» »Unlabelled » Brosur Pakej Homestay Rh Panjai udah dipenyadi BorneoPost Online | Borneo , Malaysia, Sarawak Daily News » Berita Iban - New 2 Borneo

05:26:00

Brosur Pakej Homestay Rh Panjai udah dipenyadi BorneoPost Online | Borneo , Malaysia, Sarawak Daily News » Berita Iban - New 2 Borneo

Brosur Pakej Homestay Rh Panjai udah dipenyadi

Posted: 02 Jan 2014 05:01 PM PST

by Rengenyan Labang. Posted on January 3, 2014, Friday

KUCHING: Brosur Pakej Homestay (Program Nyemilik) Rumah Panjai di Sarawak udah mujur dipenyadika kemari (ensana) nyerumba pengerami bejadika Taun Nemuai Ke Malaysia 2014 (VMY 2014) serata Malaysia, ti disadang ulih narit mayuh temuai ari menua tasik.

Brosur nya dipenyadika Menteri Muda Dagang Temuai Datuk Talip Zulpilip ti diatur Opis Menteri Dagang Temuai enggau Main Asal  Nengeri Sarawak (PKPKN Sarawak) di Padang Bilun Antarabansa Kuching (KIA).

Sepenyampau 13 Homestay Rumah Panjai di Sarawak udah dikelala sereta deka diberikelala ngagai temuai dalam enggau menua tasik.

Homestay Rumah Panjai nya dibagi ngagai kategori Iban, Bidayuh enggau Orang Ulu, ti ngembuan adat enggau main asal ti bebida.

"Produk ti dipenyadika kitai tadi (ensana) iya nya Pakej Homestay ti mungkur 13 rumah panjai ti nyerangkung rumah panjai Iban, Orang Ulu enggau Bidayuh.

"Bekaul enggau Homestay di Sarawak, kitai ngembuan macham genturung pendiau baka genturung pendiau orang berikan, rumah panjai enggau kebukai ti nadai ba menua bukai, tu disadang ulih narit mayuh agi temuai nemuai kitu," ku Talip dalam aum pengarang berita bejadika Brosur Pakej Homestay Rumah Panjai di Sarawak ditu kemari (ensana).

Brosur nya ditulis dalam jaku English, Bahasa  Melayu, Mandarin enggau jaku Jipun.

Pengawa bejadika Pakej Homestay nya sebengkah insiatif 'Visit My Kampong (VMK) – Transforming kampongs into centres of tourism to accelerate rural developmen' nengah National Blue Ocean Strategy (NBOS).

Pakej nya dikena ngenyakahka agi pemansang enggau pengerembai aktiviti dagang temuai sereta dikearapka ulih mantu ngemansangka genturung pendiau tauka rumah panjai nyadi palan penarit temuai ke ulih nyungkakka penatai pemisi.

Pakej nya  nengah kerejasama antara Komiti Dagang Temuai Malaysia enggau PKPKN Sarawak nyerumba Taun Nemuai Malaysia 2014 ngambika Homestay Rumah Panjai di Sarawak dikelala  sereta dikerembai ngagai serata menua.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Kompeni ngajar deriba dilalau ngembuan ulah integriti ke tinggi

Posted: 02 Jan 2014 04:56 PM PST

by Jacqueline David. Posted on January 3, 2014, Friday

KUCHING: Kompeni tauka Palan Ngajar Orang Deriba Kerita enggau Mutosikal dikearap ngembuan ulah integriti ke tinggi lalu ukai semina ngudahka aja pengawa ngajar orang deriba.

Menteri Muda Pemansang Nembiak (Mengeri) Datuk Abdul Karim Rahman Hamzah madah, palan ngajar orang deriba patut beratika orang ke diajar nya ukai semina landik mai kerita tauka mutosikal aja, tang landik dalam undang-undang jalai alun.

"Anang semina ngudahka utai aja, ketegal deka ngasuh orang nya 'pas' jampat tang sida enda nemu pasal undang-undang jalai alun," ku iya seraya madah bisi tetemuka sekeda palan ngajar kerita semina ngudahka pengawa sida laban deka pas jampat.

Karim madah, enti beratika kes bebadi jalai alun diatu, sida ke kena bebadi nya, mayuh agi nembiak ke berumur 17 taun ke atas.

"Amat, bebadi jalai alun tau nyadi ba barang maya enggau barang endur, tang utai ke ngirauka ati kitai, sida nembiak ke agi mekang-mekang umur ke deka nyadi ketuai kitai jemah ila, nya ke kena tinggang penusah.

"Sida ke nembiak tu patut diajar enggau silik pasal undang-undang jalai alun, ngambika sida iya ngemeratka pengelikun diri empu.

"Kitai ke bebaika kerita tauka mutosikal ukai semina patut bisi tanggungpengawa ba diri empu tang ba orang bukai mega ke sama nengah jalai alun nya," ku iya madah lebuh bejadika Palan Ngajar Orang Deriba Kerita enggau Mutosikal Kota Gading (IMKG) ba palan komersil MJC ditu, kemari (ensana).

Tandu Karim, orang ke ngajar deriba patut ngembuan tanggungpengawa ke besai beratika nembiak sida iya deka nyadi deriba ke bisi tanggungpengawa ba diri empu enggau orang bukai.

Naka kediatu, Palan Ngajar Orang Deriba Kerita enggau Mutosikal Kota Gading (IMKG) udah ngelatih urung 1,190 iku nembiak. Palan tu bisi ngajar orangn ngambi lisin kerita, lori enggau mutosikal.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Peranak rumah panjai ke kena ampuh bah nerima bantu

Posted: 02 Jan 2014 04:55 PM PST

SRI AMAN: Bisi 14 pintu Rumah Panjai Sungai Meranti, Maludam ke kena penusah ampuh bah sekumbang seminggu ke udah nerima bantu barang pemakai ari Kaban Kunsil Nengeri (ADUN) Lingga, Simoi Peri semak ditu, pagi kemari.

Simoi maya dikerandau madah, pemeri bantu barang pemakai ke diberi iya nya dikearap ulih ngelempungka tating penusah peranak rumah panjai tu ke nadai ulih meli barang ke diguna ninting hari ba Pasar Maludam.

"Piak kitai ngarapka bantu tu ulih diguna enggau naka alah seraya nganti bah ke nuntung rumah panjai sida surut," ku iya.

Berebak enggau nya, Simoi mega ngelalau peranak ke kena bungkur penusah ampuh bah nya liat ati seraya nganti bantu ari piak ke bekaul ti deka dianjung bererengat.

Sama bisi nyempulang iya, Ketuai Raban Indu Parti Pesaka Bumiputera Bersatu (PBB) Lingga, Khamisita Wasli sereta bala kaban PBB ke bukai.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Kualiti jalai di Sarawak bedau ngemuaska ati

Posted: 02 Jan 2014 04:54 PM PST

KUCHING: Kualiti jalai di menua tu bedau datai ba tikas ke tinggi sereta enda ngemuaska ati.

Menteri Muda Pengawa Berumah Datuk Abdul Karim Rahman Hamzah madah, gaya jalai ke enda manah nya kebuah kes bebadi jalai alun mayuh nyadi kelimpah ari gaya ulah orang ke bebaika kerita tauka mutosikal nya empu.

"Baka diatu, musin ujan ti enda nemu ngetu. Ketegal nya tau ngasuh jalai alun enda manah sereta enda tan lalu ngujungka iya belubang. Aku empu bejalai sebelah nengeri tu ngena kerita, meda penyai jalai alun kitai.

"Jalai ke belubang enda likun ditengah mutosikal. Kerita enda ngawa laban bisi empat tayar laban enti siti masuk dalam lubang, agi bisi tiga iti ba atas jalai tang enda sebaka enggau mutosikal laban enti tayar udah masuk ke dalam lubang, sida tau bebadi," ku iya bejaku lebuh bejadi Palan Ngajar Orang Deriba Kerita/Mutosikal Kota Gading (IMKG) ti mega bisi 'One Stop Centre', ba Palan Komersil MJC ditu, kemari.

Tandu Karim, perintah nengah Opis Penguasa Kandang Menua (PBT) patut beratika kualiti jalai laban diatu udah mayuh kerita enti dibandingka enggau suba.

Nya alai, iya madah PBT baka DBKU, MBKS sereta ijinsi bukai ke bisi besangkut paut enggau jalai enda patut nganti bebadi jalai alun nya dulu baru ka ngaduka baru.

"Tambah mega, maya musin ujan tu patut bisi orang ngaga jalai besedia enti bisi ditemu jalai belubang, lalu nampal jalai nya, baikka maya ujan tauka enda.

"Kebuah pia, laban enti jalai belubang nya tau ngasuh penguna bebadi kelebih agi ngagai sida ke bekenaka mutosikal. Aku seiku antara orang ke rindu ngena mutosikal, nya kebuah aku bangat irau ati," ku iya.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Bansa Dayak ditangkan ngemeratka pekara pelajar

Posted: 02 Jan 2014 04:52 PM PST

SIBU: Apai indai raban bansa Dayak ditangkan ngemeratka pekara pelajar anak diri ngambika tau ngasaika ubah pengidup ti meruan sereta menyana agi dudi hari ila.

Menteri Kunsil Kandang Menua enggau Pemansang Raban Bansa Dato Sri Wong Soon Koh madah, nadai pekara bukai ke pemadu beguna kelimpah ari pekara pelajar.

"Semina ari pemujur pelajar aja ulih ngubah pengidup diri empu, ruang bilik lalu nyungkakka bansa diri besemekih enggau orang ke lama udah dulu mansang," ku iya.

Iya mantaika jaku tangkan nya maya bejadika Pengerami Makai Lemai Gerempung Bansa Dayak Sarawak (SDNU) Pampang Sibu ba sebengkah restoran ditu, kilah ensana.

Pengerami makai lemai nya diatur nyerumba ngintu Hari Krismas enggau Taun Baru 2014.

Wong ti mega Menteri Wang II maya tu dipebasa nyuaka peransang pelajar ngagai anak raban SDNU Pampang Sibu ke udah nyulut ba pelajar.

Pengawa baka nya ku iya endang aruh diatur belama ngambika tau meri peransang ngagai nembiak sekula ngulihka pemandai.

"Aku ngarapka nembiak ke nerima peransang pelajar tu ulih belajar bebendar agi laban SDNU Sibu enggau naka alah nyukung sereta ngembing nembiak ngulihka pemujur.

"Nambahka nya aku besai endar pengandal ngagai kita (nembiak sekula) ulih nyadi orang ti beguna dudi hari ila," ku iya.

Berebak enggau nya, Wong ngarapka taun baru tu ulih mai tuah, pengelantang enggau penyenang ngagai rayat menua tu.

"Aku ngarapka kitai ulih nyingkang ke mua lalu meras agi meransang diri ari taun ke udah-udah," ku tandu iya.

Maya pengerami lemai nya, Wong bisi nyuaka geran RM10,000 dikena nyaup SDNU Pampang Sibu bejalaika program gerempung.

Pengerami tu mega bela bisi digulu Sekretari Politik Kepala Menteri Andrew Shiling, Pemancha Stanley Geramong enggau Chairman SDNU Pampang Sibu Tengku Gruna.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

BMS ngeluarka bup bacha dalam jaku Iban

Posted: 02 Jan 2014 04:49 PM PST

by Judan Bungap. Posted on January 3, 2014, Friday

SIBU: Borneo Media Solutions (BMS) anak kompeni Pegari Iban Production (PIP) diatu benung ngeluarka bup bacha dalam jaku Iban.

Kenyau ari ditengkebang belabuh bulan Jun 2013, BMS udah mujur ngeluarka tujuh bengkah bup bacha iya nya lima iti novel Iban lalu dua iti Gempung Ensera Nembiak.

Tuai Besai BMS Johnny Chuat maya dikerandau pengarang berita kemari madah, tuju BMS enggau PIP endang sama, iya nya ngemeratka pengawa ngeluarka bup bacha dalam jaku Iban.

"PIP tetap baka selama, ngeluarka majalah Pegari, majalah Senawah enggau bup-bup malin (Reference books) ke dikena bala nembiak ba UPSI, maktab-maktab enggau sekula-sekula perintah," ku iya.

Iya madah, naka ke diatu, BMS udah bisi ngeluarka novel 'Terutu Jemu Ambun Lemai', 'Puntan Pengerindu', 'Ai Ditetak Enda Putus', 'Kenang Pengerindu Tua' enggau 'Tekelambang Singkang'.

"Dua iti bup Gempung Ensera Nembiak iya nya Tusun 1 enggau Tusun 2 nya endang ensera-ensera nembiak Iban ti seruran ditusi sida ke tuai ari kelia baka ensera Jelu Nubai, Pelanduk seduai Tekura enggau mayuh agi.

"Bup tu chukup manah dibacha nembiak selampur umur nyengkaum kitai besai tuai mega dikena mulaika pengingat.

"Nambahka nya, bup ensera nya bisi diselitka gambar-gambar ilustrasyen," ku iya sambil madahka bup tu bisi lapan iti tusun nangka ke diatu lalu tusun ketiga ngagai tusun kelapan deka dichelak enggau bererenggat.

Johnny madah, bup ke digaga ari baruh BMS tu asil karang ari penulis tebilang baka Jantan Umbat, Janang Ensiring, Pengajar Caroline Asing ari Sg. Sut, Kapit, Pengajar Richard Anak Changgan ari Julau enggau Howard Jilan ari Kuching.

Berebak enggau tu mega, ku Johnny, iya ngarapka mayuh agi kelebih agi bansa Iban rindu macha lalu besaup ngetanka jaku Iban enggaika retai ditelan jeman laban kediatu, bala nembiak kemayuh agi endang kurang nemu bejaku ngena jaku Iban baka nembiak-nembiak rumah panjai jeman kelia.

Bala mayuh ke bisi ati deka meli bup dikeluarka BMS tu tau ngelawa www: borneomedia2u.com tauka telefon ngagai lumur 013 575 5769.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.