Nembiak patut ngembuan juluk ati dalam pengidup BorneoPost Online | Borneo , Malaysia, Sarawak Daily News » Berita Iban - New 2 Borneo |
- Nembiak patut ngembuan juluk ati dalam pengidup
- Program Pemansang Raban Nembiak nyaup ngenegapka gerempung nembiak: Mawan
- Pengajar patut ngemeranka ulah, chara gawa ke pemadu manah enggau pekara ke positif
- Rh Henry Nuni nadai penanggul menang ba pekit Anugerah Desa Cemerlang
- Rayat minta status RMR dipadah lengkas laban taba majak repa
- PRS, SUPP enggau SPDP mantah TERAS tama BN
| Nembiak patut ngembuan juluk ati dalam pengidup Posted: 21 Jun 2014 09:15 AM PDT Dikarang Rengenyan Labang // Ngambika ulih mujur ba sebarang pengawa ke dikereja sida LUNDU: Nembiak rebak baru nengeri tu dilalau ngembuan juluk ati dalam pengidup ngambika ulih nyadi raban bansa ti beguna lalu talukka diri sebilik enggau menua, kena napi pemar jemah ila. Kepala Menteri Tan Sri Datuk Amar Adenan Satem madah, nembiak rebak baru deka dikearapka nampung ngemansangka menua jemah ila. "Nembiak rebak baru kitai enda tau enda ngembuan juluk ati, peneka sereta pengerindu dalam sebarang pengawa ti dikereja ngambika ulih mujur. "Disiplin ti manah, profesyenal, ngembuan pengelandik sereta juluk ati enda tau enda bisi dalam runding nembiak rebak baru, laban nya ke manah sereta mai penguntung ngagai diri sebilik enggau nengeri tu," ku iya. Adenan bejaku munyi tu lebuh bejadika pengerami Hari Belia Negeri Sarawak 2014 ti berambaika leka jaku 'Dari Belia Untuk Belia', ke diatur Opis Menteri Pemansang Rama ba Kompleks Lumba enggau Main Pelilih Mit Lundu ditu, kemari. Ku iya baru, nembiak rebak baru berengkah ari diatu patut nyikap diri enggau pelajar teknikal kelimpah ari akademik ngambi tetapika peminta guna dalam SCORE. Iya madahka perintah chukup beratka pelajar pengelandik dalam semua pekara laban juluk nengeri ukai semina ngeluarka barang mata aja. "Beduduk ari pemansang SCORE, kitai dekaka beribu-ribu iku orang ti ngembuan pengelandik sereta gawa ba industri jemah ila. Nya alai (rebak baru) kitai enda tau enda nyikap diri berengkah ari diatu. "Kitai ukai semina deka ngeluarka barang mata aja tang kitai deka ngeluarka mayuh bansa barang tauka produk ti udah tembu. Kitai minta rebak baru beretika pekara tu. "Kami minta semua nembiak rebak baru sama enggau kami (perintah) ari diatu napi pemar sereta ngemansangka menua tu ngambika Sarawak ulih nyadi sebuah nengeri ti pemadu lantang dalam Malaysia," ku iya ke mega Kaban Kunsil Nengeri Tanjung Datu. Kelimpah ari nya, iya muji raban nembiak ti ngarika nengeri dalam Lumba enggau Main Malaysia (SUKMA) di Perlis apin lama ti teulihka penuduk lumur tiga sereta bebendar agi ngulihka penyulut dalam lumba enggau main nya ke deka diatur baru dalam taun 2016. "Taja pan Sarawak bulih lumur tiga dalam SUKMA apin lama ke udah, tang kitai tetap temegah ati. Kitai arap endar ba taun SUKMA 2016 ke alai maya nya nengeri Sarawak deka nyadi tuai rumah lalu arapka kitai ulih bulih lumur satu laban bala nembiak kitai endang ngembuan pengelandik sereta nyulut dalam lumba enggau main. Bela bisi ba pengerami nya kemari, bini iya, Puan Sri Datuk Jamilah Anu, Menteri Pemansang Rama, Tan Sri Datuk Sri William Mawan Ikom, Menteri Muda Perengkaguna Mensia Mayuh, Datuk Dr. Stephen Rundi, Menteri Dagang Temuai Datuk Amar Abang Johari Tun Openg, Sapit Menteri Dalam Nengeri Datuk Dr Wan Junaidi Tuanku Jaafar enggau sekeda bala ke bukai.   |
| Program Pemansang Raban Nembiak nyaup ngenegapka gerempung nembiak: Mawan Posted: 21 Jun 2014 09:14 AM PDT LUNDU: Program Pemansang Raban Nembiak ti komprehensif agi sereta setipak enggau arus moden enggau pemansang diatu, ulih kena ngenegapka gerempung raban nembiak. Menteri Pemansang Rama Tan Sri Datuk Sri William Mawan Ikom madahka program nya dipejalaika ari dibaruh opis menteri iya. "Tuju Program Pemansang Raban Nembiak tu ukai semina kena nyeliah sereta mutarka penyalah rama aja tang mega dikena ngemansangka intelektual, kompetensi rama, pengulih kognitif enggau nempa penaluk ngagai menua. "Nambahka nya mega dikena nempa raban pemesai ti dikearapka ngiring menua jemah ila ti kreatif, inovatif sereta ngembuan juluk ati. "Nya alai ngambika juluk program tu ulih dijapai, pemesai gerempung raban nembiak ti nyadi kaban tauka ejen rama ari perintah patut ulih berati sereta beratka ubah kemaya hari tu ngambika ulih matak raban nembiak nyereta program ti diatur," ku iya. Mawan mansutka pekara tu dalam jaku pengelalu pengerami Hari Belia Negeri Sarawak 2014 ti diatur Opis Menteri iya di Kompleks Lumba enggau Main Pelilih Mit Lundu ditu kemari. Pengerami ti ngena rambai leka jaku 'Dari Belia Untuk Belia' udah dipenyadi Kepala Menteri Tan Sri Datuk Amar Adenan Satem. Ngenang pasal pengerami nya, Mawan madahka nya dikena meri terima kasih ngagai raban nembiak ti mayuh udah mantu perintah ngatur sereta ngemansangka nengeri tu. Raban nembiak reta ti pemadu beguna dalam pemansang menua, ku iya. "Raban nembiak ti nyadi dikearapka nampung sereta ngelangkar pemansang menua jemah ila, sida enda tau enda ditegap sereta disikap ngena mayuh macham penemu enggau pengelandik ngambika ulih nampung pemansang menua ke ditinggalka rebak ke dulu ngagai nembiak rebak baru enggau dudi," ku iya. Nyerumba pengerami Hari Belia Negeri Sarawak 2014, Opis Menteri Pemansang Rama bisi meri semilan bengkah Gelar Ikon Belia Negeri Sarawak. Semilan bengkah gelar nya, Gelar Ikon Belia Kesenian (Stanley Meringai David Impi); Gelar Ikon Belia Sukarelawan (Sulhie Salleh); Gelar Ikon Belia Sukan (Audrey Nu Alexander Mula); Gelar Ikon Belia Usahawan (Mohammad Hafidz Rahani); Gelar Ikon Belia Inovasi (Ahmad Zaiwin Mohd Kassim). Gelar Jasa Belia Wira (ASP Yeoh Chun Syan); Gelar Ikon Belia Istimewa (OKU) (Lumba enggau Main)(Batricia Richeal Sentau); Gelar Ikon Belia Istimewa (OKU) (Kesenian) (Shamri Hamdan) enggau Gelar Jasa Persatuan Belia ke dimenang Pertubuhan Belia Kebangsaan Bersatu Sarawak (SABERKAS). Sama bisi datai ngulu pengerami nya kemari, bini Adenan, Puan Sri Datuk Jamilah Anu, Menteri Muda Pemansang Nembiak (Menua Pesisir) Datuk Dr Stephen Rundi, Sapit Menteri Dalam Negeri Datuk Dr. Wan Junaidi Tuanku Jaafar enggau bala ke bukai. |
| Pengajar patut ngemeranka ulah, chara gawa ke pemadu manah enggau pekara ke positif Posted: 21 Jun 2014 09:13 AM PDT KAPIT: Direktor Opis Pelajar Sarawak, Datu Abdillah Adam minta semua pengajar ngemeranka chara ngereja pengawa ke pemadu manah kena nyapai tikas pemujur ke pemadu tinggi ngemansangka mudal mensia ngambika setipak enggau Pelin Pemansang Pelajar Menua Malaysia 2013 nyentuk ke 2025'. "Pengajar patut ngemeranka chara ngereja pengawa ke pemadu manah, ulah ke manah sereta pekara ke positif ngambika ulih nyapai tikas pemujur ke pemadu tinggi ngemansangka mudal mensia ngambika setipak enggau Pelin Pemansang Pelajar Menua Malaysia 2013 nyentuk ke 2025", pia ku Abdillah lebuh bejadika pengerami nyua 'Anugerah Perkhidmatan Cemerlang – APC 2013' Opis Pelajar Kapit kena pagi Hari Lima tu tadi ke diatur ba Dewan Kejora SMK Kapit 2 ditu ke digulu bala pengajar, ketuai opis enggau bala nembiak. "Aku arap nengah pengerami nyuaka APC tu ulih nyadika pelasar endur ngedutka kaul, kerejasama sereta gawa beraban seraya bekunsi penemu enggau peneleba kena ngenegapka chara bejalaika pengawa ba tikas opis nya. Perintah ngaku pemanah pengawa enggau servis kita ngemansangka mudal mensia ke bekualiti nengah pmenah disiplin sereta peniggi tikas moral. Aku ngenataika pengaga ati ngagai bala penerima lalu arapka sida semampai bejalaika pengawa enggau naka pemanah. Ngagai sida ke bukai, anang asa ati sereta chakah agi gawa ngambika kitai ulih nerima gelar tu dudi ila. Orang ke chakah deka bulih pemujur. Nadai utai ulih nagang kita bulih pemujur enti kita amat chakah gawa," pia ku Abdillah. Ba pengerami nya bisi 230 iku ke dipilih nerima APC ke alai 135 iku ari Kapit, 50 iku ari Song sereta 45 iku ari Belaga. Datu Abdillah mega pechaya enti semua pengajar di serata menua Sarawak ngemeranka chara ngereja pengawa ke pemadu manah, ulah ke manah sereta pekara ke positif sida ulih nyapai juluk ba pelajar ti dekaka pemujur ke tinggi sereta kualiti ke manah. "Pengajar ejen Program Pemansang Nasional ngambika ulih nyapai status menua maju. Pengajar patut ngembuan pengarap ati sereta profesionyel ngambi dipebasaka. Kita patut disikap enggau mayuh macham penemu sereta pengelandik ngambika kita efektif sereta produktif. Tanggungpengawa pengajar beguna amat kena nempa sereta nyikap pengereja pengawa ngambika menua tu ulih nyadi menua maju," ku Abdillah. Iya mega ngenataika pengaga ati ngagai bala pengajar ba Pelilih Mit Song laban udah ngemujurka pelilih mit menua nya bulih pemutus ke pemadu nyulut dalam peresa 2013 UPSR di nengeri tu. Dulu ari nya lebuh ke bejaku, Pemesai Opis Pelajar Kapit, Ringgit @ Gawan Saut madahka pengerami nya besai amat reti ngagai bala pengereja pengawa ba Opis Pelajar nya laban pemanah kualiti servis sida diaku perintah. Iya mega meri terima kasih ngagai Abdillah laban ti udah bejadika pengerami nya. Bela bisi ngulu pengereami nya Sapit Residen Kapit, Zul Usop, Pemesai Opis Pelajar Song, Dali Rain, Pemesai Opis Pelajar Belaga, Henry Usat Bit, Sekreteri pengatur pengerami, Philip Beginda, Prinsipal SMK Kapit, Manggi Nyegang, Prinsipal SMk Katibas, Patrick Nojey enggau Prinsipal SMK Belaga, Lim Sea Kiaw. |
| Rh Henry Nuni nadai penanggul menang ba pekit Anugerah Desa Cemerlang Posted: 21 Jun 2014 09:12 AM PDT BINTULU: Peranak Rumah Henry Nuni arap endar ati ulih menang ba pekit Anugerah Desa Cemerlang dalam Kategori Rumah Kayu ke diatur Opis Pemansang Mensia Mayuh (KEMAS). Pekit nya diatur nengah kerejasama mayuh bengkah opis perintah dibagi ngagai dua kategori iya nya kategori genturung pendiau enggau rumah panjai. Penyelia Kanan Pengerembai Kaul Opis Pemansang Mensia Mayuh (KEMAS) Bintulu Ising Kalang lebuh ti berandau enggau pemberi maya meresa sereta meri poin ngagai rumah panjai nya ensanus madah, pemenang kededua kategori deka nerima perais RM4,000 ke alai poin ke diberi nya nyengkaum status ekonomi peranak menua enggau pemansang dalam pelajar, landskap, pengerai enggau sekeda pekara bukai. "Champian pekit nya deka dibai ngagai tikas nengeri (kategori rumah panjai) enggau nasional (genturung pendiau) ngambika ulih besemekih enggau genturung pendiau bukai kelebih agi di nengeri tu enggau menua Malaysia," ku iya. Ku Ising, entara tuju pekit nya diatur kena ngiri penemu ngagai peranak menua kelebih ti diau di ulu entigis ngambika sida ngemeratka pemeresi enggau pemanah gamal genturung pendiau sereta mega ngemeratka pekara pelajar anak enggau ekonomi ruang bilik. Nengah program ke baka tu, ku Ising, ulih nyaup nyungkak daya kreativiti peranak menua ngambika ulih besemekih sereta produktif dalam mayuh bengkah bidang ti ngujungka sida ulih besemekih ba ti dunya. Rumah Henry Nuni kala menang ba sekeda pekit pemeresi enggau pemanah rampa genturung pendiau sebedau tu. Rumah panjai bansa Iban nya urung iya penyauh 45 kilometer ari Pasar Bintulu. |
| Rayat minta status RMR dipadah lengkas laban taba majak repa Posted: 21 Jun 2014 09:11 AM PDT BALINGIAN: Rayat ba pelilih mit Balingian ke bisi minta 'Skim Rumah Mesra Rakyat (RMR) 1Malaysia' ari Kompeni Pengawa Berumah Menua Berhad (SPNB) ngarapka kompeni nya ulih meri penerang enggau lengkas bekaul enggau status peminta RMR sida sekalika diterima tauka enda. Kebuah pia laban raban nawa tanah ke diperambu dikena nirika 20 unit RMR ba sitak Kunsil Nengeri (DUN) Balingian nya diatu nya repa laban babas enggau lalang kenyau dua taun ke udah pengudah 20 iku rayat diinterbiu dikena minta RMR 1Malaysia maya taun 2012. Seiku orang ke bisi minta iya nya, Hanu Amin, 46, madah bala sida chukup ngarapka status minta RMR nya ulih diputar enggau lengkas sereta diberi penerang awakka sida nemua kebuah penanggul projek nya. "Udah dua taun kami nganti tang rita sentang status peminta kami nadai bisi didingga nyentukka diatu," ku iya madah ngagai Utusan Borneo. Hanu madah, baka buah rian semina bau renggut tang bulat ba dalam baka nya meh nasib 20 iku sida ke bisi minta, terubah ningga gagit ati maya diinterbiu sentang minta skim RMR itu. "Kami diinterbiu maya taun 2012, udah nya nerima surat ke ngasuh nganjung dokumen ke besangkut," ku iya. Iya madah, syarat bukai nyengkaum peminta ngasuh nyendiaka geran pala tanah ke udah diaku, fotostat tingki pengempu tanah, fotostat setipikit rasmi (pemadu baru) ari Opis Tanah, surat pemendar ari orang bempu tanah enggau surat sempekat. "Penanggul iya, tentu kami enda ulih nyendiaka surat pala tanah ba kandang menua ke deka alai ngentak rumah RMR nya laban tanah nya dipenggi perintah," ku iya. Seiku sida ke sama bisi minta RMR Medihi Apor, 45, madah, "Aku enda tusah ati sereta enda mereti sentang status RMR ke dipadah ungkup rayat di Balingian tu." "Terubah iya kami diinterbiu nitihka gintir diri empu, kami chukup gaga sereta meri terima kasih laban deka diberi RMR nya. Udah diinterbiu kami andal sereta ngasaika peminta kami nya mujur laban nya endang juluk ati kami. "Udah nya kami dipinta ngangkat sumpah enggau mayar setem, terus dititihka kami. "Tang, dua taun enam bulan udah nya, aku nadai agi nerima nama-nama berita ari kompeni nya, pia mega bisi dipadahka dokumen peminta ke udah dianjung nya enda chukup syarat dikena nyukung peminta aku. "Nama utai ke nguji digaga aku enggau bala peminta bukai iya nya minta raban orang ke besangkut paut berundingka nasib kami lalu meri penerang nama utai ke dikedeka dikena ngemujurka RMR nya," ku iya. Medihi madah, mayuh rayat ba Balingian chukup begunaka rumah alai diri sebilik ke majak nambah, pia mega bisi ruang bilik tepasa kunsi sereta besekut enggau apai indai diri. "Pengawa ngaga RMR ba Mukah ungkup fasa satu udah tembu lalu diatu deka masuk fasa dua, tang status RMR ba Balingian diatu nadai didinga rita lalu taba rumah nya udah balat repa," ku iya. Nya alai, ku iya rayat Balingian chukup ngarapka pemansang ke udah diperambu perintah nengah skim RMR nya ulih digaga lengkas ngambika meri pengelantang ngagai sebagi ari rayat ditu, udah nya status peminta RMR mega patut dipadah jampat laban udah kelalu lama kami nganti rumah nya. "Aku mantaika sebana tu ngambika perintah enggau raban orang ke besangkupt paut ulih mantu kami. Enti enda, penanggul tu sigi enda nemu putus sampai ke ila-ila," ku iya. |
| PRS, SUPP enggau SPDP mantah TERAS tama BN Posted: 21 Jun 2014 09:11 AM PDT Dikarang Chris Bishop // TERAS enda tau sengapa ngenamaka diri dalam BN KUCHING: Keterubah iya pengudah mayuh berita sentang pengeran Parti Tenaga Rakyat Sarawak (TERAS) nyereta serakup Barisan Nasional (BN) Nengeri, Parti Rayat Sarawak (PRS), Parti Se'ati Rayat Sarawak (SUPP) enggau Parti Progresif Demokratik Sarawak (SPDP) begempung ngena semua daya enggau kuasa ngenanka BN ari keruga sebarang parti luar. Pengerami nerima pengabang Hari Gawai ke diatur ba rumah Presiden PRS Tan Sri Datuk Amar Dr James Masing kemari nyadi palan endur tiga buah parti ari serakup BN nya ngenataika pesan ngagai TERAS ngambika enda ngeruga penegap BN di Sarawak. "Kami begempung ngenanka BN ari keruga parti luar. Enti seiti parti antara kami dikachau, kami patut meri bantu baka ke udah nyadi ba SUPP enggau SPDP. "PRS megai tanggung pengawa mantu BN lalu aku lantang ati meda dua iku presiden (SUPP enggau SPDP) begempung ngenanka BN sereta kami deka nyukung Kepala Menteri enggau Menteri Besai," ku Masing ke nyadi tuai rumah. Iya nambah, TERAS ngerampas penuduk ke ungkup SPDP engau SUPP lalu diatu nguji deka ngerampas seiti penuduk ke endang ungkup PRS. Masing ke mega Menteri Pemansang Tanah ngelalau TERAS ngambika enda ngubah atur ke udah lama dikemeran dalam perintah BN lalu parti nya enda tau sengapa ngenamaka diri dalam BN. "TERAS enda ulih peneka ati tama nyereta serakup BN nengeri. Kitai ngenggam prinsipal dia parti bukai enda tau diterima sengapa. "Chukup seiku parti presiden dalam serakup mantah, TERAS sigi enda diterima dalam BN lalu nya meh penetap penemu ke dikemeran kami," ku iya. Presiden SUPP Tan Sri Peter Chin enggau Pemangku Presiden SPDP Datuk Seri Tiong King Sing ke bela setuju enggau jaku Masing netapka kededua parti seperau ngelaban keruga TERAS lalu deka nentuka TERAS enda diterima dalam BN. "Sida lari mai penuduk ke diempu SUPP sereta SPDP lalu penuduk nya patut dipulaika ngagai kededua parti. "Sida patut ngelengka pangku pengawa, lalu bediri minta sukung ari rayat nengah parti sida empu," ku Chin. Bela datai Sapit Presiden PRS Datuk Joseph Entulu enggau ketuai bukai ari tiga ketetiga parti SUPP, SPDP enggau PRS. |
| You are subscribed to email updates from BorneoPost Online | Borneo , Malaysia, Sarawak Daily News » Berita Iban To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |