» »Unlabelled » Perintah Negeri deka beratika sistem nupi chapi BorneoPost Online | Borneo , Malaysia, Sarawak Daily News » Berita Iban - New 2 Borneo

05:03:00

Perintah Negeri deka beratika sistem nupi chapi BorneoPost Online | Borneo , Malaysia, Sarawak Daily News » Berita Iban - New 2 Borneo

Perintah Negeri deka beratika sistem nupi chapi

Posted: 05 Jun 2014 09:03 AM PDT

 Dikarang Jacqueline David //

KUCHING: Perintah Negeri Sarawak beratika sistem nupi chapi ulih dipegulaika sekali enggau kebun bedandang besai baka kebun sawit, kena ngemansangka pemayuh chapi dikeluarka menua tu.

Kepala Menteri Tan Sri Datuk Amar Adenan Satem madah, Sarawak bisi urung 1.0 juta hektar tanah ti udah ditanam enggau sawit, alai ari penyampau nya, 400,000 hektar manah endur projek (integration) chapi, tang semina 80,000 hektar dikena lalu semina nguan urung 10,500 chapi ba estet kebun sawit.

"Nyema 5 hektar ulih nyukung seiku chapi dalam kandang setaun, reti nya kebun sawit di Sarawak aja bisi peluang endur nupi 80,000 iku chapi.

"Enti kebun sawit digaga ngena chunto baka tu, iya nya chara bekebun dipegulai enggau nupi chapi, nyangka Sarawak tau nyadi pengeluar eksport dagin chapi," ku Adenan.

Iya madah munyi nya lebuh bejaku ba atur pengawa '1st ASEAN Regional Conference on Animal Production 2014' (ARCAP) ti diatur ulih UPM, MSAP (Malaysian Soceity of Animal Production), MARDI, Opis Betanam Betupi (JPS) enggau Sarawak Convention Bureau (SCB) ba sebengkah hotel tebilang ditu, kemari.

Jaku Adenan dibacha Sapit Kepala Menteri, Datuk Patinggi Tan Sri Alfred Jabu anak Numpang.

Tang taja pia, ku Adenan, bisi penanggul bukai bekait enggau sistem pegeluar nya (system of production), baka upah orang ke gawa, (forage production), bansa tanah ke ulih diputarka raban saintis sereta raban pengereja pengawa betanam betupi di Malaysia, enti kitai endang amat-amat betatika pekara tu, ku iya.

Iya nandu baru, pemisi perengka teknologi moden kemaya hari tu, baja kena nupi jelu ulih dikemansangka nyadi bekal pemakai jelu ke nyadi sebagi ari pemerat nupi jelu.

"Enti berunding deka nanam utai dipakai jelu nyangka enda ulih digaga kitai laban pemesai tanah kitai pan ukai tak besai endar, tang enti diperatika, ari sedak produk betanam betupi nyangka tau nyadi siti ari chara iya ngaga baja pemakai jelu.

"Baka sedak ari palan alai orang ngaga proses sawit enggau sekeda aktiviti betanam betupi tau digaga nyadi pemakai jelu," ku Adenan.

Adenan ngarapka konferens besai baka nya ukai semina palan alai bejuraika pemansang produk pemakai tang tau dilanjur sekali enggau penguntung ari proses tu, tau digaga nyadi barang farmaceutikal, ubat sereta barang bukai ngambika Malaysia tau nyadi palan pemansang pemakai 'halal'.

"Enti deka nyadi menua ke nyadi pengeluar jelu enggau produk jelu, ukai semina nya aja aktiviti pekebun mit, tang mungkur pengawa ngaga baja , pemansang produk nyual sereta ngaga proses nya (downstream, tauka hiliran).

"Pengguna diatu milih sereta minta pemakai ke bekualiti tinggi sereta likun, lalu pengereja pengawa betanam betupi mesti nemu ngena pemansang sereta teknologi kemaya hari tu, reti nya nguan penemu ke mayuh," ku iya.

Di Sarawak,industri nupi jelu nyadi siti pemansang ke jampat setipak enggau strategi ngemansangka industri jelu ulih Perintah Besai.

Ba bagi industri nupi jelu bukai enggau babi, kededua industri tu dikemansang enggau manah lalu nyapai tikas ke chukup (self-sufficiency level tauka SSL).

"Reti nya, Sarawak enda entu bisi pemerat meli komoditi tu (semina sekeda bansa ke bisi pemerat ba makit ke spesil agi). Ngimport jelu idup ke menua tu semina ngambi purih iya aja lalu ditupi di menua tu," ku iya.

Naka kediatu, pemayuh kebun alai nupi jelu di menua tu diperatika bisi pemansang, lalu endur ke muntang ditemu bisi nupi jelu dalam kebun bedandang besai, iya nya baka di Kuching, Sibu enggau Miri.

Kediatu, industri kebun nupi jelu sereta babi dikemansang enggau manah lalu nadai tentu bepanggai ba bantu Perintah.

"Taja pia, kitai (menua Sarawak) agi ngimport dagin chapi, tusu enggau produk tusu ari menua luar nyengkaum jelu idup ke deka ditupi di menua tu," ku iya.

Kelimpah ari nya, kebun kambin pan nyadi sebagi ari pemerat lalu Perintah udah belabuh ngaga program ngemansangka pemayuh kambin engah skim pekebun mit.

Tambah, Sarawak ku iya, enda betapi enggau penyakit Nyawa enggau Mulut, Kuris (Rabies) enggau Avian Influenza, kebuah iya bisi peluang nyadi palan alai nupi jelu sereta pengeluar pemakai ngagai sitak menua Malaysia.

Pengudah atur pengawa nya, Jabu lebuh ngarika Kepala Menteri dikerandau ulih pemberita enti skim nupi chai ba kebun sawit nya siti penguntung ke dua kali lipat ke penyerta kebun sawit, ku iya:

"Ekonomi bansa nya sigi udah lama bisi dia tang iya majak mansang, tambah iya meri penguntung ngagai industri sawit laban sida iya enda ibuh nebas rumput agi," ku Jabu.

Iya madah Perintah Menua diatu nguji ngangkatka skim tu enggau chara meli chapi ke bekuliti agi ngambika ulih nganti chapi ke udah tuai, lalu chapi ke tuai nya tau dibunuh lalu dagin iya mega tau dijual di menua tu.

Pekebun-pekebun mit ke diperatika mayuh udah ngemansangka kebun jelu digulai enggau kebn sawit, iya penyerta kebun sawit ari Kuching, Lundu, Sri Aman enggau Saratik ti dipeda bagas endar.

"Tang penguntung nya bedau ulih dijapai penuh, enda datai satu-per-lapan (1/8)," ku iya.

Sebedau nya, Presiden MSAP Dr Abu Hassan Muhammad Ali madah Malaysia bepanggai ba pengawa ngimport jelu idup, dagin sapi, dagin kambin enggau produk tusu, ke mayuh datai ari makit traidisional baka India, Australia enggau New Zeland.

"Taja pia, Malaysia enda tau enda ngemansangka pengeluar dagin chapi sida iya, ngambika kitai enda kelalu bepanggai ba dagin import ari menua luar. Nya kebuah, strategi sereta chara kitai ngemansangka industri tu patut dikemeratka ulih Perintah sereta penyerta ngemutarka pengurang kitai, laban industri tu mayuh pemerat ba komuniti kitai, tambah kitai pan bisi pemisi…Nadai kebuah enda dikemansangka," ku Abu Hassan.

Sama bisi ngulu atur pengawa nya, Menteri Muda Pengawa Betanam Betupi (Gerempung Orang Bumai Bekebun) Datuk Sylvester Entrie, Direktor JPS Lai Kui Fong, Presiden MSAP Dr Abu Hassan Muhammad Ali enggau Sapit Presiden MSAP ti mega nyadi chairman pengatur pengawa, Profesor Dr Loh Teck Chwen.

Print Friendly

TERAS patut diberi timpuh

Posted: 05 Jun 2014 09:02 AM PDT

Anang irau, lantangka ati ngambika kurang mimit laya

Dikarang Jacqueline David //

KUCHING: "Tejuka sida iya dulu, ngambika sida iya bisi awak negapka diri empu dulu, anang kelalu irau, lantangka ati ngambika kurang mimit laya," pia ku Sapit Kepala Menteri Datuk Patinggi Tan Sri Alfred Jabu lebuh diasuh meri penemu sentang Parti Tenaga Rakyat Sarawak (TERAS).

Jabu ti mega nyadi Kaban Kunsil Nengeri (ADUN) Layar madah, beri timpuh ngagai parti baru baka TERAS negapka diri dulu, laban ku iya enti kelalu mayuh macham timbal ke pansut, enggai ke TERAS nadai awak tauka peluang negapka diri empu.

Jabu madah munyi nya pengudah bejadika atur pengawa '1st ASEAN Regional Conference on Animal Production 2014' (ARCAP) ti diatur ulih UPM, MSAP (Malaysian Soceity of Animal Production), MARDI, Opis Betanam Betupi (JPS) enggau Sarawak Convention Bureau (SCB) ba sebengkah hotel tebilang ditu, ngarika Kepala Menteri Tan Sri Datuk Amar Adenan Satem.

Bedau lama tu tadi, kena 15 Mei, Menteri Pemansang Pengawa Rama ti mega kala nyadi ex presiden SPDP ngaga aum media ngenyit lalu ningkilka diri nyadi presiden parti nya lalu masuk TERAS, lalu dititihka semua Kaban Kunsil Nengeri (ADUN) ti digelar G4 (Datuk Peter Nansian, Datuk Sylvester Entrie, Paulus Palu Ngumbang, Rosey Yunus) lalu ditangkan enggau ex-chairman SUPP pampang Sibu ti mega nyadi Menteri Wang Kedua Dato Sri Wong Soon Koh ke bela dititihka ADUN Bengoh (Datuk Dr Jerip Susil),Engkilili (Johnichal Rayong Ngipa), Opar (Ranum Mina) enggau ari SWP Pelagus (George Lagong).

Berengkah ari nya, mayuh macham berita ke didinga kelimpah ari TERAS naka kediatu, agi ukai komponen Barisan Nasional (BN) laban agi nganti TERAS nganjung surat peminta masuk BN.

Deka nyadi komponen BN, begunaka sukung urung 13 buah parti komponen BN bukai ngemendarka TERAS nyadi komponen BN, iya nya dikumbai 'consensus'.

Kediatu, dua buah parti komponen BN, Parti Rakyat Sarawak (PRS) enggau Parti Sa'ati Rayat Sarawak (SUPP) enda besetju enggau TERAS laban keterubah iya ba PRS, George Lagong (Pelagus) lalu kemari, presiden SUPP Tan Sri Peter Chin udah ngasuh kaban sereta pemesai SUPP nganjung surat ningkilka diri ari parti lalu mulaika kerusi DUN ke dipangku sida iya ngagai SUPP laban ku Chin, kerusi nya ukai dimenang ADUN ngena tiket TERAS tang enggau ngena tiket SUPP.

Print Friendly

Pengerami Gawai ba Rh Martinus Nyuram dirichah enggau mayuh program

Posted: 05 Jun 2014 09:01 AM PDT

SIBU: Pengerami Hari Gawai Dayak 2014 ke diatur ba Rumah Martinus Nyuram, Sungai Assan chukup rami laban mayuh bengkah program bisi digaga.

Nitihka penerang Tuai Rumah Martinus, program nya diatur Komiti Pemansang enggau Pengelikun (JKKK) rumah panjai sida.

"Nengah program ke bansa nya kebendar iya ulih ngerichahka agi pengerami beserimbai enggau hari besai nya.

"Pia mega, program ke bansa nya ulih ngerapitka agi kaul entara kaban belayan enggau diri sebilik ke diau ba rumah panjai kami," ku iya.

Martinus madah, entara program ke chukup manah diatur nyerumba pengerami tu iya nya pekit nimbang bol, pekit nikauka straw pemadu jauh enggau pekit karaoke.

"Ditu kami mega deka meri besai terima kasih ngagai Chairman Kunsil Perbandaran Sibu, Datuk Tiong Thai King berindik ari pementas iya ke udah meri hamper-hamper nyadika perais mayuh bengkah program ke bisi diatur kami," ku iya.

Sebaka enggau mayuh rumah panjai bukai ke bisi ba Sarawak ku iya, rayat ari mayuh pupu raban bansa enggau agama ke pulai ngagai rumah panjai ku iya nyau nambahka agi penyelai enggau pengerami Hari Gawai Dayak.

"Kebuah pia laban bisi sekeda kami sebilik bisi jadi enggau orang bepengarap bukai lalu utai tu tau dikumbai Ayu 1 Malaysia," ku tandu Martinus.

Print Friendly

Seiku lelaki bebadi nyawa pengudah telantakka pun kayu

Posted: 05 Jun 2014 09:01 AM PDT

MIRI: Seiku lelaki parai pengudah kerita ke ditepan iya dituntung penusah bebadi ba sebengkah penusah eksiden ba Jalai Ilmu iya nya jalai pansut ari Desa Senadin nuju Kuala Baram Bypass ditu   pagi ensana.

Mansa benama Reuben Lim Chiaw Phon, 33, parai ba palan penusah nyadi laban balat bakal ba pala enggau dada.

Nitihka penerang, maya penusah nyadi urung pukul 8.20 pagi, mansa ke agi bujang asal ari menua Sibu lalu diau ba genturung pendiau ke semak nya lalu deriba kediri-diri laban deka nurun ngagai pasar.

Taja baka nya, lebuh datai ba palan penusah nya, kerita Proton Saga BLM bechura chelum ke ditepan mansa tepawah sebedau ensayar ngagai tisi jalai lalu ngelantak pun kayu.

Berindik ari penusah nya, mansa kena kepit ba penuduk alai deriba.

Udah nya, seraban polis, staf perubat enggau kaban Bomba Miri berumban ngesah palan penusah nyadi pengudah ningga berita nya.

Raban bomba tepasa nguna awal setengah jam endur ngemansutka bangkai mansa ari kerita ke ditepan iya.

Kepala Polis Pelilih Miri, ACP Gan Tian Kee lebuh dirandau ngaku sida amat bisi nerima ripot bekaul enggau penusah eksiden nya.

Iya madah, polis enda ngenggaika nyangka kebuah penusah nyadi laban jalai lichin pengudah ujan memesi ke nyadi ba endur nya tumu pagi ensana.

Taja baka nya, ku ita raban polis trafik deka bejalaika pansik ke silik beratika nama kebuah penusah nya tau nyadi.

Berebak enggau nya, nitihka penerang menyadi indu sulu mansa ke enggai nama iya disebut, madahka mansa diau nyewa begulai enggau sulu iya ba sebuah rumah ke enda jauh ari palan penusah nyadi.

"Laban iya asal ari menua Sibu sereta nadai kaban belayan ditu, iya suah datai ngelawa rumah kami makai enggau kami sebilik lalu kepenudi iya betemua enggau kami malam ensana," ku iya.

Nitihka penerang indu nya, sida sebilik nemu berita nya urung pukul  8.30 pagi pengudah ditusika menyadi iya ti mega nyadi sulu lelaki nya.

Nangkan nya, nitihka penerang sekeda pekereja ke gawa kontrak enda jauh ari nya, sida bisi tepedaka kerita mansa bepusin  360 darjah sebedau telantakka pun kayu ba palan penusah nyadi.

Lebuh tepedaka penusah nya, sida berumban ngelawa palan penusah deka meri bantu tang enda ulih ngaga nama-nama laban mansa kena kepit ba palan penuduk deriba.

Mensia mayuh ke bisi datai ba palan penusah nyadi berumban betelefon ngagai polis minta bantu.

Print Friendly

Nadai guna betalat penemu laban semua pemutus ba jari Chairman BN

Posted: 05 Jun 2014 09:01 AM PDT

KUCHING: Parti Sa'ati Rayat Sarawak (SUPP) majakka penemu sida iya, iya nya kerusi Kunsil Negeri (DUN) Opar, Bengoh, Engkilili enggau Bawang Assan endang ungkup parti sida, tang ni naka pengamat kerusi nya ila deka diari chalun SUPP maya Pengawa Bepilih Besai Negeri ke-11 (PRN 11) bedau diputuska agi.

Penyandang kerusi Bengoh kediatu, ti mega nyadi Menteri Muda Pengerai Rama Datuk Dr Jerip Susil , ni bagi parti ke deka ngempu kerusi nya ila, ukai pemerat tang ke berat sapa ke ulih menang ba kerusi nya ungkup BN.

"Ke penegut enggau penegap BN, iya nya ngulihka pemayuh kerusi enggau naka ulih nengah chalun ke  ulih menang, lalu enggau tu, aku pechaya ngagai Kepala Menteri Tan Sri Datuk Amar Adenan Satem ke nyadi chairman BN deka ngena runding iya pengabis manah milih chalun ke dijangka ulih menang ba kerusi nya," ku iya.

Dr. Jerip madah nadai guna ka betalat pasal sapa ke deka ngempu kerusi nya laban semua pemutus digaga ulih tuai pemesai BN milih chalun sida iya empu.

"Enti SUPP kiruh endar pasal penegap BN, pelaba aku sida (SUPP) iya patut ninga utai ku YAB Kepala Menteri," ku iya nimbal jaku presiden SUPP Tan Sri Peter Chin ke bisi ditabur ba surat berita sehari tu (kemari).

Nitih ku jaku Chin, kerusi DUN Opar, Bengoh, Engkilili enggau Bawang Assan patut diberi pulai baru ngagai SUPP laban beratika semua Kaban Kunsil Nengeri (ADUN) nya ningkilka diri ari parti kena 15Mei tu tadi lalu masuk Parti Tenaga Rakyat Sarawak (TERAS).

Empat iku ADUN nya, Dato Sri Wong Soon Koh (Bawang Assan), Dr Jerip (Bengoh), Dr Johnical Rayong (Engkilili) enggau Ranum Mina (Opar).

Sama ngulu kaban DUN tu masuk TERAS, iya nya enam kaban ADUN bukai ari SPDP, iya nya ex-presiden SPDP Tan Sri William Mawan (Pakan), sereta raban G4 Datuk Peter Nansian Ngusie (Tasik Biru), Datuk Sylvester Entrie Muran (Marudi), Rosey Yunus (Bekenu), Paulus Palu Gumbang (Batu Danau) enggau ex- sapit presiden Sarawak Workers Party  (SWP) George Lagong (Pelagus).

Kelimpah ari 10 ADUN nya, TERAS mega bisi dua Kaban Parlimen (MP),  Anyi Ngau (Baram) enggau Mawan (Saratok).

Ke semua sida tu ningkilka diri ari parti laban madahka pemutus nya digaga ngambika nadai betapi enggau sebarang penyarut ke benung nyadi dalam SUPP enggau SPDP diatu.

Print Friendly

Perintah Nengeri meri bantu RM1 juta ngagai Wong

Posted: 05 Jun 2014 09:01 AM PDT

Wong diatu betapi enggau penyakit riman untak kenyau bulan Januari taun nyin kemari

Dikarang Rengenyan Labang //

KUCHING: Bala Wong Ho Leng sebilik iya nya seiku tuai politik ke kala nyadi Chairman DAP Sarawak temegah ati sereta beterima kasih ngagai Perintah Nengeri laban udah meri bantu  sepenyampau RM1 juta dikena melanja ungkus perubat Wong, kemari.

Bantu belanja nya disuaka Speaker Kunsil Nengeri Datuk Amar Mohamad Asfia Awang Nasar ti ngarika Perintah Pengeri ngagai bini Wong, Irene Mary Chang.

Irene muji Perintah Nengeri laban tetap meri bantu kelebih agi ngagai Wong ti nyadi Kaban Kunsil Nengeri (ADUN) Bukit Assek taja pan bebida kuing politik.

"Kami sebilik beterima kasih ngagai Perintah Nengeri, Kepala Menteri Tan Sri Datuk Amar Adenan Satem sereta rayat Sarawak ti udah nyukung enggau meri bantu ngagai kami lebih agi ngagai Wong.

"Ba penemu aku tu pekara ti amat jarang nyadi, kebuah pia  laban tu meh keterubah utai tu diatur lalu Sarawak ulih nyadi chunto iya nya senentang perintah mantu kaban politik ari parti penyakal.

"Tu pekara ti amat manah sereta endang patut ditemegahka sereta aku ngarapka pengawa ti manah tu ulih diteruska jemah ila, sama mantu pangan diri lalu anang ngira bida politik," ku Irene.

Iya mansutka pekara nya lebuh dikerandau pengarang berita pengudah atur pengawa nyuaka bantu RM1 juta ari Perintah Nengeri ngagai Wong, diatur ba Opis Kunsil Nengeri ditu, pagi kemari.

Berebak enggau tu, lebuh ditanya bekaul enggau gaya pengerai Wong, Irene madahka Wong benung bebendar ngelaban penyakit ti nuntung iya.

"Naka ke diatu aku ulih madahka gaya iya amat manah, iya agi ulih ngelaban (penyakit).

"Diatu ia benung diperubat ba Pusat Perubatan Rejang di Sibu," ku Irene ti disempulang anak iya Julie Wong enggau Gabriel Wong Soon Seng, kemari.

Wong ti kala nyadi Kaban Parlimen Sibu betapi enggau penyakit riman untak kenyau bulan Januari taun nyin kemari pengudah pakar bebuntas neurologi di Australia tetemuka sel stem glioma ba untak iya.

Print Friendly