» »Unlabelled » Nyerumba VSY 2014, MPP deka ngasaika mayuh pemansang BorneoPost Online | Borneo , Malaysia, Sarawak Daily News » Berita Iban - New 2 Borneo

05:39:00

Nyerumba VSY 2014, MPP deka ngasaika mayuh pemansang BorneoPost Online | Borneo , Malaysia, Sarawak Daily News » Berita Iban - New 2 Borneo

Nyerumba VSY 2014, MPP deka ngasaika mayuh pemansang

Posted: 06 Feb 2014 08:07 AM PST

KUCHING: Chairman Opis Kaunsil Kandang Bandar Padawan (MPP) Lo Khere Chiang besemaya deka ngema­jakka projek pemansang ti tau nguntungka rayat ke dipegai opis kaunsil nya.

Ku iya, entara projek ke dikemerat iya nya ngemansang produk dagang temuai kelim­pah ari ngemayuhka perengka guna enggau ngemanahka atur penyambung nyerumba taun Nemuai Ke Sarawak (VSY) 2014.

Iya mega madah, sukung ke tegap ari opis menteri kaunsil kandang menua enggau pe­mansang raban bansa dikearap ulih mantu ngemujurka projek ke udah diungkup ngagai rayat.

"Kitai deka majakka pro­gram pemansang ba kandang MPP nengah bantu ari opis menteri Datuk Sri Wong Soon Koh sereta geran ke diberi.

"Padawan ngembuan may­uh produk dagang temuai lalu nengah atur ngelakuka semua nya enggau engkeman kitai pechaya rayat ditu deka ngasaika penguntung," ku iya lebuh dikerandau bedau lama tu tadi maya pengawa Ngelalu Pengabang di rumah iya nyerumba Taun Baru China.

Berindik ari nya, kitai minta kerejasama ari semua rayat ke dipegai MPP ngambika program ke udah ditusun ulih dipejalai enggau nadai penang­gul, tandu iya.

Ngenang pengerami ngintu Taun Baru China, Lo ngan­sak semua rayat begempung ngenanka penyerakup ngam­bika menua mengkang likun.

"Ukai semina bansa China aja ke ngintu pengerami tu tang semua rayat ari macham bansa enggau jalai pengarap bela be­gulai ngerami," ku iya.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

‘Food Trail’ dikearap ulih ngelakuka pemakai asal

Posted: 06 Feb 2014 08:07 AM PST

KUCHING: Opis Menteri Dagang Temuai enggau Main Asal Malaysia nengah Lem­baga Penggalakan Pelancon­gan Malaysia bisi perambu deka ngatur 'Food Trail' di Sarawak dalam taun tu.

Direktor Lembaga Peng­galakan Pelancongan Malay­sia Negeri Sarawak, Salahud­din Mohd Ariffin madah, nya sebengkah ari chara dikena ngelakuka pemakai asal nengeri tu.

Sarawak ku iya, mayuh pemakai asal ti ulih dikelaku tauka diangkatka ngagai reng­gat tinggi.

"Kami (Dagang Temuai Ma­laysia) nguji ngatur 'Sarawak Food Trail' dalam taun tu, nengah atur program nya kitai ulih ngelakuka pemakai asal ke bisi di nengeri Sarawak.

"Aku empu meda di Sarawak tu endang mayuh peluang ti ulih dikemansang lebih agi bekaul enggau barang pe­makai baka mi kolo, mi jawa, laksa Sarawak, mulung eng­gau mayuh ke bukai.

"Semua pemakai asal nengeri tu ulih narit temuai ti ukai semina ari Semanjung Malaysia aja tang mega ny­engkaum ari menua tasik," ku iya.

Salahuddin mansutka peka­ra nya ngagai pengarang ber­ita lebuh ti nyempulang Ke­lab Ahli Penyokong Barisan Nasional (BNBBC) nemuai seraya bejalaika pengawa ngagai gerai tauka benteng Medan Niaga Satok ditu, kemari.

Entara BNBBC ti nemuai seraya bejalaika pengawa nya, Kaban Kunsil Nengeri (ADUN) Demak Laut Dr.Hazlan Abang Hipni enggau ADUN Samariang Sharifah Hasidah Sayeed Aman Ghazali.

Iya madahka dagang temuai Malaysia deka nempa kere­jasama enggau dagang temuai Sarawak dikena ngangkatka industri dagang temuai menua enggau Sarawak.

"Kami (Dagang Temuai Malaysia) deka gawa begulai enggau Opis Menteri Dagang Temuai Sarawak, Lembaga Pelancongan Sarawak nge­lakuka palan ti disadang ulih ngemansangka pemakai asal Sarawak," ku iya.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Medan Niaga Satok chakah bejalaika program kena narit temuai ari dalam enggau luar nengeri

Posted: 06 Feb 2014 08:05 AM PST

KUCHING: Macham program patut chakah dipejalaika ba gerai tauka benteng Medan Niaga Satok ti udah dipilih nyadi sebengkah ikon tauka chunto Sarawak, dikena narit temuai ari dalam enggau luar nengeri datai kia.

Ngarika Kelab Kaban Penyukung Barisan Nasional (BNBBC) ti mega nyadi Kaban Kunsil Nengeri (ADUN) De­mak Laut, Dr Hazlan Abang Hipni madah, nya mega ulih mantu ngelakuka pengawa dagang enggau ngangkatka dagang temuai ba endur nya.

Iya madah, BNBBC seruran nyukung deka sebarang pro­gram tauka pengawa ti dipe­jalaika ba endur nya ngambika palan nya majak dikelala sereta jelai rita.

"Kami nyukung semua orang dagang ditu (Medan Niaga Satok), baka sehar­itu kami ngatur sebengkah program raban bansa dikena ngelakuka palan tu seraya mantu ngemansangka pengawa dagang ditu.

"Kami mekuh ngagai gerai ti bisi produk asal nengeri tu ke ulih dikemegah sereta diberike­lala ti nyengkaum Gerai Chef Ahid ti bisi nyendiaka pemakai asal baka laksa Sarawak.

"Laban sekeda produk asal kitai ke ulih dikelakuka ngagai renggat ke tinggi tang enda ditemu orang laban kurang diberikelala tauka promosi," ku Hazlan bejaku ngagai pen­garang berita lebuh ti nemuai seraya bejalaika pengawa nga­gai Gerai Chef Ahid di Medan Niaga Satok ditu, kemari.

Nambahka nya, ADUN Samariang, Sharifah Hasidah Sayeed Aman Ghazali ti mega kaban BNBBC sepenemu enggau Hazlan madahka Gerai di Medan Niaga Satok begu­naka sukung sereta diangkatka chakah agi beduduk ari palan nya agi baru.

Tambah mega ku iya, Medan Niaga Satok disikap perintah ngena perengka guna ti chukup sereta senipak enggau pemanah rampa menua tauka kandang endur nya.

Kaul entara orang dagang ba endur nya enggau opis tauka ijinsi ti bekaul enggau industri dagang temuai mega patut ditegapka agi.

"Kami amat beratka orang dagang tauka bejual laban kami nemu sida tu ngembuan penyelai sereta ngemeratka asil Sarawak, nya kebuah kami amat komitmen deka mantu ngelakuka palan tu.

"Palan tu amat manah sereta bisi perengka guna ti disediaka perintah sereta ditusun manah, nya kebuah kitai patut chakah merikelala orang dagang tauka bejual enggau produk ti di jual.

"Kami minta opis dagang temuai enggau orang dagang ulih bekerejasama sereta be­rundingka bakani jalai nge­lakuka endur tu ngambika ulih narit temuai datai kitu," ku Hasidah.

Kelimpah ari nya, nitihku Direktor, Lembaga Peng­galakan Pelancongan Malaysia Nengeri Sarawak, Salahuddin Mohd Ariffin madahka, Medan Niaga Satok entara 10 ikon Sarawak.

"Nya alai ari piak kami be­gulai enggau opis tauka ijinsi dagang temuai Sarawak seru­ran sereta deka ngatur program begulai, ambika banding Ekspo Satok ti udah diatur taun nyin kemari," ku iya.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Penyampau kaunsilor MPP nambah ngagai 31 iku: Jerip

Posted: 06 Feb 2014 08:05 AM PST

KUCHING: Bisi 31 iku orang ti udah dichirika nyadi kaunsilor Majlis Perbandaran Padawan (MPP) udah ngang­kat sumpah megai tanggung­pengawa ungkup timpuh dua taun tauka Sesi 2014-2016, ditu kemari (ensana).

Menteri Muda Datuk Dr. Jerip Susil madah, penyampau nya bisi nambah dibandingka enggau taun sebedau tu.

Iya madah, raban kaunsi­lor nya ukai semina kaban politik aja tang nyengkaum ari gerempung ukai dikuasa perintah (NGO).

"Sekali tu penyampau kaun­silor MPP bisi nambah iya nya ari 25 iku sebedau tu ngagai 31 iku (Sesi 2014-2016).

"Sida 31 iku kaunsilor nyengkaum ari NGO ti bisi empat iku, SUPP (12 iku), PBB (9 iku), SPDP (3 iku) enggau ari PRS bisi tiga iku. Bisi 15 ari sida nya (31 iku) orang ke baru lalu kebukai dichirika baru.

"Ke diatu semina penuduk sapit chairman agi puang. Nama orang ke patut udah di­anjung ngagai kabinet nengeri ngambika diserenih, lalu nama orang ke mangku penuduk nya deka dipadahka pengudah aum kabinet ke dudi tu ila," ku Dr. Jerip ti enggai ngenang silik pekara nya.

Iya mansutka pekara nya dalam aum pengarang berita Majlis Angkat Sumpah Ahli Majlis MPP Sesi 2014-2016 ti diatur ba Dewan Majlis MPP ditu, lemai ensana.

Sebedau tu, sapit chairman MPP dipangku Mohd Hashim Yap.

Pengerami angkat sumpah nya dikemataka Menteri Kun­sil Kandang Menua enggau Pe­mansang Raban Bansa ti mega nyadi Menteri Wang Kedua, Dato Sri Wong Soon Koh.

Lo Khere Chiang orang keterubah ngangkat sumpah di mua Wong, ti nunjukka Lo dichirika baru nyadi Chair­man MPP sereta ditangkanka sekeda Kaban Opis Kaunsil ke lama enggau baru, ke mega udah berengkah bejalaika tanggungpengawa 1 Januari 2014 tu tadi.

Kelimpah ari nya, dalam jaku pengelalu pengerami nya, Lo ngarapka MPP deka chakah agi bejalaika pengawa beduduk ari mayuh raban ke baru sereta bepeneleba.

Iya ngarapka semua kaun­silor MPP ulih bekerejasama sereta nadai bechiping maya bejalaika tanggungpengawa.

"Nengah Kaban Opis Kaun­sil ke baru ti nyengkaum ari NGO sereta mayuh macham profesyenal, aku ngarapka kitai semua ulih meri Input Positif sereta penemu tajam dikena meri servis ngagai ra­ban bansa ke diau ba kandang endur ti dikuasa MPP.

"Aku ngarapka semua ti dichiri ulih sama enggau aku nyadi seiti tim gawa ke raban bansa di MPP, tambah mega kediatu kandang MPP mayuh udah maju, lalu peminta eng­gau guna rayat mega majak mayuh," ku iya seraya be­terima kasih ngagai perintah nengeri ti arap sereta nyirika iya baru nyadi chairman.

Pengerami nya mega bisi digulu Sekretari Mendam Opis Menteri Kandang Menua eng­gau Pemansang Raban Bansa Datuk Penguang Manggil.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Aum ‘Routes Asia’ nyungkak pejalai bilun menua Sarawak

Posted: 06 Feb 2014 08:05 AM PST

KUCHING: Perintah Sarawak nengah Opis Menteri Dagang Temuai bekerejasama enggau Malaysia Airport Berhad (MAB) deka ngatur aum antarabansa bekaul enggau 'Routes Asia' (Pejalai Bilun Asia), di Palan Aum Borneo Kuching (BCCK) kena 9-11 March tu ila.

Menteri Pengawa Dagang Temuai Datuk Amar Abang Johari Tun Openg madah aum besai tu ila deka baum bekaul enggau sektor penerebai bilun sereta piak ke megai tang­gungpengawa nyaga Padang Bilun di Asia.

"Aum 'Routes Asia' deka berandauka pasal industri penerebai bilun, ke digulu lebih 100 raban industri ari serata menua Asia.

"Kelimpah ari nya, dalam aum tu mega deka berandau ngiga pejalai tauka penerebai baru bilun enggau menua baru ke patut alai bilun terebai," ku Abang Johari.

Iya madah munyi nya be­jaku ba aum media, 'Routes Asia Forum 2014' di sebuah hotel antarabasa ditu, en­sana.

Tandu iya, dalam industri penerebai bilun ngelama tu, mayuh udah berubah nyeng­kaum kompeni bilun sereta lanskap penerebai bilun.

Diatu ku iya, diperatika mayuh bilun besai, bilun tambang murah nyengkaum bilun ke disuwa.

"Nya alai, beguna amat aum tu diatur bejuraika initiatif ke patut dikena ba industri penerebai bilun.

"Ambika chunto, baka di Sarawak, perintah ngemer­atka industri dagang temuai tang kitai napi penanggul kurang penerebai bilun kitu," ku iya.

Nya alai, ku Abang Johari, aum besai tu ila, deka meri peneleba ngagai eksekutif kompeni bilun, meda pema­nah sitak menua tu, lalu meri penguntung ngagai pengawa dagang temuai ti ulih dike­mansang jauh agi.

Kelimpah ari nya, iya madah peluang aum be­sai tu mega deka beratika pemansang makit di Asia dalam sektor dagang temuai kelebih agi dalam sengkaum Asia Pasifik, ASEAN nyeng­kaum Korea, Jipun enggau China.

"Enti kitai nyebut Asia, India pan sebagi ari Asia. Lalu enti digempung menua India, China, Korea enggau Jipun, makit dagang temuai sigi besai," ku iya.

Abang Johari ngarapka tim­bal ari aum Routes Asia tu ila deka meri penguntung ngagai Sarawak, kelebih agi lebuh menua tu besedia nerima kimpin 'Open Sky in ASEAN' belabuh ari 2015.

Taun 2013, di Padang Bilun Antarabansa Kuching (KIA) nerima urung 4.85 juta penumpang ti ngujungka KIA ba penuduk ketiga pe­madu mayuh nerima penatai penumpang kelimpah ari KLIA (47 juta) enggau Kota Kinabalu (6 juta).

Sama bisi ngulu pengawa nya Menteri Muda Pen­gawa Dagang Temuai Datuk Talib Zulpilip, Direktor Besai MAB Tan Sri Bashir Ahmad, Sekretari Mendam Opis Menteri Pengawa Da­gang Temuai Datu Ik Pahon, enggau Menijer Besai (Makit) MAB, Mohamed Sallauddin Mat Sah.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Seiku lelaki ditan riman ketegal masung

Posted: 06 Feb 2014 08:05 AM PST

KUCHING: Seiku sedadu di­tan riman empat hari belabuh ari kemari laban dipelaba bisi ngereja pengawa masung seiku nembiak indu baruh umur.

Pengerijista Kot Aida Mon­tong ngemendarka pengenan riman ngambika ngemu­ntangka pengawa polis nasat kes nya.

Timpuh riman saspek ke berasal ari Simunjan nya deka abis kena 10 Februari tu.

Nitihka riput polis, seiku indu berumur 17 taun ke benung betubuh bisi empat bulan ngaga riput polis pasal saspek nya laban enggai jadi enggau iya.

Indu nya madahka seduai iya udah suah beleman, lebih ari 10 kali, udah seduai iya bekelala enggau pangan diri dua taun tu ke udah, maya iya agi berumur 15 taun.

Saspek mega madah, sebedau tu sedadu nya kala madah ngagai iya mai iya jadi tang udah nya saspek nyau enda ngamatka jaku lebuh nemu indu nya udah betubuh bisi.

Kes tu diatu benung ditasat ba baruh Seksyen 376 Kanun Keseksaan ke ngungkupka ukum jil pengabis lama 20 taun sereta disipat enti ditemu besalah.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.