» »Unlabelled » Berengkah ngerijista kelas ngajat diatu: Mabong BorneoPost Online | Borneo , Malaysia, Sarawak Daily News » Berita Iban - New 2 Borneo

05:12:00

Berengkah ngerijista kelas ngajat diatu: Mabong BorneoPost Online | Borneo , Malaysia, Sarawak Daily News » Berita Iban - New 2 Borneo

Berengkah ngerijista kelas ngajat diatu: Mabong

Posted: 13 May 2014 03:53 PM PDT

Dikarang Rengenyan Labang

KUCHING: Indu Opis SADIA (Serakup Dayak Iban Sarawak) enggau SADIA pampang Kuching deka ngatur kelas ngajat renggat kedua bulan September tu.

Pengatur program ngajat, Mabong Unggang madah, nya berindik ari sukung enggau timbal ti manah ari orang ti belajar ngajar renggat keterubah.

Kelas belajar ngajat nya diatur Indu Opis SADIA (Serakup Dayak Iban Sarawak) enggau SADIA pampang Kuching.

"Orang mayuh ke masuk kelas belajar ngajat ba renggat kedua tau ngerijista nama berengkah ari ujung bulan Mei tu, lalu kelas nya ila dipelabaka deka diatur bulan September.

"Kelas belajar ngajat tu tebuka ngagai semua renggat umur, enda ngira lelaki tauka indu, mit tauka besai. Kelas tu diatur ba Indu Opis SADIA di Kota Sentosa enggau opis SADIA pampang Kuching.

"Sapa ke deka masuk kelas belajar ngajat tu tau betanya ngagai aku empu ba lumur 012-6925562 tauka ngagai Henry Guya 017-598269 enggau Florence Asong@Mang Jawai ba lumur 019-8861769," ku iya madah ngagai pengarang berita.

Tuju numbuhka kelas belajar ngajat nya ngambika pengawa asal Iban baka ngajat ulih dipelajar sereta ditampung renggat dudi lebih agi raban nembiak, ngambi enda punas nyerunyut ubah pemansang.

Nitihku Mabong, bisi 40 iku lelaki enggau 61 iku indu ti beumur enam taun ngagai 57 taun enggau masuk kelas belajar renggat keterubah ti berengkah pun bulan Mei tu tadi.

Berebak enggau tu iya ngarapka kitai bansa Iban terus angkunka main asal diri sereta nguna peluang ti bisi disediaka gerempung.

"Aku chukup gaga ati meda pemayuh orang ti agi rindu sereta angkunka main asal kitai Iban baka ngajat tu. Semina ari ngatur kelas baka tu aja meh kitai ulih ngidupka main asal bansa diri.

"Bisi sekeda ke datai nya meri peransang ngagai SADIA ngatur program main asal ke bukai baka kelas belajar betabuh," ku iya.

Print Friendly

Pemujur Program Mantar Gawai 2014 ngelaika penyerakup bansa, ku Uggah

Posted: 13 May 2014 03:53 PM PDT

BETONG: Pengerami bejalai bebala mayuh Mantar Gawai 2014 Tikas Pelilih Betong kemari mandangka pengelikun ti setipak enggau Konsep 1Malaysia.

Menteri Bekebun Bedandang Besai enggau Komoditi Malaysia, Datuk Amar Douglas Uggah Embas madah, iya berasai gagit sereta temegah meda pengerami nya ti ngelaika rayat 1Malaysia.

"Pengerami bejalai bebala mayuh ti diatur kedua kali pengudah taun 2013 nya nyelai ungkup peranak pelilih Betong kelimpah ngetanka penyerakup enda ngira bansa enggau jalai pengarap" ku iya lebuh bejaku bejadika Program Mantar Gawai 2014 ba laman Dewan Rentap ditu.

Tu meh Konsep 1Malaysia ti lama udah dikemeran peranak Sarawak ti mandangka penyerakup bansa ti sama bela meretika adat asal pangan diri, tandu iya.

Pengrami nya digulu urung seribu iku mensia.

Uggah ke mega Kaban Parlimen Betong madah, kelimpah ari ngetanka penyerakup bansa, iya arapka Opis Residen Pelilih Betong ulih ngangkatka Betong ngagai tikas ke tinggi agi ngambika mayuh agi temuai datai ke Betong.

Nya alai, produk pemakai patut dikelalu ngambika ekonomi rayat lebih agi di Betong dikelala temuai ari luar.

Ambika chunto, Mukah tebilang enggau produk mulong sereta manta.Udah datai ba maya peranak Betong enggau pemakai ari Betong dikelaku ngambika ulih nyaup nyungkak sereta ngenegapka ekonomi peranak ditu.

Iya arapka Opis Residen bejalaika tanggungpengawa nya.

Ba pengawa bejalai bebala mayuh nya, bisi 21 raban penyereta ti ngarika ejensi perintah, peribit, NGO enggau sekula.

Dalam pekit bebaris ungkup kategori A ( ejensi perintah, peribit enggau NGO),Opis Kaunsil Pelilih Mit Betong mujur nyadi champian, Sepital Betong bulih lumur dua ditangkanka SALCRA ba lumur tiga.

Ba Kategori B iya nya kategori Ketuai Raban Bansa enggau Gerempung Ukai Dikuasa Peintah (NGO), Serakup Induk Dayak Sarawak (SIDS) Betong udah mujur bulih gelar champian, Komiti Pemansang enggau Pengelikun Genturung Pendiau (JKKK) Entanak bulih lumur dua ditangkanka Ketuai Raban Bansa Pelilih Betong ba lumur tiga.

Ba kategori C, kategori Sekula Sekondari enggau Primari, Sekula Primari (SK) Saint Agustine udah dipilih nyadi champian, SMK Saint Agustine ba lumur kedua ditangkanka SMK Datuk Patinggi Kedit ba lumur tiga .

Semua pemenang diberi perais mata duit ke alai champian nerima RM 500, kedua RM 300, ketiga RM 200 enggau saguhati RM 100.

SK Saint Agustine ulih dipilih nyadi champian semua pekit nya ke alai sida nerima perais mata duit RM 700. Tu kedua kali udah menang kenyau ari taun 2013 suba.

Perais nya disuaka Datuk Amar Douglas Uggah.

Nangkanka nya, Uggah enggau Menteri Muda Pengintu Pengelantang Pendiau Sarawak, Robert Lawson lalu bejalai matau palan bejual ti disediaka raban pengatur pengerami.

Bela bisi ngulu pengerami nya, Residen Betong Datu Romie Sigan Daniel, Sekretari Politik Sapit Kepala Menteri, Isik Utau enggau Dr Richard Rapu sereta bala ketuai opis perintah ke bukai.

Print Friendly

Perintah merambu mindahka sekeda genturung pendiau tradisional ngagai pengentap baru

Posted: 13 May 2014 03:52 PM PDT

Dikarang Jacqueline David

KUCHING: Sekeda genturung pendiau tradisional di nengeri tu benung diperambu perintah ngambika dipindah ngagai skim pengentap pendiau ke baru taja pan atur nya bedau dipejalai diatu.

Sapit Menteri Dalam Menua Datuk Wan Junaidi Tuanku Jaafar madah, program perintah deka mindah sekeda genturung pendiau tradisional bedau diatur diatu laban iya begunaka timpuh ke panjai sereta kos ti besai.

"Ngenang rumah di genturung pendiau Tabuan Foochow ditu, enti ulih rumah patut jauh agi ari  pangan diri.

"Kitai patut berubah laban perintah mayuh udah nyendiaka rumah baka Rumah Mesra Rakyat (RMR), Rumah Mampu Milik (RMM) enggau sekeda program pengawa berumah bukai.

"Kitai enda ibuh takut pindah ngagai endur bukai, bala anak pan anang takut pindah ke bukai laban rumah ke endang digaga enggau manah likun sereta nyamai alai diau, ari kitai ngaga langkau tauka rumah sepiak apai indai kitai tang enda likun ba kitai empu," ku Wan Junaidi.

Iya madah baka nya lebuh ngelawa sida ke kena tinggang penusah angus apin lama ke udah di genturung pendiau Tabuan Haji Drahman (Tabuan Foochow) ditu, kemari.

Iya madah, genturung pendiau nya endang udah dia kenyau taun 1960 kelia, tang maya nya ku iya, penyauh takah rumah ari pangan diri enda semak baka kediatu, tang udah nyadi adat diau dalam genturung pendiau bansa nya, enti seiku ari anak udah belaki tauka bebini, sida iya lalu ngentak rumah sepiak apai indai diri.

" Nya alai, gaya rumah ke digaga di genturung pendiau tradisional bansa tu endang enda likun laban penyemak rumah enggau pangan diri. Enti bisi penusah baka angus, sigi tusah deka diseliahka. Rumah tradisional baka tu ukai semina di sarawak tang di serata menua lebih agi di Sarawak," ku iya ke kala diau di genturung pendiu nya kelia.

Nya alai ku iya, mensia ke diau di genturung pendiau bansa nya patut nyaga pengelikun diri.

"Enti bisi penusah angus, taja pan Bomba datai jampat enda ulih nyelamatka rumah angus nya. Nasit semina 8 buah aja ke angus, tang enti iya angus baru, iya tau ngerampit mayuh agi rumah," ku iya.

Kena Hari Empat minggu nyin tadi, lapan buah rumah (64 iku diri sebilik) ke betampung angus kena empa api di geturung pendiau nya ke nyadi dalam urung pukul 10.30 pagi ti ngujungka seiku bini orang enggau dua iku anak mit parai angus.

Penusah nya dipelaba bepun ari wayar karan rumah ke enda digaga enggau manah ke lalu ngujungka rumah nya angus.

Kelimpah ari nya, Wan Junaidi madah iya deka baum enggau ketuai raban bansa enggau penghulu di sitak nya, nyengkaum Opis Menteri Pemansang Menua Pesisir enggau Kandang Menua bejuraika chara ngemansangka endur nya baru, tauka mantu ngulihka pepenerang bekaul enggau peminta bantu Rumah PPRT ti bisi disediaka ungkup ruang bilik komuniti dia, enda ngira bansa Melayu, Iban tauka China.

Ari penusah ke ninggang sekeda orang di genturung pendiau dia, dua iku agi anak indu niang Anisa Ramblee ke parai tu tadi deka dibantu Yayasan Sarawak nengah bini Kepala Menteri, Datuk Sri Jamilah Anu.

Nengah Palan Servis Kaban Parlimen Santubong nya mega, sida mega bisi meri bantu barang ke ulih dikena sida beridup nyengkaum mata duit RM36,400.

Wan Junaidi mega beterima kasih ngagai mensia mayuh ke diau ngelingi genturung pendiau ke mayuh ari sida nya bansa China sama mantu penusah nya.

"Komuniti China sereta pemesai pengarap China bisi datai mantu meri pemakai sereta tulung bukai. Aku meri besai ngagai bantu ari semua serak rayat di nengeri tu," tandu iya.

Print Friendly

Pansik pengamat seiku lecturer kolej komuniti ti bejaika Sarawak

Posted: 13 May 2014 03:52 PM PDT

KUCHING: Menteri Pengintu Pengelantang Pendiau, Orang Indu enggau Pemansang Ruang Bilik minta Kolej Komuniti mansik sereta ngenukuka pengamat pekara bekaul enggau seiku lecturer kolej nya ti bejai Sarawak, baka ti diayanka dalam Facebook.

Menteri iya, Fatimah Abdullah madah, ulah lecturer ti baka nya ngeruga pemanah kaul entara Sarawak enggau Semenanjung Malaysia.

"Laban pekara nya udah ditemu mensia mayuh sereta enda dipelalai agi, aku minta piak ti patut ambika banding tu bekaul enggau Kolej Komuniti, sida enda tau mansik sereta ngenukuka nama cherita ke bendar.

"Enti iya nyebut pekara ti enda patut baka bisi bepiak penatai asal, nya enda manah laban ulih ngeruga penyerakup Sarawak enggau Semenanjung Malaysia.

"Kitai beratka penyerakup sereta bebasaka pangan diri, ukai nempa pengeruga ti ngasuh begedi enggau ringat," ku iya.

Fatimah mansutka pekara nya lebuh ditanya bekaul enggau seiku lecturer ari Kolej Komuniti apin lama bisi nulis pekara ti enda manah dalam Facebook.

Ngenang baru, Fatimah ti nyaga pekara pelajar nengeri Sarawak madah, lecturer nya patut mandangka seiku pengajar ti bekualiti sereta ngembuan tanggungpengawa ke menua.

Iya madah, menua mekuh kualti pengajar enggau pemesai ba renggat pelajar, nya alai pengajar nyengkaum lecturer patut nyendiaka servis manah dalam pelajar.

Ulah ti begedi sereta ringat nya ulih ngeruga juluk menua ti deka nempa pelajar bekualiti sekalika renggat sekula tauka kolej, institut pelajar tinggi.

"Pekara tu patut dikemerat laban kitai bebendar deka meda transformasyen pelajar mujur iya nya nempa modal mensia bekualiti tikas dunya.

"Pangka ari pekara tu, enti pengajar tauka lecturer enggai meri servis bekualiti, piak ti bekaul patut bejalaika pansik ba pekara tu.

"Enti pengajar tauka lecturer ti diberi tanggungpengawa bejalaika pengawa nyadi pengajar tang enda nitihka patut, nya tau ngeruga juluk enggau output transformasyen sistem pelajar," ku iya.

Print Friendly

Dennis: Kenyau lima taun ke udah, penyampau peranak Telang Usan ke nadai KP majak mimit

Posted: 13 May 2014 03:52 PM PDT

KUCHING: Lima taun ke udah, beribu peranak  Telang Usan nadai kad pengelala (KP) tang diatu semina urung 500 – 600 aja tinggal.

Pemujur tu asil ari pengawa Opis Pengerijista Bansa (JPN) Sarawak nengah 'Unit Khas Bergerak' (UKB) enggau pengelunggar atur kena gaga sereta ngisi pom Mykad enggau surat beranak.

Kaban Kunsil Nengeri (ADUN) Telang Usan Dennis Ngau (gambar) madah, diatu mayuh ari rayat ke diau di sitak nya udah bisi kad pengelala udah perintah ngemuntangka proses enda ngukum enti pengawa ngerijista nya laun digaga.

Iya madah ngelama tu rayat di sitak nya seruran bedalih kebuah enda betati ngaga dokumen nya, ketegal suntuk.

"Diatu kitai meratika pemayuh rayat di Telang Usan ke nadai kad pengelala nyangka bisi dalam 500 tauka 600 tauka kurang ari nya.

"Tu laban mayuh rayat ti udah nemu pemerat bisi dokumen kad pengelala," ku iya madah maya dikerandau malam kemari.

Iya madah opis JPN mega udah dibuka di Long Lama ngambika ngemuntangka rayat di sitak nya ngaga dokumen pengelala lalu enda ibuh ke Marudi baka ngelama tu.

Iya mega madahka, urung 90 peratus ari 13,000 komuniti Penan mega udah bisi dokumen kad pengelala.

"Nya alai, jaku penyakal ke madahka nyauka 10,000 rayat di sitak Telang Usan nadai kad pengelala nya enda betul lalu semina digaga nyadi isu politik aja," ku iya.

Lebuh dikerandau bekait enggau tekad ai Baram, Dennis madah, iya siti ari singkang Perintah nusun baru Telang Usan enggau sekeda sitak besemak enggau sitak nya.

"Tekad ai nya peluang ke pengabis manah beratika mayuh agi pemansang deka dibuka tauka dipejalaika di sitak Telang Usan.

"Di sitak tekad ai nya mega deka dibuka Bandar Baru Telang Usan ke deka nyadi palan ke mai penguntung ngagai rayat di sitak nya kelimpah ari nyendiaka peluang pengawa," ku iya.

Print Friendly

Kemeratka identiti bansa Dayak, ku William Mawan

Posted: 13 May 2014 03:52 PM PDT

Enti enda dikemerat, kelai sereta tanda asal bansa kitai deka lenyau nyerunyut ubah pemansang dunya

KUCHING: Raban bansa Dayak patut bebendar ngemeratka identiti diri ngambika enda muntang lenyau sengapa nyerunyut ubah pemansang.

Menteri Pemansang Rama, Tan Sri William Mawan Ikom madah, mayuh bengkah komuniti endang bisi identiti diri tang enti sida enda ngemeratka kelai nya tanda nya deka lenyau jemah ila.

"Naka ke diatu bansa Dayak bisi identiti diri baka ai tuak enggau sekeda pemakai asal, nya alai enti kitai enda nemu manduk tuak tauka pemakai asal, jauh amat reti enti kitai ngumbai diri bansa Dayak," pia ku iya.

Iya bejaku munyi tu lebuh bejadika pengerami Mantar Gawai ke diatur Gerempung Bansa Dayak Sarawak (SDNU) Samarahan begempung enggau Serakup Indu Dayak Sarawak (SIDS) Samarahan di Taman Merdang Satu, kemari.

Mawan ke mega presiden SDNU madah, dalam konteks tu apai indai enda tau enda nurunka tanda sereta kelai asal bansa enggau adat  ngambika bisi ditampung nembiak rebak dudi ila.

Beserimbai enggau pengerami nya, iya ngungkupka geran ari perintah RM20,000 ngagai SDNU enggau SIDS Samarahan, lalu nyuaka bantu mata duit RM3,000 ngagai Indu opis SDNU, ke alai mata duit RM1,000 ari kuchik iya empu.

Ku iya, belanja nya ulih dikena sida bejalaika pengawa sereta mantu kaban ti begunaka bantu nya.

Berebak enggau pengerami nya mega bisi disempulang enggau pengawa nyuaka insentif ngagai anak kaban gerempung nya ke nyulut ba peresa perintah taun seiti nyin tadi. Bantu ungkup kaban gerempung nya ke sakit sereta diperubat ba Sepital Besai Sarawak (SGH) mega bisi disuaka.

Sama bela bisi nerima bantu ari gerempung nya nyengkaum seiku kaban gerempung nya ti kena penusah diruntun beg.

SDNU Samarahan dirijista kena 13 Januari 2013, lalu naka ke diatu bisi 265 iku kaban. SIDS Samarahan dirijista kena 17 Februari 2013 sereta ngembuan 120 kaban. Bala kaban nya dirijista nengah atur pengawa nemuai ngagai mayuh bengkah genturung pendiau ti dipejalaika sida belama, ku Belayong.

Bela bisi ngullu pengerami Mantar Gawai nya, Mandal presiden I SDNU, Anthony Banyan, Chairman SDNU Samarahan, Stanley Belayong Pok, Chairperson SIDS Samarahan, Emas Gijak, chairman Serakup Graduet Dayak Sarawak (SDGA), Dr Dusit Jaul, Sekretari SPDP Muara Tuang Churchill Edward, Tuai Rumah Genturung Pendiau Entinggan enggau Sungai Empit, David Jiku Nader sereta Bas Kaus.

Print Friendly