» »Unlabelled » Peranak Pelagus diansak nyukung chalun BN BorneoPost Online | Borneo , Malaysia, Sarawak Daily News » Berita Iban - New 2 Borneo

05:30:00

Peranak Pelagus diansak nyukung chalun BN BorneoPost Online | Borneo , Malaysia, Sarawak Daily News » Berita Iban - New 2 Borneo

Peranak Pelagus diansak nyukung chalun BN

Posted: 08 Feb 2014 09:07 AM PST

Tu ngambika sida ulih nerima geran Projek Mit Pemansang Menua Pesisir ari perintah

KAPIT: Peranak sitak Pelagus diansak nyukung chalun Barisan Nasional (BN) ngerampas penuduk nya maya Pengawa Bepilih Nengeri (PRN) ti deka datai.

Menteri Pemansang Tanah Tan Sri Datuk Amar James Jemut Masing madah, tu beguna amat ngambika peranak ba sitak Pelagus ulih nerima mayuh agi geran Projek Mit Pemansang Menua Pesisir (MRP).

Ku Masing, sitak Baleh ke dipegai iya, nerima geran MRP ari iya empu enggau Kaban Parlimen (MP) Hulu Rajang Wilson Ugak Kumbong.

"Kami duai ari BN. Semua pengari rayat BN nerima agih belanja RM1.5 juta ungkup MRP setaun. Ungkup peranak Baleh, kami bulih penguntung ari MRP kelimpah nerima agih belanja ari bajet MP," ku Masing madah ba sebengkah pengerami nyuaka geran MRP, apin lama ke udah.

Tandu iya, ketegal Pelagus diarika pengari rayat ari Parti Pekereja Sarawak (SWP) Sapit Presiden George Lagong, ke udah menang penuduk nya ba pengawa bepilih taun 2011, sitak nya nadai nerima geran MRP ari perintah.

"Peranak napi pengerugi laban iya (George) nadai ulih mantu kita. Nadai ngawa, sehari tu kita rugi. Kita patut belajar ari pengilap nya. Nya alai, maya pengawa bepilih ila, kita enda tau enda ngundi chalun BN ngambika kita ulih nerima geran MRP baka peranak ari Baleh," ku Masing ke mega Kaban Kunsil Nengeri (ADUN) Baleh.

Ba pengerami nya, Masing madah geran sepenyampau RM167,000 ari bajet taun nyin kemari diagih ngagai 16 penerima ari sekula, rumah panjai enggau gerempung ukai dikuasa perintah (NGO) sitak Baleh.

Masing mega nyuaka RM100,000 ngagai 10 buah Komiti Pemansang enggau Pengelikun Genturung Pendiau (JKKK) ari sitak Pelagus.

Berebak enggau nya mega, Ugak nyuaka geran MRP ngagai tujuh buah JKKK ari sitak Hulu Rajang.

Sama bisi datai ba pengerami Sekretari Politik Kepala Menteri Sarawak, Wilson Nyabong, Kaban Komiti Tinggi PRS Datuk Kristoffer Nyuak, Penghulu Sallang Batang, Penghulu Ugak Esop, Penghulu Bunsu Gerinang enggau sida ke bukai.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Anang mayuh kedalih nganjung anak besekula

Posted: 08 Feb 2014 09:04 AM PST

KUCHING: Ketegal mayuh bantu pelajar ti udah disediaka perintah, nadai kebuah apai indai enda nganjung anak besekula, ku Kaban Kunsil Nengeri (ADUN) Saribas, Mohammad Razi Sitam.

Iya madahka nya nunjukka perintah beratka pekara pelajar nembiak di menua sereta nengeri tu.

"Perintah diatu nyendiaka mayuh macham bantu pelajar ngagai nembiak sekula baka Skim Baucer Tuisyen, Kumpulan Wang Amanah Pelajar Miskin (KWAPM), Rancangan Makanan Tambahan (RMT) enggau kebukai.

"Nya alai apai indai enda patut meri mayuh kedalih baka seranta enda ulih nganjung anak ngulihka pemandai.

"Kitai patut beterima kasih ngagai perintah laban bantu ti baka tu agi diberi, lalu apai indai enda patut bechiping lebuh ngena bantu ti diberi perintah," ku iya madah ngagai pengarang berita ensanus.

Dulu ari nya iya nyuaka duit Bantu Sekula ngagai nembiak Sekolah Kebangsaan (SK) Tanjung Assam, di Betong ensanus.

Ngenang pekara pelajar iya madah, apai indai patut ngemeratka pelajar anak ngambika ulih ngubah tikas pengidup diri sebilik ngagai ke lebih menyana.

Nya alai anak tauka nembiak patut disikap ngena pemandai tauka penemu, tambah mega sida nya ti nampung megai menua jemah ila, ku iya.

"Anak reta ti pemadu berega ngagai menua laban sida ti penampung ngiring menua, kelimpah ari ti ulih ngubah pengidup diri sebilik," ku iya.

Entara ti bisi datai ngagai pengerami nya ensanus, Pemesai Pelajar Bagi Menua  Betong Sapawi Mahadi enggau Kepala Pengajar SK Tanjung Assam Rabia Andom.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Taib nemu agi sapa bagi chalun ke patut nganti iya

Posted: 08 Feb 2014 09:04 AM PST

SARATOK: "Kemaya iya badu lalu sapa bagi chalun ke patut nganti iya,..saut nya semina dipansutka Kepala Menteri Sarawak, Pehin Sri Abdul Taib Mahmud empu," ku Menteri Pemansang Rama Sarawak, Tan Sri William Mawan Ikom (gambar).

Ku Mawan, semua piak enda ibuh segaut ngaga isu kediri empu dalam pekara tu, laban dalam pekara tu, semina iya (Taib) nemu agi bekaul enggau gaya politik di Sarawak, nemu nama utai ke nyadi kemaya hari tu enggau jemah ila sereta kemaya ubah nya patut nyadi.

"Naka kediatu, Sarawak agi begunaka YAB Taib, taja pia kami dalam gempung Barisan Nasional (BN) Sarawak selubang penemu sebarang pemutus iya ke deka badu lalu sapa bagi chalun nganti nya pulai ngagai penemu iya empu," ku Mawan maya nyaut tanya ari media bekaul enggau isu nya lemai kemari pengudah tembu ngulu pengerami Angkat Sumpah Chairman, Sapit Chairman enggau bala Kaban Opis Kaunsil Pelilih Mit Saratok (MDS).

Bekenangka berita selebubu ti madahka Presiden Parti Sa'ati Rayat Sarawak (SUPP), Tan Sri Peter Chin ke disempulang Sapit Presiden SPDP, Datuk Seri Tiong King Sing ke deka betemu enggau Menteri Dalam Nengeri, Datuk Seri Ahmad Zahid Hamidi, Mawan madah iya enda nemu senentang pekara nya.

"Aku enda nemu, riput surat kabar nya amat ke enda, laban piak kami (SPDP) nadai ngaga sebarang pemutus bekaul enggau pekara nya," ku iya.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Perintah merambu numbuhka ILP di Serian, ku Riot

Posted: 08 Feb 2014 09:04 AM PST

SERIAN: Perintah merambu deka numbuhka Institut Latihan Perindustrian (ILP) di pelilih menua Serian ti dipejalaika dalam Rolling Plan Ke-4.

Menteri Penguasa Pemayuh Tubuh enggau Pengereja Pengawa, Datuk Seri Richard Riot Jaem madah, penumbuh ILP di Serian udah dikemendarka Menteri Besai Datuk Seri Najib Tun Razak.

"Menteri Besai udah ngemendarka penumbuh Institut Latihan Perindustrian (ILP) ti deka digaga ba Serian. Iya madah deka dipejalaika dalam Rolling Plan Ke-4, reti iya dalam timpuh empat tauka lima taun ke deka datai.

"Palan tauka tanah endur numbuhka ILP udah ditentuka tang mayuh pekara deka diatur baka langkar sereta patut minta pemendar ngagai State Planning Authority (SPA).

"Penumbuh ILP Serian nya ila ukai semina ungkup peranak menua Serian aja tang nyengkaum peranak Sibu, Simanggang, Simunjan sereta ke bukai.

"Nya alai kitai beterima kasih ngagai Menteri Besai laban udah ngemendarka penumbuh ILP di sitak Parlimen Serian," ku iya seraya ngarapka Serian nyadika chunto pengeluar pengereja pengawa bepengelandik.

Riot ti mega nyadi Kaban Parlimen Serian mansutka pekara nya lebuh dikerandau pengarang berita pengudah ngulu Program Gerak Gempur YB Menteri Sumber Manusia Turun Padang seraya Hari Tebuka Taun Baru China ti diatur ba Dewan Masyarakat Serian, ditu kemari.

Bejaku baru iya madahka perambu numbuhka ILP Serian nya mega senipak enggau juluk deka nempa 50 persin pengereja pengawa bepengelandik lebuh manggai taun 2020, kelimpah ari mayuh pengereja pengawa bepengelandik ti ditempa semilan opis menteri ke bukai.

Ku iya, naka kediatu Malaysia ari 14,000 pengereja pengawa semina 28 persin aja ke digelar pengereja pengawa bepengelandik.

"Juluk perintah diatu iya nya deka nambahka lima persin agi ngambika ba taun 2015 ulih tejapaika 33 persin pengereja pengawa bepengelandik lalu lebuh manggai taun 2020 tejapaika 50 persin pengereja pengawa bepengelandik," ku iya.

Ku Riot, Opis Menteri pegai iya bisi 32 buah ILP sereta tiga ILP ti bisi nyendiaka setipikit nyentuk ngagai renggat diploma dalam macham bidang.

Iya madah, semilan opis menteri mega bisi nyendiaka Latih Pengelandik Teknikal enggau Vokesyenal (TVT) ke nyengkaum Opis Pelajar, Opis Kereja Raya, Institut Kemahiran Belia Negara (IKBN) enggau ke bukai.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Gerempung Tuai Rumah Kanowit ngatur aum keterubah 2014

Posted: 08 Feb 2014 09:04 AM PST

SIBU: Gerempung Tuai Rumah Kanowit ngatur aum keterubah iya taun tu ba Palan Pengelandik Jari Kanowit.

Beberapa pekara dikerandau ba aum nya nyengkaum ngemeratka tanggungpengawa nyadi tuai rumah.

Aum nya mega bisi berandauka peminta piak Opis Pelilih Menua Mit ke minta tetiap tuai rumah di pelilih menua tu nyerenih rikut enggau profil Komiti Pemnansang enggau Pengelikun Genturung Pendiau (JKKK) rumah panjai diri empu.

Kelimpah ari nya, Tuai Rumah Anthony Ahju ke dipilih nyadi Presiden gerempung madah, tetiap tuai rumah patut nganjung riput ninting bulan sida ngagai opis pelilih menua mit.

"Kitai ke nyadi tuai rumah mega patut komited enggau tanggungpengawa diri empu sereta enda ngarapka timbal ari orang bukai.

"Tu laban tanggungpengawa kitai endang gawa ke rayat," ku iya.

Ku Anthony, semua penanggul ke ditapi tuai rumah dalam atur pengawa sida ke nyadi kaban gerempung patut diputarka nengah chara berunding tauka baum.

Ba aum nya mega, beberapa aktiviti baru udah diperambu nyengkaum ngatur pengawa nemuai seraya belajar ke Kuching sepengelama tiga hari ba bulan March ti deka datai tu.

Piak gerempung mega merambu deka ngatur Pekit Futsal enggau 'Sukaneka Antara Zon Ketua Kaum' ba bulan Ogos, 'Kuiz Perdana Ketua Kaum' enggau 'Malam Jasamu Dikenang' ba bulan September.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Sarawak diadang bisi ketuai perintah baru

Posted: 08 Feb 2014 09:03 AM PST

by Chris Bishop. Posted on February 9, 2014, Sunday

Berindik ari Taib ke ngeleka penuduk, KT enggau MKT meri kuasa ngagai Taib milih penganti

KUCHING: Seiku ketuai ke baru disadang deka nguluka Barisan Nasional (BN) Sarawak ba pengawa bepilih besai nengeri ti deka datai ke alai Kepala Menteri Pehin Sri Abdul Taib Mahmud deka ngeleka penuduk sebedau tembu timpuh DUN serak tu.

Ba siti aum pengarang berita pengudah tembu kunsil tinggi Parti Pesaka Bumiputera Bersatu (PBB) kemari, chaiman mendam Datuk Amar Mohamad Asfia Awang Nassar madah semua komiti tinggi (KT) enggau komiti kereja tinggi (MKT) meri kuasa ngagai Taib milih penganti iya.

"Seiku ketuai ke baru deka nguluka perintah BN nengeri ba pengawa bepilih besai ke deka datai.

"Kitai dalam PBB beratika pekara tu enggau berat ketegal timpuh DUN ke diatu deka tembu kenaka 30 Jun 2016.

"Ba sebarang maya iya (Taib) berundingka pematut, raban komiti tinggi enggau MKT meri mandat madu kepala menteri ke baru," ku iya.

Ditanya pemberita senentang berita ke dipansut suratkabar nasional ti mantaika Taib deka ngetu ari pengawa iya enda lama agi, Asfia madah iya enggai bejuraika panjai ba senentang berita selebubu nya.

Ku iya, riput ke ayan ba surat kabar nasional nya semina berita selebubu lalu aku enggai digaum ngerembaika berita selebubu ti datai ari berita ke bedau temu pengamat.

Asfia nambah, barang sapa aja ketuai ti dipilih kepala menteri patut diberi sukung ke pemadu kuat kelebih agi ba maya napai pengawa bepilih besai nengeri ke deka datai.

"PBB bisi mayuh raban ketuai ke chukup landik lalu nengah sukung sereta atur kereja begempung, kitai pechaya nengeri tu mengkang ulih dikuasa BN," ku iya.

Dalam timpuh besilih ketuai, nengeri Sarawak deka mengkang likun ketegal kitai ngembuan atur politik ti tegap, tandu iya.

Asfia enda nyangkal seiku ari tiga iku nama ketuai disadang deka dipilih Taib nganti penuduk.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.