» »Unlabelled » Kemayuhka peranak Sarawak masuk ‘Fellow Perdana’ BorneoPost Online | Borneo , Malaysia, Sarawak Daily News » Berita Iban - New 2 Borneo

13:09:00

Kemayuhka peranak Sarawak masuk ‘Fellow Perdana’ BorneoPost Online | Borneo , Malaysia, Sarawak Daily News » Berita Iban - New 2 Borneo

Kemayuhka peranak Sarawak masuk ‘Fellow Perdana’

Posted: 30 May 2014 02:48 PM PDT

Dikarang Jacqueline David //

Nengah latih program tu, mayuh pekara ke beguna ba opis menteri udah dipelajar

KUCHING: Program Fellow Perdana, iya nya sebengkah atur meri peluang ngagai nembiak Malaysia nyadi pelatih ba opis Menteri Besai, Sapit Menteri Besai enggau menteri kabinet bukai diatu dibuka deka ngambi nembiak baru ke taun tu.

Menteri Nembiak, Lumba enggau Main, Khairy Jamaluddin madah program ti diatur Opis Menteri nya dikena meri peluang ngagai nembiak Malaysia ke bepegelandik belajar sereta mantu ngatur pengawa ba renggat ke tinggi dalam opis perintah.

Ku iya, sida ke bisi ati deka enggau program tu tau nganjung CV (penerang diri empu) enggau nulis karang dalam 500 leka jaku dalam jaku English tauka Bahasa Malaysia.

"Chara nganjung karang nya ngena e-mel ngagai perdanafellow@kbs.gov.my," ku Khairy lalu nambah, program nya dipejalai kena nambah pemanah program ke raban menteri kabinet enggau Fellow Perdana.

Iya madah menteri kabinet deka nerima pelatih muda, idealistik, bagas sereta bepengelandik sepemanjai timpuh program nya.

Kelimpah ari nya, Sapit Sekretari Besai Gerempung Alumni Fellow Perdana, Samuel Sila Mathew Unjah ngelaluka mayuh agi nembiak Sarawak nyadi penyereta dalam Program Fellow Perdana, laban ba siri keterubah program tu suba, bisi enam anak Sarawak aja.

"Aku berasai untung laban sepemanjai pengawa latih aku begulai enggau Menteri Pengawa Bekebun Bedandang Besai enggau komoditi, Datuk Amar Douglas Uggah Embas, mayuh pekara udah dipelajar aku bekaul enggau atur bekebun bedandang besai enggau komoditi ke mayuh kaul enggau rayat Sarawak," ku Samuel.

Print Friendly

Terminal bas, penyangkai bilun agi dedat mensia pulai Gawai kemari

Posted: 30 May 2014 02:47 PM PDT

KUCHING: Agi tebal raban bansa Dayak kemari kiruh mulaika diri ke menua nyerumba pengerami Gawai Dayak enggau sida sebilik ti berengkah diintu 1 Jun, nyengkaum sekeda ke gawa di Semenanjung Malaysia.

Tinjau Utusan Borneo ngagai Terminal Bas Kuching Sentral enggau Padang Bilun Antarabansa Kuching pagi sampai ngalih hari kemari, mandangka agi mayuh orang pulai ke menua.

Cathrine Sirai, 23, ti pulai ke Sibu lebuh dikerandau taun tu sereta taun ke udah-udah pengerami Gawai endang diintu ba rumah panjai diri.

"Enti maya pengerami Gawai Dayak aku endang pulai ke menua diri, pia mega orang bukai baka ti dipeda ba Terminal Bas tu tentu ngambi awak pulai ke menua diri ngerami Gawai enggau diri sebilik.

"Semina ba pengerami Gawai Dayak aja kitai ulih betemu berandau enggau diri sebilik sereta bala kaban ti datai ari jauh, ke lalu ulih ngerapitka kaul diri sama diri," ku iya seraya madah diri pulai ke rumah panjai sida di Sg Jikang Julau.

Nambahka nya, Wite Gagok,32, sereta sida menyanak datai ari Kuala Lumpur deka pulai berami ngintu Gawai Dayak di menua asal Kampung Tapu, Serian.

"Semina maya kitai ngintu pengerami Gawai Dayak tu aja meh kami ulih mulaika diri ke menua. Tu pan kami sebilik pulai dua taun sekali.

Print Friendly

Mawan: Seliahka penyarut dalam politik maya Gawai

Posted: 30 May 2014 02:46 PM PDT

KUCHING: Laya politik sereta penyarut ari dalam parti patut diseliah rambau kitai ngintu Gawai Dayak, Ku Menteri Pemansang Rama Tan Sri William Mawan Ikom.

Mawan ke mega Menteri Kanan dalam kabinet menteri nengeri madah ba dunya kemaya hari, pengerami gawai ngelaika pengawa kitai ngintu pemujur ti udah ditempa lalu ngambika tiap iku kitai ulih nyapai pemujur ke besai agi jemah.

Iya ngelalau dia Hari Gawai patut endur kitai ngerapitka kaul sereta ngenegap penyerakup enggau pangan diri.

"Manah agi kitai enda bejaku ka pekara politik lalu berami maya Hari Gawai. Gawai sebengkah pengawa ti mai penyerakup lalu anang ngerusak pengerami tu enggau jaku politik," ku Mawan lebuh dikerandau The Borneo Post.

Mawan madah iya deka ngintu gawai ba Pakan kenaka 1 Jun lalu semua dikangau datai berami.

Kena 2 Jun, Mawan deka ngulu Pengerami Gawai Dayak (renggat nengeri) di Dataran Kipas, Miri.

Pengabang dipebasa ke disadang datai iya nya TYT Tun Pehin Sri Abdul Taib Mahmud enggau bini, Toh Puan Ragad Kurdi, Menteri Besai Datuk Seri Najib Tun Razak enggau bini Datuk Amar Rosmah Mansor, Kepala Menteri Tan Sri Datuk Amar Adenan Satem enggau bini Puan Sri Jamilah Anu sereta Sapit Kepala Menteri Datuk Patinggi Tan Sri Alfred Jabu Numpang enggau bini, Dato Sri Empiang.

Print Friendly

Polisi ‘Nadai Tiket, Enda Nepan’ nerima puji

Posted: 30 May 2014 02:46 PM PDT

Dikarang Rengenyan Labang //

Semua operator bot ekspres sereta penumpang patut ngemeratka atur pengelikun ti dipejalaika LSS

KUCHING: Terminal Penumpang Kuching (TPK) di Pending kemari penuh dibanding enggau maya hari bukai lebuh nadai pengerami nyerumba pengerami Gawai Dayak ke alai mensia mayuh berengkah mulaika diri ke menua, taja pia pengelikun di penyangkai nya meruan dikemerat raban penerit adat.

Tinjau pengarang berita di TPK kemari sama baka taun ke udah, terminal nya sekut laban mensia milih perengka pengangkut sungai kena mulaika diri ti ukai semina bansa Dayak aja tang nyengkaum raban bansa bukai ngambi awak pulai ke menua berebak enggau kemisi sekula.

Taja pia di TPK agi ulih dijaga berindik ari Kaunsil Sungai Sarawak (LSS) numbuhka strategi tauka polisi 'No Ticket, No Entry' ba semua terminal besai di serata Sarawak berengkah 1 Mei 2014.

Polisi nya ngemeratka 'Nadai Tiket, Enda Masuk' dikena ngelai pemesai reti seput mensia maya betepanka ekspres.

Kontroller LSS William Jinep madah, polisi 'No Ticket, No Entry'  nerima sambut sereta sukung ti manah ari penumpang.

Polisi nya ulih nyeliahka ari bot ekspres mai pemayuh penumpang ngelui penetap sereta kemendar ari LSS.

"Naka ke diatu (kemari) Operasyen Penerit Adat nyerumba pengerami Gawai Dayak 2014 ti bejalaika polisi 'No Ticket, No Entry' nerima sukung sereta sambut ti amat manah ari operator bot enggau penumpang

"Bepelasarka ripot ke diterima ari Terminal Penumpang Kapit tadi (kemari) mensia ti bekenaka perengka pengangkut sungai ngayanka pengaga sereta muji polisi 'No Ticket, No Entry' tu, lalu kami (LSS) deka bejalaika polisi tu ukai semina naka tu aja tang nyentuk ke jemah ila.

"Nengah polisi tu operator muntang nyaga pengelikun penumpang seraya nyeliahka tambang ditikika rega," ku iya lebuh dikerandau nengah telefon kemari ti madahka diri benung matau Terminal Penumpang di Belaga,  ditangkanka Pelagus enggau Kapit.

Operasyen Penerit Adat nyerumba pengerami Gawai Dayak 2014 dipejalaika LSS enggau kerejasama Jabatan Laut Wilayah Sarawak (JLWS), Agensi Penguatkuasaan Maritim Malaysia (APMM) enggau Polis Diraja Malaysia (PDRM) dikena nyaga pengelikun penumpang.

Nitihku pengereja pengawa penerit adat LSS, Fauzi Taril ti dikerandau lebuh matau gaya ba TPK kemari, iya madah, sida amat terit bejalaika polisi baru nya.

"Atur ti dipejalaika kami amat terit diatu, enti nadai tiket sida nadai ulih masuk bot ekspres, lalu enti tiket abis dijual nitihka penyampau orang tambang ke udah ditetapka dia kami mega nutup kaunter.

"Ditu (TPK), kami ti bejalaika pengawa nadai betapi enggau penanggul laban penumpang meri kerejasama ngagai kami, baka diasuh nulis nama sida pan nurutka atur nya," ku iya seraya madahka TPK berengkah neribu pemayuh penumpang ari ensanus nyentuk kemari.

Bot ekspress Bahagia No. 1 ti muat 178 iku penumpang sereta Bahagia No.8  (208 iku) bekejang pukul 8.30 pagi ari Kuching-Tanjung Manis-Sarikei- Sibu lalu dalam jam ke sama ari Sibu-Sarikei-Tanjung Manis-Kuching.

Kelimpah ari strategi polisi 'No Ticket, No Entry'  LSS sepemanjai timpuh operasyen bisi ngatur 'River Block'  enggau 'River Patrol' ba palan ke engkeman di Batang Rajang ti mungkur kandang Pelagus, Belaga & Batang Balleh, Batang Igan, Batang Kemena enggau sungai besai bukai di serata Sarawak.

Tuju operasyen nya dikena ngenukuka tiap bot enda ngundan penyampau penumpang ngelui ari ke udah ditetapka.

Print Friendly

5,277 pemesai JPM ditikika pangkat ngagai koperal enggau sarjen nengah TBBK

Posted: 30 May 2014 02:45 PM PDT

KUCHING: Bisi 291 Wader Jil (KX17) enggau 72 Koperal Penjara (KX20) di serata institut di nengeri Sarawak udah ditikika pangkat nitihka Time-Based Bepelasarka Penyulut (TBBK) Koperal enggau Sarjan.

Serata Malaysia ku Sapit Ketuai Direktor (Pengurusan) Opis Jil Malaysia (JPM), Komisioner Penjara Datuk Wan Abdul Rahman Abdullah madah bisi 5,277 pemesai JPM ditikika pangkat ngagai koperal enggau sarjen nengah TBBK.

"Peniki pangkat tu ukai semina meri pangka ba pemanah ekonomi diri sebilik tang mega ulih ngangkatka motivasi dikena bejalaika pengawa ti manah sereta bekualiti dalam servis Koreksional.

"Kitai ngarapka semua pemesai dalam JPM terus nyulut sereta nyapai juluk koreksional ti uli meri penguntung seraya mantu orang ti kala ngereja penyalah, nyadi orang ti beguna dalam raban bansa," ku iya.

Abdul Rahman mansutka pekara nya dalam jaku pengelalu Majlis Pemakaian Pangkat Time-Based Berasaskan Kecemerlangan (TBBK) Koperal dan Sarjan Opis Penjara Malaysia Zon Sarawak, ti diatur ba Auditorium Sri Sarawak, Indu Opis Jil Sarawak, Jalai Puncak Borneo ditu, kemari.

Pengerami nya dipenyadika Sapit Menteri Dalam Nengeri Datuk Dr. Wan Junaidi Tuanku Jaafar.

Sida ke niki pangkat nya nyengkaum ari Institut Indu Opis Jil Sarawak, Penjara Puncak Borneo, Penjara Pusat Sri Aman, Penjara Pusat Sibu, Penjara Pusat Miri, Penjara Limbang, Pusat Koreksional Bintulu sereta Parol & Perkhidmatan Komuniti Negeri Sarawak.

Kelimpah ari nya, Joesauvace Impin Jeluing ari Institut Penjara Pusat Sibu nerima pangkat koperal kemari, lebuh dikerandau madahka diri temegah ati ditikika pangkat.

Iya ti udah 12 taun nyadi pemesai dalam opis jil madahka peniki pangkat nya nyadika peransang terus gawa ke menua.

"Aku amat gaga ati ke peniki pangkat tu lalu tu meh rejeki ngagai aku sereta kami sebilik. Udah tu aku deka gawa lebih bebendar agi," ku iya.

Print Friendly

JAKPAW meransang mayuh agi orang masuk Askar Wataniah

Posted: 30 May 2014 02:45 PM PDT

KUCHING: Tiga raban pemesai menua tu dipadu mangku pengawa nyadi pemesai dalam Komiti Pendukung Askar Wataniah dikena meransang mensia mayuh masuk soldadu 'wataniah', lalu tiga raban pemesai tu, iya nya Sapit Sekretari Perintah Menua Datu Misnu Taha, Direktor Opis Unit Perambu Menua Datu Ismuni Ismawi enggau Sekretari Mendam ba Opis Menteri Opis Kandang Menua enggau Pemansang Komuniti Datu Penguang Manggil.

Sekretari Perintah Nengeri Sarawak ti mega chairman Komiti Pendukung Soldadu Wataniah (JAKPAW), ti mega Komander Rejimen 511 Tan Sri Datuk Amar Morshidi Ghani madah komiti tu ditumbuhka nyadi pemungkal kena ngaga promosyen, meransang sereta nyendiaka perengka guna ke pemansang soldadu wataniah di Sarawak.

Kemari beserimbai enggau Komiti (Pendukung), Morshidi madah komiti tu deka mai mayuh agi pemesai opis perintah sereta mensia mayuh  masuk nyadi soldadu wataniah.

Sama bisi ngulu atur pengawa nya, Menteri Muda Pengawa Pemansang Industri Estet Datuk Peter Nansian Ngusie ti mega kaban komiti nya enggau Sapit Komander Rejimen 511 ti mega nyadi Direktor Soldadu Wataniah Lt Kol Mazalan Adam.

Naka ke diatu pemayuh kaban dalam Rejimen 511 bisi 2,500 orang ti ngatika diri ke mayuh ari sida nya sida ke gawa ba opis perintah, orang ngatika diri enggau mensia bukai.

Nyerumba pengawa ke diatur Rejimen 511 ke mungkur Kuching, Sri Aman, Sarikei, enggau Betong, Rejimen 510 mungkur Sibu, Miri, Bintulu enggau Limbang ke nyauka sebaka pemayuh tubuh ke masuk rejimen nya.

Iya nandu baru, batang pengawa nyadi sedadu wataniah tu baka raban sedadu (simpanan or reserved) di asuh mantu siti-siti pengawa ke ngemeratka bantu.

"Soldadu wataniah deka dipadah batang pengawa ke deka dikereja sida tang baka menua kitai ke likun bansa tu, sedadu wataniah tu mayuh ngaga pengawa bukai baka program sedadu bekelala enggau rayat, tauka baka mantu ngaga projek 'Jiwa Murni' ke mantu mensia mayuh ke diau di menua pesisir tauka mantu orang ke tasah pendiau.

Nyadi sebagi ari soldadu wataniah, sida iya mega sebagi ari 'Bahagian Pasukan Simpanan' (BPS) Raban soldadu Malaysia (ATM).

Enti sema bisi sebarang penusah nyadi, sedadu wataniah tu nyerumba lapis kedua udah ATM ( ke sama mega nyengkaum darat, tasik enggau langit).

Soldadu wataniah tu mega mangku pengawa sida iya dalam nya, sementara aja (iya nya bisi timpuh mangku pengawa nya), lalu baka nya mega, dalam Wataniah tu, bisi 'Tauliah Sukarela tauka Tauliah Kehormat'.

Pangku pengawa ke dipegai sida iya, bisi timpuh, iya nya enti maya sida pinchin, tauka nadai agi mangku pengawa sida iya, pangku pengawa nyadi sedadu wataniah tauka mangku pengawa dalam JAKPAW deka diambi pulai baru, lalu semua pangku pengawa soldadu wataniah enggau JAKPAW dikemendarka Yang Dipertuan Agong.

Print Friendly