» »Unlabelled » Sarawak deka ngemeratka pemansang menua pesisir ba RMK-11, ku Adenan BorneoPost Online | Borneo , Malaysia, Sarawak Daily News » Berita Iban - New 2 Borneo

05:21:00

Sarawak deka ngemeratka pemansang menua pesisir ba RMK-11, ku Adenan BorneoPost Online | Borneo , Malaysia, Sarawak Daily News » Berita Iban - New 2 Borneo

Sarawak deka ngemeratka pemansang menua pesisir ba RMK-11, ku Adenan

Posted: 26 Aug 2014 09:16 AM PDT

SEBUYAU: Sarawak dalam Langgur Pemansang Malaysia Lumpar Ke-11 (RMK11) deka lebih ngemeratka pemansang di menua pesisir ti jauh tinggal dibandingka enggau di mengeri.

Kepala Menteri Tan Sri Datuk Amar Adenan Satem madahka, pemansang di menua pesisir patut dikemerat ngambika takah enggau mengeri ulih dikerapitka agi.

Nitihku iya, kandang endur menua pesisir di Sarawak agi begunaka mayuh perengka guna mensia mayuh laban bisi genturung pendiau tauka kampung bedau ngembuan bekal elekterik enggau bekal ai beresi.

"Dalam RMK-11, kitai deka mekuhka pemansang di menua pesisir. Di mengeri baka Kuching, sibu, Miri enggau Bintulu udah disikap perengka guna mensia mayuh baka bekal ai beresi enggau elekterik.

"Kitai meratika kandang menua pesisir di Sarawak, agi mayuh ti bedau bisi ai, elektrik enggau jali alun," ku iya.

Iya mansutka pekara nya dalam Majlis Ramah Tamah Peringkat DUN N.22 Sebuyau, kemari.

Nitihku Adenan, iya deka bebendar ngulihka ungkup belanja ti lebih mayuh ari perintah besai dikena ngenegapka pemansang menua pesisir nengeri tu.

"Pemesai Sarawak nyau deka sama enggau pemesai Semenanjung Malaysia, nya alai kitai begunaka ungkup belanja ti besai.

"Kitai deka ke pemansang di Sarawak senipak enggau di Semenanjung Malaysia," ku iya.

Ngenang pekara bukai, Adenan madahka, perintah besai enggau Petronas besetuju nambahka penatai pemisi Sarawak nengah asil minyak enggau gis ti diulihka ari nengeri tu.

"Taja pia ppekara tu agi diperunding sereta begunaka timpuh panjai diputarka.

"Aku endang enda setuju enggau penyampau royalti ti diberi ngagai kitai sebedau tu," ku iya.

Lebih ari 5,000 iku orang datai ngagai pengerami nya.

Sama bisi datai ngagai pengerami nya bini Kepala Menteri, Puan Sri datuk Jamilah anu, Menteri Muda Pemansang Industri Datuk Julaihi Narawi, Kaban Kunsil Nengeri (ADUN) Sadong Jaya Aidel Lariwoo enggau ADUN Saribas Mohd Razi Sitam.

Print Friendly

Lau muji pengawa dikereja PIBG SMK Deshon ngisi tabung sekula

Posted: 26 Aug 2014 09:14 AM PDT

Dikarang Judan Bungap

Kelimpah ari ngenegapka kaul entara serakup nya enggau mensia mayuh atur nya nyungkak pengerai selangkuh tubuh nembiak

 

SIBU: Sekolah Menengah Kebangsaan (SMK) Deshon udah mujur ngatur Jogathon Gerempung Apai Indai enggau Pengajar (PIBG) sekula nya kena Hari Enam tu tadi.

Temenggung Vincent Lau Lee Ming dipebasa bejadika atur pengawa nya.

Ba jaku iya, Lau muji sekula nya ke udah bebendar ngemujurka pengawa nya ti ngembuan tuju deka nambahka wang turu dikena ngemansangka sekula kelimpah ari ngenegapka kaul pengereja pengawa ari sekula, pengajar, nembiak enggau raban PIBG.

"Pengawa tu mega muka awak ngagai nembiak betemu sereta begulai enggau mensia mayuh lalu ngenegapka kaul sida enggau orang bukai," ku iya.

Nambahka nya ku Lau, pengawa nya mega diatur seririh enggau peransang perintah, '1Student, 1Sport, 1Malaysia'.

"Kelimpah ari nya, pengawa tu mega tau nempa nembiak ke bepengerai sereta bedisiplin," ku iya madahka baru.

Maya tu mega, Chairman PIBG SMK Deshon Ting Sing Chui madah, pengawa sida nya ngembuan juluk ati deka ngumpul turu RM60,000.

"Batang tuju kitai iya nya deka ngiga belanja dikena masang 20 unit 'LCD Projector' dalam kelas.

"Kelimpah ari nya mega, kitai deka ngena turu tu ngemujurka program nembiak lebih agi bekaul akademik enggau program luar kelas," pia ku iya madah.

Pengawa sehari nya bela digulu Kepala Pengajar SMK Deshon Nicholas Bamphied.

Print Friendly

John: Gitang Jalur Gemilang, menira Sarawak kena ngayanka penaluk ke menua

Posted: 26 Aug 2014 09:12 AM PDT

KAPIT: Residen Pelilih Kapit, Fedrick John George kena lemai Hari Satu tu tadi udah bejadika pengerami kimpin nambaika Jalur Gemilang sereta nyadung menira menua Malaysia enggau Sarawak ngagai bala ketuai sekeda opis perintah ditu.

Kimpin nambaika Jalur Gemilang sebengkah chara ke mandangka penaluk diri ngagai menua Malaysia beserimbai enggau pengerami ngintu Hari Merdeka kena 31 Ogos tu.

"Semua begunan perintah enggau ke bekaul enggau perintah baka sekula, begunan kedai enggau genturung pendiau diperansang ngias rumah enggau premis sida ngena Jalur Gemilang tauka menira Sarawak kena mandangka pengangkun diri ke menua Malaysia. Kapit deka nyadi tuai rumah ngintu pengerami ba tikas menua Sarawak taun tu, nya alai semua peranak menua tu dipinta bekerejasama ngitang Jalur Gemilang", pia ku Fedrick

Pengawa nyuaka menira nya udah dipejalaika ba lobi Kompleks Nengeri Bletih sereta digulu bala ketuai opis perintah enggau bala ketuai raban bansa.

Bela bisi datai maya nya, DO Kapit, Elvis Didit, SAO Awang Mohd Nizam, Irene Merang enggau Karon Mapus sereta Temenggung Tan Kian Hoo.

Dulu ari tu, Opis Pelilih Mit Kapit udah nulis surat ngagai orang ti ngempu rumah kedai ngambika sida ngechat baru kedai sida ngambi manah dipeda sereta ngitang Jalur Gemilang maya bulan merdeka tu.

Opis Penerang Sarawak mega udah ngatur pekit Ngias Lanskap Hari Merdeka ngena Jalur Gemilang tauka menira Sarawak.

Print Friendly

Baram Regatta udah muka peluang dagang ngagai peranak menua nya

Posted: 26 Aug 2014 09:12 AM PDT

MARUDI: Sapit Kepala Menteri ke mega Menteri Pemansang Menua Pesisir, Datuk Patinggi Tan Sri Alfred Jabu muji orang ke bejual enggau ke ngaga asil pengelandik jari laban ti udah mujur ngelaku sereta nyual produk sida maya pengerami Baram Regatta ke diatur ba pasar Marudi, apin lama ke udah.

Beserimbai enggau pengerami nya, Tan Sri Jabu ke disempulang Menteri Muda Perengkaguna Mensia Mayuh, Datuk Stephen Rundi Utom enggau Sapit Sekretari Menua, Datu Ose Murang udah ngawakka diri ngabas palan endur bejualka barang nyengkaum ari Long Bawan,Kalimantan.

Nengah awak nya mega, Jabu enggau Datuk Stephen Rundi bisi bebelika sekeda barang ti ngerinduka ati baka tepa enggau sekeda barang bukai.

Enda tinggal nguna awak bejualka barang nya, bini Sapit Residen Miri (Pengawa Rama) Emang Oyo Emang, ke alai iya bela bejualka asil pengelandik jari.

Pengudah dedat digulu lebih 20,000 iku mensia maya pengerami Baram Regatta, diatu pasar Marudi pulai puang baru baka selama. Mayuh mega sekeda kedai kupi tutup kemari laban ti deka belelak dulu pengudah kiruh sereta lelak nyambut mensia mayuh maya pengerami nya tadi.

Print Friendly
We encourage commenting on our stories to give readers a chance to express their opinions; please refrain from vulgar language, insidious, seditious or slanderous remarks. While the comments here reflect the views of the readers, they are not necessarily that of Borneo Post Online. Borneo Post Online reserves the right not to publish or to remove comments that are offensive or volatile. Please read the Commenting Rules.

Ngedut kaul, begulai berami lebih agi besai reti ari perais: Dominica

Posted: 26 Aug 2014 09:11 AM PDT

MIRI: Raban 'Triple KB' taja semina teulihka lumur tiga ba pekit tanda nya, sida ngasaika pengulih nya besai reti.

Pengaga raban tanda tu enda ulih kira maya disebut sida bulih lumur tiga ba Pekit 'Datun Julut' ke diatur di Marudi empai lama ke udah.

"Kitai nemu, pemujur bulih lumur ba pekit ti baka tu ukai semina dijuluk tang reti ti besai ba pengawa tu iya nya kitai mujur ngedut kaul sereta berami begulai enggau raban bukai.

"Perais ti diulih kami nya ke bonus," ku Dominica Tinggang, ketuai raban nya madah ngagai 'The Borneo Post' kemari.

Raban Triple KB tu diarika lapan iku indu bansa Orang Ulu iya nya, Maruna Lian, Rosena Connie, Veronica Oyau, Stella Low Len, Dominica, Christy Lipang, Sulan Ajang enggau Theresa Lirang Wan.

Tim tu sebagi ari 11 raban 'Datun Julut' ke berebut ngulihka gelar dalam pekit nya.

Nitih penerang ari Dominica, raban 'Triple KB' tu ngarika sitak Baram Tengah ba pekit nya.

Pekit tu mega sebagi ari atur pengawa 'Malam Main Asal 1Malaysia' nyerumba pengerami 'Regatta Baram 2014' di Marudi.

Ukai semina gaga menang ku Dominica, sida mega ngena awak nya ngulihka peneleba meda ngena mati diri pengerami Lumba Perau di Marudi.

Print Friendly

Pengawa nyukat tanah ngelantangka ati sida

Posted: 26 Aug 2014 09:11 AM PDT

MIRI: Peranak menua ari Long Seniai, Ulu Sungai Akah, Ulu Baram udah setuju ba pengawa nyukat tanah temuda tauka Tanah Adat Bansa Asal (NCR) sida ke dipejalaika nengah inisiatif baru NCR.

Tukang Wang Komiti Pemansang enggau Pengelikun Genturung Pendiau (JKKK) Long Seniai, Lihan Ding Ngau,59, madah, nya peluang sereta deka nyadika pemun nguna tanah ke enda dikeibuhka sida ngelama tu sereta mega ngemansangka kandang menua nya jemah ila.

"Kami berasai gaga ati setujuka pengawa perintah ti bejalaika atur nyukat perimeter tanah NCR ba Long Seniai, Ulu Sungai Akah sereta mega enggau ati ke lurus mantu rayat ditu ngulihka hak sida nengah atur nya," ku Lihan madah ngagai 'The Borneo Post' kemari.

Ku Lihan, rumah panjai raban bansa Kenyah ke manjai 30 pintu tu urung 300 kilometer ari bandaraya Miri, ulih dilawa ngena kerita ngelama 8 jam pejalai nengah jalai kompeni kayu batang nya diuan urung 100 iku peranak menua nya.

Ku iya, sida udah nganjung peminta nyukat perimeter tanah NCR nya taun nyin tadi sereta udah dikemendarka dalam bulan Ogos tu tadi.

Lihan madah, peranak menua nya lantang ati enggau atur pengawa ti dipejalaika perintah kena nyukat tanah NCR sida, ke alai pengudah nya ila lalu dipejalaika pengawa nyukat lot tanah kekediri ti begunaka bantu ari peranak menua nya.

Ku iya nandu, pemesai tanah NCR ke diempu peranak menua nya urung 3,816 hektar.

Kena 11 Ogos tu tadi, raban ari Opis Tanah enggau Survei (JTS) udah berengkah bejalaika pengawa sida nyengkaum ngena sistem JPS.

"Kami berasai gaga endar ati laban nengah pengawa nyukat tanah NCR nya ulih nyaup nyeliahka tanah pesaka kami ari dikeruga," ku Lihan.

Laban ke jauh di ulu entigis sereta mengkang kering bepegai ba adat lama, gaya di Long Seniai enda sebaka enggau ba sekeda rumah panjai bukai.

Nya begunaka kerejasama ari semua peranak menua ngambika sama bela setujuka tanah pesaka disukat sereta ulih diempu sida, pia ku iya baru.

Pengawa nyukat nya udah belabuh dipejalai kena 11 Ogos tu tadi nengah konsep beripai sereta saup ari JKKK enggau peranak rumah panjai nya, ngambika ba raban ari Opis Tanah enggau Survei nemu garis entara menua sida.

Dulu ari nya, kena 27 March taun tu tadi, raban ari Opis Tanah enggau Survei udah ngatur randau enggau peranak rumah panjai nya seraya meri awak ngagai sida betanyaka sebarang pekara ke bekaul.

Maya nya, genap iku udah setuju ngambika tanah NCR sida disukat nengah inisiatif baru NCR.

Print Friendly