» »Unlabelled » Kenegapka kaul, kemeranka kerejasama: Mawan BorneoPost Online | Borneo , Malaysia, Sarawak Daily News » Berita Iban - New 2 Borneo

05:04:00

Kenegapka kaul, kemeranka kerejasama: Mawan BorneoPost Online | Borneo , Malaysia, Sarawak Daily News » Berita Iban - New 2 Borneo

Kenegapka kaul, kemeranka kerejasama: Mawan

Posted: 24 Jun 2014 09:55 PM PDT

Dikarang Churchill Edward //

Pengerami Gawai mega patut ke pelasar endur semua peranak nengeri tu ngenukuka pengelikun menua diri

KUCHING: Tuai Pengabang pengawa Ngiling Tikai PBB N15 Muara Tuang, Tan Sri William Mawan Ikom madah, pengerami Gawai Dayak ukai semina endur kita gaga besampika pengulih pengawa bumai sepemanjai taun ke udah tang mega patut nyadi pelasar semua peranak Sarawak, enda milih peturun tauka jalai pengarap, ngenegapka kaul sereta ngemeranka kerejasama kena ngenukuka pengelikun menua.

Mawan ke mega, Menteri Pemansang Rama madah, kelimpah ari pengerami Gawai, bansa Dayak patut ngemeratka pemesai reti adat enggau main asal diri baka ti dibantai malam Hari Minggu nya.

Iya ke mega Kaban Kunsil Nengeri (ADUN) Pakan sereta kaban parlimen (MP) sitak Saratok nerang: "Maya penyarut 13 Mei 1969 di Semenanjung Malaysia suba, peranak nengeri Sarawak enda nemu utai ke nyadi din laban kiruh enggau pengidup diri sereta enda irauka penyadi nya laban bebasaka pangan diri lalu enda muntang dikeruga penemu jai.

Iya mega madahka diri lantang sereta gaga ati meda penegap kaul entara pupu raban bansa di nengeri lebih agi lebuh pengerami Gawai Dayak, Hari Raya Puasa tauka Taun Baru China.

Tuai Gawai ba pengerami nya, Datuk Seri Mohammad Ali Mahmud ke mega ADUN Muara Tuang ngelalau mensia mayuh seruran ngemeratka pemanah kaul sereta kerejasama ngambika tepujurka pemansang ekonomi.

"Kitai muntang ngemujurka semua juluk sereta atur pemansang enti bisi kerejasama enggau kaul ti tegap lalu nya deka nguntungka semua peranak menua," ku Ali.

Berebak enggau nya Ali ngelansa penyadi dua macham sejarah di nengeri tu taun tu. Keterubah, ku iya, pengawa maduka Kepala Menteri ke suba Tun Pehin Sri Abdul Taib Mahmud nyadi Tuai Pemegai Menua (TYT) sereta kedua, ngangkatka Menteri Pengawa Spesil Tan Sri Datuk Amar Adenan Satem nyadi Kepala Menteri baru.

Iya nandu, Taib mega MP Kota Samarahan dulu suba lalau Adenan ex-ADUN Muara Tuang.

Ali ke mega chairman PBB N15 Muara Tuang madah, Mawan (ex-presiden SPDP), taja ngubahka kuing politik, iya endang orang tegap dalam Barisan Nasional (BN).

"Mawan, ku iya, seiku orang politik ti seruran talukka atur BN. Nya mih aku ngelawa iya (Mawan) nyadi pengabang ti dipebasa malam tu. Aku deka mai iya baru ba pengawa bukai ila," ku Ali.

Kelimpah ari nya, temuai sereta pengabang malam nya mega diperindang seiku penyanyi Iban ti pegari iya nya Ricky Andrewson ke udah mujur ngerikod 11 iti almum lalu bulan Julai tu deka ngeluarka album baru ti mai rentak ballad enggau pop ke dikumbai iya Atas Nama Pengrindu.

Bela bisi ngulu atur pengawa nya, chairman pengatur pengawa Hamzah Ibrahim ke mega sapit chairman PBB N15 Muara Tuang, Tuai Miring (Lemambang) Suja Luntu, Kepala Polis Samarahan DSP Lee Chong Chern, sapit DO Rais Ahmad, Sapit Residen (Rama) John Awan enggau Sapit Residen (Pemansang) Abdul Khalid Manap.

Print Friendly

Aku deka nyuluk tikas ke tinggi agi, ku Mac

Posted: 24 Jun 2014 03:08 PM PDT

Dikarang Rengenyan Labang //

Pemujur iya ngulihka penyulut ba pelajar berindik ari peninuk mendingka lecturer

KUCHING: Bisi 872 iku graduet Politeknik Malaysia Kuching Sarawak (PKS) nerima skrol dalam pengerami Konvokesyen Ke-22 PKS kemari.

Nitih penerang ari Direktor PKS Clara Ong Guat Leng, penyampau nya nyengkaum 526 iku graduet Sesi Disember 2012 lalu 346 iku garduate Sesi Jun 2013.

"Aku arap bendur semua graduet tu ulih ngayanka PKS sebuah institut teknikal ti ulih mantu, nampung peminta guna pengereja pengawa semi profesyenal, lebih agi di kandang SCORE.

"Aku minta semua graduet PKS nyadi ikon ngagai raban bansa enggau industri. Ayanka meh pengelandik kita nyadi seiku pengereja pengawa ti dedikasi, komited enggau beintegriti ti ulih ngangkatka nama PKS nyadi pengeluan TVET (Latihan Vokasional dan Teknikal)," ku iya.

Clara mansutka pekara nya dalam jaku pengelalu pengerami Konvokesyen Ke-22 PKS ti diatur ba sebengkah hotel ditu, kemari.

Pengerami nya dipenyadika Menteri Muda Raban Nembiak Datuk Abdul Karim Rahman Hamzah ti ngarika Menteri Dagang Temuai Datuk Amar Abang Johari Tun Openg.

Raban 872 iku graduet (ke dibagi dua sidang) nya kemari tembu dalam pelajar diploma enggau setipikit ti dalam Jabatan Kejururteaan Awam; Jabatan Kejuruteraan Elektrik; Jabatan Kejuruteraan Mekanikal; Jabatan Kejururteraan Petrokimia; Jabatan Perdagangan enggau Jabatan Teknologi Maklumat dan Komunikasi.

Berebak enggau nya,  Mac Chiney Jerry, 23, ba pengerami konvokesyen nya nerima Anugerah Pengarah Politeknik Kecemerlangan Akademik & Kokurikulum (Politeknik).

Iya ti asal ari Batu Lintang Sri Aman graduet Sesi Jun 2013 ari Jabatan Kejuruteraan Mekanikal iya nya Diploma Kejuruteraan Mekanikal, teulihka CGPA 3.77.

Lebuh ditanya bakani Mac teulihka penyulut iya madahka diri endang meratika amat lebuh pengajar ngajar dalam kelas.

Nitihku Mac, iya ukai semina deka ngulih pemandai angka renggat diploma tang deka nampung pelajar ngagai renggat ke tinggi agi.

"Dalam kelas aku endang beamat-amat mending sereta meretika nama utai ke diajar lecturer lalu tembu kelas aku ngulang utai ke udah dipelajar ngambika ulih ingat sereta lebih nemu.

"Udah tu, 3 Julai aku deka ngerijista nampung pelajar ba Institut Teknologi Petrolem Petronas di Terengganu," ku iya ti madahka apai iya pinchin polis lalu indai iya nyaga ruang bilik.

Kelimpah ari nya, Siti Soleha Hasan, 23, asal ari Sandakan Sabah teulihka Anugerah Pengarah Politeknik Anugerah Kecermelangan Akademik & Kokurikulum (Politeknik).

Ba Politeknik iya ngambi Diploma Kejuruteraan Perkhidmatan Bangunan dalam Jabatan Kejuruteraan Awam.

Ku iya taja pan bisi penanggul diau di nengeri orang lebih agi jauh ari diri sebilik, semua nya ukai nyadika tegal enda ulih nyulut.

Iya ti graduet Sesi Disember 2012 nerima skrol ba konvokesyen Ke-22 PKS. Lebuh dikerandau iya madahka diri deka terus ngangkatka nama enggau produk politeknik.

"Diatu aku benung nyambung degree enggau Politeknik.

"Aku ngarapka diri ulih meri imej manah ngagai produk Politeknik nyentukka aku gawa ila, aku deka ngasuh orang nemu kualiti produk Politeknik," ku iya.

Print Friendly

Enda ibuh diatur PRK ba DUN Bukit Assek: Abdul Aziz

Posted: 24 Jun 2014 03:08 PM PDT

PUTRAJAYA: Nadai diatur Pengawa Bepilih Mit (PRK) ungkup Kunsil Nengeri (DUN) Bukit Assek, Sarawak berindik ari pemarai pengari rayat DAP,

Wong Ho Leng, minggu nyin tadi, ku Chairman Komiti Pengawa Bepilih Besai (SPR) Tan Sri Abdul Aziz Mohd Yusof.

Iya madah, pemutus SPR nya digaga pengudah beratika undang-undang ke dipegai diatu.

Bepelasarka Artikel 54 (1) Perlembagaan Persekutuan, pengawa bepilih mit patut dipejalaika dalam timpuh tiga taun, sebedau ambis sesi Parlimen enggau DUN.

"PRK semina ulih dipejalaika ba DUN Bukit Assek nyema timpuh mandat kurang ari tiga taun. Pemarai iya nyadi pengudah ambis timpuh nya, iya nya dua taun kepenudi tauka pengudah tiga taun keterubah..

Nyadi dalam undang-undang menua Malaysia enggau undang-undang nengeri Sarawak, enda ibuh diatur pengawa bepilih mit taja pan penuduk nya enda disadang puang. Nya pemutus dalam undang-undang," ku iya madah ngagai pemberita pengudah ngulu Pengerami Hari Inovasi SPR 2014 enggau Anugerah Perkhidmatan Cemerlang SPR 2013, ditu ensana.

Wong, 54 ti kala nyadi Chairman DAP Sarawak parai ba Palan Berubat Rejang, Sibu kena 21 Jun ketegal penyakit ruman untak.

Maya Pengawa Bepilih Nengeri Sarawak 2011, Wong menang ba kerusi DUN Bukit Assek ngalahka chalun Barisan Nasional (BN) Chieng Huong Toon enggau chalun bibas Hii Tiong Huat enggau penyampau majoriti 8,827 iti undi.

Abdul Aziz madah, berkata aum DUN Sarawak berengkah 20 Jun 2011, lalu haribulan pemarai pengari rayat  DAP nya enti nitihka timpuh nya kira tiga taun sehari. Reti nya lebih sehari ari undang-undang ke patut endur ngatur PRK.

"Tempoh mansau DUN Sarawak iya nya kena 20 Jun 2016. Taja baka nya, Kepala Menteri ulih ngatur pengawa bepilih nengeri tumu agi ari timpuh nya enti udah bulih pemendar ari Tuai Pemegai Menua (TYT) Nengeri Sarawak enggau nitihka undang-undang ke dipegai diatu," ku iya.

Iya amdah, raban SPR agi bedau neriam penerang rasmi ari Speaker DUN Sarawak bekaul enggau pemarai ex Parlimen DAP Sibu nya. — Bernama

Print Friendly

Pengering, penegap DAP Sarawak bepun ari penyakah niang Ho Leng, ku Guan Eng

Posted: 24 Jun 2014 03:07 PM PDT

SIBU: Pengawa ngubur Kaban Kunsil Nengeri (ADUN) Bukit Assek niang Richard Wong Ho Leng udah mujur diatur ba Pendam Methodist, Batu 10, Jalai Oya Lama ditu pengudah disembiang ba Gerija Methodist Hwai Ang ditu, kemari.

Sebedau nya, beratus iku bala kaban belayan, penyukung enggau bala pemesai Parti Tindakan Demokratik (DAP) datai begelumu ba rumah iya di Jalai Ipoh.

Nangkan ke nya sida bebala mayuh nyempulang lungun niang ngelawa gerija sebedau disembiang.

Kepala Menteri Pulau Pinang Lim Guan Eng ba jaku iya madah, niang seiku 'Giant Killer' maya ke agi ba politik seraya mayuh nempa pemujur ba pengawa bepilih.

Niang Ho Leng, ku iya, belabuh tama enggau DAP kena 19 April 1986 lalu neruska politik ti ngemeratka rayat nempa pengidup ke likun dudi hari ungkup semua.

"Pengering enggau penegap DAP Sarawak nyentuk ke sehari tu bepun ari pengeransing niang.

"Iya ukai semina matak rebak baru ngeringka parti tang mega mujur ngangkatka tikas parti nya di Sibu ditu," ku iya sambil madah budi enggau nama niang deka semampai dikenang nyentuk jemah ila.

Berebak enggau tu, anak tuai niang, Suzanne Wong madah, apai iya orang ti ngemeratka pengelikun orang bukai ari diri empu.

"Taja mayuh pengawa di opis tang iya landik magi awak begulai enggau kami sebilik," pia ku jaku iya.

Niang Ho Leng nadai ba Palan Berubat Rajang ditu kena hari Enam tu tadi pukul 10.50 malam nyau pengelama ditepan penyakit riman untak.

Niang ninggalka bini Irene Chang enggau empat iku anak iya nya Suzanne, Julie Victoria enggau Brenda lalu ke lelaki iya nya Gabriel.

Sekeda bala ke bisi datai maya numbakka niang iya nya Penyanding Penemu DAP Lim Kit Siang, Sapit Chairman DAP Teresa Kok, Chairman DAP Sarawak Chong Chieng Jen, Sapit Chairman Parti Keadilan Rayat (PKR) Sarawak See Chee How enggau bala pemesai parti penyakal ke bukai.

Print Friendly

Raban graduet ari PKS diperansang ngerebut pengawa puang di SCORE

Posted: 24 Jun 2014 03:07 PM PDT

KUCHING: Raban graduet lebih agi Politeknik Malaysia Kuching Sarawak (PKS) diperansang ngerebut peluang pengawa ti disediaka nengeri tu baka ba SCORE, ngambika peluang nya enda diisi pengereja pengawa ari menua luar.

Menteri Dagang Temuai ti mega Menteri Pengawa Berumah Datuk Amar Abang Johari Tun Openg madahka perintah ngembuan pengarap besai ngagai graduate nengeri tu ti bepengelandik tinggi.

Iya madah, Sarawak diatu benung chakah ngemansangka ekonomi nengah SCORE ti nyendiaka 1.5 juta peluang pengawa ke nyangkaum pengereja pengawa bepengelandik enggau tengan pengelandik.

"Aku arap bendar ngena pengelandik 'hands-on' enggau 'soft skill' ti dipelajar sereta dikembuan graduet PKS, kita ulih ngisi pengawa puang ti nengeri Sarawak.

"Kita enda tau enda ingat, Sarawak nyasar tauka nagit deka nempa 350,000 pengereja pengawa bepengelandik lebuh manggai 2013.

"Nya alai dalam setaun Sarawak enda tau enda nempa 20,000 pengereja pengawa bepengelandik ari peranak menua tu empu. Enti enda, kitai deka rugi laban pengawa puang nya tentu deka diisi orang menua luar," ku iya.

Abang Johari madahka pekara nya dalam jaku iya ti dibacha Menteri Muda Pemansang Raban Nembiak enggau Menteru Muda Pengawa Berumah Datuk Badul Karim Rahman Hamzah ba pengerami Konvokesyen Ke-22 Politeknik Kuching Sarawak (PKS) ti diatur ba sebengkah hotel ditu kemari.

Ambika banding ku iya bejaku baru, Sarawak udah ngemansangka Samajaya nyadi Zon Perdaganagn Bebas Perindustrian ti bejalaika pemansang industri elektronik enggau servis ti bekaul.

Beberapa kompeni anatarabansa baka X-FAB, Toko Electroniics, Taiyo Yuden, OMG Electronic, Hitachi Global Storage Technologies, MMEC, Amerika Syarikat enggau COMTEC, China udah ngaga kerabn pengaga sida di nengeri tu, ku iya.

"Dipelabaka ba taun 2020 ila, 6,250 pengereja pengawa diguna dalam bidang tu. Nya alai graduate PKS patut ngerebut peluang tu," ku iya.

Taja pia iya ngelalau raban graduate ngambika ukai semina bepanggai ngagai makai gaji tang patut berunding ngemansangka diri empu.

Kebuah  pia ku iya laban mayuh institut ti nyali duit ditumbuhka di nengeri tu ke ulih mantu orang ti deka berengkah tauka ngerembaika dagang.

"Graduate patut berunding enda kelalu bepanggai ngagai gawa makai gaji aja tang diperansang nyadi orang dagang tauak muka pengawa dagang ti meri penguntung ke lebih besai.

"Penumbuh institusi ti nyendia bantu duit nya dikena meransang  mayuh agi raban graduate ti tembu belajar nyadi orang dagang," ku iya.

Berebak enggau tu, iya ngarapka PKS terus negutka kaul enggau ijensi luar sereta piak industri dalam pengawa ngajar enggau belajar ngambika kurikulum program seruran senipak nitihka peminta sereta ubah pemansang.

"Kerejasama nya mega ulih ngangkatka penyulut Politeknik Malaysia Kuching Sarawak nempa graduate ti bekualiti enggau bpengelandik tinggi," ku iya.

Print Friendly

Anang charut enggau pangan diri, ku Rayong

Posted: 24 Jun 2014 03:07 PM PDT

Perintah Barisan Nasional deka muntang agi meri pemansang enti semua rayat sepenemu

ENGKILILI: Kaban Kunsil Nengeri (ADUN) Engkilili Dr Johnnical Rayong anak Ngipa ngelalau rayat di DUN Engkilili ngambika enda charut penemu tauka belaya enggau pangan diri kena ngemuntangka perintah Barisan Nasional (BN) ngemansangka sitak nya.

Iya ke patut, rayat di DUN Engkilili patut seruran besaup enggau pangan diri dikena ngemujurka pemansang menua diri.

"Aku deka bebendar ngemansangka sitak DUN Engkilili ngambika semua kita terus ngasaika pemansang ninting maya," ku iya.

Iya madah munyi nya rambau Pengerami Ngiling Bidai Gawai Dayak 2014 ke diatur Parti Pesaka Bumiputera Bersatu (PBB) Pampang Engkilili ba Dewan Majlis Daerah Lubok Antu (MDLA) di Pasar Engkilili, kena Hari Enam tu tadi.

Rambau pengerami nya, Dr Rayong ngungkupka RM10,000 Projek Mit Menua Pesisir (MRP) ngagai PBB Pampang Engkilili.

Pengerami nya dipenyadika Menteri Bekebun Bedandang Besai enggau Komoditi, Datuk Amar Douglas Uggah anak Embas.

Kelimpah ari nya, Dr Rayong ngansak rayat ba sitak DUN Engkilili terus nyukung semua polisi Pemansang Kepala Menteri Sarawak enggau Menteri Besai Malaysia dikena nentuka rayat ba menua pesisir enda tinggal ari arus pemansang.

"Semua kita patut seruran begulai enggau perintah BN ngambika enda tinggal nyepi arus pemansang," ku iya.

Bela bisi datai ba pengerami tu iya nya Sekretari Menteri Bekebun Bedandang Besai enggau Komoditi Malaysia Dr Richard Rapu, Walikota Sri Aman ti mega nyadi Chairman Program Richard Tawan enggau Pemesai Pengatur Pengawa Pelilih Menua Lubok Antu Brain Musang.

Print Friendly