» »Unlabelled » Penanggul nya bepun ari pemayuh mensia, ku Lo BorneoPost Online | Borneo , Malaysia, Sarawak Daily News » Berita Iban - New 2 Borneo

05:13:00

Penanggul nya bepun ari pemayuh mensia, ku Lo BorneoPost Online | Borneo , Malaysia, Sarawak Daily News » Berita Iban - New 2 Borneo

Penanggul nya bepun ari pemayuh mensia, ku Lo

Posted: 30 Apr 2014 09:18 AM PDT

Kitai nemu palan pemeresi ai di Tapah nya endang udah tuai sereta enda tetangkupka pemintaDikarang Rengenyan Labang

KUCHING: Chairman Opis Kunsil Kandang Bandar Padawan (MPP) Lo Khere Chiang madah, Jabatan Kerja Raya (JKR) deka nganjung ai enggau naka pengelengkas ngagai sekeda peranak di sepemanjai Jalai Kuching-Serian ti betapi enggau penanggul nadai ai.

Peranak di sepemajai Jalai Kuching–Serian ti berengkah ari Siburan ngagai Beratok dalam kandang beberapa ari ke udah diripot nadai ai.

"Sida (JKR) deka enggau naka pengelengkas nganjung ai beresi ngagai sekeda peranak ti betapi enggau penusah nya.

"Peranak tau berunding enggau JKR ke nganjung ai nya kemaya timpuh ke patut endur sida ngajung laban tebal agi siang hari nadai tentu orang di rumah. Peranak genturung nya tau betelefon ngagai lumur JKR 082-240371.

"Pagi tadi (kemari) kaunsilor aku bisi nanya pekara tu ngagai JKR lalu sida iya (JKR) madahka bisi penanggul ba sekeda perengka dalam Loji Penapis Ai nya, sida mutarka penanggul nya lalu ngarapka ulih manah baka ngelamatu.

"Tambah mega pemansang menua kitai kelalu jampat lalu Loji Pemeresi Ai nya enda tetangkupka peminta peranak ti nyau majak betambah," ku iya.

Lo mansutka pekara nya dalam aum pengarang ti diatur ba bilik aum MPP kemari.

Bejaku baru iya madahka, tambah mega Loji Pemeresi Ai Tapah nya udah kelalu tuai sereta  patut dikemesai.

"JKR udah minta belanja ngagai perintah besai nengah Opis Menteri Pemansang Menua Pesisir enggau Kandang Mengeri dikena ngemesaika Loji nya.

Kelimpah ari nya iya madah, rayat nengeri tu patut ngenataika seberang penanggul ngagai piak ke patut.

Iya madahka perintah bisi nyendiaka lumur telefon ke terus disambung ngagai opis kepala menteri iya nya 082-555999, sereta Tali Khidmat nengah www.talikhidmat.gov.mywww.talikhidmat.gov.mywww.talikhidmat.gov.mywww.talikhidmat.gov.my ke tau endur rayat ngenataika sebana diri.

Print Friendly

PPPM sebengkah inisiatif dikena ngenegapka kualiti sistem pelajar

Posted: 30 Apr 2014 09:17 AM PDT

KUCHING: Perambu Pemansang Pelajar (Pelan Pembangunan Pendidikan Malaysia tauka PPPM) 2013-2015 mantaika strategi enggau inisiatif kena negapka pemanah kualiti sistem pelajar nasional.

Kelimpah ari nya, iya mega beratika semua nembiak ngembuan peluang ke sebaka ngulihka pelajar ke bekualiti.

Sapit Direktor Opis Pelajar Sarawak (JPS) Abdul Rahman Bolhassan madah PPPM 2013-2015 ngarap ulih nyapai lima batang pekara mungkur sistem pelajar Malaysia, iya nya Akses: 100% enrolmen mungkur semua renggat pelajar ari prasekula ngagai sekondari atas manggai 2020.

Kelimpah ari nya, iya madah dalam pekara pemujur pejalai sistem sida ke bekaul enggau pekara tu nemu tikas kualiti ke patut bisi ba tiap iku nembiak, ngambika ulih besemekih ba renggat global.

"Enam iti pekara besai ti patut dikemerat ulih nembiak, iya nya baka Penemu, Pengelandik berunding, pengelandik nyadi ketuai, pengelandik Dwibahasa, etika enggau jalai pengarap enggau identiti nasional," ku iya.

Iya madah munyi nya lebuh bejaku bejadika 'Majlis Penyampaian Sijil Anugerah Cemerlang Peringkat Pendidikan (APC) Daerah Kuching 2013' di Dewan Serbaguna, Yayasan Sarawak, kemari.

Kena beratika ubah ti digaga nya, Opis Menteri Pelajar ngemeratka 11 pekara penyulut ke patut diatur, iya nya nyendiaka pelajar bekualiti ke sama rata, beratika tiap iku nembiak nemu ngena jaku Bahasa Malaysia enggau English taja pan jaku bukai pan diperansang.

"Ambika chunto, PPPM 2013-2015 profesyen  pengajar deka nyadi lebih berprestij sereta elit lebuh maya ngambi pengajar dalam urung 30 peratus graduan ke pengabis nyulut dalam menua, ngambika profesyen nya nyadi profession ke dipilih.

"Tu reti iya atur nyadi pengajar tinggi agi kena beratika semua pengajar ke dilatih nitihka atur minimum akademik ulih nyadi pengajar," ku iya.

Belabuh ari taun 2013, pengajar diasuh ngambi program 'Pembangunan Professional Berterusan' (CPD)

"Kena beratika (kepimpinan berprestij tinggi) dianjung di tiap buah sekula, kriteria milih prinsipal enggau  kepala pengajar nitihka timpuh pengelama gawa.

"Enggau nya, tiap prinsipal enggau kepala pengajar diasuh ngambi setipikit Professional Kebangsaan ke 'Kepimpinan Pendidikan (NPQEL) ari Institut Aminuddin Baki," ku iya.

Ba atur pengawa nya kemari, urung 394 prinsipal enggau kepala pengajar nerima 'Sijil Anugerah Cemerlang Peringkat Pendidikan (APC) Daerah Kuching 2013'.

Print Friendly

Anang berumban nyain kimpin ngurangka tarif lekterik

Posted: 30 Apr 2014 09:16 AM PDT

KUCHING: Mensia mayuh patut anang berumban tang berunding panjai sebedau nyain kimpin ngurangka tarif ti dipejalaika Parti tindakan Demokratik (DAP).

Opis Kunsil Kandang Bandar Padawan (MPP) Lo Khere Chiang madah, rayat patut ngembuan tanggupengawa ke besai nyaga nengeri lalu chara ti dipejalaika parti nya enda betul.

Iya madah, tarif di Sarawak udah kelalu murah lalu nadai kebuah rayat enda setuju.

Semua kami dalam MPP bisi pengirau ngagai pengawa ti dipejalaika DAP ti mensia mayuh nyain ngayanka sukung kimpin ngurangka tarif elekterik laban nya enda ngayanka 'barometer' ti betul dikena DAP nyukat sukung rayat, ku iya.

"Ngena awak tu, opis MPP enggau kaunsilor aku madah, kimpin ngurangka tarif ti dipejalaika DAP enda mandangka sida serius ti tau ngayanka sukung mensia mayuh.

"Enti sida beamat-amat deka ngurangka tarif nya, lapa enda mandangka kimpin sida di Penang tauka Selangor dulu, tembu nya baru mantaika di Sarawak, enti amat serius.

"Tarif di Sarawak, ke pemadu murah di menua tu. Perintah udah enggau naka ulih bejalaika atur ngambika tarif nya meruan belama.

"Nya alai mensia mayuh patut berunding panjai dulu sebedau nyain kimpin nya. Tu pemanah enggau penguntung rebak dudi," ku iya maya aum pengarang berita ba Bilik Baum MPP ditu, ngalih hari kemari.

Print Friendly

Ulah ngenakut orang ngena SMS majak mayuh

Posted: 30 Apr 2014 09:15 AM PDT

Suah kes mansik pengempu kad 'prepaid' enda mujur bepun ari pengelemi sistem: Wan Junaidi

Dikarang Judan Bungap

SARIKEI: Opis Menteri Dalam Nengeri (KDN) berasai irau bepun ari penyampau kes ngenakut tauka ngegap orang ngena pesan jaku pandak (SMS) niki 100 peratus.

Sapit Menteri KDN Datuk Wan Junaidi Tuanku Jaffar madah, kes tu mega tusah deka diputar polis laban bisi penanggul nyidi orang ke ngempu lumur telefon nya.

"Ari gaya tu kitai meda bisi pengurang antara kerejasama kompeni nyediaka servis telekomunikasyen ti suah laun meri penerang.

"Berindik ari pekara nya, ngarapka semua piak ulih bekerejasama enggau polis mutarka kes tu. Polis enda ulih mansik kes nyema nadai kerejasama ari kompeni nyediaka servis telekomunikasyen

"Tu lebih agi mantu nyidi sapa ke ngempu lumur telefon," ku iya madah ngagai pengarang berita pengudah ngulu pengawa nyua ka bantu chek ari BAKTI ngagai kaban belayan nembiak ari Tanah Putih ke bebadi ba penusah lemas, empai lama tu tadi.

Bantu nya disuaka bini iya Datin Feona Sim.

Dulu agi ari nya, Wan Junaidi enggau bini iya nemuai ngagai Kampung Tekajong, Daro bela nyua ka bantu ke sebaka ngagai sida ari Kampung Saai, Daro sereta nemuai ngagai Opis Polis Tanjung Manis.

Ku Wan Junaidi nampung jaku iya, mansik kes ngemba mega mar diputar laban nyangka lumur nya ngena servis 'prepaid' ti suah agi pengawa ngerijista nama enda nitihka atur enggau manah.

Bepun ari nya, iya ngarapka sida ti bekaul ulih ngatur pengawa ngerijista nitihka atur enggau manah kelimpah pengawa nya digaga orang ke endang ngempu kad 'prepaid' nya.

"Sida ke meli kad 'prepaid' tu patut datai batang tubuh ngerijista nama diri kelimpah ejen ke nyual mega patut nitihka atur ti udah ditetapka.

"Kes ngenakutka orang bukai nengah SMS mai penanggul ngagai polis," ku iya nandu.

Berebak enggau tu mega Kaban Parlimen Santubong nya muji polis Sarikei laban mujur ngurangka kes penyalah rama ba pelilih menua nya.

"Tikas penyalah rama ba pelilih menua tu enggau tikas pengawa polis chukup manah, kes ke dibai ngagai kot lebih 90 peratus mujur diatur.

"Tu mandang nyauka semua kes mujur diputar dalam kandang taun 2012 ngagai 2013," pia ku iya sambil madah tebal kes mujur diputar enggau lengkas.

Print Friendly

Tengku: NGO Iban ngembuan tanggungpengawa ngemeran sereta ngemeratka adat enggau main asal

Posted: 30 Apr 2014 09:15 AM PDT

SARIKEI: Gerempung ukai dikuasa perintah (NGO) Iban ba menua tu ngembuan tanggungpengawa ngemeran sereta ngemeratka adat enggau main asal bansa Iban ngambika enda punas nyerunyut pemansang dunya.

Sekretari Politik Kepala Menteri Tengku Gruna madah, ngatur sebengkah pengerami ti bekaul enggau adat tauka main asal bansa Iban nyengkaum Dayak ke bukai chara ti engkeman megai tanggungpengawa nya.

"Semua sarakup enggau gerempung enggi Dayak ambika banding baka Gerempung Dayak Iban Sarawak (SADIA) endang bisi tuju kediri empu maya ngaduka pengawa.

"Seiti ari tuju iya nya ngetanka adat enggau main asal bansa kitai Dayak," pia ku iya madah.

Nambahka nya ku Tengku, NGO Dayak mega enda ulih limpang ari perintah ngelawa pemujur tuju gerempung.

Kebuah pia ku iya laban semina perintah aja alai besukung ba pengidup, pemansang ekonomi enggau pekara ke bukai ti ulih ngangkatka diri nengah gerempung.

"Seiti ari tuju kitai iya nya deka ngiga pemansang sereta sejalai enggau bansa bukai ngambika mujur nyapai juluk ati gerempung.

"Nya alai, kerejasama kitai enggau perintah nentuka semua pekara tu," ku iya madah.

Iya mantaika jaku nya maya ngarika Sapit Menteri Pemansang Menua Pesisir enggau Kandang Menua Datuk Alexander Nanta Linggi bejadika Malam Mantar Gawai Dayak 2014 Gerempung Dayak Iban Sarawak (SADIA) Pampang Sarikei ke diatur ba Dewan Suarah Sarikei kena 26 April tu tadi.

Pengerami lemai nya bela digulu Residen Sarikei Dahim Nadot, Chairman SADIA Pampang Sarikei Clement Hillary, Pemancha Janggu enggau Pemancha Radin kelimpah bisi 600 iku bala pengabang ke bukai.

Tengku ti mega Chairman Sarakup Dayak Sarawak (SDNU) Pampang Sibu ngelalau bala ke bisi datai maya nya bela chakah nyengulaka anak diri empu.

Ku iya, tebal agi bansa Iban maya hari tu ngiga pengidup ba kandang mengeri ti randaka chara beridup ti lebih agi bepenguji.

"Semina pelajar ulih nentuka pengidup kitai jemah ila.

"Nya alai kitai anang enda ransing besemekih enggau bansa bukai napi ubah enggau penguji nyerumba ubah pemansang dunya kemaya hari tu," pia ku iya madah baru.

Berebak enggau tu mega, Tengku ngelalau raban bansa Iban ngambika enda kelalu ngerua belanja maya Hari Gawai Dayak ti deka diintu enda lama agi.

Ku iya, Hari Gawai Dayak diintu kelai gaga udah tembu ngetau tauka bumai enti dulu kelia.

"Jaga pengerai diri empu anang kelalu beirup ai bisa.

"Pia mega anang kelalu beambis belanja nyambut Gawai Dayak laban tau ngenataika penanggul belanja anak tauka uchu kitai sekula," ku iya madah.

Maya pengerami tu mega Tengku nyuaka geran projek mit menua pesisir (MRP) RM5,000 ari Datuk Alexander ngagai SADIA Pampang Sarikei.

Sekeda ari program ke bela bisi diatur maya pengerami tu baka Pekit Kumang, ajat asal, tikit benasit, beperindang enggau 'live band', pengawa muka kujuk enggau ngirup ai pengayu.

Print Friendly

Pelatih GiatMara tetapika peminta makit sereta begaji besai, ku Rosdi

Posted: 30 Apr 2014 09:15 AM PDT

KUCHING: Bidang pengelandik diatu udah nyata ulih nyamin penyulut ba tikas pengidup seseiku berindik ari ti teulihka gaji besai, taja pan bisi pengurang dalam bidang akademik.

Beduduk ari pekara nya, Ketuai Pemesai Eksekutif GiatMara Datuk Rosdi Ismail madah, sida diatu benung chakah nentuka pelatih ti pansut ari GiatMara tetapika peminta makit sereta begaji besai.

Iya madah, GiatMara ari taun 1986 nyentuk ke diatu udah mujur nempa 302,000 iku pelatih serata menua, ti bisi ngambi entara 55 bidang ti disediaka.

Ari 302,000 iku pelatih nya urung 85 peratus dalam bidang pengelandik ti nyadi pengereja pengawa bepengelandik lalu urung 10 peratus nya dalam pengawa dagang sereta ke lebih nya nampung pelajar, ku iya.

"Nya alai, juluk kami diatu nengah pengawa beserakup deka nempa mayuh agi pelatih tauka pekereja bepengelandik tinggi lalu teulihka gaji tinggi, lalu kompeni ke endur sida gawa mega puas ati ba kereja ti ngujungka kompeni mujur.

"Diatu kitai ulih meda orang ti ngambi sereta nambahka pengelandik taja pan enda manah dalam akademik, ulih begaji besai iya nya dalam sebulan gaji manggai entara RM7,000-RM10,000 sereta tetapika peminta guna di menua tasik," ku iya

Ngenang MoU ti disain nya ti bekaul bidang welding dalam minyak enggau gis, ari 231 palan GiatMara di Sarawak bisi lapan palan nya nyendiaka kos dalam Bidang Kimpalan Asas enggau Kimpalan Pertengahan.

Lapan palan nya nyengkaum di Betong, Lawas, Limbang, Lubok Antu, Miri, Mukah, santubong enggau Selangau.

"Reti iya dalam setaun Sarawak ulih nempa urung 300-400 iku pelatih dalam bidang Kimpalan, lalu ari taun 1998 nyentuk diatu Sarawak udah nempa 2,200 iku pelatih dalam bidang nya sereta udah gawa ba endur nitihka pengelandik.

"Kitai ngarapka nengah kerejasama ke disain seharitu, kitai ulih nempa 60,000 iku pengereja pengawa bepengelandik dalam bidang ke patut ke lalu ulih gawa ba Limbungan Brooke," ku iya.

Kelimpah ari nya, Chairman Perbadanan Urusan Kejuruteraan dan Limbungan Brooke  Datuk Abang Abdul Karim Tun Openg madah, tuju sempekat nya disain endang dikena mantu peranak nengeri teulihka penatai pemisi tinggi nengah bidang pengelandik.

"Tuju tauka juluk kerejasama (entara Brooke Dockyard, GiatMara Malaysia enggau Gigih Avenue) iya nya deka meri peluang gawa bepenatai pemisi tinggi nagai peranak nengeri sereta nyungkakka tikas ekonomi, lebih agi di kandang Santubong enggau Demak Laut.

Pengawa nyain sempekat nya kemari dikemataka Kaban Kunsil (ADUN) Demak Laut Dr. Hazlan Hipni ti ngarika Menteri Pemansang Infrastruktur enggau Penyambung Datuk Sri Michael Manyin Jawong.

MoU nya meri peluang ngagai pelatih welding ke dipilih ari lapan palan GiatMara serata Sarawak nitihka latihan pengelama empat bulan di Pusat Latihan Lanjutan Kimpalan GiatMara – Gigih Avenue di Kawasan Industri Mara (KIM) Demak Laut udah nya latihan industri pengelama dua bulan di Brooke Dockyard Sejingkat.

Bisi datai ba pengerami tu Chairman Gigih Avenue Sdn Bhd Abdul Rashid Mohd Sidek enggau ke bukai.

Print Friendly