Formula BN Plus dikena di Sarawak, ku Adenan BorneoPost Online | Borneo , Malaysia, Sarawak Daily News » Berita Iban - New 2 Borneo

---

• Formula BN Plus dikena di Sarawak, ku Adenan
• Kitai kala diungkup nyampau nya, sepuluh peratus nya enda ngenyitka ati, ku Chong
• Adenan keterubah dikerami ba pengawa ‘Ramah Tamah Aidilfitri’ ba indu opis PBB
• Pengawa ngaga Jalai Ba’Kelalan-Bario udah manggai 30 peratus diatu
• Sepital Lawas ba renggat ke dua, Sri Aman enggau Petra Jaya benung ditusun
• PBB minta ungkup setengah ari kerusi baru DUN

Formula BN Plus dikena di Sarawak, ku Adenan Posted: 24 Aug 2014 03:03 PM PDT Dikarang Chris Bishop KUCHING: Kepala Menteri (KM), Tan Sri Datuk Amar Adenan Satem netapka Formula BN Plus deka dikena nyentuk nga­gai maya pengawa bepi­lih besai nengeri ke-12 (PRN12) ke dipelaba deka diatur sebedau bulan Jun 2016. Enggau pemutus nya, ra­ban kabinet menteri ke udah numbuhka parti baru, Parti Tenaga Rakyat Sarawak (TERAS) enggau United People's Party (UPP) deka mengkang megai tanggung pengawa menteri taja pan kededua parti nya apin di­terima dalam gempung BN nengeri. "Aku deka ngena Formula BN Plus dalam atur pengawa perintah Sarawak nyentuk maya bepilih besai nengeri (PRN12) tu ila. "Pengawa PRN dipelaba deka diatur sebedau bulan Jun 2016," ku Adenan. Iya mansutka penetap nya ba sebengkah aum penga­rang berita pengudah aum Komiti Besai Parti Pesaka Bumiputera Bersatu (PBB) ba indu opis parti nya ditu, kemari. Ngenang senentang aum kemari, Adenan ke mega Presiden PBB madah, isu ke bekaul enggau PRN12 udah dikerandau pengelama dua setengah jam. Ku iya, kitai nusun mayuh pelin kena napi pengawa bepilih ti deka datai ke alai pemar ke ditapi rayat dipe­jurai ba aum. "Kitai bejuraika chara mutarka penanggul ke ditapi rayat sereta chara napi pe­nusah ke nating sekeda parti dalam serakup," ku iya. Ngenang senentang For­mula BN Plus, Sekretari Be­sai PBB Datuk Dr Stephen Rundi lebuh dirandau ma­dah, raban menteri ke udah numbuhka dua parti baru deka mengkang dalam kabinet menteri ketegal timpuh nyentuk PRN, agi memekang. "Raban ari kededua parti nya mengkang dalam kabi­net menteri tang sida enda dalam BN, tu meh Formula BN Plus," ku Rundi. Rundi nambah, sebarang penerang senentang TERAS enggau UPP semina ulih di­pansutka kepala menteri lalu ukai ari menteri bukai. Raban ari TERAS ke dalam kabinet menteri iya nya, Menteri Kanan ke mega Menteri Pemansang Rama Tan Sri William Mawan, Menteri Muda Pemansang Industri enggau Tanggung Pengawa Raban Bansa Datuk Peter Nansian, Menteri Muda Betanam Betupi enggau Perengka Guna Mensia Mayuh Datuk Sylvester Entrie, Menteri Muda Pemansang Ruang Bilik enggau Pelajar Anak Mit Rosey Yunus. Raban ari UPP iya Menteri Kaunsil Kandang Menua enggau Pemansang Raban Bansa ke mega Menteri Pekara Wang II Dato Sri Wong Soon Koh, Menteri Muda Pengerai Mensia Mayuh Datuk Jerip Susil.

Kitai kala diungkup nyampau nya, sepuluh peratus nya enda ngenyitka ati, ku Chong Posted: 24 Aug 2014 03:01 PM PDT KUCHING: Pemutus Petronas ngungkupka sepuluh peratus ngagai Sarawak ba 'Malaysia Liquefied Natural Gas Sdn Bhd (MNLG) 4' dipeda singkang ke manah tang perintah nengeri tetap deka nulihka bayar royalti minyak enggau gis 20 peratus ari perintah besai. Menteri Kanan ti mega Menteri Pemansang Tanah Tan Sri Dr James Jemut Masing bejaku munyi nya seraya nim­bal penemu Kepala Menteri Tan Sri Datuk Amar Adenan Satem bekaul enggau perkara nya maya aum media ditu, apin lama ke udah. Masing madah, bayar royalti minyak enggau gis ke Sarawak tau digaga dalam wang tunai tauka utai bukai. "Tu singkang ke manah dipandangka Petronas ke Sarawak meri bayar royalti minyak enggau gis urung 20 peratus…. Nyangka penyam­pau ke dibayar nya enda datai 20 peratus tang deka ngelui ari penyampau bayar ke diterima ngelama tu, ke semina lima peratus. "Perintah nengeri temeg­ahka pemutus Petronas ti deka mayar penyampau tu lalu dalam timpuh ke sama mega, kitai nemu Petronas nyangka begunaka timpuh lama mimit ngeamatka peminta 20 peratus royalti minyak enggau gis laban nya bisi kaul enggau kompeni besai antarabansa," ku iya ma­dah nengah pesan jaku pandak ke dikirum ngagai bilik berita, ditu. Kaban Kunsil Nengeri (ADUN) sitak Baleh nya ngarapka rayat mereti lalu ba timpuh ke sama beterima kasih ngagai Petronas sereta Kepala Menteri ke udah bendar minta pekara nya dipujur. Iya mega madah, perintah nengeri udah minta Petronas mayar royalti minyak enggau gis urung 20 peratus baka ke disetuju semua ADUN maya aum kaunsil nengeri Mei tu tadi. Ba aum media nya mega, Adenan madah, sempekat nya dijapai pengudah perintah nengeri berunding enggau Petronas nyengkaum menua tu dalam industri minyak eng­gau gis menua sereta peminta nambah penyampau bayar roy­alti minyak enggau gis ari lima ngagai dua puluh peratus. "Petronas keterubah iya suba besetuju meri lima peratus sa­ham dalam MLNG 4 tang diatu ditambah ngagai 10 peratus. Tu entara pemujur lalu kitai mega deka majak berandauka pekara nya. Ila aku madah baru ba pen­erang bukai pasal pemansang tu," ku iya madah lalu nandu baru, perintah nengeri enggau Petronas udah numbuhka se­bengkah komiti endur pemesai kanan perintah nengeri enggau pemesai kanan Petronas. Komiti nya ila ku iya, deka ngiga jala ke pengabis manah beratika penyereta Sarawak ba industri minyak enggau gis dalam tasik menua tu. Perintah nengeri enggau ra­yat dikearap enda saru penemu entara syer 10 peratus ngagai Sarawak ba projek 'Malaysia Liquefied Natural Gas Sdn Bhd (MLNG)4' enggau pinta bayar royalti minyak enggau gis 20 peratus ari perintah besai, laban kededua pekara tu enda sebaka. Chairman Parti Tindakan Demokratik (DAP) Sarawak Chong Chieng Jen madah, enti nitih nadai utai ke ngenyitka ati ba pemeri syer nya laban sebedau tu Sarawak kala diberi saham lima peratus nengah MLNG 1 sereta 10 peratus ari MLNG 2 enggau MLNG 3. Berindik ari nya ku iya, perintah nengeri anang enda ingat ngulihka bayar royalti minyak enggau gis 20 peratus ke patut dipinta ari perintah besai baka ke udah disetuju ulih semua ADUN ba Aum Kaunsil Nengeri (DUN) Mei tu tadi. "Penemu bansa nya ti digaga perintah besai semina ngasuh kitai saru penemu entara 10 peratus saham MLNG 4 eng­gau pinta nambah royalti min­yak enggau gis ngagai Sarawak ari lima peratus sebedau tu ngagai 20 peratus."

Adenan keterubah dikerami ba pengawa ‘Ramah Tamah Aidilfitri’ ba indu opis PBB Posted: 24 Aug 2014 03:01 PM PDT KUCHING: Parti Pesaka Bumiputera Bersatu (PBB) keterubah kemari, ngatur pengerami 'Ramah Tamah Aidilfitri' pengudah aum Komiti Kereja Parti ba indu opis parti nya di Jalai Bako ditu. Pengerami nya mega ngelai­ka keterubah Kepala Menteri Tan Sri Datuk Amar Adenan Satem ngerami Aidilfitri begulai enggau kaban PBB kenyau iya megai kuasa. "Kitai udah meda pen­gawa besilih kuasa ari kepala menteri ke dulu ngagai Ade­nan dipejalai engau lanchar. "Penuduk Kepala Menteri chukup tegap ke alai iya mega nyadi presiden PBB. "Nengah Artikel 15 (7), barang sapa ke dipadu ny­adi kepala menteri enggau otomatik deka dipadu nyadi presiden PBB lalu presiden ke diatu patut meri penuduk nya ngagai kepala menteri," ku Chairman Mendam PBB Datuk Amar Asfia Awang Nassar ba jaku pengelalu rambau pengerami nya. Iya ke mega Speaker DUN nambah, penuduk semua rab­an 'Yang Berhormat' chukup tegap nengah Artikel 15 (3) ke alai barang sapa ke nyadi ADUN enggau otomatik deka nyadi ketuai pampang. "Baka nya mega penuduk ketuai pampang mit, kitai ngurangka pampang mit ari beribu ngagai semina 71 aja. "Kitai nginsil 'bahagian' lalu ngemunka 'ranting' ngambika ulih nyeliah penetap ba Seksyen 14, Akta Pendaftar Pertubuhan (ROS) ke alai tiap pampang patut nganjung ripot ngagai ROS. Enti enda dititih, pampang tau dikinsil pengerijista gerempung,"ku Asfia. Nambahka nya Asfia ma­dah, Sarawak chukup untung ketegal bisi kepala menteri baka Adenan ke ngembuan penau ba pekara sejarah, undang undang sereta tusun merintah.

Pengawa ngaga Jalai Ba’Kelalan-Bario udah manggai 30 peratus diatu Posted: 24 Aug 2014 03:01 PM PDT MIRI: Raban Injinir soldadu ke bejalaika pengawa ngaga jalai Ba Kelalan-Bario udah nembuka 15 kilometer tauka ari 30 peratus jalai nya. Berebak enggau nya komu­niti Kelabit ba tanah tinggi Bario deka meda projek nya mujur ditembuka enggau manah. Sapit Direktor Besai ICU ba Opis Menteri Besai, Datuk Ahmad Zaki Ansore Mohd Yusof, Dato Ismail bin Haron (Special Division) enggau Pemesai Opis Pemansang Menua, Datuk Kamal Husin udah ngabas pemujur pen­gawa ngaga jalai nya sereta berati utai ke diguna bukai ba Bario enggau Ba'Kelalan kena ujung minggu nyin tadi. Raban nya udah betemu sereta meri penerang ngagai Menteri Pengatur Pemansang enggau Pengeraja Asal II, Datuk Amar Awang Tengah Ali Hasan sereta MP Lawas, Datuk Henry Sum Agong bekaul enggau tikas pemujur ngaga jalai nya ba Padang Bilun Lawas sebedau mulaika diri ke Putrajaya. "Jalai ke penyauh 15 kil­ometer udah digaga lalu bisi 35 kilometer agi jalai nyam­bung ngagai tanah tinggi nya deka ditembuka," ku Zaki lebuh berandau ba Padang Bilun Lawas pemulai iya ari Ba'Kelalan. Jalai Bario-Ba'Kelalan ke beungkus RM48 miliun nya projek ngaga jalai ti kedua di nengeri tu ke digaga Raban Sol­dadu Malaysia (ATM) ari baruh Strategi Lautan Biru nengah projek Jiwa Murni sida. Jalai keterubah digaga pen­yauh 75km ari Long Lopeng-Ba Kelalan, digaga ngena 'soil stabilization technology' ke ulih ngelimat ungkus melakin jalai nengah chara konven­sional. Kelimpah ari ngena model nya di Marudi enggau sekeda endur bukai di nengeri tu, ATM mega bisi bejalaika sekeda projek bukai di Ma­laysia Timur nyengkaum nyambung sistem bekal ai beresi ngagai menua pesisir, ngaga jematan enggau projek rumah bantu. Jalai Ba'Kelalan-Bario nya berengkah digaga dalam taun 2012 tang tejanggal laban ditagang peranak menua nya ketegal ngachau entali ai ngagai umai sida. Taja pia penanggul nya udah diputar, ke alai projek tu ditampung baru. Pengawa ngaga jalai ke nyambung Bario enggau Ba'Kelalan sebagi ari projek besai ke bukai ti deka ngemu­dahka pemansang dipejalaika di Bario enggau Ba'Kelalan, sereta udah dikemendarka Menteri Besai, Datuk Seri Najib Tun Razak. Menteri nya mega udah minta Perintah Besai ngen­yampatka CIQ di Ba'Kelalan kena nyaga penama sereta pemansut mensia mayuh enggau barang dikena neritka pengelikun ba tanah tinggi Lun Bawang. Berebak enggau nya,Tengah mega bisi ngenang isu bantu ari perin­tah besai ungkup peranak ba Gneturung Pendiau Manan­gah, iya sebuah genturung pendiau orang berikan nebing tasik di Awat-Awat ke ditun­tung penusah angus apin lama ke udah. Ku iya, perintah nengeri tu deka mantu 41 buah ruang bilik ke tasah nya diengkah ba palan sekim pengentap baru ke alai peminta nya deka dianjung ngagai Opis Menteri Besai ngambi ngemudahka bantu ngaga rumah nya dike­mendar ungkup ruang bilik ke tasah nya.

Sepital Lawas ba renggat ke dua, Sri Aman enggau Petra Jaya benung ditusun Posted: 24 Aug 2014 03:00 PM PDT KUCHING: Menteri Muda Pengerai Mensia Mayuh Datuk Dr Jerip Susil madah, Sarawak deka bisi 3 buah sepital baru iya nya di Lawas, Sri Aman enggau Petra Jaya. Ku iya, pengawa ngaga Sepital Lawas udah masuk renggat ke dua diatu lalu Sepital Sri Aman enggau Petra Jaya benung ditusun. "Kitai diatu benung ngatur Spital Lawas ke udah masuk renggat kedua. Sepital Sri Aman enggau Sepital Petra Jaya benung ditusun enggau manah. "Kitai mega benung nyendiaka sekeda klinik di menua pesisir, ku iya ba sebengkah aum pengarang berita pengudah nutup Transborneo Wound Congress 2014 di Hotel Pullman ditu, kilah ensana. Taja pia, Dr Jerip enda nerangka enggau silik senentang ketetiga projek nya. Dulu agi ari nya, iya madah perintah benung ngatur pelin ngelampat timpuh ke udah lama tejanggal ke alai iya pechaya ketetiga sepital nya ulih mantu nambahka penyampau sepital enggau klinik ke dikemisi maya diatu. "Pekara ti dikerunding kitai diatu iya nya nambah perengka ke alai penyampau klinik di menua pesisir sereta sepital mengkang kurang. "Semua nya mengkang kurang taja pan kitai bisi Sepital Besai Sarawak (SGH) Sepital Sibu enggau Sepital Miri,'ku iya. Pekara ti dikemerat kitai dalam timpuh dua taun tu iya nya nambah perengka ba dalam sepital besai ti dikembuan kitai diatu, tandu iya. Direktor SGH Dr Chin Zin Hing ke bela datai madah penyampau belanja ke deka diguna ba pengawa nya chukup besai. Ku iya, opis pengerai seruran begunaka belanja ke lebih, manggai dua kali lipat.

PBB minta ungkup setengah ari kerusi baru DUN Posted: 24 Aug 2014 02:59 PM PDT Dikarang Chris Bishop KUCHING: Setengah ari penyampau semua penuduk kunsil nengeri (DUN) ke baru patut diungkupka ngagai Parti Pesaka Bumiputera Bersatu (PBB), ku Kepala Menteri Tan Sri Datuk Amar Adenan Satem. "Enti bisi atur nambah penyampau penuduk kunsil nengeri jemah, kitai dalam PBB deka minta setengah ari penyampau nya ungkup PBB. "Kebuah pia, laban PBB sigi bisi ngembuan hak ngenataika pinta nya. Kitai nadai mayuh penyarut dalam parti," ku iya rambau pengerami 'Ramah Tamah Aidilfitri 2014 PBB Sarawak' ba indu opis parti ditu, kemari. Adenan ke mega Presiden PBB madah, parti diatu udah likun sereta mansang enda baka parti dalam serakup BN ke bukai ke enda nemu ngetu napi penyarut. "Kitai dalam PBB meseti badas, anang nitihka singkang sida parti bukai lalu tanggung pengawa ke disan kitai lebih besai agi ari ke udah. "Ketegal nya, kitai berani ngenataika pinta tu,"ku iya nandu. Ngenang pengawa ngangkatka iya nyadi kepala menteri bedau lama tu tadi, Adenan madahka Datuk Amar Abang Johari enggau Datuk Amar Awang Tengah ke mega nyadi chalun kepala menteri maya nya udah meri sukung ke chukup manah. Ku iya, kededua seduai nerima pemutus nya enggau lantang ati, tu meh PBB lalu pengawa nyadi kepala menteri seiti pengawa ke berat disan. "Nengah saup ari Awang Tengah enggau Abang Johari sereta Jabu enggau orang bukai, semua pekara ke berat tau lempung,"ku iya. Iya mega ngansak PBB sedia napi pengawa bepilih negeri ke deka datai ti diadang diadu sebedau bulan Jun 2016. Kitai meseti nyikap diri lalu nitihka pelaba enti PBB mengkang badas, tusah deka ngalahka PBB, tandu iya. "Baka pengawa bepilih ke udah, PBB bediri ba 35 penuduk lalu menang ba semua penuduk nya. Nama aja penuduk ke diberi ngagai kitai, PBB nadai penanggul teulihka pemujur,"ku iya. Ba pengerami nya kemari, Adenan enggau bini iya Puan Sri Dato Jamilah Anu bela bisi nyuaka pemeri ngagai anak patu balu ari PERYATIM. Bela datai kededua Sapit presiden Datuk Patinggi Tan Sri Alfred Jabu enggau Datuk Amar Abang Johari Tun Abang Openg, kededua Mandal Kanan presiden Datuk Amar Awang Tengah Ali Hassan enggau Dato Sri Douglas Uggah, Chairman Mendam ke mega Chairman Komiti Eksekutif PBB Sarawak Datuk Amar Asfia Awang Nassar.

You are subscribed to email updates from BorneoPost Online | Borneo , Malaysia, Sarawak Daily News » Berita Iban To stop receiving these emails, you may unsubscribe now.	Email delivery powered by Google
Google Inc., 20 West Kinzie, Chicago IL USA 60610