rumah Jil Malaysia (JPM) udah netapka 26 Disember itu hari bulan ngelawa orang jil, orang ke kena tan, enggau juvenil beserimbai enggau Hari Krismas.

Nundaku JPM, hari bulan tu ungkup orang tutup di semua institusi jil, palan ngemanah ulah enggau Sekolah Henry Gurney di serata menua.

Seraya ungkup orang ke ditan di baruh Akta Keselamatan Dalam Negeri (ISA) di Tempat Tahanan Perlindungan Kamunting, Taiping tau dilawa kena 25 Disember.

Maya ngelawa nya berengkah ari pukul 8.15 pagi nyentuk ke 4.15 lemai lalu bala temuai dilalau bebaika kad nemuai sereta kad pengelala.

Kelimpah ari nya, orang ke nemuai nya enda tau mai pemakai tang bebeli di kantin rumah jil empu.

Temuai orang Keristin deka dikemeratka dulu, pia ku penerang nya.

Temuai ke deka beberika duit ngagai orang ke kena tutup nya dipinta ngambi risit nyadi akun nerima duit.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Pemakai ulih nempa penyerakup rayat: Fatimah

Posted: 17 Dec 2013 08:15 AM PST

by Rengenyan Labang. Posted on December 18, 2013, Wednesday

KUCHING: Pemakai ulih ngasuh tauka nempa penyerakup entara rayat nengeri tu kelimpah ari ti  ulih nyadi sebengkah jalai dikena narit temuai menua bukai datai ke nengeri tu.

Pekara nya dipadahka Menteri Pengintu Pengelantang, Orang Indu enggau Pemansang Ruang Bilik, Datuk Fatimah Abdullah lebuh bejadika 'Buku Masakan-Indian Flavour' ti diatur di Sarawak Club ditu.

"Aku arap bendar pemakai ulih nyerakupka semua kitai, enda nyalah baka lumba enggau main ti udah dikelala ulih nyerakup kitai bansa.

"Baka ba pengawa (bejadika Buku Masakan-Indian Flavour) pagi tu kitai ulih meda pupu bansa ti datai, kitai ulih sejalai, sepenemu tauka beserakup nengah pekara ti sama dikerindu iya nya pemakai.

"Pekara baka tu patut dikemeran tauka ditampung sereta ditemu enggau diperundingka raban nembiak iya nya pemakai ulih ngasuh beserakup tauka segulai sejalai, lebih agi pemakai ti bepengerai," ku iya kemari.

Ngenang pemakai ulih nyadi produk penarit dalam industri dagang temuai ku iya, pemakai ti manah sereta nyamai ulih narit temuai ari menua tasik selalu agi datai ke nengeri tu.

Ku iya lebuh makai malam enggau bala bakih ti datai ari menua Jipun, sida deka datai baru ke Sarawak iya nya ketegal penyamai pemakai kelimpah ari pemanah rampa menua, adat enggau main asal sereta rayat Sarawak.

"Di nengeri tu mayuh pilih, mayuh pekara di Sarawak ulih narit orang mayuh tama kitu," ku iya.

Buku Masakan-Indian Flavour ti dipenyadika Fatimah ngerintai mayuh macham bansa pemakai India ti keterubah dikeluarka, asil ari pengelandik nyendiaka pemakai Datin Ruby Sengupta.

Bisi datai ba pengerami nya kemari, Datuk Dr. Sengupta, Datuk Amar Wee Hood Teck sereta Pengarang ti mega Chairman Pengatur pengerami nya M.Rajah.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Semacham peminta patut diperundingka perintah

Posted: 17 Dec 2013 08:12 AM PST

Serakup Peranak Ulu Ngemah minta kelai apak entara tanah NCR sida enggau Lanjak Entimau Wildlife Sanctuary

KANOWIT: Serakup Peranak Ulu Ngemah (PPUN) semina bisi semacham peminta nyerumba Hari Krismas enggau Taun Baru tu.

Tuai Rumah (TR) Magai Sawing (gambar) ke mega chairman serakup nya arapka perintah menua ngemendarka peminta sida ke deka nemu apak entara tanah Adat Bansa Asal (NCR) sida enggau Lanjak Entimau Wildlife Sanctuary di Ulu Ngemah ditu.

Kami udah nulis surat ngagai Opis Tanah enggau Penyukat Sibu (LSD) sereta Opis Kampung Sarawak sentang pekara nya. Tang nyentuk ke diatu sida lalu bedau nerima timbal bekaul enggau pekara nya.

"Kami amat deka nemu apak entara tanah nya ngambika orang ti ngempu tanah dia enda saru ni bagi tanah sida enggau tanah galau perintah dudi ila.

"PPUN nadai penanggul begempung enggau ejensi ke bekaul mutarka pekara tu," ku iya lebuh nyadi chairman ba aum serakup nya kena 7 Disember tu tadi ke diatur ba Nanga Ngungun, Sungai Ngemah ditu.

Lanjak Entimau Wildlife Sanctuary pemesai 1,870 kilometer besegi ke mungkur kandang menua berengkah ari Sri Aman, Sarikei, Sibu enggau Kapit udah ditumbuhka dalam taun 1983.

Ku iya, Ulu Ngemah endang kandang menua peranak rumah panjai nya kenyau ari taun 1910, sebedau sida dipindah ke ili Sungai Ngemah ketegal dikachau kominis urung taun 1970.

Lebuh ke diansak pindah, sida ninggalka umai enggau rumah panjai, ku iya.

"Bisi sekeda kaban belayan sida mengkang nguan menua nya. Taja pia, tanah ti ditinggailka kami ditejuka pia aja ketegal jauh ari rumah kami ke diatu," ku iya.

Iya mega minta perintah mendingka penemu peranak asal menua nya sebedau merambu ngemendarka urung 20 bengkah pesaka galau enggau palan nya digazet nyadi biological resources conservation.

Iya mega meransang bala kaban PPUN begempung nyaga kandang menua Ulu Ngemah ari orang luar ke deka ngulihka untung enggau lengkas belalai ari ditemu peranak asal menua nya.

Iya nyebut pekara tu berindik ari pekara ke kala nyadi ba kandang menua nya sebedau tu.

Semua pengawa ti deka dipejalaika ba Ulu Ngemah patut bisi pemendar ari PPUN.

"Kami nadai penanggul begempung ngambika kededua piak ke bekaul sama bela bulih pemaik enggau penguntung ari pekara tu," ku iya.

dataika Najib enggau sekeda tuai ari perintah besai meri jamin atur nya enda dikena di Sarawak enggau Sabah seraya kededua bengkah nengeri nya ke diuan tebal orang bepengarap Keristin ke nguna leka jaku 'Allah' nyebut Petara keristin ari kelia menya.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Peminta peranak pengarap Keristin Chapel Tamah Malihah deka diperunding

Posted: 17 Dec 2013 08:12 AM PST

KUCHING: Peminta peranak pengarap Keristin Chapel Tamah Malihah deka diperunding, ku Kaunsilor Opis Kaunsil Bandar Padawan (MPP) Hillary Giang.

Ku iya, entara peminta sida ke deka dikenatai ngagai piak ke bekuasa iya nya minta opis kaunsil ngaga penutup parit besai kena nyaga pengelikun anak mit ke suah bemain maya sembiang, ngaga pengadang tanah ba belakang rumah gerija ngambika tanah enda mudah tusur enggau ngaga paking kerita besai ke agi sereta dibelakin.

"Aku besemaya deka ngenataika peminta kita nya ngagai piak ke bekuasa agi ngambika diperunding enggau silik.

"Pia mega, aku pechaya MPP semampai mandangka komitmen kelebih agi bekaul enggau pengelikun mensia mayuh. Kitai sama besampi ngambika peminta kita ulih diperunding," ku iya seraya madah kerejasama rapat antara raban gerija enggau opis kaunsil patut dikemeran sereta dikemeratka agi.

Iya bejaku munyi nya ba Pengerami Mantar Krismas 2013 nyerumba enggau 'Program Children Chrismas Party' ke diatur ba mua laman Chapel Anglika Taman Malihah, ditu, kena Hari Minggu tu tadi.

Berebak enggau nya mega, iya ngelalau kaban komiti chapel tau ngenataika peminta agih belanja ngagai perintah.

"Ba taun tu aja, perintah udah ngagihka belanja urung RM6 juta ngagai peranak megai pengarap Keristin Anglika di serata Malaysia," ku iya.

Dulu agi ari nya, ba jaku Chairman (Priest In-Charge) chapel Revd. Ronnie W. Caniddy madah, sida mega merambu Chapel Taman Malihah deka nyadi seiti Parish jemah.

Berindik ari nya, iya minta perintah nengah MPP ngungkupka tanah ba belakang rumah sembiang diberi ngagai chapel sida.

"Aku arapka MPP ulih meri tanah ba belakang chapel nya diberi ngagai kitai ngambika nyamai agi endur ngatur sebarang aktiviti ke besai tauka ulih dikena nangkir chapel ngambika besai agi," ku iya.

Sama bisi datai ba pengerami nya, Chairman Chapel Taman Malihah Thomas Kana, layleader Julius Janting enggau raban chapel ke bukai.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

RM4m udah dipelanja 1MSAC: Joseph Salang

Posted: 17 Dec 2013 08:12 AM PST

by Judan Bungap. Posted on December 18, 2013, Wednesday

JULAU: Urung RM4 miliun udah dipelanja Kaunsil Penyanding Penemu 1Malaysia Sarawak (1MSAC) ngatur 28 bengkah projek pemansang rama berengkah bulan Jun tu tadi lalu disadang deka tembu magang ujung taun tu.

Chairman 1MSAC Datuk Joseph Salang Gandum madah, projek ke diatur ari baruh program rama iM Sarawak tu mungkur menua Julau, Limbang, Mas Gading enggau Miri kelimpah menua pesisir di Lusong Laku di Belaga enggau Long San di Marudi.

"Projek tu nyengkaum projek bekal ai, kuasa karan, bantu barang pemakai, pemansang pengelandik enggau projek betanam betupi, pelajar, lumba enggau main sereta projek nyeruri rumah lalu deka mai penguntung ngagai lebih 30,000 iku rayat ba menua pesisir Sarawak.

"Program pemansang rama tu diatur begulai enggau Yayasan Rayat 1Malaysia (YR1M) enggau Yayasan 1MDB (1Malaysia Development Berhad) ti digelar kitai Program iM Sarawak," ku iya.

Iya mantai penerang tu maya berandau enggau pengarang berita sepenembu bejadika Projek Bekal Ai Beresi enggau bejadika iM Sarawak di Sekolah Kebangsaan (SK) Nanga Meluan ditu, kemari.

Sama bisi datai ngulu pengerami tu iya nya bala Komiti Besai 1MSAC baka Hasbi Habibollah ti mega Kaban Parlimen Limbang, Nogeh Gumbek ke mega Kaban Parlimen Mas Gading, Datuk Billy Abit Joo, Ir Irwan Zulkarnain Muhammad Hasbie, Pemesai Kajibumi, Opis Mineral enggau Geosains Sarawak Sulong Enjop, Kepala Pengajar SK Nanga Meluan Thomas Legak enggau Chairman Gerempung Apai Indai enggau Pengajar (PIBG) SK Nanga Meluan Nabau Laja.

Ngenang projek nanam padi ba Lusong Laku, ku Salang, naka ke diatu 133 ruang bilik ke nerima projek nya benung besaup nasau 50 hektar pemesai tanah.

"Projek tu diungkup ngagai raban bansa Penan lalu kitai semina meri bantu belanja aja tang meresi tanah enggau nanam tepulai ngagai sida empu," ku iya sambil madahka rayat menua nya berasai temegah ati nerima bantu nya.

Salang madah, tiap bengkah projek ke diatur kunsil sida dikereja begulai rayat ke nerima projek nya empu.

"Kami semina meri bantu belanja aja lalu projek nya ditembuka rayat empu kelimpah bisi kerejasama ari ijinsi perintah ke bukai.

"Ijinsi perintah tu nyengkaum Opis Pelajar Nengeri Sarawak, Opis Mineral enggau Geosains Sarawak, Opis Menteri Pemansang Betanam Betupi kelimpah opis ke bekaul ke bukai," ku iya.

Dulu agi ari nya, Salang maya bejaku ba mua bala mayuh madahka iya temegah ati enggau ulah apai indai ulih besaup nembuka projek bekal ai sekula nya.

Ku iya, projek nya dipenyadika begulai enggau Opis Mineral enggau Geosains Sarawak kelimpah bala apai indai nembiak sekula nya empu.

"Sebedau tu, kitai bisi dipadahka, bala pengajar enggau nembiak napi penanggul senentang bekal ai ke nyadi urung tiga kali seminggu.

"Nya alai, nengah projek bekal ai beresi ari baruh program iM Sarawak tu, kitai ngarapka penanggul tu enda nyadi agi lalu bala nembiak enggau pengajar ulih ngemeratka agi pekara pelajar," ku iya madahka baru.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Pastor: Berita ke nyebut polis ngansak tambai ti ngundan leka jaku ‘Allah Ta’ala’ diturun, enda amat

Posted: 17 Dec 2013 08:12 AM PST

KUCHING: Gempuru Besai Keristian Jaku Iban (GBKJI) kilah ensana madah, berita ke nyebut polis bisi ngansak raban gempuru nya nurunka tambai ke ngundan leka jaku 'Allah Ta'ala' kena hari Lima tu tadi, sebengkah cherita ke enda amat.

Polis semina ngasuh sida mindahka tambai nya ke belakang ari tempat asal ke alai tiang menira enggau jalai tama ngagai BCCK, ku chairman GBKI Pastor Greman Ujang (gambar).

Reti nya tambai nya bedau ba luar pusat nya lalu agi bisi dipeda orang mayuh ari jauh, ku saut iya lebuh ditanya pasal riput ba portal ke madah, tambai nya enda diasuh digitang ba laman BCCK, ku iya.

Greman madah, komiti pengatur nurut pinta piak bekuasa laban sida enggaika pekara nya nyadi penyarut. Sida ngatur gempuru ke diatur ninting taun lalu urung 6,000 iku raban keristin bisi ngulu gempuru tiga hari nya ke berengkah Hari Empat tu tadi, tambah iya.

Pengari ari mayuh bengkah gerija keristin enggau bansa asal di Sarawak bisi ngulu gempuru besai nya.

Greman madah: "Kami udah ngatur gempuru baka tu kena Hari Lima nyin kemari ba BCCK kenyau 16 taun ke udah lalu bedau kala salah penemu enggau polis tauka piak bekuasa. Hari Lima tu tadi, kami senurut enggau pinta piak bekuasa laban enggaika utai nya nyadi penyarut lebih agi bebasaka sekeda bakih kitai ke datai ari menua tasik ngulu gempuru besai nya."

Tang taja pia penemu Greman ba pekara nya enda dipesetujuka sekeda raban orang Keristin.

Berita ba portal nyebut Patrick Sibat, sekretari gempuru besai bala pengatur chukup malu lalu tekenyit meda atur ke dipejalaika polis.

"Orang ke datai tekenyit. Kami malu. Malu besai kami lebuh pemerati raban Keristin ari Australia, New Zealand, Solomon Islands, India, Mongolia enggau Taiwan bela meda enggau mua mata sida empu," ku Patrick.

Artikel nya mega madah, polis ngasuh sida nurunka tambai ari perintah 'orang atas'.

"Pekara nya enda manah lalu mai penerang ke salah ngagai orang ke datai ari menua tasik, lebih agi kitai suah nyebut nadai besekat megai pengarap ke diserangkung dalam Sempekat 18 poin Malaysia," ku Patrick.

"Ba jari sepiak menteri besai ngemendarka kitai bisi pilih diri megai pengarap di Sarawak, lalu ba jari sepiak nya polis datai lalu ngasuh kami nurunka tambai laban leka jaku 'Allah'," tandu iya.

Kot Apil dalam bulan Oktober tu tadi meri pemutus leka jaku 'Allah' enda tau dikena kereban pengerembai Gereja Katholik, The Herald, laban 'Allah' ukai sebengkah pekara ke batang dalam pengarap Keristin lalu laban nguna leka jaku nya deka merasa bala orang Islam.

Atur nya udah ngemegauka bala keristin di Sarawak enggau Sabah, dataika Najib enggau sekeda tuai ari perintah besai meri jamin atur nya enda dikena di Sarawak enggau Sabah seraya kededua bengkah nengeri nya ke diuan tebal orang bepengarap Keristin ke nguna leka jaku 'Allah' nyebut Petara keristin ari kelia menya.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.