» »Unlabelled » Agi enda kitai ingatka pemidang bujang berani? BorneoPost Online | Borneo , Malaysia, Sarawak Daily News » Berita Iban - New 2 Borneo

05:03:00
1

Agi enda kitai ingatka pemidang bujang berani? BorneoPost Online | Borneo , Malaysia, Sarawak Daily News » Berita Iban - New 2 Borneo

Agi enda kitai ingatka pemidang bujang berani?

Posted: 30 Aug 2014 09:11 AM PDT

Kubur niang Kanang enggau Micheal Padel enda diintu manah tauka dikeibuh

MIRI: Taja pan baru urung setaun udah midang, Gerempung Veteran Sarawak Rangers (SRVA), apin lama ke udah berasai tekenyit endar ati meda kubur niang Datuk Temenggung Kanang Langkau ba pendam Bujang Berani di Jalai Budaya enda dikeibuhka.

Baka nya mega sebuah pendam be betapak enggau enggi iya ti diempu niang ASP Michael Pardel ke udah lesi bebadi maya ke besatup enggau bala penyelawai di Semporna, Sabah kena 3 March, 2013. Dulu ari nya, niang Kanang midang kena 3 Januari, 2013. Seduai sama bela dikuburka ba pendam nya nengah basa soldadu ke penuh.

Presiden SRVA, Lt Col (Rtd) Robert Rizal Abdullah madah, beserimbai enggau pengerami ngintu Hari Merdeka ti ke-57 kena Hari Minggu tu (seharitu), tu  meh maya perintah ngemerat sereta ngintu pendam nya tauka nirika batu pengingat ke seduai.

"Aku tekenyit endar ati meda gaya kubur niang Kanang enggau Micheal Padel. Udah ngelui setaun seduai dikuburka dia, tang pendam seduai lalu enda digaga enggau manah.

"Malu amat asai ati meda gaya pendam bujang berani menua tu ti enda dikeibuhka. Mudah amat kitai enda ingatka sida? Enti nitihka, patut bisi orang ulih ngemansutka belanja dikena ngaga kubur nya manah agi," pia ku Rizal lebuh ke dikerandau The Borneo Post ensanus.

Rizal disempulang kaban Exco SRVA udah ngabas Pendam Bujang Berani nya kena 22 Ogos, 2014.

"Laban ke mangku tanggungpengawa ngepunka Ops Mai Pulai tauka Ops Ngerapuh 21 iku Iban Trackers enggau Sarawak Rangers ke lesi bebadi lebuh ti bejalaika operasyen di Malaya berengkah ari taun 1948 nyentuk ke 1960, aku ngemeratka pendam nya ti ngujungka sida dikuburka ba Kuching.

Rumput ba pendam nya udah ditebas sereta diberesi Thomas Ling enggau raban iya ti dipejalaika nengah chara beripai. Taja pia, pengawa ngintu pendam nya ninting hari patut dilempaika ba sebuah ari NGO soldadu ke bisi di Kuching, ngambika pendam nya seruran beresi belama," pia ku iya.

Kanang maya ke pinchin mangku pangkat Pemesai Warren Satu (WO1), seiku ari sekeda bala bukai ke diberi gelar Seri Pahlawan Gagah Perkasa (SP) enggau Pingat Gagah Berani (PGB), maya iya ke mengkang idup suba.

Kanang bejalaika pengawa ba Rejimen Ranger Diraja ke-8 nyentuk ke iya pichin pengudah gawa nyadi soldadu ngelama 21 taun.

Pemerani iya dibasa sereta diaku ketegal udah berambunka nyawa ngelaban bala kominis ba Tanah Hitam, Perak kena pun taun 1980, ke alai maya iya bisi kena timbak tiga kali.

Lima iku bala kominis enggau seiku soldadu parai lalu seiku agi balat endar bakal maya ke betempuh nya. Udah nya iya lalu diasuh nyadi ketuai Unit Combat Intelligence Platoon ari Ranger Batalion ke-8 ngambika nyidi sereta munaska raban kominis dalam bulan Februari taun1980.

Laban ti udah mandangka pemerani maya beperang, iya diberi gelar Seri Pahlawan Gagah Perkasa (SP) enggau Pingat Gagah Berani (PGB) ari Yang di-Pertuan Agong Sultan Ahmad Shah kena 3 Jun taun 1981.

Berebak enggau nya, niang Michael seiku ari enam iku polis ti parai ketegal kena serang nyenyit bala penyelawai lebuh ti bejalaika pengawa nyaga pengelikun di Genturung Pendiau Seri Jaya, Sabah.

Beserimbai enggau nya, Robert Rizal ke sebedau tu dikelala enggau nama Robert Madang Langi, seiku bujang berani bansa Iban ke mega Chairman Komiti Ops Mai Pulai, mega udah nerima gelar Panglima Gagah Berani (PGB), gelar bujang berani ti kedua pemadu tinggi di Malaysia laban ke udah berambunka nyawa ngelaban bala kominis dalam taun 1973 di Sarawak.

Print Friendly

Pelilih Mit Sebauh deka dirandang nyadi mengeri besai

Posted: 30 Aug 2014 09:10 AM PDT

Dikarang Ambrose Rirang //

Peranak Sebauh dilalau seruran begempung ngambika langgur pemansang ke digaga perintah ulih tejapaiBINTULU: Rayat mayuh pupu raban bansa ti nguan Pelilih Mit Sebauh dilalau ngambika seruran begempung enggau pangan diri dikena ngemujurka langgur perintah ke deka ngemansangka kandang menua nya nyadi mengeri besai jemah ila.

Menteri Muda Perengka Rama (Bekal Kuasa Karan enggau Telekomunikasyen), Datuk Dr Stephen Rundi Utom madah, naka ke diatu Pelilih Mit Sebauh dipeda majak mansang beduduk ari kompeni ladang kelapa sawit bedandang besai ti mayuh dibuka ba kandang menua nya.

Kelimpah ari nya mega sida ke betanam betupi enggau jalai alun ke majak mayuh udah digaga ngemuntangka peranak menua nya benanamka kelapa sawit ba tanah diri empu.

"Beduduk ari penyampau mensia ti majak nambah mayuh nguan menua Sebauh tu kelebih agi bala pengereja pengawa ba ladang kelapa sawit, pemesai ba opis perintah enggau mayuh agi pengereja pengawa ba bidang bukai, nya alai aku bisi pengingin ati deka mantu ba pengawa ngangkatka Pelilih Mit Sebauh tu nyadi sebengkah mengeri besai jemah ila," ku iya.

Rundi ti mega nyadi Kaban Kunsil Nengeri (ADUN) Kemena mansutka jaku nya rambau Pengerami Makai Lemai Hari Merdeka Enggau Hari Malaysia ti diatur ba Balai Raya Sebauh, empai lama ke udah.

Ku iya, sepengudah feri ti ngelayang Batang Kemena bepun dikena empai lama ti udah, iya udah ngelantangka bala mensia mayuh ti nguan rumah panjai ba kawasan Ulu Sebauh nyengkaum Kelabat/Genaan enggau menua ti besemak mindah kin kitu kelebih agai ngagai Pasar Sebauh enggau Bandar Bintulu.

Enti suba ku iya, sebedau feri tembu, bala mensia bekenaka perau ari menua diri ngelawa Pasar Sebauh, tang diatu sepengudah feri dikena ngelayang Sungai Kemena, sida nyamai endar mindah kin kitu laban jalai alun mega nyau nuntung pala tangga.

"Tu meh utai dikedeka aku laban kitai sama ampit bulih penyenang enggau pengelantang beduduk ari langgur pemansang perintah ti nyau majak nyata dipeda dikena ngemansangka menua Sebauh tu," ku iya.

Lebuh maya tu mega, Rundi mantaika pengaga ati nuju pupu bansa ti nguan Pelilih Mit Sebauh nyengkaum Iban, China, Melayu enggau bala raban Orang Ulu laban ulih begulai manah enggau pangan diri kenyau menua merdeka kelia.

Semua tu ku iya mandangka pupu raban bansa ba menua ru endang ulih begulai enggau pangan diri ba mayuh bengkah pengawa baikka pengawa besai tauka mit.

"Nya alai, aku endang ngarapka menua Sebauh tu ulih nyadi sebengkah menua chunto ti ulih mansang enggau mujur ari diatu dataika jemah ila laban mensia mayuh ba pelilih menua tu ulih bekunsi penemu enggau runding dikena ngemansangka mayuh bengkah pengawa," ku iya nambah ke jaku.

Seketeri Politik Ngagai Kepala Menteri, Victor Temenggung Angang, Pengulu Michael Lanyau Ruma enggau Temenggung Utong Sigan entara temuai ke sama bela ngulu pengerami nya.

Print Friendly

Regata Kapit: Sebuah perau tungkup sereta kena lantak ari belakang

Posted: 30 Aug 2014 09:09 AM PDT

KAPIT: Seiku lelaki ke nyereta pekit lumba perau ke beumur urung 50 taun bakal sepengudah perau iya tungkup sebedau dilantak seiku agi pemekit bukai ari belakang maya besemekih ba lumba renggat keterubah beserimbai enggau Regata Kapit di Sungai Rajang ditu, lemai kemari.

Nitihka dipadah bala mayuh ke bisi meda penusah nya, perau lumba ke dibai iya, tungkup dipelabaka ketegal pangka umbak ekspres ke dulu mansa ari nya.

Perau lumba ke nangkan ari belakang enda sempat nyeliah lalu ngelantak perau iya ke ngujungka iya tepelanting ke bukai.

Bala komiti enggau raban Bomba ke bisi meda bela beguai ngambi iya.

Penyereta ke bakal ba kaki kanan nya terus ditaban ngagai Sepital Kapit.

Kelimpah ari nya, perau lumba enggau injin lelaki mega dipadahka enda ulih diambi sebedau ke tenggelam.

Berindik ari penusah nya, pekit renggat keterubah lemai nya dilanjar lemai tu (31 Ogos) lalu ditangkan enggau pekit renggat final.

Print Friendly
We encourage commenting on our stories to give readers a chance to express their opinions; please refrain from vulgar language, insidious, seditious or slanderous remarks. While the comments here reflect the views of the readers, they are not necessarily that of Borneo Post Online. Borneo Post Online reserves the right not to publish or to remove comments that are offensive or volatile. Please read the Commenting Rules.

Ahmad: Meruan keingatka pemesai reti Hari Merdeka

Posted: 30 Aug 2014 09:08 AM PDT

SARIKEI: Rayat di menua tu patut negapka penyayau ngagai menua laban nengah penemu ke bansa nya pemesai reti merdeka enda mudah tusur ngapa.

Pemesai Opis Penyerakup Menua enggau Intergrasyen Nasional (JPNIN) Sarikei, Ahmad Noorkamal Abdul Malek madah, pengawa ngaduka menua merdeka 51 taun ke udah dikereja semua rayat Malaysia maya nya laban sida nemu pemesai reti penyamai nyadi seiti bansa.

"Buah merdeka ke disepi menua sehari tu endang patut dipebasaka semua orang enda ngira ari penemu politik, jalai pengarap enggau bansa.

"Menua ke merdeka endang nyadi chuan pendiau ke dikembuan semua kitai lalu kitai deka meda semua orang besaup enggau pangan diri maya bisi penusah enda bekira bansa enggau jalai pengarap," ku iya.

Ahmad madah munyi nya rambai pengerami 'Serumpun Raya Tabika Perpaduan Kampung Baru Sarikei' ditu, empai lama ke udah.

Pengerami nya diatur ba tanah laman Kelas Tabika Pusat Aktiviti JPNIN Sarikei sereta digulu urung 80 iku orang nyengkaum bala nembiak tabika enggau bala apai indai nembiak.

Nangkan ke nya, Ahmad madah nengah program ke bansa rayat di menua tu deka ngingatka baru pemesai reti Hari Merdeka.

"Mayuh bala kitai ke bisi ditu udah nadai ingatka agi pemesai reti Hari Merdeka, tang kebendar iya kitai ke nyadi peranak Malaysia patut meri terima kasih ketegal penyamai ke udah disepi diatu.

"Nya alai, lebuh kitai beratika sekeda utai ke nyadi ba menua bukai diatu…agi mayuh orang mengkang beperang enggau pangan diri laban sida bedau ngasaika reti Hari Merdeka.

"Kitai ke nyadi peranak menua tu patut meri terima kasih laban utai ke disepi diatu, jaga manah pengelantang ke bisi diatu nyentuk ke jemah ila," ku iya.

Nyerumba program sehari nya mayuh bengkah aktiviti bisi diatur baka nyuaka duit raya enggau nyadung menira Jalur Gemilang ngagai mensia mayuh ba kandang menua nya.

Print Friendly

Tiong enda setuju formula BN Plus

Posted: 30 Aug 2014 09:08 AM PDT

MIRI: Pemangku Presiden Parti Demokratik Progresif Sarawak (SPDP) Datuk Seri Tiong King Sing bebendar ngenggaika formula Barisan Nasional (BN) Plus.

Iya madah, formula nya enda ulih diterima dalam parti sida sereta serakup BN ke bukai.

"Aku sigi enda setuju enggau formula BN Plus sereta enda mudah belembut mimit ba pekara nya," ku iya rambau 'Malam Perpaduan SPDP di Eastwood Valley Golf & Country Club' ditu kena malam Hari Lima tu tadi.

Ku Tiong, tu endang nyadika pelasar sereta dikena nyaga pemerat parti serakup BN ke bukai.

"Kami (tiap serakup BN) patut besaup enggau pangan diri lalu manggaika penuh pengarap ngagai pangand iri," ku tandu iya.

Laban ke nyadi pengari rayat, amat enda patut pemerat diri empu ngelui ari pemerat parti enggau rayat.

Berebak enggau nya, Tiong mega ngelalau bala kaban SPDP ngambika terus besaup enggau kaban parti serakup BN ke bukai maya napi Pengawa Bepilih Besai Nengeri (PRN) ke deka datai.

"Beri penuh sukung ngagai semua parti serakup lalu anang melakangka pangan diri ngereja utai," ku Tiong.

Ulah ke ngereja utai melakangka orang tau ngachurka BN enggau serakup parti ke bukai.

Rambau pengerami ti berambaika leka jaku 'Saya Sayang SPDP' nya, urung 1,100 iku kaban ari empat pampang iya nya Lambir, Piasau, Pujut enggau Senadin sampal datai.

Pengawa begelumu bansa nya udah diatur ba Bau, Kuching, Saratok, Sibu, Bintulu enggau deka diatur ba sekeda kandang endur bukai enda lama agi.

Bela bisi datai Presiden Parti Se'ati Rayat Sarawak (SUPP) Tan Sri Peter Chin Fah Kui, Sekretari SPDP Datuk Nelson Balang Rining, Ahli Parlimen Baram Anyi Ngau, Menteri Muda Pengawa Lumba Datuk Lee Kim Shin, Komiti Besai SPDP enggau sekeda pengari parti serakup BN ke bukai.

Print Friendly

Kaban SPDP di nengeri tu manggai urung 96,000

Posted: 30 Aug 2014 09:07 AM PDT

MIRI: Kaban Parti Demokratik Progresif Sarawak (SPDP) manggai urung 96,000 di serata Sarawak lalu mandangka penegap parti nya.

Sekretari iya, Datuk Nelson Balang Rining madah, penyampau nya mandangka parti nya agi tegap sereta nyadi sebengkah parti dalam serakup Barisan Nasional (BN) ke agi mengkang ulih diguna.

"Kaban SPDP naka ke diatu bisi 94,384 iku lalu 1,600 agi bedau direjista," ku iya rambau pengerami 'Malam Perpaduan SPDP' bepalan ba Eastwood Valley Golf & Country Club ditu, kena Hari Lima tu tadi.

Ngenang pengawa ngerejista kaban parti nya, diatu pengawa nya agi benung dipejalai lalu mengkang ngiga kaban biak tauka besai tuai.

"Kitai mega meda mayuh ari sida ke profesional bisi pengingin deka nyadi kaban parti (SPDP)," ku iya.

Udah nya, ngenang sentang sayap tauka pampang raban nembiak enggau indu ke direjitsa ngagai Opis Pengerejista Gerempung (ROS), diatu bisi 33 pampang indu udah direjista lalu raban nembiak bisi  16 pampang.

Nangkan ke nya bala sida diatu benung ngerejista genap pampang raban nembiak enggau indu ke bisi diatu ngagai ROS.

Berebak enggau nya, Kaban Parlimen Baram, Anyi Ngau madah, ketuai baru SPDP melabaka ulih ngiring parti nya nyingkang jauh agi.

"SPDP diatu majak manah taja sebedau tu amat bisi charut, tang nya utai ke udah lepas," ku iya.

Ke diatu, parti udah meruan lalu mandangka seiti kelai ke manah ngagai BN ba pengawa bepilih besai nengeri ke deka datai.

Bela bisi bejaku ba pengerami nya Pemangku Presiden SPDP Datuk Seri Tiong King Sing lalu bala temuai ke bisi datai iya nya Presiden Parti Se'ati Rayat Sarawak (SUPP) Tan Sri Peter Chin Fah Kui, kaban Komiti Besai SPDP enggau sekeda pengari parti serakup BN ku bukai.

Print Friendly