» »Unlabelled » Penegap institusyen ruang bilik patut dikemerat BorneoPost Online | Borneo , Malaysia, Sarawak Daily News » Berita Iban - New 2 Borneo

05:16:00

Penegap institusyen ruang bilik patut dikemerat BorneoPost Online | Borneo , Malaysia, Sarawak Daily News » Berita Iban - New 2 Borneo

Penegap institusyen ruang bilik patut dikemerat

Posted: 22 Jun 2014 09:05 AM PDT

Apai ti nyadi ketuai ngempu tanggungpengawa nempa penuku, penegap sesebengkah komuniti

Dikarang Chris Bishop //

KUCHING: Komuniti ke manah ayan asil ari penegap institusyen ruang bilik lalu ketegal nya raban apai ke nyadi ketuai patut ngemerat pemaik ruang bilik diri.Menteri Dagang Temuai Datuk Amar Abang Johari Tun Abang Openg madah, enti raban apai enda bejalaika tanggungpengawa sida niti­hka patut, suah agi institusyen ruang bilik deka pechah.

"Ba atur pemansang menua enggau komuniti, raban apai megai tanggungpengawa be­sai begulai enggau indai.

"Apai nyendiaka belanja tauka utai bukai ke diguna ba tiap ruang bilik, indai ngatur semua pengawa dalam ruang bilik.

"Institusyen ruang bilik pa­tut dikemerat ngambika ulih nempa sebengkah komuniti ke manah sereta tegap lalu apai patut ngemeratka pekara nya," ku iya ba pengerami ngintu Hari Apai di The Hills ditu, kemari.

Pengerami ti keterubah iya diintu lalu diatur nengah kerejasama ejensi perintah enggau NGO begulai enggau Biro Pemansang Orang Indu enggau Ruang Bilik, nerima puji ari Johari lalu nya man­dangka kaul entara apai eng­gau indai chukup tegap.

"Kaul nya meri peransang ngagai ruang bilik meretika guna ngadaka komuniti ke manah,'ku iya.

Dulu agi ari nya, Menteri Pengintu Pengelantang Pen­diau, Orang Indu enggau Pemansang Ruang Bilik Datuk Fatimah Abdullah ba jaku pengelalu madah raban apai megai tanggung pengawa besai ba atur pemansang bala anak ari sida ada nyentukka besai.

"Tajapan penyayau indai enda ulih diganti, anak be­gunaka apai ngambika tau angkat besai enggau regas.

"Diatu, pangku pengawa apai ukai semina nyendiaka belanja ngagai ruang bilik, tang sida patut seruran ngaul diri ba pengidup anak sida.

"Apai nyaup mutarka pen­anggul ke ditapi anak, ngajar atur ke patut dititih dalam pengidup, nyikap sida enggau penemu ngambika tau napi pemar jemah sereta nyadi kaling ngagai bala anak,"ku iya.

Iya mega madah maya bemain enggau bala anak tau dikena raban apai nerenak sekeda reti enggau basa dalam pengidup, bejaku enggau anak sereta ngedut kaul emosi begulai enggau anak.

Bela datai Menteri Muda Pelajar Tumu Nembiak Mit Rosey Yunus, Menteri Muda Pengintu Pengelantang Pen­diau Robert Lawson Chuat, ADUN Semariang Shari­fah Hasidah, ADUN Pantai Damai Abdul Rahman Jun­aidi, Direktor Biro Wanita Norliah Ahmad enggau orang bukai.

Print Friendly

Perundingka chara ngintu pengerami Gawai ngambi enda ngenabarka pengerindu rebak baru, ku Mawan

Posted: 22 Jun 2014 09:03 AM PDT

BAU: Raban orang ke ng­atur pengerami Gawai patut berundingka chara bukai ke tau ngangkatka pengawa nya seraya ngemeratka adat eng­gau main asal.

Menteri Pemansang Rama Tan Sri William Mawan Ikom madah, sida patut enda se­ruran ngadu atur ke sama ba tiap pengerami gawai ketegal pekara nya tau bendar ngena­barka pengerindu nembiak rebak baru.

"Pengerami Gawai nyadi sebengkah pengawa besai ti mandang sereta ngintu adat enggau main asal komuniti Dayak,"ku Mawan ke nyadi pengabang di pebasa ba Kar­nival Gawai Dayak Redeems 2014 'Ngaruom Simutur' di Kampung Apar malam ensanus.

Mawan ke mega ADUN Pakan enggau MP Saratok madah pengerami mega nyadi sebengkah palan endur ngedut ke kaul entara diri se­bilik enggau pangan bukai.

Pengerami malam nya digulu enda kurang ari 1,000 iku orang ke alai ba laman balai, bemacham pemakai bansa asal Dayak dinah ngagai bala pengabang ke datai.

Iya mega muji konsep ke dikena rambau pengerami nya ti udah ngelaku pen­gawa orang dagang komu­niti Dayak sereta pechaya REDEEMS deka ngerembai enggau manah.

"Redeems dikemegah per­anak Sarawak kelebih agi bansa Bidayuh lalu kitai patut ngenanka pemaik tu,"ku iya.

Presiden Redeems Datuk Peter Nansian Ngusie ba jaku pengelalu madah dia ila (24 Jun), pengawa makai lemai gawai renggat nengeri deka dipenyadi Sapit Menteri Besai Tan Sri Muhiyiddin Yassin.

Bela datai ba pengawa ila iya nya Tuai Pemegai Menua Tun Pehin Sri Abdul Taib Mahmud enggau Kepala Menteri Datuk Amar Adenan Satem.

Ba pengerami ke sama, Shellina Gagem ari Kampung Plaman Nyabet, Serian me­nang gelar Dayung Sikora lalu nerima perais RM1,000 besereta tropi.

Penuduk lumur dua pulai ngagai Elizabeth Glore Betan ari Kampung Senibong, Sin­gai ke alai iya nerima perais RM800.

Stephanie Lutan ari Kam­pung Bugu Mawang, Serian menag penuduk lumur tiga sereta nerima RM700.

Perais disuaka bini Nan­sian, Datin Rose Sidin.

Print Friendly

Opis menteri merambu ngaga mayuh apartmen kena ngemantupka trend nembiak rebak baru

Posted: 22 Jun 2014 09:02 AM PDT

KUCHING: Opis Menteri Pengawa Berumah deka ngaga mayuh agi apartmen dikena mutar penyuntuk rumah seraya ngemantupka peneka nembiak rebak baru.

Berindik ari nya, perintah merambu deka ngaga mayuh agi apartmen dalam kandang mengeri ti tau mega nge­mujurka pemaik institusyen ruang bilik.

Menteri nya, Datuk Amar Abang Johari Tun Abang Openg madah pemutus nya digaga pengudah tebal agi nembiak rebak baru diatu rindu diau di apartmen.

"Nembiak rebak baru diatu ngasaika diau di apartmen setipak enggau gaya pengidup ti suah bejalai ninggalka rumah baik nya ketegal kereja tauka bejalai ngelantangka ati.

"Sida ngasai, diau di apart­men lebih likun ketegal kan­dang ngelingi dipagar sereta nadai penanggul enti ditinggal lama.

"Ketegal nya, perintah angkun nyendiakka apartmen ungkup nembiak rebak baru lebih agi ngagai sida ke baru nirika ruang bilik," ku iya ba pengerami ngintu Hari Apai di The Hills ditu, kemari.

Iya ke mega Menteri Da­gang Temuai netapka tiga genturung pendiau iya nya Kampung Tabuan Melayu, Darul Hana enggau Kampung Tanjung Datu di Sibu entara sekeda palan endur ngaga apartmen.

Kelimpah disedia ungkup raban nembiak baru, Abang Johari madah apartmen mega manah dibeli raban orang ari menua pesisir ke mindah ngagai kandang mengeri.

"Raban orang ari menua pesisir ke gawa dalam kan­dang mengeri tau meli apart­men ke alai sekeda nya dijual ba rega ke umbas iya dibayar sida.

"Perintah enggai nyadi enda berundingka sida, ng­intu pemaik ruang bilik sida. Diatu rega rumah nyau majak mar ketegal rega tanah ti udah majak niki lalu pemutus nirika apartmen ulih mutarka sekeda penanggul tu,"ku iya.

Print Friendly

SKM Sarawak ngarap tejulukka tagit taun tu

Posted: 22 Jun 2014 09:02 AM PDT

KUCHING: Suruhanjaya Koperasi Malaysia (SKM) Sarawak ngarapka ulih nya­pai tagit penatai pemisi RM170 juta ari asil dagang gerempung kerejasama taun tu.

Direktor SKM Sarawak, Abas Abu Bakar madah tagit nya ulih dijapai nengah 900 buah gerempung kerejasama lama enggau sekula ke disadang dirijista pengujung taun tu.

"Ba taun ke udah (2013), SKM mujur teulihka RM168 juta penatai pemisi asil ari da­gang gerempung nengah 883 buah gerempung kerejasama di serata nengeri.

"Ari penyampau nya, 'ko­perasi kredit' mansutka asil ke pemadu mayuh iya nya manggai RM41 juta asil ari 31 buah koperasi," ku iya.

Iya mansutka jaku nya pengudah dikerandau ba pengerami ngintu Hari Ko­perasi Sekula Kolej Datu Patinggi Haji Abdillah ditu, kemari.

Iya mega madahka naka 31 Disember 2013, SKM Sarawak udah ngerejister 883 buah koperasi ke nyengkaum 702 buah koperasi lama eng­gau 181 buah koperasi sekula ke ngembuan 329,493 iku kaban.

Nengah puku syer pen­yampau RM150 juta sereta reta ba penyampau RM151 juta, SKM Sarawak mujur ngerikod penatai pemisi ari asil dagang ba penyampau RM168 juta ari semua 883 buah koperasi ba taun seiti nyin kemari.

Ba kaul ke sama, iya madah SKM nadai betapi enggau koperasi ti ngembuan pen­anggul tajapan Bank Negara udah ngemandakka timpuh lon ari 15 nyentuk 20 taun ngagai 10 taun aja.

"Ari penyampau kop­erasi ke direjister, SKM udah ngerintai 20 buah koperasi ke pemadu manah di Sarawak ke alai KOPER­KASA ba penuduk lumur satu ti udah ngerikod asil dagang penyampau RM20 juta," ku iya.

Print Friendly

TYT ngulu pengawa Ngelalu Pengabang Gawai Dayak di rumah Harry

Posted: 22 Jun 2014 09:02 AM PDT

BAU: Pengerami Gawai Dayak ukai semina dirami maya hari besai nya aja tang pengerami tu ulih diintu enda ngira maya, kelebih agi dalam dunya pemansang baka kediatu ke beratika pemujur pelajar nyadi seiti pemerat ke sama patut dirami.

Seiku orang dagang bansa Bidayuh, Henry Harry Jinep ari Bung Konis, Singai, Bau lebuh bejaku ingatka pemendar apai indai iya lebuh nyengula sereta udah nyaga sida iya ari mit kelia, madahka pengawa Ngelalu Pengabang Nyerumba Pengerami Gawai Dayak nya kemari, beserimbai enggau Gawai Dayak dikena ngingatka pemujur bala apai indai iya ke udah betatika pemujur bala anak sida iya ungkup jemah ila.

"Kami bala anak John Jinep, ke udah manggai 94 taun, seruran ingatka ajar apai indai, lalu diatu kami menyadi deka nampung pemujur apai indai kami.

"Beserimbai enggau Hari Apai mega, kami meri jaku selamat ngagai apai kami, John Jinep seiku tuai bansa Bidayuh enda ngira penusah iya empu laban deka meda bala anak mujur magang-magang, lalu mesan kami menyadi seruran nelap enggau orang bukai," ku Henry.

Henry madah munyi nya lebuh bejaku ngelaluka Tuai Pemegai Menua  (TYT)  Sarawak Tun Pehin Sri Abdul Taib Mahmud pemesai sereta mensia mayuh bukai ke bisi datai ngagai Pengerami Rumah Tebuka Gawai Bung Konis ti diatur ba rumah apai Henry empu.

Iya nandu baru, muji pengawa ke udah digaga ulih Taib ngelama iya udah mangku pengawa nyadi Kepala Menteri Sarawak, udah mai mayuh pemansang ngagai komuniti Bidayuh baka ke dipeda kemaya hari tu.

Bansa Bidayuh ku iya, udah jauh mansang dalam pekara pelajar, ekonomi setipak enggau pemansang polisi maya Taib suba, ke sama nyengkaum tiap pupu bansa bukai di menua tu.

"Pemansang ke udah digaga nuan (Taib) udah mayuh mantu redak nembiak bansa Bidayuh. Polisi pemansang udah mayuh ngubah komuniti Bidayuh nambah penatai pemisi kami," ku iya lalu nambah rayat Sarawak nyengkaum rayat Kpg Singai mega gaga ati sereta meri jaku selamat ngagai Tuai Menua Sarawak ke baru nerima gelar 'Tun' ari Yang Dipertuan Agong bedau lama tu tadi.

Ba atur pengawa nya mega, Taib bejadika 1Singai Pasar Baru Tondong ti dikemansangka Putra Sentosa Development Sdn Bhd enggau John Jinep Properties Sdn Bhd ke betuju meri peluang ngagai mensia mayuh ke diau di sitak nya ngembuan pemisi perengka guna ke lebih moden.

"Ngarapka enggau pemansang ke bisi diatu, 1Singai deka meri pengelantang pendiau ngagai mensia mayuh sereta ngadaka mayuh agi orang dagang ari sitak nya, ke tau muka dagang mit-mit enggau umbas iya, restoren sereta dagang bukai," ku iya.

Ba atur pengawa nya mega, urung 33 nembiak sekula ari sitak Singai ke udah mujur dalam peresa UPSR, PMR, SPM enggau STPM nerima insentif Bung Konis ari ruang bilik Jinep alai nembiak ke pengabis nyulut nerima RM150 (UPSR), RM200 (PMR), RM500 (SPM) enggau RM700 (SPM).

Nembiak sekula ke pengabis nyulut ke teulihka 9A dalam peresa SPM 2013, Elissa Cresenta anak Justin diberi gelar 'Best Outsanding Award' ke nerima RM1,000.

Pengerami Rumah Tebuka Gawai Dayak Bung Konis nya kemari bisi mai sereta urung 2,000 bala temuai ke bisi ngabang ngagai endur nya, lalu sama digulu ulih Presiden Serakup Dayak Bidayuh National ti mega nyadi Sekretari Mendam Opis Menteri Pengawa Dagang Temuai, Datu Ik Pahon Joyik, Kaban Parlimen Mas Gading Anthony Nogeh, enggau Sekretari Politik Opis Kepala Menteri Datuk Wilfred Rata Nissom.

Print Friendly

Semua bansa di Sarawak bela ampit pemansang

Posted: 22 Jun 2014 09:01 AM PDT

Diatu nadai bida agi dalam komuniti bumiputera

Dikarang Jacqueline David //

BAU: Politik pemansang ti digaga perintah dalam kandang 50 taun diperatika ulih ngubah pendiau rayat sereta ngubah menua tu nyadi menua moden.

Tuai Pemegai Menua (TYT) Nengeri Sarawak Tun Pehin Sri Abdul Taib Mahmud madah, asil ari nya, semua pupu bansa di menua tu sama ngasaika mayuh macham pemansang ke udah ngubah pendiau sida maju agi.

Iya madah, perintah udah bebendar beratika pengelantang pendiau rayat menua tu lantang agi sereta ngasaika pemansang baka ke diasaika mensia mayuh kemaya hari tu.

"Kemaya hari tu, tau dipadah kitai, nadai sebengkah bansa kena tinggal, enda ngira nya orang Bidayuh, Iban, Melayu, China tauka Orang Ulu.

"Semua pemisi kitai diatu ba mua mata kitai empu lalu semina bepanggai ba kitai empu laban semua rayat bisi kuasa diau lantang sereta bulih pengawa ke manah.

"Aku beratika, diatu nadai bida agi dalam komuniti bumiputera laban semua pupu bansa udah niki ngagai seiti tikas lalu ngulihka penguntung asil ari pemansang ke digaga perintah," ku iya.

Taib madah munyi nya rambau Pengerami Rumah Tebuka Gawai Bung Konis 2014 di Bung Konis, Singai semak ditu, kemari.

Kelimpah ari nya, iya ngarapka bansa Bidayuh sereta semua pupu bansa bukai di menua tu tetap beserakup lalu sama-sama ngaga menua tu nyadi menua ke maju. Ba jaku iya mega, iya muji orang dagang Bidayuh ke udah mujur baka Henry Harry Jinep enggau sida sebilik ke bukai laban ke udah ngatur pengawa nya lalu iya ngarapka sida sebilik terus maju lalu nyadi chunto ngagai semua komunti Bidayuh.

Print Friendly