Penyaru PR Dalam Norconsult Ari Menua Norway?

Posted: 22 May 2014 06:43 AM PDT

Bala pengari gerempung NGO Save rivers ari menua Sarawak begambar ba mua rumah Parlimen Switzerland minggu nyin kemari

Udah bekau ti kiruh nemuai ke menua Eropa laban ti deka nerangka bantah besai-besai ngagai SCORE di menua Sarawak, bala orang bansa asal Sarawak udah kena tulak ti sumbung kompeni Norconsult di menua Norway.

Dalam surat bedalih kompeni nya, ti dipelabaka udah ditulis CEO dalam Sarawak Energy, Torstein Sjotveit asal ari menua Norway ti ngarika sebuah kompeni sanding penemu pengeluar kuasa hidro menua nya udah madahka iya besedia nyambut penemuai bala NGO ari Sarawak nya, udah nemuai ke nengeri Oslo ti endur sida deka ngenataika kes sida.

Presiden, ti mega nyadika CEO kompeni Norconsult, John Nyheim, enggai betemu enggau sida, laban, kenu ku iya, iya chukup puas ati enggau pemanah pengawa kompeni iya bekereja di Sarawak lalu enda ibuh iya nyaut ngarika sida.

Ulah enggau pendiau John Nyheim nya balat ngenyitka ati lalu nyelai ba pengawa iya mutarka isu-isu tanggungpengawa sosial enggau korporat sesebengkah kompeni, ti suah agi nya ngayanka penyinu ati sida ngagai pekara ti baka tu, lebih agi lebuh sida bejalaika pengawa dagang sida di menua bukai, ti ngembuan rampa menua ti mudah kena keruga.

Kompeni ABB ari Switzerland udah ngayanka teladan ti manah baka ni chara nerima sebuah petisyen ba minggu nyin kemari, lebuh bala pemesai dalam kompeni nya nyambut penemuai raban gerempung ari Sarawak nya enggau manah, mendingka sebana sida lalu besetuju enggau pemutus penemu kompeni nya ti besemaya deka meresa baru pengawa sida di Malaysia.

Nadai saut ari Norconsult, ti terang bendar nunjukka sida enda ibuh dipadahka pasal tanggungpengawa sida!

Kompeni nya baka ti ditunjukka sida dalam laman web sida empu madahka pengawa dagang sida "makin mansang di Sarawak" lalu udah "nanggam sempekat ba kontrak-kontrak kuasa hidro di Kuching", terang bendar nunjukka sida nya benung bekerejasama dalam pengawa ngaga beberapa buah tekat ti udah dilanggur ke guna projek SCORE, taja pan perintah menua udah puntan nerangka kes nya tauka ngulihka sukung orang mayuh.

SEB udah nguji ngenyampatka penembu projek tekat besai-besai nya ngambika dulu ari pemutus peresa empas projek ba rampa emnua enggau sosial, ti udah dikereja sida dikena ngelanggar prosidur enggau kuasa pengelantang orang bansa asal.

Norconsult bisi kaul enggau cara ti salah dalam pengawa ngaga Tekat Murum lalu sida mega mujur bulih kontrak ngaga tekat-tekat di Baram enggau Baleh, taja pan sida bedau nerima projek nya chara betul ba undang-undang

Dalam surat saut iya nya CEO ari menua Norway nya madahka kebuah iya enggai nerima penemuai orang bansa asal ari Sarawak nya, ti deka ngenataika petisyen ti ngundan 65,000 iti nama orang bansa asal dikena mantah sereta nagang pengawa ngaga tekat di pelilih menua sida di Sarawak.

Kenu ku CEO Nyheim nya, kebuah ti ke terubah laban SEB nadai kala didawa ketegal penyalah makai suap!
Enti disebakaka enggau runding logik, Nyheim engka enda mantah enti iya dikumbai bisi bekaul dalam penusah Holokos Hitler, laban penusah nya nadai kala didawa, lalu nama reti justifikasyen ti munyi nya?

Norconsult enda besedia deka nemu pasal empang jalai lebih 200 hari ti didirika orang bansa asal dikena nagang pemasuk dikena ngaga Tekat Baram ti udah dikontrakka ngagai kompeni sida

Penetap runding ti enda betanggunpengawa nya, ditambahka enggau mayuh penerang bekaul enggau penyalah makai suap enggau salah guna kuasa dalam kompeni SEB bekaul enggau projek ngaga tekat sereta mega ngaku diri puntan dulu suba ba tanggungpengawa korporat enggau sosial sida ngagai raban bansa asal Sarawak.

Bisi didinga sekeda jaku randau dikena ngemanahka pekara dalam pejalai projek ngaga tekat ba maya dudi hari ila, tang nadai sebarang tanda ti madahka pasal penguntung ari projek nya.

SEB udah bebendar nguji ngaga lalu nembuka Tekat Baram dulu ari pemutus peresa enggau pansik empas projek ngagai rampa menua enggau sosial tauka pendiau mensia enggau utai idup bukai ba pelilih menua sida.

Pengawa nya ditagang empang jalai ti didirika orang bansa asal, diatu masuk ba hari ti ke-210.

Berebak enggau nya, kompeni SEB bisi ditemu nguji nyuap raban-raban bansa asal ti dituntung lalu nipu sida enggau chara ngeluluka diri besukatka rampa menua awakka meri gambar projek nya bisi sukung lalu ngasuh orang bansa asal dia satu runding.

Ketegal ti ke-dua Nyheim, nitihka isi surat saut iya, madahka SEB udah "nyain Protokol Pengawa Meruan Kuasa Hidro" lalu sida bisi siku CEO, Torstein Sjotveit ti nyadi kaban dalam Gerempung Pengeluar Kuasa Hidro Entarabansa (ti bebayar $3,000).

Tambah mega 'perengka' ti ku Nyheiom dalam protokol nya semina sekeping surat lalau pengawa manah lalu nadai pemendar ati ke sapa-sapa orang ti sama sain protokol nya bejalaika pengawa sida.

Tu siti ari kebuah bala orang ti pandai ba rampa menua ari serata dunya enda nerima Protokol Gerempung Pengeluar Kuasa Hidro Entarabansa nya nyadika pengiasa jemari bup aja, ti digaga kompeni-kompeni pengeluar kuasa hidro ti belalai di belakang organisasyen nya.

Protokol entarabansa enggau kuasa pengelantang orang bansa asal ti minta penemu orang bansa asal diperatika – tang kompeni SEB tetap enggau langgur pengawa sida begagaka tekat enggau nadai bulih pemendar orang bansa asal tauka asil peresa enggau pansik empas projek nya

Ketegal ti ke penudi diberi CEO ari kompeni Norconsult nya enggai betemu enggau raban delegasyen laban kenu ku iya deka nyaga resia orang bansa asal Sarawak.

John Nyheim engka nemu bendar pasal klien sida nya Sarawak Energy, ti endang enggi bala orang Sarawak lalu orang ti bisi pemerat ba SEB nya endang orang bansa asal Sarawak empu, ti diarika bala temuai ti nguji deka betemu enggau iya minggu tu!

Nyheim sama enggau Sjotveit meri malu ke orang Norway di Sarawak!

Berani bendar Nyheim milih leka jaku ti sumbung pasal nyaga resia ngarika klien, lebuh maya penampak nya nyadika pugu tanggungpengawa kompeni iya bekaul enggau pekara tu?

Nya mega seninjik, sebengkah guna baka ti dirintaika dalam terma-terma Protokol Gerempung Kuasa Hidro, ti dikumbai Norconsult nya mega nyadika kaban sida
Nyheim udah meri malu ke diri empu laban penyumbung iya enggau isi surat iya ba orang bansa asal ti arap bendar ke pengawa manah kompeni iya lalu sida dikeruga peniki ai tekat ba rumah sida, ngambika pulaika pengaya ti tekala nya ngagai sekeda orang.

Nyheim mega patut nemu pasal sebuah agi kompeni pengaga tekat ari Norway ti bukai, ti kala ditemuai Torstein Sjotveit enggau penemu ngambi bagi dalam program ngaga tekat di Sarawak.

Sarawak Report udah mujur nemu pemanah pemutus runding kompeni Norsk Hydro ti enggai diambi ngaga projek di Sarawak laban projek ti baka nya kelalu balat dikeenggaika orang mayuh.

Kompeni Norconsult deka nemu ba siti hari ila.

Berebak enggau nya, berapa iti pelasar ajar dalam PR ti patut dipadahka dikena ngemetulka penyumbung kompeni nya enggau mega CEO sida. Surat nya baka ti di baruh tu:

Penyaru PR ba mua orang mayuh – surat saut Norconsult ngagai pengari orang bansa asal ari sarawak

Penyaru PR Dalam Norconsult Ari Menua Norway?

Penyaru PR Dalam Norconsult Ari Menua Norway?

Recent Comments

Archive