» »Unlabelled » Kepala Menteri pemungkal munaska pengawa makai suap BorneoPost Online | Borneo , Malaysia, Sarawak Daily News » Berita Iban - New 2 Borneo

05:04:00

Kepala Menteri pemungkal munaska pengawa makai suap BorneoPost Online | Borneo , Malaysia, Sarawak Daily News » Berita Iban - New 2 Borneo

Kepala Menteri pemungkal munaska pengawa makai suap

Posted: 26 Jun 2014 09:06 AM PDT

Iya mega nagang sida sebilik malutka diri enggau pekara nya

Dikarang Jacqueline R. David //

KUCHING: Enti deka berubah, ubah dulu ari atas lalu dititih sida dibaruh.

Baka nya mega enggau pengawa makai suap, begunaka sebengkah ubah ke patut belabuh ari atas lalu ditangkan enggau orang ke gawa ari baruh.

Ketuai Opis Makai Suap (SPRM) Tan Sri Abu Kassim Mohamed madahka opis nya berasai lantang ati laban maya ti betemu enggau Kepala Menteri Sarawak, Tan Sri Datuk Amar Adenan Satem kemari, iya setuju enggau ulah makai suap patut diseliah bala ketuai dulu, ke alai iya (Adenan) deka nyadi chunto ke manah, bini anak iya enda tau enggau minta lisin ke bisi bekaul enggau tanah, kayu tauka pekara bukai.

"Maya kami betemu enggau Kepala Menteri, iya (Adenan) bisi mantaika sekeda pekara ti dipelaba ulih diputar begulai enggau SPRM.

"Iya mega madahka diri setuju enggau perambu SPRM sereta nguji nyeliah sida sebilik ari bisi kaul enggau peminta lisin tanah tauka palan berimba kayu.

"Aku berasai temegah ati enggau polisi Kepala Menteri ke enda ngemendarka sida sebilik tauka kaban belayan, bini anak bisi kaul enggau pekara nya," pia ku Abu Kassim seraya madahka nya timbal ke manah amat ari Kepala Menteri.

Iya madah pekara ke positif ti dipejalaika SPRM diatu iya nya betanyaka penemu ari perintah dulu sereta ngaul komuniti lalu mendingka penemu ari komuniti.

"Sebengkah agi pekara ke patut dikemerat, iya nya tebal agi sida tu bekeringka nama pemesai ari opis perintah, nama kaban politik tauka orang tengah laban ku sida iya, raban nya bisi kaul enggau nama orang besai sereta ulih ngemuntangka pengawa ke dikereja tauka peminta sida.

"Ukai semina ngena nama orang besai aja, sida tu beambi ulih nyuap ngena duit lebuh ti ngatur peminta sida.

"Enti sema bisi pekara ke baka tu nyadi, ripot ngagai SPRM, laban nya penyalah tauka makai suap," ku Abu Kassim.

Iya madah munyi nya ba aum enggau media pengudah berandau sereta merarau enggau ketuai komuniti China Borneo Convention Centre Kuching (BCCK) ditu, kemari.

Ba pengawa bejualka minyak diesel, iya madah, pengawa ngelalai, enchuri tauka nyual diesel sabsidi ari perintah udah ngerugika perintah bebiliun ringgit. Berindik ari nya SPRM minta perintah mansik atur meri sabsidi nya baru.

Ngenang sentang kerejasama enggau komuniti China, iya madahka SPRM minta timpuh meri penerang ngagai mensia mayuh sereta komuniti China ke tebal agi ngereja pengawa ngambika SPRM ulih nyadi ejensi perintah ti ulih dikearapka.

Sebedau nya, kaban SPRM Tan Sri Datuk Amar Hamid Bugo madah maya betemu enggau Kepala Menteri, iya ukai semina nyukung pengawa munaska makai suap aja tang  mega ngelalau ba pekara bukai, iya nya opis kandang menua patut terit agi bejalaika pengawa sida kelebih agi kandang menua ke endur berimbaka kampung enggau palan enchuri pasir.

Presiden Gerempung Ketuai Komuniti Cina sitak Kuching, Temenggung Lu Kim Yong madahka randau ke diatur SPRM enggau bal ketuai komuniti China nya sebengkah pekara ke manah.

Ku iya, ngelama tu komunti China kurang endar penemu ba pengawa ti dipejalaika SPRM.

"Enti bisi nemu pan, sida enggai ngiruhka diri. Bisi sekeda ke kala ngaul SPRM, tang laban peneleba ke enda entu manah, sida iya enggai ngiruhka diri agi.

"Taja pia, tu sebengkah atur ke manah laban SPRM udah nyanggup deka meri penerang ke silik agi ngagai komuniti China sereta mega bansa bukai. SPRMmega ngembuan juluk deka nyadi opis ke semak enggau rayat," ku Lu.

Sama bisi nguluka aum media nya kemari, Direktor SPRM Sarawak Dato Bahri Mohamad Zin.

Print Friendly

Adenan: Nemu penatai diri kelai talukka adat enggau bansa

Posted: 26 Jun 2014 09:05 AM PDT

BAU: Orang ke ingatka penatai diri empu, deka dipebasa laban sida ngelala bansa enggau adat komuniti diri, ke alai Kepala Menteri Sarawak, Tan Sri Adenan Satem besemaka baka komuniti Bidayuh, di serata dunya tetap orang Bidayuh ti seruran ingatka adat diri.

"Enda ngira bansa, Bidayuh tauka pupu raban bansa bukai, orang ke tegap enggau adat diri, tetap ingatka penatai diri laban adat nya meh ke ngelaika bansa kitai," pia ku Adenan lebuh bejaku ba pengerami Hari Gawai Dayak Karnival Redeems ke-9 ti berambaika leka jaku rambai 'Malaysia Pelbagai Budaya' ba Palan Redeems di Genturung Pendiau Apar, Bau ditu, kena malam hari Dua tu tadi.

Kelimpah ari nya, iya mega madahka raban bansa Bidayuh udah mayuh udah ngembuan orang ke bisi pelajar ke alai bisi sekeda nya mangku pengawa nyadi lutur, luyar, injinir, professor sereta sekeda pangku pengawa bukai.

Adenan mega madahka Tuai Megai Menua (TYT) Tun Abdul Taib Mahmud, seiku orang ke mayuh udah ngajar iya ngaul komuniti di menua tu.

"Aku deka nitihka singkang orang ke dulu agi ari aku (Taib). Dalam taun 1960-an lebuh Taib mangku pengawa nyadi menteri di menua tu, taun 70-an nyadi Menteri di tikas Perintah Besai, 80-an nyadi Kepala Menteri, iya (Taib) seruran ngaul komuniti Bidayuh lalu ngasaika komuniti to baka sida sebilik.

"Nyauka setengah abad, Taib tetap ngaul komuniti Bidayuh. Nya alai, tu palan ke manah meri basa ngagai Taib ke udah nyadi bakih sereta ngaul komuniti Bidayuh. Pelaba aku, tuai pemesai Bidayuh bukai pan setuju enggau aku.

"Aku pan deka ngaul komuiti Bidayuh. Enti kita ulih nerima aku nitihka singkang orang ke dulu agi ari aku, aku gaga endar ati," ku Adenan.

Sebedau nya, Menteri Muda Pengawa Pemansang Industri (Pemansang Industri Bekebun Mit) ke mega Presiden Palan Redeem, Datuk Peter Nansian Ngusie mantaika ke pengaga ati iya laban pengerami nya sama bela digulu Tuai Menua Tuan (TYT) Tun Abdul Taib Mahmud, enggau Sapit Menteri Besai Tan Sri Muhyiddin Yassin.

Print Friendly

DBKU nanggung pengerugi RM200,000 ketegal Vandalisme

Posted: 26 Jun 2014 09:03 AM PDT

KUCHING: Dewan Bandaraya Kuching Utara (DBKU) ngeluarka belanja lebih ari RM200,000 dikena nganti besi penutup parit, pagar besi sereta perengkaguna mensia mayuh ti dirusakka orang.

Datuk Bandar DBKU, Datuk Abang Abdul Wahap Abang Julai madah tebal agi perengkaguna mensia mayuh ti diganti nya di gaga ari besi keluli ti chukup berega enti dijual.

"Vandalisme sereta penchuri perengkaguna mensia mayuh udah nempa mayuh penanggul berindik ari ulah nadai jai nya kami (DBKU) ngeluarka belanja lebih ari RM200,000 taun nyin kemari, dikena nganti baru.

"Taja pia, nitihka ripot DBKU naka Jun taun tu penyampau kes nya bisi nurun lalu aku ngarapka ulih manggai tikas 'Sifar Vandalisme' jemah ila," ku iya madahka ngagai The Borneo Post, kemari.

Iya arap endar ati  mensia mayuh kemaya hari tu mereti sereta chakah agi malutka diri dalam program komuniti ti diatur kena ngiri penemu ba pengawa nyaga sereta sayauka reta ti diempu semua.

Kelimpah ari nya, DBKU mega melanjaka duit dikena nganti sereta ngemanahka baru lampu di kandang Taman Reservoir enggau Taman Muzium, papan nama sereta ke bukai di kandang endur ke di pegai DBKU.

"DBKU ti nyadi opis ke bekuasa ditu megai tanggungpengawa nentuka semua nya manah lalu ulih dikena raban bansa lalu berebak enggau tu mega kami enggau naka ulih nukar perengkaguna mensia mayuh ti udah dirusak nya.

"Dikena nyeliahka ari dichuri, DBKU deka nganti penutup parit ngena kereban ti enda berega ngambika orang  nadai ati agi deka enchuri nya," ku iya.

Iya madahka, kandang menau di Samariang enggau Genturung Pendiau Gita suah endur penusag vandalisme nya nyadi.

Print Friendly

Kemujurka juluk 1 Malaysia nengah pengawa ngintu pengerami

Posted: 26 Jun 2014 09:02 AM PDT

SEBUYAU: Tetiap bengkah pengerami ti diintu semua pupu bansa di menua tu ulih nyadika pelasar dikena ngemujurka juluk 1 Malaysia baka ti diperansang Menteri Besai, pia ku Menteri Pemansang Orang Indu, Ruang Bilik enggau Raban Bansa Datuk Rohani Abdul Karim.

Nitihku iya, endang patut tiap bengkah pengerami diintu begulai enda ngira sekalika di Sarawak, Sabah tauka di Semenanjung Malaysia.

"Kitai ngabang ngagai pangan diri, kaban belayan, orang sepiak rumah tauka bilik kitai enda ngira peninggi pangkat enggau jalai pengarap," ku iya ba pengerami Ngiling Tikai ti diatur ba Balai Mensia Mayuh Genturung Pendiau Sungai Lumut, Sebangan, Sebuyau apin lama ke udah.

Rohani ke mega Kaban Parlimen Batang Lupar madahka pengawa ngabang ngagai pangan diri sebengkah ari adat tauka penyelai ti patut dikemeran belama ngambika semua rayat ulih idup dalam pemaik enggau pengelantang.

"Penyerakup rayat pupu bansa beguna amat ba kitai ngambika terus maju. Baka ke ditemu semua, Sarawak diuan mayuh bengkah pupu bansa.

"Semua bansa diberi peluang ti sama lalu pekara ti dikearapka aku iya nya penyerakup ke diasaika kitai seharitu ukai datai tekala nya sereta patut ditanka.

"Nya alai, penyereta ari opis , ejensi perintah enggau gerempung ukai dikuasa perintah (NGO) ti bepengelandik ngatur atur pengawa ti ngemeratka penyerakup beguna amat, ngambika penyerakup menua ulih ditan sereta ditegapka agi," ku iya.

Ba pengerami nya Rohani nyuaka geran perintah ke sama bela penyampau RM5,000 ngagai 10 buah Komiti Pemansang enggau Pengelikun Genturung Pendiau (JKKK) di sebuayu sereta Genturung Pendiau Sungai Lumut.

Bela bisi ngulu pengerami nya, Sapit Direktor KASTAM Sarawak Abdul Karim Wahab, Kaunsilor Asli Yahya, Pengulu Merum Babu, Pengulu Kendawang Ruik, Pengulu Hamdan Esamail sereta Tuai Rumah Genturung Pendiau Sungai Lumut, Tuai Rumah Nillie Ranggu.

Print Friendly

Peretika dedalam polisi ti ditukuka perintah,ku Abg Johari

Posted: 26 Jun 2014 09:02 AM PDT

KOTA SAMARAHAN: Tiap bengkah polisi ti ditukuka perintah patut diperetika enggau dalam sereta diambi ari penerang ke amat  lalu ukai ari penerang ke sengapa ditempa, Ku Menteri Dagang Temuai Datuk Amar Abang Johari Tun Abang Openg.

"Polisi ke dituku perintah tebal agi dikena nentuka servis enggau produk perintah disedia enggau engkeman lalu nyadi tanggungpengawa kitai ngerembai sereta ngemeran polisi nya.

"Peretika enggau dalam tiap bengkah polisi ke dituku ari penerang ke amat lalu ukai ari penerang ke sengapa ditempa.

"Pekara tu chukup berat ngambika kitai enda nyadi sebagi ari raban orang ke nadai mai penguntung ngagai ejensi, nengeri enggau menua,'ku iya.

Iya mansutka jaku tu ba pengerami 'Majlis Anugerah Gemilang UNIMAS (MAGU) 2014 ke diatur di DeTAR PUTRA ditu, kemari.

Berindik enggau nya, Abang Johari ke mega Menteri Pengawa Berumah ngansak raban orang gawa UNIMAS majak nyikap diri enggau penau sereta pengelandik ke lebih agi ba atur dunya ke nadai besekat diatu.

Ku iya nambah,  kitai semua patut nemu polisi perintah ke baru lalu majak nambah penau diri ke tau dikena maya kitai ngereja pengawa.

"Pekara tu berat ngambika kitai semua ulih majak mansang ke mua setipak enggau pinta servis perintah enggau pinta palan pelajar tinggi,'ku iya.

Dulu agi ari nya, Mandal Canselor Prof Dato Dr Mohamad Kadim Suaidi ba jaku pengelalu madah, MAGU 2014 meri basa ngagai 158 iku orang gawa universiti nya ke nerima Anugerah Perkhidmatan Cemerlang (APC).

Ku iya, gelar nya diberi ngagai orang gawa ti udah nyapai pemanah ikas gawa ngelui ari 85 peratus ungkup taun 2013 lalu nyaup nyapai tagit ti ditetapka.

Bela datai Sekretari Perintah Besai Datuk Md Yahaya Basimin, Sapit Mandal Canselor (Akedemik & Entarabansa) Prof Dr Fatimah Abang, Sapit Mandal Canselor (Pekara Pelajar & Alumni) Prof mohd Fadzil Abdul Rahman enggau orang bukai.

Print Friendly

Komponen parti BN meseti bekempit enggau pangan diri

Posted: 26 Jun 2014 09:02 AM PDT

Awakka penyakal enda ngeruga rayat di menua pesisir

Dikarang Judan Bungap //

SONG: Komponen parti Barisan Nasional (BN) meseti bekempit enggau pangan diri dikena nyeliah parti penyakal beambi ulih ari pengelemi ketegal enggai beserakup enggau pangan diri.

Sekretari Politik Kepala Menteri Tengku Geruna madah, diatu parti penyakal deka ngerembaika penemu sida nyentuk ke ngagai menua pesisir lebih agi deka malut runding rayat rumah panjai.

"Kitai ba menua pesisir baka ba Kunsil Nengeri Katibas taja ngembuan parti ke enda sama tang bela ari baruh BN magang enda ulih enda ngadang penatai penyakal ke deka ngerembaika penemu politik sida ngagai menua pesisir.

"Pekara tu nandaka penyerakup sereta kerejasama enggau pangan diri lalu bela ngeringka parti BN magang taja enda sama parti," pia ku iya madah.

Ku iya, parti penyakal ke endang ukai datai ari menua tu empu semampai nginau awak lalu nyidi pengelemi BN ngambika ulih datai ngeruga penemu rayat ba menua pesisir bela ngenggaika pegai perintah BN.

Iya mantaika jaku tu maya bejadika Program Perintah Begulai enggau Rayat ba Rumah Kujau, Ulu Takan, Katibas, Song kena 21 June tu tadi.

Mensia mayuh, kira bisi 300 iku, ke bisi datai ngulu program sehari nya seraya mendingka licha ari ejensi opis perintah Kapit baka ari Opis Pengawa Dagang Dalam Nengeri, Koperasi enggau Pekara Bebeli Barang (KPDNKK), Bomba, Opis Pengintu Pengelantang Pendiau Mensia Mayuh, Opis Pengerijister Bansa (JPN), Opis Pengintu Pengelikun Sungai (LSS), Kemas enggau Polis.

Kelimpah ari nya, mensia mayuh mega diajar chara ngena perengka pengerara api ari raban Bomba.

Nambahka nya, Tengku ti mega chairman komiti pengerami, ngelalau rayat ba Katibas semampai nyukung pegai Kaban Kunsil Nengeri (ADUN) Katibas Datuk Ambrose Blikau enggau Kaban Parlimen Kapit Datuk Alexander Nanta Linggi ngambika ulih ngasaika pemansang belama.

"Kitai udah meda kenyau BN megai menua tu, mayuh bengkah program pemansang udah ditumbuhka.

"Ambika banding baka projek jalai ari Sibu ke Kapit diatu benung digaga kelimpah bantu bukai ke diungkup ngagai orang rumah panjai nyengkaum skim getah, lada lalu ke pemadu guna iya nya program nyukat kelinggi tanah NCR," ku iya madahka baru.

Ku Tengku, rayat ba menua nya patut berasai temegah ati laban dipegai Alexander ke dipadu nyadi Sapit Menteri Pemansang Menua Pesisir enggau Kandang Menua ti ngemuntangka agi program pemansang ba menua nya.

Perintah mega ku iya, enda sanggu numbuhka pemansang ba menua pesisir laban pemujur BN megai menua tu bepun ari sukung rayat ba menua pesisir.

"Berindik ari nya, rayat anang pambar ari pangan diri ngambika semua pelin pemansang perintah ulih diatur enggau serurun.

"Anang kepapas laban semua nya nadai mai penguntung pungka nejuka penanggul bukai datai nuntung," pia ku iya.

Tengku mega maya tu bisi nyuaka pemeri RM1,500 enggau tiga iti perengka pengerara api ngagai Komiti Pengelikun Genturung Pendiau (JKKK) Rumah Kujau.

Print Friendly