» »Unlabelled » Lebuh India, Waterfront, Satok, Plaza Merdeka deka nyadi Zon Kapit Tayar BorneoPost Online | Borneo , Malaysia, Sarawak Daily News » Berita Iban - New 2 Borneo

05:05:00

Lebuh India, Waterfront, Satok, Plaza Merdeka deka nyadi Zon Kapit Tayar BorneoPost Online | Borneo , Malaysia, Sarawak Daily News » Berita Iban - New 2 Borneo

Lebuh India, Waterfront, Satok, Plaza Merdeka deka nyadi Zon Kapit Tayar

Posted: 28 Aug 2014 11:29 AM PDT

KUCHING: Dewan Bandaraya Kuching Utara (DBKU) deka neritka Zon Kapit Tayar ba sekeda kan­dang endur ke suah dedat perengka pengangkut nge­lingi mengeri Kuching.

Datuk Bandar DBKU, Datuk Abang Abdul Wahap Abang Julai madah, entara kandang endur ke udah di­pilih iya nya Lebuh India, Waterfront Kuching, Satok enggau jalai ba mua Palan Be­beli Barang Plaza Merdeka.

"Kandang endur ke dipilih nyadi Zon Kapit Tayar dikelala nyadi palan ke suah dedat men­sia bebaikka entukar ti sengapa ngengkah entukar sebarang alai kelimpah ba endur ngengkah entukar ke disedia.

"Kitai deka meda peranak mengeri tu mereti sereta diajar ngambika enda sen­gapa ngengkah entukar sida ti tau ngelubah pejalai entu­kar bukai lebih agi ba maya orang mulai tauka mansang kereja,'ku iya.

Iya mansutka jaku tu lebuh dirandau pemberita maya demonstrasyen 'Kapit Tayar' ba mua Palan Bebeli Barang Plaza Merdeka ditu, kemari.

Iya nambah, chara nya dituku ketegal majak may­uh orang bebaikka entukar ngengkah entukar sida sen­gapa endur diatu.

Ku iya, DBKU udah disikap ngena perengka ngapit tayar nitihka bansa tayar ungkup ke ngelanggar atur nya.

"Kitai deka neritka atur, enda ngira lori tauka bansa entukar ke ditemu diengkah ba Zon Kapit Tayar, ukum ke terit deka dilempai ba orang ke ngempu entukar.

"Chara tu enda nyeli­ahka entukar ke diempu ejensi perintah ke mai lumur QSG. Enti ditemu ngelanggar atur, tayar entukar nya deka dikunchi mega,"ku iya.

Ngenang senentang bayar kompaun ke deka diletak enti orang ngempu entukar deka muka pengapit tayar, iya madah naka ke diatu chara nya diteritka nitihka perintah notis.

"Kitai deka meri notis keterubah ungkup penyalah keterubah lalu notis kedua enti iya nandu penyalah nya.

"Enti ditemu tiga kali ngereja penyalah, kami nadai dua tiga ngeletak bayar kom­paun nitihka undang-undang opis kaunsil kandang menua (PBT) iya nya enda ngelui ari RM100," ku iya.

Iya nambah, entukar ke udah dikunchi deka diirit ngagai endur bukai enti orang ke ngempu entukar nya enda datai dalam timpuh 4 jam.

Bela datai, Kaban Dewan DBKU Datuk Wee Hong Seng enggau Sapit Direktor DBKU Kartina Zamhari.

Print Friendly

Kebuah tanah nya dikelaung, diserungkai: Leon

Posted: 28 Aug 2014 11:26 AM PDT

Peranak genturung pendiau Pakit nyerungkai ulah seiku pengulu ke dipelabaka salah nguna kuasa

 Dikarang Chris Bishop //

KUCHING: Kebuah tanah sekeda peranak Genturung Pendiau Pakit, Sri Aman urung 16.5 hektar peme­sai dikelaung ba renggat kedua skim bekebun sawit SALCRA, pengujung iya diserungkai.

Ensanus, pengempu tanah Francis Xavier Dahang, Christopher Jalai enggau Gerajie Jenau niki ngagai Opis DAP Sri Aman lalu be­temu enggau chairman parti nya, Leon Jimat Donald ngenataika sebana tu.

Ku Leon, sida tiga orang ke ngempu tanah bisi nyereta renggat keterubah skim nanam sawit SALCRA di Sri Aman ke alai tanah sida udah ditanamka sawit pengelama 20 taun.

"Diatu, tanah sida nya patut ditanamka sawit baru ungkup renggat kedua skim nya. Tang enggau nadai kebuah ke nyemetak tanah sida ti pemesai 16.5 hektar dikelaung, enda ditanamka sawit.

"Orang ke ngempu tanah ngakun, pengudah dike­laung nyereta skim pengela­ma 5 taun ke udah, sida napi pengusut penatai pemisi lalu pekara nya mega meri pangka ba pengulih asil SALCRA," ku Leon.

Iya ke mega mandal chair­man DAP Sarawak nambah, pengudah dipansik, orang ke ngempu tanah pechaya, jaku tagang ti ngasuh tanah sida dikelaung ari pemansang da­tai ari seiku Pengulu enggau kaban iya di Sri Aman.

Sida mega pechaya, Pen­gulu nya ngambu tanah nya enggi iya lalu deka ngaga projek berumah ba endur nya ke berimbai enggau Opis SALCRA (Pakit).

Pengudah kebuah nya diserungkai, dua polis ripot udah digaga ba Balai Polis Sri Aman ditu.

"Enti tuduh nya amat, pekara tu mandangka pen­gulu tu salah nguna kuasa mangku pengawa nyadi ketuai komuniti, ngayahka pengarap rayat sereta nge­mulaka penyereta skim SALCRA.

"Polis patut mansik kes tu enggau lengkas lalu enti diasaika patut, bai kes tu ngagai ejensi ke ngembuan kuasa ke tinggi agi," tandu Leon .

Print Friendly

Kapit udah sedia endur ngintu Hari Merdeka ke-57

Posted: 28 Aug 2014 11:22 AM PDT

KAPIT: Kapit udah dipilih endur ngintu Hari Merdeka renggat nengeri Sarawak kena 31 Ogos tu. Pasar ke diuan 13,000 iku mensia tu udah chukup nyendiaka diri nyam­but pengerami belabuh ari 30 nyentuk ke 31 Ogos tu.

Chairman pengintu pengerami nya, Tan Sri Datuk Amar Dr James Jemut Masing lebuh bejaku ba aum enggau pengarang berita madah, pengerami nya deka diintu sesedang rami dikena meri basa ngagai penumpang ke udah lesi bebadi ba penusah bilun MH17.

Kena pagi 30 Ogos bisi diatur 'Pelanda Merdeka', lumba bot bekuasa besai ba tebing sungai Kapit lalu mua ke lemai bisi diatur 'Thank Giving Prayer' ba masjid Jabar An-Nur.

Kena pagi 31 Ogos diatur pengawa bejalai bebala mayuh ba Padang Lumba enggau Main ditu ke digulu TYT Tun Pehin Sri Taib Mah­mud enggau Kepala Menteri Sarawak, Tan Sri Adenan Satem sereta bala kabinet nengeri Sarawak.

Ku Residen Kapit, Fedrick John George, Kapit udah se­dia endur ngintu pengerami nya.

Ku iya, taja pan jauh sereta mayuh pengurang tang nen­gah pengeran sereta penyakah semua opis perintah enggau komuniti menua nya, Kapit nguji ngatur pengerami nya enggau naka pemanah.

Ku iya nandu, pengawa ny­endiaka diri udah mujur dipe­jalaika nyengkaum pengawa belatih bejalai bebala mayuh kena 31 Ogos nya ke mungkur 2,000 iku penyereta baka bala nembiak, opis perintah eng­gau NGO ti ngarika 25 buah kontinjen.

Kelimpah ari nya, tebal agi begunan perintah eng­gau sekula udah diias ngena Jalur Gemilang sereta menira Sarawak ke ngintu pengerami Hari Merdeka ke-57 tauka ke-51 ungkup Sarawak.

Beserimbai enggau nya, Balai Dagang China udah ngemansutka belanja dikena meli Jalur Gemilang enggau menira Sarawak ungkup kaban serakup ngambika bisi digitang ba kedai sida.

Chairman Balai Dagang China, Dato Yong Hua Sying udah minta bala raban bisnis ngitang Jalur Gemilang kena mandangka penaluk enggau penyanyau sida ngagai menua Malaysia.

Berebak enggau nya, dua iti menira ke besai udah digitang ba begunan Syarikat Telekom.

Print Friendly

Sekula kluster di Sarawak deka nyadi model di menua Malaysia

Posted: 28 Aug 2014 11:21 AM PDT

KUCHING: Penyulut sekula kluster ba pelajar nyengkaum di menua pesi­sir Sarawak ti ngelui ari dipelaba, disadang deka di­ambi nyadika model menua Malaysia.

Chairman Panel Pen­yanding Penemu, Penyulut Sekula, Opis Menteri Pela­jar Malaysia Tan Sri Datuk Seri Panglima Dr. Abdul Rahman Arshad madah, SK Ulu Lubai ke jauh di ulu entigis diaku Gerempung Pelajar, Sains enggau Adat Asal Pertubuhan Bangsa-bangsa Bersatu (Unesco) nyadi sekula ke pemadu nyulut, gelar ke nadai kala diterima sekula di Semenan­jung Malaysia.

"Tembu ngabas sekeda sekula kluster di Sarawak, tikas penyulut ba sekeda sekula nya chukup tinggi sereta ngelui ari pelaba.

"Ku aku nya 'ngelui ari pelaba' laban sekula nya di menua pesisir. Lebuh kita ninga pasal sekula di mengeri, nadai kita melaba sekula ke baka nya te­japaika prestasi ti pemadu manah laban betapi eng­gau mayuh macham pemar sereta pengurang penyikap tang ukai di Sarawak," pia ku iya lebuh ke dirandau pengarang berita di lobi Kompleks Kaunsil Negeri (DUN) di Petra Jaya, ditu, ensanus.

Ku Dr Abdul Rahman, ari 21 buah sekula kluster ke dikelala di Sarawak, semina semilan buah aja ke bedau diabas iya.

"Sekula ngembuan pe­maik diri ke alai kami deka mantu ngangkatka sekula tu manggai ba tikas antarabansa," ku iya seraya madah, bisi 300 buah sekula kluster ke udah dikelala ba serata menua Malaysia tu.

Kemari iya udah nemuai ngagai Sekula Primari Ma­drasah Datuk Hj. Abdul Kadir Hasan sereta ngaku pengelandik nembiak ba sekula nya bejaku English, kelimpah ari jaku Bahasa Arab enggau Malaysia.

"Keterubah endar aku teperasa deka nemu tikas Jaku English ke diajar nga­gai nembiak dia, tang diatu aku ngaku pengelandik sida ngelui ari sekula bukai.

"Ukai semina landik be­jaku English tang mega Jaku Arab. Nya alai ku aku sekula di Sarawak ditu tau diambi nyadika model (sekula klus­ter)," ku iya.

Iya ke mega Pro Chanselor UiTM dulu ari tu udah nemuai ngagai Kepala Menteri Tan Sri Datuk Amar Adenan Satem ngan­gauka iya bejadika Simpo­sium Gerempung Antara­bansa ungkup Sains enggau Teknologi Pelajar (IOSTE) Borneo Ke-16 ti deka diatur berengkah ari 21 nyentuk ke 27 September tu.

Simposium nya diatur UiTM, Institut Pematih Pengajar Kampus Tun Ab­dul Razak, Institut Pematih Pengajar Batu Lintang eng­gau Opis Pelajar Sarawak, deka ngempuruka bala pemansik, penengkebang polisi, bala pengajar enggau orang seseiku ke ngem­buan penyiru sentang chara 'Sains enggau Teknologi Pendidikan' ulih nyaup ngemansangka global eng­gau penegap seseiku sereta pemereti ati ba tikas antara­bansa.

Nyempulang iya lebuh nemuai nya, Rektor Uni­versiti Teknologi Mara (UiTM) Sarawak Prof Dato Dr Jamil Hamali, Ketuai Unit Komunikasyen Kor­perat UiTM Sarawak Prof Madya Dr Firdaus Abdul­lah enggau Sapit Man­dal Chanselor (Hal Ehwal Akademik) Universiti UCSI Prof Dr Teoh Kok Soo.

Iya nemuai ke Sarawak belabuh ari 24 nyentuk ke 29 Ogos tu ke alai iya deka ngabas mayuh sekula di Pelilih Mit Kuching, Bau enggau Lundu.

Print Friendly

Penyedar, penyiru komuniti ba OKU agi kurang

Posted: 28 Aug 2014 11:16 AM PDT

Taja pan sida bisi penyelai tang ba sekeda pengelandik raban tu nyemaka orang normal

  KUCHING: Tikas penyedar sereta penyiru mensia may­uh ba raban Orang Nyelai Pendiau (OKU) di nengeri tu agi kurang ti ngujungka sida (OKU) dianggap baka mensia kelas kedua.

Direktor Sepital Besai Sarawak (HUS) Dr. Chin Zin Hing madah, isu tauka penanggul raban OKU meng­kang kurang dikemeratka komuniti

"Pengurang enggau penyelai sekalika ba fizikal, mental tauka intelektual sereta kurang dikeibuhka komuniti ngujungka sida dipeda baka mensia kelas kedua.

"Ambika chunto, laban ti nyelai pendiau sida (OKU) enda dikeibuh tauka dikem­eratka dalam makit pengereja pengawa taja pan ke bendar sida bisi pengelebih tauka pengelandik ti nadai bida enggau orang normal, tu ngayanka seraka maya milih OKU diambi mangku pen­gawa enti dibandingka enggau orang normal.

"Tu mega ngujungka OKU bepanggai ba bantu ke diberi perintah laban nadai penatai pemisi tetap," ku iya.

Dr. Chin mansutka pekara nya lebuh bejaku sereta bejadika 'Taklimat Rehabili­tasi Kedua Peringkat Negeri Sarawak', ti diatur Jabatan Rehabilitasi HUS begulai enggau 'Kuching Spinal In­juries Association' (KUSIA) ba Kompleks Belia & Sukan Sarawak ditu, kemari.

Nambahka nya Dr. Chin madah, penyampu OKU ma­jak nambah berindik ari kes penyakit enda berampit baka kemi manis enggau darah tinggi ke ngujungka penyakit kardiovaskular baka strok.

Nitihka ripot Opis Menteri Pengerai Malaysia (KKM) taun 2013, penyakit bekaul enggau penanggul kardio­vaskular ngayanka sebengkah entara 10 kebuah besai dipas­ukka ngagai sepital perintah di Malaysia, ku iya.

"Penyakit ti bekaul enggau penanggul kardiovaskular sereta sistem saraf baka strok mega entara 10 kebuah pemati di Malaysia.

"Penyampau penusah be­badi ba jalai alun sereta ba endur gawa mega ngujungka mai penanggul nyadi OKU," ku iya ti enda madahka penyampau raban OKU di Sarawak.

Ngenang pasal penerang ke diatur dua hari berunggu nya, Dr. Chin ngarapka pengawa nya ulih meri pen­guntung ngagai semua peny­ereta nyengkaum raban perubat, ruang bilik OKU, OKU empu, gerempung ukai dikuasa perintah baka KUSIA, kompeni enggau ejensi perintah iya nya Opis Pengintu Pengelantang Ra­ban Bansa (JKM).

"Kerejasama enggau 'smart partnership' ti bepelasarka 'win-win situation' baka tu deka nyadika penegap ngang­katka raban OKU.

Kelimpah ari nya iya ma­dah, Jabatan Perubatan Reha­bilitasi ba HUS ti diketuaika Dr. Leong Be Kim ba taun 2013 udah bisi ward reha­bilitasi.

Ward rehabilitasi bisi enam buah katil, lalu tang­gungpengawa Jabatan Pe­rubatan Rehabilitasi mega betambah, ambika chunto penyampau pesakit luar taun 2012 bisi 548 iku sereta nambah ngagai 1,262 ba taun 2013, ku iya.

Entara semilan pekara ke dipejuraika ngagai peny­ereta nyengkaum 'General Rehabilitation Management Principles' (Dr. Leong); 'Physiotheraphy Interven­tion for Wheelchair Users' (Jurupulih Perubatan ang­gota, Kia anak Alek); 'MBI & ADL Retraining for People With Diasbility' (Jurupulih Perubatan Carakerja, Siti Aisyah) enggau mayuh pekara bukai.

Nambahka nya tiga beng­kah bengkel bisi diatur iya nya Wheelchair Seating System, Wheelchair Skills Training enggau Demo on Rehabilita­tion Technology.

Print Friendly

Pengerami Makai Lemai SPDP diatur malam tu ba Eastwood Valley Golf and Country Club

Posted: 28 Aug 2014 11:16 AM PDT

MIRI: Parti Demokratik Pro­gresif Sarawak (SPDP), deka ngatur pengerami makai lemai malam tu, 29 Ogos ba Eastwood Valley Golf and Country Club Miri, ke alai nya sebagi ari penemuai peman­gku Presiden SPDP Datuk Seri Tiong King Sing kena nerang ngagai kaban parti nya sentang gaya parti, pengudah presiden SPDP ningkilka diri sereta numbuhka sebuah parti baru.

Ketuai Penerang Nembiak SPDP, Jaya Ramba madah, pengerami makai lemai nya mega diatur dikena ngedutka kaul entara kaban parti nya ari empat buah pampang baka pampang SPDP Piasau, Sena­din, Pujut enggau Lambir.

Semua empat pampang nya besaup ngatur pengerami beserumpu makai lemai ke disadang deka digulu urung 1,000 iku kaban parti.

"Pengerami Makai Lemai ti berambaika leka jaku "Saya Sayang SPDP" nya sebengkah ari program pemandang ngu­bah SPDP ngambika tampak agi rita sereta tau dikearap rayat lalu nyadi parti bepe­lasarka pemansang ke mega sebuah parti komponen Ba­risan Nasional (BN) .

Sukung ke manah ari men­sia mayuh ngagai parti nya mandangka SPDP chakah mutarka sebarang penanggul ke nuntung parti lebih agi pengudah ex- presiden kami ke suba ningkilka diri," ku Jaya madah ngagai The Bor­neo Post.

Ku iya, tiket pengerami makai lemai nya tau dibeli ari Ketuai SPDP Pampang Piasau, Pujut, Senadin enggau Lambir tauka ari komiti peng­atur pengerami, Rexsol Gilum ke alai iya ulih ditelefon nen­gah lumur 016-8572657.

Barang sapa ke ari luar Bandaraya Miri ti bisi ati deka ngulu pengerami makai lemai nya, tau ngenetapka penatai sida ngagai komiti pengatur pengerami.

Print Friendly