Kekadang penanggul projek bepun ari rayat: Asfia BorneoPost Online | Borneo , Malaysia, Sarawak Daily News » Berita Iban - New 2 Borneo |
- Kekadang penanggul projek bepun ari rayat: Asfia
- Sitak menua Semop, Pulau Bruit deka dikemesai endur industri ngaga kapal
- Nengah saup DAP, bup ‘Pengap Gawai Kelingkang Nempalai Kasai’ dipenyadi
- Genap pengerami dikena ngedut kaul, ku Fedrick
- Perintah BN deka terus meri pemansang ba DUN Semop
- Bala tuai raban bansa dipinta chakah agi ngereja pengawa diri
| Kekadang penanggul projek bepun ari rayat: Asfia Posted: 23 Jun 2014 03:02 PM PDT Sekeda orang ngenggaika projek pemansang perintah ketegal ngerenchah tanah sida BINTANGOR: Kebuah sesebengkah projek tejanggal ukai ketegal pengari rayat tang tebal agi penanggul nya nyadi bepun ari rayat empu. Speaker Kunsil Nengeri Datuk Amar Mohamad Asfia Awang Nassar madah, kekadang bisi ulah sekeda orang rindu ngemesaika pekara mit nyadi pekara besai ngujungka penanggul bukai tau nyadi penekul pemansang sesebengkah projek ari perintah. "Enti bisi projek laun tembu tauka laun berengkah nya ukai salah pengari rayat kita tang ketegal ari penanggul bukai lebih agi ketegal rayat empu. "Suah agi penanggul ke nyadi laban bisi sekeda rayat bebendar ngetanka tanah sida ari kena renchah projek baka projek nirika tiang karan, jalai alun tauka pengawa masang paip ai beresi," ku iya. Asfia mantaika jaku nya maya datai ngabang ngulu Pengerami Ngiling Tikai ke diatur ba Rumah Usop Bengkok, ba Sungai Sian di Bintangor ditu, kilah ensana. Bela bisi ngulu pengerami tu iya nya Sapit Residen (Program Pemansang) Sarikei Badjuri Bidin, Ketuai Sekretari Politik Kepala Menteri ti mega Kaban Kunsil Nengeri (ADUN) Semop Abdullah Saidol, ADUN Jemoreng Abu Seman Jahwie, Sapit Chairman Parti Pesaka Bumiputera Bersatu (PBB) Pampang Meradong Morsili Bakar, Ketuai Raban Nembiak PBB Pampang Meradong Kaunsilor Helmi Morsili, Penghulu Augustine Pau enggau bini Abdullah, Nora Ashikin Ibrahim sereta bala ke bukai. Ba senentang mantaika penanggul nyengkaum bepintaka projek ba menua diri, ku Asfia, rayat anang lembau bejalai ngelawa bagi sapa ke patut lalu ukai semina ngandalka pengari rayat sida datai ngagai menua nentuka projek ke patut dipenyadika. "Tanggungpengawa pengari rayat iya nya mantaika peminta (projek) rayat ngagai perintah. "Seraya nya, rayat empu patut chakah nyidi penanggul ke ditapi sida nyengkaum bepintaka projek ke endang patut ditumbuhka ba menua diri empu," ku iyanandu. Berebak enggau tu mega Asfia meri jaku tangkan ngagai rayat bagi pegai DUN Semop ngambika enda kiba kanan milih rayat ke tau nyadi pengari sida. Ku iya, ba atur demokrasi menua tu bisi dua bengkah bagi iya nya sepiak mai penyenang ba pengidup lalu sepiak semina landik kerah-kerah bejaku aja. "Rayat ke dipilih ke tau nyadi pengari rayat iya nya rayat ke ngembuan 'taring' lebih agi ari parti ti kering tang ukai parti ti suah bendar charut. "Ambika banding, ba pengawa milih tuai dalam parti aja sida (penyakal) suah charut enggau pangan diri tang tu enda nyadi ba parti perintah baka pengelikun ke dikembuan PBB. "Nya alai, aku ngarap rayat nengeri tu landik milih sapa ke patut nyadi pengari sida ngambika pengidup jemah ila seruran angkat sereta likun," pia ku iya madah. Asfia madah, ADUN Semop, Abdullah, seiku chalun ke dipilih taui parti laban ke endang ngembuan penau megai tanggung pengawa nya. Iya mega pechaya sukung rayat DUN Semop enda kiba kanan laban iya bechuanka sukung rayat dia ngagai iya endang manah maya iya agi nyadi ADUN Semop suba. "Beri sukung kita ngagai iya baka kita nyukung maya aku agi nyadi pengari kita ditu suba. "Aku mega andal sukung rayat ditu lebih agi bansa Iban enda tepawah ari Barisan Nasional (BN) laban rayat ditu mengkang bepanggai ba perintah BN deka ngasaika pemansang. "Anang ngelebu diri laban semina BN aja bisi geran projek menua pesisir (MRP) ke diberi ngagai rayat lalu pengelebih tu nadai ba sida penyakal," ku iya sambil ngarapka rayat DUN Semop bechuanka penanggul ke ditapi rayat ba DUN Meradong kenyau ari sida dipegai penyakal. Ba pengerami tu mega Asfia bisi nyuaka cek RM15,000 ngagai rumah panjai Usop. Kepenudi pengerami sehari nya, iya enggau bala pemesai ke bukai ngajat ngerebahka ranyai sebedau ngiling tikai kelai penembu pengerami Gawai.   |
| Sitak menua Semop, Pulau Bruit deka dikemesai endur industri ngaga kapal Posted: 23 Jun 2014 03:00 PM PDT SIBU: Perintah udah nentuka sitak menua Semop enggau Pulau Bruit dikena nambahka penyampau industri ngaga kapal ba nengeri tu. Menteri Pengatur Pemansang Pengeraja Asal enggau Rampa Menua II Datuk Amar Awang Tengah Ali Hassan madah, puku dikena ngangkatka dua bengkah menua nya deka dipansukka ba Pelin Pemansang Malaysia Lumpar Ke-11 (RMK-11). "Sibu sebengkah menua alai ngaga kapal ke dieksport ngagai menua bukai baka Singapore, China, Arab Saudi, Vietnam enggau menua tasik bukai. "Kelimpah ari nya, palan tu mega bisi digaga di Rantau Panjai, Sibu tang dua bengkah palan tu udah penuh tauka udah enda chukup pemesai agi nejuka perintah deka nambahka palan nya di Semop enggau di Pulau Bruit," ku iya. Taja pan baka nya ku iya, puku enggau pemesai palan tu empai ditemu dulu. Iya mantaika jaku nya pengudah bejadika Pengerami Nutup Seminar Program 'Meneroka Peluang Dalam Sektor Perdagangan dan Perindustrian' beserimbai enggau 'Minggu Perusahaan Kecil dan Sederhana' ba sebengkah hotel ditu, kemari. Sama bela bisi datai maya tu iya nya Menteri Muda Pengatur Pemansang Industri ti mega Menteri Muda Pemansang Menua Pesisir enggau chairman komiti pengawa Datuk Julaihi Narawi, Menteri Muda Pengatur Pemansang Pengeraja Asal Datuk Mohd Naroden Majais, Kaban Kunsil Nengeri (ADUN) Nanga Annuar Rapaee, ADUN Jemoreng Abu Seman Jahwie, ADUN Daro Murni Suhaili enggau ADUN Balingian Yossibnosh Balo. Ba seminar ke digulu 555 iku penyereta sehari nya bisi mantaika enam bengkah keretas kereja. Keretas kereja tu dibantai Malaysia External Trade Development Corporatioan (MATRADE), Malaysian Investment Development Authority (MIDA), SME Bank, Malaysian Industry-Goverment Group for High Technology (MIGHT), The Office of Domestic Trade, Co-operatives and Consumerism (PDNKK) enggau State Planning Unit (SPU) ari Opis Kepala Menteri. Ba jaku iya maya bejadika pengerami nya, Awang Tengah madah, perintah mega deka numbuhka palan dagang ba sebengkah endur di sitak Sibu tang agi nganti pemendar dulu. Pemutus nya digaga ku iya laban Sibu ngembuan pengelebih alai numbuhka Industri Mit enggau Jelan Pemesai (IKS) kelimpah sebengkah menua ke strategik nyerumba penumbuh Projek Tau Dikena Baru Sarawak (SCORE). "Kitai deka berunding enggau perintah nengeri ngambi bejadika perambu tu ba RMK-11 alai kitai mega deka bejadika aset industri seraya ngangkatka IKS ba sitak tu nyerumba SCORE ukai semina bepelasarka industri berat aja tang mega bisi ngaul pemansang IKS," ku iya madahka baru. Nambahka nya, perintah diatu chakah numbuhka industri ba menua pesisir nyengkaum pasr-pasar ke mit alai diatu mega perintah udah nentuka 77,000 hektar pemesai tanah di Tanjung Manis alai ngaga 'hab halal' ungkup industri barang pemakai, framaseutikal enggau kosmetik. Awang Tengah mega madah, perintah chakah ngemansangka sitak Sibu nyadi 'Food Basket' bepun ari ke besemak enggau sitak Sarikei ti tebilang enggau barang pemakai. "Nya alai, rayat bagi sitak Sibu patut nyungkakka diri ba pengawa dagang nyengkaum IKS lalu anang semina meda makit sida ba menua tu aja tang nyentukka ba makit antarabansa. "Perintah nyediaka macham bengkah bantu enggau program ke diungkup ngagai orang dagang menua tu lebih agi IKS. "Tang sayau bendar semua bantu enggau program tu semina dikena mimit aja," pia ku iya nerang. Berebak enggau tu Awang Tengah bisi madah, menua baka Kazathan enggau Bosnia ti kaya enggau pengeraja asal pechayaka kompeni ari Malaysia ba pengawa industri kapal, ngulihka gis enggau minyak, produk pemakai, ubat enggau kosmetik. Kelimpah ari nya, iya madah menua Dubai mega bisi minta kompeni ari menua tu numbuhka kilang tauka industri ba menua nya lebih agi industri barang pemakai. "Tu kelai orang menua bukai pechayaka kompeni ari menua kitai lalu pekara tu patut dikena kitai nyungkakka agi dagang diri rembus ba makit dunya," ku iya madah baru. Maya tu mega iya madah, nitihka ripot ari MIDA bagi timpuh bulan Januari nyentuk March taun tu, Sarawak mujur ngerikod RM7.3 billiun ari pengawa beranakka puku iya nya rikod ke pemadu tinggi di serata Malaysia. |
| Nengah saup DAP, bup ‘Pengap Gawai Kelingkang Nempalai Kasai’ dipenyadi Posted: 23 Jun 2014 02:59 PM PDT KUCHING: Bup ti nusoi sebengkah main asal Iban nengah 'Pengap Gawai Kelingkang Nempalai Kasai' ke dikarang Jimmy Donald mujur dipenyadi ensanus. Jimmy ke udah ngarang 16 macham bup Iban mega kala nyadi kaban parlimen Sri Aman (1995 nyentuk 2008) sereta udah nyadi kepala pengajar ba mayuh sekula sekondari serata Sarawak. "Ba serata dunya, orang nguji ngidupka baru main asal sida. Aku ulih meri jamin, main asal Iban enda nitihka nasit main asal bansa bukai lalu bup ke dilanchar sehari tu deka ngenan main asal Iban," ku iya lebbu meri penerang maya atur pengawa nya kemari ke dikemujurka MP Bandar Kuching Chong Chieng Jien. Iya mega madah bup nya ngundan pengap ke dipeturun ari orang ke dulu lalu dilaguka bala lemambang ba pengawa ke bekaul. Ba kaul ke sama, Chong muji pengawa manah Jimmy ke udah mujur nembuka bup 'Pengap Gawai Kelingkang Nempalai Kasai' penebal 570 lambar. Iya mega madah Jimmy bisi ngenataika pengirau ati ngagai iya seraya madah, Iban rebak baru enda nemu sentang main tauka pengawa pengap lalu tau endar pupus jemah. "Dalam timpuh dua bulan, DAP mujur ngiga belanja dikena ngalus lalu ngeluarka bup ke nyadi sebengkah ari chara kitai ngenan main asal bansa Iban tu," ku iya nambah. Iya mega madah Jimmy udah minta bantu ari DAP ngambika tau nyelak sereta ngeluar bup nya ketegal Dewan Bahasa dan Pustaka ngembuan sekeda polisi ti nagang bup nya dichelak sereta dikeluar. Baik nya bup ke ditulis ba jaku Iban, Bidayuh, China tauka Melayu, perintah nengah ejensi ke bekaul ku iya, patut ulih mantu ngeluarka bup ti dikarang enggau tuju ngenanka main asal, tandu Chong. Bela datai ba pengawa nya sekeda ketuai ari DAP enggau ketuai ari gerempung ke ukai dikuasa perintah. |
| Genap pengerami dikena ngedut kaul, ku Fedrick Posted: 23 Jun 2014 02:59 PM PDT Kelimpah ari nya semua pengereja pengawa perintah patut chakah bejalaika pengawa ke penguntung rayat KAPIT: Kompleks Nengeri Bletih ditu, ngayanka sekeda ubah nyerumba pengawa ngintu Gawai seraya dipandangka tambai besai di mua nya, ti mai leka jaku, 'Selamat Gawai, Gayu Guru, Gerai Nyamai'. Pengawa nya ngelaika pengerami Ngiling Bidai ke diatur Opis Residen sereta digulu semua pengereja pengawa ari opis perintah nengeri enggau perintah besai sereta ejensi bukai di pelilih Kapit ditu. Ba tengah dewan kompleks nya dianchauka bidai ti digaga ari wi sereta didirika pandung endur tiang ranyai sereta dia mega pengawa miring dipejalai sebedau ngepunka pengawa. Residen Pelilih Kapit Fedrick John George mujur bejadika atur pengawa nya. Penutup pengawa maya nya ke alai Fedrick nguluka semua temuai ti dipebasa ngiling bidai, kelai pengujung pengawa Gawai ba taun tu. Bela bisi ngulu atur pengawa nya, Sapit Residen Zul Usop (rama) enggau Joseph Ikan (pemansang); Tuan DO Song, August Jackline; mandal injinir pelilih mit Kapit, Gerald George; sapit direktor Opis Pengintu Pengelantang Mensia Mayuh, Peter Gabong; sapit direktor Opis Betanam Betupi, Dominic Chunggat; pemantu Opis Residen, Opis Pelilih Mit Song, Kapit enggau Belaga, Minggu Jampong, Robert Segie, Robert Angaw, Irene Merang, Harry Bruce Edwin, Ronald Gang, Awangku Faizal, Julius Scott Sapong, Selmah Sepang, Venassa Joseph, Karon Mampus; kepala kerani, James Sandak sereta beratus pengereja pengawa perintah bukai enggau mensia mayuh. Ba jaku pandak Fedrick,iya muji pemanah ulah mensia maya pengerami, ukai semina Gawai tang udah tu kitai deka berami ngerami Hari Raya lalu udah nya bisi agi pengawa bukai ke alai nengeri kitai mandangka penegap kaul sereta ngayanka pemereti maya berami. Iya mega muji ketuai raban bansa ketegal besaup ngemujurka genap pengerami ke dipejalaika. "Suah agi lebuh maya gawa, kitai jarang berandau enggau pangan diri taja pan bepeda tauka bepansa tang nengah pengerami ti baka tu, kitai patut bekempit sereta ngenegapka kaul entara diri sama diri seraya berami," ku Fedrick. Berebak enggau nya, iya mega ngelalau semua pengereja pengawa perintah di Kapit ngemeratka pemansang sereta sida mega patut chakah bejalaika atur ngambika Kapit enda tinggal ari ubah pemansang. "Kitai ti megai pengawa perintah, enti enda ngatur pengawa enggau manah dia rayat deka rugi tambah mega pengereja pengawa patut besaup bejalaika pengawa kena ngemansangka menua," tandu iya. KAPIT: Kompleks Nengeri Bletih ditu, ngayanka sekeda ubah nyerumba pengawa ngintu Gawai seraya dipandangka tambai besai di mua nya, ti mai leka jaku, 'Selamat Gawai, Gayu Guru, Gerai Nyamai'. Pengawa nya ngelaika pengerami Ngiling Bidai ke diatur Opis Residen sereta digulu semua pengereja pengawa ari opis perintah nengeri enggau perintah besai sereta ejensi bukai di pelilih Kapit ditu. Ba tengah dewan kompleks nya dianchauka bidai ti digaga ari wi sereta didirika pandung endur tiang ranyai sereta dia mega pengawa miring dipejalai sebedau ngepunka pengawa. Residen Pelilih Kapit Fedrick John George mujur bejadika atur pengawa nya. Penutup pengawa maya nya ke alai Fedrick nguluka semua temuai ti dipebasa ngiling bidai, kelai pengujung pengawa Gawai ba taun tu. Bela bisi ngulu atur pengawa nya, Sapit Residen Zul Usop (rama) enggau Joseph Ikan (pemansang); Tuan DO Song, August Jackline; mandal injinir pelilih mit Kapit, Gerald George; sapit direktor Opis Pengintu Pengelantang Mensia Mayuh, Peter Gabong; sapit direktor Opis Betanam Betupi, Dominic Chunggat; pemantu Opis Residen, Opis Pelilih Mit Song, Kapit enggau Belaga, Minggu Jampong, Robert Segie, Robert Angaw, Irene Merang, Harry Bruce Edwin, Ronald Gang, Awangku Faizal, Julius Scott Sapong, Selmah Sepang, Venassa Joseph, Karon Mampus; kepala kerani, James Sandak sereta beratus pengereja pengawa perintah bukai enggau mensia mayuh. Ba jaku pandak Fedrick, ARAM BERAMI MAKAI: Temuai, bala pengabang sereta mensia mayuh bela ngulihka pemakai diri. NGANTI NGETAS AJA: Residen Kapit, Fedrick John George ngajat ngelingi pun ranyai sebedau diketas kena ngelai penembu atur pengawa maya nya. IDAR AKU!: Sapit Resident, Joseph Ikan bela ngajat ngelingi pun ranyai sebedau ngetas buah ranyai. iya muji pemanah ulah mensia maya pengerami, ukai semina Gawai tang udah tu kitai deka berami ngerami Hari Raya lalu udah nya bisi agi pengawa bukai ke alai nengeri kitai mandangka penegap kaul sereta ngayanka pemereti maya berami. Iya mega muji ketuai raban bansa ketegal besaup ngemujurka genap pengerami ke dipejalaika. "Suah agi lebuh maya gawa, kitai jarang berandau enggau pangan diri taja pan bepeda tauka bepansa tang nengah pengerami ti baka tu, kitai patut bekempit sereta ngenegapka kaul entara diri sama diri seraya berami," ku Fedrick. Berebak enggau nya, iya mega ngelalau semua pengereja pengawa perintah di Kapit ngemeratka pemansang sereta sida mega patut chakah bejalaika atur ngambika Kapit enda tinggal ari ubah pemansang. "Kitai ti megai pengawa perintah, enti enda ngatur pengawa enggau manah dia rayat deka rugi tambah mega pengereja pengawa patut besaup bejalaika pengawa kena ngemansangka menua," tandu iya. |
| Perintah BN deka terus meri pemansang ba DUN Semop Posted: 23 Jun 2014 02:55 PM PDT Dikarang Judan Bungap // Projek tu nyengkaum jalai raya, karan enggau ai beresi BINTANGOR: Kaban Kunsil Nengeri (ADUN) Semop Abdullah Saidol chakah deka nyikap pemansang menua nya enggau projek jalai alun, karan enggau ai beresi. Iya madah, pengeransing iya nya bepun ari perintah nengeri tu enda belampung ati mubuhka projek pemansang ba menua pesisir nyengkaum sitak Kunsil Nengeri (DUN) Semop ketegal pemujur Barisan Nasional (BN) ngelama tu endang ari sukung rayat menua pesisir. "Kepala Menteri empu bebendar ngansak bala pengari rayat ngambika chakah tauka ransing nyidi penanggul ke ditapi rayat ba menua pesisir. "Nya alai, kami (pengari rayat) deka berani bejaku ngagai perintah besai ngambika bulih bantu dikena numbuhka pemansang ba menua pesisir," pia ku iya madah. Abdullah mantaika jaku tu maya ngulu Pengerami Ngiling Bidai ba Rumah Peter Minggat, Sungai Mupong Ulin ditu kena hari Enam minggu seiti nyin tadi. Sama bela bisi datai nyempulang iya maya tu iya nya bini iya Nora Ashikin Ibrahim Sapit Residen (Program Pemansang) Sarikei Badjuri Bidin, Sapit Chairman Parti Pesaka Bumiputera Bersatu (PBB) Pampang Meradong Morsili Bakar, Sapit Chairman PBB Pampang Semop Kaunsilor Tuai Rumah Nicholas Abu Seman, Ketuai Raban Nembiak PBB Pampang Meradong Kaunsilor Helmi Morsili, Kaunsilor Nick Penghulu Augustine Pau sereta bala ke bukai. Nambahka nya, ku Abdullah ti mega Ketuai Sekretari ngagai Kepala Menteri, perintah nengeri tu mega enggau naka alah nyaga ati rayat menua pesisir ngambika enda ringgat semina ketegal pekara mit lebih agi ba pekara bepintaka projek. Berindik ari nya, iya madah, sida naka alah mutarka nama-nama penanggul ke bisi ditapi rayat nyengkaum rayat ba rumah panjai. Kelimpah ari nya, ku iya, bala kaunsilor enggau tuai rumah ngembuan tanggung pengawa matau pemujur pejalai projek perintah ke bisi ditumbuhka ba menua sida. Abdullah madah, ngelama tu bisi sekeda projek ke digaga ba menua pesisir enda nitihka stindit ke patut ngujungka rayat napi penusah bukai. "Tanggung pengawa tuai rumah iya nya meda sereta matau projek perintah ke diberi ngagai menua sida. "Enti bisi penanggul ba projek nya bai ngagai opis ti bekaul tauka padah ngagai kaunsilor ngambika penanggul nya ulih dipansik nama kebuah tau nyadi," pia ku iya madah. Berebak enggau tu mega, Abdullah madahka diri deka berandau enggau opis ti bekaul senentang peminta peranak ba Rumah Peter Minggat ke minta digagaka jalai alun penyauh empat kilometer ari Jalai Tanjung Manis/Sibu ngelawa rumah panjai sida. "Aku deka berandau enggau Opis Residen minta Opis Kereja Raya (JKR) matau menua tu ngambika kitai ulih minta projek jalai tu digaga. "Nyema enda besai tauka enda dibelangkin nadai salah jalai tu disimen dulu asal aja ulih ditengah," pia ku iya madahka baru. Dulu agi ari nya, Abdullah enggau bala raban ke bukai bisi ngabang ngagai pengerami ke sebaka ba Rumah Seli Judi, Sungai Mupong lalu ke penudi ngabang ngagai Rumah Anggi Enggol, Nanga Bangkit, Bintangor. |
| Bala tuai raban bansa dipinta chakah agi ngereja pengawa diri Posted: 23 Jun 2014 02:54 PM PDT KUCHING: bala tuai pupu raban bansa ke udah dichiri mangku pengawa tauka udah disambung baru dipinta ngembuan ulah ke chakah ngereja pengawa, kelebih agi beratika pekara ti berat ke patut diadu ba sitak ke dikuasa diri empu. Pemangku Pegawai Pelilih Menua Kuching Zamhari Saidi madah, pengawa tuai-tuai pupu bansa betatika sebarang penanggul ke patut diputarka ba sitak diri deka ngelengkaska agi pemansang digaga. Nya alai, ku iya, Ketuai Direktori ari Opis Pelilih Menua enggau Residen patut nemu enti bisi sebarang penanggul ke ditapi rayat ba sitak ti dipegai sida iya minta penanggul nya ulih diputar tauka dikurangka. "Diatu rayat mayuh pilih endur mantaika kompelin sida iya nya nengah media, awakka penanggul rayat ulih diputar. "Ni naka pemayuh penanggul tauka kompelin ti digaga, tuai-tuai pupu bansa patut ngembuan ulah ke proaktif beratika penanggul nya ulih diputar tauka dikurangka," ku Zamhari. Iya madah munyi nya lebuh bejaku ba atur pengawa Ngiling Tikai begulai enggau tuai-tuai pupu bansa ti diatur ulih Opis Pelilih Menua Kuching di sebuah hotel entarabansa ditu, ke bisi ngangau urung 200 lebih pegawai sereta tuai-tuai pupu bansa, malam hari Minggu tu tadi. Ku iya, tuai pupu bansa mega dipinta beratika projek pemansang ti patut digaga di sitak sida iya diberi timpuh ngagai bulan Oktober, mantaika perambu projek nya, ngambika ulih diperundingka ulih Opis Pelilih Menua enggau Kaban Kunsil Nengeri (ADUN) di sitak nya empu. Semua perambu projek pemansang nya deka dianjung ngagai Opis Pelilih Menua dulu, lalu udah nya kami perambu nya deka disua ngagai ADUN ti megai sitak kita, ngambika ulih dikemendarka, ni bagi projek pemansang ke berat, ke patut digaga dulu. "Opis Pelilih Menua mega deka ngaga BQ (Bill of quantity tauka spesifikasi) enggau ejensi teknikal kami, ngelawa genturung pendiau nya, lalu udah nya nganjung lis nya ngagai Opis Sarawak Divisional Office (SDO) ngambika ulih digaga dalam taun 2015. "Ambika chunto, enti deka ngemanahka agi dewan ba genturung pendiau, tuai pupu bansa patut ngaga lis nya, perengka guna, belanja enggau sekeda pekara bukai, lalu dianjung ngagai Opis Pelilih Menua," ku iya lalu nambah projek pemansang nya mega nyengkaum sebarang perengka guna infrastruktur bukai. Kelimpah ari nya mega, iya madah Opis Pelilih Menua Kuching mega deka ngaga siti direktori ke stindit ngelis semua spesifikasi projek baka balai, jematan, pengkalan enggau sekeda perengka guna infrastruktur bukai ke sebaka enggau spesifikasi opis kunsil. "Berengkah ari bulan Julai tu, Opis Pelilih Menua Kuching deka ngaga siti direktori perengkaguna infrastruktur. Enggau pemisi direktori tu ila, projek ulih digaga enggau jampat. "Ambika chunto, baka pengawa ngaga manah agi rumah (baikpulih), enti suba enti ngaga nya nyangka ngambi timpuh sebulan, tang udah bisi direktori nya ila, dalam timpuh lima ari udah tembu. "Pemisi sistem baka tu deka ngemuntangka agi pengawa pemansang," ku iya. |
| You are subscribed to email updates from BorneoPost Online | Borneo , Malaysia, Sarawak Daily News » Berita Iban To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |