» »Unlabelled » Pengerami Ngiling Tikai patut diintu dalam kandang bulan Jun BorneoPost Online | Borneo , Malaysia, Sarawak Daily News » Berita Iban - New 2 Borneo

05:03:00

Pengerami Ngiling Tikai patut diintu dalam kandang bulan Jun BorneoPost Online | Borneo , Malaysia, Sarawak Daily News » Berita Iban - New 2 Borneo

Pengerami Ngiling Tikai patut diintu dalam kandang bulan Jun

Posted: 28 Jun 2014 09:06 AM PDT

Kena ngayanka pemesai basa, adat enggau main asal diri empu

Dikarang Rengenyan Labang //

KUCHING: Timpuh ti pemadu manah endur ngatur pengerami Ngiling Tikai dikena nutup Gawai Dayak ti diintu ninting taun kena 1 Jun, iya nya 30 Jun.

Jimbun Tawai seiku orang ke nemu pasal adat Iban madah, maya ngatur pengerami Ngiling Tikai enda patut ngerampit bulan bukai kelimpah ari dalam bulan Jun.

Pekara bekaul enggau ngatur pengerami Ngiling Tikai entara pekara ti kala dipejuraika dalam aum Majlis Adat Istiadat Sarawak (MAIS), ku iya.

"Maya baum, ku jaku timpuh ngatur pengerami Ngiling Tikai nya anang ngerampit bulan Julai, Ogos enggau bulan bukai, diperambuka maya ke patut iya nya 30 Jun.

"Lalu enti deka ngerami ngelui ari timpuh nya (30 Jun) patut diberi nama bukai, anang meri nama pengerami Ngiling Tikai.

"Laban enti diperundingka enggau ngena, tikai ke dianchau maya Gawai Dayak enti kelalu lama enda digiling, ngujungka tikai nya kamah, nya alai anang kelalu lama ngiling iya," ku iya lebuh ditanya bekaul enggau timpuh ke patut pengerami Ngiling Tikai diatur.

Jimbun ti kala nyadi Pengajar ke Nyulut dalam Jaku Iban diatu gawa nyadi Sapit Pemesai Pemansik Rama ba MAIS madah, kitai bansa Dayak patut bisi basa adat enggau main asal diri empu.

Ku penemu iya, timpuh ti kelalu lama mandangka kitai Dayak tauka Iban nyau baka ngayanka nadai basa ngagai adat enggau main asal diri empu.

Laban ku iya, enti kitai ke empu adat enggau main asal nya enda ulih babasaka nya, bansa bukai tentu mega nadai basa ngagai kitai (adat enggau main asal), tu nyengkaum  atur pengawa Ngiling Tikai.

Ambika banding raban bansa bukai lebuh ngintu pengerami sida pan bisi timpuh lalu enda kelalu lunggar, ku iya.

"Nya alai kitai mega patut baka nya, pengerami Ngiling Tikai tu endang enda patut diatur ke lalu lunggar tauka ngerampit bulan Julai enggau bulan ke bukai, enggai ke kitai diketawaka bansa bukai," ku iya.

Print Friendly

Ngiling Bidai 2014 Serakup Tuai Rumah Sebauh diatur kena 4 Julai

Posted: 28 Jun 2014 09:05 AM PDT

BINTULU: Serakup Tuai Rumah Kandang menua Sebauh deka ngatur Pengerami Ngiling Bidai 2014 ti keterubah endar ba Balai Mensia Mayuh kena 4 Julai tu ila.

Ku Chairman pengantur pengerami nya, Nicholas Bat madahka pengerami ngiling bidai nya ila dipelaba deka digulu Menteri Muda Perengkaguna Mensia Mayuh (Penyambung Karan enggau Telekomunikasyen) Datuk Dr Stephen Rundi Utom, ke alai mensia mayuh diperansang datai bebala mayuh ngulu pengerami nya ila.

"Raban pengatur pengerami bisi nyual 60 buah mija ke berega RM360 sebuah lalu pengawa nyual tikit nya dipejalaika aku empu enggau Tuai Rumah Henry Nuni," ku iya.

Tanya ke silik tauka enti deka meli tikit tau betelefon ngagai Nicholas nengah lumur 010-9680504 enggau Henry (019-8167135).

Print Friendly
We encourage commenting on our stories to give readers a chance to express their opinions; please refrain from vulgar language, insidious, seditious or slanderous remarks. While the comments here reflect the views of the readers, they are not necessarily that of Borneo Post Online. Borneo Post Online reserves the right not to publish or to remove comments that are offensive or volatile. Please read the Commenting Rules.

Orang ke minta pegawa patut nemu chara napi interviu

Posted: 28 Jun 2014 09:04 AM PDT

KUCHING: Suruhanjaya Perkhidmatan Awam (SPA) pampang Sarawak deka bebendar nentuka raban orang ke begiga pengawa dalam ejensi perintah diajar chara napi interviu enggau penerang bukai ke bekaul.

Berindik ari nya, Sekretari pampang Abdul Halim Abang Naili madah SPA nadai penanggul ngaga kerejasama begulai enggau gerempung ukai dikuasa perintah (NGO), serakup dalam genturung pendiau sereta ke bukai ngambika raban orang ti begigaka pengawa ulih mereti sereta nemu chara nyaut tanya maya interviu.

"Ngemujur juluk nya, SPA sedia ngatur kerejasama enggau semua serak komuniti nyengkaum NGO Melayu, China, Iban tauka bansa Dayak bukai.

"Kami ngembuan juluk nyadung penerang ke diguna kelebih agi ba atur ngerebut awak gawa dalam SPA," ku iya.

Abdul Halim mansutka jaku tu maya bejadi Licha 'OUTREACH' Tips dan Panduan Memasuki Perkhidmatan Awam di Dewan AKMAL pampang Sarawak, Jalai Matang ditu, kemari.

Iya nambah, licha ke diatur kemari nya ulih nyaup SPA ngelala lalu nyadung penerang ngagai orang ke enda ampit ningaka penerang ari ejensi nya ngelama ke udah.

"Engka sekeda nya enda ampit enggau ba program SPA ke udah. Nengah program Outreach, raban orang ke ditagit, ulih nerima penerang ari SPA," ku iya.

Ba kaul ke sama, iya madahka SPA deka ngatur sebengkah agi program outreach di Dewan Suarah Kota Samarahan kena 12 Julai 2014 tu, lalu semua raban orang ke ngembuan pengingin ngerebut awak gawa di ejensi perintah diperansang datai.

Program kemari diatur SPA nengah kerejasama Biro Pekara Pelajar PBB pampang Tupong, Ranting PBB Taman Yen Yen/Lee Ling enggau Sri Perkasa, Jalai Matang.

Bela datai Pemesai ari Opis Penyereakup enggau Integrasyen Bansa Pelilih Kuching Rose Jonathan Ragau, Chairman KRT Taman Lee Ling Mohamed Sa'et Amran, raban penyereta program enggau orang bukai.

Print Friendly

Seraya Ngiling Bidai Geramong bejalaika pengawa betemu enggau rayat di Kanowit

Posted: 28 Jun 2014 09:04 AM PDT

MENTERI Muda Dagang Temuai (Atur Pengawa enggau Produk) ke mega Menteri Muda Pemansang Tanah Datuk Gramong Juna tudah bejadika pengerami Ngiling Bidai ba tiga bengkah endur di Kanowit, empai lama ke udah.

Palan keterubah endar iya nya ba Balai Mayuhguna Nanga Lipus ditangkanka enggau ba Balai Mensia Mayuh Machan enggau Rumah Ron di Nanga Ngungun.

Nyempulang iya Kaban Parlimen Kanowit Datuk Aaron Ago Dagang, Sekreteri Politik Kepala Menteri Maurice Giri, DO Kanowit Noel Katis Nyabong enggau Pemesai Opis Penerang Pelilih Mit Kanowit, Wan Mohd Zuki Wan Ismail.

Berebak enggau pengereami nya, iya udah ngemujurka program betemu enggau rayat, nyuaka Projek Mit Pemansang Menua Pesisir (MRP) RM8,000 ngagai Serakup Indu Dayak Sarawak (SIDS) Pampang Nanga Lipus, bejadika lantai tile sereta ngungkupka MRP RM15,000 ngagai JKKK Rumah Ron.

Lebuh ke bejaku ba tiga bengkah pengerami nya, Gramong meransang rayat ngetanka penyerakup sereta begempung nempa pengelantang enggau pengelikun.

Iya ke mega Kaban Kunsil Nengeri (ADUN) Machan minta rayat nyeliahka pekara ke negatif sereta sensitif dalam pengidup sida.

"Buai ulah ke deka beserekang penemu enggau pangan diri tang kemujurka agenda perintah ti deka ngemajuka rayat nengah chara malutka diri ba mayuh bengkah bidang baka ekonomi, pelajar enggau mayuh macham agi.

"Intu genap bengkah pengerami enggau likun sereta kemeranka konsep penaluk 1Malaysia," ku iya.

Print Friendly

Seiku ini ditemu baru pengudah lelang ngelama dua hari

Posted: 28 Jun 2014 09:03 AM PDT

LUBOK ANTU: Seiku ini ke diriput lelang ba babas enda jauh ari Rumah Panjai Empelam, Lubok Antu kenyau ari 25 Jun tu tadi, udah ditemu baru kena Hari Lima tu tadi. 

Kepala PolisPellilih Mit Lubok Antu, DSP James Johnathan madah, ini ke beumur 80 taun nya mujur ditemu urung pukul 3.30 lemai Hari Lima ba babas enda jauh ari rumah panjai nya.

Ku James, ini nya pansut ari rumah panjai iya di Empelam, Lubok Antu laban ke deka ngiga buah maram urung pukul 9 pagi kena 25 Jun tu tadi.

"Taja pia ini nya lalu enda mulaika diri ke ti ngujungka sida sebilik lalu ngaga ripot ba Balai Polis ditu urung pukul 6.55 lemai kena 26 Jun tu tadi," ku iya.

Pengudah nerima ripot polis, seraban 10 iku polis ari Indu Opist PolisPelilih Mit Lubok Antu, tiga iku ukui penyidi polis enggau empat iku raban ari Opis Pengerara Api enggau Penyah Penusah udah ngiga ini nya ba babas ba kandang menua Empelam.

Operasyen ngiga sereta nyelamat nya mujur lebuh sida nemu iya ke nyau lepi dalam babas nya, ku James.

Print Friendly
We encourage commenting on our stories to give readers a chance to express their opinions; please refrain from vulgar language, insidious, seditious or slanderous remarks. While the comments here reflect the views of the readers, they are not necessarily that of Borneo Post Online. Borneo Post Online reserves the right not to publish or to remove comments that are offensive or volatile. Please read the Commenting Rules.

Ngiling Tikai enggau Ngiling Bidai

Posted: 28 Jun 2014 09:03 AM PDT

Dua bengkah pengawa ke bisi bida ba raban bansa Dayak 

Dikarang Rengenyan Labang //

PENGAWA Ngiling Tikai enggau Ngiling Bidai iya dua bengkah pengerami ke suah didinga diintu raban bansa Dayak lebih agi bansa Iban lalu ke diatu nyau bisi diintu opis-opis perintah, kompeni sereta Komiti Pemansang enggau Pengelikun Kampung (JKKK) mega bisi ngatur pengawa nya kelimpah ba rumah panjai dikena ngelai Pengerami Gawai Dayak ti diintu ninting 1 Jun tiap taun udah abis.

Taja pia tiap kali pengerami nutup Gawai, pekara bekaul enggau Ngiling Bidai enggau Ngiling Tikai tu selalu dipetalatka kitai Iban, laban bisi sekeda ngembuan penemu madahka dua bengkah jaku tauka pengawa nya pekara ti sebaka lalu sekeda madahka nya pengawa nya pekara ti bebida.

Kitai Iaban tu endang bisi adat, nitihka adat enggau main asal dua jaku enggau pengawa tu iya nya Ngiling Bidai enggau Ngiling Tikai tu pekara ti enda sebaka.

Pengawa Ngiling Bidai tu suah dikereja kitai enti udah tembu Gawai besai baka lebuh kitai bisi nirika kelingkang, mengap sereta diintu dalam timpuh dua ngagai tiga malam, udah tembu bidai ke dianchau ba Gawai besai nya deka digiling.

Tang Ngiling Tikai dikena nutup Gawai ti mit ke diintu enda lama baka Gawai Dayak, laban maya Gawai Dayak kitai ngerembai tauka nganchau tikai ba ruai, nya alai nya dikumbai Ngiling Tikai.

Tikai ke digiling nya digaga ari rutan, bemban tauka mayuh macham tikai ke bukai.

Tang bidai tu digaga ari tikai rutan ti dianyam beselat lambar enggau kulit tekalung tauka ribis tauka temeran (nitihka sebut sesebengkah menua). Temeran nya dibelah  nyadi lambar bidai ke dianyam beselat enggau rutan ti disebut dianyam tunggal.

Bekaul enggau dua jaku enggau pengawa tu, Utusan Borneo bisi ngerandau Jimbun Tawai ke udah kala nyadi Pengajar Nyulut Jaku Iban, lalu diatu iya gawa nyadi Penulung Pemesai Pemansik Sosial ba Majlis Adat Istiadat (MAIS), pasal Ngiling Bidai enggau Ngiling Tikai.

Nitihku penerang Jimbun, iya madahka dua jaku enggau pengawa nya kebendar iya bisi bida.

Enti tikai nya digiling reti iya Ngiling Tikai, lalu enti bidai ke digiling ba pengerami nya nya baru dikumbai Ngiling Bidai.

"Utai ke dikumbai ngiling bidai enggau ngiling tikai tu dua iti pengawa ti enda sebaka.

"Ngiling Bidai tu dirami dikena nutup gawai besai baka Gawai Kelingkang, Gawai Kenyalang enggau Gawai besai ke bukai, Gawai diintu  dua ngagai tiga malam lalu pengawa mengap mega bisi diatur, ba ujung Gawai nya dia bidai nya deka digiling.

"Ngiling Tikai tu diatur ba pengerami gawai ti mit baka Gawai Dayak, maya nya tikai ke digaga ari bemban enggau rutan sereta ke bukai dianchau, lalu tikai nya deka digiling nyadika tanda nutup pengerami lalu dikumbai Ngiling Tikai," ku iya.

Iya madahka bidai tauka idas nya dikena orang kelia mandung padi kena nyimpan padi sebedau disimpan dalam tibang, laban kelia nadai pelastik.

Nyadi maya Gawai dikumbai orang nganchau bidai laban iya besai ngambika lebuh dientum orang ke nimang pengap bidai nya enda pesuk laban rumah orang kelia begelegarka buluh, ku iya.

Nya alai orang ke ngatur pengerami Ngiling Bidai nya patut ngenukuka ke digiling nya endang bidai, lalu pia mega enti tikai ke deka digiling dikena nutup Gawai, nya tau dikumbai Ngiling Tikai, ngambika adat enggau main asal kitai Iban enda bebalut.

Timpuh tauka pengelama ngintu Gawai Dayak tauka kemaya pengawa Ngiling Tikai mega entara pekara ti suah didinga nyerumba pengerami Gawai Dayak.

Enti nitih, timpuh endur ngiling tikai Gawai Dayak enda patut kelalu lunggar enggai ke nadai agi ngembuan reti ngagai bansa kitai Dayak.

Diatu sekeda pengerami Ngiling Tikai bisi diatur ba bulan Oktober, Disember, Januari, nya nyau kelalu lunggar.

Pengawa Ngiling Bidai ke dikena ngelai Gawai Dayak udah abis, enti nitih anang ngelui ari sebulan.

Dalam taun 2012 suba, Menteri Pemansang Rama Tan Sri William Mawan Ikom maya bejadika pengerami Ngiling Tikai ba Rumah Matu Dingun, Sungai Sawa, Jalai Engkamop madahka mayuh bengkah isu bekaul enggau adat asal Iban patut dipejuraika nyengkaum timpuh tauka pengelama ngintu Gawai Dayak.

"Ba penemu iya, pengerami ngintu Gawai Dayak umbas iya diatur dalam timpuh sebulan aja.

"Gawai Dayak endang disambut kena 1 Jun ninting taun, lalu maya ke chukup engkeman endur ngatur pengerami Ngiling Tikai aruh ditetapka kena 30 Jun," ku Jimbun.

Nangkan nya, iya madah naka ke diatu, lalu bedau ditetapka ni pemanjai timpuh nyambut pengerami Gawai Dayak tauka kemaya awak pemadu patut endur ngatur pengerami Ngiling Tikai diatur.

Ari buah penemu Jimbun empu madahka, timpuh Gawai Dayak patut diintu dalam kandang sebulan lalu udah nya Pengerami Ngiling Tikai patut diatur sebedau tauka kena 30 Jun.

"Pekara sentang Pengawa Ngiling Tikai bisi disebut maya aum MAIS, lalu jam endur ngintu pengerami Ngiling Bidai disadang digaga 30 Jun, tang pekara tu bedau nyentuk bendar," ku iya.

Print Friendly