» »Unlabelled » Perundingka pengelikun orang ke betengahka jalai nya, ku Kilah BorneoPost Online | Borneo , Malaysia, Sarawak Daily News » Berita Iban - New 2 Borneo

05:18:00

Perundingka pengelikun orang ke betengahka jalai nya, ku Kilah BorneoPost Online | Borneo , Malaysia, Sarawak Daily News » Berita Iban - New 2 Borneo

Perundingka pengelikun orang ke betengahka jalai nya, ku Kilah

Posted: 09 Dec 2013 01:55 PM PST

Perintah patut berunding mutarka keruga luri batang Bakun-Bintulu

KUCHING: Tajapan udah dikemanah, Jalai Bakun-Bintulu mengkang enda likun ditengah ketegal luri ti sarat ngundan batang seruran betengahka jalai nya.

Pengari Nembiak Barisan Nasional (BN) Belaga Henry Kilah Talek madah mayuh riput nusui luri batang dibai laju sereta tau ngujungka penusah bebadi.

Iya madah, bedau lama tu tadi, ketuai BN ari menua nya sereta sida sebilik nyau ka bebadi di jalai nya ketegal luri ti sarat mai batang ngelantak mutu sida ari belakang.

Ketegal nya, iya ngansak perintah berundingka chara nagang luri betengahka jalai nya lalu ngansak sida bekenaka jalai bukai ti disediaka kompeni batang.

"Raban Nembiak BN Belaga meri puji enggau basa ngagai (Menteri Kerejaraya) Datuk Fadillah Yusof ti udah nyaup ngemanah jalai nya. Jalai udah manah tang disadang rusak baru dalam awak ke semak.

"Perintah patut berundingka chara pemadu engkeman kena nagang luri nengah jalai tu. Sida ukai semina ngerusak jalai tang ngeruga pengelikun orang bukai ti betengahka jalai nya. Luri tu patut nengah jalai ti diungkupka ngagai kompeni batang aja," ku iya.

Kilah ke mega Sapit ketuai Penerang Nembiak Parti Pesaka Bumiputera Bersatu (PBB) enggau Ketuai Nembiak pampang Belaga setuju enggau raban ketuai bukai dalam BN ti irau meda luri batang ke sarat tauka dikumbai luri antu ti seruran ngeruga pengelikun mensia mayuh.

Menteri Pemansang Tanah ke mega Kaban Kunsil Nengeri Baleh Tan Sri Datuk Amar Dr James Jemut Masing ba penerang iya di The Borneo Post kenaka 19 September madah, mayuh nyawa udah bebadi ba jalai nya ketegal ulah deriba luri antu ti enda bebasaka orang bukai lalu enggai nengah jalai batang ti udah disedia.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Fatimah: Raban nembiak, orang besai tuai ke bisi penimpang dikerami ba pengawa merarau

Posted: 09 Dec 2013 01:54 PM PST

by Chris Bishop. Posted on December 10, 2013, Tuesday

KUCHING: Urung 150 iku raban nembiak enggau orang besai tuai ari mayuh palan pengintu pengelantang pendiau dikerami ba sebengkah pengawa merarau ke diatur ba 'Restoran Absolute Tribal', Sarakraft Pavillion ditu, kemari.

Digulu temuai ke dipebasa, Menteri Pengintu Pengelantang Pendiau, Pekara Indu enggau Pemansang Ruang Bilik Datuk Fatimah Abdullah, pengawa beserumpu merarau nya ngundang raban ari 11 gerempung.

Kelimpah ari nya, Restoran Absolute Tribal ngepunka projek 'The Suspended Meals' enggau tuju mantu raban orang ke enda benasit ngelingi Kuching.

CEO Gerald Goh madah projek nya nyadi palan endur orang ti deka meri bantu ngagai orang ti enda benasit ngemantupka pengeran ati sida sereta pia mega ngerembaika penerang ke ngemeratka raban orang ke seranta.

"Nengah chara tu kitai ngarap ulih mandangka penyinu sereta mantu raban ti begunaka bantu.

"'Suspended Meals' diungkupka ngagai raban ti begunaka bantu lalu nyadi sebengkah projek komuniti. Kitai tau meli pemakai ba restoren tu lalu diberi ngagai sida ke begunaka bantu ti deka ditentuka jemah," ku iya.

Suspended Meals tau dibeli ba Restoren Absolute Tribal nengah rega RM10 ke alai restoran deka nambah penyampau nya nyadi RM15 ungkup seiku orang ke dibantu.

Ba kaul ke sama, Fatimah muji inisiatif restoren ti deka nyendiakka pemakai ngagai raban orang ke enda benasit di nengeri tu lalu iya ngansak mayuh agi orang dagang neladan Gerald.

"Ba dunya ti majak mansang, kitai enda patut ngemelakang raban orang ke enda bidik lansik. Aku ngansak mayuh agi orang dagang neladan projek Gerald tauka ngepunka projek bukai ke ngembuan tuju ke sama," ku iya.

11 buah gerempung ke datai ngulu pengawa merarau kemari iya nya pengari ari Gerempung Orang Cacat Sarawak (POCS), Community Based Rehabilation Centre (CBR), Gerempung Orang Buta, Cheshire Home, Green Ribbon, PIBAKAT. Austistik, Gerempung Buddha, Mental, Single mother enggau Hun Nam Siang Tng.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

SPDP Bekenu nyaup ngelempung penusah peranak Rh Ngindang

Posted: 09 Dec 2013 01:54 PM PST

KUCHING: SPDP Bekenu udah nyuaka bantu RM13,500 ngagai peranak Rh Ngindang di Sg Sebatuk Niah dikena ngelempung tating penusah dituntung rumah angus.

Mandal presiden pampang nya, Peter Jilin ngemansutka duit kediri empu RM2,250 dikena nambahka penyampau duit tulung ari pampang iya.

Sama bisi enggau nyuaka  bantu nya ngagai TR Ngindang Entili di Bekenu apin lama ke udah, iya nya Chairman SPDP Pampang Bekenu Kaunsilor Sebastian Janting enggau sekretari Andrew Abak.

Rumah panjai 40 pintu nya udah angus laban api kena pagi 4 Disember tu tadi.

Lebuh penusah nya nyadi, dua buah kerita pengerara api enggau 13 iku raban pengerara api ari Miri udah datai madamka api sepengudah nerima kangau urung pukul 8.15 pagi nya.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

MPP patut dipadah enggau lengkas enti betapi penanggul

Posted: 09 Dec 2013 01:54 PM PST

KUCHING: Opis Kaunsil Bandar Padawan (MPP) ngelalau semua mensia ke diau di kandang endur nya ngaga riput enggau lengkas enti bisi tepeda lampu jalai ke enda idup pia mega jalai ti balat rusak.

Kaunsilor (Kr) sitak Ulu Padawan Edward Kurik madah, peranak menua nya dilalau meri kerejasama ngagai opis kunsil ngambika ulih nyaup ngintu sereta ngemanah perengka guna ke disedia.

"Enti bisi pinta nyendiakka lampu jalai tauka ngemanah jalai nuju genturung pendiau sereta pia mega bisi tepeda lampu jalai ke enda idup, sida diperansang ngenataika riput nengah alur ti patut ke alai ketuai patut ngenataika pinta nuju kaunsilor ke megai kuasa.

"Anang ngelalai penanggul enti nemu pekara nya sigi salah, udah nya bejaika MPP ketegal enda ibuhka pemaik genturung pendiau," ku iya maya bejadi Program Pemansang Komuniti MPP ba Kampung Bisira Rayang enggau Kampung Stabut, Jalai Lama Padawan Hari Enam tu tadi.

Bejaku ngagai pemberita udah nya, Edward madah program diatur MPP lalu sejalai enggau pinta Kepala Menteri Pehin Sri Abdul Taib Mahmud ti deka meda tiap opis kaunsil kandang menua ngerapit kaul enggau mensia mayuh.

Ba MPP, iya madah opis kaunsil nusun program nitihka zon sereta nitihka kaunsilor ke megai kuasa. Ungkup menua Ulu Padawan, program berengkah 23 November di Kampung Abang.

"Program deka diatur ba tiap genturung pendiau ke alai kitai ngarap ulih ngerapit kaul entara opis kaunsil enggau peranak menua. Ketuai genturung pendiau Bisira Rayang enggau Stabut, Rining Tai Bisira sereta Jugag Singan gaga meda pemujur program," ku iya.

Lebih 160 iku datai ngulu program di Bisira Rayang enggau Stabut ke alai sida disereta 69 iku pelajar ari Universiti Teknologi MARA (UiTM) Kota Samarahan lalu begempung ngadu pengawa beripai seraya nanam pun kayu.

Licha senentang servis ngumpul uras bisi dipejurai Hary Busan ari MPP lalu Lecturer ari UiTM Kota Samarahan Oriah Akir bejuraika 'Program Mengubah Destini Anak Bangsa'.

Konsultan ari Amanah Saham MARA (ASM) Nadia Abdullah meri licha senentang atur beranakka puku lalu meri penerang senentang chara ngatur belanja.

Edward ke mega Sapit Pekara Wang Parti Rakyat Sarawak (PRS) ngagihka pom Yayasan Teras ngagai nembiak sekula ngambika tau dikena minta sekulasip nampung pelajar ngagai palan pelajar tinggi.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Bekempit enggau perintah ngambi teulihka pemansang

Posted: 09 Dec 2013 01:51 PM PST

by Judan Bungap. Posted on December 10, 2013, Tuesday

Atur pemansang muntang dipejalai enti peranak rumah panjai ngaul diri enggau pengari rayat

KANOWIT: Kaban Kunsil Nengeri (ADUN) Ngemah Alexander Vincent ngelalau peranak menua pesisir lebih agi ari rumah panjai bekempit enggau perintah ngambi muntang teulihka penguntung ari semua program atur pemansang.

Iya bejaku munyi ba sebengkah pengawa ke alai iya ngungkupka RM30,000 Projek Mit Menua Pesisir (MRP) ngagai Rumah Sandau Ayu di Mapai Ili ditu empai lama ke udah.

Bantu nya dikena nyaup ngerataka taba rumah panjai baru sida dia.

Kelimpah ari nya, iya mega bisi nyuaka RM4,000 ke belanja dikena rumah panjai nya.

Berebak enggau nya, Alexander nerima urung 100 iti pom masuk nyadi kaban Parti Rayat Sarawak (PRS).

Pengawa nya dikemataka Sekretari PRS Pampang Ngemah Anyie Jana enggau Ketuai Raban Nembiak Ramba Resang.

Bekaul enggau bantu nya, bala dia udah nganti bantu dikena nyaup ngentak rumah panjai baru sida urung iya empat taun ke udah.

Kepenudi ba 2011 maya Kaban Parlimen Kanowit bisi nyuaka bantu RM25,000.

Ba jaku iya maya pengawa nya, Alexander ngelalau bala ba menua pesisir ngambi ngetanka sukung ngagai pegai perintah Barisan Nasional (BN).

"Enti kita besemak enggau perintah dia kita deka ngasaika macham bengkah bantu nyengkaum ungkup nengah atur pemansang MRP tu.

"Aku ngarapka sida ti empai nemu pengelebih tu lengkas nukar runding ngambi tau pulaika penguntung ngagai pengidup jemah ila.

Iya madahka sida enda ibuh berasai sanggu mantaika penanggul ke bisi nuntung ngagai pengari rayat BN laban penanggul nya deka diputarka.

Alexander mega ngelalau bala ke bisi datai ngambika enda salah peragam senentang bantu ke diberi perintah dikena nyukat kelinggi Tanah Adat Bansa Asal (NCR).

Ambika chunto neladan rayat di Betong ti nyukung bendar bantu nya, pia ku iya.

Ku iya, atur nya mega disukung Menteri Besai Datuk Seri Najib Tun Razak nengah bantu RM80 milliun dikena program nyukat kelingi tanah NCR.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

PKR Miri ngatur pengawa beserumpu makai malam dikena ngulihka belanja

Posted: 09 Dec 2013 01:50 PM PST

MIRI: Parti Keadilan Rakyat (PKR) Miri deka ngatur pengerami makai malam mai tuju deka ngumpul pan dikena mantu orang ke begunaka bantu ke diau di menua pesisir.

Pengerami makai malam seraya ngumpul pan nya deka diatur kena 18 Disember tu di Boulevard Restaurant besuluka rambai jaku 'Who Cares? We Care,' berengkah jam 6.30 lemai.

Ketuai PKR Miri ke mega Kaban Parlimen Miri, Dr Michael Teo madah, pan nya diguna orang ke seranta ari menua pesisir nurun ke pasar lebuh ngaga dokumen sida.

"Tu setegal, penanggul wang nyadi sebengkah pekara ke besai ke ditapi sida ngulihka surat beranak enggau kad pengelala. Indah tu penanggul ke ditapi sida ari menya," tambah iya.

"Sida ke nurun ke Miri betapi enggau penyuntuk duit ringgit laban ungkus pejalai ke tinggi lebih agi sida ke semina bepanggai idup ba asil utai tanam," ku ambah iya.

Iya madah, ungkup ungkus pejalai aja sida begunaka belanja lebih RM100 bisi nya lebih  RM300 enti sida nya jauh agi bedau nyengkaum ungkus nyuwa hotel enggau makai ngirup sepengelama sida diau di Miri.

"Dalam sebulan, pukul rata 20 nyentuk ke 30 iku orang ari menua pesisir kelebih agi ari di Baram datai minta bantu duit dikena nampung ungkus pejalai enggau suwa bilik di Miri sepemanjai sida diau ditu sama meh nya maya minta, tauka ngambi dokumen ke udah tembu gaga," ku terang Dr Teo.

Berindik ari gaya utai ke nyadi dikena mantu peranak dia mutarka penanggul sida, PKR Miri enggai enda pan ngatur pengerami pengasih dikena ngumpul wang turu setegal sida nadai teulilhka pan ari perintah ungkup tuju nya.

Bisi datai Kaban Kunsil Nengeri (ADUN) Pujut, Fong Pau Teck.

Kelimpah ari makai malam, pengerami nya mega diatur beserimbai enggau pengawa mantar Krismas sereta PKR  beterima kasih ngagai bala penyukung sida ba pemenang parti maya PRU13 tu tadi.

Seraya nya tikit berega RM50 seiku tauka RM500 semija (10 iku) udah belabuh dijual.

Penyampau 40 buah mija udah disediaka ungkup pengerami nya ila. Orang ke bisi ati deka meli tikit tau ngiga Bill Kayong nengah lumur 019-8745020 tauka Mujan (010-5935796).

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.