» »Unlabelled » ‘Skim Biasiswa Yayasan Warisan Perajurit’ dibuka BorneoPost Online | Borneo , Malaysia, Sarawak Daily News » Berita Iban - New 2 Borneo

05:14:00

‘Skim Biasiswa Yayasan Warisan Perajurit’ dibuka BorneoPost Online | Borneo , Malaysia, Sarawak Daily News » Berita Iban - New 2 Borneo

‘Skim Biasiswa Yayasan Warisan Perajurit’ dibuka

Posted: 22 Dec 2013 08:38 AM PST

KUCHING: Barang sapa tau minta 'Skim Biasiswa Yayasan Warisan Perajurit' ke benung dibuka ungkup anak ex-soldadu ke mujur dalam peresa 'Penilaian Menengah Rendah (PMR) 2013'.

Chairman Gerempung ex-Soldadu Malaysia (PBTM) pampang Sarawak, Spencer Birai (gambar) madah, pom peminta nya diatu tau diambi ari opis PBTM menua ba Lumur 208, Ringkat 1, MJC, Batu Kawah.

"Skim Biasiswa Yayasan Warisan Perajurit' diatu dibuka ungkup anak ex-soldadu ke udah mujur dalam peresa UPSR 2013 tu tadi.

"Orang ke minta sekulasip nya enda tau enda bisi 6A ke atas, lalu enda tau enda bisi 'A' dalam sabjek Bahasa Melayu," ku iya madah lebuh dikerandau Utusan Borneo kemari.

Iya madah pom ke udah chukup diisi enda tau enda disengkaum enggau salin kad pengelala, salin surat beranak nembiak nya, lumur akaun Bank Simpanan Nasional (BSN) tauka Affin Bank sereta salin pemutus peresa PMR enggau bup pinchin apai tauka indai ke udah di tetapka.

"Aku ngarapka sida soldadu ke udah pinchin lalu bisi anak ke udah mujur dalam PMR 2013 nganjung peminta anak sida enggau jampat.

"Sida ex-soldadu (apai tauka indai) ke deka nemu pasal pekara tu enggau silik agi, tau nanya ngagai pemesai kami, Entingang ba lumur 010-8350240, enggau jampat," ku iya.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Patut tauka enda kitai ngumbai tanah ai diri ‘nengeri seks’ ketegal pemayuh palan urut?

Posted: 22 Dec 2013 08:37 AM PST

KUCHING: Ukai ketegal mayuh palan refleksologi dibuka di nengeri tu ngujungka nengeri tu diberi juluk nama 'nengeri seks' tauka ari pemayuh penyadi penyakit berampit berindik ari pengawa beleman enda betagang.

Chairman Opis Kaunsil Bandaraya Kuching, Lo Khere Chiang madah, enda patut meri gelar madahka Kuching tu diatu mansang endar nyad 'nengeri seks', bepun ari pemayuh palan refleksologi.

"Rayat di Sarawak, lebih agi Malaysia ngembuan ulah ke manah lalu tegap dalam pengarap sida, baik nya Islam, Keristin, Hindu, Buddha sereta pengarap bukai.

"Nya alai, enda patut enti dipadah Kuching entara nengeri ke tebilang enggau pemanah rampa menua sereta rayat ke manah enggau temuai, nyadi nengeri ke majak mansang sereta digelar 'nengeri seks'," ku iya.

Lo madah munyi nya, lebuh dikerandau kemari, nimbal jaku Kaban Parlimen Stampin, Julian Tan ke mantaika penemu iya pasal pekara tu dalam Malaysiakini.

Lo nandu baru, di nengeri tu aja bisi urung 50 buah palan refleksologi ke bisi lisin dibuka di sitak pegai MPP, lalu ke semua palan tu sigi seruran dikemata belama, nitihka atur ke udah ditetapka.

Semua palan refleksologi tu diperesa pengabbis kurang setaun sekali, lalu enti ditemu bisi palan ke bisi betapi enggau sebarang penanggul, iya deka suah agi diperesa.

"Taja pia, endang bisi sekeda palan betapi enggau pengawa ke enda menuku, tang iya tau mega nyadi di sebarang endur. Baka ditu, agi ulih dikemataka laban kitai bisi undang-undang nagang pengawa nyundal.

"Tang pemerat iya, kitai ke besai tuai patut nyaga ulah diri, ngambika enda bebalut enggau pengawa ke enda menuku, lalu ngajar anak kitai ari sida iya nembiak, ngajar ulah ke menyana," ku iya.

Palan-palan refleksologi dibuka ke mensia mayuh kena sida iya beurut ketegal pengerai tauka belelak, udah sehari-hari kitai gawa.

Kelimpah ari nya, ba pekara permit muka palan refleksologi semina diberi ngagai orang ke amat-amat ditemu deka bejalaika pengawa tu tang nitihka atur ke udah ditetapka sereta nyendiaka servis ke patut tang ukai meransang pengawa ke enda menuku.

Ke diatu, MPP bedau kala nerima sebarang kompelin ke enda menuku di sitak pegai sida iya, lalu enti bisi ditemu salah, MPP deka mansik sereta meresa palan nya, lalu enti amat bisi pengawa salah nyadi, lisin palan refleksologi nya tau dibatak pulai baru.

Ba penemu, Datuk Bandar Opis Kaunsil Bandaraya Kuching Selatan (MBKS), Datuk James Chan enda lantang ati ninga jaku Tan ke madahka negeri Kuching nyadi 'nengeri seks'.

"Uji perati dulu enggau manah, enti Kuching bansa nya? Ba aku, barang sapa deka nemu enggau silik agi, pansik dulu sebedau mansutka jaku sida iya," ku iya.

Chan madah, semua palan refleksologi di sitak pegai MBKS, suah dipansik sereta diperesa ukai semina ulih MBKS aja tang opis kandang menua bukai.

"Pelaba aku, pengawa salah tauka enda menuku tau nyadi di sebarang nengeri. Enti kitai madahka tu enda tau, nya enda tau, kadang-kadang nengeri nya tau mati baka nya aja.

"Aku ngarapka nadai orang kala bejaika nengeri sida iya empu. Enti bisi penemu ke deka dibantai, padah ngagai aku tauka datuk bandar bukai tauka ngagai perintah. Anang sebarang utai sebut," ku Chan.

Iya madah, ruang bilik ke charut ukai ketegal ari palan refleksologi aja, tang tau mega bepun ari utai bukai.

"Peda ulah kitai empu dulu, kemanahka agi ulah kita, sayau ke nengeri kitai, anang nganu sereta bejaika nengeri kitai empu laban timbal kitai deka dikena nengeri bukai ke besemekih enggau kitai, lebih-lebih agi diatu menua kitai benung ka ngangkatka diri empu.

"Nya alai timbal munyi nya enda patut, sereta enda betul laban rikod kitai manah," ku iya.

Tang taja pia, ku Chan, pengawa ke enda menuku ukai semian besangkut paut enggau palan refleksologi.

"Enti kitai madah pasal orang ke datai ari menua bukai ke ngaga pengawa ke enda menuku, nya patut dipansik ejensi kandang menua ke bukai.

"Sigi amat seiku dua ke ngaga pengawa salah bansa nya, tang enti ditemu, lisin sida iya dikinsil," ku iya.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Raban Keristin benung kiruh bebeli barang

Posted: 22 Dec 2013 08:37 AM PST

by Jacqueline David. Posted on December 23, 2013, Monday

KUCHING: Beserimbai enggau pengawa ngerami Hari Krismas ti semina ting­gal dua hari aja agi, mensia mayuh ke nguan kandang mengeri tauka menua pesi­sir benung kiruh bebelika barang kena ngintu hari besai nya.

Nyauka tiap endur palan bebeli barang dedat laban mensia lalu baka nya mega enggau jalai alun, ari pagi ngagai malam, semampai penuh laban kerita.

Christina anak Apau, 29, ari Kapit madah taun tu, sida menyanak nyambut Hari Krismas di Kuching di rumah menyadi iya.

Maya dikerandau lebuh bebeli barang di sebuah pasaraya besai di mengeri tu, Christina madahka iya baru udah tembu bebelika baju dua iku anak iya.

Christina ke nyadi kerani di sebuah kompeni ngaga rumah di Kapit, ngarapka taun baru tu ila, mai mayuh agi pemujur ngagai sida sebilik.

"Beserimbai enggau Hari Krisms tu, aku ngarapka mayuh agi pemujur deka datai, lebih agi maya tu aku betubuh bisi. Diatu udah masuk tujuh bulan. Ku doktor madah, anak aku tu beserak," ku iya, ke gaga endar ninga berita manah nya.

Teresa Wilson, 40, ari Kuching, madahka Hari Krismas, hari begempuru enggau diri sebilik, lalu jarang endar di mengari bisi 'Rumah Terbuka', ku iya.

Lebuh dikerandau, Teresa ke gawa di sebuah ejensi Perintah, baru udah tembu bebelika barang ias kena rumah maya Hari Krismas, madahka Hari Krismas hari ke endang dikearap mai semua diri menyadi, apai indai, ipar, anak menyadi begempuru sereta bese­rumpu makai.

"Kami sigi jarang bisi 'Rumah Terbuka' laban Hari Krismas tu spesil ke diri sebi­lik aja," ku iya.

Ba seiku nembiak sekula, Trisha Jane, 15, bebansa Iban/Bidayuh madah, Hari Krismas, hari dikerinduka iya, laban maya nya, iya bepe­luang nulung apai indai iya bekemaska rumah, ngias pun Krismas, sereta bepeluang meli baju baru.

"Aku udah meli sepasang baju gaun, kena ngintu Hari Krismas, sereta kena nurun besembiang Hari Krismas. Taun tu, pengerami nya dis­ambut kami sebilik umbas iya, tang laban kami bisi 'Rumah Tebuka', ngarapka mayuh kaban belayan sereta bala pangan deka datai.

"Pelaba aku semina maya Krismas aja ulih betemu eng­gau kaban belayan laban enti hari bukai, semua orang gagau gawa," ku iya.

Sha Davidson, umur urung 30 taun, bansa Iban ari Baling­ian udah lama diau di Cullen, Scotland sereta bisi dua iku anak mit madahka, iya le­lengau amat lebuh hari besai, siti aja ke nadai di Scotland, ku Sha.

"Di Scotland, chara orang ditu nyambut Hari Krismas lain ari kitai. Laban adat sida ditu, Hari Krismas kena diri sebilik aja.

"Semina mentua, bala ipar enggau anak menyadi laki aku aja ke ngabang ngagai kami, lalu beserumpu makai. Udah nya, belelak aja di rumah meda orang main bol ba TV tauka bala nembiak bemain 'game'," ku Sha, ke ngenang rumah panjai sida di Baling­ian ninting taun Hari Krismas tetap rami laban, ukai semina beserumpu makai, tang nga­bang ngagai kaban belayan bukai.

Caroline Basford, 52, ari Saratok sama udah lama diau di Aberdeen, Scotland, tang tiap taun maya Gawai Dayak aja ke bisi pulai ke Sarawak tauka ke menua (Saratok).

"Utai ke ngerinduka ati maya Hari Krismas, lebuh be­belika 'present' ke diri sebilik sereta berapi malam sebedau Hari Krismas. Kami ditu, beserumpu makai tengahari aja Hari Krismas. Maya nya bisi (turkey) sereta pemakai Krismas bukai, kelimpah ari Wine enggau Champagne," ku Caroline ke nyendiaka semua pemakai nya kediri iya aja.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Bisi 2,000 raban keristin nedat bandar Kapit

Posted: 22 Dec 2013 08:35 AM PST

Pengawa bejalai bebala mayuh nya diatur begulai kena ngerami Hari Krismas taun tu

KAPIT: Sekretari Politik Kepala Menteri Sarawak, Wilson Nyabong udah bejadika Pengerami Hari Krismas 2013, ke diatur Gerempung Gerija Sarawak ngarika Sapit Menteri Pemansang Menua Pesisir enggau Pelilih Menua kena lemai Hari Lima minggu tu tadi.

Wilson Nyabong disempulang bala ketuai ari mayuh bengkah gerija nguluka lebih 2,000 iku raban keristin bejalai bebala mayuh ngelingi pasar Kapit ke tembu ba Dewan Suarah Kapit.

Program nya berengkah pukul 6:30 nyentuk ke pukul 11.00 malam dikerami enggau mayuh bengkah main baka caroling ari Pastor Simon Kong Chung Chee, koir ba pemun enggau pengujung program nya ari gerija Hock Ing Methodist, jaku pengelalu Father David Ho ari Gerija Katolik, sembiang pemuka program betuaika Pastor Yu Ming Puo, besembiang bebala mayuh diuluka Gerija Community Baptist, mantaika main betanda ari Gerija Ong, bacha injil ari Pastor Simon Kong, bacha Gospel ari Father David Ho, pesan Hari Krismas ari Pastor Bujang Enggik, nungkun dian penyerakup ari semua bala ketuai gerija sereta sembiang puji.

Rambai jaku program nya taun tu iya nya 'Gift of Love'.

Lebuh bejaku ba pengerami lemai nya, Wilson muji semua raban keristin ari gerempung gerija laban ke berakup ngulu sereta ngerami pengerami nya.

"Tu mih tanggam ke rat raban keristin ari baruh Tuhan Jesus. Taja pan kita datai ari gerija ke bebida, tang tuju kitai orang keristin endang sebaka magang, pechayaka Iya, besembiang sereta muji Tuhan," ku iya.

"Aku berasai lantang endar ati meda pemayuh orang datai ngulu program tu, lebih agi bala nembiak ti malutka diri enggau gerija. Bala nembiak patut malut diri ba pengawa ke baka tu ngambika sida ulih nyaup ngerembaika penyanyau enggau penyerakup ari Tuhan Jesus ngagai mensia mayuh. Enti bala nembiak regas ba pengawa di gerija, nya ulih nyaup ngenegapka disiplin enggau ulah sida ngambi ngenyauhka diri ari penusah rama," ku iya.

Berebak enggau nya, ba jaku pengelalu Father David Ho madahka pengereami Hari Krismas tu patut ngaga sereta ngelantangka ati semua laban raban Keristin udah diberi Tuhan Jesus penyanyau.

Raban Keristin mega enda patut ngintu Hari Krismas tu ari segi mandangka pengaya, pemakai enggau ai irup aja tang ngeringka semengat sida nengah chara besembiang.

Kitai ke nyadi orang Kristin, patut besembiang ngagai Tuhan, muji Jesus ngambika teulihka lalau enggau pengering ba semengat," ku iya.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Perintah bisi pelin besai ngemansangka menua pesisir: Abang Johari

Posted: 21 Dec 2013 02:30 PM PST

KUCHING: Perintah bisi pelin besai sereta panjai dikena ngemansangka kandang menua pesisir, nyengkaum nyendiaka perengkaguna sereta nyungkakka tikas sosio-ekonomi rayat.

Menteri Pengawa Berumah, Datuk Amar Abang Johari Tun Openg madah perintah bisi juluk ke tinggi deka mai ubah ke rayat enggau menua.

Iya arap bendar perintah ulih ngemansangka rayat enggau menua Sarawak beduduk ari nengeri tu ti mayuh pemesai ti bepengelandik enggau bepeneleba.

"Peluang Sarawak maju jemah ila amat besai laban kitai bisi pelin besai nyengkaum pengawa ngemansangka kandang menua pesisir lalu rayat pesisir deka sama ngasaika penguntung.

"Perintah enggau pemesai kitai bisi perambu timpuh panjai kena ngemansangka menua enggau mantu rayat, kitai amat untung laban bisi pemesai ti bepeneleba sereta bebendar deka mai transformasyen ke rayat.

"Peneleba tu nyadi penegap dikena ngemajuka kandang menua kitai," ku Abang Johari ti mega nyadi Menteri Dagang Temuai.

Pekara nya dipadahka Abang Johari ba pengerami nyuaka kunchi Rumah Mesra Rakyat (RMR) Sekim Palan Pengentap Pendiau Baru Bengoh (BRS) ti diatur ba Dewan Kampung Taba Sait, Sekim Palan Pengentap Pendiau Baru Bengoh ditu, kemari.

Ba pengerami nya iya nyuaka kunchi rumah ngagai 52 ruang bilik ari Kampung Taba Sait, Kampung Pain Bojong, Kampung Rejoi enggau Kampung Semban.

Nandu baru iya madahka, dikena ngenukuka pelin besai ngemansangka menua enggau rayat nyadi nyata perintah deka ketuai tauka pemesai ti ulih mai transformasyen.

"Kitai deka ke ketuai tauka pemesai ti bisi runding dunya, nya alai berengkah ari diatu kitai ngelatih rebak baru ngambika ulih nukar pemasai ke diatu jemah ila," ku iya.

Kelimpah ari nya lebuh ti ngenang industri dagang temuai Abang Johari madah, menua Kamboja enggau Myanmar deka belajarka chara ngemansangka industri dagang temuai ti dikemeranka di Sarawak.

Ku iya, BRS ti ditusun enggau manah sereta rampa menua ke manah dipeda ari langit ulih nyadika teladan ngagai dua bengkah menua nya.

Berindik ari nya perintah deka lebih chakah ngemansangka dagang temuai ti bepelasarka ekonomi.

"Menua Cambodia deka belajar chara ngemansangka Program Nyemilik enggau Sarawak, nya alai kitai ngasaika sekim pengentap pendiau baru tu (Bengoh) ulih nyadika chunto laban rumah digaga sereta ditusun sereta disikap enggau perengkaguna ti chukup," ku iya.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Peranak ke enggai pindah dilalau berunding panjai

Posted: 21 Dec 2013 02:29 PM PST

Ngambika sida sama ulih ngasaika penguntung ari atur pemansang ti disediaka perintah

KUCHING: Bisi 90 ruang bilik ti kena bungkur projek Tekat Ai Bengoh ke enggai pindah ngagai Sekim Pengentap Pendiau Baru Bengoh (BRS) dilalau berunding panjai ngambika sama ulih ngasaika penguntung ari atur pemansang ti disediaka perintah.

Pekara nya dibantaika Menteri Muda Pengerai Mensia Mayuh Datuk Dr. Jerip Susil dalam jaku pengelalu pengerami nyuaka kunchi Rumah Mesra Rakyat (RMR) Sekim Pengentap Pendiau Baru Bengoh ti diatur ba Dewan Kampung Taba Sait, Sekim Pengentap Pendiau Baru Bengoh ditu kemari.

Iya ngelalau raban nya ngambika enda mudah teparuk enggau panjuk jaku piak ti nadai tanggungpengawa ke semina deka ngemuntanka pemansang sereta bejai perintah.

Sekeda orang ti nguji malut runding ruang bilik nya (ti enggai pindah), sida patut berunding manah sereta ninjau baru tuju perintah, ku iya.

"Semua kereban tauka perengkaguna ti disediaka perintah (ba BRS) ulih ngangkatka pemanah tikas pengidup, jalai ti manah sereta semak enggau mengeri meri awak ngagai peranak ngiga peluang gawa di mengeri lalu tu ulih munaska penyeranta.

"Kitai (perintah) beterima kasih ngagai ruang bilik ti meri kerejasama lalu deka pindah ngagai endur tu sereta nyukung perintah ti bebendar ngangkatka tikas pengidup rayat.

"Nya alai, ngagai sida ke enggai pindah, aku ngarapka sida ulih ngubah runding sida deka pindah jemah ila laban tuju perintah deka meri pemanah. Anang mudah teparuk ngagai piak ti bisi juluk ngemuntanka pemansang dibai perintah.

"Munyi ti dipadahka ngagai aku bisi 21 ruang bilik ari Kampung Pain Bojong, 35 ruang bilik ( Kampung Taba Sait) enggau 34 ruang bilik ari Kampung Rejoi," ku iya ti nyadi Kaban Kunsil Nengeri (ADUN) Bengoh.

Ba pengerami nya, Menteri Pengawa Berumah Abang Johari Tun Openg mujur nyuaka kunchi rumah ngagai 52 ruang bilik.

Empat buah genturung pendiau ti kena bungkur projek nya nyengkaum Kampung Taba Sait (58 ruang bilik), Kampung Pain Bojong (47 ruang bilik), Kampung Rejoi (40 ruang bilik) enggau Kampung Semban (59 ruang bilik).

Bisi datai ngagai pengerami nya kemari, Residen Bagi Menua Kuching Abang Shamshudin Abang Seruji, Sekretari Mendam Opis Menteri Dagang Temuai Datu Ik Pahon enggau kebukai.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.