» »Unlabelled » ‘Ramah Tamah Aidilfitri’ PUSAKA ditapatka mayuh pengabang BorneoPost Online | Borneo , Malaysia, Sarawak Daily News » Berita Iban - New 2 Borneo

05:05:00

‘Ramah Tamah Aidilfitri’ PUSAKA ditapatka mayuh pengabang BorneoPost Online | Borneo , Malaysia, Sarawak Daily News » Berita Iban - New 2 Borneo

‘Ramah Tamah Aidilfitri’ PUSAKA ditapatka mayuh pengabang

Posted: 19 Aug 2014 09:09 AM PDT

KUCHING: PUSAKA kemari nerima mayuh pengabang maya pengerami Ramah Tamah Aidilfitri PUSAKA 2014, ti diatur ba tengah laman Wisma Sumber Alam, ditu.

Pengerami nya dipenyadika Menteri Pengatur Pemansang Pengeraja Asal ti mega Chairman Lembaga Pengurusan PUSAKA Datuk Amar Awang Tengah Ali Hassan, ti disempulang bini iya Datuk Dayang Morliah Awang Daud.

Ba pengerami nya bala pengabang disediaka mayuh macham pemakai enggau ai irup baka lemang, rendang, satay, mi jawa, mi penang , rojak, ais kacang, kuih, buah rian, buah lensat, buah mutan enggau mayuh ke bukai.

Nambahka nya bala pengabang diperindang raban Pentarama Opis Pemadah ngena mayuh macham lagu Hari Raya kelimpah ari bemukun ari raban Kenyalang 3.

Berebak enggau pengerami tu kemari pengawa nyerahka 'Piala Pusingan Pertandingan Golf' PUSAKA 2014 ari Awang Tengah ngagai Kapten Kelab Golf Sarawak (KGS), Dr. David Sylvester Ling Sheng Tee, sereta nyuaka perais hole-in-one.

PUSAKA mega nyendiaka empat bengkah perais hole-in-one nyerumba Pekit Golf PUSAKA 2014 ti diatur kena 23 Ogos tu ba Kelab Golf Sarawak.

Bisi lima katogeri dipekitka iya nya kategori VIP, temuai dipebasa, PUSAKA enggau anak kompeni, tebuka lelaki enggau tebuka indu, ti udah bisi 240 iku penyereta.

Sebuah kereta Myvi berega RM47,418 (bagi pukulan di Matang Hole 3 & Demak Hole 17) pemeri ari Saratim Insuran Sdn Bhd ke ulih diperebutka pemain golf ti nyereta pekit tu.

Kelimpah ari nya, bisi tiga perais hole-in-one iya nya pakej kemisi nyengkaum tiket bilun pulai mansang ngagai Amerika Syarikat (USA) ti berega RM20,000 pemeri ari Lonpac Insuran Berhad (Santubong Hole 17 & Siol Hole 6); pakej kemisi nyengkaum tiket bilun pulai mansang ngagai London ti berega RM15,000 pemeri ari Multi-Purpose Insurance Berhad (Santubong Hole 14 & Siol Hole 4) enggau jam jari Rolex berega RM15,000 pemeri ari Progressive Insurance Berhad )Matang Hole 8 & Demak Hole 14).

Print Friendly

DAP deka berati enggau silik tinda ngaga jematan Batang Samarahan

Posted: 19 Aug 2014 09:09 AM PDT

KUCHING: Parti Tindakan Demokratik (DAP) Sarawak deka beratika penyilik proses tinda ngaga jematan Batang Samarahan ke beungkus semak RM150 juta.

Chairman parti nya, Chong Chieng Jien madah, kebuah baka nya laban rega nya baka ke enda patut, pengawa betukar tinda tiga projek ke diatur Opis Kereja Raya sebedau tu.

Tiga iti projek ke dipadah nya, projek Fasa 3, Pakej B Jalai Song/Sg Yong (Kapit), Fasa 3 Pakej C. Jalai Song/Sg Yong (Kapit) enggau Jematan Kanowit ke berega nyauka RM100 juta sebuah.

"Kena 16 Ogos 2014, JKR bisi mansutka 'iklan tender' tebuka dalam surat berita menua tu ke deka ngaga sereta nembuka sadang projek Jematan Batang Samarahan.

Laban rikod nya dipelaba bisi nyelai nyadi ba tiga iti projek JKR sebedau tu, DAP (Sarawak) deka beratika enggau penyilik proses tinda ngaga Jematan Batang Samarahan laban enggai penanggul ke empat nyadi baru," ku iya madah ba aum media ditu, kemari.

Chong ti mega nyadi Kaban Parlimen (MP) Bandar Kuching madah, sebedau tu tiga iti projek nya bisi dipansutkka 'iklan tender' ulih JKR dalam surat kabar di menua ke madahka tinda nya tebuka baka projek Jematan Batang Samarahan, tang udah nya nukar jaku sida iya ngagai 'tender terhad', ke nadai madah ngagai urung 1,000 iku konteriktor ke udah nganjung peminta sida.

Taja pia, dalih ke dipadahka Opis Menteri Wang, projek nya deka digaga enggau lengkas tang pengawa nyerahka projek nya bedau ulih diatur nyauka enam bulan laban tinda nya ditukar, ku iya.

Chong madah baru, sekeda konteriktor ke udah di lis ngaga projek nya enda temu tuju penatai sida iya kelebih agi ba pengulih sida iya nembuka projek nya ke dijangka deka ngena belanja RM100 juta sebuah.

"Nitihka tasat ti digaga aku empu, bisi kompeni ke dipilih ari 10 konteriktor ngaga projek nya baru dibuka kena 2011 tu, lalu sekeda nya semina bisi aset urung RM500,000 tang bulih tender ke berega urung RM100 juta nya," ku iya.

Ba pekara nya mega, Kaban Kunsil Nengeri (ADUN) Kota Sentosa nya madah, iya lalu bedau nerima timbal ari Kepala Menteri Tan Sri Datuk Amar Adenan Satem bekaul enggau perambu pemansang tanah perintah dalam pemesai 263.6 ikar di Batu Kawah digagaka rumah ungkup orang ke begaji mit di menua tu.

"Kitai meri awak mimit ngagai Kepala Menteri nimbal kitai laban kitai pan sama nemu iya nadai hari diatu kelebih agi penyarut politik ke ditapi ulih UPP enggau SUPP," ku iya lalu nambah iya empu udah nganjung surat bekaul enggau pekara nya ngagai Adenan kena 31 Julai tu tadi.

Ba perambu projek pemansang tanah nya, Chong madah, urung 3,120 unit rumah flet tinggi ulih dibeli digaga tiga buah bilik tindok enggau dua buah bilik mandi.

Kelimpah ari nya, kandang nya ila deka disikap ngena perengka baka sekula primari, padang alai bemain bol, kot alai bemain Netball enggau mayuh perengka bukai.

Print Friendly

ACS ngatur sembiang bebala mayuh pagila

Posted: 19 Aug 2014 09:09 AM PDT

KUCHING: Serakup Gerija Sarawak (ACS) deka ngatur sembiang beserimbai enggau Hari Merdeka pukul 7.30 lemai pagila ( 21 Ogos) ba Christian Ecumenical Worship Centre, Jalan Stampin ditu.

Atur pengawa besembiang nya diatur ninting taun nengah chara begintir ke alai taun tu pengawa besembiang nya deka diuluka Sarawak Chinese Annual Conference of The Methodist Church.

Rambai jaku atur pengawa besembiang nya taun tu 'Our Father in Heaven', ke alai nengah rambai jaku nya deka ngiring raban Keristin bisi bida chara besembiang ngagai Tuhan.

Archbishop Anglikan Province of Southeast Asia, Pemangku Chairman Kaunsil Gerija -Gerija Malaysia, Mandal Presiden Christian Federation of Malaysia ke mega Chairman ACS Archbishop Datuk Bolly Lapok deka ngepunka sembiang ditangkanka jaku lalau 'Our Father in Heaven' deka dikenataika Reverend Dato Dr Su Chii Ann.

Pengawa merekat bala Ketuai Gerija deka diuluka Sapit Chairman ACS Archbishop Dato John Ha.

Lebuh besembiang nya, sida deka besampai ngagai Tuhan ngambika meri pengelikun, nadai bechiping ati, besembiangka penyuchi gerija- gerija enggau raban Keristin, jampat gerai sereta ulih bebaik, pengelantang pendiau ngagai semua rayat Malaysia enggau penyerakup sereta pengelikun ba semua pupu raban bansa enggau jalai pengarap di menua tu.

Sembiang nya mega ditujuka ngagai bala ketuai menua tu,ruang bilik enggau pangan anak kapal sereta penumpang bilun MH370 enggau MH17.

Laban menua gerija di Sarawak ngembuan mayuh bengkah pupu raban bansa, bacha ari bup injil enggau sembiang deka dipejalaika ngena jaku English, Bahasa Melayu, Mandarin, Iban, Bidayuh, Kayan, Melanau enggau Lun Bawang.

"Semua raban Keristin ditesau ngulu atur pengawa besembiang nya kena ngelaika kitai bisi penyerakup ba Tuhan. Tu meh maya semua raban Keristin datai bebala mayuh besembiangka menua ti dikesayau enggau rayat ke nguan menua tu," ku Sekretari Besai ACS Ambrose Linang ba penerang berita ti dipansutka iya.

Iya mega nesau semua bala YB enggau MPs ke mekut jalai pengarap Keristin di Sarawak ngulu atur pengawa nya.

Kelimpah ari nya, Ambrose minta semua pampang ACS bejalaika atur pengawa nya ba pelilih menua diri.

Print Friendly

Eksport produk kayu ramu ngayan penegap, ku Tengah

Posted: 19 Aug 2014 09:09 AM PDT

Dikarang Rengenyan Labang

KUCHING: Eksport produk kayu ramu Sarawak ari Januari nyentuk Jun 2014 ngayanka penegap dibandingka enggau timpuh ke sama taun 2013, taja pan gaya ekonomi agi lunggar.

Pekara nya dipadahka Menteri Pengatur Pemansang Pengeraja Asal enggau Rampa Menua II Datuk Amar Awang Tengah Ali Hassan kemari.

"Penyampau eksport produk kayu ramu Sarawak ari Januari nyentuk Jun 2014 iya nya RM3.66 billion dibandingka enggau 2013 ba timpuh ke sama semina RM3.61 billion.

"Tu ngayankan penyampau eksport produk kayu ramu Sarawak setengah taun keterubah 2014 nyungkak sepenyampau 1 peratus tauka RM53 juta enti dibandingka enggau timpuh ke sebaka taun nyin kemari.

"Taja pan gaya ekonomi dunya bedau tegap tang penyampau eksport nunjukka penyungkak, nya alai tu kelai ti manah ngagai industri kayu ramu (ba taun 2015)," tandu iya.

Awang Tengah mansutka pekara nya ngagai pengarang berita, pengudah ngulu pengerami Ramah Tamah Aidilfitri PUSAKA 2014, ti diatur ba tengah laman Wisma Sumber Alam ditu, kemari.

Bejaku baru iya madah, dalam setengah taun keterubah 2014, papan lapis entara produk ti mayuh meri penguntung tauka pemadu mayuh di eksport ke menua tasik.

"Papan lapis produk besai sereta mayuh dieksport ba penyampau RM1.98 biilion. Papan lapis meri penguntung 54 peratus ari penyampau rega eksport produk kayu ramu," ku iya ti mega Menteri Pemansang Industri.

Produk kayu ramu besai ke bukai baka batang (RM1,008 juta), kayu sayat (RM270 juta), papan fibre (RM124 juta) enggau venir (RM110 juta), ku iya.

Nambahka nya iya madah, produk ari Sarawak mayuh dieksport ngagai menua Jepun, India, Taiwan enggau Korea.

"Setengah taun keterubah 2014, Jepun makit besai ditapatka eksport produk kayu ramu ari Sarawak enggau penyampau RM1,458 juta tauka 40 peratus ari penyampau semua rega eksport.

"Tiga makit besai ke bukai iya nya India (RM702 juta), Taiwan (RM379 juta) enggau Korea (RM253 juta). Ketetiga makit nya, penyampau eksport bisi RM1,334 juta tauka 36 peratus ari penyampau semua ke dieksport," ku iya seraya madahka Sarawak mega bisi eksport ngagai Timur Tengah, Yamen, Vietnam enggau ke bukai.

Nitihku iya taun nyin kemari iya enggau raban iya bisi nemuai lalu ngiga peluang makit industri kayu ramu ke menua Kazakhstan.

Taja pia iya madahka piak perintah patut ngiga jalai bakani deka mai indusrti kayu ramu ngagai menua, berindik ari menua nya dikelinggi darat magang.

"Kami udah nyain sempekat pemereti ati (MoU) enggau sida (Kazakhstan) lalu sida bisi ngayanka pengerindu ngagai produk kitai, tang berebak enggau tu kitai mega deka beratika isu bekaul enggau perengka pengangkut enggau logistik," ku iya.

Print Friendly

Sapa entara sida sepuluh iku nya teulihka gelar Keling BDCF 2014?

Posted: 19 Aug 2014 09:09 AM PDT

SIBU: Gelar Keling Pengerami Mantaika Main Asal Borneo (BDCF) 2014 deka diperebut 10 iku penyereta.

Chairman Komiti Pekit Mejar Moses Ripai madah, pekit serak tu digulu bala penyereta ke datai ari serata nengeri tu.

"Malam tu (20 Ogos) semua penyereta deka dipandang ngagai mensia mayuh belabuh pukul 9 malam ba panggau BDCF di Dataran Bandar Sibu Fasa I sebedau besemekih ngerebut gelar champian malam pagila.

"Sida deka ngena ngepan komtemporari konsep Dayak," pia ku iya madah ngagai pengarang berita ditu, kemari.

Ku iya, ba malam pekit kepenudi, bala pemekit deka ngena ngepan asal.

Bala penyereta pekit keling tu iya nya John Berendan Sang, Steward Sabang, Frankie Fiq Ngadit, Randy Pangkas, Wellington Kuling, Kenneth Entalang, Kemmy John, Augustine Douglas Steel, Mathias Ribut enggau Cornelius Joseph.

Champian pekit Keling BDCF 2014 deka mai pulai perais mata duit RM3,000 sereta disempulang trofi enggau hamper.

Penuduk lumur dua mai perais mata duit RM2,000 lalu ditangkan perais mata duit RM1,000 ngagai penuduk lumur tiga sereta bela disempulang trofi enggau hamper.

Penuduk lumur empat enggau lima mega bisi mai perais mata duit RM500 enggau hamper," ku iya madahka baru.

Penyereta ke bulih lumur enam ngagai 10 deka diberi perais RM300 enggau hamper.

Sapit Kepala Menteri Datuk Patinggi Tan Sri Alfred Jabu dipelabaka deka bejadika pengawa nutup panggau BDCF 2014 beserimbai enggau pekit ke penudi Keling enggau Kumang BDCF 2014 pagila (21 Ogos) pukul 7.00 lemai.

Print Friendly

Perintah berundingka chara nyeliah jalai sekut

Posted: 19 Aug 2014 09:09 AM PDT

KUCHING: Perintah nengah Opis Menteri Pemansang Infrastruktur benung mansik chara ti engkeman bekaul enggau perengka pengangkut mensia mayuh ti efisien ngambi nyaup mtuarka penanggul jalai alun sekut.

Menteri Muda opis nya, Datuk Daud Abdul Rahman (gambar) madah, ngena perengka pengangkut mensia mayuh ti efisen patut dipejalai kena nentuka komuniti kitai ulih ngurangka diri bekenaka perengka pengangkut diri.

Iya ngarapka komuniti kitai mereti sereta nyukung pekara tu laban perintah enda ulih ngaga jalai alun belama.

"Perintah deka berundingka chara ngatur perengka pengangkut mensia mayuh ti efisen ba kitai ditu kena meransang orang mayuh bekenaka perengka pengangkut nya.

"Tang ti patut dipejalaika kitai diatu iya nya meri penyedar ngagai raban bansa ngambika ngena perengka pengangkut mensia mayuh, lalu tu deka dipejalaika bererenggat ngambika lebih efisen sereta kondusif awakka orang mayuh deka ngena iya.

"Nyema orang mayuh enggai ngena iya, nya ketegal enda efisen. Nyema perengka pengangkut nya efisen, aku arap bendar rayat deka ngena nyemaka bisi jalai ti senipak ngagai endur gawa. Tu meh ke dipansik kami," ku iya.

Iya mansutka pekara nya lebuh bejaku ba 'Majlis Ramah Tamah Aidilfitri' Dewan Bandaraya Kuching Utara (DBKU) di Depo DBKU ditu, malam ensanus.

Ngenang pekara nya baru, Daud ti mega Menteri Muda ba Opis Kepala Menteri (Pekara Islam) madah, penyekut jalai alun enda ulih diputarka taja pan projek ngemesaika jalai, jalai alternatif enggau ke bukai dipejalaika tang enti mensia enggai ngena perengka pengangkut ti disediaka nya, penanggul jalai sekut enda ulih putar.

"Uji kitai meda di Singapore enggau mengeri besai bukai baka Kuala Lumpur, taja pan perengka pengangkut mayuh tang nadai penanggul sekut jalai alun laban sistem ngatur ti manah sereta perengka guna dalam perengka pengangkut mensia mayuh lebih efisen.

"Tu meh nyadika chunto lalu ke penudi iya raban bansa mega patut ulih meretika tanggungpengawa sida sereta ngena perengka pengangkut mensia mayuh ti disediaka," ku iya.

Nambahka nya iya madah, 'bypass' di jalan Depo ti digaga dikena mutarka penyekut jalai alun di Matang mega enda ulih ngurangka penanggul nya di kandang endur nya.

"Kebuah pia laban pemansang majak nyadi di Matang nyengkaum pengawa berumah, kedai majak nambah.

"Nya alai perintah deka nentuka program ngemesaika jalai deka dipejalaika bererenggat lebih agi tiga projek iya nya ngaga 'underpass' di bulatan Datuk abang Kipali Abang Akip ti beungkus RM50 juta ti dipelabaka tembu taun baru.

"Projek kedua iya nya jalai pansut ari Matang ke Sungai Maong ngena ungkus belanja RM140 juta ti dipelabaka berengkah dipejalaika pemadu laun bulan Januari taun baru lalu sebengkah agi projek iya nya ngaga jematan di Jalai Wawasan 2020 ke Rampangi ti benung dipejalaika.

"Ngarapka nengah tiga perojek tu, kitai ulih ngurangka penyekut jalai alun di Petra Jaya tu," ku iya.

Kelimpah ari nya dalam jaku pengelalu pengerami nya Datuk Bandar DBKU Datuk Abang Wahap Abang Julai madahka pengerami nya diatur dikena nempa penegap begulai enggau pangan diri entara pengereja pengawa DBKU, senipak konsep 1DBKU.

"Pemanah kaul entara pengereja pengawa sebengkah ari penyulut organisasi dikena ngemujurka misi enggau visi.

"Nyadi sebengkah organisasi ti bisi pengereja pengawa ke ari mayuh macham bansa enggau jalai pengarap, kitai patut ngemeranka ulah beserakup enggau bekerejasama enggau pangan diri ngambika sama mai pemansang enggau penguntung ngagai menua sereta diri," ku iya.

Dulu ari nya, mayuh macham aktiviti diatur baka enchabut tiket benasit, betanda, pemerindang ari Band DBKU sereta pekit Raja enggau Permaisuri Raya DBKU 2014.

Bisi datai ba pengerami nya kemari, bini Daud Datin Noraini Husin, Direktor DBKU Dr Saadiah Abdul Samat enggau Pegawai Kanan DBKU.

Print Friendly