» »Unlabelled » Mong: ARC deka chakah agi bejalaika pengawa pemansik BorneoPost Online | Borneo , Malaysia, Sarawak Daily News » Berita Iban - New 2 Borneo

05:03:00

Mong: ARC deka chakah agi bejalaika pengawa pemansik BorneoPost Online | Borneo , Malaysia, Sarawak Daily News » Berita Iban - New 2 Borneo

Mong: ARC deka chakah agi bejalaika pengawa pemansik

Posted: 23 Aug 2014 09:10 AM PDT

Dikarang Rengenyan Labang //

Kelebih agi mansik sayur, buah enggau pengawa betanam ba ladang

KUCHING: Palan Pemansik Betanam Betupi (ARC) Semongok ngenyakahka pengawa pemansik ba sayur, buah enggau pengawa betanam ba ladang dikena ngangkatka pemansang betanam betupi di Sarawak.

Menteri Muda Betanam Betupi (Pemansik enggau Dagang) Datuk Mong Dagang madah, nya setipak enggau ARC ti bejalaika tanggungpengawa ke beguna amat sereta besai dalam Opis Betanam Betupi Sarawak.

Ku iya, suba ARC bejalaika pengawa pemansik ba lada chelum, koko enggau mulung tang berindik ari pengawa numbuhka Kaunsil Lada Malaysia, Kaunsil Koko Malaysia Malaysia enggau Crop Research and Application Unit (CRAUN), nya alai pengawa pemansik diserahka ngagai ejensi nya.

"Nya alai ARC terus bejalaika pengawa pemansik ba beras, buah, sayur enggau utai tanam  di ladang, nyengkaum buah enggau sayur asal menua tu," ku iya.

Mong mansutka pekara tu lebuh bejadika Hari Terbuka Palan Pemansik Betanam Betupi 2014 ti diatur ba ARC Semongok, Jalai Puncak Borneo ditu, pagi kemari.

ARC ku iya mayuh udah mujur ba pengawa pemansik betanam betupi baka lada chelum udah ngasilka bansa lada ti dikerindu sereta bisi peminta tinggi baka bansa lada Semongok emas enggau Semongok Aman.

Ba pemansik padi, ARC udah mujur ngangkatka nama beras Bario nengah setipikit Petunjuk Geografi (GI) kelimpah ari padi Biris enggau Bajong, ku iya.

"Lalu ba pengawa pemasik ke dipejalaika ba buah enggau sayur asal baka dabai enggau terung Dayak, ari ti enda dikelala diatu dikelala sereta tebilang ba peranak menua Malaysia," ku iya.

Kelimpah ari nya pemansang ba database software, WIMICS (Weed, Insect, Microorganism Collection Sarawak) dikena ngemunaska rumput, indu utai enggau mikroorganisme sereta diagnosa penyakit enggau semua bansa indu utai ke ngerusak dikena ngemandakka timpuh mutarka penanggul nya, ku iya.

"Database software tu mega ulih nyadika lalau dagang antarabansa jemah ila," ku iya.

Ngenang Hari Terbuka ARC 2014, Mong madahka tuju pengerami nya diatur endang dikena ngelakuka ARC mensia mayuh kelebih agi nembiak sekula enggau universiti ngambika nemu pasal ACR.

"Tuju Hari Terbuka ARC tu dikena nempa pengerindu ba nembiak sekula enggau universiti dalam bidang Sains.

"Aku ngarapka Hari Tebuka ke baka tu ulih diatur ninting taun, laban sebedau tu ke pemadu dudi endar diatur iya nya dalam taun 2001," ku iya.

Bela bisi ngulu ba pengerami nya kemari, Direktor Opis Betanam Betupi Lai Kui Fong, pengari Sekretari Mendam Opis Menteri Betanam Betupi Moden Joseph Wei, Ketuai Sapit Direktor Opis Betanam Betupi (Pemansik) Megir Gumbek enggau bala bukai.

Print Friendly

Kenegapka agi kaul Malaysia enggau Indonesia

Posted: 23 Aug 2014 09:09 AM PDT

KUCHING: Kepala Menteri Tan Sri Datuk Amar Adenan Satem ngarap kaul entara Malaysia kelebih agi Sarawak enggau Indonesia ulih ditegapka agi ngambi pulaika pemaik ngagai pemansang ekonomi rayat kededua menua.

Ba sebengkah pengerami kemari, iya madah kerejasama ke udah lama dikembuan ulih diratka agi ngambi pulaika pengelantang rayat.

Adenan mega meri jaku 'selamat' ngagai Indonesia sereta ngarap pengelikun enggau kuasa merintah diri ke udah diasai pengelama 69 taun deka meruan belama.

"Ngajihka Pengelantang Indonesia maya ngintu Hari Merdeka ke-69, aku ngarap kaul ke rat entara perintah Sarawak enggau Indonesia deka majak tegap sereta meruan belama,'ku iya ba 'Majlis Resepsi Diplomatik Peringatan Hari Kemerdekaan Indonesia ke-69' di Hotel Imperial ditu, malam ensanus.

Ba kaul ke sama,Konsulat Jeneral Republik Indonesia Djoko Harjanto nengah seiti surat penerang berita madahka iya berasai temegah ati laban ulih ngintu Hari Merdeka Indonesia di nengeri tu enggau lantang sereta likun.

"Tu ngelaika basa ti besai ungkup perintah enggau rayat Indonesia ari perintah enggau rayat Sarawak nyerumba pengawa ngintu Hari Merdeka Indonesia ke-69.

"Kami pechaya kaul ke rat enggau Sarawak deka majak tegap lalu deka seruran digenggam ungkup pemaik kerejasama kededua menua," ku iya.

Ba pengerami nya, atur meri basa ngagai orang ti udah lesi bebadi ba penusah bilun MH17 bisi mega dipejalaika, ke alai bala temuai ngetu jenuh ngelama seminit, besembiang nitihka jalai pengarap diri.

"Kami ngarika perintah Indonesia ngenataika penyinu ati ngagai ruang bilik sida ke lesi bebadi ba penusah bilun MH17 lalu deka seruran meri sukung ngagai perintah Malaysia kelebih agi maya ti napi penusah ke baka tu," ku Djoko.

Bela datai bini Kepala Menteri Puan Sri Datuk Jamilah Anu, Sekretari Perintah Nengeri Tan Sri Datuk Amar Mohd Morshidi Abdul Ghani, Menteri Pemansang Infrastruktur enggau Penyambung Dato Sri Michael Manyin Jawong, Yang Dipertua Majlis Islam Sarawak Datu Putit Matzen enggau orang bukai.

Print Friendly

KM: Agi mayuh kandang menua baru deka dikemansangka

Posted: 23 Aug 2014 09:09 AM PDT

KUCHING: Perintah nengeri merambu deka ngemansang tauka muka mayuh agi kandang endur baru kelebih agi di mengeri Kuching tu.

Kepala Menteri Tan Sri Datuk Amar Adenan Satem madah, kandang endur baru nya deka dikemansangka ngena infrastruktur kelimpah ari ngemajuka pengawa berumah.

Iya madahka entara endur ke deka dibuka nya baka kandang endur di Matang, Batu Kawa enggau Kota Samarahan.

"Aku nguji deka muka mayuh agi kandang endur baru sereta nambahka agi pemansang infrastruktur lalu ari nya kitai ulih ngemajuka pengawa berumah.

"Nya alai aku ngelalau pemaju ngambi ngurangka ungkus ngaga rumah lalu ari nya rega rumah ke dijual ngagai pemeli ulih dikurangka, anang semina nguntungka kita (pemaju) aja," ku iya.

Adenan bejaku munyi tu lebuh bejadika SHEDA Property Expo 2014 ti diatur Sarawak Housing and Real Estate Developers' Association (SHEDA) ba BCCK ditu, pagi kemari.

Bejaku baru iya madah, dikena ngemujurka pengawa ngemansang kandang endur baru nya, semua ke bekaul baka opis menteri pengawa berumah, pemaju pengawa berumah, kompeni pengawa berumah, Opis Tanah enggau Survei (JTS) enggau ke bukai ti bekaul patut berakup ngemansangka industri berumah.

Iya madahka Opis Menteri Pengawa Berumah ti dipegai Datuk Amar Abang Johari Tun Openg patut berandau enggau semua orang ke bekaul pasal pemansang industri pengawa berumah di nengeri tu.

Nambahka nya iya minta JTS ngenyampatka pengawa ngemendarka projek nengah chara ke mudah.

"Aku meri penemu ngagai Abang Johari ngambika ngatur aum enggau semua raban ke bisi pemerat ba pekara nya ngambika berunding sereta berandauka chara dikena ngemansangka industri pengawa berumah.

"Kitai nguji deka ngemudahka agi pengawa ngemendarka projek, aku udah meri jaku gerah ngagai Opis Tanah enggau Survei ngambika sekeda pekara ke enda patut nya diseliah sereta dikemuntang dikena ngemudahka agi pengawa ngemendarka nya," ku iya.

Dulu ari nya sebedau bejaku sereta bejadika SHEDA Property Expo 2014, Adenan minta semua mensia mayuh ke ngulu pengerami nya kemari sama diau jenuh enda lama serteta besampi ngagai sida ti lesi bebadi nepan bilun MH17.

Bela bisi ngulu pengerami nya kemari Abang Johari, Menteri Muda Pengawa Berumah Datuk Abdul Karim Rahman Hamzah enggau Datuk Francis Harden Hollis, Presiden SHEDA Zaidi Ahmad sereta Chairman Pengatur Pengawa, Sim Kiang Chiok.

Print Friendly

Rayat di Pelagus auska pemansang, ku Wilson Ugak

Posted: 23 Aug 2014 09:08 AM PDT

SIBU: Sekeda peranak menua Pelagus berasai asa endar ati laban ti keranka pemansang pengudah penyakal menang ba sitak nya, sereta ngasaika pengerugi laban ke nadai diberi beberapa juta ringgit belanja ari Projek Pemansang Menua Pesisir (MRP).

Kaban Kaunsil Besai Parti Rakyat Sarawak (PRS), Wilson Ugak Kumbong pechaya BN ulih ngerampas sitak nya baru ba Pengawa Bepilih Kunsil Nengeri ke deka diatur dudi tu ila, laban sitak nya begunaka pemansang kelebih agi ba pemansang infrastruktur.

"Rayat di Pelagus udah rugi laban nadai diberi MRP enggau pemansang ke bukai.

"Sida udu agi landik ba pekara politik tang diatu sida udah nemu semina BN ti ngembuan rikod ke manah sereta ulih mai pemansang ngagai sida.

"Peranak menua nya enggai ditinggalka sengapa laban sida keran deka ngembuan jalai pengidup ke bekualiti, ke alai semina BN aja ulih ngemujurka juluk nya.

"Kami dalam BN meri utai ti udah disemaya ngagai rayat, enda baka penyakal ke semina nemu ngaga semaya puang aja," pia ku Ugak ke mega MP Ulu Rejang madah ngagai The Borneo Post.

Ba Pengawa Bepilih Kunsil Nengeri 2011, George Lagong ke bediri nengah tikit chalun Ngatika Diri udah teulihka 5,740 iti undi ngalahka chalun BN, Stanley Nyitar @ Unja Malang ke bulih 2,903 iti undi ditangkanka chalun ari PKR, Edward Sumbang Asun ke semina bulih 1,171 iti undi aja.

Ku Ugak, iya udah nemuai betemu enggau rayat sereta mendingka timbal ari sida, ke alai sukung rayat ngagai BN diatu majak nambah.

Ku iya, peranak menua nya asa ati enggau pengari rayat sida laban enda ulih mai pemansang, tang semina ngemataka sitak bukai ke majak maju.

"Nya alai, peluang BN ngerampas baru sitak nya besai laban rayat ba sitak dia auska pemansang.

"Aku udah ngagai Pelagus betemu sereta nerang ngagai rayat ngambika sida empu meda nama pemansang ti udah dikereja penyakal kenyau udah menang ba sitak nya," pia ku iya.

Kelimpah ari nya, maya 'Majlis Ramah Tamah Aidilfitri' 2014 tikas Bagi menua Sibu ke diatur ba RH Hotel pun bulan Ogos tu tadi, Kepala Menteri Tan Sri Datuk Amar Adenan Satem madahka PRS diberi pengelebih ngengkahka nama chalun parti nya bediri ba sitak Pelagus maya Pengawa bepilih Kunsil Nengeri ke deka diatur dudi tu ila.

Ku Ugak baru,PRS bisi chalun ke engkeman bediri ba sitak nya ke alai pekara nya deka diputuska ketuai parti ila.

Print Friendly

Anang mendingka petenah ari raban penyakal, ku Rayong

Posted: 23 Aug 2014 09:08 AM PDT

ENGKILILI: Raban penyakal dilalau anang bejaika parti komponen Barisan Nasional (BN) ba mua rayat ketegal ke deka bulih penguntung ba pekara politik sida empu.

Kaban Kunsil Nengeri (ADUN) Engkilili, Dr Johnnical Rayong Ngipa madah, parti penyakal enti nitihka patut regas agi betemu enggau rayat sereta nerangka polisi pemansang ti ditengkebang sida empu.

"Raban nya sanggup nyadung petenah bejaika ketuai BN ketegal deka ngelemika sukung rayat ngagai BN ngambika nyukung parti sida (penyakal).

"Aku ngelalau kita (rayat)  anang mendingka petenah ari sida. Majak bekempit enggau ketuai BN ngambi pemansang ba pengidup kita ulih dikerembaika belama," ku iya.

Iya bejaku munyi tu ba Pengerami Ketuai Begulai enggau Rayat di Rumah Kaunsilor Engkabi, Rumah Panjai San Semanju dalam Pelilih Mit Engkilili, apin lama ke udah.

Kelimpah ari nya ku iya, rayat ba menua pesisir di Engkilili mengkang begunaka perintah BN ngemajuka pengidup sida nengah mayuh bengkah pekara.

"Aku arapka rayat di menua pesisir anang nyeliahka perintah BN laban kami mayuh endar peneleba ba pengawa negmansangka pengidup kita kenyau ari kelia nyentuk ke diatu," ku iya.

Beserimbai enggau pengerami nya, Dr Rayong lalau ngungkupka Projek Mit Pemansang Menua Pesisisrr (MRP) RM10,000 ngagai Komiti Pemansang enggau Pengelikun Genturung Pendiau (JKKK) San Semanju.

Print Friendly

Pesta Tasik Biru deka nyadi ikon menua Bau

Posted: 23 Aug 2014 09:07 AM PDT

Besaup ngangkatka penyelai ke bisi dikembuan menua Bau awakka dikelala mensia mayuh

BAU: Menua Bau endang sebengkah pelilih menua ke ngembuan penyelai lalu bisi penau nyadi sebengkah palan dagang temuai ke tebilang ba nengeri tu.

Kaban Kunsil Nengeri (ADUN) Tasik Biru Datuk Peter Nansian Ngusie madah, pemayuh bansa utai ke ulih ngerinduka ati sekalika nya kampung main asal bansa Bidayuh enggau Hakka, Gua Angin, Gua Pari-Pari, Gua Raja sereta mayuh agi ke bukai tau narit ati bala temuai datai ngagai endur nya.

Taja pia, ku iya pengawa ngemansangka industri dagang temuai ba kandang menua nya bisi tepagang berindik ari nadai komiti ke udah dipadu dikena ngatur pemansang ngerembaika industri nya.

"Kitai ngembuan mayuh produk enggau utai ke meri pengerindu ari sukut dagang temuai baka gua ke manah, penyelai kampung Bidayuh nyengkaum Pesta Tasik Biru ke diatur sehari tu (kemari), kelimpah bisi pengerami bukai baka Chap Goh Meh ke nyadi pengerami besai ba pelilih tu.

"Kitai patut nguna pengelebih ke bisi dikembuan nya laban kitai empu (rayat) ditu deka bulih penguntung ari semua pekara nya.

"Tang baka ni? Orang deka datai kitu nyema langsung nadai meda nama-nama tesau bekaul enggau pekara nya. Nya alai kitai begunaka kerejasama semua piak endur ngemujurka menua Bau nyadi sebengkah palan ke meseti dilawa kelebih agi bala temuai ke raun ngagai nengeri tu," ku iya.

Nansian ti mega nyadi Menteri Muda Pemansang Raban Bansa enggau (Pemansang Industri Kebun) madah munyi nya rambau Pengerami Pesta Tasik Biru 2014 ke diatur pengelama dua hari di Tasik Biru ditu, kemari.

Nangkan ke nya, Nansian madah udah datai maya iya komuniti Bau besaup enggau Opis Pelilih Bau sereta ejensi perintah enggau ukai perintah berundingka jalai dikena ngemujurka perambu nya.

"Pemesai tanggung pengawa enggau kerejasama semua piak kelebih agi Opis Pelilih dipeguna amat dikena ngemujurka industri dagang temuai ke endang bisi penau ba pelilih Bau ditu.

"Pekara ke pemadu beguna iya nya pengawa ngelaku lalu aku meransang Opis Pelilih Bau besaup enggau Opis Dagang Temuai Sarawak (STB) sereta ejensi ke besangkut paut ngangkatka penyelai ke bisi dikembuan menua Bau awakka dikelala mensia mayuh," ku tandu iya.

Udah nya, nengah chara bansa tu baru penyelai enggau pemayuh produk dagang temuai di Bau ulih dikelala bala temuai ke bisi raun ngagai nengeri tu.

Berebak enggau nya, Nansian mega bisi nyadaka langgur penemu ngasuh panggau mendam bisi digaga ba Tasik Biru awakka ulih endur bejalaika mayuh bengkah program dudi hari.

Enti udah bisi panggau tu, mayuh bengkah program ulih diatur baka mandangka kugiran enggau pengawa belagu kelimpah dikena ngerami menua Tasik Biru," ku buah penemu Nansian.

Bejaku ngenang pengerami nya kemari, tu endang pengerami diatur ninting taun kenyau ari 2009 lalu taun tu program ke bisi diatur dipeda badas agi setipak enggau nama baru pengerami tu.

Taun tu, pengerami ke diberi nama Pesta Jong diberi nama baru iya nya Pesta Tasik Biru lalu ngarapka nengah program lumba ai enggau aktiviti bukai tau setipak enggau pengerindu ke maya hari.

"Ukai nya aja, buah penemu kitai ke ngatur pengerami ninting taun tu mega deka nyadi ikon menua Bau," ku iya.

Dulu ari nya, Pemesai Pelilih Bau Inting Nyami madah, Pesta Tasik Biru 2014 ngayanka mayuh bengkah aktiviti bebida ari taun ke udah-udah baka lumba bakayuh rakit, bebatak tali atas rakit, bekayak, bekayak atas kayu batang enggau pekit lumba jong enggau pekit pemanah jong.

Iya madah, batang tuju pengerami tu diatur dikena ngelakuka menua Tasik Biru nyadi palan dagang temuai sereta ngelakuka lumba ai ke chukup nyelai lalu nadai ba endur bukai.

Kami ngarapka pengerami tu ulih narit penatai temuai ari luar raun ngagai pelilih Bau, awakka tau nyungkak penatai pemisi komuniti ditu," ku tandu iya.

Aktiviti bukai ke bela bisi diatur nyerumba pengerami tu iya nya besenam, pelanda 'Fun Run,' eksibisyen enggau bejualka barang pengelandik jari, bejualka ai irup enggau utai empa, kus enda lama diatur Kolej Komuniti Mas Gading pengelama dua hari di Tasik Biru.

Print Friendly