Sebana nya udah dikenatai ngagai ejensi bekuasa BorneoPost Online | Borneo , Malaysia, Sarawak Daily News » Berita Iban - New 2 Borneo |
- Sebana nya udah dikenatai ngagai ejensi bekuasa
- Peranak SPPS napi penanggul ti sebaka belama
- STA mujur nyapai juluk ari iring Taib maya iya nyadi Kepala Menteri suba
- Atur meresi ulah gian dadah deka berengkah Jun tu
- Tuai rumah patut bekempit enggau perintah ke penguntung rayat
- Bekempit enggau JTS ba pengawa nyukat tanah
| Sebana nya udah dikenatai ngagai ejensi bekuasa Posted: 29 May 2014 09:05 AM PDT Pemar ukai semina nadai surat kuasa, enda dibayar elawin, jaku tuai rumah tu pan dikemengal: Anthony Dikarang Chris Bishop // KUCHING: Meruan mayuh raban tuai rumah di Pelilih Kuching bejalaika tanggung pengawa nyadi ketuai genturung pendiau enda dibayar elawin tajapan pekara nya udah dikenatai ngagai ejensi ti bekuasa. Minta pekara nya diputar enggau lengkas, ku Chairman Serakup Dayak Iban Sarawak (SADIA) pampang Kuching Datuk Dr Anthony Nait ke kala ngenataika isu nya ngagai ejensi perintah sereta dipansut ba surat kabar ba taun 2012 suba lalu berebak enggau jaku tangkan Kepala Menteri Tan Sri Datuk Amar Adenan Satem tu tadi, dikearap pekara nya dikemerat. Apin lama ke udah Menteri Pengatur Pengeraja Asal anggau Rampa Menua Datuk Amar Awang Tengah Ali Hassan bisi madah, Kepala Menteri ngansak isu tuai rumah ke nadai diberi surat chiri diputar enggau lengkas. Awang Tengah mansutka jaku nya ba sebengkah pengerami nutup Pesta Medamit berebak enggau pengawa Mantar Gawai ungkup pelilih Limbang di Nanga Medamit malam Hari Minggu tu tadi. Nait madah, enda kurang ari lapan iku tuai rumah di Pelilih Kuching bejalaika tanggung pengawa sida tang nadai diberi elawin kandang lima ngagai sepuluh taun. "Tajapan sida mangku tanggung pengawa nya, iya ke amat sida mengkang nyadi pemangku aja ketegal nadai surat chiri ke sah ari perintah. "Enti nadai surat chiri, raban tuai rumah tu enda diberi elawin ari perintah," ku iya madah ngagai Utusan Borneo kemari. Nait nambah, raban tuai rumah tu suah dipinta datai ngagai opis pelilih menua sereta ngulu sesebengkah atur pengawa ngena belanja diri, enda dibayar elawin, nadai ganti minyak entukar tauka mutosikal. Iya mega madah, kuasa sida tuai rumah tu bisi sekat lalu suah mega sida disangkal sekeda orang. "Aku ngasai, nengah pelasar SADIA isu ke ditapi raban tuai rumah tu patut bendar dikemeratka ejensi ti bekuasa ngambika sida muntang agi bejalaika pengawa. "Aku mega minta pekara tu diperatika enggau berat munyi tangkan ari Kepala Menteri ke dikenataika Awang Tengah maya sebengkah pengerami empai lama ke udah," tandu iya. Ngenang kaul ke sama, Nait minta ejensi perintah enda kelalu lama netapka pemutus nyambung konterik raban tuai rumah ti udah tembu timpuh. Ku iya, enti pemutus kelalu lama raban tuai rumah enda ulih ngena kuasa sida ketegal timpuh ke dulu udah abis. "Sekeda nya nyau nganti pengelama 8 bulan baru konterik disambung. Pekara tu ukai semina meri penanggul ngagai rakyat tang mega tau ngeruga pemanah sistem perintah," ku iya. Ba pengerami ke diatur di Nanga Medamit, Awang Tengah lebuh nyaut tanya Pemancha Willie madah : "Kepala Menteri minta pekara tu diputar enggau lengkas. Sekeda tuai rumah udah lama meri servis enggau chukup penaluk lalu sida sigi ngembuan pengelandik". Diperita, entara sekeda tuai rumah di pelilih Kuching ke nadai surat chiri iya nya Tuai Rumah Kpg Desa Wira Fasa 3, Kpg Sg Medin Semariang, Kpg. Tabuan Lalang, Kpg Stutong Baru, Kpg Samariang Baru Fasa 2/3/4/5, Kpg Demak. Kpg Stapok enggau Taman Malihah.   |
| Peranak SPPS napi penanggul ti sebaka belama Posted: 29 May 2014 09:02 AM PDT Penusah suntuk ai beresi endang suah ditapi sida taja pan sebana nya udah dibantai maya AUM DUN Dikarang Judan Bungap // SIBU: Peranak menua ti nguan Skim Pengentap Pendiau Skuau (SPPS) deka ngasaika ai beresi baka selama maya Gawai Dayak ti deka datai, ku Kaban Kunsil Nengeri (ADUN) Tamin Datuk Joseph Mauh. Iya mantaika jaku tu maya dikerandau pengarang berita ensana. Ku iya, Opis Kereja Raya (JKR) deka dipadah senentang penanggul bekal ai beresi ke bisi nuntung peranak menua nya. "Aku udah nemu penusah ke nyadi tu lalu nya mega ukai penusah ke baru. "Keba aku empu udah mai pekara tu ngagai aum Kunsil Nengeri (DUN) berandau baka ni tau mutarka penusah tu. "Tang nyentuk ke sehari tu peranak menua nya mengkang ngasaika penusah ti sebaka," ku iya. Maya ditanya nama kebuah penusah nya nyadi, ku Mauh, pengawa berundingka chara mutar penusah nya nganti Pelin Pemansang Malaysia nangkan ke tu ila. Kebuah pia ku iya, laban paip lama ba menua nya deka diganti ngena ke baru lalu bekenaka ungkus ti besai. Ketegal pekara tu Mauh madah, ka pan enda peranak Skuau diberi bantu ai ninting maya bisi penanggul ai nyadi di menua sida. Ensana, Kaunsilor Andrewson Ngalai minta opis ti bekaul lengkas mutarka penusah suntuk ai ke nyadi nuntung sekeda peranak rumah panjai di Skuau kenyau dua minggu ke udah. Rayat dia nangi bendar penusah baka nya mengkang ditapi sida maya Hari Gawai pan nyau semak. Nambahka nya, hari dipelabaka kemarau maya Gawai Dayak taun tu. "Aku minta, opis enggau sida ti bekaul berunding enggau lengkas baka ni mutarka penusah ke nuntung kami ditu. "Kami nangi bendar laban Gawai Dayak nyau majak semak," ku iya. |
| STA mujur nyapai juluk ari iring Taib maya iya nyadi Kepala Menteri suba Posted: 29 May 2014 09:02 AM PDT KUCHING: Iring tauka pegai Tuai Pemegai Menua (TYT) Tun Pehin Sri Abdul Taib Mahmud lebuh maya iya Kepala Menteri udah ngasuh Persatuan Perkayuan Sarawak (STA) tampak nama ukai semina di rantau tu tang mega renggat antarabansa. Chairman STA, Pemanca Datuk Wong Kie Yik madah, semina ketuai ti bisi juluk ulih mai ukai semina dalam industri kayu ramu ke numbas pemesai tang udah nempa pengulih penatai pemisi manggai RM7 billiun taun nyin kemari. Ku iya, industri tu udah mantu nyendiaka mayuh peluang pengawa lalu naka ke diatu tetapika urung 100,000 iku staf. "Tun Pehin Sri udah bebendar ngemansangka industri kayu ramu taja dipejai sekeda Gerempung Ukai Dikuasa Perintah (NGO) ba pekara kampung tang ba taun 1989 iya enggau berani ngasuh ITTO datai ke Sarawak ngenuku ngena mata diri laban ngenggaika tagang eksport batang kayu segala. "Tang iya meransang mayuh agi industri bepelasarka kayu ramu dikemansang ngambi ulih mantu menua tu empu sereta enda bepanggai ba royalti ngulihka insentif. "Kitai berasai temegah laban ngasaika pemansang nya mujur dalam industri ngeluarka asil ari kayu lalu teulihka penatai pemisi tinggi, enda melakangka pengereja pengawa dalam industri nya," ku iya nengah teks ti dibacha Setiausaha Kehormat STA Dato Henry Lau Lee Kong ba pengerami 'Makan Malam Penghargaan STA Kepada TYT dan Mengalukan Ketua Menteri Baharu' ditu ensana. Wong mega madah, Taib meransang semua pengemeran idustri kayu ramu masuk STA ngambika dalam gerempung nya ulih berandau ngiga jalai pemadu manah ngemansangka industri nya. "Nengah chara tu, industri kayu ramu ulih nempa kerejasama nyadi sebengkah gerempung ke ulih berunding enggau ejensi perintah," ku iya. Berindik ari nya, Wong ngarapka Kepala Menteri ke baru Tan Sri Datuk Amar Adenan Satem ulih nampung utai ti udah dipun sereta dipejalaika Taib sebedau tu ngambika industri kayu ramu ulih datai ba tikas ti tinggi agi, ukai semina nyulut dalam rantau tu tang ba renggat antarabansa. "Industri kayu ramu amat beguna sereta sebengkah ari penambah ekonomi di nengeri tu tang di rantau tropika betapi enggau mayuh isu dalam makit antarabansa. "Nengah kerejasama rat, kitai ulih mutarka isu ke pemanah industri di nengeri tu sereta menua dibaruh pegai Kepala Menteri ti baru," ku iya. Kelimpah ari nya, ku iya, STA mega deka terus ngena premium Industri Perkayuan Sarawak sereta meri penguntung ngagai industi kayu ramu enggau nempa kerejasama nengah ejensi ti bekaul. Pengerami malam ensanus dikena meri basa sereta ngayanka gelar tinggi ngagai Taib laban ti nyadi perintis indusrti kayu ramu di Sarawak pengelama nyadi Kepala Menteri ari taun 1981 ngagai 2014, iring ti nyulut dalam timpuh 33 taun. Bisi datai ba pengerami nya Taib enggau bini iya Toh Puan Sri Raghad Kurdi Taib, Adena enggau bini Puan Sri Datuk Jamilah Anu, Sapit Kepala Menteri Datuk Patinggi Tan Sri Alfred Jabu, Menteri Pengatur Pemansang Pengeraja Asal enggau Rampa Menua II Datuk Amar Awang Tengah Ali Hasan, Menteri Wang Kedua Dato Sri Wong Soon Koh enggau Menteri Pemansang Tanah Tan Sri Dr James Jemut Masing. Nyerumba pengerami nya, STA meri pingat 'Ahli Emas' ngagai Taib enggau Adenan. Taib mega meda pengawa bejadika projek bup 'A Life in Sarawak Timber – Up Close and Personal' STA ti dipenyadika Adenan. |
| Atur meresi ulah gian dadah deka berengkah Jun tu Posted: 29 May 2014 09:01 AM PDT KUCHING: Ejensi Anti Dadah Menua (AADK) Sarawak deka bejalaika operasyen nangkap orang gian dadah di serata nengeri berengkah bulan Jun tu ila. Sapit Ketuai Direktor (Operasyen) AADK Malaysia Izhar Abdul Talib netapka Pelilih Kuching deka nyadi palan endur ngepunka operasyen besai nya ke alai pengawa ke sama deka diatur di pelilih bukai nangkanka nya. "Berengkah bulan Jun tu AADK Sarawak deka ngepunka operasyen di pelilih Kuching nengah kerejasama Opis Narkotik Polis sereta ejensi bukai ke bekaul. "Pengudah nya operasyen ke sama deka diatur di Kota Samarahan, Sri Aman, Betong, Sibu, Sarikei, Kapit, Mukah, Limbang enggau Bintulu. "Tuju operasyen iya nya ngambika orang gian dadah ulih dianjung berubat ba palan perubat orang gian dadah di nengeri tu kelimpah ari kitai meri penerang senentang penyalah gian dadah ngagai mensia mayuh," ku iya. Iya mansutka jaku tu ba sebengkah aum pengarang berita pengudah ngulu aum 'Majlis Tindakan Membanteras Dadah (MTMD)' Nengeri Sarawak ti bechairmanka Menteri Pemansang Rama Tan Sri William Mawan di Begunan Akademi Percukaian Malaysia ditu, kemari. Izhar mega madah 1,750 iku orang gian dadah udah dirikod di nengeri tu dalam timpuh bulan Januari 2011 nyentuk April 2014 lalu ari penyampau nya, 95 iku kes nandu ngereja penyalah gian dadah baru. "Operasyen mega deka ngiga orang gian dadah tauka 'Orang Kena Pengawasan' ti dikemendar pulai ngagai komuniti ngambika tau nentu tikas pemanah ulah. "Kelimpah ari nya, operasyen mega ngiga 'Orang Kena Pengawasan' ti udah dikeluar waran tangkap," ku iya. Ba kaul ke sama, dikena nentuka penyalah gian dadah ulih disekat, AADK ba taun 2014 deka beratika enggau silik tiap genturung pendiau ba genap pelilih menua kelebih agi ba kandang endur ti disadang tau nyadi kes gian dadah. Ku iya, genturung pendiau nya deka dipantau enggau silik ke alai mayuh macham program ngemulaika pemanah ulah deka disedia ungkup sida ti ditemu gian dadah. Ngemujurka juluk nya, Izhar madah dua genturung pendiau di pelilih Kuching iya nya Tabuan enggau Bandar Baru Samariang udah ditemu endur bejalaika program. Iya madah chara ke sama mega deka dikena ba pelilih bukai enggau tuju nentuka tiap pelilih menua nadai ngembuan penyalah gian dadah. |
| Tuai rumah patut bekempit enggau perintah ke penguntung rayat Posted: 29 May 2014 09:01 AM PDT PANTU: Kaban Kunsil Sitak (DUN) Balai Ringin Snowdan Lawan ngelalau raban tuai rumah ke dibaruh kuasa iya bela ngembuan runding ke sama enggau perintah ungkup pemaik rayat. Ku iya, tuai rumah megai tanggung pengawa mantu rayat lalu sida patut meri kerejasama ngagai pengari rayat (YB), residen, pemesai pelilih menua enggau ejensi perintah ke bukai. "Nyadi seiku tuai rumah, nuan patut bejalai sereta bekereja segulai enggau perintah ketegal mayuh tusun pemansang udah disedia ungkup rayat,"ku iya maya ngemujur pengawa nyuaka setipikit chiri ngagai 21 tuai rumah Hari Tiga tu tadi. Projek bekal ai, lekterik enggau jalai entara sekeda projek ke udah disediaka perintah, tandu iya. Pengawa diatur di Rumah Christopher Ambu, Aping Dadak lalu bela digulu Pemesai Pelilih (DO) Sri Aman Ismawi Salleh sereta 60 iku tuai rumah bukai ke diau besemak. Snowdan nerang, entara sekeda tanggung pengawa tuai rumah iya nya ngintu pemaik rayat ke dipegai sida kelimpah ti nyaup ngemujur program ke udah disedia perintah lalu semua tanggung pengawa nya bisi diterang ba surat chiri ke diterima tiap iku tuai rumah. Iya nambah tuai rumah patut adil maya bejalaika tanggung pengawa diri lalu anang sekali miakka kaban, diri sebilik tauka suku juru bukai. "Maya bejalaika tanggung pengawa, anang sekali nundaka asai ati sereta ketegal ti deka ngemantup juluk diri . . . tanggung pengawa patut diadu enggau adil sereta lurus,"ku iya. Snowdan mega temegah enggau penyerakup ke udah ayan di tiap rumah panjai lalu iya ngansak semua peranak meri kerejasama ngagai tuai rumah. Iya (Snowdan) besemaya deka mai mayuh agi pemansang nengah atur ke engekeman. Ngambi chunto ke nyadi ba sebuah rumah panjai di Pantu ke alai 3 buah ruang bilik ti enda sepenemu enggau tuai rumah udah merambu ngaga dinding ba ruai, Snowdan madah pekara nya patut enda nyadi. Kelimpah ari nya, Snowdan setuju enggau penemu Ismawi ti dulu agi ari nya ngelalau raban tuai rumah nemu sekeda undang-undang tanah NCR sereta nemu kati chara bekena teknologi pemadah. Snowdan udah nya bisi nyuaka projek mit menua pesisir (MRP) penyampau RM5, 000 ngagai tiap 25 buah rumah panjai sereta RM3, 000 ngagai Gerempuang Tuai Rumah Pelilih Sri Aman. |
| Bekempit enggau JTS ba pengawa nyukat tanah Posted: 28 May 2014 09:05 AM PDT Dikarang Rengenyan Labang // BAU: Peranak nengeri lebih agi bansa Bidayuh patut ngempit Opis Tanah enggau Survei (JTS) ba pengawa nyukat tanah Adat Bansa Asal (NCR) nengah Seksyen 18 Kanun Tanah Negeri (KTN), ke nyendiaka mayuh pengelebih ngagai pengempu tanah. Menteri Pemansang Infrastruktur enggau Penyambung, Dato Sri Michael Manyin Jawong madah, tanah NCR ke udah disukat nengah inisiatif baru sereta dikeluarka surat pala tanah enda muntang diambu orang bukai. "Enti disukat nengah Sekyen 18 KTN, tanah NCR ke udah bisi pala nadai timpuh pengelama ngempu tanah nya sereta nadai chukai tanah, nadai bayar ungkus nyukat kelimpah ari nadai bayar premium. "Tang nyema tanah NCR nya dijual ngagai orang bukai (ukai diri sebilik) dia chukai tanah patut dibayar urung RM2 sehektar ngagai pengempu baru. "Petenah pekara dalam politik ti madahka perintah ngerampas tanah rayat, nya pekara ti enda amat. Laban tanah ke udah bisi pala ba jari pengempu (tanah), nadai ulih ambu orang bukai," ku iya. Manyin ti mega Penyanding Penemu Serakup Bansa Dayak Bidayuh (DBNA) mansutka pekara nya lebuh bejadika Majlis Pelancaran Pengukuran Lot Individu dibaruh Seksyen 18 KTN nengah inisiatif baru NCR Genturung Pendiau Sibuluh enggau Genturung Pendiau Grogo, Bau ti diatur ba Dewan Suarah Bau ditu, ensana. Ngenang pengawa nyukat perimeter survei enggau lot individual dalam raban bansa Bidayuh iya madah, DBNA bisi tanggungpengawa mantu ngaga dokumen sebedau disukat JTS. Iya madahka DBNA berangkah ngaga pengawa dokumen tanah NCR raban bansa Bidayuh dipejalaika ari taun 2007 iya nya Genturung Pendiau Skuduk enggau Genturung Pendiau Pisa. "Nyentukka seharitu (kelimpah ari Genturung Pendiau skuduk enggau Genturung Pendiau Pisa) bisi 41 genturung pendiau Bidayuh udah tembu digaga dokumen (dokumentasi) sereta deka diserah ngagai JTS ngambika disukat. "Kitai ngarapka chara tu (dokuemntasi) sereta kerejasama ari semua piak enggau nadai berebut tauka beserak ambu tanah ulih ngeyampatka timpuh JTS nyukat tanah NCR enggau ngurangka ungkus belanja," ku iya. Dulu ari nya dalam jaku pengelalu, Chairman DBNA ti mega Mendam Sekretari Opis Menteri Dagang Temuai Datu Ik Pahon madahka, bisi 388 buah genturung pendiau Bidayuh udah berijista enggau DBNA. Iya madahka DBNA chakah mutarka penanggul beserak ambu ngambika pengawa nyukat tanah ulih dipejalaika. "Kami DBNA deka lebih chakah ngadu worksyop nengah komiti tanah ngagai genturung pendiau bekaul enggau pengawa ngaga dokument tanah NCR ti udah dipejalaika ari taun 2007, ti dikena mantu perintah ngenyampatka pengawa nyukat," ku iya. Sama bisi datai ngagai pengerami nya kemari, Menteri Muda Pemansang Raban Bansa ti mega Kaban Kunsil Nengeri (ADUN) Tasik Biru Datuk Peter Nansian Ngusie, ADUN Opar Ranum Mina, Penolong Pengarah Tanah JTS Abdullah Julaihi enggau Penguasa JTS Bagi NCR Taib Belal enggau ke bukai. |
| You are subscribed to email updates from BorneoPost Online | Borneo , Malaysia, Sarawak Daily News » Berita Iban To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |