» »Unlabelled » Mensia seruran dekaka pemanah servis: Moshidi BorneoPost Online | Borneo , Malaysia, Sarawak Daily News » Berita Iban - New 2 Borneo

05:44:00

Mensia seruran dekaka pemanah servis: Moshidi BorneoPost Online | Borneo , Malaysia, Sarawak Daily News » Berita Iban - New 2 Borneo

Mensia seruran dekaka pemanah servis: Moshidi

Posted: 04 Dec 2013 01:41 PM PST

by Jacqueline David. Posted on December 5, 2013, Thursday

Perintah nemu peneka rayat, bepun ari nya, atur ngemanahka pengawa endang dikemerat belama

KUCHING: Rayat seruran ngarapka mayuh bantu ba penyikap ke dikemerat ari opis perintah.

Sekretari Perintah Menua, Tan Sri Datuk Amar Morshidi Ghani madah rayat diatu, pengudah nyepi penyamai sereta pemuntang ba sesebengkah renggat, sida ngarapka pengelui ari peneka ba renggat bukai.

"Pengudah ngasaika penyamai sereta pemuntang ba sebengkah renggat dia peminta tauka peneka mensia majak ngelui ari ke udah.

"Tang ukai suah ulih dikemuntang, perintah mega bepanggai ba pemisi tauka pematut. Ni bagi ke patut dikenulu nya mih diatur dulu lalu iya ke tau dikelaun nya dikenudi…Nya entara sekeda penanggul ke ditapi kami," ku Morshidi.

Iya mansut penemu munyi tu lebuh ngerandau pemberita beserimbai enggau 'Hari Perkhidmatan Awam' 2013 ti deka diatur kena 10 Disember 2013 tu ila.

Taja pia iya madah, atur ke dipejalaika opis perintah nyadi progresif agi ari sukut atur lalu beratika ni bagi ke patut dikemerat nya dikereja dulu, lebih agi pampang ke mai pemansang ekonomi, nya ke balat agi dikemerat.

"Enti ba sebengkah endur nya pemansang ekonomi dia manah, lalu ulih nambah penatai pemisi rayat, dia sitak nya deka dikenulu," ku iya.

Iya nandu, ba atur pengawa opis perintah, iya ke balat ditapi ba renggat tinggi iya nya dalam semua atur pemansang.

"Kitai mesti ngenajamka pengelandik pengereja pengawa, penemu sida ngatur pengawa, bakani perintah ulih ngemanahka proses kereja sereta servis opis perintah," ku iya.

Diatu pan ku Morshidi, ba sekeda pampang opis perintah udah mayuh berubah, lalu ukai semina naka nya aja laban pemanah baka tu deka terus dikemerat.

"Sekeda ari servis ke dikembuan opis perintah ulih dilawa sereta ditanya nengah 'online'.

"Ba sekeda sitak menua ke udah disambung jalai bisi disediaka opis mit perintah kena mantu mensia mayuh ba sitak nya," ku iya.

Kelimpah ari nya, servis ke dikemeranka Opis Pengerejister Bansa (JPN) tauka imigresyen udah jauh manah ari ke suba.

Maya meri penerang, Sekretari Perintah Besai pampang Sarawak, Datu Yahaya Basimin madah naka ke diatu, sebana ke diterima ba opis perintah seruran dikemanah.

"Kami seruran ngemanahka servis kaunter kami, ukai semina nengah 'online' aja tang servis kaunter udah jauh berubah.

"Ambika chunto, diatu pengawa ngaga passport tembu sehari, tambah mega opis imigresyen bisi dibuka Hari Enam enggau Minggu.

'Udah mimit sebana, timpuh ngereja pengawa pan ditambah…Pelaba aku penyampau pengawa ke diatur Imigresyen udah chukup manah. Enda patut bisi kompelin laban kami ngemanahka pengawa," ku iya.

Morshidi nambah, 'Telekhidmat' mega Bbisi disedia tang enda mayuh orang bekenaka perengka nya taja pan servis nya berengkah ba taun 1996.

Telekhidmat, palan endur mensia mantaika penanggul tauka kompelin ke deka dipadah ngagai perintah.

"Mensia mayuh tau betelefon ngagai 555999 lumur 'Telekhidmat' tauka dilawa nengah 'online' e-telekhidmat. Kami ngena sistem tu beratika rayat ulih mantu kami madahka penanggul ke ditapi sida baka pasal jalai, parit, pun kayu ke labuh, ukui sereta utai bukai.

"Ari Telekhidmat tu, kami bisi sistem endur ngulihka timbal tu lalu diberi ngagai ijinsi ke ngempu tanggungpengawa nya. Tang enti penanggul nya enda dikemetulka ijinsi nya, kami deka nanya sereta minta penerang, nama kebuah," ku Morshidi.

Di Sarawak diatu, penyampau pengereja pengawa ba Opis Perintah (Menua) bisi dalam 23,000 (Opis Kampung, Tanah enggau Survei, Kereja, Ai, Opis Kandang Menua (PBT), Opis Betanam Betupi, SEDC sereta sekeda opis bukai) lalu pemayuh sida ke gawa ba Opis Perintah Besai (pampang Sarawak) bisi dalam 100,000 ke mungkur polis, soldadu, opis pelajar, opis pegerai, JPN, Imigresyen enggau sekeda opis bukai.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Muzium baru deka berengkah digaga taun dudi

Posted: 04 Dec 2013 01:39 PM PST

KUCHING: Projek ngaga muzium baru ti bepalan ba Dewan Tun Abdul Razak enggau palan ngengkah entukar ba muzium ke diatu deka berengkah dipejalaika taun baru.

Taja pia, Direktor Muzium Sarawak, Ipoi Datan lebuh ngenang pekara nya enda madahka timpuh ke bendar projek nya deka berengkah dipejalaika.

"Projek ngaga muzium baru deka dipejalaika taun baru. Diatu consultants benung ngaga langkar ke penudi lalu enti udah dikemendarka dia timpuh bejalaika projek deka ditetapka.

"Renggat keterubah projek iya nya pengawa nampung annex baru muzium ti endur nyimpan semua koleksi sereta endur pemansik, deka berengkah taun baru sereta dipelaba tembu dalam timpuh dua taun.

"Renggat kedua projek berengkah dipejalaika pengudah renggat keterubah, ti nyengkaum Dewan Tun Abdul Razak, ngaga opis, palan pemandang sereta ke bukai ke dipelaba berengkah digaga dua tauka tiga taun ari diatu sereta dijangka ulih tembu kandang taun 2018 tauka 2019," ku iya.

Ipoi dikerandau pengarang berita bekaul pekara nya, pengudah bejadika Pameran Seni Halus ti diatur ba Muzium Seni ditu kemari.

Nitih penerang iya ungkus belanja dikena bejalaika projek nya urung RM300 milliun.

Iya madah, projek nya benung dalam pengawa ngelangkar sereta deka dikerandau ba aum enggau raban consultants.

"Minggu baru kami bisi baum enggau consultants ari dalam enggau luar menua nyengkaum Opis Kereja Raya (JKR) enggau ke bukai, udah nya baru ulih dikenuku," ku iya.

Perambu projek nya dipejalaika ngambika Kuching nyadi sebengkah Heritage City.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

SPDP mengkang parti ke tegap: Anyi

Posted: 04 Dec 2013 01:36 PM PST

MARUDI: Taja betapi enggau sebarang penanggul tang bala kaban Parti Progresif Demokratik Sarawak (SPDP) ditu mengkang ngemeranka ulah beserakup enggau raban gempung Barisan Nasional (BN) ke bukai.

Tu nyengenda bendar dipeda ba atur pengerami makai malam nyambut Hari Krismas ke diatur Serakup Indu SPDP ditu ke nerima timbal ke manah diumba enggau semengat penyerakup dibantaika kaban parti enggau temuai bukai.

Ku Kaban Parlimen Baram Anyi Ngau, pengerami makai malam nya ukai semina mandangka ulah bebasaka pangan diri, penyiru enggau minta ampun dalam semengat Krismas tang nya mega nanggamka agi kaul enggau kerejasama antara kaban dalam parti enggau temuai ke datai ari parti-parti kompenan BN ke bukai.

"Kitai di dalam SPDP,nyau nyadi seiti ruang bilik ke besai lalu tu ulih dipeda malam tu, kitai ulih begulai ukai semina bansa Iban, Kenyah sereta Orang Ulu, Melayu enggau China, tang mega bansa Penan," ku Anyi seraya madah nya seiti ari chunto penyerakup dalam SPDP.

Anyi madah munyi nya maya bejaku bejadika pengerami makai malam Mantar Hari Krismas 2013 ke diatur Serakup Indu SPDP Marudi enggau Telang Usan, ba Dewan Suarah Baram kena malam hari Minggu tu tadi.

Anyi bejaku ngarika Presiden SPDP ke mega Menteri Pemansang Rama Tan Sri William Mawan Ikom.

Lebih 1,000 iku kaban enggau penyukung SPDP ke bisi ngulu pengerami nya dilalau bekaul enggau gaya politik ke ditapi parti-parti komponen BN, maya kediatu, sigi enchabar.

Ku iya, semua ketuai BN enggau parti-parti dalam BN  ngembuan tuju ke sama iya nya deka ngemansangka rayat iya di serata nengeri dikena nyungkakka tikas pengidup ngambika menyana agi enggau ngasaika pemansang ke manah agi.

"Berindik ari nya, tanggungpengawa kami ke nyadi ketuai deka nentuka pemansang ke diberi perintah dikenatai ngagai rayat nyengkaum di Marudi enggau Telang Usan, setipak enggau agenda BN iya nya deka mai rayat enggau menua tu maju manggai ba Wawasan 2020," ku iya.

"Pengawa kitai diatu iya nya deka ke pemansang ukai semina ungkup kitai empu, tang mega anak, uchu kitai jemah ila.

"Nya alai, kitai patut nyukung raban ketuai perintah besai enggau nengeri kena ngemujurka juluk tu," ku iya.

Tandu Anyi, ukai semina raban bansa patut meri sukung tang raban rebak baru mega aruh meri  kerejasama ngambika menua pesisir baka Baram, majak mansang.

"Juluk kitai dalam SPDP deka terus ngenegapka atur pemansang ba Baram, ukai semina begempung enggau parti politik BN ke bukai tang mega enggau ketuai sereta bala kaban BN ke bukai, kena ngerapatka kaul enggau kerejasama antara kitai semua.

"Juluk kitai dalam SPDP sama mega baka juluk dalam parti-parti politik BN ke bukai," tandu Anyi.

Kelimpah ari nya, ba pengerami makai malam nya, Anyi mega nerima lebih 500 peminta masuk nyadi kaban SPDP ari Ketuai Puteri SPDP Marudi, Josephine Duyuk Tuah.

Ba pengeerami nya mega bisi dipandangka enggau mayuh aktiviti baka belagu karaoke enggau Pekit Kumang SPDP Mantar Krismas 2013.

Gelar Kumang pekit nya pulai ngagai Jacqueline Gau ari Rumah Selat, Sungai Pasir.

Lumur dua, anak penakan Kenyah/Iban Ivony Lawai ari Long Banga lalu lumur tiga labuh ngagai Sophia Tijan Philip, nembiak indu bansa Kayan ari Long Na'ah.

Dua pemenang perais saguati iya nya Patricia Welma Nelson Munan enggau Nur Safikah Zainal.

Bisi datai ba pengerami nya, Sekretari Politik Kepala Menteri, Kijan Toybee, Chairman SPDP Pampang Marudi Alexander Asing John Sadai, Ketuai  Pemuda SPDP Robert Ayu, Putera SPDP Tonny Cheng, Ketuai Raban Indu SPDP Marudi ke lalu nyadi chairman pengatur pengerami Theresa Gelang enggau Pemesai Tadbir Marudi Rose Edward Tarang.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Projek hidro mikro meri penguntung ngagai empat kandang menua pesisir

Posted: 04 Dec 2013 01:36 PM PST

KOTA SAMARAHAN: Projek mikro-hidro ti dikemansangka Fakulti Kejuruteraan Universiti Malaysia Sarawak (UNIMAS) dipelaba deka meri penguntung ngagai peranak ba empat bengkah kandang menua pesisir nengeri tu.

Nitihku Timbalan Dekan (Pascasiswazah dan Penyelidikan) Fakulti Kejuruteraan Dr. Hushairi Zen (gambar), projek nya diatu dalam renggat pemansang dipejalaika Kumpulan Mikro-Hidro fakulti nya.

"Empat kandang endur menua pesisir ti dikemansangka nengah projek mikro-hidro tu iya nya Semulong Ulu, Sri Aman; Bukit Assum, Padawan; Nanga Sengaih, Julau enggau Bario.

"Projek mikri-hidro di Semulong nyau deka tembu lalu ke bukai benung ba renggat pemansik," ku iya lebuh dikerandau pengarang berita pengudah bejadika 'Majlis Perasmian Minggu Kejuruteraan' di UNIMAS, kemari.

Ku iya, piak sida bedau ulih netapka timpuh penembu projek pemansang nya laban bepanggai ba guna enggau logistik palan pemansang.

"Timpuh penembu projek ba empat kandang menua pesisir nya bedau ditentuka laban nya bepanggai ba logistik enggau guna palan pemansang.

"Kelimpah ari nya, kami patut ngajar sereta ngenegapka peranak ba kandang menua nya pasal sistem pemansang nya," ku iya.

Iya nerangka, mikro-hidro dikemansang ngambka ulih nyendiaka bekal elekterik ungkup lampu enggau kipas sereta ukai dikena aikon.

"Empat kandang menua pesisir ke dipilih bepelasarka peminta guna ba kuasa elekterik dikena nganti injin api.

"Nya (ngena injin api) ungkus besai sereta semina ulih mekal kuasa elekterik pengelama tiga ngagai empat jam aja.

"Kami ngarapka nengah sistem mikro-hidro ba kandang menua pesisir nya ulih ngurangka pemerat tating peranak sereta ulih mekal kuasa elekterik pengelama enam ngagai lapan jam sehari," ku iya.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Pekit main bol 9 sepiak 21 enggau 22 Dis

Posted: 04 Dec 2013 01:35 PM PST

SIBU: Tim main bol dipinta ngambi bagi ba pekit main bol 9 sepiak ke diatur Allygator Resources ba padang main bol di Jalai Lada Sibu kena 21 enggau 22 Disember tu.

Komiti Pengatur Allyson Linggo madah, pekit nya ngembuan tuju deka ngemansangka pengawa main bol ba sitak tu kelimpah ti nyadika menalan alai nempa kaul enggau pangan diri.

"Champian deka mai pulai perais mata duit, trupi, midul enggau baju main bol lalu penuduk lumur dua enggau tiga mai perais mata duit, trupi enggau midul," ku iya madah ngagai pengarang berita, kemari.

Komiti pengatur mega bisi nyendiaka perais sagu ati pemeri ari Clixster Mobile.

Pom enggau pekit tau diambi ba Elite Sibu Bhd. di No.5, Tkt 1, Lrg. Tunku Abdul Rahman 8B1 ditu.

Penerang silik tau ditanya ngagai Allyson 01122097788 tauka Fenny 01116734200.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Nembiak parai tepelanting ari mutosikal

Posted: 04 Dec 2013 01:35 PM PST

KUCHING: Seiku nembiak lelaki parai ketegal balat bakal ba kes bebadi jalai alun di simpang lampu trafik Jalai Batu Kawah dini hari kemari.

Nembiak ke parai nya, dikelala enggau nama, Macnykle Osman, 18, ari Jalai Biawak, Lundu.

Nitihka penerang, maya bebadi jalai alun nya nyadi, nembiak nya dipadah dalam pejalai pulai ngagai rumah kaban iya di Stampin lalu ngena mutosikal bansa Honda EX5 enggau petunggal iya urung pukul 1 pagi.

Tang taja pia, mutosikal ke dikena seduai iya belantak enggau kerita Perodua Kelisa lebuh datai ba simpang lampu trafik nya, lalu ngujungka seduai iya tepelanting ari mutosikal nya.

Laban kelalu balat tepangka, seiku ari nembiak nya (ke mai mutosikal) dipadah parai ba endur nya empu, tang petunggal iya semina bakal mimit aja.

Raban paramedik ari Sepital Besai Sarawak (HUS) datai ngagai palan penyadi.

Bangkai mansa dibai ngagai HUS ngambika dibuntastasat.

Nitihka penerang, mansa anak keempat ari lima iku diri menyadi diau begulai enggau aya iya sekumbang dua bulan ke udah.

Raban polis ari pampang Trafik Indu Opis Polis Pelilih (IPD) Kuching mega datai ngagai palan penyadi mansik bekaul enggau kes bebadi nya.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.