» »Unlabelled » 20 peratus royalti minyak ditambah ungkup Sarawak BorneoPost Online | Borneo , Malaysia, Sarawak Daily News » Berita Iban - New 2 Borneo

05:42:00

20 peratus royalti minyak ditambah ungkup Sarawak BorneoPost Online | Borneo , Malaysia, Sarawak Daily News » Berita Iban - New 2 Borneo

20 peratus royalti minyak ditambah ungkup Sarawak

Posted: 03 Jun 2014 03:08 PM PDT

Dikarang Jacqueline David //

Pekara tu dipadahka Najib lebuh maya ngintu Malam Rumah Terbuka Malaysia Gawai Dayak di Miri

KUCHING: Peneka menua Sarawak ngulihka penambah 'royalti' minyak dijangka deka nerima pemendar ari Perintah Besai.

Malam Rumah Tebuka Malaysia Gawai Dayak 2014 ti di intu di Fan Square, Miri kena 2Jun tu tadi, Menteri Besai Datuk Seri Najib Tun Razak madah Perintah Besai deka nimbang peminta ke pengabis manah ungkup Sarawak ngulihka royalti tinggi agi asil minyak enggau gis ngagai menua tu.

Jaku Najib nya nerima timbal ke positif ari tuai pemesai menua ke ngasaika pekara bekait enggau royalti minyak nya endang patut diungkup pulai baru ke Sarawak tang dalam timpuh ke sama, nyaga kaul entara kededua buah sitak menua.

Menteri Pemansang Tanah Tan Sri Datuk Amar James Jemut Masing madah, iya beterima kasih ngagai Kepala Menteri Tan Sri Datuk Amar Adenan Satem laban udah mujur mai bala Kaban Kunsil Nengeri (ADUN) menua tu beserakup enda ngira penemu politik sida iya, minta 'royalti' minyak ke menua tu ditambah ngagai 20 peratus ke Sarawak.

"Tu pemun ke manah digaga Kepala Menteri , laban ngelama tu pekara tu bedau dipejuraika. Awakka tu nyadi pemun ke utai ti deka nyadi ila. Kitai sama-sama bediri beserakup ke penguntung Sarawak.

"Bida dalam politik patut diiyarka dulu lalu penguntung Sarawak patut dikemeratka dulu. Aku berasai temegah ati meda Perintah Besai deka berundingka peminta 20 peratus Sarawak nambah royalti minyak enggau gis kitai," ku Masing ti mega nyadi Presiden Parti Rakyat Sarawak (PRS).

Udah nya, ADUN Balai Ringin Snowdan Lawan madah, Sarawak beterima kasih ngagai Perintah Besai enggau PM (Najib) laban seruran betatika pemerat Sarawak, ke dipadah iya PM bisi 'soft spot' ba Sarawak.

Kelimpah ari nya, Snowdan mega madahka menua tu mega patut beterima kasih ngagai Kepala Menteri (Adenan) laban udah mantaika pemerat tu ngagai Perintah Besai sereta bisi mega udah dibantai maya Aum Kunsil Nengeri (Aum DUN) ke-17 tu tadi, alai pekara tu dibantaika Snowdan empu, ADUN Semop Abdullah Saidol (BN-PBB) enggau ADUN Kota Sentosa Chong Chieng Jien (DAP).

"Enti nitihka teknikal, Sarawak menua ke pengabis besai di Malaysia, lalu iya begunaka ungkup ke besai kena ngemansangka serata menua tu. Pengarap kitai sigi besai lalu ngambika pemerat tu ulih diadu enggau jampat," ku Snowdan lalu nambah, pemerat baka tu sigi patut diadu enggau jampat laban Sarawak entara menua Malaysia Timur ke nyadi 'fixed deposit' Barisan Nasional (BN).

Kaul ke manah entara Perintah Besai enggau Menua disalin ngagai pendiau ke menang-menang (win-win situation) lalu Sarawak patit diberi pan 'khas' baka tu, ngambika ulih ngaga mayuh agi pemansang di serata menua, laban Sarawak jauh tinggal ari menua bukai, ku Menteri Muda Pengerai Mensia Mayuh, Menteri Muda Nembiak (Menua Pesisir) ti mega nyadi Sekretari Besai BN Negeri, Datuk Dr Stephen Rundi anak Utom.

"Seagi-agi Perintah Besai meri kitai pan ke chukup kena ngaga pengawa pemansang baka ke diperambu kitai, nya pemerat  menua ke bendar. Baik iya deka diberi kemaya tu  tauka dalam timpuh ke panjai lalu ukai ni naka penyampau peratus ke deka diberi," ku Rundi.

Dalam jaku Najib maya ngepunka Rumah Terbuka Malaysia Gawai Dayak 2014, iya madah Perintah Besai nadai sebarang penanggul tauka belampung ati deka berundingka pemerat enggau Sarawak bekait enggau pemerat menua tu.

"Perintah Besai deka nimbang pemerat ke pengabis manah (bekait enggau royalty minyak ke besai agi)," ku Najib.

Print Friendly

Timpuh mayar royalti minyak patut dipadah

Posted: 03 Jun 2014 03:08 PM PDT

KUCHING: Perintah Besai dipinta madahka timpuh bejuraika pekara mayar 20 peratus royalti minyak enggau gis ngagai Sarawak nyengkaum ngagai sitak menua bukai, Sabah, Kelantan enggau Terengganu, ku Mandal Chairman Menua Parti Keadilan Rakyat (PKR) See Chee How.

See madah, chara mayar 20 peratus royalti minyak enggau gis enggau ngagai 3 bengkah menua bukai ke sama ngeluar minyak enggau gis meseti terang (enda belalai) sereta betanggungjawap.

"Enti nitihka prinsipal, kami enda setuju mayar royalti minyak enggau gis nya dalam bayar geran pemansang. Perintah Besai enggau Menua meseti terang bida entara dua tu.

"Royalti nya endang ungkup kitai, tang geran perintah pemeri Perintah Besai, ke digaga tauka diberi Perintah BN," ku See.

Iya madah munyi nya maya aum pengarang berita ke diatur ba opis PKR di Batu 3, ditu kena Hari Dua tu tadi.

Enti Perintah Menua besetuju enggau Perintah Besai dalam perambu mayar royalti minyak enggau gis enggau chara meri geran pemansang, Kunsil Nengeri menua tu meseti dipadahka akaun ke udah diaudit ba pekara mayar nya, reti nya tu bayar tambah royalti minyak enggau gis kelimpah ari geran perintah ti di beri ngagai Sarawak enggau tiga buah sitak pengeluar menua bukai (Terengganu, Kelantan enggau Sabah), ku iya.

"Kebuah bansa tu, ngambika Perintah Besai enda ngambi ulih ngena geran pemansang kena mayar ungkup Sarawak nya, ke dikumbai kitai royalti minyak enggau gis," ku iya.

See ti mega nyadi ADUN (PKR) Batu Lintang madah, Perintah Menua Sarawak meseti minta syer ke sama bela lalu mutuska penyereta menua tu dalam 'Production Sharing Contracts (PSCs) nyengkaum produk minyak enggau gis ke diambi ari menua Sarawak.

Iya madah ba bagi penyakal, sida iya minta Perintah Besai enggau Menua mantaika pemayuh PSCs ke udah disain entara Petronas enggau Kontraktor PSC ke besangkut paut enggau Sarawak; Penyampau PSCs ke besangkut paut enggau Sarawak; Pemegai ekuiti Sarawak dalam PSC ke diatu; Penyampau hak (entitlements) Sarawak dalam penguntung PSC; Pemegai ekuiti Sarawak di PSC ba industri (hiliran tauka downstream) ke diatu enggau Penyampau hak Sarawak dalam penguntung bekait enggau industri PSC (downstreams).

"Kami minta Perintah Menua minta pemegai ekuiti, nengah 'Sovereign Wealth Fund' (SWF) ti dipenggi menua tu, lebuh PSCs diperunding patut disambung dalam timpuh penggal entara 15-20 penggal.

"Berebak enggau nya, kami mega minta syer menua tu ke bisi hak, nengah SWF, ba industri (downstream) baka kontrak kena ngaga perengka guna infrastruktur enggau semua perengka sukung (maintenance)," ku See.

Print Friendly

Nembiak ari SK Nanga Poi mayuh tegar belanda

Posted: 03 Jun 2014 03:08 PM PDT

KANOWIT: Sekula Primari (SK) Nanga Poi mujur nyadi champian sepengudah ngalah lapan buah sekula bukai ba Pekit Kunsil Lumba Sekula-Sekula Primari (MSSR) Zon 2 Pelilih Kanowit ke diatur ba SK Sengayan, belabuh 29 ngagai 30 April 2014 tu tadi.

Penuduk lumur dua dipenggi Sekula Bansa China (SJKC) Yee Ting lalu SK Sengayan bulih penuduk lumur tiga.

Pekit tu dipenyadi Pemantu Pemesai Opis Pelajar Pelilih Kanowit, Berita Sabang.

Tuju pekit tu diatur laban deka milih nembiak ngarika Zon 2 bepekit ba Karnival MSSR Pelilih Kanowit enda lama agi.

Nambahka nya, pekit tu tau nyintalka agi kaul antara bala nembiak enggau bala pengajar seraya ngelawa tuju 1 Murid 1 Sukan ari Opis Menteri Pelajar.   Kelimpah ari nya, ngalihka malam pekit belagu bela bisi diatur.

Print Friendly
We encourage commenting on our stories to give readers a chance to express their opinions; please refrain from vulgar language, insidious, seditious or slanderous remarks. While the comments here reflect the views of the readers, they are not necessarily that of Borneo Post Online. Borneo Post Online reserves the right not to publish or to remove comments that are offensive or volatile. Please read the Commenting Rules.

Nembiak PRS minta tuai BN nentuka bagi parti menggi kerusi Pelagus

Posted: 03 Jun 2014 03:07 PM PDT

KUCHING: Nembiak Parti Rakyat Sarawak (PRS) minta penerang ari tuai pemesai Barisan Nasional (BN) nyengkaum ari Parti Tenaga Rakyat Sarawak (TERAS) ba penerang sida iya bekait enggau kerusi Pelagus.

Penemu ke bebalut, ku Ketuai Publisiti Nembiak PRS Bit Surang dibantaika lebuh Kaban Kunsil Nengeri (ADUN) Pelagus George Lagong bisi dipeda ayan begulai enggau tuai pemesai TERAS maya aum media kena 15 Mei tu tadi, alai Tan Sri William Mawan Ikom madahka diri ningkilka diri nyadi presiden Parti Demokratik Progresif lalu masuk TERAS.

Berebak enggau nya, Lagong bisi dipeda begulai enggau TERAS, reti nya kerusi Pelagus deka pulai ngagai TERAS, utai nya ti dibantah PRS laban kerusi Pelagus nya endang kerusi ungkup PRS.

"Pemerat penerang dalam pekara tu patut dipejurai enggau terang ngambika ditemu, enggaika meri penemu ke saru entara komponen parti BN, kelebih agi PRS datai ke seharitu ngambi penemu ke enda ngarika sapa-sapa dalam pekara bekait enggau TERAS," ku Bit madah dalam surat nuju Bilik Berita ditu.

Iya madah TERAS patut ngaga pemutus politik enggau naka penyampat lalu beratika pemerat PRS ke udah lama taluk ngagai BN.

"Kami ngasaika utai tu enda patut ba TERAS enggau chara tebuka ngayanka penyarut nya ba mua orang tauka ngelaban enggau chara tebuka betengalan alai enggau parti komponen BN," ku Bit.

Iya nandu baru, iya nya Pelagus nya kerusi PRS lalu parti nya enggau naka ulih ngambi kerusi nya pulai baru.

"Kami enggai nundukka sapa-sapa bekait enggau kerusi Pelagus. Nyadi sebagi ari ruang bilik BN  ke besai, kami minta tuai pemesai BN madahka penuduk nya enggau jampat ngambika enda meri penyarut ngagai mensia mayuh sereta parti," ku Bit.

Print Friendly

Tanda Datun Julud pengeraja asal bansa Orang Ulu

Posted: 03 Jun 2014 03:06 PM PDT

Dikarang Alvester Bigol Sulang //

TANDA Datun Julud chukup tebilang ba raban Orang Ulu kelebih agi ngagai bansa Kayan / Kenyah ke diau ba kandang menua Bulungan, Kutai, Berau, enggau Pasir iya nya sebengkah menua ke ngerimbai garis menua Sarawak enggau Kalimantan Timur.

Nitihka penerang sumber,  tanda Datun Julud ditengkebang seiku raja raban bansa Dayak Kenyah ba Apo Kayan ke dikumbai Nyik Selong laban ti kelalu gaga sereta meri tanda basa ngagai Petara Pengasih berindik ari pengada uchu iya.

Pengudah pekara nya nyadi, tanda Datun Julud terus dikerindu ba raban bansa ke diau semak menua nya sereta terus beberita ngagai pelilih menua bukai di sereta negeri Sarawak.

Penyampau raban bansa Kenyah sebedau abad ke – 20 diripotka bisi 23, 000 iku. Raban bansa kayan enggau Kenyah diau ba sitak Kuala Sungai Long lalu ngembuan kaul chukup mentas enggau pangan diri.

Pekara tu ngujungka bansa Kayan enggau Kenyah ngembuan adat ke chukup sebaka.

Ambika chunto, dua bengkah bansa tu bela ngelakuka tanda Datun Julud nyentuk ke sari tu. Taja pan bansa Bahau idup semak pendiau enggau sida tang sida ngembuan jaku ke bebida.

Ari sukut ekonomi, bansa Bahau ngereja pengawa betanam betupi baka bumai padi bukit enggau padi paya.

Ari sukut penatai asal, bansa Kenyah datai ari Ulu Sungai Baram ke bepalan ba pelilih menua Long San. Udah nya, bansa Kayan palan keterubah ke alai sida diau iya nya ngili Sungai sepemanjai Ulu Batang Baram, Usun Apau, Balui, sitak Tinjar, enggau Ulu Batang Rajang.

Nitihka penerang mega, madahka bansa Kayan enggau Kenyah ke diau ba menua Sarawak datai ari Indonesia. Sida rindu ngaga lubang ba pending lalu digantung enggau gelang timah tauka tembaga berat ngambika pending lanjut nyentuk ke bahu.

Bansa Kayan mega landik ngambuh besi dikena ngaga perengka baka sangkuh, duku, kapak enggau perengka bukai dikena ngidupka diri.

Pulai baru ngagai pun cherita, diatu tanda Datun Julud, tebal agi dipandangka lebuh bisi pengerami ke besai-besai tauka dikena ngambat penatai temuai ke bisi datai ngagai rumah panjai kelebih agi temuai ari menua luar.

Tanda tu ulih dikereja kediri tauka beraban-raban. Enti kelia, tanda Datun Julud suah dipandangka lebuh lemai hari ulih sida ke indu-indu lalu maya tu bala sida indu ke betanda nya deka diperati ba sukut pemajik enggau pengelandik sida ke betanda.

GAYA / CHARA BETANDA

Siku ketuai suah agi iya nya orang lelaki deka nguluka raban sida ke betanda nya ba mua lalu ditangka sida ke indu. Sida semina engkebutka kaki enggau jari belubah-lubah.

Enti tanda tu digaga ba rumah panjai, suah agi sida betanda ngelinggi ruai Tuai Rumah tauka sepemanjai ruai. Ujung-ujung orang bukai deka nitih lalu entudi ari belakang.

Pekara ke bansa tu ngujungka sida ke betanda majak rami laban ti ketawaka penyilap pangan diri kelimpah ti meri peransang.

Sida ke betanda tu nitihka alun muzik Sape. Bala penari endang nitih aja gaya tanda ari siku ketuai ba mua sida.

Chara betanda mega iya nya ngentakka kaki ke kiba enggau ke kanan lalu diulang-ulang seraya ke belagu enggau betempap jari.

Raban bansa Kenyah ti suah mandangka tanda tu chukup manah dipeda diumba enggau liuk tubuh sereta punggung ke lemi. Udah nya, selepak jari ke diayun mega bisi diselitka enggau bulu-bulu burung lalu gaya sida betanda baka ke nunda burung ke benung terebai.

Kadang-kadang mega sida ke betanda mega melekuka kaki kanan enggau kaki kiba seraya ngemaruhka tubuh, udah nya bepusin nitihka peneka diri empu.

NGEPAN DATUN JULUD

Lebuh ngambat penatai bala pemesai tauka maya ngintu pengerami sekeda chura ngepan tradisioal bisi dikena baka penutup pala ke digaga ari manik ke udah ditusuk enggau bulu kambin.

Baju enggau sarung (taah) diias enggau ukir tradisional sereta digaga ari manik enggau labuci. Penari indu ngena baju lengan pandak sereta kain bechura tradisional.

Ngepan tradisional ke ngembuan mayuh chura tu digaga ari jari. Kipas ke diselit ba jari penari indu suah agi diambi ari bulu burung enggang lalu tuju iya semina nyadika lawa aja.

Penari lelaki tebal agi dipeda mai Terabai enggau duku ilang maya betanda. Ba pala penari lelaki bisi selapuk ke dilekatka enggau bulu burung Kenyalang.

Baju penari lelaki digaga ari kulit kayu Kemedu kelimpah ari Kulit kambin sunong.

GAYA NGANTA

Bala penari Datun Julud dikantaka nitih gaya ke dikumbai " Natural " tauka realiti. Kebuah pia laban pengawa tanda tu dipandangka ba mua mensia mayuh. Enggau tu penyigat enggau pemajik bala penari nyengala dipeda.

PERENGKA MUZIK

Sape aja perengka ke dikena ngiring tanda Datun Julud. Sape sebansa ari perengka muzik betali, lalu mansutka munyi lebuh iya diketik.

Sape digaga ari sebansa kayu lembut tebal agi baka engkabang enggau Jokuvang. Tubuh iya dipeda panjai mimit lalu bisi ditebuk lubang ba pun ngambika bisi ngemansutka auh munyi.

Raban sarjana akademik ari menua barat suah ngumbai sape 'the boat lut'. Dalam tanda Datun Julud entara lagu ke suah dimain ngena muzik sape iya nya lagu Sak Paku.

JAKU PENUTUP

Tanda Datun Julud diatu balat dikerindu sereta bisi dipelajarka bansa bukai di menua tu laban ari gaya tanda mandangka orang ke indu ke nemu betanda ngembuan penemu ke alus sereta mereti.

Chunto iya, gaya jari penari indu ke ayun lundai chukup ngelantangka ati orang ke meda tanda tu.

Udah nya, ba penari lelaki terang amat mandangka pengering iya sempama baka bujang berani. Sida betanda sambil megai ilang baka ke deka belaban enggau munsuh. Terabai dipegai mega mandangka perengka dikena ngelindung diri maya betembung enggau munsuh.

Pengering penari lelaki dipeda lebuh iya ngiring orang indu betanda, pekara tu mandangka iya siku orang ke ulih ngelindung orang indu sereta ngelindung bansa diri ari kena serang raban munsuh.

Ari sukut ngepan ke dikena, chura ke dipilih chukup engkeman enggau tanda. Pekara tu mandangka bansa Kayan / Kenyah kelia chukup pintar dalam milih chura ke dikena dalam tanda Datun Julud.

Ngarapka tanda Datun Julud terus pegari nama jelai rita dilakuka raban ke betanggungjawap baka Opis Menteri Dagang Temuai enggau Main Asal ti betuaika Datuk Seri Mohamed Nazri Abdul Aziz ba peringkat perintah besai enggau ba peringkat negeri betuaika Menteri Dagang Temuai Datuk Amar Abang Johari Tun Openg.

Tambah mega taun tu dikumbai Taun Nemuai Ke Malaysia lalu tu meh peluang tanda Datun Julud dipandangka ngagai bala temuai ari menua luar lebuh sida bisi datai ngagai palan-palan main asal ke bisi di menua kitai.

Print Friendly