» »Unlabelled » UiTM ngemeratka peranak asal menua Sarawak BorneoPost Online | Borneo , Malaysia, Sarawak Daily News » Berita Iban - New 2 Borneo

05:11:00

UiTM ngemeratka peranak asal menua Sarawak BorneoPost Online | Borneo , Malaysia, Sarawak Daily News » Berita Iban - New 2 Borneo

UiTM ngemeratka peranak asal menua Sarawak

Posted: 07 Jun 2014 09:15 AM PDT

Dikarang Rengenyan Labang //

Anang enda ngena awak ti disediaka nya ngenuku sereta ngerejista diri nampung pelajar kita

KOTA SAMARAHAN: Universiti Teknologi Mara  (UiTM) Sarawak meri awak 90 peratus ngagai peranak Bumiputera nengeri tu nampung pelajar ba institut pelajar tinggi (IPT) nya.

Rektor UiTM (Sarawak) Prof. Datuk Dr. Jamil Hamali madah, peranak Bumiputera nengeri tu patut ngena awak ti disediaka, kelebih agi ngagai sida ti diterima nampung pelajar di UiTM ngambika ngerejista diri.

"Kami (UiTM Sarawak) ngemeratka agi peranak nengeri, 90 peratus nembiak ke nampung pelajar ditu ari Sarawak lalu urung 10 peratus peluang nya diberi kami ngagai nembiak ari Semenanjung Malaysia enggau Sabah.

"Nya alai, ngagai nembiak ke diterima nampung pelajar ba UiTM ke bedau ngenuku sereta ngerejista diri nampung pelajar ba UiTM Sarawak, enti sema kita bisi penanggul patut madah ngagai kami.

"Ngagai sida ke bedau ngerejista diri enti sema  ketegal penanggul belanja, ambika banding ari Limbang tauka Lawas patut madah ngagai kami, awakka kami ulih ngaga kerejasama enggau YB sitak ti bekaul tauka pemesai Opis Kaunsil Pelilih Menua berundingka chara dikena ngambika sida ulih ngerejista diri sereta nampung pelajar ditu (UiTM)," ku iya.

Jamil mansutka pekara tu lebuh dikerandau pengarang berita, pengudah bejadika pengerami Minggu Destini Siswa (MDS) Sesi Jun-Nov 2014 tikas Pra-Diploma enggau Diploma, ti diatur ba Dewan Jubli, UiTM ditu kemari.

Lebuh dipinta ngenang sentang penyampau nembiak ke diambi belajar ungkup Sesi Jun – Nov 2014, iya madah, Sesi sekali tu ke pemadu mayuh ngambi nembiak ti mega tebal agi meri awak ngagai peranak menua Sarawak.

"Enti nitihka statistik, kami bisi nyendia sereta meri awak ngagai 2,500 iku nembiak. Ari penyampau nya, ke udah ngerejista diri ba kolej bisi 1,919 iku nembiak lalu dipelabaka urung 200 nyentuk ke 300 iku benung ngerejista diri diatu.

"Sida ke bedau ngerejista diri nya dipelabaka engka bedau nerima surat sereta jauh menua baka ari Semanjung Malaysia enggau Sabah enda ulih ngerejista diatu diatu laban nadai tiket bilun," ku iya.

Lebuh ti bejaku ba pengerami nya, Jamil ngelalau nembiak baru ngambika ngembuan transformasyen diri ti lebih ngemerat deka ngubah pengidup diri enggau menua jemah ila.

Nembiak, kelebih agi bala nembiak UiTM patut meri terima kasih ngagai perintah laban ke ulih nampung pelajar ba UiTM sereta bisi sabsidi ari perintah, ku iya.

"Anang ketegal belajar bisi nerima subsidi kita nembiak lalu deka ngembuan ulah 3L iya nya 'Lalai, Lupa, Leka' baka enggai ke librari enggai nurun kuliah, enda ingat belajar, enda ingat ke apai indai sereta ke bukai.

Bejaku baru iya madahka, penyulut nembiak ukai semina ditukuka nengah akademik aja tang mega ko-kurikulum.

"Penyulut dalam ko-kurikulum nya seiti bonus kelebih agi ba markit kereja, kelimpah ari nyulut dalam akademik," ku iya.

Ba pengerami nya, Jamil ngemata nembiak baru macha Ikrar kelai bebasa sereta nitihka atur ti udah ditetapka UiTM.

Sama bela bisi  ngulu pengerami nya, Sapit Rektor ba Bagi Hal Ehwal Pelajar Prof. Madya Wan Akil Tuanku Abdullah & Prof. Madya Dr. Rosita Suhaimi enggau bala bukai.

Print Friendly

Penimpang nyadika peransang Agus deka nyulut ba pelajar

Posted: 07 Jun 2014 09:14 AM PDT

KOTA SAMARAHAN: Taja pan nyelai pendiau ari nembiak bukai, Argus Dusit, 18, seiku anak Iban ngembuan juluk ati ti besai deka nyulut ba pelajar  tinggi.

Argus seiku orang angkung ke udah mujur diterima nampung pelajar ba Universiti Teknologi Mara (UiTM) Sarawak, ngambi Diploma Sains ngelama dua taun setengah.

"Taja pan aku bisi penimpang tang aku sebaka juluk ati enggau nembiak bukai tauka deka nyulut dalam pelajar sereta mujur ba pengidup.

"Penimpang aku ti angkung tu ukai nyadi ketegal aku enda ulih mujur, tang tu nyadika peransang ngagai aku empu. Aku ngarapka diri sebaka enggau orang bukai teulihka CGPA 3.5 ke atas.

"Aku arapka ba UiTM tu aku ulih nempa pemerani diri laban sebedau tu aku seiku orang ti malu tauka nadai pemerani," ku iya ti madahka juluk ati deka nyadi Dynamic Position Operator.

Iya ti asal ari Genturung Pendiau Tudan, Miri bisi lima iku diri menyadi lalu iya anak ti pemadu tuai ke sida menyadi. Apai iya gawa nyadi welder lalu indai iya semina nyaga ruang bilik.

Argus diberi peluang nguluka nembiak baru UiTM Sesi Jun – Nov 2014 macha Ikrar Pelajar, ti mega nyadika peransang sereta meri pemerani ngagai iya empu.

Kelimpah ari nya Argus madahka diri gaga ati ulih masuk UiTM ditambah mega semua bala nembiak bukai ulih nerima penimpang iya.

Ku iya, Minggu Distini Siswa (MDS) meri peluang ngagai iya bekelala sereta ngerapitka kaul enggau nembiak bukai, lalu ulih ngubah iya ngambika berani agi.

"Sekumbang MDS aku enda malu ngaulka diri enggau orang bukai. Sida mega nadai beduan  tauka nyeliahka aku," ku Argus.

Argus entara 1,903 iku nembiak ti udah ngerejista diri nampung pelajar ba UiTM Sesi Jun – Nov 2014 kemari.

Print Friendly

Manyin: Pengeran TERAS deka tama BN mar dikemujurka

Posted: 07 Jun 2014 09:13 AM PDT

KUCHING: Menteri Pemansang Infrastruktur enggau Penyambung Dato Sri Michael Manyin pechaya pengeran Parti Tenaga Rakyat Sarawak (TERAS) nyereta serakup Barisan Nasional (BN) Sarawak mar deka dikemujurka.

Ku iya, BN ngembuan sebengkah konstitusyen ti netapka parti baru semina ulih diterima dalam serakup enti bisi pemendar ari semua parti.

"Enti sebuah parti mantah pinta TERAS masuk dalam serakup BN nengeri, parti baru nya endang enda ulih diterima masuk.

"Tang taja pia, semua pemutus mengkang dilempaika ba Menteri Besai enggau Kepala Menteri,' ku iya.

Iya mansutka jaku tu lebuh dikerandau pemberita pengudah bejadi Gempuru Tiga Taun Sekali ke 7 Gerempung Dayak Bidayuh Menua (DBNA) ditu, kemari.

Bedau lama tu tadi, ketuai ari SUPP enggau SPDP bisi mansutka jaku madahka sida enggai nerima TERAS masuk dalam serakup BN.

Kededua parti nya madahka penuduk ke dibai pengari rayat (YB) ti nyereta TERAS mengkang ungkup sida lalu patut dipulai ngagai parti.

Ngenang sentang gaya politik Sarawak diatu, Manyin ke mega ADUN Tebedu  pechaya penyarut ke ditapi Parti Sa'ati Rakyat Sarawak (SUPP) enggau Parti Progresif Demokratik Sarawak (SPDP) deka ngeruga penegap Barisan Nasional (BN) nengeri.

Kelimpah ari nya, iya mega pechaya laya entara raban ketuai ari kededua parti nya mar deka diputar Kepala Menteri enggau Menteri Besai.

Print Friendly

Adenan mujur bejalaika pengawa sekumbang 100 hari nyadi KM Sarawak, ku Dr. Jamil Hamali

Posted: 07 Jun 2014 09:13 AM PDT

KOTA SAMARAHAN: Tan Sri Datuk Amar Adenan Satem ti genap 100 hari nyadi Kepala Menteri Sarawak nerima puji berindik ari pengulih iya bejalaika tanggungpengawa ngiring menua sereta ngemeratka pemansang nengeri.

Rektor Universiti Teknologi Mara (UiTM) Sarawak Prof. Datuk Dr. Jamil Hamali madah, Adenan mujur nampung pemansang ke dipejalaika Tun Pehin Sri Abdul Taib Mahmud maya ti nyadi Kepala Menteri sebedau tu.

Lebuh dikerandau ba sebengkah pengerami sereta dipinta mantaika langgur penemu bekaul enggau 100 hari Adenan nyadi Kepala Menteri, iya madahka bisi pekara baru ke ulih diperati sereta dipeda dalam timpuh nya.

Nitihku iya, Adenan  mega sama ngemeratka pemansang nengeri kelebih agi bekaul enggau SCORE sereta raban nembiak ti nyadi raban penampung jemah ila.

"Dalam timpuh 100 hari iya (Adenan) udah bejalaika tanggungpengawa nyadi Kepala Menteri enggau pemadu manah.

"Iya (Adenan) nemu nama pekara ke nyadi sereta ti patut dikemerat, baka pemansang Sarawak ba SCORE, ngemeratka raban nembiak ti nyadi penampung menua Sarawak jemah ila, lalu runding iya enda mudah dikeruga tauka tekuing ulih akal raban penyakal.

"Ambika banding, apin lama pemesai khas Kepala Menteri bisi betemu enggau aku lalu madahka Kepala Menteri deka betemu  sereta berandau enggau semua nembiak institut pelajar tinggi (IPT)," ku iya seraya madahka nya pekara ti amat manah, baka ke dikereja Tun maya ti mengkang nyadi Kepala Menteri suba.

Dalam surat kabar kemari, Kepala Menteri Tan Sri Datuk Amar Adenan Satem madahka diri ukai orang ke patut becherita pasal penyulut tauka pemujur sekumbang nyadi Kepala Menteri.

Iya madahka, rayat meh ti pemadu engkeman manding seraya madah, 100 hari mangku pengawa nya timpuh ti pandak endur ngenukuka penyulut iring seseiku ketuai.

"Pengudah aku dichirika, aku meda polisi perintah sebedau tu amat manah sereta mansang.

"Aku engka bisi penemu tauka runding kediri tang nganti dulu laban ti pemadu beguna iya nya nampung polisi ti benung dipejalaika diatu.

Print Friendly

KRT Kpg Muhibbah enggau KRT Debak Laut ngerapitka kaul nengah program lumba enggau main

Posted: 07 Jun 2014 09:12 AM PDT

SRI AMAN: Komiti Genturung Pendiau (KRT) Zon Satu Kampung Muhibbah, ba Sri Aman udah milih chara ke diri empu dikena ngerapitka kaul begulai enggau KRT ari pelilih menua bukai.

Pekara tu nyengala dipeda lebuh KRT Zon Satu Kampung Muhibbah, Sri Aman ngatur Program Lumba enggau Main Rayat ke dipasuk kaban  KRT Debak Laut ari kandang menua Betong ditu apin lama ke udah.

Chairperson KRT Zon Satu Kampung Muhibbah, Latipah Mantali madah, kira 30 iku kaban KRT Debak Laut, Betong bisi nyereta aktiviti nya.

Tuju iya dikena ngerapitka agi kaul entara kaban ari dua bengkah KRT dalam pegai menua Sri Aman enggau Betong, ku iya.

"Nengah aktiviti ke bisi diatur bansa nya nyadi kitai ngarapka dua bengkah kaban ari dua KRT tu tau bulih penemu dikena ngemansangka KRT diri empu," ku iya madah ngagai Borneo, ditu ensana.

Bisi lapan iti aktiviti diatur beserimbai enggau program lumba enggau main nya baka main Bowling Nyiur, Nikaukam Bol Ping Pong, Nginti Botol, Nyepu gelembung, Ngirup Coca Cola, Makai Buah Epul, Nganyam Senupat enggau Ngisi Ai Dalam Botol.

Bisi 60 iku rayat ari KRT Zon Satu Kampung Muhibbah enggau 30 iku kaban KRT Debak Laut bisi ngambi bagi dalam aktiviti-aktiviti ke bisi dipekitka nyerumba program nya.

Sama bisi datai ba pengerami tu iya nya Penulung Pemesai Penyerakup Menua Sri Aman, Mohd Firdaus, Penulung Pemesai Penyerakup Menua Betong, Encik Nawapipi, Chairman KRT Debak Laut, Suhaimi Mohd denggau chairman pengatur program, Awang Sulaiman Awang Ani.

Print Friendly

Jaku petenah penyakal meransang ketuai BN bebendar gawa, ku Harden

Posted: 07 Jun 2014 09:12 AM PDT

SRI AMAN: Perintah Barisan Nasional (BN) deka bebendar gawa dikena nentuka rayat ba nengeri tu majak ngasaika pemansang, ku Menteri Muda Pemansang Menua Pesisir enggau Pengawa Berumah, Datuk Francis Harden Hollis.

Ku iya, asil penerit kerejasama entara rayat enggau perintah, tentu nadai penanggul endur perintah bejalaika pemansang ba negeri tu lalu rayat patut angkun entudi pejalai perintah ke diatu.

"Kitai endang ngaku, genap pemansang ke dipejalai ba negeri tu datai ari perintah Barisan Nasional (BN) lalu ukai diberi raban penyakal.

"Iya ke ditemu kitai, bedau kala raban penyakal meri pemansang ngagai rayat kitai di nengeri  tu lalu iya bisi dipeda, genap pemansang baka jalai raya, perengka letrik, ai beresi enggau pemansang bukai semua nya datai ari perintah BN," ku iya.

Iya ti mega nyadi Kaban Kunsil Nengeri (ADUN) Simanggang ti mega nyai Chairman Parti Se'ati Rayat Sarawak (SUPP) Pampang Simanggang madah munyi nya rambau bejadi Program Hari Gawai 2014 diatur SUPP Pampang Simanggang bepalan ba Rumah Sherit, Titikah Undop, Sri Aman malam ensana.

Ku iya, rayat ba nengeri tu patut nulak semua polisi ke dibantaika raban penyakal laban polisi nya endang bula magang sereta deka dikena nguingka penemu rayat awakka nyukung sida.

"Endang udah nyadi pengawa raban penyakal, genap kali musin pengawa bepilih, sida tu deka datai sempama baka kulat tumbuh udah ujang lalu sida deka mantaika mayuh cherita dikena bejai perintah.

"Ulah ke bansa tu enda patut dititih, laban sida semina deka mambarka penyerakup enggau pengelantang rayat. Penatai sida ke ngagai kandang menua kitai kitu laban deka bejai perintah ke diatu, tambah mega sida ngembuan juluk deka ngerampas kuasa ari perintah," ku iya.

Nya alai, rayat patut nulak semua jaku petenah ke dibai raban penyakal ngagai perintah BN.

Ku iya, semua jaku penetah ke dibantaika raban penyakal ngagai perintah BN ngelama tu kebendar iya enda mudah ngelemika semengat ketuai BN tang jaku penetah nya nyau majak meransang ketuai BN terus bebendar agi ungkup rayat.

Harden madah, ulah raban penyakal ke nusi jaku petenah bejai BN nadai mai asil lalu masau jam aja laban sida (penyakal) enda ulih mai ubah enggau pemansang ngagai rayat," ku iya.

Nya alai, angkat meh semua kitai ari tinduk, badu bemimpi agi, pemansang ke deka disepi enda ulih datai ngenyit tang begunaka sukung ari semua kita," tandu iya.

Sama bisi datai ba pengerami nya, Ketuai Raban Nembiak SUPP N.27 Simanggang, Patrick Micheal Malajin, Sapit Chairman Opis Kunsil Pelilih Menua Sri Aman (MDSA), Kunsilor Sawing Sumar, bala tuai raban bansa sereta bala kaban Komiti Pemansang enggau Pengelikun Kampung (JKKK) ke bukai.

Ba pengerami nya, Harden mega bisi nyadaka agih belanja kira RM 6,000 ngagai JKKK lalu RM 5,000 ngagai RM 5,000 Gerempung Indu. Berebak enggau pengerami nya, Harden bisi bejadi  kipas ke diberi ngagai rumah panjai nya.

Print Friendly