» »Unlabelled » Sebengkah cherita pasal pemerinsa seiku Kenyalang di Kem Piasau Miri BorneoPost Online | Borneo , Malaysia, Sarawak Daily News » Berita Iban - New 2 Borneo

05:04:00

Sebengkah cherita pasal pemerinsa seiku Kenyalang di Kem Piasau Miri BorneoPost Online | Borneo , Malaysia, Sarawak Daily News » Berita Iban - New 2 Borneo

Sebengkah cherita pasal pemerinsa seiku Kenyalang di Kem Piasau Miri

Posted: 29 Dec 2013 02:48 PM PST

by Chris Bishop. Posted on December 30, 2013, Monday

KUCHING: Pengudah Faridah mati ditangkap, Jimmy lalu enggai makai pengelama tiga hari bejurut sereta duduk dedegi di batang kayu besemak enggau endur penusah nyadi di Piasau Garden, Miri.

Jimmy bemunyi ngangauka Faridah siang enggau malam enda ngengetu lalu iya disadang mati ketegal beraika Faridah, sulu ke mega tawing ti udah enggau iya begulai kenyau ari taun 2004.

Tang, enda memukai, kangau Jimmy nya tadi didinga seiku agi burung kenyalang indu ti enda ditemu ari ni penatai.

Juliet datai ngerimbai, mujuk Jimmy ti majak agi nganti pemulai Faridah. Bemacham chara dikena Juliet ngumbuk Jimmy.

Nyau ke puas, Jimmy pan nerima penatai Juliet ba pengidup iya, nganti sulu lama (Faridah) ti udah ninggal ka iya ketegal ulah sekeda mensia ti enda mereti sereta bebasaka undang-undang.

Munyi nya meh pun cherita kitai ti deka ngelala ulah ke endar burung kenyalang ke nyadi simbol pemesai Negeri Sarawak.

Penusah tauka cherita nyadi kenaka 24 September 2013 urung jam 12:30 tengahari lalu udah nyadi siti berita besai ayan ba surat kabar kelimpah ti dititih enda kurang ari 2,000 iku kaban Facebook ti chukup sinu ngenang pekara ke udah nyadi.

Nitihka penerang Chairman Persatun Alam Malaysia (MNS) pampang Miri, Musa Musbah ba hari Faridah mati dibunuh, iya nerima kangau telefon madahka penusah nya.

Pengudah nerima kangau telefon, iya enggau lengkas nuju ngagai palan penusah nyadi lalu nanya sekeda orang ti bisi bejalai ba kem nya…nanya sapa bagi orang ke ngereja penyalah.

Orang ke ditanya Musa nunjukka tiga iku orang ke nyadi saspek ti mesit, nangkap lalu munuh Faridah.

"Aku mikir kededua Jimmy enggau Faridah bela ditangkap sehari nya. Tang Jimmy lepas ke alai Faridah nadai manah nasit, iya ukai semina dibunuh tang bangkai iya dibuai ke dalam tung uras.

"Pengudah nerima kangau telefon, aku enggau lengkas ngagai palan penusah nyadi lalu dua iku orang ke ditanya nunjukke aku tiga iku orang ti udah nangkap lalu munuh Faridah.

"Aku minta sida tiga ngelepas ka Faridah tang ketegal ti irauka pengelikun diri aku ngambi pemutus ngeriput pekara nya ngagai Sarawak Forestry Corporation (SFC) besereta riput polis.

"Pengudah berita pemati Faridah dipasukka ba Facebook, semua 2,000 iku kaban Facebook ringat lalu madahka kompeni tauka pengaji endur tiga iku nya kereja. Irauka ulah sida ditemu pengaji, bangkai Faridah dibuai ke dalam tung uras baka ke dipeda kitai ayan ba surat kabar enggau media elektronik,"ku Musa lebuh dikerandau ba Kem Piasau, Miri bedau lama tu tadi.

Berengkah ari penusah nya, Jimmy lalu duduk dedegi ba batang kayu besemak enggau endur penusah nyadi nganti pemulai sulu iya, Faridah.

"Kami bejaga ba baruh pun kayu endur Jimmy duduk dedegi, nyadang iya deka labuh lalu mati ketegal enda makai enggau ngirup ketegal beraika Faridah.

"Ba runding aku, penatai Juliet udah mantu nyelamat nyawa Jimmy," ku Musa.

Musa (seiku orang pinchin Shell) ke udah mantau pengidup burung kenyalang (Jimmy enggau Faridah) kenyau ari taun 2012 madah Juliet ke datai ngumbuk Jimmy, iya ke amat seiku burung kenyalang ti dulu agi diberi nama Utet.

Maya nya, ku Musa, dua iku burung kenyalang datai ninga kangau Jimmy, iya nya Juliet (Utet) enggau Alice (Nong).

"Aku mikir Juliet enggau Alice nya Utet enggau Nong, dua iku burung kenyalang purih kelapan Jimmy enggau Faridah di Kem Piasau tu. Nong bisi malu mimit lalu aku nyangka Juliet nya Utet," ku iya.

Pengudah pemati Faridah, Juliet datai nyelamat Jimmy ke alai pengudah sebulan begulai seduai dipeda enggai jauh ari pangan diri lalu disadang deka betelu enda lama agi, tandu Musa.

Nerangka ulah burung kenyalang, Musa madahka bansa burung tu ngembuan ulah ti siruka pangan diri lalu deka nitihka pangan diri mati enti seiku udah dulu mati.

Ku iya, kenyalang (Jimmy enggau Faridah) suah dipeda besapi pemakai enggau pangan diri lalu ngembuan mayuh chara bebuti merindang pangan diri.

Iya netapka Kenyalang (ba Kem Piasau) sebengkah burung ke chukup jinak lalu nya entara sekeda kebuah purih Jimmy enggau Faridah ke dulu udah enda temu penunga agi.

Pemati Faridah udah muka runding sereta ngajar kitai semua ke alai perintah balat ngemerat pengawa ngintu pemaik sereta pengelikun burung tauka jelu ke enda tau dibunuh, sebarang penyalah ke ngelanggar undang-undang ti ditetap deka diukum setipak.

Diatu bangkai Faridah udah diawet sereta dipansik DNA ba Muzium Sarawak lalu deka dibai pulai ngagai Miri ngambika tau dipandang nggai mensia mayuh di Taman Kenyalang di Kem Piasau Miri.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Ulah bebunuh sereta bejualka dagin jelu siga majak dipejalai taja pan nemu pemerat ukum

Posted: 29 Dec 2013 02:45 PM PST

KUCHING: Baka ke ditemu mensia mayuh, jelu siga ke ditagang dikachau ari baruh undang-undang enda patut ditupi tauka dijual. Taja pia, agi bisi restoren nyual tauka manduk dagin jelu siga nya.

Manyuh restoren sepemanjai jalai Kuching-Serian  bisi nyual tauka nyumai dagin jelu siga baka dagin lelabi, babi babas, pama enggau semawa.

Ba pasar Bau enggau Lundu pan bisi nyual sereta manduk dagin jelu babas nya taja pan sida nadai mantaika nya ba lis bansa pemakai ke bisi dijual.

Taja pan ke bendar dagin jelu tu enda tau dijual, tang sida belalai nyual tauka maya jam raban penerit adat udah tembu gawa. Kelimpah ari nya, bisi sekeda restoren semina nyual dagin jelu babas tu ngagai orang ke dikelala sida aja.

Kelimpah ari orang ti ngempu restoren, mensia mayuh di menua pesisir ba sekeda Bagi menua Sarawak, kelebih agi maya bejualka dagin jelu siga nya ba tamu, sida belalai ari ke dipeda Pemesai Opis Kampung Sarawak (FDS) enggau Opis Kampung Sarawak (SFC).

Tebal agi, palan ke suah endur bejualka dagin jelu tu ba pasar ke enda jauh ari garis entara menua baka Serian enggau Serikin.

Kelimpah ari dagin jelu siga tu dijual ba pasar mit baka di Kapit, Song enggau Selangau ke semak enggau pemansut jelu siga, pia ku Operasyen menijir SFC Mohamad Jirin Anis  madah ngagai the sundaypost.

Lebuh bejalaika pengawa neritka adat, pemar ke ditapi sida iya nya timpuh bala raban penerit adat tu ngenataika diri ngagai palan endur bejualka dagin jelu siga nya, laban lebuh sida datai dia, udah ninggalka palan nya, pia ku.

Pekara ke baka tu udah nyadi kenyau ari Ordinan Nyaga Jelu Siga diperambu dalam taun 1998 sereta diteritka dalam taun 1990.

Peranak menua Sarawak enda ulih ngetu makai dagin jelu siga. Taja pan bisi sekeda bagi enggau bansa jelu siga tu dijual enggau rega ke mar, tang bala pemeli tetap deka meli laban sida arap endar ati sebagi ari perengka tubuh jelu sida nya tau nyadika ubat sereta manah pulaika pengerai.

Pengawa ngasu jelu sida tu mega udah nyadi sebagi ari chara pengidup peranak asal menua Sarawak.

Ketegal berundingka pengawa lama ti dipejalaika peranak asal menua tu, raban orang ke ngaga undang-undang ngemendarka jelu siga ke dijaga tang mengkang mayuh penyampau baka babi babas, tau diempa.

Enti nitihka Ordinan Nyaga Jelu  taun 1998 (diubah baru taun 2003) semina naka 5 kg aja dagin jelu siga tau dikembuan sesiku.

Barang sapa ke ditemu ngembuan ngelui ari 5 kg, raban bekuasa tau nganggap sida bisi ati deka nyual dagin jelu nya. Sesapa ke ditemu nyual tau diukum nyentuk ke RM5,000 lalu sesapa ke ditemu meli deka diukum nyentuk ke RM2,000 nengah Ordinan Trade Ban Section.

Ari baruh Ordinan nya mega, sesapa ke ditemu ngasu, nangkap, nyual, ditemu bisi ati deka nyual, import enggau ekport, ngempu tauka nupi sebarang jelu siga, nyimpan dagin tauka sarang nya endang salah.

Pemerat ukum ke deka ditinggangka ngagai sida bepanggai ba bansa jelu ke ditangkap tauka dibunuh. Penyampau ukum mata duit enggau pengelama dijil mega bepanggai ba bansa jelu ke ditangkap tauka dibunuh sida.

Bida entara jelu ke endang amat dijaga enggau semina dijaga, iya nya bansa jelu ke endang amat dijaga  nya udah majak punas tauka semina bisi ba sekeda endur aja tauka lama beranak sereta betambah.

Ukum ke ditinggang ngagai jelu ke amat dijaga nya besai agi ari jelu ke semina dijaga aja. Kelimpah ari nya lisin tau dikeluarka ngagai jelu ke semina diintu tang enda tau sesekali dikeluarka ngagai bansa jelu ke endang amat diintu.

Di Sarawak,ukum ke ditinggangka ngagai orang ti ditemu meli babi babas, lelabi, kijang enggau semawa nya sama pemerat. Taja pia, ukum nya diseliahka ari palan penupi jelu siga ke ngembuan lisin.

"Semua mensia mayuh patut begempung nagang sebarang pengawa nyual dagin jelu siga. Enti sema nadai peminta, tentu dagin jelu nya enda dijual."

Ba penemu Braken, ukum berat ti ditinggangka nya semina ulih dikena sementara aja. Semina nengah chara ngiri penemu aja ulih nyeliahka penanggul munuh tauka ngasu ke jual tauka ngulihka perengka tubuh jelu nya.

"Ba rebak apai aku kelia, lebuh sida meda jelu siga, ba mata sida meda nya pemakai. Ba rebak aku diatu, bisi kami meda ke pemakai lalu bisi sekeda nadai ngembuan runding nya. Arapka semina nengah ba rebak anak aku ila, sida jelu nya semina jelu aja, ukai ke pemakai." ku Braken.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

PPWS Pelilih Sri Aman udah mujur ngatur Hari Ruang Bilik

Posted: 29 Dec 2013 02:44 PM PST

SRI AMAN: Gerempung Orang Indu Sarawak (PPWS) Pelilih Sri Aman udah mujur ngatur Program Hari Ruang Bilik PPWS kandang menua Sri Aman di Stadium Mini Sri Aman empai lama ke udah.

Program nya berengkah tumu iya nya pukul 8.00 pagi. Pengerami nya bisi digulu urung 200 iku kaban PPWS ari serata Sri Aman kelimpah ari lima iku raban PPWS Kapit ke diketuaika Ma.

Chairman PPWS Kandang menua Sri Aman, Saidah Saibi lebuh ke dikerandau madahka, kelimpah nyadi aktiviti ninting taun lalu tuju ngatur program nya dikena ngempuru semua kaban PPWS di Sri Aman.

Ku iya, mayuh bengkah aktiviti ke ngait ati udah diselit ba batang program nyengkaum bansal bejual PPWS Pampang Kampung Hulu, Tanjung Engkabang, Kampung Hilir enggau Kampung Pangkat Stumbin.

Bisi diatur mega sepemanjai program nya senamrobik, sukaneka, 'poco-poco', ngerat pulut kuning, pekit nyura, karaoke sereta beperesa pengerai ke dipejalaika pengereja pengawa ari Opis Pengerai Pelilih Sri Aman.

Atur pengawa nutup program nya dipenyadika Pemantu Khas Kaban Parlimen Sri Aman Edmund Pirang.

Bisi datai Pemancha Mas Shamsiah Maslem, Penghulu Abdul Samad Abdul Rahim, Mandal Chairman PPWS Kandang menua Sri Aman Nur Khadijah Abdullah sereta bala kaban PPWS ke bukai.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.