» »Unlabelled » Kenyau taun 2013 mayuh ngasaika penguntung BorneoPost Online | Borneo , Malaysia, Sarawak Daily News » Berita Iban - New 2 Borneo

05:04:00

Kenyau taun 2013 mayuh ngasaika penguntung BorneoPost Online | Borneo , Malaysia, Sarawak Daily News » Berita Iban - New 2 Borneo

Kenyau taun 2013 mayuh ngasaika penguntung

Posted: 21 Aug 2014 10:24 AM PDT

Projek iM Sarawak udah mujur nguntungka lebih 147,000 iku peranak menua ti begunaka bantu

KUCHING: Projek iM Sarawak udah meri pengun­tung ngagai lebih 147,000 iku mensia nengah 115 projek ti udah dipejalaika berengkah ari bulan Jun 2013.

Tuju projek iM nya dikena ngangkatka kualiti pengidup raban bansa di serata nengeri Sarawak, iM Sarawak sebeng­kah inisiatif pemansang rama di baruh 1Malaysia Sarawak Advisory Council (1MSAC).

Dalam licha pandak ke­mari, Kaban 1MSAC Ir­wan Zulkarnain Muhammad Hasbie madahka projek nya mungkur mayuh pekara baka perengka guna, pelajar eng­gau kebukai.

"Naka ke diatu bisi 115 projek udah dipejalaika ti meri penguntung ngagai lebih 147,000 peranak menua ti mungkur kandang menua Limbang, Julau, Sibu, Miri, Mas Gading, Santubong, Lundu enggau Kuching.

"Nambahka nya, projek tu mega bisi dipejalaika di ka­dang menua pesisir Sarawak baka Lusong Laku enggau Long Urun Belaga, Long San di Marudi, Long Semadoh di Lawas enggau menua ke bukai.

"Semua projek tu dipe­jalaika Yayasan 1Malaysia (YR1M) enggau Yayasan 1Malaysia Development Bhd (1MDB) sereta kerejasama ari ejensi perintah sereta entiti menua tu empu," ku iya.

Entara projek ti udah mujur dipejalaika naka diatu iya nya bekal elekterik menua pesisir nengah hidro mikro di Ru­mah Michael Jantan, Bekatan di Julau, sistem pemeresi ai dikena nyendiaka bekal ai beresi di Rumah George, Nansang di Pakan enggau SK Nanga Meluan di Meluan.

Projek bukai nyengkaum Program Berbasikal Belia di Kuching, paip baru dikena nyendiaka bekal ai beresi di Kampung Senibong, Perian, Tebaro enggau Jampari di Lundu, nyendiaka benih padi di Skuduk Chupak di Siburan enggau projek bukai.

"Seiti ari projek di baruh iM Sarawak iya nya Nadi Kasih, tuju iya mantu ngemanahka rumah ruang bilik seranta enggau kurang benasit manah di mayuh endur ba Sarawak.

"Nengah projek tu, iM Sarawak nyendiaka belanja sereta bekerejasama enggau pemesai raban bansa ba pen­gawa ngelala bagi rumah ke patut dikemanahka.

"Tiap rumah nerima bantu baka kereja ngemanahka ru­mah nyengkaum atap, dind­ing enggau lantai rumah ti ulih begunaka belanja nyentukka ngagai RM5,000," ku iya.

Naka Julai 2014, Projek Nadi Kasih iM Sarawak udah mantu 2000 ruang bilik ba kandang endur di Limbang enggau Kuching.

Projek nya deka dikerem­baika ngagai endur bukai ny­engkaum Julau, Sibu, Serian, Daro, Kapit, Lubok Antu enggau ke bukai, ti nagit 1,500 ruang bilik deka dibantu.

1MSAC ti ditumbuhka bulan Jun 2013, ti nyadika penyanding penemu ngagai Menteri Besai ngambika iya nemu nama pekara ke diguna raban bansa di menua pesisir enggau menua ulu Sarawak.

Kaunsil tu bechairmanka Kaban Parlimen Julau Datuk Joseph Salang Gandum lalu kaban iya Kaban Parlimen Limbang Hasbi Habibollah, Kaban Parlimen Mas Gading Anthony Nogeh Gumbek, ti kala nyadi Kaban Parlimen Rajang Datuk Billy Abit Joo enggau Irwan Zulkarnain empu.

Print Friendly

Pengawa mai niang dua menyanak ari pangkalan TUDM ke Pendam Islam Samariang bejalai lanchar

Posted: 21 Aug 2014 10:23 AM PDT

KUCHING: Tusun pengawa penudi dikena nerima penatai bangkai dua beranak ke parai ditabanka MH17 labuh ari Pangkalan Tentera Udara Diraja Malaysia (TUDM) ke Masjid Jamek Negeri lalu ditumbak di Pendam Islam Semaring bejalai enggau lan­char, kemari.

Menteri ba Opis Kepala Menteri (Pekara Islam) Datuk Daud Abdul Rahman madah, tusun pengawa ke penudi enggau raptai 'Istiadat Peng­hormatan Jenazah Tragedi MH17' dikena nerima bangkai dua beranak iya nya 'Allah­yarhamah' Ariza Ghazalee enggau anak iya, 'Allahyarham' Muhammad Afif Tambi ti datai seharitu (kemari), nadai napi sebarang penanggul sepeman­jai isitiadat nya.

"Raptai istiadat dipejalaika enggau lanchar sereta pen­gawa nyangkul lubang pen­dam enggau ke bukai ti dikena pagila (seharitu) semua nya nadai penanggul.

"Aram meh semua kitai besampi ngambiaka semua pengawa ti deka diatur bejalai enggau lanchar sereta semua tusun atur pagila (seharitu) bepanggai ba penatai bang­kai (jenazah) di pangkalan TUDM ditu ti dipelabaka pukul 3.00 lemai," ku iya madah ngagai Utusan Boreno, kemari.

Ku iya, pejalai ti berengkah ari pangkalan TUDM nyen­tuk ngagai pendam Islam Se­mariang dibantu raban Polis Diraja Malaysia (PDRM), ti nyaga jalai ke ditengah perengka pengangkut ti mai 'jenazah' nyentuk ngagai Masjid Jamek Negeri.

Jalai nya nyengkaum Jalan Lapangan Terbang, Jalan Tun Jugah, Jalan Tun Razak, Jalan Datuk Merikan Saleh, Jambatan Tun Sallehudin, laluan tol Zecon, Bulatan Gersik, Bulatan Mahkamah Tinggi Kuching, Jalan Masja, Jalan Tun Abdul Rahman Yaakup, Bulatan Semariang enggau jalai ti nuju Masjid Jamek.

"Aku ngelalau orang mayuh ti deka meri basa ke penudi, ngambika datai tumu agi ke Masjid Jamek dikena nyeli­ahka ari jalai ti sekut sereta ngengkahka kereta ba palan ti udah disediaka piak masjid.

"Maya pengawa ngubur, aku minta ngambika enda ke­lalu mayuh ngenyekutka jalai ba pendam ti mit, meri basa kepenudi ba pendam nya kami lebih ngemeratka ngagai sida sebilik enggau kaban belayan mansa," ku Daud.

Kelimpah ari nya, Ket­ua Bahagian Pentadbiran (Korporat dan Pengurusan) Lembaga Amanah Keba­jikan Masjid Negeri Sarawak (LAKMNS) Abang Bikusary Kadir madahka, pengawa nyikap sereta raptai ti diatur ari ensanus nerima kerejasama ari piak masjid, Jabatan Agama Islam Sarawak (JAIS), Angkatan Tentera Malaysia (ATM) sereta Jabatan Kerja Raya (JKR) Nengeri.

"Naka lemai tu (kemari), penyikap enggau raptai agi diatur laban kami deka ngenukuka tiap tusun atur pengawa pagila (seharitu) be­jalai enggau lanchar," ku iya.

Bekaul enggau 'Istiad­at Penghormatan Jenazah Tragedi MH17', semua enda engkeretik pengelama seminit diatur sereta serata Malaysia, entara pukul 10.45 pagi nga­gai 11.15 pagi.

Ba Kuching, pengawa enda engkeretik nya deka diatur di Medan Niaga Satok, ditu ti dipelabaka berengkah pukul 10 pagi tu.

Sepemanjai ke enda eng­keretik nya, mensia mayuh enggau perengka pengangkut patut ngetu pengelama sem­init sereta macha Al-Fatihah sida ti bepengarap Islam lalu ti ukai bepengarap Islam dipinta besampi nitihka jalai pengarap diri.

Atur pengawa diau enda lama nya deka ditaburka terus nengah stesen radio enggau televisyen.

Mensia mayuh dilalau nge­na gari chelum kena bebasaka pengawa ngulit enggau isitidat basa ke penudi sehari tu.

Print Friendly

Lebih 100 iku pekebun mit sawit mantah pemutus MPOB ti ngarika kompeni besai

Posted: 21 Aug 2014 10:22 AM PDT

SERIAN: Seiku aktivis hak tanah, Nicholas Mujah be­semaya deka balat agi man­dangka pengeringat tauka mantah ngelaban Kaunsil Sawit Malaysia (MPOB) enti sema MPOB majak ngarika kompeni ke besai.

Lebuh bejaku enggau media pengudah bejalaika bantah ba mua opis MPOB Pampang Kota Samarahan kemari, iya madah, MPOB enda patut bechiping ati enggau bala pekebun mit, ke alai MPOB udah minta kilang sawit di Sarawak anang meli buah tandan baru (FFB) ari estet baka ke udah dipadahka sida sebedau tu.

"Aku deka majak mai pekara tu nyentuk ke tikas antarabansa nyengkaum RSPO (Roundtable on Sus­tainable Palm Oil)," ku iya.

Lebih 100 mensia mayuh udah begempuru ba palan endur ngengkahka kerita ba mua opis MPOB Pampang Kota Samarahan berengkah ari pukul 10 pagi kemari seraya mai banner mandangka pengeringat ngagai MPOB laban ti nyeliahka hak sereta enggai meli buah sawit sida.

Tebal agi bala ke enggau ba gempuru nya bala Iban Re­mun ari Genturung Pendiau Lebor enda jauh ari Serian, lalu bala ke bukai nya bala pekebun mit ari Melikin, Pantu enggau Simunjan sereta seiku aktivis ari PKR, Nicholas Bawin. Kelimpah ari nya, seiku ari orang ti mandangka pengeringat nya bisi mai sebuah lori ti ngundan buah sawit ke enda ulih dijual iya.

Taja pia, pengeringat sida bisi tendu mimit lebuh seiku ari pemesai meranika diri ngansak semak ngagai sida mutarka pekara nya sereta nyaut tanya ari sida.

Ku pemesai nya,MPOB Pampang Kota Samara­han nemu pasal penanggul nya, tang ukai ari baruh kuasa sida. Tambah mega tanggungpengawa nya ari baruh bagi pansik enggau pemansang ba baruh organ­isasyen integration research and extension division.

Ku iya, penanggul nya deka dikenataika ngagai bidang kua­sa ke tinggi agi dalam MPOB ba Indu Opis nya di Kuala Lumpur, lalu isu estet nya ari baruh bidang kuasa pemeri lisin enggau penerit adat.

Urung sejam nudah nya, raban nya badu begempuru agi pengudah polis datai kia sereta ngelalau raban nya nganjung pengari sida be­randauka pekara nya enggau MPOB ba opis.

Antara sekeda pekara ti dikerandauka enggau MPOB Pampang Kota Samarahan baka status lisin koperasi Ketuai Genturung pendiau Lebor Jengga Jeli, enggau pekebun mit, laban iya apin lama udah nerima surat minta iya nerangka kebuah enchuri buah ari ladang dikereja begulai enggau TH Pelita Gedong.

Nicholas, ke nyempu­lang Jengga sereta enggau sekeda bala pengari bukai maya aum nya madah, nadai lisin pekebun mit dikunsil tauka ditanka seagi MPOB Pampang Kota Samarahan ngemeratka pekara nya.

Peranak Genturung Pen­diau Lebor kes nya ba Kot Besai Kuching High Court lalu nangkanka nya ba Kot Ngapil ti ngemendarka tanah Adat Bansa Asal diempu Peranak Genturung Pendiau Lebor.

Nitihka ripot media apin lama ke udah, kes kilang ke enggai meli buah sawit baru ari estet nya ukai semina nyadi di Serian aja,tang mega nyadi ba Tinjar, Baram.

Print Friendly

Terenakka reti merdeka ba nembiak, ku Karim

Posted: 21 Aug 2014 10:22 AM PDT

Sida mega patut ngenalamka pemereti ba leka jaku nya ke udah diasai kitai ngelama 51 taun

Dikarang Chris Bishop //

KUCHING: Menteri Muda Pemansang Nembiak Datuk Abdul Karim Rah­man Hamzah meransang raban nembiak meretika enggau dalam reti merdeka lalu bebendar ngangkatka diri ngagai tikas ke tinggi agi.

"Kitai patut nerenak reti merdeka ba tiap iku anak ngambika sida meretika enggau dalam reti merdeka ke udah dijapai kitai penge­lama 51 taun.

"Nengeri sereta menua tu begunaka raban nembiak rebak baru tauka peturun ke ngembuan penau enggau

pengelandik ke tinggi.

"Kitai begunaka peturun ke manah ke tau ngembing nengeri enggau menua ngagai tikas ke tinggi agi ari ke udah dijapai diatu," ku iya.

Iya mansutka jaku tu ba pengawa ngepunka Kembara Merdeka Jalur Gemilang (KMJG) enggau Kimpin Nuat Jalur Gemilang 2014, Opis Pemadah Malaysia (Sarawak) di Amphitheatre, Waterfront Kuching ditu, pagi kemari.

Iya ke mega Menteri Muda Pengawa Berumah nambah, kenyau merdeka ba taun 1963 mayuh macham ubah udah diasai lalu semua nya ungkup pemaik rayat.

Ku iya, pengudah mer­deka gaya politik nengeri tu majak manah lalu nge­muntangka atur perintah ke megai kuasa nusun semua program pemansang.

"Gaya politik ke manah pengudah merdeka ngu­jungka mayuh perengka guna disedia ba tiap pelilih menua ungkup pengelan­tang rayat.

"Enda ibuh jauh kitai be­jalai enti deka meda semua ubah ke nyadi, pejalai ari Kuching ke Miri chukup nyadika saksi semua pe­mansang ke udah ditempa," ku iya.

Enti ba jeman sebedau merdeka, jalai nuju Sibu mengkang bebatu lalu may­uh orang enda berani nen­gah jalai nya ketegal keruga munsuh, tandu iya.

Ngenang kaul ke sama, Karim madah Konsep1Ma­laysia ke dituku ngelamatu patut dikemeran belama ngambika pemaik enggau pengelantang ke diasai ba sebuah menua merdeka ulih diintu manah.

Konvoi Kembara Merde­ka Jalur Gemilang (KMJG) kemari ke digulu mayuh macham ejensi perintah enggau peribit ngejang ngagai Kampung Opar, Bau sebedau ke Lundu.

Bela bisi ngulu atur pen­gawa nya Pemangku Direk­tor Opis Pemadah (Sarawak) Zaini Mohamad, Ketuai Konvoi Abdul Rahman Aziz sereta orang bukai.

Print Friendly

Kena ngemuntangka bantu, veteran soldadu diperansang ngerijista diri

Posted: 21 Aug 2014 10:19 AM PDT

KUCHING: Serakup Veteran Soldadu Malaysia (PV-ATM) ke sebedau tu disebut Serakup Ex-Soldadu Malaysia (PBTM) seruran meransang veteran sol­dadu sekalika bepinchin tauka enda di nengeri tu, ngerijista diri nyadi kaban serakup nya.

Chairman PV-ATM Nengeri Sarawak Spencer Birai madah, pengawa nya deka ngemuntangka veteran soldadu teulihka mayuh penguntung ari bantu ke bisi disediaka.

"Kami minta sereta meransang bala veteran soldadu di nengeri tu sekalika bepinchin tauka enda, ke bedau ngerijista diri nyadi kaban patut berundingka nya.

"Di nengeri tu urung 8,000 iku kaban serakup nya lalu dipela­baka lebih ari 50 peratus bedau ngerijista diri nyadi kaban lalu sida tu tebal agi diau di rumah panjai sereta enda bepinchin.

"Kebuah kami minta veteran tu ngerijista diri nyadi kaban serakup ngambika lebuh anak sida pandai, nyulut ba pelajar, senang kami nguruska sida nyema sida deka minta bantu bukai pan ulih nengah serakup tu.

"Baka pagi tu kami nyuaka Bia­siswa Yayasan Perajurit ngagai anak veteran ti nyulut ba peresa UPSR taun 2013 ," ku iya lebuh dirandau pengarang berita ba opis PV-ATM ditu, kemari.

Kelimpah ari insentif pelajar PV-ATM enggau JHEV (Jaba­tan Hal Ehwal Veteran) mega bisi mantu nyuaka pemeri 'one-off', ngagai penusah pemati (belanja ngubur) enggau mayuh ke bukai.

Ngenang penerima bantu Bia­siswa Yayasan Perajurit, Spencer madah, bisi 11 iku anak kaban veteran ATM nengeri Sarawak nerima bantu biasiswa nya ke udah nyulut dalam peresa UPSR taun 2013.

Iya madah, nya nyengkaum pampang Kuching, Mambong, Serian, Lundu, Tasik Biru, Batu Kawa enggau Asajaya.

"Nambahka nya bisi 18 iku anak kaban Veteran ATM Nengeri Sarawak ke nyulut dalam peresa PMR taun 2013, diatu agi nganti pemendar biasiswa ari Lembaga Tabung Angkatan Tentera," ku iya ti dulu ari nya nyuaka biasiswa ngagai enam iku anak veteran ti nyulut peresa UPSR.

Nembiak ke ulih nerima bia­siswa nya nyulut ba peresa UPSR sereta teulihka pemadu nadai dalam lima matapelajar 4A,1C lalu Bahasa Malaysia enda tau enda teulihka A. Ba peresa PMR, nembiak enda tau enda teulihka pemadu kurang 6A tauka lebih sereta Bahasa Malaysia enda tau enda teulihka A.

Print Friendly

DCCI minta permit kereja peranak Sarawak di Singapore diperunding

Posted: 21 Aug 2014 10:17 AM PDT

KUCHING: Balai Dagang eng­gau Industri Dayak (DCCI) minta atur baru senentang permit kereja di Singapore ungkup peranak Sarawak diperundingka baru.

Pinta tu dikenatai presiden DCCI Datuk Joseph Salang Gandum ba sebengkah aum begulai enggau deligit Singa­pore ti betuaika menteri ba opis menteri besai Grace Fu Hari Dua tu tadi.

Salang nerang ketegal atur baru permit nya, orang gawa bansa Dayak ke beumur baruh ari 36 taun napi pemar teulihka permit.

Pemar nya ditapi ketegal sekeda penetap ti dituku ejensi di Singapore ti nagang peranak Sabah enggau Sarawak ke beumur baruh ari 36 taun gawa di republik nya pengudah sekeda kes belaya nyengkaum kes bunuh bisi ngaul bansa Dayak betaun ke udah, ku iya nerang.

"Aku ngenataika pinta 'spisil' ngambika permit kereja ungkup bansa Dayak ke beumur 36 taun ke baruh diperundingka baru.

"Tajapan pekara tu dibaruh kuasa perintah Singapore, penetap nya udah ngujungka peranak nengeri tu ke beumur baruh ari 36 taun ke ngembuan pengerindu gawa di republik nya napi pemar,"ku iya.

Penetap ke berengkah dituku ba taun 2012 nya udah ngujungka mayuh bansa Dayak (Sarawak) ke gawa di Singapore nadai batang pengawa agi ketegal sida enda ulih ngemanjai timpuh permit diri lalu ngujungka sida gawa di Johor.

Bepelasarka riput media, per­anak Sarawak kelebih agi ke ngembuan pengelandik angkun teulihka pengawa ba industri minyak enggau gis, fabrikasyen sereta gudang.

Ba aum ke sama, sekeda isu ke bisi dikerandau iya nya senentang peluang ngerebut makit dagang di Singapore.

Salang mega madah dikena ngemujur juluk dagang nya, penerbai bilun terus ari Sibu ke Singapore ti mai produk menua tu kelimpah ari mai orang numpang patut diperunding.

Dikerandau mega, sekeda orang dagang Singapore keran deka numbuhka dagang di Sarawak lalu meri peluang ngagai raban nembiak peranak nengeri tu ngulihka peneleba nyadi man­ager sereta raban profesional.

Fu ke mega Menteri Rampa Menua enggau Pengeraja Asal (Ai) II sereta Menteri Luar II disempulang Konsulat Besai Singapore ke Malaysia Ong Keng Yang sereta sekeda pemesai ari opis menteri enggau ejensi ke bekaul.

Sida seraban nyempulang Fu ke benung nemuai kereja ngagai Sarawak berengkah Hari Dua nyentuk Hari Lima (sehari tu).

Isu besilih pelajar entara nem­biak sekula sekondari ari Singa­pore enggau nengeri tu mega bisi dikerandau.

Konsulat Besai Singapore ke Malaysia ngenataika pengangkun iya ngemujurka juluk nya lalu DCCI ngenataika penyanggup meri bantu ba atur tusun pengawa kelebih agi ke ngaul sekula di menua pesisir ke tebal agi ngarika pelajar Dayak.

Disetuju, program nya ulih nyaup meri peneleba ngagai pela­jar Singapore meretika Sarawak enggau peranak nengeri tu.

Print Friendly