» »Unlabelled » Nadai salah enti pulai ke pemaik parti enggau BN BorneoPost Online | Borneo , Malaysia, Sarawak Daily News » Berita Iban - New 2 Borneo

05:03:00

Nadai salah enti pulai ke pemaik parti enggau BN BorneoPost Online | Borneo , Malaysia, Sarawak Daily News » Berita Iban - New 2 Borneo

Nadai salah enti pulai ke pemaik parti enggau BN

Posted: 12 May 2014 09:23 AM PDT

Dikarang Chris Bishop, Jacqueline R. David //

Penemu nerima TERAS dalam serakup Barisan Nasional patut diperunding enggau manahKUCHING: Presiden Parti Demokratik Progresif Sarawak (SPDP) Tan Sri William Mawan deka beratika enggau berat senentang perambu nerima Parti Tenaga Rakyat Sarawak (TERAS) dalam serakup Barisan Nasional (BN) nengeri lalu nyaup mutarka penyarut ke nuntung parti diatu.

Tajapan enda ngeletak sebarang pemutus, Mawan madah nadai salah enti atur nya tau mulaika penyerakup sereta penegap dalam perintah Barisan Nasional (BN).

Ku iya, penegap BN deka kurang enti SPDP majak lemi ketegal penyarut ti benung nuntung lalu jalai patut ditusun enggau lengkas.

"Enti kitai (SPDP) ngasai ubah enggau strategi patut ditusun baru, semua nya patut diatur ungkup pemaik parti sereta BN.

"Enda salah orang bukai nyaup mutarka penanggul enti pengawa nya tau pulai ke pemaik. Semua pekara tau nyadi,"ku iya lebuh dikerandau pemberita rambau ngetu tengahari Aum Dewan Undangan Nengeri (DUN) ditu, kemari.

Nyaut pemberita enti iya ngasai penuduk nyadi presiden dikeruga ketegal penyarut nya, Mawan madah iya mengkang seiku ketuai parti ke chukup tegap lalu enda sekali rawan.

Ku iya, aku orang sereta seiku ketuai dalam BN…sekalika nuan ngasai BN deka meda pekara ke tau ngelemi BN nyadi…?

"Kitai patut mendingka runding orang bukai lalu anang nitihka pengeran ati diri. Kitai beserakup ungkup pemaik, penegap parti enggau BN lalu ukai ketegal deka ngemujurka juluk diri," ku iya.

Dulu agi ari tu, sapit presiden SPDP Dato Seri Tiong King Sing nengah sebengkah penerang madahka diri enda setuju enggau langgur penemu nerima TERAS nyaup mutar penanggul.

TERAS diperambu diterima masuk BN nengeri ngambika bisi endur pengari rayat ti ninggalka parti ngenduh ketegal beserekang penemu enggau ketuai bukai.

Tiong pechaya atur nya tau endar ngemunas pengarap ati ti digenggam dalam parti komponen ngelamatu.

Tiong dirikod mansutka jaku: "Nya deka meransang sekeda kaban parti ke enda setuju enggau ketuai dalam komponen BN sereta ngerusak penyerakup ti dikemegah kitai dalam BN ngelamatu.

"Nya deka ngeruga pemanah kaul ke digenggam dalam BN," ku iya.

Print Friendly

Penyampau eksport kayu nurun 5 peratus dibanding enggau timpuh sebaka: Tengah

Posted: 12 May 2014 09:22 AM PDT

KUCHING: Ba suku keterubah taun 2014 iya nya ari bulan Januari ngagai March, penyampau ekspot kayu Sarawak manggai RM1.77 biliun.

Menteri Pengatur Pengeraja Asal enggau Rampa Menua Datuk Amar Awang Tengah Ali Hassan madah, tiga produk ngarika 93 peratus ari penyampau semua ekspot kayu Sarawak nya.

"Ketetiga produk ti meri pangka besai iya nya papan lapis enggau venir ba penyampau RM1.06 biliun, kayu batang ba penyampau RM442 juta enggau kayu sayat RM132 juta.

"Sekeda produk ekspot (7 peratus) nyengkaum kayu rachik (RM17 Juta), kayu Kumai (RM6 juta), papan sempa kayu (RM62 juta) kayu lapis (RM9 juta), papan serpih (RM15 juta) enggau produk bukai urung RM25 juta," ku iya.

Awang Tengah mansutka penerang tu rambau nyimpul jurai Aum Kunsil Nengeri (DUN) ti Ke-17 ditu, kemari.

Iya nambah, tebal agi produk kayu ari Sarawak diekspot ngagai Jepun iya nya penyampau (RM752 juta), India (RM398 juta), Taiwan (RM191 juta), Menua Timur Tengah (RM113 juta) enggau Korea Selatan (RM116 juta). Semua nya ba penyampau RM1.57 biliun.

"Enti dibandingka enggau suku keterubah taun 2013, penyampau ekspot kayu Sarawak ba suku keterubah 2014 tu dipeda nurun 5 peratus iya nya ari RM1.85 biliun ngagai RM1.77 biliun.

"Penyampau ekspot tu kurang ketegal gaya ekonomi ti lubah ba sekeda makit besai serta dunya,'ku iya.

Iya mega madah, program ngelaku kayu ari Sarawak chakah dipejalai diatu ngambika pinta tau nambah penyampau ekspot ngagai makit global.

Ku iya, program ngelaku kayu ngagai menua luar baka ke India enggau Korea chakah diatur kelimpah ari nyereta Malaysian International Furniture Fair sereta pengawa bukai ti mandangka asil ari kayu di Dubai Wood enggau India Wood.

"Kitai mega ngatur kerejasama enggau gerempung industri menua ngimpot kayu,' ku iya.

Print Friendly

Mong: Penembu Jalai Lachau deka nguntungka 51 buah rumah panjai

Posted: 12 May 2014 09:22 AM PDT

SRI AMAN: Limapuluh satu buah rumah panjai nyengkaum empat buah sekula primari di genturung pendiau Melayu enggau China ulih betengahka jalai alun ke manah agi enti pengawa melakin jalai Lachau, dalam Pelilih Mit Sri Aman dipejalaika enda lama agi.

Menteri Muda Betanam Betupi Moden, Datuk Mong Dagang madah, pengawa  melakin jalai pemanjai 5 kilometer ti beungkus RM4 juta nya deka berengkah tengah bulan Mei tu.

Ku Mong, jalai Lachau ke digaga kena pun taun  1960 nya mengkang bebatu. Enti udah dibelakin ila, peranak menua nya ulih nengah jalai ke manah agi.

"Berita tu tentu ngelantangka ati peranak menua dia laban udah lama sida nganti jalai nya dibelakin," ku iya.

Mong bejaku munyi tu lebuh berandau enggau pemberita beserimbai enggau penemuai iya matau pemansang ba kandang sitak Kunsil Nengeri Bukit Begunan, ditu ensana.

Iya disempulang Injinir Opis Kereja Raya (JKR) Pelilih Sri Aman, Cassidy Morris.

Mong ke mega Kaban Kunsil Nengeri Bukit Begunan madah, enti pengawa melakin jalai Lachau nya tembu ila, reti nya empat batang jalai besai ba sitak nya udah tembu dibelakin.

Empat batang jalai besai ti ku iya, iya nya Jalai Kara, Jalai Sungai Besai Selanjan, Jalai Munggu Beringin enggau Jalai Lachau.

Mong mega madah, jalai ari Lachau nuju ke jalai Selanjan Angkong penyauh 21 km benung dipejalaika diatu.

"Aku meri terima kasih ngagai perintah kelebih agi JKR Sri Aman ti dikearap bejalaika pengawa nya udah bebendar bejalaika pengawa sida  ngemansangka DUN Bukit Begunan," ku iya.

Mong mega ngelalau rayat di Sri Aman terus  nyukung perintah Barisan Nasional (BN) ngambika sida majak nerima pemansang.

Print Friendly

Jabu nyukung pengawa nulis bup pasal pemansang pengawa betanam betupi

Posted: 12 May 2014 09:22 AM PDT

KUCHING: Sebuah bup nusui pemansang pengawa betanam betupi kenyau semilan puluh taun ke udah di Sarawak diperambu digaga.

Nyukung pengawa nya, Sapit Kepala Menteri Datuk Patinggi Tan Sri Dr Alfred Jabu madah, bup nya ila deka mantu raban pemansik ke diatu, ngemansang jauh agi pengawa betanam betupi.

"Kenyau ditumbuh kelia, Opis Betanam Betupi Sarawak (JPS) udah ngemun bemacham chara betanam betupi ke baru.

"Pansik enggau pemansang ba kaul nya seruran dipejalai dalam timpuh nya ti diakun udah mantu ngemujur program ngemunas penyeranta di nengeri tu.

"Berindik ari nya, aku pechaya semua pemansang ba pengawa betanam betupi patut dirikod dalam bup lalu nyadika lalau ngagai ejensi," ku iya.

Jabu mansutkan jaku tu ba Pengerami Malam Gawai 2014 Gerempung Veteran Opis Betanam Betupi Sarawak (SAVA) ba sebengkah restoren ditu, malam ensanus.

Ngemujur juluk mansutka bup nya, iya ngagihka belanja RM30,000 ngagai SAVA ke megai tanggungpengawa ngumpul sereta nulis semua penerang ke bekaul nyentuk bup dikeluar.

Kelimpah ari nya, Jabu besemaya deka meri penyampau belanja ke sama ba taun 2015 ke alai iya mega deka minta saup ari ejensi perintah ke bukai baka SALCRA.

Dulu agi ari nya, presiden SAVA Johnny Chien Pik Ung madah, lebih RM150,000 diguna dikena nentuka projek ngeluar bup nya ulih dikemujur.

Ba kual bukai, Iya nambah, SAVA diatu benung ngiga palan manah endur nudukka opis gerempung lalu saup ari JPS dikelalu.

SAVA diatu udah bisi lebih 50 iku kaban lalu rambau pengerami malam ensanus, pengawa ngerijista kaban baru bisi diatur.

Bela datai, sapit sekretari perintah nengeri Datu Ose Murang, Direktor JPS Lai Kui Fung, Chairman Pengatur Pengawa Robert Josem, Sekretari Mendam JPS Datu Dr Ngenang Janggu enggau orang bukai.

Print Friendly

Kenyau 2008 nadai terunding betampung: Gawong

Posted: 12 May 2014 09:21 AM PDT

Dikarang Judan Bungap //

Ketegal suntuk sendat ba pengidup sida menyanak enda nampung berumah panjai tang ngarapka PBRBINTANGOR: Ketegal suntuk sereta bepenanggul ba penatai pemisi, Gawong Chendan, 34, enda enggau sida serumah, Rumah Suring, Sungai Tulai, Bintangor ngentak rumah panjai baru berindik ari penusah angus kenyau taun 2008 suba.

Maya ke dikerandau pengarang berita kemari, iya madah, sida menyanak semina ulih ngentak rumah mit ba belakang rumah sida serumah pengudah rumah panjai lama angus.

Tang ku iya, rumah alai sida diau diatu balat mit lalu enda umbas endur sida menyanak diau.

"Beramu suba pan semadi disaup bala bukai ditu.

"Enti ngaji tauka meli ramu begunaka puku ti besai. Nambahka suba maya nya aku semina gawa kapal ikan ti begaji mit nekul juluk ati deka nampung orang bukai," ku iya.

Sida sebilik nyengkaum seiku anak indu iya ke tuai baru sekula tadika lalu ke biak baru berumur lima bulan lebih semina bepanggai ba penatai pemisi ari iya ke gawa nyadi tukang kebun ba sekula rumah panjai sida.

Taja pia ku Gawong ke baru gawa ba sekula nya lima bulan ke udah madah, iya bisi pengirau nangika putus pengawa laban gawa nengah chara kunterik. Ketegal pekara tu mega, iya madah, sida sebilik andal amat bulih Projek Bantu Rumah (PBR) ari perintah baka orang bukai.

"Ngelama tu kami sebilik ngining meda orang bukai mujur bulih PBR tang aku enda nemu sapa bagi dilawa, baka ni chara minta pom," ku iya nandu.

Suba ku iya, enda kala minta saup sida serumah minta pom peminta nya tang nyentuk ke diatu pom nya lalu nadai datai ba iya ngujungka iya majak enda nemu chara bukai minta saup opis ti bekaul.

Gawong mega enda nyalam iya nangi ngenang pengidup sida sebilik ke diatu tau nekul pemujur anak iya dua iku nya lebih agi ba pekara pelajar jemah ila.

Print Friendly

Raban Gerija Anglikan St John beserumpu ngelaluka penatai Deacon baru Rev Doyle

Posted: 12 May 2014 09:21 AM PDT

SIBU: Gerija Anglikan Saint John diatu udah bisi seiku Deacon baru iya nya Reverend Doyle Owen Laccase.

Pengawa ngerami penatai iya udah diatur ba laman gerija nya ditu lemai ensana lalu digulu urung 100 iku raban gerija ke bukai.

Pengawa tu mega diatur Men Fellowship Gereja Saint John ti betuaika Ujang Anyi lalu disempulang pengawa manggang, makai beserumpu enggau beperindang.

Ba pengerami tu, Ujang ti mega Sekretari Parish Church Council (PCC) Sibu bisi nyuaka pemeri beserimbai enggau Hari Indai ngagai Women Fellowship Gerempung Gerija Sarawak (ACS).

Kelimpah ari nya, Women Fellowship Gerija Anglikan Saint John Sibu betuaika Pauline Lamus bela nyuaka tepa ngagai Reverend Doyle kelai gaga ati nyambut penatai iya.

Pengawa lemai nya bela digulu Vicar Gereja Anglikan Saint John Reverend Canon Jamal Senada enggau Sub Deacon Obed George Gomes.

Reverend Doyle penakan Finland enggau Malaysia landik bejaku Iban.

Apai iya Aarne Olavi Laccase datai ari menua Finland lalu indai iya Boon Moi bansa China/Hakka ari Sri Aman.

Reverend Doyle ada kena taun 1985 ba Sri Aman lalu kala belajar ba SRB Chung Hua, Sri Aman sebedau besekula ba SMK Saint Luke enggau SMK Simanggang ti mega ba Sri Aman.

Nangkan ke nya, iya nampung pelajar ba Kolej Inti Sarawak ba taun 2003 nyentuk ke 2005 ngambi pelajar Diploma in Mechanical Engineering.

Tembu belajar dia iya gawa ba sebengkah kompeni telekomunikasyen megai penuduk 'Eksekutif Jualan dan Juruteknik'.

Ba taun 2009, iya dipasuk ngagai House of the Epiphany Kuching sebedau nampung pelajar ngagai Seminari Theoloji Malaysia, Seremban (2010-2013).

Iya nembuka pelajar bulan Oktober taun nyin tadi sebedau datai ngagai Gerija Saint John, Sibu ditu kena bulan November 2013.

Iya dichirika The Most Reverend Archbishop (The Province of South East Asia) Datuk Bolly Lapok nyadi Deacon kena 27 April tu tadi ba Gerija Saint Thomas, Kuching.

Print Friendly