Pengari Penerang – Ambi Bagi Nyadi Raban Pemansik Ke RFS!

Posted: 09 Jun 2014 05:49 AM PDT

Ambi meh bagi ba laman web Radio Free Sarawak ti udah mayuh menang perais penyadung enggau penabur berita enggau penerang

Sarawak Report enggau Radio Free Sarawak mai bala pemacha enggau peninga ngena peluang ba maya Gawai tu mai berita enggau penerang pulai ke rumah panjai sida – lalu udah nya mai penrang nya pulai ngagai kami ila.

Kami bisi nyediaka perais ti mit ke sida ti ngirum pulai nengah emel pasal Tinjau Pemereti Ati RFS ngagai kami – bala pemenang deka nerima tiket penerebai bilun pulai mansang ke dua iku ke Singapura ba ujung minggu, nyengkaum suwa bilik endur bemalam dua malam ba bilik Hotel Ibis!

Penerang ti diguna kami ari bala 'pengari penerang' dibai pulai ngagai rumah panjai sida nya penerang ti udah diambi sida ari laman web kami nyengkaum penerang ti baru dichelak ba suratberita Huffington Post, bekaul enggau empas negatif projek ngaga tekat hidro besai-besai ba raban bansa asal di serata dunya.

Penerang nya udah digempuruka gerempung NGO International Rivers.

Penerang ti diasuh kami bai kita pulai ke menua nya tinjau pemereti ati, ti deka nunjukka simpul penemu orang mayuh bekaul enggau semua pekara ti ditapi sida di menua Sarawak.

Kami udah nyediaka Tinjau Pemereti ati, ti digaga kami dalam jaku English, Melayu enggau Iban, dikena ngulihka baka ni asai ati orang mayuh pasal penanggul ti bisi ba menua sida bekaul enggau penyeranta sida, pengawa ngeruga kampung enggau tanah adat sida, pendiau enggau ulah perintah enggau mega pekara pengerai sida.

Tinjau tu tau diambi ari laman Radio Free Sarawak ba genteran pemaut http://radiofreesarawak.org/survey/ lalu kami minta bala pemacha enggau peninga kami nya mai tinjau kami nya pulai ke menua ti tau ngiga seberapa mayuh sida serumah enggau sida sebilik ngambi bagi dalam tinjau nya.

Udah kita mujur ngulihka tinjau nya ba bansa jaku ti dikedekaka kita, kita tau ngaga salin sepemayuh nitihka guna kita ngena komputer kita dikena kita betanya ngulihka saut tinjau ba rumah panjai kita. Udah nya kirumka pulai tinjau nya ngagai emel kami – enda laun ari 30 haribulan Enam tu.

Tiap iti tinjau kita ti diemelka kita ngagai kami nya deka dipasukka kami ke dalam rafel kami ngambika bisi dichabut kami dikena kami nentuka sapa-sapa ti bidik diberi perais! (Semua penerang bendar kita ba emel nya deka dipelalaika kami)

Nengah tinjau nya kami arapka kami bulih penerang ti gambar ti silik agi baka ni runding bala orang di rumah panjai lalu nama utai ti dikedekaka sida. Kami deka meresa semua saut sida dalam sebengkah repot, lalu mayuh agi saut diterima kami, mayuh agi mega penerang ditemu kami.

Bantu kami enggau chara mai pulai tinjau tu ke rumah panjai enggau genturung pendiau kita ba rambau pemisi Gawai tu – kami arapka kami bulih sepemayuh runding enggau penemu ari bala orang di rumah panjai ari serata menua Sarawak!

Lalu diatu aram sama macha pasal 10 pekara ti beguna ti patut ditemu kita pasal projek tekat hidro di Sarawak ti nadai kala dipadahka bos kompeni SEB bebansa Norway, Tirstein Dale Sjotveit, ngagai kita ngelama tu!

Penerang ti pemadu beguna tang dilalaika Perintah Sarawak ari dikerandauka pasal projek tekat hidro.

1. Ba pemayuh 50,000 iti tekat besai di dunya tu udah ngalitka penganyut batang sungai di serata dunya tu:

Lebih kurang 50,000 buah tekat enggau peninggi 15 meter tauka tinggi agi enggau bepuluh ribu tekat ti mit agi udah digaga mensia. Bisi sekeda nya manggai ba umur lebih seratus taun, tang mayuh agi tekat nya digaga udah tembu Perang Dunya Ke-2. Bisi kira-kira 5,000 iti tekat nya datai ngagai peninggi 60 meter; lalu diatu bisi 350 iti tekat benung digaga.

2. Tekat ulih ngubah gaya rampa menua:

Tekat udah ngubah sebagi ari tiga bagi batang sungai di dunya tu ti bulih sama pemesai rampa menua California. Lepung tekat nya bisi lebih tiga kali lipat pemayuh ai batang sungai enti digempuruka sekali.

3. Tekat meri guna ti besai:

Tekat hidro ngeluarka 16% ari pemayuh kuasa karan dunya enggau ke guna mai ai ke utai tanam ke 12-15% pemayuh mensia. Ba skala ti mit agi tekat ti mit-mit digaga dikena mekalka ai ke guna besehari-sehari, ngurangka pengerusak dibai bah, pejalai kulu-kili nengah ai enggau dagang temuai. Mayuh agi tekat digaga dikiena mekalka ai ke utai tanam, tang 80% ai ti dilepungka nya dikena ngeluarka kuasa karan.

4. Tekat tau munuh pengidup ikan

Tekat tau nanggul pejalai ikan, ngurangka bekal angin oksigen dalam ai lalu nanggul mayuh bansa utai idup dalam ai ke bukai. Tekat tau nanggul sungai meresi diri. Pemayuh utai idup makin kurang datai ke 70% ba batang sungai menua begaya hari tropik.

5. Tekat tau ngubah sistem gaya hari dunya:

Tekat ai enda neutral gaya hari. Lebih agi ba menua tropik ti endur utai idup ti luluh dalam lepung ai deka ngeluarka gas metana ti bias lalu ngasilka chura rumah ijau. Raban saintis besepenemu madahka lepung tekat ai ari serata dunya tu ulih ngasilka 40% ubah ba gaya hari digaga mensia empu, ti sebaka pemisa enggau ubah dibai ba penerebai bilun kin kitu.. Penusah datai ari bah enggau kemarau ari gaya hari ti enda meruan tau ngujungka tekat enda likun lalu kurang beguna ke penatai pemisi sesebengkah menua.

6. Tekat mindahka pendiau mensia:

Projek tekat udah mindahka enda kurang ari 80 juta mensia, enggau 23 juta di menua China aja. Pemindah nya udah nerumpak pengidup mensia ti endang udah lama idup dalam penyeranta lalu nadai dibantu ba perengka idup ti diguna sida besehari-sehari. Tekat mai penusah pengidup ngagai enda kurang ari 500 jita mensia ti diau di ili tekat. Pemanah tekat suah bendar melakangka nasit raban orang ti diau semak projek nya ti udah meri awak ke projek tekat nya.

7. Tekat ngerampas kuasa pengelantang mensia:

Mayuh tekat ti besai-besai udah mindahka orang bansa asal ti digaga perintah bekukut besi ti bependiau kasar atas rayat sida. Di menua Myanmar, China, Ethiopia, Guatemala, Sudan enggau menua-menua bukai, bala pengaga tekat udah nimbah jaku bantah orang ti ngenggaika projek nya ngena pengasar lalu ngelanggar kuasa pengelantang mensia. Ba sebengkah penusah tekat pechah, lebih 440 iku orang raban bansa asal ti udah dipindahka ketegal meri awak ngagai pengawa ngaga Tekat Chixoy di Guatemala dalam taun 1982.

8. Ungkus ngaga tekat kelalu mar:

Tekat ti besai-besai begunaka belanja ti kelalu tinggi digaga. Enda kurang ari 2,000 bilion dollar dipelabaka dikena ngaga pemayuh tekat kenyau ari taun 1950. Ketegal ari penyaru ba pengawa merambu enggau penyalah makai suap, mayuh tekat laun ari timpuh tembu digaga ari ti udah ditetapka ngagai 44 peratus lalu belanja lebih ari ti ditagaka tau manggai 96 peratus ari belanja asal. Belanja ti lebih ari belanja asal dikena ngaga tekat ngujungka tekat enda beekonomik digaga.

9. Semua tekat enda meruan selama-lama:

Lama kelama lepung ai tekat deka ngundan ambuh tanah, lalu ungkus meresi ambuh nya majak besai sebesai ari penguntung ari tekat. Di menua US, lebih 1000 buah tekat udah diperesi ba ungkus ti tinggi. Lebuh tekat digaga lalu enda diintu enggau manah, tekat tau pechah. Pada penusah tekat pechah ti pemadu balat di dunya, pengerusak Tekat Banqiao di menua China udah munuh 171,000 iku orang dalam taun 1975.

10. Bisi pemilih bukai ti manah agi:

Dalam taun 2012, perintah-perintah enggau gerempung pengawa dagang udah ngaga 75 gigawat kuasa angin enggau kuasa ari matahari, bebandingka enggau 30 gigawat kuasa hidro ari tekat. Pemilih tu jauh manah agi lebuh ungkus ba empas projek ngagai rampa menua enggau mensia diambikira sekali. Agensi Kuasa Entarabansa udah nuduhka penemu ti madahka 60 peratus duit agih dikena ngulihka lebih kuasa dikena ba semua projek kuasa ti ulih digaga baru ba sesebengkah menua.

Pengari Penerang – Ambi Bagi Nyadi Raban Pemansik Ke RFS!

Pengari Penerang – Ambi Bagi Nyadi Raban Pemansik Ke RFS!

Recent Comments

Archive