» »Unlabelled » Saup KDC enggau opis pengerai nengah LA 21 BorneoPost Online | Borneo , Malaysia, Sarawak Daily News » Berita Iban - New 2 Borneo

05:03:00

Saup KDC enggau opis pengerai nengah LA 21 BorneoPost Online | Borneo , Malaysia, Sarawak Daily News » Berita Iban - New 2 Borneo

Saup KDC enggau opis pengerai nengah LA 21

Posted: 17 Aug 2014 09:30 AM PDT

Komuniti rumah panjai patut ngemeratka pemeresi payung rumah kena nyeliah pengelekai penyakit

KAPIT: Opis Kaunsil Peli­lih Mit Kapit (KDC) udah mujur bejalaika program pemansang komuniti sereta Local Agenda (LA) 21 di Rumah Gerunsin Pagang, Nanga Nyimoh, Song kena 14 enggau 14 Ogos tu tadi.

Tu ti ketiga kali KDC udah ngatur program ti sebaka be­gulai enggau sekeda ejensi ke ukai dikuasa perintah (NGO) nyengkaum Song Lions Club, Fire Fighting (BOMBA) Volunteers sereta Sarakup Indu Dayak Sarawak (SIDS) pampang Song.

Kelimpah ari kena ngedut kaul entara opis sereta NGO enggau peranak rumah panjai, atur pengawa nya mega dike­na neleba pengeraja pengawa seraya nyempil sida begulai enggau pupu raban bansa.

Program tu mega menche­lakka mata sereta pending semua tentang pemesai reti ngemanah sereta ngemeratka pemanah rampa menua nen­gah program LA 21.

Sekeda ari atur pengawa ti bisi dipejalaika maya nya, lumba enggau main renggat beperindang, meresi kandang pendiau sereta nyembur rac­hun dikena nagang nyamuk aedes betelu.

Adap ke malam mega bisi diatur randau pasal chara nyaga pengerai enggau pengelikun begulai enggau opis kaunsil, opis pengerai, BOMBA, opis Betanam Bet­upi, KEMAS sereta polis.

Nengah pengawa bu­kai, opis kaunsil mega bisi muka kaunter ke endur sida ngumpul chukai. Tembu pen­gawa bukai, pekit 'poco-poco' mega bisi diatur kelimpah ari bekaraoke.

Ba hari ti penudi, kena 15 Ogos, urung pukul 7.00 pagi bisi diatur pengawa eksesais bebala mayuh lalu ditangkanka pengawa beri­pai meresi kandang payung rumah panjai.

Mayuh pengawa bukai ungkup raban nembiak baka bemain futsal, nyumpit, pekit pemanah ai tuak, pemanah ngepan, pekit betabuh, ngajat sereta sekeda ke bukai bela bisi diatur.

Walikota KDC Philimon Nuing maya bejadika atur pengawa nya madah, opis kaunsil nya kenyau ari taun 1996 suba udah be­jalaika pengawa ti sebaka juluk nengah kimpin meresi kandang menua ti dipunka menteri ti ngempu tang­gungpengawa maya nya, Datuk Amar James Wong Kim Min

"Bepun ari nya, opis kaunsil ari baruh opis menteri nya ngubah mayuh nama tang sama juluk ngatur program nyempil rayat seraya ngemer­atka pengerai kandang menua nengah program LA 21," ku Philimon.

Ngenang pengelekai pen­yakit dengue di serata nengeri tu, Philimon ngelalau mensia mayuh ngambi sereuran ngemeratka pemeresi kan­dang menua diri kena nye­liah palan endur nyamuk betelu.

"Naka ke diatu, bisi 58,000 kes udah diripot di serata menua lalu naka bulan Ogos tu bisi 120 kes dirikod parai ketegal pengakit nya.

"Anang lembau besaup enggau opis pengerai sereta opis kaunsil meresi kandang menua diri seraya nyeliahka palan ke tau endur nyamuk aedes betelu. Enti pemai leka penyakit tu ulih dipunaska, penyakit dengue mega ulih tagang ari ngelekai," tandu iya.

Berebak enggau nya Phili­mon nyuaka bantu RM8,000 ari opis kaunsil nya ngambi bisi dikena ngaga bansal pen­ganti besendi enggau jematan besi ti meraka Batang Katibas, seberai rumah panjai nya.

Pengawa nutup pro­gram nya dipenyadika Sapit Menteri Pemansang Menua Pesisir enggau Kandang Men­uaDatuk Alexander Nanta Linggi ke mega kaban parli­men Kapit.

Bela bisi ngulu atur pengawa nya, Kaban Kaunsil Nengeri (ADUN) sitakKatibas, Datuk Ambrose Blikau Enturan, tuan kunsil Robert Segie ti ngarika tuan DO Song, sapit Walikota Tapah Ata, sekeda kaunsilor, Pemanca Gudang Anak Gramong enggau raban tuai rumah ari rumah panjai ti ngelingi nya.

Print Friendly

RELA patut seruran besedia ngemeratka pengelikun semua

Posted: 17 Aug 2014 09:29 AM PDT

Dikarang Chris Bishop

BAU: Raban Sukarelawan Malaysia (RELA) patut nyikap diri ba pengawa mantu ejensi bukai ngambika tau nentuka pengelikun enggau pengelantang rayat, nengeri sereta menua.

Direktor Besai Opis RELA, Dato Mustafa Ibrahim ma­dah, penyampau raban RELA ti udah manggai tiga juta iku di serata menua diatu, netapka sida sedia meri bantu..

Ari penyampau nya, Mus­tafa madah Sarawak bisi urung 250,000 iku raban RELA ke alai penyampau nya mayuh agi ari ejensi bukai ke ngembuan kuasa.

Ketegal nya, iya madah raban RELA patut mantu ejensi bukai baka ke Polis DiRaja Malaysia (PDRM) ke ngembuan kuasa tang enda ngembuan penyampau tubuh ke chukup.

Raban PDRM nyengkaum polis bantu semina 150,000 iku aja lalu sida ngintu pemaik urung 30 juta rayat di serata menua.

Kitai udah milih raban RELA ke sikar lalu kita patut ngayanka penaluk ngambika bela ngintu pengelikun rayat sereta menua,"ku iya.

Mustafa mansutka jaku nya ba Pengawa Bejadi Nama Baru Palan Operasyen RELA (POR) ngagai Palan Serbis Komuniti RELA (PKKR) enggau Ngelekat Pangkat Bersekutu RELA di Kam­pung Segong, Singai ditu, kemari.

Mustafa nambah, kelim­pah mantu ejensi bukai, raban RELA dilalau seruran ngemerat pekara disiplin ke alai pengawa nya ulih ngintu pemaik nama ejensi ngambika seikas enggau ejensi bukai.

Ngambi chunto PDRM, Opis Bomba enggau Penyela­mat Malaysia sereta 'Jabatan Pertahanan Awam Malaysia', Mustafa madah ketetiga opis nya entara ke pemadu manah di Malaysia.

Aku enggai ninga berita bisi raban RELA diberi jaku lalau ketegal ngelanggar disiplin kelebih agi ba atur ngena unifom RELA.

Enti ngena unifom RELA, pekayan patut dikena enggau chara ke betul. Enti majak enda nemu, peda ba bup se­nentang chara ngena unifom ke bisi disedia.

Chara ngena unifom eng­gau betul ukai semina ket­egal ti deka ngintu pemaik nama ejensi tang nyadika kelai basa kitai ngagai unifom RELA,'ku iya.

Ba pengawa nya kemari, Mustafa bisi ngelekatka tanda pangkat bersekutu ngagai 25 iku raban RELA ti deka mantu pemesai tetap ejensi ba pengawa ngintu pengelan­tang pendiau sereta pemaik raban RELA kelebih agi di Sarawak.

Print Friendly

Konsulat Besai Indonesia di Sarawak ngintu Hari Merdeka ti Ke-59 kemari

Posted: 17 Aug 2014 09:28 AM PDT

KUCHING: Konsulat Besai Indonesia di Sarawak ngintu Hari Merdeka Ke-59 di Jalai Stutong ditu, kemari.

Dikena ngenang hari ti penuh sejarah nya, menira menua nya digitang ngelingi opis konsulat.

"Hari Merdeka mai reti ti besai ngagai tiap iku peranak Indonesia. Hari tu mega ngingatka kitai patut kereja bebendar sereta ngenanka penyerakup ngambika tau napi semua pemar," ku Kon­sul Besai Republik Indonesia Djoko Harjanto.

Iya mega madah 2014 deka nyadi taun ke nentuka kuing menua nya pengudah Indo­nesia milih presiden enggau sapit presiden ke baru ti deka ngiring menua nya ngagai tikas ke tinggi agi.

Nitih penerang ari iya, Indonesia udah ngerembai manah dalam timpuh be­rapa taun ke udah ba pekara rama enggau pemansang ekonomi.

Ba kaul ke sama, Djoko ngenataika jaku pesan Hari Merdeka ari President Joko Widodo (Jokowi) ngagai bala ke bisi datai.

Entara ke bisi datai iya nya raban orang gawa opis konsul, nembiak ke belajar di uni­versiti, raban ari gerempung orang indu (Dharma Wanita) enggau peranak menua nya ke diau ditu.

Print Friendly
We encourage commenting on our stories to give readers a chance to express their opinions; please refrain from vulgar language, insidious, seditious or slanderous remarks. While the comments here reflect the views of the readers, they are not necessarily that of Borneo Post Online. Borneo Post Online reserves the right not to publish or to remove comments that are offensive or volatile. Please read the Commenting Rules.

Seiku peranak NBD enda tetembuka pelanda KM 2014

Posted: 17 Aug 2014 09:27 AM PDT

KUCHING: Seiku peranak Negara Brunei Darussalam (NBD) enda sempat nembuka pelanda Kuching Marathon 2014 lebuh iya rebah di Jalai Muhibbah lalu parai, pagi kemari.

Sapit Kepala Polis Pelilih Menua Kuching Superin­tendan Fauzilan Abdul Aziz madah penyereta ke dike­lala enggau nama Abdul Aziz Japar, 54 dipadah parai di sepital besai Sarawak (HUS) dalam urung pukul 7 pagi.

"Iya bisi enggau orang be­landa ba Kuching Marathon, masuk kategori 5km (kilom­eter) lebuh iya labuh lalu luput ba Jalai Muhibbah.

"Iya lalu dibai ambulans ke bisi nyaga mensia mayuh ba atur pengawa nya lalu ditaban ngagai HUS. Taja pia, datai ba 'Red Zone HUS', iya dipadah parai," ku iya madah lebuh dikerandau pemberita, kemari.

Abdul Aziz bisi enggau bala penyereta bukai ke sama bisi datai di Kuching enggau iya ari Negara Brunei Darussalam hari Lima tu tadi, ke sama deka enggau KM 2014.

Bala pangan iya bukai ke sama datai ari Negara Brunei Darussalam enggau KM 2014 madahka, Abdul Aziz sigi orang ke bagas endar dalam pengawa belanda bansa tu di menua sida iya empu di Brunei tang tu meh keteru­bah, iya enggau marathon tu di luar Negara Brunei Darussalam.

Kebuah iya parai bedau ditemu tang dijangka iya kena sakit tungkul ati.

Kes nya dipadah polis mati ngenyit seraya nganti pemu­tus buntas pansik.

Ba pekara ke bekaul eng­gau KM 2014, dua iku agi penyerta dipasuk ngagai HUS pagi kemari, alai seiku nya ari Kota Kinabalu ditaban ngagai HUS laban iya bisi madahka diri pedis dada lalu seiku agi ari Kenya dipasuk ke HUS laban pedis perut.

Marathon tu keterubah diatur Gerempung Kuching Marathon (KMA) enggau Opis Kunsil DBKU mujur matak urung 5,500 penyereta ari 30 buah menua luar.

Print Friendly

Perintah BN enda ngelaungka rayat ti napi penusah pengidup, ku Harden

Posted: 17 Aug 2014 09:27 AM PDT

SRI AMAN: Perintah enda kala ngelaungka rayat ti napi penusah dalam pengidup tang deka bebendar agi mantu sida ngambika bela ngasaika pengelantang baka orang bukai.

Menteri Muda Pemansang Menua Peisisr enggau Pen­gawa Berumah, Datuk Fran­cis Harden Hollis madah, perintah seruran ngemer­atka pengelantang rayat enda ngira pangkat, bansa tauka jalai pengarap sida.

"Tu mih penyiru ti di­pandangka perintah Ba­risan nasional (BN), semua pananggul ti ditapi rayat endang dikemerat magang," ku iya maya bejaku ba atur pengawa ke endur iya ny­uaka Bantu Ungkup Raban Ke Kurang Bidik Lansik ti diatur Gerempung Ngema­nah Ulah Che Chuan Khor (PMACCK) Simanggang ditu pagi kemari.

Ku iya, sebuah perintah ti tegap enda deka ngelaungka penamah sereta sukung ari rayat tang deka bebendar ngenataika genap bantu ti patut ungkup sida.

"Ari nya, anang sekekali ngumbai perintah nyeliah tanggungpengawa ngem­eratka pengelantang rayat sekalika sida nguan mengeri tauka menua pesisir.

"Genap penanggul ti ditapi sida deka dikemeratka perin­tah lalu diputar nitihka pema­tut dalam atur pemansang ti dipejalaika," tandu iya.

Berebak enggau nya, bisi 250 raban orang ti kurang bidik lansik ari pelilih Sri Aman nerima pemeri baka beras sereta rengka pemakai bukai ari PMACCK Simang­gang ditu.

Bela bisi ngulu atur pen­gawa nya, Temenggong Sii Toh Peng, Penghulu Lee Siang Hua, Kapitan Tay Siaw Chuan, chairman gerempung nya, Kapitan Kuek Aik Seng sereta kaban komiti bukai.

Mara nya mega Harden ngungkupka RM5,000 nga­gai PMACCK ngambika bisi dikena sida bejalaika program.

Print Friendly

Ulah beserekang penemu patut diiar

Posted: 17 Aug 2014 09:26 AM PDT

Dikarang Judan Bungap

Penyerakup tau nentuka bansa Dayak enda tinggal pemansang ari bansa bukai

SIBU: Bansa Dayak patut ngiarka ulah ti beserekang penemu baikka ba pekara politik tauka ba pekara bukai ngambika bansa kitai tampak agi dipeda perintah ari bansa bukai.

Kaban Parlimen Ulu Re­jang Wilson Ugak Kumbong madah, penyerakup tau nen­tuka bansa Dayak enda tinggal ba semua bengkah pekara pemansang nyengkaum pe­natai pemisi.

"Enti kitai Dayak deka tam­pak dipeda, ngambika jaku kitai dipendingka perintah, kitai enda ulih mekuhka ulah beserekang penemu enggau pangan diri.

"Buai pekara ti tau nekul penyerakup nyengkaum ba politik ngambika kitai bansa Dayak ulih besemekih enggau bansa bukai napi pemansang menua," pia ku iya madah.

Iya mantaika jaku tu maya bejadika Pengerami Mantaika Main Asal Dayak Borneo (BDCF) 2014 ditu, malam kemari.

Bela bisi datai maya tu iya nya Chairman Komiti Pen­gawa Sempurai Petrus Ngelai, Pemancha Stanley Geramong, bala kaunsilor enggau bala bukai.

Nambahka nya ku Ugak, ba pun penumbuh menua Malaysia suba, bala pemesai nentuka semua bansa bela bu­lih 'hak' ke sebaka ngambika menua tu ditumbuh nengah penyerakup semua bansa.

"Anang ngelebu bala peme­sai ke dulu suba ti deka meda menua tu ditumbuh bepe­lasarka penyerakup semua bansa.

"Lalu pia mega bala peme­ sai kitai bansa Dayak endang ari menya chakah ngempung semua kitai ngambika ulih beserakup lalu begulai likun enggau pangan diri," ku tandu Ugak.

Ba pekara bukai, Ugak muji komiti pengawa laban ngemu­jurka BDCF taun tu enggau taun-taun ke udah.

Ku iya, pengerami tu ukai semina dikena ngelakuka menua Sibu ulih dipasuk ba kelendar dagang temuai nengeri Sarawak tang beber­itaka nengeri tu menua ke agi mengkang ngenanka main enggau pengarap lama ngagai serata menua.

"Enti ukai kitai bansa Dayak mantaika adat enggau main asal orang bansa bukai sigi enda ulih meda.

"Pengerami baka tu mega engkeman mandang serayaka dikena ngetanka pengeraja enggau pengelebih bansa Dayak ke nadai dikembuan bansa bukai," ku iya madah.

Ugak mega ngarapka pengerami nya enda ditejuka pia aja tang patut disikap enggau manah agi awakka tau mai penguntung ngagai bansa Dayak.

Berebak enggau tu mega iya ngelalau bala apai indai bansa Dayak ngemeratka pelajar anak sida.

"Rebak baru nyadika pela­sar enggau pengering menua tu mansang dudi hari.

"Nya alai, apai indai enda milih sapa-sapa lebih agi bansa kitai Dayak meseti chakah nyengulaka anak diri ngulihka penemu enggau pelajar ti chukup," ku iya.

Print Friendly