Baka Ni 1MDB Melanja Pengidup Jho Low! BERITA ANGAT! |
| Baka Ni 1MDB Melanja Pengidup Jho Low! BERITA ANGAT! Posted: 07 May 2014 07:02 AM PDT  Naka iya pemayuh duit dikena ngirup ai champagne ti sebaka enggau gaji pemadu mimit di Malaysia ke rega sebutul Udah bekau dibantaika dulu ari tu diatu Sarawak Report ngayanka mayuh agi penerang ba kaul entara orang kaya ti enda seruran ngelalaika diri Jho Low enggau tabung pengaya One Malaysia Development Berhad (1MDB). Penerang nya nunjukka ba taun 2011, 1MDB udah dikena mayar utang bejuta-juta euro di Ireland dikena meli siti gerempung rumah hotel di London ba sebengkah atur dikena ngulihka kuasa nengah kompeni iya, Wynton Group. Penerang tu dibantaika udah bekau iya ti suah beberapa bulan ti udah ti madahka iya bisi kaul, tauka nerima sebarang penguntung ari duit tabung 1MDB nya. Pekara nya mega nyungkit jaku tanya nama kebuah kepala pemesai dalam 1MDB udah bisi mansutka penerang madahka Jho Low nadai tanggungpengawa dalam 1MDB. Pengerusi ti nguasa duit dalam tabung 1MDB nya Menteri Besai Najib Razak empu, ti ngepunka tabung nya nyadika singkang ke terubah iya udah iya mujur ngulihka baru penuduk menteri besai iya dalam taun 2009 suba. Jho Low endang ditemu bisi kaul enggau bini Menteri Besai, Rosmah Mansor, enggau anak dulu iya, Riza Aziz, ti mega bisi ditemu meri jaku terima kasih ngagai Jho Low ba pengujung wayang ti dikeluarka sida, Wolf Of Wall Street.  Rumah hotel Connaught di nengeri Mayfair nyadika sebagi ari gerempung kompeni iya Ba berita kami ti dulu ari tu Sarawak Report bisi nuliska repot ti madahka baka ni Jho Low enggau gerempung kompeni iya Wynton Group nya disukung ngena duit ari tabung 1MDB ba sebengkah pengawa ti udah puntan deka meli sebuah kompeni rumah hotel ti enggi Claridges. Tuan Akim David Richards udah meresa enggau silik sebuah kes baka ni Jho Low ngenataika kangau rega dikena iya nginjau duit nengah Agensi Pengemata Reta Menua Ireland (NAMA), ti udah diambi alih siku orang dagang ti udah napi pemuntan dagang, Derek Quinlan. Tuju ke bendar nya dikena meri peluang ngagai Jho Low awakka bulih kuasa megai mayuh agi syer dalam gerempung rumah hotel ti dibayar ngena tabung 1MDB nya. Tang, kini ke penunga orang dagang ti biak bendar umur ari menua Pulau Pinang nya, ti madahka diri ukai datai ari ruang bilik orang ti kaya, tau bulih duit ngemayuh nya dikena meli lalu ngambi pulai €60 juta nya? Tuan Akim nya nadai mansik enggau silik bekaul enggau pengawa melanja mayar utang nya, ti enda besenutuk terus enggau kes ti dipendingka nya. Tang agi mayuh penerang ti tau disungkit ba maya nya nengah surat berita Irish Press, beserimbai enggau nya mega Derek Quinlan ti nyadika siku orang dagang tebilang di endur nya. Semua repot dalam media tu nadai nyebut nama Jho Low, laban belanja nya, kenu ku suratberita Irish Independent enggau media ti bukai, datai ari tabung 1MDB empu!  Jho Low direpotka mungkal jurai penemu nya. Nyentuk ke sehari tu nadai siku orang di Malaysia nemu iya nya benung dipelanja ngena duit ari tabung 1MDB  Pengawa mayar utang ti mudah tekeruga di Malaysia nya udah dipejalaika tinggi ari rega ti berani ditangkup orang bukai. Suratberita Sunday Times di menua UK mega bisi nuliska berita ti sebaka lalu nyebut pemayar utang nya 1MDB. Repot nya ninggalka mimit asai pengirau ati ti madahka pemayar utang Jho Low nya bisi nguji mayar utang (ti ditemu deka meri untung ti mayuh ngagai Ireland) nya endang ari 1MDB, kelimpah ari sida ti nyemetak nyebut nama kompeni Wynton Group enggi Jho Low/JQ2!  Ngulu pengerami di menua Hollywood nya siti ari pengawa belepa ti baru ke Jho Low – sekali ke tu siti ari kebuah duit tabung 1MDB nya dikena melanja pengawa belepa iya nya? Enggau beberapa iti jaku bebula penerang ari Jho Low enggau mega raban pemesai dalam 1MDB ti madahka nembiak kaya Jho Low nya bisi kaul enggau sapa-sapa ba tabung nya lalu pengawa sida ti beranakka puku nya begunaka saut ti enda betangguh-tangguh. Nama kebuah duit tabung Malaysia, ti endang ditagaka dikena ngaga pengawa pemansang di menua Malaysia empu, dikena melanja pengawa beranakka puku bar eta Jho Low ti bedau tentu ditemu meri penguntung? Sekali ke Jho Low nya nyadika kepala orang ti beranakka puku ke 1MDB lalu enti nya amat, berapa penguntung pulai ngagai iya? Tauka, sekali ke Jho Low nya nyadika kepala raban orang bukai ti beranakka puku ti enda tau disebut nama? Ke penudi tu, sekali ke tanggungpengawa Jho Low dalam 1MDB enggau kaul iya enggau sida Najib Razak sebilik nya tau dikena nerangka baka ni iya bulih puku dagang ti mayuh bendar enggau ngenyit? |
| Pemujur Bansa Berawan Di Mulu – Penghujung Undang-undang Ngerampas Tanah Ke Taib! Posted: 07 May 2014 04:37 AM PDT  Pemujur – penyelai iya nya perintah Sarawak ti jai mengkang ngelubahka pechara apil ti nyadika chunto salah guna kuasa Dalam taun-taun 1990 suba menyadi Taib, iya nya Raziah Mahmud enggau laki iya, peranak Australia peturun Lebanon, Robert Geneid, ngelanggur deka nirika palan dagang temuai ba tengah kampung puang bebukit ti diberi seduai enggau nama Borsamulu, semak enggau lubang-lubang kusing di Mulu. Projek nya udah nyadika langgur seduai tang lalu nadai sebarang belanja pansut ari seduai. Dikena ngemujurka pengawa ngaga padang bilun ba endur nya, tuchung bukit dia enda tau enda dirataka – ti begunaka belanja ti besai lalu melakangka pengelantang pendiau orang bansa asal endur nya sereta mega pemanah rampa menua dia. Langgur penemu nya ulih digaga nyadi nyata ari pemutus penemu menyadi Raziah, iya nya Taib Mahmud lebuh iya nyadi Kepala Menteri, dikena ngulihka belanja ari opis SEDC dikena nyukung pengawa dagang kunsi ba projek nya. Lalu, ngena chara kereja iya ti baka selama nya, projek dipelanja duit menua udah dipegulaika iya enggau atur meri penguntung ke Taib Mahmud sebilik. Ulih diperatika baka ni sida Taib sebilik ngulihka syer ti besai dalam Royal Mulu Resort/'Borsamulu' nengah segempung kompeni, nyengkaum kompeni Mesti Bersatu, Plieran, Kenyalang Cergas enggau Daya Syukra.  Baka ni sida Taib sebilik ngambarka Mulu ke guna sida empu Kenyau ari berita ti dibantaika Sarawak Report dalam taun 2011, Kepala Menteri empu udah bisi syer ti mayuh bendar dala projek 'Royal' Mulu.  Chara ngenyemakka diri ngagai rampa kampung (ti udah nadai agi tuchung bukit) Tang enda mukai-mukai rampa menua ti dipilih sida Taib sebiliknya dikena sida nirika projek palan dagang temuai nya endang dulun agi enggi orang bukai.  Dipeda besai sereta manah – tang ba asal iya ukai enggi sida Taib lalu diatu sida ditemu salah laban udah ngerampas kuasa orang bukai Raban bansa asal Berawan udah nguan menua nya kenyau ari sebedau penatai Rajah Brooke lalu perintah British udah enggau gaga ati ngelala kuasa bansa asal nya dulu ari maya perintah koloni, ti udah nya dipasukka ngagai konstitusyen sebedau menua merintah diri. Tang Taib Mahmud udah suah bendar ngumbai diri empu nya tuai menua 'demikrasi', lalu meri atur ngagai semua pemesai opis perintah, bekereja melakangka pekara ti mit-mit baka nya. Atur pengawa ti nyelai nya dikereja siku lawyer ti udah chukup pelajar ba penemu undang-undang. Iya udah ngeluarka penerang ti madahka rampa menua nya 'tanah perintah menua', ti tau dirampas iya sepeneka ati lalu udah nya diberi iya ngagai sida sebilik pia aja.
Raban bansa asal Berawan udah belabuh mantah sida dalam taun 1994 lalu sida mega neruska bantah sida.  Perais ke pengerampas tanah pemadu mayuh patut diberika ngaga Geneid melaki-bini?
Ba minggu nyin kemari, udah bekau enam taun sida ngena bantu ari lawyer, sida udah mujur mai kes charut tanah sida nya ngagai kot tinggi laban ngambi kira kandang menua nya udah digagaka padang bilun ti digaga sida Geneid sebilik ba tuchung bukit ba puak rampa kampung ti dulu menya manah bendar dikayam mata, ti udah dikelala Gerempung Bansa (UN) nyadika Pesaka Rampa Kampung Dunya. Udah bekau bechara ti lilih agi ngagai kuasa orang bansa asal ngelaban perintah, Kot Tinggi Sabah enggau Sarawak mutuska penemu madahka kandang endur ngaga padang bilun nya udah dirampas enggau chara ti salah enggau nadai mayar pampas lalu nadai ngelala kuasa pengempu endur nya. Lawyer ti landik ba kuasa atas tanah orang bansa asal ti mega nyadika pengari parti penyakal Abun Sui, udah suah bendar ngarika bansa asal Berawan, sehari tu udah madah ngagai Sarawak Report pasal pemutus pechara dalam kot tinggi nya nyadika pengerandang jalai k ekes penyarut tanah ke bukai. Tambah mega, Geneid melaki bini nya mega ngerampas selampur rampa menua endur ngaga palan dagang temuai ngena chara ti sama, enggau nadai mayar sebarang pampas ngagai orang bansa asal ti bempu menua nya. Pekara ti manah dikereja sida di endur nya meri pengawa ngagai orang bansa asal, nyadung pemakai enggau mantaika ajat asal ngena ngepan asal sida dikena nyambut temuai ti datai lalu bemalam ba hotel sida.  Putera Albert diperindang ba hotel 'Royal' Mulu. Udah nya, dikena ngelai penemuai iya, Geneid melaki bini udah nyuaka duit tulung ti mayuh bendar ti kenu ku sida dikena nyukung kimpin'rampa menua' iya ti datai ari duit suap diterima ari kroni kayu batang sida, raban sida Hii sebilik ti udah mujur nerima konsesyen nebang kayu ari Taib Mahmud Taib endang enggai bebasaka undang-undang, ti digaga dikena ba orang bukai, ukai ba iya empu. Sehari tu lawyer Abun Sui udah ngamatka penerang ti madahka perintah menua Sarawak deka mai pemuntan sida dalam kes nya ngagai Kot Apil, enggau kes puntan ti dulu agi laban udah ngemaruhka nama undang-undang Tanah Sarawak kenyau ari beberapa taun ti udah. Taja pan udah alah dalam beberapa iti pechara dalam Kot Apil ngelaban Taib, perintah menua mengkang enggai nyurutka diri ngaku diri alah lalu ngubah tanah ti salah nya. Tang, lama agi rejim perintah nya mengkang betan, makin balat agi ukum deka ditapi sida. Projek ti patut mai pemansang ke menua nya udah nyadi projek pemasau belanja. Palan dagang temuai nya jarang bendar nerima temuai ari luar, kelimpah ari penemuai raban Geneid sebilik ti merindang diri dalam pengerami ti besai-besai enggau enda bebayar. Gerempung Marriott Hotel ti beduduk di menua US diatu udah besetuju meli pengurusan dagang kunsi nya enggau chara ti salah ba undang-undang ari raban sida Geneid sebilik, enggau juluk ati deka bedagangka Mulu nyadika 'Palan Dagang Temuai ti Manah ke Rampa Menua'. Gerempung Marriott nya bisi kuasa dipadahka 'hotel dagang temuai' Mulu nya datai ari semua utai ti bekaul enggau rampa menua dia. Iya didirika atas tanah ti dirampas enggau chara ti salah ba undang-undang, ti endur Abun Sui udah besemaya deka mantu raban bansa Berawan ngetanka endur nya. |
| You are subscribed to email updates from Sarawak Report To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |