Radio Free Sarawak Nerima Tanda Basa Media Entarabansa |
| Radio Free Sarawak Nerima Tanda Basa Media Entarabansa Posted: 01 May 2014 04:02 AM PDT  Peter John Jaban berandau enggau orang bansa asal Peter John Jaban, pemungkal raban pemacha berita dalam Radio Free Sarawak udah diberi basa NGO Reporters Without Frontiers nyadika siku ari "100 Bujang Berani Infomasyen" dunya deka dirami ketegal pengawa sida rambau Hari Media Bebas Sedunya, kena 3 haribulan Lima tu ila.  Taib Mahmud, maya iya ti nyadi Kepala Menteri Sarawak, kala ngumbai RFS nya "stesyen radio ti manchal" Peter John Jaban belabuh ngeluarka program iya ti ke terubah ari stesyen radio nya ba bulan Sepuluh 2010. Radio Free Sarawak ngeluarka program sida ari stesyen sida di nengeri London dikena nyeliahka diri kena dawa undang-undang pengeluar lisin di Malaysia ti balat nekan, ti semina meri ruang ngagai stesyen RTM ti dikemataka perintah enggau stesyen bukai ti ngemesaika parti ti merintah. Stesyen radio ti bisi lisin di Malaysia endang diasuh perintah meri pengawa ke raban "Pengemata Berita", ti mangku pengawa merati sereta ngemataka sebarang isi berita lalu nurunka sebarang isi berita ti tau ngasuh orang mayuh ngembuan runding ti bingkuk ngagai parti merintah, sekali ke berita nya amat tauka enda. Menua Malaysia diengkahka ba tikas ti di baruh dalam kategori media bebas dalam bacha indeks entarabansa lalu diatu menua nya nyau majak kusut jauh agi enti dibandingka enggau menua ti balat nekanka rayat sida empu baka Kemboja enggau Myanmar. Dalam taun 2014 menua Malaysia udah merurut dua mata ngagai tikas ke-147 ari 180 buah menua ti diperesa raban NGO Reporters Without Borders. Stesyen radio dalam jaku Iban enggau Melayu nya numpuka chara pengeluar program sida ngeluarka sada nyawa bala orang ti di menua pesisir ti udah kena keduan enggau keruga pendiau. RFS mega nyadika pelasar ngagai bala NGO enggau parti penyakal ti enda bulih peluang mansutka agenda enggau manifesto sida dalam media ti dikuasa perintah.  Peter John Jaban begambar enggau pemacha berita veteran RFS Christina Suntai Sekeda bala orang politik perintah enggau BN suah agi enggai ngambi bagi dalam jaku randau ti dikeluarka dalam program RFS nya ninting lemai, lalu sida rindu agi nuduh RFS nyadika 'pengerembai jaku petenah' enggau stesyen ti ngelaban perintah. Mayuh bengkah penerang udah dipansutka ti madahka stesyen radio RFS nya nyadika "virus" ti "ngerachun runding" rayat di menua pesisir enggau di ulu sungai. Lebuh Menteri Dalam Menua, Hishammuddin Hussein (diatu nyau majak tebilang beduduk ari penanggul pengelenyau bilun MH370) mansutka penerang ti madahka iya deka nentuka bagi undang-undang ti disadang dilanggar stesyen radio RFS nya, ngambika ulih dikena iya ngukum sapa-sapa orang Melayu ti bisi bekaul. Datai ke sehari tu iya mengkang enda mujur tetemu ke sapa lalu kelimpah ari nya perintah Malaysia ngena chara nyekat program ari stesyen nya, lalu sekat ti ke diatu nya diatur dua minggu ke udah ti endur program RFS tanggul ninting lemai.  Tanda angkat ngelaban? Bala orang ti mantah pengawa ngerampas tanah enggau enda beradat – peratika baju-T RFS ti dikena sida Ari belakang tabir RFS Peter John Jaban (ti ngena nama buah ayah Papa Orang Utan ti nyadika tanda penyinu iya ke jelu siga mayas nya ti majak punas ari kampung menua Sarawak ketegal kena keruga kompeni kayu batang ti dipelanja perintah menua) udah ngemeranika diri mansutka identity iya ti bendar ba taun 2011. Udah nya iya mulaika diri ke menua Sarawak dalam taun 2012, ti endur iya ngentapka pendiau enggau pengawa iya mantah lalu pia mega ngambi bagi dalam raban pengeluar program ti mega nyadika hos program ninting lemai nya. Pengawa iya nya udah ngujungka iya napi penangi disekat paspot pejalai iya lalu mega napi sesyen tanyasaut bepansik sereta diperatika raban polis ari Cawangan Khas sepemanjai maya. Iya endang ngaku diri berasai takut lali irau ke diri kena tangkap enggau atur enda beradat, tang iya madahka ngagai Sarawak Report "kitai patut berani mantaika pekara ti bendar". Radio Free Sarawak enggau raban pengeluar program ti tegap nya, tebal agi sida nya ngena nama buah ayah dikena sida ngelalaika identity sida empu, meri tanggungpengawa ngerembaika berita ti mungkur pekara bekaul enggau kuasa pengelantang orang bansa asal ti diperening ari sukut raban peninga menua pesisir enggau ulu sungai. Sehari tu tadi dalam berita angat sida, sida nusui pasal pemenang raban bansa asal dalam pechara kes penyarut tanah asal sida ngelaban kompeni kayu batang enggau kompeni kebun dandang besai di pelilih Long Terawan, ti udah kena keruga orang tanah. Udah bekau ti napi penyarut tanah dalam pengelama beberapa taun nya, sekali agi Kot Apil udah setanah enggau raban orang bansa asal lalu ngelaban perintah menua Sarawak ti betuaika Taib Mahmud/Adenan Satem. Tang raban penerit adat menua mengkang enggai ngubah ulah sida, ti endur orang bansa asal mar bendar deka tetemuka pemujur.  Lawyer Kuasa Tanah ke Orang Bansa Asal Abun Sui Anyit mandangka pengaga ati sida udah bekau menang bechara dalam penyarut tanah Long Terawan, ngelaban kompeni kayu batang ti dipelanja perintah menua Baka tu meh chara NGO Reporters Without Frontiers meresa lalu nusui pasal Peter John Jaban enggau Radio Free Sarawak: PETER JOHN JABAN Dikelala enggau nama buah ayah "Papa Orang Utan", Peter John Jaban nyadika pemacha berita dalam stesyen Radio Free Sarawak, iya nya sebengkah stesyen radio gelumbang angin pandak ti bepalan di nengeri London ti naburka program sida ditagaka ngagai orang raban bansa asal Sarawak ti diau ti sebelah menua pesisir enggau ulu sungai, ba pulau Borneo. Peter, ti asal ari raban bansa Iban udah meri pengamah nama ke perintah menua Sarawak nengah mayuh jaku randau iya enggau bala peninga di Sarawak dikena ngutuk pengawa eksploitasyen ba orang bansa asal ti lalu ngaitka nama Taib Mahmud ti Kepala Menteri kaya raja nya. Radio Free Sarawak patut bejalaika pengawa ngeluarka program sida chara belalai di Sarawak, ti endur raban penerit adat Sarawak ngumbai stesyen nya ngerembaika "jaku petenah" enggau mega "ngerachun runding enggau semengat orang mayuh". Sepengudah iya pulai ke Sarawak dalam taun 2012, Peter John Jaban idup dalam penakut enggai ke diri ditangkap perintah, tang asai takut nya enda nagang iya meri jaku: "Aku gaga bendar ati ke tanda basa tu, abis enda pan tanda tu meri penguntung enti sema aku kena tangkap dudi hari ila". Peter John Jaban nyadika siku orang ti berani ari pemayuh bala orang ti berani dalam raban pengerembai berita dalam Radio Free Sarawak. Iya mega berasai gaga ati ke pangkat Panglima ketegal pemerani iya ti diberi Gabeno menua Pontianak, Indonesia, ti ngarika Majlis Dewan Adat Dayak menua nya. |
| You are subscribed to email updates from Sarawak Report To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |