» »Unlabelled » Titih ajar Tuhan baka dalam injil: Rt Rev Bishop Hii BorneoPost Online | Borneo , Malaysia, Sarawak Daily News » Berita Iban - New 2 Borneo

07:37:00

Titih ajar Tuhan baka dalam injil: Rt Rev Bishop Hii BorneoPost Online | Borneo , Malaysia, Sarawak Daily News » Berita Iban - New 2 Borneo

Titih ajar Tuhan baka dalam injil: Rt Rev Bishop Hii

Posted: 31 May 2014 09:11 AM PDT

Dikarang Judan Bungap //

Orang ti muntang ngereja penyalah, enda nitihka ajar, enda patut digelar orang Keristin

SIBU: Raban bansa Dayak ti mekuh pengarap Keristin ditangkan ngambi semampai nitihka ajar ari Tuhan baka ke ditulis dalam injil.

Bishop of Sibu Right Reverend Bishop Joseph Hii madah, kelalu mayuh penguji ke bisi nyadi ba dunya kitai diatu.

Ku iya, orang ti muntang ngereja penyalah enda nitihka ajar Keristin enda patut digelar orang Keristin.

"Kitai orang Keristin enda semina mending aja tang titihka jaku ajar Tuhan.

"Bisi ditulis dalam injil 'Ukai semua orang ngangauka aku Tuhan, Tuhan deka masuk ngagai Serega, tang semina sekeda aja sida ti nitihka pekara ti dikedekaka Apai di Serega,'" ku iya maya bejaku ba Sembiang Missa Gawai Dayak ba Sacred Heart Cathedral ditu, Hari Lima tu tadi.

Kira bisi 2,000 iku raban Keristin bansa Dayak ngulu pengerami nya ke diatur 'Iban Section of the Cathederal'.

Nambahka nya Bishop Hii madah, sida mega patut besembiang, besampi, nulung lalu rindu ke orang bukai.

"Enti orang meda pemanah ulah kitai dia orang bukai mega deka nunda ulah ti sebaka," ku iya madah.

Penatai raban gerija maya nya disambut tabuh Iban kelimpah ari umba ngepan asal bala indu enggau lelaki ka datai maya nya.

Bishop Hii dibantu Reverend Father John Anandan, Reverend Father Richard Lau, Reverend Father David Lau ,Reverend Father Ferdinand Vergeer enggau Reverend Bapa Thomas Connors merekat ai pengayu.

Kaban Kunsil Nengeri (ADUN) Tamin Datuk Joseph Mauh Ikeh begulai enggau Bishop Hii sereta bala bukai maya tu mega ngeradak Ai Pengayu kelai meri Selamat Taun Baru ngagai raban bansa Dayak.

Print Friendly

KSKB diperansang nyungkak penguntung dagang

Posted: 31 May 2014 09:07 AM PDT

Dikarang Judan Bungap //

SONG: Koperasi Song Kapit Berhad (KSKB) udah mujur ngatur Pengerami Makai Malam Beserimbai enggau Aum Besai Ninting Taun enggau Mantar Gawai ba Balai Mensia Mayuh Song ditu, empai lama tu tadi.

Pengerami nya dipenyadi Sapit Menteri Pemansang Menua Pesisir enggau Kandang Menua Datuk Alexander Nanta Linggi lalu bela digulu Pemantu Direkter Suruhajaya Koperasi Malaysia (SKM) Beraim Hossen, Sekretari Politik Kepala Menteri Jefferson Jamit Unyat, Pemesai Pelilih Menua Song Jacqualine Ougos, Chairman KSKB Penghulu Baling Jengin enggau Sekretari KSKB Catherine Nain Abit sereta bala raban KSKB ke bukai.

Ba pengerami tu Nanta dipebasa nyuaka replika cek RM63,141.50 ngagai KSKB, penyampau dividen ke dibagi ngagai 77 iku raban.

Udah nya iya nyuaka peransang pelajar ngagai anak raban KSKB ke bulih pemutus peresa ti manah taun seiti suba.

Ba jaku iya, Nanta meri puji ngagai KSKB laban serak tu mujur nyuaka 100 persin dividen ngagai bala raban sida.

Ku iya, pemujur nya endang bepun ari pemanah chara megai sereta disempulang pengeransing enggau kerejasama bala raban gerempung.

Iya ti mega Kaban Parlimen Kapit ngarapka ulah nya ulih dikemeranka belama.

Kelimpah ari nya, Nanta ngarapka KSKB ulih berundingka dagang bukai dikena nyungkakka agi tikas penguntung koperasi sida.

Berebak enggau pengerami nya mega iya bisi nyuaka geran RM88,000 ngagai semilan iti gerempung ukai dikuasa perintah (NGO) ari raban bansa China ba pelilih nya.

Sida ke nerima geran tu iya nya Lembaga Pengurusan SJKC Hin Hua, Kelab Lions Song, Komuniti 1Malaysia Kampung Cina Song, JKKK Kampung Cina Song, Gereja Methodist Sang En, Persatuan Buddist Song, Tadika Semarak, Hock Ann Hoe Benevolent Society enggau Persatuan Foochow Song.

Kelimpah ari nya, Kelab Rekreasi Opis Pemadah Song mega bisi nerima geran RM7,000 ari Nanta.

Print Friendly

Pemujur program nyemilik udah ngelantangka pengidup sida Karum sebilik

Posted: 31 May 2014 09:06 AM PDT

Dikarang Chris Bishop //

KUCHING: Pemutus ngetu gawa ba pasar Kuching lalu nyereta kus nyemilik ke disedia Opis Menteri Dagang Temuai dalam taun 2006, udah ngubah pengidup seiku orang indu, Karum Jugas ari Genturung Pendiau Annah Rais, Jalai Puncak Borneo.

Pengudah enam taun ngaulka diri ba program nyemilik, Karum, 49, diatu udah berengkah ngasaika penyamai idup lalu udah muka sebuah agi bilik ungkup program nyemilik di rumah panjai Bidayuh, di Genturung Pendiau Annah Rais.

Kelimpah ari nyendiaka bilik endur temuai diau, Karum mega nyendiaka servis nemuai ngagai ai wong, mata ai angat (hotspring) enggau neresa kampung.

Temuai mega dibai nemuai ngagai kebun lada ba kandang endur ngelingi genturung pendiau Annah Rais.

Lebuh dikerandau pemberita bedau lama tu tadi, Karum madahka iya berengkah ngemun program nyemilik ba bilik lama sida di rumah panjai genturung pendiau nya dalam taun 2008.

"Nyauka puas gawa di pasar Kuching, aku bisi ninga sebuah ejensi bisi ngatur kus program nyemilik di Balai Mensia Mayuh genturung pendiau Annah Rais.

"Aku enda berunding panjai agi lalu mutus ati badu gawa ngambika ulih nyereta program nya, ke diatur dalam taun 2006.

"Selang dua taun pengudah nembuka kus, aku mujur muka sebuah bilik ungkup program nyemilik asil bantu enggau iring ejensi opis dagang temuai.

"Berengkah ari sehari nya, aku nerima mayuh penatai temuai kelebih agi maya ujung minggu. Penatai pemisi aku majak nambah ti ngujungka pengidup aku berasai lantang diatu,"ku iya.

Taja pan enda dibantu laki iya ti benung gawa di Sabah, Karum ke bisi empat iku anak ti benung besekula diatu udah mujur muka sebuah agi bilik ungkup program nyemilik di rumah panjai ke sama.

Ku iya, belanja RM5,000 udah dikena ngemanahka bilik lama ke diempu ini iya, ke udah nadai bedau lama tu tadi.

Bilik baru Karum ngembuan 3 pangking mit enggau sebuah bilik besai kelimpah disikap enggau mayuh macham perengkaguna.

Program nyemilik ba bilik baru Karum mega bisi nyendiaka pemakai tiga kali sehari, iya nya ngirup pagi, merarau enggau makai lemai ti disediaka Karum empu.

Suah agi karum nyendiaka pemakai asal bansa Bidayuh baka manuk pansuh enggau pemakai ke diulih ari kampung seraya nyendiaka ai tuak.

Temuai mega tau nyumai kediri ba dapur ti bisi disediaka. Bilik Karim mega bisi nyendiaka endur bepanggang, iya nya ba tanju rumah panjai nya.

Karum ngeletakka bayar RM98 seiku ungkup bilik mit sereta RM220 ungkup bilik besai ke disikap enggau tanju endur ngemataka pemanah rampa menua.

"Taja pan besemekih enggau 12 iku orang bukai ti sama bela bejalaika program nyemilik di genturung pendiau Annah Rais, aku ngasai pekara nya ukai penanggul ke besai.

"Kami udah mujur ngubah nasit diri pengudah masuk program tu, lalu aku chukup gaga diatu pengudah mutus ati badu gawa dalam taun 2006 lalu malutka diri ba dagang tu ke meri pengelantang ngagai pengidup kami sebilik,"ku Karum.

Karum Homestay ditumbuhka ba 67, Genturung Pendiau Annah Rais, Jalai Puncak Borneo lalu penerang ke silik tau ditanya nengah lumur 016-8981675.

Print Friendly