Sapa Ti Patut Dikarapka? Torstein Sjotveit Enggau Propaganda SEB Tauka Buah Penemu Ari Siku Pengulu Bansa Penan? |
- Sapa Ti Patut Dikarapka? Torstein Sjotveit Enggau Propaganda SEB Tauka Buah Penemu Ari Siku Pengulu Bansa Penan?
- Radio Free Sarawak Dipilih Nerima Tanda Puji Media Di Australia
- Nama Utai Ti benung Nyadi Di Menua Tasmania?
| Posted: 19 May 2014 07:07 AM PDT Propaganda ari kompeni pengeluar kuasa elektrik, Sarawak Energy Berhad (SEB) udah sekali agi dibantaika nengah sebuah filem ti mudah ti tau ngasuh ati mensia mayuh tekenyit. Dalam sebuah filem dokumentari sida ke diatu ti direkod sida di Tegulang nya, raban bansa Penan ti udah dientapka pendiau dia udah dikemendarkan bejaku ngarika diri empu, lalu ukai diarika SEB tauka agensi berita bansa, Bernama, ti bejaku ke sida ngagai bala pengarang berita ti udah dijinak-jinakka. Lalu siku tuai bansa Penan, Pengulu Pao Tului, ti suah diayanka SEB dalam pengelama bebulan-bula nyadika siku tuai raban bansa asal ti besedia dibai bejuraika macham leman pekara enggau sida, udah direkod kamera ngambika nusui baka ni raban bansa asal nya dikeduan. Jauh ari ti bepuas ati ba "pengidup dudi hari ti tampak" enggau "pemansang ti tekala nya dalam pengidup" sida, pengulu ti udah badu bekereja nya nusui enggau lenak baka ni kompeni kuasa elektrik enggau perintah menua udah suah bendar enggai dibai bejurai tauka ngemendarka peminta bala nembiak redak iya lebuh sida dipejal ninggalka menua asal enggau kampung sida. Lebuh ti berandau enggau bala juru kamera ba tapak rumah (di Tegulang) ti bedebu sereta kamah, ti endur bala orang bansa asal ari Long Wat udah dipejal ngentapka pendiau diri, pengulu nya madahka baka ni raban bansa Penan nyau udah berasai putus pengarap, udah bekau betaun-taun sida bejuraika penemu enggau SEB, lalu ke pengujung iya sida udah nurunka penyampau peminta sida ari RM500,000 (US$150,000) ngagai RM100,000 (US$31,000) ke sebuah ruang bilik orang, laban sida udah ngumbai perintah nadai duit ti chukup!  Sukung ti majak kurang ari raban bansa asal tu ti tau ngasuh ati orang mayuh tekenyit Tang, udah bekau ngurangka peminta nya pan SEB mengkang nulak peminta raban bansa asal nya. Tang, ke penudi iya SEB udah mutuska penemu sida ti deka meri elaun ari baruh ikas pemadu mit RM850 sebulan ke tiap ruang bilik lalu dibayar ninting bulan dalam pengelama 4 tahun aja, taja pan sida enda tau enda mindah ari chara idup ngasu-beburu ngagai sebengkah kandang menua ti endur sida endang nadai pengelandik beridup chara betanam-betupi ba maya ti ngemandak nya. Atur baru ti ngasuh tekenyit ati ari kompeni SEB Utai ti ngasuh orang mayuh tekenyit ati nya pasal jaku penerang ari pengulu nya ti madahka nembiak redak iya deka nerima bayar pampas ti mimit bendar ti enda ditemu sida kemaya lalu sida nyadang sida deka nerima semina RM250 sebulan dikena meli berang diguna besehari-sehari, nyengkaum belanja dikena sida mindah kin-kitu ba sebelah kandang menua di teluk kampung lalu jauh ari batang sungai! Diatu kami meretika jaku penerang ti seruran disadaka SEB ti madahka sida meri bansa Penan pampas ngena "barang ti manggai ungkus RM600,000" nyadika ganti pengerugi sida ti udah lenyau menua enggau jalai pengidup sida. Terang bendar lumur enggau angka ti disebut-sebut SEB nya enda tetap, ti semina dikira-kira nguntungka sida aja, laban ketegal sida ti udah mansutka belanja ti besai dikena sida mindahka bala orang ti mayuh. Pampas mata duit ke bendar iya nya semina RM250 sebulan ke tiap ruang bilik dalam pengelama 4 taun. Uji nuan idup ngena pampas mata duit nyampau nya, Torstein Sjotveit!  Kaum Penan yang terjejas dibiarkaRaban bansa Penan ti dituntung penanggul udah ditejuka ngumbai Taib nya suntuk duit!n menganggap sama ada Taib kesuntukan wang! Penerang ti disadang tau diulihka ari atur tu bepanggai bendar ba bala orang ti mutuska penemu sida, ti udah ngulu aum ba Gerempung Bansa di Geneva ba mua bala pengarang berita pasal tuju pengawa sida ti ngangkatka pemanah pengidup raban bansa asal di menua Sarawak. Raban bansa asal ti seranta sereta dituntung penanggul nya udah ditejuka belabaka Menua Sarawak ti kaya nya enggau kompeni pengeluar kuasa elektrik ti udah udah nginjau duit dikena melanja program ngaga tekat ba penyampau RM30 billion nya semina ulih meri elaun pengidup ti mimit bendar. Torstein Sjotveit, beserimbai enggau nya, udah nentuka sekeda ari duit nya diagihka lebih sejuta dollar setaun nyadika pakej gaji taun iya lalu beratus-ratus juta agi dipasukka dalam akaun kompeni-kompeni enggi tuan iya, Kepala Menteri Sarawak Abdul Taib Mahmud. Propaganda ti enda temu-tuku Penerang ari Pengulu Pao Tului mai reti ba pengawa mapap muji-muji diri empu ti dikereja bala orang bala Kepala SEB, Torstein Sjotveit nya, utai ti enda bendar.  Gaya begambar dikena bekelulu lebuh Torstein Sjotveit ngemesai-mesaika 'misyen pengelantang mensia' dikena 'ngangkatka pemanah' pengidup bansa Penan. Torstein Sjotveit udah mandangka sebuah galeri gambar iya ti begulai enggau pengulu nya enggau mega bala orang Long Wat, seraya ke muji-muji diri baka ni iya udah mujur mantu sida enggau chara ngerusak menua enggau kampung asal sida lalu udah nya ngisi ai tekat lalu udah nyangumbai sida berasai gaga ati ke pengawa iya atas pengidup sida.  "Penatai aku disambut enggau manah" – SEB udah ngumbai Pengulu Pao Tului nya nyadika penyukung ke Torstein Sjotveit – tang diatu gambar nya udah jauh bendar bebida Pengulu Pao Tului, ti udah nyeritaka pemar pengidup ti ditapi raban bansa iya empu bulan nyin kemari, agi mengkang diayanka SEB enggau sekeda suratberita propaganda perintah nyadika siku tuai raban bansa asal ti nyukung pengawa 'manah' perintah menua enggau kompeni pengeluar kuasa eletrik sida. Semina dua hari tu tadi, Bernama enggau suratberita Borneo Post udah madahka pengulu nya endang besetujuka pemerinsa pengidup orang ari raban bansa iya empu udah "diputarka nengah jurai enggau pengawa jaku randau" ba sebengkah cherita ti betopik "Penan Murum ngaga pengidup ke jeman dudi sida ti tampak"!  Nempa propaganda, tang sida empu nusui penerang ti bebida – mega ditunjukka ba gamal mua sida empu Cherita ti sama tu udah ditulis lalu dikeluarka baru pasal "ngangkatka pemanah pendiau ba singkang atur ti jampat" lalu besalahka gerempung-gerempung NGO laban nyungkak bantah ke raban bansa Penan. Tang filem nya udah mujur nerangka enggau silik ti madahka nadai siti pan perengka diguna nya udah ditagaka dia lalu Pengulu Pao Tului udah ngamatka raban bansa asal iya nadai bulih sebarang penerang ni maya sida deka nerima pampas nya. Sekali ke tu nama kebuah orang tuai ti nyadika tuai raban bansa iya empu tu bejuraika penemu enggau SEB kenyau ari beberapa taunt u udah; ti udah nemuai ke Kuching ba taun nyin kemari lalu ngarika raban bansa iya ti majak tusah ati, diatu udah diketuka perintah Sarawak ari pengawa iya? Sekali ke sida deka ngukum Pengulu Pao Tului, lalu nyerumba nya sida bebendar amat ngayanka iya nyadika penyukung langgur pengawa sida? Enti baka, terang bendar mih ukum ti pemadu dikenakutka iya nya roh aki-ini iya laban engka iya udah puntan enda miring ngagai sida ketegal pengerusak batang sungai enggau rampa menua asal sida. Raban bansa Penan lalu bedau bulih peluang endur sida miring lalu SEB bedau ngagihka belanja dikena sida meli perengka dikena miring menga-mit ngambika diberika ngagai roh aki-ini bansa Penan ti dituntung penanggul nya. Sekeda ari jaku ari Pengulu Pao Tului (dikena iya nimbal propaganda SEB ti panjai-panjai dalam sekeda suratberita BN di menua Malaysia) "Ba pun tu kami ngulu mayuh aum enggau perintah lalu aku endang enda ngemendarka sebarang tekat ai digaga di menua tu. Kami udah mega suah bejurai. Bisi sekali kami berandau enggau siku YB enggau tiga iku temuai ari menua bukai. Sida bemalam ba rumah panjai kami. Dia, aku lalu madahka sida sebedau aku ngetas randau kami lalu ninggalka sida, "sereta kita datai di Kuching tauka di Kuala Lumpur, kita patut madahka ngagai Kepala Menteri tauka Menteri Besai awakka nganjung bala soldadu enggau senyata sida dikena munuh raban bansa Penan di menua tu. Ku aku madahka ngagai sida "udah kita munuh semua bansa Penan ditu ila baru kita tau belabuh ngaga Tekat Murum". Tang pengujung iya kami enda ulih nagang sida ngaga Tekat Murum.  Torstein Sjotveit madahka iya "disambut enggau basa ti manah" laban ti deka mai "atur pemansang" – tang pengulu Pao Tului madahka iya patut munuh semua bansa Penan dulu sebedau sida ngaga Tekat Murum "Lalu kami udah minta pampas RM500,000 ke tiap iti ruang bilik. Kami lama bendar udah nganti, tang peminta kami nya lalu bedau dikamatka. Ba jaku randau ke nangkanka nya aku udah ngurangka peminta nya ari RM500,000 ngagai RM200,000 lalu dikurangka baru ngagai RM100,000. Aku belabaka sida (perintah) enggai mayar kami pampas ngemayuh nya, laban aku ngumbai sida udah meri kami ganti ednur diau ti pechuma, bekal ai beresi enggau kuasa elektrik mega pechuma (taja pan nadai bejamin datai ke ni maya). Engka sida udah enda ulih nangkup pinta kami nya. Datai ke sehari tu sida mengkang enda ulih nyaut peminta. Ulah sida udah ngemediska ati kami nyentuk aku nyau deka madahka sida "berika kami sebarang penyampau ti ulih beri kita!" Lalu kena 24hb Tujuh 2013 tu tadi kami sekali agi berandau di Long Menapa lalu perintah ngelanggur deka mayar kami RM850 sebulan ke tiap ruang bilik. Bayar pampas nya deka diatur dalam pengelama 4 taun lalu deka diketuka udah kami mujur bulih belanja bantu ari pengawa betanam-betupi. Tang mayuh ari raban Penan enda setuju ke atur bayar pampas tu. Peminta asal kami RM500,000, lalu lebuh kami minta RM100,000 peminta kami nya mega enda dikemendarka sida (perintah). Nya alai kami minta RM3,000 sebulan ke tiap ruang bilik, sida patut mayar kami RM850 mata duit lalu ukai RM250 mata duit lalu barang ke bukai nya 'beungkus' RM600, baka ti dilanggurka sida bukai. "Enti sida enda ulih mayar kami RM3,000 sebulan sida patut mayar kami RM850 mata duit lalu ukai RM250 mata duit ti ditambahka enggau barang diguna 'beungkus' RM600, baka ti dilanggurka sida bukai – nama kebuahnadai siku orang ptut arapka perintah Taib Mahmud  Endang ditejuka bepanggai ba jaku semaya SEB enggau perintah Taib Mahmud ti suah berubah "Bayar nya ukai naka 4 taun tang banyar nya patut dibayar sepemanjai umur", ku Pengulu ti udah putus asa nya ti ngarika raban bansa iya ti kena tuntung penanggul ketegal suah nemu pemuntan maya berunding enggau perintah ti jai sereta mega enggau kepala SEB Torstein Sjotveit. Pengulu ti udah diketuka ari pengawa iya nya, diatu ti beumur 80 taun nya, lalu bejaku baru pasal penusah ati iya ke pengerusak palan tuchi raban bansa iya – sekeda endur ti kenu ku SEB deka diintu sida enggau manah. Filem nya lalu ngenang pasal penguntung ti disemayaka SEB nyadika balas budi orang bansa asal nya ti ngelepaska palan tuchi sida enggau ke pengerusak menua asal sida: "Ni maya sida deka ngaga sekula, klinik enggau perengka diguna ke bukai? "Aku benung nganti saut ke tanya nya. Kena 6hb Enam 2010 suba YB Billy Abit Joo kala udah besemaya enggau kami ba sebengkah jaku randau di Sungai Asap. Kenu ku iya, sida deka ngaga klinik, sekula primari, sekula sekondari enggau sebuah pasar, nya mih utai ti disebut iya. .. "Bisi letak maya endur ngaga semua utai nya?" Nadai, kami pan enda nemu, kami enda nemu dini endur utai nya deka digaga ila." Torstein Sjotveit enggau SEB udah puntan ngamatka semaya sida ngagai orang mayuh, ti endur sida madahka semua perengka diguna nya deka udah bisi lebuh bansa penan datai ba palan pengentap pendiau baru sida nya. Peluang sida ke diatu nya sida SEB arapka peminta bansa Penan nya deka lenyau baka nya aja lalu sida deka nejuka bansa Penan mati lalu but ba sebengkah kandang menua ti udah balat kusi berimbai enggau kebun dandang besai sawit lalu ngumbai pengawa sida nya nyadika "kayu penyukat pemanah pengawa" ba atur pengentap pendiau baru. |
| Radio Free Sarawak Dipilih Nerima Tanda Puji Media Di Australia Posted: 19 May 2014 01:44 AM PDT  Stesyen radio ti 'manchal'? Seraban pengarang enggau pemacha berita ari stesyen radio bebas ti ngena jaku Iban Radio Free Sarawak (RFS) udah mujur nerima tanda puji media di Australia, ari Universiti Queensland di pelilih Brisbane. Pemenang ti bukai dalam kategori orang siku-siku nya pengarang berita befotografi ti bekereja di Afganistan, Barat Ali Batoor. Raban RFS nya, ti bisi kaban bekereja enggau chara belalai dikena nyeliahka diri kena keduan orang bekuasa ari Sarawak, berasai gaga bendar ati ninga berita nya enggau tanda puji nya. Tu nyadika tanda puji ke-dua ke pemanah pengawa RFS dalam timpuh enda kurang ari sebulan.  Pengarang enggau pemacha berita Peter John Jaban benung berandau enggau siku tuai raban bansa asal di Sarawak Beserimbai enggau Hari Bebas Media Sedunya, kena 3 haribulan Lima tu tadi, siku ari pemacha berita stesyen RFS nya, Peter John jaban, udah diberi tanda puji 100 Bujang Berani ari gerempung Global Press Freedom ari NGO Reporters Without Borders. Peter John Jaban, ti udah madahka ngagai orang mayuh pasal kaul iya enggau stesyen radio nya, udah meri basa enggau pengaga ati iya ngagai raban RFS ti udah bebendar sereta mujur bekereja, ti dikena ngetanka pejalai projek sida kenyau ari 4 taun tu lalu mega ngagai bala peninga enggau penyukung stesyen radio nya di serata dunya. Program radio tiap lemai nya endang dituju ngagai bala peninga ari raban bansa asal di Sarawak, ti benung napi keruga pengawa orang ngulihka kayu batang ari kampung enggau tanah asal sida lalu pengawa ngerampas tanah dikena muka kebun dandang besai sawit enggu raban orang ti bekuasa di menua nya. Ba ujung minggu tu tadi stesyen radio nya bisi ngambi bagi dalam sebengkah pameran di menua Miri enggau dunju sida dikena ngelaku radio nya ngagai orang mayuh di menua nya. Program sida mai berita pasal penyarut tanah enggau kes-kes dalam kot, ti disekat dalam media selama di menua nya. RFS meri pelasar ngagai sekeeda gerempung NGO enggau jaku randau bekaul enggau isu kuasa pengelantang mensia di menua nya.  Pemangku Menteri Pekara Pengangkut enggau Menteri Pengelikun Menua, Hishammuddin Hussein Program dalam RFS udah balat dikerinduka orang ari raban bansa asal di menua pesisir, udah nerima mayuh jaku kutuk bala orang politik pemerintah, ti nuduh stesyen nya dipejalaika enggau enda beradat. Menteri pengelikun Menua, Hishammuddin Hussein (siku menteri ti nyadi tebilang agi beserimbai enggau penusah pengelenyau penerebai bilun MH370) kala mansutka jaku iya "enda nejuka sebarang batu enda dikalihka" dikena nentuka penyalah dikereja stesyen radio nya. Tang, Hishammuddin udah enda mujur tetemuka sebarang penerang ari baruh batu-batu ti dikalih-kalihka iya. Baka nya mega, MP BN ari sitak Sibuti Ahmad Lai Bujang nyadika siku orang politik BN ti nyemakaka RFS nya baka igi penyakit ti bias ti patut diseliahka orang mayuh. Jaku nya lebih agi munyi 'petenah', sebengkah penyalah ti balat ti tau ditinggang ukum tutup ti lama lalu tuduh nya udah mejal raban stesyen radio nya bejalaika pengawa sida enggau chara belalai dikena sida nyeliahka diri kena keduan orang ti bekuasa. Kutuk enggau bantah nya meruan, nandaka bala orang politik perintah ngasaika sida tekeruga pun penatai penerang enggau berita ti bebas ti enda ulih kuasa sida. Siku agi menteri BN, Douglas Uggah Embas udah ngela RFS baka rachun. Lalu Sapit Menteri Pemadah, Komunikasyen enggau Main Asal, Joseph Salang Gandum udah mansutka jaku dalam sesyen tanyasaut dalam perlimen madahka iya ngelala bala orang Sarawak empu bisi ngambi bagi dalam stesyen radio nya lalu sida tau ditinggang undang-undang menua. Siku agi pengari rayat BN, Snowdan Lawan,mmega madahka perintah deka matau pengawa RFS, laban kenu ku iya stesyen nya balat ngarika pejalai pengawa parti penyakal lebih agi maya bepilihbesai. Opis perintah di Malaysia bisi ditemu ngachau program ari stesyen radio nya lalu nyerang laman web ba maya program nya ditaburka kenyau ari empat taun ke udah tu, lebih agi maya bepilihbesai. Tanda puji ari unversiti nya nyadika kelai bepelajar tinggi ti kering bendar ke stesyen nya, ti udah balat bendar napi bantah enggau kutuk bala orang politik parti BN di bekuasa di Malaysia. Palan ti meri tanda puji ari university nya nyadika sebuah sekula tebilang di Australia ti ditumbuhka dalam taun 2007 lalu nyadika palan bala pakar ba pengawa pengerembai berita chara bebas di Australia.  Dikeduan raban apek bayat kayu batang – bala orang indu ari pelilih Melikin tu benung mendingka program RFS bekaul enggau penusah ti nuntung raban bansa sida. Menua Malaysia diengkahka ba tangga pemadu baruh dalam tikas ngerembaika berita chara bebas di dunya. Perintah iya udah milih nguasa semua macham jaku bantah lalu sida semina ngerembaika berita nengah stesyen radio enggau suratberita ti belisin aja, lalu sida nuduh sebarang stesyen bukai nyadika 'penabur petenah' ti dikumbai sida ngelemika pemanah nama enggau pengawa perintah. Kelimpah ari nya, RFS, ngeluarka program sida ngena gelumbang angin pandak ari menua tasik nya nengah internet lalu beduduk ba palan nya, sida enda kena bungkur undang-undang nya. RFS nya sebengkah projek ti mampang ari laman blog Sarawak Report.  Siku peningaprogram RFS ari bansa Penan |
| Nama Utai Ti benung Nyadi Di Menua Tasmania? Posted: 19 May 2014 01:02 AM PDT  CEO Ta Ann ti mega siku orang dagang wain – Evan Rolley Perintah menua Australia sekali agi ditemu meri sabsidi ti besai dikena ngemendarka sapa-sapa orang tauka kompeni nebang kampung sida di pelilih pulau Tasmani. Kompeni Ta Ann ti bisi indu opis di menua Sarawak udah mujur bulih kontrak ba penyampau $7.5 juta, ti nyadika semua penyampau enggau pemeri ti dulu agi nya manggai $45 juta kenyau ari 7 taun tu udah, taja pan kompeni ari Malaysia nya ngumbai diri nadai bulih untung dalam pengawa dagang nya. Nama utai deka diperatika kita nangkan ke tu? Ya, kitai deka meda agih belanja $136,000 ari duit Ta Ann lesap dikena melanja pengawa ngeluarka wainti digaga di menua nya, dikeluarka CEO Ta Ann ari menua nya empu – Evan Rolley, ti udah kala nyadi kepala dalam Opis Kampung Tasmania! Kepala kompeni Ta Ann ti mega pemegai syer pemadu mayuh, petunggal Taib Mahmud, iya nya Hamed Sepawi, siku orang Islam, bedau lama ti udah bisi diambi gambar dipeda lantang bendar ati seraya ngirup ai irup bealkohol nya, tauka ai irup ti nyau deka sebaka reti enggau nya begulai enggau bala pelanggan sida ti datai ari menua Jepun. Nitihka repot berita ari menua nya empu, Ta Ann ditemu bisi meli kira-kira 300 peti wain ti dikeluarka CEO sida empu nya ba rega $35 sebotol. Kenyau ari Evan Rolley nyual wain benama 'Heriot Point' ba rega $25 sebotol, nya dipeda sebengkah chara ti berupai dikena ngerampas agih belanja enggau ngelakuka Ta Ann sanggup meli 300 peti ke iya empu ukai ba rega ti dikurangka, tang ba rega premium ti tinggi!  Rintai rega wain ti dikeluarka Evan Pekara itu ngarika pendiau bekelulu sereta bedanjang tanggungpengawa, ti patut diambi tindak Opis Shariah Malaysia ba atas Hamed Sepawi enggau tindak ari Opis Kira-Kira menua Australia ba atas Evan Rolley. Tang sebaka enggau di menua beperintah demokrasi bukai di dunya tu, pekara nya semina deka ngasuh orang bekaul ngapa, enda lama, lalu bala orang di Tasmania semina deka bedemuh baka nya aja.  Siku orang tuai ti sama, bini biak iya (kepala menteri ti seruran ngarika iya, di belakang) – Gabenor Sarawak ti mega tuai menua bekukut besi, Abdul Taib Mahmud Perintah Australia udah melanja pejalai pengawa dagang Ta Ann kenyau ari sida ti mayar kompeni nya numbuhka palan ngaga papanlapis ke terubah sida dalam taun 2007 suba. Pengawa nya dipejalaika taja pan kompeni nya ditemu bisi duit bebilion-bilion ti lebih ari numbas dikena sida ngati ke diri ngaga palan ngaga papanlapis nya, enti sida deka. Tang chara Taib enggau Hamed bedagang endang seruran ngarapka menua ti endur sida bedagang nya ngaga sereta nyediaka palan enggau perengka ti diguna dikena bedagang, lalu udah nya untung ari dagang nya deka diambi sida ari menua nya. Lalu ke bendar iya, palan pengaga papanlapis nya semina dikena sida ngelamun asil kayu batang ti ditebang di Sarawak tang diberi setipikit 'kayu manah ke rampa menua' ari menua Australia. Nama kebuah Australia balat tambap, nyukung dagang ti mai pengerugi nya, ti ngerusak rampa kampung pesaka Tasmania nya empu? Semua nya dikereja ketegal politik, lalu ukai ketegal ekonomi ke penguntung menua.  Pengerusak kampung bungas enggau kampung puda di Tasmania Pengawa ngaga palan ngaga papanlapis ti baru dikena nginjin kayu batang nya disadang tau meri pengawa ngagai 120 iku orang di menua nya –taja pan Ta Ann kala didinga nyebut deka muka pengawa mayuh ari nya. Pemeri ari perintah parti Labour ti dulu nari tu udah dikemendarka atas polisi nyukung Ta Ann, sebuah kompeni ti dikerinduka bala menteri sida baka Paul Harriss enggau Bryan Green ari parti penyakal ke dulu suba, nya dipelabaka enda patut dikena ngulihka penemu ti besenutuk lalu dikena ngubah Sempekat kampung ti sebagi nya nyadika atur dikena nyaga laluh kampung ke penudi di pulau nya. Atur nya disukung sekeda raban ti rinduka rampa menua, nyengkaum Wilderness Society.  Paul Harriss (kanan) orang kananTa Ann Tasmania enggau Awang Tengah, orang kanan Taib di Sarawak Tang kelimpah ari bebasaka Sempekat Kampung, raban tukang tumbang nya diatu nyau berebutka peluang berubah perintah dikena ngelabuhka nya. Paul Harriss, ti diatu mangku pengawa nyadi Menteri Pengeraja Asal, merambu deka mai tuduh penemu nya ngagai Parlimen Menua ba beberapa hari tu. Pengawa nya dikena ngemelika bala orang ti madahka tuduh penemu ari Wilderness Society, ti ngumbai sida ulih 'bekaul' enggau Ta Ann enggau bala penyukung politik sida, dikena ngurangka pengawa nebang kampung di menua nya. Pengawa nya deka ngerugika Tasmania beratus juta dollar ba bayar pampas laban udah besetuju ngemataka rampa kampung be pemesai 500,000 ha, tang Paul Harriss besedia meri seput ti baru ngagai industri kayu batang – semua nya ke guna sebuah kompeni ari menua bukai ari luar Australia, Ta Ann. Tu endang Paul Harriss ti lama, ti udah kala dianjung nemuai ke Sarawak dipelanja Ta Ann lalu bekerejasama enggau kompeni nya kenyau ari iya belabuh ngaga kaul di menua nya. Paul Harriss udah madahka bala orang di Sarawak, ti suah kena keruga pengerusak rampa kampung ketegal pengawa ngulihka kayu batang enggau pengawa muka kebun dandang besai, deka bulih penguntung ari 'pemansang ti meruan'. Iya endang nemu bisi penguntung ba atur pengawa Ta Ann enggau Hamed Sepawi di menua Sarawak, lebuh iya besetuju nuliska jaku pemuka ba cherita lama korporat Ta Ann ti bedagang ngena sukung bala kaban Parlimen Tasmania. Bala orang asal di Sarawak enda besetuju enggau penemu iya nya – pia mega disempulangka 300 iti kes charut tanah ti udah difailka dalam kot dikena ngelaban perintah Sarawak ngambika dipecharaka. Ke bendar iya, semua lisin ti besai-besai Hamed Sepawi nya diulih iya ngena chara makai suap ari petunggal iya empu, Abdul Taib Mahmud, ti baru nyadi Gabenor Sarawak, ti udah enda dikibuhka bala MP ari Tasmania. Engka Paul Harriss besedia deka meda video tu ti nunjukka siti chunto atur pengawa ti ditusui bala orang asal, ti endur kampung pesaka sida enda tau enda meri awak bekereja ngagai kompeni sida muka kebun dandang besai sawit ti sebagi ari tiga bagi nya enggi Hamed Sepawi ti ngarika petunggal iya empu, Taib Mahmud nya. Tu utai ti tau dikumbai pemansang ti meruan?  Dirusak kerita lipan Hamed Sepawi, rumah panjai Rh Sendok di Sarawak. Bisi 300 iti kes charut tanah asal ngati dipecharaka, mayuh agi nya nemu perintah Sarawak salah ngeruga tanah adat enggi orang bansa asal. Mayuh kompeni kayu batang Sarawak besetuju enggau penemu Paul Harriss ti deka mai pengawa ngulihka kayu ngagai menua Tasmania. Agi mega, ngumbuk bala orang politik enggau bala pemesai perintah nya beguna bendar dikena ngulihka lisin nya endang chara kereja raban apek bayat mafia kayu batang ari Malaysia belabuh ari pelilih Amazon nyentuk ngagai Congo lalu terus ngagai Asia Tenggara.  Raban orang asal Sarawak ngelaban pengawa ngulihka kayu batang enggau pengerusak tanah enggau sungai sida Ba taun nyin kemari Hamed Sepawi enggau kompeni iya, Atlantic Resources, udah diburu pansut ari menua Liberia aria rah Presiden laban iya ditemu bulih lisin nebang kampung enggau chara ti salah ba atas ¼ ari laluh ari rampa kampung pemadu besai di menua Congo nya.
Kompeni bechura apek bayat mafia kayu batang tu dipejalaika ngena belanja bebilion-bilion dollar udah ngerusak kampung di Borneo – penguntung ari pengawa nya udah dipasukka ngagai kuchik orang diri sebilik ti bisi bekaul enggau politik, lebih agi ngagai Hamed Sepawi empu. Nya udah nyadika siti penatai belanja ti mayuh ngagai sida ti berindik dalam kaul dagang ti digaga Taib di Tasmania. Kompeni Hydro-Tasmania enggau bala pemesai perintah di menua nya udah nemu peluang ba pengawa ngaga tekat ai di Sarawak, chunto iya, enggau ke pengawa ngulihka kayu batang ti diarika duit bejuta-juta ringgit enggi Taib dikena ngulihka untung ti bendar ti mar bendar ari pelilih menua matahari padam nya. Tang, sekali ke untung baka tu ti dikarapka bala orang di menua Tasmania? Lalu sekali ke sida majak deka bedagang enggau orang baka Hamed Sepawi? Menua Liberia udah mechat iya? Bala pengundi ti nyukung pemeri Tasmania ngagai apek bayat mafia kayu batang Sarawak nya patut nemu. Untung ti besai nya datai ari pengawa ngerusak kampung pesaka sida deka dipasukka ngagai kuchik Taib enggau bala kroni iya, ukai tama ngagai wang turu Tasmania. Rindu bala orang di menua Tasmania ke atur pengawa baka tu? Laban pengawa tu deka ngujungka sida dipeda baka bala orang ari menua dunya ke-tiga – sebaka enggau bala orang asal di menua Sarawak enggau Papua, Congo enggau Amerika Selatan, ti kena keduan apek bayat mafia Taib ba atas orang politik siti-siti endur.  Baka ni polisi kebun dandang besai Taib udah mai penanggul ngagai kampung enggau rampa menua Sarawak. Hamed Sepawi nyadika pemegai pemadu mayuh syer dalam lisin kayu batang enggau kebun dandang besai Taja pan mayuh penerang ti kamah pasal kaul Ta Ann, tang sekeda orang politik Tasmania, baka Paul Lennon, Paul Harriss, Simon Crean (menyadi kepala kompeni Hydro-Tasmania, David Crean) enggau Bryan Green, udah balat nyukung kompeni tu dalam kandang beberapa taun. Jaku tanya iya, sekali ke pun penatai pemisi ti bukai ti enda diterima Paul Harriss ke dalam industri kayu batang di Tasmania nya? Sekali ke bisi sebarang penyalah ti deka dikenyadika sida melanja pengawa nya? Laban, duit kamah Hamed Sepawi enggau Ta Ann nya datai ari pengawa makai suap dalam politik enggau salah guna kuasa.  Mantah program ngaga tekat ti disukung kompeni Hydro-Tasmania Pengerusak kampung di Sarawak udah mai penanggul ti besai ke orang bansa asal enggau kuasa sida; pengerusak kampung Borneo enggau ubah ba gaya hari deka mai empas ngagai kitai semua. Pekara tu suah bendar udah ditusui sereta ditemu orang mayuh, ukai semina dalam laman blog tu tang mega dalam gerempung media tebilang di serata dunya enggau mega raban orang ti landik ba gaya rampa menua ti dikelala orang. Taib benung dipansik opis MACC ketegal chura penyalah makai suap ti dikereja iya – dalam sebuah menua ti balat korup! Nya alai, sekali ke tu enda ngawa ba Paul Harriss enggau bala penyukung ke kompeni Ta Ann – ti udah dibai sida tama lalu bekereja ba endur sida nya suba? Bala penyukung Ta Ann patut nemu pasal pengamah pengawa salah makai suap tu. Bisi utai ti enda betul ba kaul kompeni nya enggau bala bakih politik sida di Tasmania. Chunto iya, lebuh Hamed Sepawi empu meri terima kasih ngagai dua iku orang politik Tasmania ti nyukung iya laban udah mujur meri sabsidi ngagai kompeni iya dalam taun 2006, Paul Lennon (ti kala udah nyadi Menteri Besai) enggau Bryan Green ti nyadi Menteri Kampung di Tasmania, iya madahka diri udah ngaga palan ngaga papanlapis ba sitak bepilihbesai seduai nya!  Rolley ba penuduk iya ti nyadi CEO Ta Ann Tasmania lebuh Hamed Sepawi madahka sabsidi perintah ti deka diberi Ba jaku iya nya mega iya meri terima kasih ngagai Evan Rolley, lebuh nya iya nyadi Direktor Opis Kampung lalu enda ulih ngatur pengawa lebih ari nya dikena ngemenuhka peminta dalam sempekat nya. Iya mega meri gela "Captain" ngagai Rolley ketegal pemerat iya bekereja mantu Ta Ann ngulihka juluk ati sida nya. Enda lama udah nya "Captain" Evan Rolley ninggalka batang pengawa iya ngagai menua lalu bekereja nya kepala operasyen Ta Ann. Ngambi bekereja bala orang politik enggau pemesai perintah ba siti-siti menua nya siti chara apek bayat mafia kayu batang Malaysia nya bekereja, lalu sekali ke utai baka tu ti deka dipeda bala orang di Tasmania? Evan Rolley udah bula lebuh iya mai tama kompeni Ta Ann nya ngagai Tasmania. Lebuh keterubah iya ngeluarka lisin kayu batang ngagai Ta Ann, Rolley patut meri penetap ati ngagai orang mayuh di menua nya, madahka Ta Ann enda beniat deka ngerusak kampung bungas sida. Ari penetap ati ti ditandu-tandu iya kenyau ari 2006 nya, bala orang mayuh di Tasmania tentu deka arapka Ta Ann deka semina nebang kayu ti ditanam baru – lalu pechaya ke kampung bungas sida enda dikeruga.  Asil tebang 'manah ke rampa menua' ari kayu tanam baru? Ya, nitihka Rolley – semina kayu puda ari kampung ti enda regas aha ditebang Ta Ann – lalu ke bukai nya ditebang lalu ditunu Tang tiap kali raban NGO ti rinduka rampa menua enggau bala pengarang berita nunjukka madahka sempekat ti digaga Rolley enggau Ta Ann nya udah ngemendarka Ta Ann ngulihka kayu ari kampung bungas ti besai bendar rampa nya, Rolley ti nyadi CEO baru dalam Ta Ann ngumbai bala orang nya betenahka iya! Utai ti nyelai nya, 'kayu ari kampung tanam baru' ba leka jaku orang ti pandai baka Rolley nya dikena nerangka bansa kayu ti mit ti agi puda (saiz ti numbas ke guna palan ngaga papanlapis Ta Ann) ari kampung bungas – ukai ari kampung tanam baru ti begunaka ungkus ti besai enti ditebang. Rolley enggau bala penyukung iya ari bala orang politik udah ringat bendar ke jaku bantah ba kayu 'manah ke rampa menua' aja ti ditebang, selampur kampung bungas dia mega ditebang lalu ditunu. Nadai leka jaku "manah ke rampa menua" ba semua bansa kayu ti ditebang Ta Ann, sekali ke kayu nya ditebang di Tasmania tauka di Sarawak. Sida udah berumban-baban nemuai ke menua Jepun laban ngemulaka orang di Jepun din sida nyual asil kayu nengah kompeni ti kamah sereta salah pengawa.  'Kayu manah ke rampa menua'? – Hamed Sepawi udah mujur bendar ngulihka untung besai-besai ari lisin nebang kayu enggau lisin muka kebung dandang besai ti diberi petunggal iya empu, Kepala Menteri Sarawak, Abdul Taib Mahmud Bala orang Tasmania patut nyurutka diri ari ti deka ngidupka pemati pengawa dagang begunaka kayu lalu nguji ngidupka kompeni Ta Ann ti balat udah ngerusak rampa menua sida. Menua Australia nya sebuah menua ti udah suah minta ampun ngagai orang bansa asal laban penyaru runding sida ari kelia. Sekeda penyaru runding nya nyadi di Tasmania. Tasmania enda patut berasai salah ke penyaru runding nya. Tang, enti pengawa minta ampun nya dipeda setengah bebendar, menua nya patut berunding nyeliahka diri ari ti ngeruga orang asal Sarawak enggau pengeraja ari tanah sida tauka ngaga kaul enggau sebarang orang ti beranakka puku dagang enggau chara ti salah. Enggau chara meransang kaul enggau Ta Ann enggau mega orang ti bebelika barang sida di menua Jepun, pemesai perintah Tasmania deka dikumbai sengaja deka ngereja pengawa nya. |
| You are subscribed to email updates from Sarawak Report To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |