» »Unlabelled » JKKK diperansang ngemeratka pengelikun di rumah panjai BorneoPost Online | Borneo , Malaysia, Sarawak Daily News » Berita Iban - New 2 Borneo

05:05:00

JKKK diperansang ngemeratka pengelikun di rumah panjai BorneoPost Online | Borneo , Malaysia, Sarawak Daily News » Berita Iban - New 2 Borneo

JKKK diperansang ngemeratka pengelikun di rumah panjai

Posted: 16 Aug 2014 12:39 PM PDT

BINTANGOR: Komiti Pemansang enggau Pengelikun Genturung Pendiau (JKKK) ba rumah panjai ditangkan anang sanggu minta jaku ajar ari Opis Penyah Penusah Enggau Pengerara Api (Bomba) senentang chara ngintu pengelikun rumah panjai.

Pemesai Pelilih Mit Menua Meradong Mastapha Julaihi madah, agi mayuh rumah panjai ke lebih agi ba pelilih menua tu jauh ari Opis Bomba tauka empai datai jalai.

"Nya alai, JKKK ngembuan tanggungpengawa ke besai senentang ngintu pengelikun rumah panjai sida.

"Seiti ari chara iya nya, anang enggai datai ngelawa opis bomba minta ajar tauka pekara bukai ti bekaul sebedau ngajar bala bukai ba rumah panjai," pia ku iya madah.

Iya mantaika jaku tu ba atur pengawa Sivik Mesra beserimbai enggau Pengawa Nyuaka Setipikit Ngagai Tuai Rumah Pelilih Mit Meradong ba sebengkah restoren di Bintangor ditu, kemari.

Pengawa nya dipenyadi Sapit Residen Sarikei (pengawa rama) Lim Hock Meng ngarika Residen Sarikei Dahim Nadot lalu digulu Sekretari Opis Kunsil Meradong enggau Julau Adrian Luang, Pengulu Augutine Pau enggau bala ke bukai.

Kelimpah ari nya ku Mastapha, JKKK mega ngarika rumah panjai sida tau berundingka chara dikena ngulihka perengka pengerara api.

"Perengka tu beguna bendar maya bisi penusah angus nyadi ke lebih agi ngagai rumah panjai ke enda datai jalai tauka enda ulih dilawa bomba.

"Kita tau ngena duit JKKK tauka minta saup ari pengari rayat kita dikena meli perengka nya," ku iya madah baru.

Ba pekara bukai, iya mega ngelalau JKKK ngambika chakah agi ngembing bala bukai ngangkatka penatai pemisi diri.

JKKK ku iya, bela megai tanggungpengawa ngembing rayat seririh enggau tuju perintah ti deka ngubah pengidup rayat ba menua pesisir.

"Perintah udah nengkebang mayuh macham bengkah program nyengkaum ba menua pesisir ti bisi bekaul enggau pengawa dikena ngangkatka tikas pengidup.

"Lalu JKKK megai tanggungpengawa mai bala bukai nimbal juluk ati perintah tu," pia ku iya madah.

Berebak enggau nya mega Mastapha ngelalau Gerempung Tuai Rumah Pampang Meradong (PTRM) ngatur program ti ulih dikena nempa penyerakup ba rayat di pelilih mit menua tu.

Ari nya, iya muji program ke diatur sehari nya ti udah ngempuruka bala tuai rumah enggau ejensi perintah sereta berandauka pekara dikena mutarka penanggul ke ditapi ba rumah panjai.

"Seiti ari batang tuju kitai ngatur program ti ngaul bala mayuh iya nya ngetanka penyerakup ke endang udah bisi kenyau menua tu Merdeka 57 taun ke udah.

"Penyerakup ukai muntang digaga laban begunaka timpuh ti panjai lalu kitai rebak maya tu patut ngetanka pekara nya nyentuk ke jemah ila," ku iya madah baru.

Print Friendly

Kapit tuai rumah ngintu pengerami Hari Merdeka 2014

Posted: 16 Aug 2014 12:36 PM PDT

KAPIT: Menteri Pemansang Tanah Sarawak, Tan Sri Datuk Amar Dr James Jemut Masing madah Kapit deka nyadi palan endur ngintu Hari Merdeka Tikas Nasional kena 31 Ogos tu ila, taja pan diintu nengah chara ke mit kena meri masa ngagai penusah ke nuntung bilun MH17.

"Tu aum ke penudi endar diatur enggau komiti pengatur pengawa. Kami udah dipinta nyadi palan endur ngintu pengerami nya. Aku empu deka nyadi chairman program Hari Merdeka, taja pan pengerami nya enda diintu nengah chara ke besai laban ti meri basa ngagai bilun MH17 ke udah dituntung penusah terempas," pia ku Masing.

"Atur pengawa keterubah endar deka dipejalaika kena 30 Ogos, ke alai muak ke pagi nya ba tebing sungai Kapit deka diatur 'Merdeka Powerboat Race 2014' enggau 'Larian Merdeka 2014'. Muak ke lemai bisi diatur 'Thank Giving Prayer' ba masjid Jabar An-Nur. Nangkanka nya kena pagi 31 Ogos bisi diatur pengawa bejalai bebala mayuh ba Padang Lumba enggau Main, ke alai 2000 iku ngarika 20 kontinjen deka digulu Tuai Megai Menua (TYT), Tuan Pehin Taib Mahmud enggau Kepala Menteri, Tan Sri Adenan Satem sereta bala menteri kabinet Sarawak. Enti nadai penanggul ba gaya hari, raban penerejun ngena payung terejun deka mandangka pengelandik sida terejun. Muak ke lemai, pekit lumba perau bekuasa besai deka digulu Kepala Menteri," pia ku Masing pengudang nyadi chairman aum komiti nya ke diatur ba Kompleks Nengeri Bletih kena lemai Hari Lima tu tadi.

Sama bisi ngulu aum nya, Menteri Muda Betanam Betupi Moden Sarawak, Datuk Mong Dagang, Menteri Muda Adat enggau Pesaka Asal, Liwan Lagang, Menteri Muda Menteri Pemansang Tanah, Datuk Haji Abdul Whad Aziz, Residen Kapit, Fedrick John George, Sapit Residen Kapit, Zul Usop, DO Kapit, Elvis Didit, Enjinir Pelilih Kapit, Hassan Ayaw, Enjinir SEB, Mariana Sylvester Panau, OCPD Kapit DSP Peter Umbuas, Pemesai RELA, Hendry Goh, Sekreteri Majlis Daerah Kapit, Yong Ing Chuoenggau bala ketuai opis perintah ke bukai.

Print Friendly

Servis ti dipejalaika MBKS ngasi agi pengudah bebagika zon

Posted: 16 Aug 2014 12:33 PM PDT

KUCHING: Pengawa magi zon tauka kandang endur ngagai pengeraja pengawa tauka raban kaunsilor, sebengkah ari chara Majlis Bandaraya Kuching Selatan (MBKS) meri servis ke ngasi agi ngagai raban bansa ke dipegai sida (MBKS).

Datuk Bandar MBKS, Datuk James Chan madah, nengah chara nya raban kaunsilor ulih ngempitka diri semak agi enggau raban bansa.

Berindik ari nya Chan ngelalau raban bansa madahka terus penanggul enggau peminta sida ngagai MBKS nengah bala Kaunsilor ke megai zon nya.

"Diatu kami (MBKS) udah bisi zon lalu raban Kaunsilor udah bisi berubah runding ke alai sida deka meri servis ke manah agi nengah chara betemu enggau raban bansa.

"Enti bisi penanggul, kaunsilor kami ke megai zon nya deka mantu, berati sereta mendingka penanggul raban bansa.

"Tu sebengkah ari chara MBKS, laban kami deka ngangkatka raban bansa seraya nyadika mengeri Kuching manah sereta ngerembaika mansang, nya alai aram meh kitai semua beserakup," ku iya.

Chan mansutka pekara tu ba jaku pengelalu iya maya pengerami Ramah Tamah Aidilfitri MBKS begulai enggau Komuniti 2014, ti diatur ba Lobi MBKS, ditu ensanus.

Pengerami nya udah dipenyadika Menteri Kunsil Kandang Menua ti mega menteri ke megai tanggungpengawa ngintu MBKS, Dato Sri Wong Soon Koh.

Nambahka nya ku Chan, MBKS mayuh nyendiaka servis bukai ngagai raban bansa dikena nyapai juluk nyadi opis kunsil ba tikas ke pemadu tinggi.

Iya madahka juluk nya ulih dijapai enti bisi kerejasama enggau penyerakup ari semua pupu bansa enda ngira jalai pengarap.

"Kami engka endang bisi pengelemi enggau penimpang tang enti kitai semua beserakup, dia semua pengelemi nya ulih dibali nyadika pengering tauka penegap.

"Lalu penguntung ari beserakup nya tadi ukai semina pulai ke opis bekuasa tu tang mungkur raban bansa," ku Chan seraya minta raban bansa enda ngira bansa enggau jalai pengarap beserakup ngambika idup dalam pemaik enggau pengelantang.

MBKS ba pengerami nya bisi ngagauka raban ari rumah pengandai tuai, gerempung orang buta enggau ke bukai sereta gerempung ukai dikuasa perintah.

Nyerumba pengerami nya kemari, MBKS mega ngintu hari pengada 72 iku pengereja pengawa MBKS.

Kelimpah ari nya MBKS mega nyuaka perais mata duit ngagai anak kaban SOREKA (kelab MBKS) ti nyulut dalam peresa perintah baka UPSR (dua iku), PMR (empat iku) enggau SPM (lima iku).

Sama bisi datai ba pengerami nya, Menteri Muda Pemansang Raban Bansa Datuk Peter Nansian Ngusie enggau bala bukai.

Print Friendly

Perintah nengeri dipinta mayar pampas, geran pindah enggau lengkas

Posted: 16 Aug 2014 09:36 AM PDT

KUCHING: Sapit Menteri Pengeraja Asal enggau Rampa Menua Datuk Seri Dr James Dawos minta perintah nengeri ngelengkas bayar pampas enggau geran mindah ngagai peranak ke kena bungkur projek Tekat Ai Bengoh.

Ku iya, atur nya ulih nyeliah operasyen tekat ai ari tejanggal panjai agi ke alai perintah nengeri patut mutar penanggul ke ditapi peranak menua nya dulu.

"Nuan enda ulih ngampuhka kandang endur tekat ai enti nuan enda mayar pampas sereta geran mindah ti tau ngujungka rayat ngelaban," ku iya pengudah tembu aum begulai enggau Komiti Sekim Pengentap Pendiau Bengoh (BRS)di opis iya (Bt 10) kemari.

Dawos ke mega MP Mambong netapka operasyen Tekat Ai Bengoh chukup beguna dikena napi gaya ubah gaya hari.

Ubah gaya hari diatu kelebih agi maya kemarau panjai tau ngujungka pelilih Kuching kurang bekal ai beresi, pia ku iya.

"Nya meh kebuah palan Tekat Ai Bengoh chukup beguna. Tekat ai nya ulih mantu maya ikas ai ba Sungai Sarawak (Kiri) majak langkang ketegal musin kemarau.

"Kitai patut ngelengkas operasyen. Aku ngasai udah kelalu lama, manggai lapan taun udah tang tekat ai nya lalu bedau bejalaika opersyen.

"Sebarang maya berengkah ari diatu, enti ikas ai ba Sungai Sarawak (Kiri) langkang, orang ke diau ba pelilih Kuching deka betapi enggau penanggul suntuk bekal ai," ku iya.

Dawos madah, enti perintah begunaka tanah NCR peranak menua nya, pampas ke setipak patut dibayar ngagai orang ti beempu tanah.

Tanah NCR ba luar kelingi tekat ai nya urung 4,000 hektar ke alai perintah begunaka urung RM64 juta kena mayar pampas nya.

Dawos nambah, rumah enggau tanah endur peranak menua nya berumah endang udah dibayar pampas lalu isu ke diatu iya nya senentang bayar pampas ungkup tanah NCR sida ti diperambu perintah ke deka diampuh enggau ai.

"Enti perintah enda mayar pampas, sida bisi hak enggai mindah laban tanah NCR nya endang tanah sida ke sah," ku iya.

Kelimpah ari bayar pampas tanah, Dawos mega minta perintah ngelengkas bayar geran mindah baka ke udah dulu disemaya ngagai peranak menua nya.

Ku iya, perintah patut meri geran mindah RM10,000 ngagai tetiap ruang bilik ngambika bisi dikena sida mindahka semua perengka rumah ngagai BRS.

Dawos madah dua pinta nya entara sekeda resolusyen ke ditetap maya aum Komiti BRS kemari.

Iya madah resolusyen deka dianjung ngagai Menteri Pengeraja Asal enggau Rampa Menua Datuk Amar Awang Tengah Ali Hasan.

"Aku empu deka nganjung resolusyen nya ngagai menteri pengudah semua tembu," ku iya.

Print Friendly

Dr Rayong dipilih nyadi Chairman Protem UPP pampang Engkilili

Posted: 16 Aug 2014 09:36 AM PDT

ENGKILILI: Kaban Kunsil Nengeri (ADUN) Engkilili Dr Johnnical Rayong anak Ngipa udah dipilih nyadi Chairman Protem Parti Rakyat Bersatu (UPP) pampang N.28 Engkilili nengah aum bepilih ungkup pampang parti nya ba Opis iya di Pasar Engkilili, kemari.

Berebak enggau nya, Peter anak Jawi dipadu nyadi Ketuai Operesyen Raban Nembiak enggau Bulan anak Melina dipilih nyadi Ketuai Operasyen Raban Indu UPP Pampang Engkilili.

Dr Rayong madah, bisi 2,500 iku kaban udah minta nyadi kaban parti nya naka ke diatu.

"Kami deka terus ngiga kaban baru lalu kami nesau rayat ke empai nyadi kaban ni-ni parti Barisan Nasional (BN) tau nitihka kami.

Tambah mega kami deka nyuluk tagit 5,000 iku kaban ba maya ke diatu," ku iya.

Dr Rayong madah munyi nya ngagai pemberita pengudah nguluka pengawa baum bepilih komiti pampang parti nya ba Opis iya di Pasar Engkilili, kemari.

Nangkan ke nya, Dr Rayong nyadaka teruma kasih ngagai rayat DUN Engkilili laban agi bisi pengandal ngagai iya ngiring UPP pampang N.28 Engkilili.

"Aku ngarap sida terus nyingkang begulai enggau aku ngemansangka sitak DUN Engkilili dibaruh perabung perintah pegai Barisan Nasional," ku iya.

Rambau aum milih komiti protem nya, mensia mayuh bela setuju ngasuh Dr Rayong ngetanka kerusi DUN Engkilili ngena tiket BN maya pengawa bepilih besai nengeri ke deka datai.

Berebak enggau nya bala kaban ke bisi enggau baum bnya madahka sida endang nyukung pengawa ke udah digaga Menteri Besai Datuk Seri Mohd Najib Razak enggau Kepala Menteri, Tan Sri Datuk Amar Adenan Haji Satem.

Bisi 500 iku orang datai maya aum bepilih komiti protem UPP pampang N.28 Engkilili nya.

Print Friendly

UPP ‘A New Beginning’ udah dipenyadi kemari

Posted: 15 Aug 2014 12:40 PM PDT

Surat minta parti nya nyadi kaban Barisan Nasional deka dianjung enda lama agi, ku Wong

Dikarang Chris Bishop //

KUCHING: Parti Rakyat Bersatu (UPP) nadai penanggul berandau enggau ketuai dalam Parti Sa, ati Rayat Sarawak (SUPP) mutarka sekeda bida runding ungkup pemaik komuniti China.

Taja pia, Chairman Komiti 'Pioneer' UPP Dato Seri Wong Soon Koh madah randau nya semina ulih dikemujur enti diatur Kepala Menteri Tan Sri Datuk Amar Adenan Satem.

"Kami ketuai dalam UPP sedia berandau enggau SUPP enggau penetap pengawa nya diatur Kepala Menteri.

"Ba randau nya ila, kitai deka bejaku ngarika UPP lalu ukai ngarika raban ketuai ke udah ditingkil ari SUPP," ku iya.

Wong mansutka jaku tu lebuh dikerandau pemberita pengudah ngemujur pengawa Ngelanchar Parti Bersatu Rakyat (UPP) "A New Beginning' di ringkat 9, Begunan Crown Tower ditu, kemari.

Nyaut tanya bukai, Wong madahka UPP deka ngenataika surat pinta nyereta serakup Barisan Nasional (BN) ba awak ke semak tu.

"Kami ngelempai ngagai Kepala Menteri mutuska pinta UPP nyereta BN. Iya (Adenan) seiku ketuai ke ngembuan mayuh peneleba," ku iya.

Aku enggau Datuk Dr Jerip Susil (Adun Bengoh) mengkang dalam kabinet menteri, Dr Johnnical Rayong (Adun Engkilili) sereta Ranum Mina (Adun Opar) tetap dalam BN ke alai kami endang seruran nyukung BN, tandu Wong.

Ba pengerami ngintu 55 taun penumbuh SUPP kena 8 Ogos tu tadi, Adenan ke nyadi temuai dipebasa lebuh ke bejaku ngansak UPP enggau SUPP ngepunka randau enggau pangan diri ungkup pemaik raban bansa China.

Pechaya penumbuh UPP asil ari penyarut ke nuntung SUPP, Adenan ngasai nadai seiku raban bansa Cina lantang ati meda laya ke nyadi entara raban ketuai dalam parti.

Ku Adenan, kededua parti ti tebal agi ngarika bansa China nya patut ngadu sempekat ngambika sida mengkang bisi pengari dalam perintah Barisan Nasional (BN).

"Aku ngansak SUPP enggau UPP berengkah bejaku enggau pangan diri. Tu meh maya kededua parti tu bejaku lalu ngiga sempekat ungkup pemaik raban bansa China.

"Aku pechaya kita dalam SUPP enggau UPP ngelala sapa munsuh ke endar. Kitai enda ulih ngerampas penuduk ke udah diempu penyakal enti laya tu dipajak," ku Adenan rambau pengawa nya.

Print Friendly