Peranak Ulu Undop baru berengkah ngasaika penguntung ari projek sawit BorneoPost Online | Borneo , Malaysia, Sarawak Daily News » Berita Iban - New 2 Borneo |
- Peranak Ulu Undop baru berengkah ngasaika penguntung ari projek sawit
- Penakluk kaban parti ulih ngenegapka SPDP: Tiong
- Pengerami Gawai Dayak ukai semina diintu raban Dayak aja
- Penama ADUN SPDP, SUPP ngagai TERAS ulih ngenegapka BN: Jerip
- TK Headhouse & Propagation, palan pemansik biodiversiti di S’wak (SBC)
- Abdullah: Tegapka penyerakup taja pan bebida penemu
| Peranak Ulu Undop baru berengkah ngasaika penguntung ari projek sawit Posted: 24 May 2014 09:12 AM PDT SRI AMAN: Seraban 110 iku peranak ari kandang menua Ulu Undop udah nerima penguntung ari Projek Ladang Sawit ti dikemansangka SOP Pelita Batu Lintang Plantation Sendirian Berhad, Sri Aman nengah chara komersial dalam kandang lima taun ke udah. Menijer Besai Ladang, SOP Pelita Batu Lintang Plantation Sendirian Berhad, Sri Aman, Mohd Shoffian Jalil madah, asil nya udah dipeda pengudah pengawa meri Saham ASSAR ti berega RM284,734.80 ngagai 110 peranak tauka penyereta projek nya. Ku iya, puku nya asil ari pengawa sida ti ngemansangka tanah Adat Bansa Asal (NCR) dalam kandang lima taun ke udah. "Kompeni kami udah dipilih mantu peranak di kandang menua Ulu Undop ngemansangka tanah adat sida nengah pengawa nanam sawit bedandang besai," ku iya. Iya bejaku munyi tu ba Pengerami Nyuaka Gelar Nembiak Ke Nyulut 2013 sereta mega Nyuaka Saham ASSAR kandang menua Ulu Undop, Sri Aman ba Hotel Seri Simanggang ditu kemari. Iya mega minta peranak di kandang menua nya ke bedau masuk projek nya patut berunding, laban nya meri penguntung ngagai sida. Berebak enggau nya, Pemesai Opis Pelajar Pelilih Mit Sri Aman, Vevien Mujah lebuh ke bejaku ba pengerami nya arapka nembiak di menua pesisir ngena peluang ke bisi ngulihka mayuh macham penemu. Laban ku iya, semina nengah pemandai aja ulih ngubah pengidup raban bansa lebih agi di menua pesisir. "Kitai deka meda nembiak di menua pesisir ulih setipak enggau nembiak di nengeri, taja pia diatu mayuh nembiak menua pesisir udah teulihka penyulut ba pelajar," ku iya. Ba pengerami nya bisi empat iku nembiak ke nyulut ba Ujian Penilaian Sekolah Rendah (UPSR), empat iku nembiak ba peresa Penilaian Menengah Rendah (PMR) enggau tujuh iku ba peresa Sijil Pelajaran Malaysia (SPM) 2013 nerima duit insentif. Bela bisi ngulu pengeramin nya, Menijier Pelilih Selatan SOP Pelita, George Lentton Ngindang, Chairman Komiti Pemansang Ulu Undop, Tuai Rumah Mingging Sigan, ketuai opis perintah enggau bala ketuai raban bansa.   |
| Penakluk kaban parti ulih ngenegapka SPDP: Tiong Posted: 24 May 2014 09:10 AM PDT Ngambika parti tu majak tegap sereta tebilang ba raban komponen parti BN di menua tu BINTULU: Semua kaban Parti Demokratik Progresif Sarawak (SPDP) diperansang terus talukka parti enda ngira isu tauka penanggul ke nuntung diatu ngambika parti nya majak tegap nyadi sebagi ari parti komponen Barisan Nasional (BN) di menua tu, pia ku kaban Parlimen Bintulu, Dato' Seri Tiong King Sing. Ku iya, taja pan SPDP diatu benung betapi enggau penanggul, kaban parti patut nemu penanggul ke nyadi dalam Parti Demokratik Progresif Sarawak (SPDP) ukai bepun ari dengki enggau pangan diri, tang ketegal ulah seiku ketuai parti ti enda nitihka atur parti. "Pekara ke beguna amat diatu iya nya, semua kaban parti patut mereti sereta nemu penanggul ke amat nyadi dalam parti, ngambika sida enda nerima penerang ke salah sentang pekara nya kelebih agi jaku orang bukai ari luar ti deka beambi ulih ari penanggul ke nyadi nya," pia ku iya bejaku maya Malam Penyerakup SPDP ke diatur ba sebuah restoren ditu kena malam Hari Lima tu tadi. Pengerami nya digulu lebih 3,000 iku penyukung parti nya ke mega ngelaika SPDP mengkang bisi sukung ke kuat ari penyukung, taja pan Tan Sri William Mawan Ikom ke mega ex-presiden parti udah ninggalka parti sereta tama Parti Tenaga Rakyat Sarawak (TERAS). Pengerami nya mega sebagi ari program SPDP beserimbai enggau Aum Kaban Kaunsil Besai (AMKT) ke diatur ba Palan Servis Kaban Parlimen Bintulu, muak ke siang sehari nya. "Diatu kitai (SPDP) nampung pengawa ngemujurka kuing parti ngambika ulih nyadi sebuah parti politik ari baruh BN ke bediri tegap ba bala penyukung kuat parti nengah iring kaban Kaunsil Besai (AMT) ke diatu," pia ku iya. Ku iya baru SPDP deka gawa chakah agi ngenegapka parti ngambika majak tebilang ba raban komponen parti BN bukai, taja pan betapi enggau penanggul baka ke diatu. Beserimbai enggau nya, Tiong meri terima kasih ngagai semua AMKT sereta mega kaban parti ke sepenemu nyiri iya nyadi pemangku presiden parti sementara nganti pengawa milih baru AMKT ba Aum Besai Tiga Taun Sekali SPDP ke deka diatur kena 27 September taun tu. |
| Pengerami Gawai Dayak ukai semina diintu raban Dayak aja Posted: 24 May 2014 09:09 AM PDT SRI AMAN: Pengerami Gawai Dayak ti diintu kena 1 Jun, ukai semina dirami raban bansa Dayak aja, tang nyadi pengerami semua bansa. Pengari Sapit Direktor Opis Pengintu Pengelantang Mensia Mayuh Bagi Menua Sri Aman, Tingga Manggat madah,nya pengerami nya mega sma bela semua raban bansa baka Melayu, China enggau ke bukai. "Tu ngayanka pengerami Gawai Dayak udah nyadi pengerami semua bansa sebaka enggau Hari Raya, Taun Baru China enggau Deepavali. "Ari tu bansa bukai ulih belajarka adat enggau main asal raban bansa Iban, sereta ulih ngasaika pemakai asal kitai," ku iya. Iya bejaku munyi tu lebuh bejadika pengerami Mantar Gawai enggau Hari Pengada Anak Mit, Rumah Nembiak Mit Datuk Ajibah Abol, Sri Aman ba Hotel Seri Simanggang ditu malam ensanus. Ku iya, penyerakup bansa ulih ditempa nengah mayuh bengkah pengerami ke diatur, ke alai bansa bukai ti enda ngintu pengrami tu mega sama bela ulih ngasaika pengerami Hari Gawai nengah chara ngabang ngagai rumah pangan diri ke bisi ngintu pengerami nya. Bida ba jalai pengarap enggau gaya pengidup ukai nyadika penanggul ngagai bansa bukai ke ngabang ngagai rumah pangan sida ke bebansa Dayak seraya ngenegapka agi juluk '1Malaysia' ti udah lama dikemeran sereta dikemeratka ba Sarawak, ku iya. Nyerumba pengerami nya bisi diatur pengawa melah kek Hari Gawai enggau Hari Pengada kelimpah ari ngajat, karaoke sereta nyuaka perais Gawai ngagai nembiak RKK. Sama bisi ngulu pengerami nya, Kepala Pengajar Rumah Nembiak Mit Datuk Ajibah Abol,Sri Aman, Nurul Elliana Alias, Chairman Komiti Temuai RKK Datuk Ajibah Abol, Sri Aman, Alhias Muhi enggau bala bukai. |
| Penama ADUN SPDP, SUPP ngagai TERAS ulih ngenegapka BN: Jerip Posted: 24 May 2014 09:09 AM PDT Dikarang Chris Bishop // Kepala Menteri mega kala nerima PBDS nyadi kaban BN dalam taun 1983 SIBURAN: Semilan iku ADUN ari SPDP enggau SUPP ke tama Parti Tenaga Rakyat Sarawak (TERAS) enda ngeruga penyerakup enggau penegap Barisan Nasional (BN) Nengeri, ku Dr Jerip Susil. Iya ti enda lantang ati enggau jaku tuduh sekeda orang ti madahka sida ukai dalam BN, minta badu betalatka pekara nya agi. "Badu ngemesaika pekara tu, kami ngemerat penegap BN Nengeri taja pan lima iku ADUN ari SPDP enggau empat iku ADUN SUPP udah begempung ari baruh seiti payung. "Kami seraban udah betemu enggau Kepala Menteri lalu besemaya kami mengkang gawa, meri servis ngagai rayat nengah BN. "Anang salah runding, sekeda mantah parti baru tu masuk BN kelebih agi raban ketuai ari SPDP enggau SUPP," ku iya. Jerip mansutka penerang tu ba pengerami nyuaka setipikit chiri ngagai 57 iku Ketuai raban bansa ungkup ADUN Bengoh enggau Tarat di sebuah restoren ditu, pagi kemari. Iya ke mega Menteri Muda Pengerai Mensia Mayuh madah, pekara ke sebaka kala nyadi dalam taun 1983, ke alai Kepala Menteri maya nya udah netap pemutus nerima Parti Bansa Dayak Sarawak (PBDS) nyadi kaban BN tauka dikumbai 'BN PLUS'. "Nerima PBDS nyadi 'BN PLUS' mujur ngenegap politik di Sarawak maya nya, lalu pekara ke sama mega ti nyadi diatu. "Kami ngasai payung baru tu ulih nyaup mulaika penegap ngagai BN sereta gaya politik dalam nengeri tu," pia ku iya. Bisi sekeda ketuai sereta raban enda ngalih, SPDP pan sama BN lalu SUPP pan sama BN mega, tandu iya. Iya netapka sida seraban dalam Teras nadai ngembuan niat deka belaya enggau ketuai ari SPDP enggau SUPP lalu keran majakka pengawa meri servis ngagai rayat nengah chara ke lantang. |
| TK Headhouse & Propagation, palan pemansik biodiversiti di S’wak (SBC) Posted: 24 May 2014 09:08 AM PDT KUCHING: Pengawa pemansik utai tumbuh asal di nengeri tu deka lebih chakah agi dipejalaika berindik ari penumbuh TK Headhouse & Propagation Palan Biodiversiti Sarawak (SBC) ti udah dipenyadi sereta di buka kemari. Sekretari Perintah Nengeri Tan Sri Datuk Amar Mohamad Morshidi Abdul Ghani madah, nya senipak enggau juluk ati SBC ti nyaga rampa menua, utai tumbuh di nengeri tu. "Rumah tu (TK Headhouse & Propagation) baka inkubator dikena ngemansangka orang dagang. Kami nguji deka ngemansangka semua utai tumbuh. "Stuk utai tumbuh dikena bejalaika pansik chukup, lalu diatu pengawa mansik (utai tumbuh) bisi benung dipejalaika. "Asil ari pengawa pansik nya deka ditaruh kitai empu, nyengkaum penemu asal enggau Intellectual Property (IP)," pia ku iya ke mega Chairman Kaunsil Biodiversiti Sarawak. Morshidi bejaku munyi tu lebuh dikerandau pengarang berita pengudah bejadika TK Headhouse & Propagation enggau Hari SBC di Jalai Puncakl Borneo ditu kemari. Ngenang rumah ti baru dipenyadika nya, Pemangku Ketuai Pemesai Eksekutif SBC, Dr. Yeo Tiong Chia dalam jaku pengelalu madahka TK Headhouse & Propagation digaga dalam timpuh 14 bulan. Ku iya, rumah baru nya mayuh guna sereta bisi penyelai. "Atap digaga nyauka baka puchuk kayu dalam kampung, dalam rumah nya berangin taja pan terang laban panchar mata panas ulih tembus sereta bisi sebengkah bilik endur kami ngereja pengawa. "Pekara ke beguna amat, iya nya rumah tu deka naruh sekeda utai pansik ti pemadu besai endar reti, baka utai tanam ti ngemansutka utai ke ulih dikena ngelaban penyakit riman kelimpah ari endur naruh sekeda utai tanam ke bebau rengut ti dikena ngaga minyak wangi," ku Yeo. Lebuh ke ngenang pasal Hari Nyambut Temuai SBC, ku iya, mayuh atur pengawa dipejalaika nyengkaum pekit nyura anak mit enggau main sains inovatif, pemandang enggau sekeda utai bukai. Kitai seharitu ngena marik kerubung tekuyung senipak enggau rambai jaku Hari Biodiversiti taun tu 'Island Biodiversity', ku iya. Bela bisi datai ba pengerami nya mega Luyar Besai Nengeri Datu Abdul Razak Tready enggau bala bukai. |
| Abdullah: Tegapka penyerakup taja pan bebida penemu Posted: 24 May 2014 09:07 AM PDT KUCHING: Rayat pupu bansa di nengeri tu enda patut begedika pangan diri ketegal ti bebida penemu enggau runding. Ketuai Sekretari Politik Kepala Menteri, Abdullah Saidol madah ulah ke baka nya semina deka mechahka penyerakup ke udah lama digenggam ti nyadi penentu pengelikun enggau pemansang Sarawak. "Pebasa penyerakup kitai di Sarawak laban penyerakup pekara ti besai reti. Enti enda pia, pedis kitai deka nyapai pemansang baka ke dipeda sehari tu. "Anang begedika pangan diri taja pan penemu enggau runding kitai enda sebaka laban semua kitai tu anak nengeri Sarawak," ku iya. Iya mansutka jaku tu ba pengerami Mantar Gawai Tikas Pelilih Meradong di Dewan Christus Lumen Mindi Bintangor malam ensanus. Pengerami nya diatur Gerempung Tuai Rumah Meradong, SDNU enggau SIDS, lalu bela digulu Sapit Menteri Pemansang Menua Pesisir enggau Kandang Menua Datuk Alexander Nanta Linggi enggau ADUN Daro, Murni Suhaili. Abdullah ke mega ADUN Semop madah, rayat Sarawak ti diarika mayuh bengkah pupu raban bansa nengah batang pengarap sereta runding ti bebida udah nentuka nengeri tu chukup kaya enggau adat sereta main asal. Ku iya, nengah bemacham main asal ke dikemisi, Sarawak chukup nyelai enti dibandingka enggau nengeri bukai. Ambika chunto, aku ke nyadi Sekretari Politik Kepala Menteri enggau ADUN enda bepilih bansa ba pengawa meri servis ngagai rayat. "Aku pechaya semua ADUN enggau Sekretari Politik ke bukai seruran sedia meri servis ngagai rayat lalu servis nya dipejalai enda ngira bansa enggau jalai pengarap," ku iya. Beserimnbai enggau nya, Alexander lebuh ke bejaku ngansak raban Dayak sedia besemekih ba pekara pelajar enggau dagang ngambika bela mujur baka bansa bukai. Iya ke mega Kaban Parlimen Kapit ngelalau raban Dayak anang mudah pechaya ke tuju politik sekeda raban ti deka mechah penyerakup di nengeri tu. "Aku ngansak bansa Dayak berunding positif maya napi pemansang ke benung ngerembai ngambika enda tinggal. "Kelimpah ari nya, kitai patut bebendar ngenan pemanah kaul entara pupu bansa lalu ngenegap pemereti ati begulai enggau bansa bukai," ku iya. Berebak enggau pengerami nya, Abdullah nyuaka belanja RM10,000 ditangkanka Alexander meri RM5,000 lalu Murni meri RM2,500 ngagai gerempung. |
| You are subscribed to email updates from BorneoPost Online | Borneo , Malaysia, Sarawak Daily News » Berita Iban To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |