HARI KE-300 – “Nadai Pemendar Neruska Pengawa”!

Posted: 19 Aug 2014 11:27 PM PDT

Repot – nadai pemendar dikena neruska pengawa

Raban bala orang ti mantah projek ngaga tekat enggau gerempung NGO ti bukai udah begempung lalu begempuru di Kuala Lumpur sehari tu laban deka mejal atur mantah lalu nagang projek Tekat Baram ti datai ari runding enggau penemu gila Taib Mahmud.

Dalam simpul penemu sida madahka langgur projek nya nadai kuasa dipajakka udah bekau kena tekan undang-undang menua ti udah enda dikibuhka Perintah Sarawak ti lama udah ditejuka.

Baram nya sebuah ari 12 buah tekat baru ti deka digaga ke projek SCORE Taib Mahmud lalu tekat nya udah ngampuhka kandang rampa menua ti enda kurang ari 400 kilometer pesegi lalu mejal enda kurang ari 20,000 iku orang bansa asal pindah ninggalka menua asal sida.

Enti pengawa ngaga tekat ti bukai nya dipajakka ila lebih 2,000 kilometer pesegi rampa kampung di Sarawak deka tengelam dalam ai, sama-sama enggau pendiau bepuluh ribu iku orang bansa asal.

Sehari tu, gerempung NGO entarabansa, International Rivers ti bisi pengelandik ba pekara tekat ai, udah nyerahka repot sida bekaul enggau tekat Baram, beserimbai enggau hari ke-300 bantah sida ngagai projek nya.

Bloked Baram – 300 hari lalu majak nambah, sida mantah langgur projek ngaga tekat ti enda betul ba undang-undang baka ti dikereja Sarawak Energy

Gerempung nya ngarika siti agi peresa ti silik bekaul enggau pengawa ngaga tekat ti udah nuju atur mantah pengawa perintah Sarawak ba pekara nya.

Gerempung pengintu pengelantang mensia di Malaysia empu, Suhakam, Kaunsel Lawyer Malaysia, Suaram enggau gerempung Bruno Manser Fund udah mujur ngeluarka repot sida ti mechat sereta mantah penyalah makai suap enggau penimpang atur dalam langgur projek SCORE.

Dulu ari tu Universiti Oxford bisi ngeluarka repot sida ti nyungkak pengirau ati orang mayuh bekaul enggau pengawa ngaga tekat besai dikena ngeregaska pemansang menua ke semua orang.

Ba simpul pansik sida Oxford nya mayuh agi tekat ti besai-besai nya suah agi mar digaga lalu suah mega tembu semina nyadi projek gajah burak ti enda dipenyadi ti masau duit ari wang turu sesebengkah menua.

Ba pun minggu tu, nyau datai ba gintir menua Vietnam ngambi langkah mentah pengawa ngaga tekat besai baka nya.

Menua nya udah madahka sida ngetu ngaga 12 iti tekat ti besai-besai ti udah dilanggur sida. Sebaka enggau penyampau tekat ti udah dilanggurka perintah Taibenan Satem ti benung napi bantah orang bansa asal Sarawak.

Taib tentu enda nyebut leka jaku "enggai" nyadika saut iya – tang ari ti neruska pengawa nya iya udah ngelanggar kuasa pengelantang enggau pengelikun mensia

Tang, Gabenor Taib Mahmud enggau Kepala Menteri iya Adenan Satem udah nunjukka seduai tetap majakka projek nya digaga.

Baka ti udah kala diterangka kompeni enggi sida Taib Mahmud sebilik enggau kroni iya udah besedia deka ngulihka bebilion-bilion dollar ari pengawa dagang kunsi ti nyelai, ti endur kompeni Three Gorges Dam ari menua China udah dipeda kelalu ransing ati bejalaika pengawa sida di menua Sarawak, terima kasih ngagai duit jali ti datai ari wang turu perintah sida empu
Ba pengujung ila bala orang di Sarawak ti deka bebayarka semua utang menua sida empu nya.

Baka ti udah diayanka dalam repot bekaul enggau projek tekat di menua Sarawak, singkang ke terubah nya deka nimbang penemu sekali ke projek nya tau dipejalaika nitihka undang-undang enggau dalih nirika tukuh ti deka berusakka pesaka rampa menua enggau pendiau enggau daya idup orang bansa asal di bumi Sarawak.

Tang bala pemacha blog tu dipinta macha enggau lenak agi repot EIA Tekat Murum nya.

Dalam repot nya bisi 'penerang ke peminta' ti madahka tukuh ti besai baka Bakun nya beguna bendar dikena mansutka 100% ari kuasa karan nengah arus kabel dalam tasik ngagai menua Semenanjung Malaysia, semadi, baka ti ditemu orang mayuh diserata dunya, Bakun tetap enda ulih ngeluarka kuasa karan baka nya, laban teknologi ti baka nya bedau bisi!

'Penerang ke peminta' Murum nya enda masuk runding, laban batang penemu nya enda ulih nyadi nyata. Kuasa karan ari Bakun enda ulih dianjungka Semenanjung Malaysia … nama kebuah iya madahka agi begunaka 12 buah agi tekat patut digaga, ti berengkah enggau Baram?

Enggau nya 'penerang ke peminta' ke Murum nya semina sebengkah utai ti disadang ulih nyadi nyata tang ke bendar iya, mar digaga nyadi nyata ari segi teknikal iya.

Diatu tekat Bakun semina ulih ngeluarka 50% kuasa karan lalu enda begunaka kuasa karan mayuh agi ari tekat bukai baka tekat Murum.

Enggau nya, nama sadang ba 'guna' kuasa karan ari tekat Baram … enggau 12 buah agi tekat ti bukai?

Langgur projek nya ukai dikena ngeluarka kuasa karan hidro. Langgur nya mechah raban bansa Dayak di menua Sarawak lalu mai penguntung bebilion-bilion dollar ngagai kompeni sida Taib Mahmud sebilik enggau raban kroni iya.

Bacha sereta sidi repot ke baru ari International Rivers.

Tekat Baram baka ti dilukis pengelukis …

Enggau penerang media ari gerempung NGO SAVE Rivers:

Kuala Lumpur: Sebuah empang jalai tauka bloked didirika dikena orang bansa asal mantah sereta nagang pengawa ngaga tekat Baram di Sarawak diatu udah manggai ba hari ti ke-300 sehari tu, kena hari Satu 18hb Lapan 2014.

Nyadika sebengkah pengawa tauka pengerami sehari nya, seraban orang bansa asal ti datai ari kandang menua semak enggau tapak ti diperambu deka endur ngaga tekat Baram, diatu benung di Kuala Lumpur laban ngulu sebuah jaku randau.

Jaku randau nya diatur beserimbai enggau pengawa ngelancharka repot ari sebuah misyen ti ngiga penerang bekaul enggau kuasa pengelantang mensia ari Baram. Dalam jaku randau nya bala orang bansa asal diberi peluang mansutka penemu sida empu ba pansik dalam repot nya.

Mayuh tuduh bekaul enggau penyalah ngelanggar kuasa pengelantang mensia dikereja kompeni SEB ba langgur projek Baram nya. Kena bulan Dua taun tu tadi dia bisi 15 bengkah genturung pendiau raban bansa asal di Baram udah numbuhka siti komiti dikena sida nimbal pengawa SEB ti besilatka jaku tuduh nya. Asil pansik nya diperesa lalu dibandingka enggau garislalau kuasa pengelantang mensia menua Malaysia enggau entarabansa.

Beduduk ba asil pansik nya, tindak kompeni SEB enggau Perintah Sarawak belabuh ngereja pengawa ngaga tekat Baram nya dipeda udah ngelanggar agih undang-undang dalam Konstitusyen Perintah Besai enggau Penetap Kuasa Pengelantang Mensia Gerempung Bansa (UN). Repot ti dikeluarka ari asil pansik nya nerangka tujuh iti kategori ti nyemetak bekaul enggau penimpang atur ti dikereja SEB di Baram.

Ba hari ti sama nya, repot nya udah diserahka ngagai gerempung SUHAKAM enggau ngenataika peminta ari gerempung ngambika – "Ngambi tindak ti patut bejalaika pansik ti ngatika diri ti silik ba tuduh salah pengawa makai suap SEB enggau pejal ngagai orang bansa asal nerima projek nya di Baram." Repot ti sebaka mega deka diberika ngagai sebarang gerempung dagang ti deka beranakka puku dagang sida ba pengawa ngaga tekat di menua Sarawak.

Nitihka Peter Kallang, pengerusi NGO SAVE Rivers madahka, "Orang di Baram ngapil bantu lalu arapka apil sida nya didinga orang mayuh ngambika pengawa perintah ti beduan rayat iya empu nya tau diketuka tekala nya," ku iya nambah, "aku gaga bendar ati laban SUHAKAM udah besedia mendingka serebana kami tu."

PENERANG MEDIA TEMBU NAKA TU

SAVE Rivers nya nyadika tulang belakang raban orang bansa asal enggau gerempung sivil di menua Sarawak, ti bekereja ngemataka kuasa pengelantang mensia sereta nagang sebarang projek tekat kuasa karan ti besai-besai di menua Sarawak.

HARI KE-300 – “Nadai Pemendar Neruska Pengawa”!

HARI KE-300 – “Nadai Pemendar Neruska Pengawa”!

Recent Comments

Archive