» »Unlabelled » Sarawak begunaka 230,000 iku pengereja pengawa bepengelandik BorneoPost Online | Borneo , Malaysia, Sarawak Daily News » Berita Iban - New 2 Borneo

05:14:00

Sarawak begunaka 230,000 iku pengereja pengawa bepengelandik BorneoPost Online | Borneo , Malaysia, Sarawak Daily News » Berita Iban - New 2 Borneo

Sarawak begunaka 230,000 iku pengereja pengawa bepengelandik

Posted: 03 Dec 2013 02:59 PM PST

by Rengenyan Labang. Posted on December 4, 2013, Wednesday

KUCHING: Sebengkah pansik mandangka Sarawak begunaka urung 230,000 iku pengereja pengawa bepengelandik ba taun 2015 dikena nangkup peminta guna industri besai dalam SCORE.

Sapit Menteri Pelajar 1, Datuk Mary Yap Kain Ching madah, beduduk ari pekara nya nembiak rebak baru diatu dipinta nyikap diri ngena pengelandik enggau penemu dalam bidang teknikal enggau vokesyenal dikena ngemansangka menua.

"Di Sarawak, pemayuh enrolmen dalam bidang teknikal enggau vokasyenal ti ditaga perintah besai ungkup Sarawak iya nya 200 persin (%) tauka 68,000 iku nembiak ba taun 2015 dipelabaka bedau tetangkupka peminta guna industri besai SCORE.

"Kebuah pia, laban pemayuh pemeranak puku dalam industri lebuh manggai taun 2015 begunaka mayuh pengereja pengawa bepengelandik tinggi iya nya nambah ari 23 persin ngagai 37 persin.

"Sebengkah pansik mandangka pengereja pengawa bepengelandik ti diguna di Sarawak ba taun 2015 ulih manggai 230,000 iku. Nya alai raban graduate patut ngambi inisiatif nyikap diri ngena penemu enggau pengelandik awakka ulih ngerebut peluang gawa ti bisi disediaka," ku iya.

Yap madahka pekara nya lebuh bejaku ba Majlis Konvokesyen Ke-16 Pusat Pemabangunan Kemahiran Sarawak (PPKS) enggau Kolej Teknologi Lanjutan Antarabangsa sarawak (i-CATS) ti diatur ba Dewan Inti College Sarawak ditu pagi kemari.

Bejaku baru iya madah, perintah ngarapka mayuh agi institusi di menua kelebih agi di nengeri tu nempa mayuh agi graduate ti bepenemu enggau pengelandik dalam bidang teknikal enggau vokesyenal.

Udah nyadi juluk perintah deka ngangkatka pelajar teknikal enggau vokesyenal nyentuk ngagai tikas dunya, baka ti ditaga PPKS/i-CATS, ku iya.

Iya madahka perintah seruran ngenukuka sistem pelajar menua ulih meri asil ti manah ngambika ulih ngemansangka mudal mensia, sosial enggau ekonomi menua.

"Perintah amat begunaka institusi baka PPKS/I-CATS ulih betapi enggau pemar sereta ngemujurka polisi dalam Pelin Pemansang Pelajar ti nyadi pemun pemansang pelajar menua dalam timpuh 15 taun," ku iya.

Ngenang pengerami konvokesyen, Yap madahka nya nunjukka PPKS/i-CATS chakah ngemajuka bidang teknikal enggau vokesyenal sereta nempa mudal mensia betikas dunya.

"Aku arap bendar PPKS/i-CATS ulih nyadi institusi keterubah sereta tebilang nyendiaka pelajar teknikal di Sarawak, tu dikemegahka rayat Sarawak," ku iya.

Iya ngarapka semua piak sekalika pengereja pengawa akademik, institusi swasta, gerempung ukai dikuasa perintah ari dalam enggau menua tasik sama chakah nempa rayat Malaysia ti beintelek lebuh manggai taun 2020.

Sama bisi ngulu pengerami konvokesyen Ke-16 nya kemari, Chairman PPKS ti mega Presiden i-CATS Tan Sri Datuk Amar Abdul Aziz Husain; Direktor Eksekutif PPKS ti mega Ketua Pegawai Eksekutif i-CATS Datuk Baharudin Abdullah, Direktor Opis Pelajar Nengeri sarawak Datu Abdillah Adam enggau kebukai.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

SWP merambu numbuh mayuh agi pampang parti

Posted: 03 Dec 2013 02:58 PM PST

KUCHING: Sarawak Workers Party (SWP) merambu muka mayuh agi pampang parti nya ila.

Presiden parti Larry Sng (gambar) madah, Pampang SWP Padungan deka dipenyadi kena 10 Jan 2014 sereta ditangkan  Dudong, Meradong enggau Bukit Begunan.

Pampang Padungan betuaika sekretari besai parti Dr Ong Lark Sai. Kediatu, SWP udah numbuhka pampang iya ba Pelagus, Julau, Kanowit, Huju Rajang, Lubok Antu, Sri Aman enggau Selangau.

Sng madah, ketuai warden Opis Kampung Sarawak (SFC) ke suba Wilfred Landong udah dichiri megai pangku pengawa Tukang Wang ke baru.

Wilfred, ke masuk SWP sebedau Pengawa Bepilih Besai Ke-13 (PRU13) lalu bediri ba sitak Sri Aman, deka nyilih Jessie Sng ke badu agi mangku pengawa nya.

"Kami enggai meda parti semina dipegai sebuah ruang bilik aja. Nya alai, Jessie ningkilka diri ari mangku pengawa nya," ku Sng madah ngagai pemberita, pengudah tembu ngulu aum kaban suprem kaunsil parti, bedau lama ke udah.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Parti Rayat Sarawak mengkang nagih, ku Masing

Posted: 03 Dec 2013 02:57 PM PST

KUCHING: Parti Rayat Sarawak (PRS) semampai ngarapka penambah pangku pengawa menteri dalam kabinet perintah besai laban naka kediatu kuota bedau chukup enti bepelasarka penyampau penuduk parti ke menang maya Pengawa Bepilih Besai Ke-13 (PRU13) tu tadi.

Presiden parti Tan Sri Datuk Amar Dr James Jemut Masing madah mayuh kaban PRS ngenataika sebana ati diri senentang timbal diberi ngagai parti taja pan mujur menang semua enam penuduk ba PRU13 bedau lama ke udah.

"Penyampau dipadu ke dalam kabinet perintah besai enda setipak enggau pemujur parti. Kami menang enam penuduk, taja pia kami semina diungkupka seiku menteri penuh.

"Tang, parti bukai (Barisan Nasional) ke enda tentu mujur sida diungkupka penyampau ke sebaka. Berindik ari nya, kaban Suprem Kaunsil minta kami berandauka pekara nya enggau ketuai perintah besai ngambika dipebasa bepelasarka pemujur maya PRU13 suba," ku iya madah ngagai pemberita pengudah tembu ngulu aum kaban Suprem Kaunsil PRS ke diatur ba indu parti nya ba Jalai Pending, bedau lama ke udah.

PRS semina diungkupka seiku menteri penuh sereta seiku sapit menteri, lebuh kabinet ngerintaika nama menteri kabinet perintah besai 10 hari pengudah BN ngetanka kuasa merintah menua maya PRU13 ba bulan Mei. Sapit Presiden parti ke mega Kaban Parlimen (MP) Selangau Datuk Joseph Entulu Belaun diberi pangku pengawa Menteri ba Opis Menteri Besai.

Mandal Presiden parti ke mega MP Julau Datuk Joseph Salang, taja pia, enda nerima pangku pengawa nyadi Sapit Menteri Dagang Temuai lalu diatu dipadu nyadi chariman Penyanding Penemu Opis Kaunsil 1Malaysia Sarawak.

Bepelasarka riput media, mayuh ketuai PRS enggau kaban parti ngarapka parti diberi ambis nadai seiku da agi pangku pengawa menteri penuh nyerumba ubah ba tusun baru kabinet ila.

Ba pekara bukai, Masing ke mega Menteri Pemansang Tanah merambu atur nyiri Pemesai Khas JASA patut dikerandau ba raban parti BN sitak nya empu tauka ari pengari rayat (BN) ba sitak nya.

"Pemesai JASA, dichiri kena mantu pengari rayat BN. Berindik ari nya, kami merambu ngagai piak ke bekaul enggau JASA, atur nyiri pemesai JASA mesti nerima penemu tauka berandau dulu enggau pengari rayat (BN) ke megai sitak nya.

"Enti pengari rayat ari PRS, tentuka PRS dipadah dulu sapa bagi pemesai JASA ke deka dipadu ba sitak nya. Baka nya mega enggau parti bukai, ambika chunto enti pengari rayat ari PBB, parti PBB patut nemu dulu sapa bagi pemesai JASA nya," ku iya.

Bekaul enggau atur nyiri kaunsilor dalam opis kaunsil perintah menua, iya madah parti merambu mayuh agi raban nembiak tauka bisi pengelandik kelebih agi ba raban orang indu mangku pengawa nya.

"Atur nyiri raban kaunsilor patut beratika pengulih. Pemujur ba akdemik patut dikemeratka. Pia mega kitai merambu mayuh agi raban orang indu dipadu mangku pengawa nyadi kaunsilor," ku iya.

Maya Aum Kunsil Nengeri Ke-17 tu tadi, perintah udah besetuju nambahka penyampau kaunsilor ari 25 ngagai 30 iku ba tetiap opis kaunsil perintah menua.

Berebak enggau aum media nya mega, iya ngerahka nama Kaban Parlimen Kanowit Datuk Aaron Aro Dagang dipadu nyadi Tukang Wang ke baru PRS. Berindik ari nya, Aaron ulih enggau ngaga sebarang pemutus parti taja pan alah ngerebut lima penuduk mandal presiden ba aum besai parti ke diatur ba Sibu dua bulan ke udah lalu.

Kaban Kunsil Nengeri (ADUN) Balai Ringin Snowdan Lawan dichiri mangku pengawa nyadi kaban suprem kaunsil. Snowdan mega alah ba pengawa milih kaban parti maya nya suba. Sebedau nya, iya mangku pengawa sapit sekretari besai parti.

Mua baru dichiri masuk nyadi kaban suprem kaunsil iya nya injinir Janang Bungsu, mangku pengawa nyadi Sapit Sekretari Besai ke baru, pemesai bank Alexander Donald Ketuai Pemadah ke baru, injinir Thomas Balan Bang nyadi Sapit Ketuai Pemadah, lalu Ali Adap ari Limbang dichiri nyadi kaban biasa suprem kaunsil.

ADUN Tamin Datuk Joseph Mauh Ikeh, ke merambu enda ngetanka pangku pengawa mandal presiden, mega dichiri nyadi kaban biasa suprem kaunsil parti laban parti agi begunaka penemu enggau peneleba iya. Agi mayuh pangku pengawa puang dalam suprem kaunsil bedau diisi.

Datuk Wilfred Rata Nissom dichiri baru mangku pengawa nyadi Sekretari Besai lalu Edward Kurik dichiri baru mangku pengawa nyadi Sapit Tukang Wang.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Peranak Long Luar enggau Long Singu mujur pindah ngagai Palan Pengentap Pendiau Mentalun

Posted: 03 Dec 2013 02:56 PM PST

KUCHING: Peranak ari Long Luar enggau Long Singu, dua buah genturung pendiau ke kena bungkur projek Tekat Ai Murum mujur pindah ngagai Palan Pengentap Pendiau Mentalun.

Nitihka penerang berita ari Sarawak Energy Berhad (SEB), pengawa mindahka peranak tu mungkur 353 ruang bilik ke berengkah dipejalai ba bulan September 2013.

Renggat penudi pengawa mindahka raban tu tembu kena 30 November tu tadi nangkanka renggat keterubah ari genturung pendiau Long Tangau (31 runag bilik) enggau Long Menapa (42 raung bilik) pindah ngagai Palan Pengentap Pendiau  Metalun.

Long Luar (52 ruang bilik) enggau Long Singu (67 ruang bilik) ke mungkur 119 ruang bilik, tembu pindah urung pukul 4.30 lemai enggau 6.30 kemai, 2 Disember.

Antara sekeda penguntung ekonomi enggau bantu diberi ngagai tetiap ruang bilik baka 15 hektar tanah nyengkaum sebuah rumah panjai1,300 kaki pemesai, bekal ai beresi, kuasa karan, bantu pelajar enggau perubat, dewan mayuh guna, sebuah gerija, palan nyeridi anak mit enggau bantu kuchik diri RM850 sebulan (bantu enda lama). Tuai Rumah Madai Salu ari Long Luar enggau Paren Usak ari Long Singu antara sekeda ke nerima kunchi rumah baru sida.

Nyadi peranak baru Metalun, Lai Lait ari Long Luar madah: "Kami udah disediaka rumah baru sereta diberi bantu elawin. Ba pengujung taun tu, kami deka bisi sebuah sekula enggau kelinik. Kami arapka pemansang tu deka ngubah tikas pendiau pengidup kami."

Lagu Karang, ari Long Singu sereta beranak dua madah: "Kebuah kami pindah laban kami disemayaka enggau sekula sereta kelinik iya nya sebengkah pemansang ti bangat dikearapka aku ngelama tu. Kenyau ari munya nyentuk ke peturun apai aku, kami nadai nerima sebarang pelajar. Aku deka anak aku bisi pengelandik enggau penemu."

Bekenangka pengawa mindahka raban tu, Pemesai Opis Pelilih Mit Belaga Abdul Halim Abdullah madah: "Renggat penudi ke kena pindah tembu 2 Dis tu tadi, mungkur mayuh ruang bilik. Pejalai mindahka sida tu lanchar nengah saup perintah menua, Opis Menteri Betanam Betupi, Opis Menteri Pemansang Menua Pesisir enggau Wilayah (KEMAS), Opis Tanah enggau Survei (JTS) Sarawak, polis, Opis Pelajar Nengeri, Opis Pelilih Mit, Opis Kaunsil, Opis Pemadah enggau SEB empu. Kami meri besai terima kasih ngagai sida ketegal bantu ngemujurka pengawa mindahka raban tu."

Menijar Besai II SEB (Tanggungpengawa Rama) Jiwari Abdullah madah: "Sekumbang tiga bulan ke udah lalu, kami napi mayuh macham penanggul tauka penguji baka ngepang jalai Murum enggau bantah ari raban penyakal kena ngemuntanka pengawa mindahka raban tu. Taja pia, semua penanggul tu ulih diputarka nengah program randau lalu pekara tu ulih dipeda ba pemujur renggat ke penudi dipindah kena 2 Dis tu tadi ti mandangka kita bebendar deka nyungkakka tikas pendiau pengidup sida jemah ila. Diatu komuniti nya deka ngasaika semua atur pemansang."

"Juluk kitai deka nyendiaka bantu sereta nentuka sida tu ulih nerima gaya pendiau pengidup ti baru. Inisiatif Opis Menteri Betanam Betupi  nengah kerejasama SEB enggau komuniti Penan deka ngemujurka 'Home Garden Programme'. Semua program ke diatur ke penguntung sida ngambika sama ngasaika atur pemansang," ku Jiwari.

SEB beempu tanggungpengawa nyungkakka tikas sosio-ekonomi nengah SCORE. Rayat udah nemu pemaik ari peluang kereja enggau pemeranak puku deka mai penguntung tang mayuh mega enda nemu pangka ke positif ngagai SCORE ba komuniti.

Inisiatif SCORE deka mai pemansang ngagai rayat ke kurang penatai pemisi ngambika sida sama ngasaika penyenang ari perengka guna jemah ila.

Ngagai komuniti ke kena bungkur projek Tekat Ai Murum, kelimpah bisi rumah baru sida mega deka nerima bekal ai beresi, kuasa karan, pelajar, servis perubat enggau sekeda perengka guna ke bukai.

Semua tu ulih dikemujur nengah kerejasama antara rayat enggau perintah nengah Sarawak Energy baka ke udah dipejalaika sida ngelama tu.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Penumbuh palan perubat peribit diperansang: Taib

Posted: 03 Dec 2013 02:56 PM PST

by Jacqueline David. Posted on December 4, 2013, Wednesday

Berindik ari penatai pemisi peranak menua ke majak manah, rayat begunaka penengkeman servis pengerai

KUCHING: Penyikap pengawa pengerai peribit jemah ila dikearap ulih napi peminta mensia mayuh nyaga pengerai berindik ari rayat ke ngembuan penatai pemisi tinggi.

Berebak enggau nya, penumbuh palan perubat peribit di serata menua Sarawak baka di Kuching, Sibu, Bintulu enggau Miri mega diperansang.

Kepala Menteri Pehin Sri Abdul Taib Mahmud madah, nyerumba Kuching ke diuan urung 700,000 iku mensia lalu berindik ari pemayuh nya iya ngarap, ukai semina sepital perintah aja tang mega ari peribit deka ngasaika peminta ba pengawa pengerai ari mensia mayuh.

"Rayat kitai ngembuan penatai pemisi ke tinggi, lalu palan perubat baka tu endang dikemeratka rayat. Di Kuching aja, udah bisi 4 buah sepital peribit, 2 di Sibu, nyangka di Bintulu ila bisi sebuah…Nya alai penumbuh sepital peribit endang diperansang.

"Kitai nadai jalai bukai, sepital peribit ngembuan servis ke manah sereta nitihka peneka orang ke sakit, lalu utai bansa tu nadai di sepital perintah berindik ari penyampau orang ke sakit diperubatka ba sepital perintah kelimpah ari suntuk orang gawa," ku Taib.

Nya alai ku Taib, kitai untung endar laban ulih ngena penyikap ke baka tu sereta patut beterima kasih laban palan baka tu jadi penyendia kena napi peminta pengawa berubat jemah ila.

"Nya alai, penemu baka tu endang diperansang ngungkupka lutur ari luar muka servis tu ngatika diri mantu mensia mayuh. Aku belabuh meda Palan Perubat Normah (NMSC) kelia, mula-mula iya dibuka, lalu berindik ari nya, aku beratika mayuh pampang peribit nunda singkang nya.

"Aku beterima kasih ngagai anak Sarawak ke milih pulai ngagai menua sida iya empu, lalu ngepunka pengawa bansa tu di menua diri. Ukai nyamai ninggalka menua alai sida iya gawa suba (Australia), ke alai gaji jauh besai tang sida  sanggup begempung ngepunka Borneo Medical Centre," ku iya.

Taib madah baka tu lebuh bejadika Borneo Medical Centre di Jalai Tun Jugah (Simpang Tiga) ditu, kemari.

Kelimpah ari nya, Taib madah ba perintah, pengawa berubat tu disedia enggau naka ulih, tang semina ngarapka perintah aja enda ulih mantu pemayuh mensia ke diau ba sesebengkah sitak, alai pampang peribit diperansang ngepunka palan perubat.

"Perintah enggau naka ulih ngemeratka pengerai rayat, enti enda ulih pan kitai bekunsi. Baka GDP kitai, 5 persin endang diungkup kena nyaga pengerai mensia mayuh sereta diungkup dalam Bajet Perintah," ku iya seraya madah, pekara pengerai nyauka sama pemerat enggau pengelikun enggau pelajar.

Nya alai, iya madah rayat pan nemu pemerat pengawa pengerai dalam kandang 20 taun tu ila deka meri pengelantang ngagai mensia mayuh.

"Ukai ketegal perintah enda nyediaka penyikap ke chukup tang laban sekeda ari kitai nemu perengka enggau penyikap pengerai disediaka perintah.

"Kekadang kedeka mensia tu nyangka nadai di sepital perintah nya alai sepital peribit manah agi endur berubat laban pengawa berubat di sepital peribit tu disengkaum sekali enggau servis ke manah.

"Nya alai, barang sapa ke tetapika peminta  sepital peribit tau milih kitu tang enti enda sida tau milih sepital perintah, nitihka peneka sereta pemisi diri," ku iya.

Ku iya, di menua pesisir, pengawa pengerai di Sarawak agi mayuh bepanggai ba lutur terebai dibanding enggau di semenanjung laban penyauh sesebengkah sitak nya semina ulih lawa ngena bilun engkabang aja.

"Urung 5,000 iku rayat kitai ngachir di serta menua lalu ketegal nya, perintah mega enggau naka ulih nyendiaka penyikap kena napi penanggul pengerai.

"Datai ke sehari tu pan, 85 persin infrastruktur dikena ngagai jalai, karan enggau ai beresi. Ketegal pemayuh rayat kitai ngachir, kitai di Sarawak enti deka ngagai sekeda sitak, agi bepanggai ba bot tauka perau, lutur terebai. Enti ulih, servis pengerai tu deka dikerembai ngagai tiap sitak di menua tu," ku iya.

Taib nandu, perintah endang ngemerat pengerai sereta deka ngaga mayuh agi sepital ba sesebengkah pelilih menua tang enti ngarapka sepital perintah aja enda chukup, nya kebuah penumbuh sepital peribit diperansang.

"Kitai ngaga sepital di Petra Jaya pan enda chukup napi pemayuh mensia ke begunaka servis pengerai lalu ari nya kitai meransang sebarang orang ke landik ba pengawa pengerai numbuhka sepital peribit," ku iya.

Sama bisi ngulu atur pengawa nya kemari, Menteri Muda Pengerai Mensia Mayuh, Datuk Dr. Jerip Susil, Direktor Besai Borneo Medical Centre, Sr Peter Tang enggau Direktor Eksekutif, Robert Lau.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Nadai kelai, penyelai gaya hari sepemanjai bulan tengkujuh

Posted: 03 Dec 2013 02:55 PM PST

by Rengenyan Labang. Posted on December 4, 2013, Wednesday

KUCHING: Dipelaba sepemanjai bulan Disember 2013 nyentuk Mach 2014 gaya ari di nengeri tu nadai penyelai ke tau mai penusah.

Chairman Jawatankuasa Pengurusan Bencana Negeri Sarawak (JPBNS), Datuk Patinggi Tan Sri Alfred Jabu Numpang, komiti tetap udah ditumbuh seraya nyikap diri napi sebarang penusah tasah ti enda disadang nyadi.

"Berita manah ngagai semua iya nya dipelabaka nadai penyelai ba gaya hari lalu tu meri mayuh pengelantang sereta mensia mayuh idup baka ngelama tu enggau nadai pengirau. Nya bepelasarka pelaba sistem pengesan.

"Dipelabaka nadai penyelai ba gaya hari berengkah bulan Disember 2013 ngagai Mach 2014. Nya dipelabaka ulih dikearapka dalam 100 hari.

"Taja pia, kitai (JBPNS) enda tau enda ngadang tauka besedia betapi sebarang penasah ti enda disadang nyadi," ku iya seraya madahka semua penerang bekaul enggau gaya hari enggau pekara ke nyadi deka dipadahka Opis Pengemata Gaya Hari Malaysia Negeri Sarawak.

Jabu mansutka pekara nya ba aum enggau pemberita pengudah nyadi chairman Aum JPBNS 2013/2014 ti diatur ba Bilik Aum Tingkat 2, Wisma Bapa Malaysia ditu, kemari.

Nengang aum nya iya madahka tuju aum dikena mendingka penerang enggau riput penyikap Nengeri Sarawak betapi musim tengkujuh taun 2013/2014.

Nambahka nya, dikena nyemaka ke langkar atur pengawa ti dipejalaika enti sema penusah bah nyadi.

"Maya baum tadi (kemari) kami (JPBNS) mendingka penerang pasal penyikap Kaunsil Pengelikun Bansa Nengeri Sarawak; Opis Pengemata Gaya Hari Malaysia Negeri Sarawak; Opis Parit enggau Entali Ai Nengeri Sarawak enggau Opis Pengintu Pengelikun Raban Bansa Nengeri Sarawak betapi enggau penusah tasah bah enti sema bisi nyadi.

"Pusat Pengentap Tasah udah dikemanahka di serata nengeri lalu sepenyampau 650 pusat pengentap tasah udah disediaka, tang bepelasarka gaya hari ke diatu palan nya nyangka enda dikena," ku iya.

Sama bisi maya aum pengarang berita nya kemari, Menteri Pengintu Pengelantang, Orang Indu enggau Pemansang Ruang Bilik, Datuk Fatimah Abdullah enggau Sapit Sekretari Perintah Nengeri Sarawak Datu Misnu Taha.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.