» »Unlabelled » Bangkai nembiak 12 taun ditemu gegaring tisi jalai BorneoPost Online | Borneo , Malaysia, Sarawak Daily News » Berita Iban - New 2 Borneo

05:22:00

Bangkai nembiak 12 taun ditemu gegaring tisi jalai BorneoPost Online | Borneo , Malaysia, Sarawak Daily News » Berita Iban - New 2 Borneo

Bangkai nembiak 12 taun ditemu gegaring tisi jalai

Posted: 30 Nov 2013 11:12 AM PST

ROBAN: Bedau lama tu tadi,kitai dikenyitka enggau berita baya ngeluwakka kerat mensia nadai pala, lengan enggau kaki, sekali agi peranak ditu dituntung penusah tetemuka bangkai seiku nembiak indu beumur 12 taun ba tisi jalai ditu, kemari.

Mansa dikelala enggau nama Rinnie Tiew anak Tiew Kutey ,12, berasal ari Rumah Nunung, Menggeris, udah ditemu peranak genturung pendiau dia ke benung mansa nurun ke umai enda jauh ari palan penyadi, urung pukul 6.30 pagi.

Mansa udah ditemu gegaring ba tisi Jalai Roban-Kabong iya nya enda jauh ari rumah panjai Rumah Robert, Sungai Pasir, Roban.

Apai mansa, Tiew Kutey, 47, madah, kena lemai ensana (Hari Lima) sebedau penyadi nya, mansa begulai enggau iya sereta seiku da agi aka iya ngelawa pengerami nikah seiku kaban belayan sida ke diatur ba Rumah Robert, Sungai Pasir, Roban.

"Iya (mansa) adi pengkuan ari 6 diri menyadi lalu baru udah tembu sekula ba sekula primari ba Sekolah Kebangsaan (SK) Engkabang, sereta deka nampung pelajar ngagai sekula sekondari ba taun ti deka datai tu.

"Aku tekenyit bendar lebuh ninga utai ke nuntung anak aku, kelebih agi, maya aku digerak dani kemari lalu ninga berita enda manah bekaul enggau pekara nya.

"Aku enda ulih ngetatka penyinu ati diri sepengudah ninga berita ti nuntung anak aku, kelebih agi lebuh meda iya udah tengkering kangkang lalu nadai enseput agi," ku iya maya dikerandau pemberita ba Rumah Mayat Sepital Saratok, kemari.

Indai mansa, Seloma Jenin, 50, ke mega bisi dikerandau maya nya enda ngadang penyadi nya nuntung anak iya.

"Aku baka ke enda pechaya lebuh ninga berita ti nuntung anak aku. Tu laban maya iya nurun begulai enggau aka enggau apai iya lemai kemari (ensana) maya ngulu pengerami nikah nya, iya baka ke nadai nenama.

"Iya (Rinnie) maya ngulu pengerami nikah nya nepan mutosikal begulai enggau aka iya, lalu apai iya nepan mutosikal enggau orang bukai.

"Nya meh kepenudi aku meda anak aku nya," ku iya enggau sesabak lebuh dikerandau pemberita.

Nyerumba enggau nya mega, Kepala Polis Pelilih Saratok (KPD), DSP Lee Thai Lein lebuh ditelefon ngesahka bisi nerima riput bekaul enggau penusah nya, lalu begeguai ngelawa palan penyadi.

Kes benung ditasat piak polis.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

RM98,000 digumpul dikena ngaga Gerija St. Barnabas

Posted: 30 Nov 2013 11:11 AM PST

MIRI: Sepenyampau RM 98,000 udah mujur digumpul dalam pengerami makai malam dikena ngumpul duit belanja ngaga gerija St. Barnabas, Taman Tunku kena malam Hari Lima tu tadi ke digulu urung 700 temuai.

Semua penyampau belanja dikena ngaga gerija nya dianggarka urung RM 1.2 juta ti ulih muat antara 400 nyentuk ke 450 iku mensia mayuh.

"Kitai udah bulih belanja RM300,000 ari Menteri Besai taun nyin tadi nengah Menteri Tenaga, Teknologi Gadung enggau Ai ke suba iya nya Tan Sri Peter Chin Fah Kui," ku Pengerusi Pengatur Makai Malam Ngumpul Wang Turu Gerija St. Barnabas Pemancha Wilson Siang Lim.

Ku iya, ungkus asal ngaga gerija nya sepenyampau RM 600,000 tang udah nambah ngagai RM1.2 juta dikena meli perengka guna ke moden.

Kelimpah ari nya, iya minta kaban menteri enggau komuniti Iban menua nya empu ngemeranka ulah kerjasama ngambika gerija nya ulih tembu nitihka penyampau belanja ke deka digumpul nangkanka tu.

Berebak enggau nya, Sekretari Politik Kepala Menteri Peter Howell Jilan ba jaku iya ngelalau ngambika nembiak mit bepengarap Keristin diiri enggau penemu nitihka ajar Keristin berengkah ari umur agi biak.

"Aku arapka embing enggau ajar Keristin ulih dikereja ba renggat umur agi biak," ku iya.

Tu ngambika bala nembiak nya enda tinggal ari pegai jalai pengarap enti udah tuai umur ila.

Ba pengerami nya, Kaban Parlimen Sibuti Ahmad Lai Bujang mega bisi meri belanja ari geran Projek Mit Menua pesisir (MRP) sepenyampau RM50,000 lalu Menteri Pemansang Rama Sarawak Tan Sri William Mawan Ikom nengah Peter mega bisi meri MRP sepenyampau RM 25,000 dikena ngaga gerija nya.

Sama bisi datai ba pengerami nya Father Solomon Cheong Chung Vun.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Keterubah pengawa beripai ba Kampung Damai

Posted: 30 Nov 2013 11:11 AM PST

MIRI: Urung100 iku peranak ari Kampung Damai, Sealine di Miri ditu bisi enggau ngulu pengawa beripai ti diatur kena 23 November tu tadi.

Pengawa beripai ti keteterubah iya diatur di genturung pendiau ditu sepengudah Komiti Pengatur Pemansang (ADC) ditumbuhka empai lama ti udah.

Sama bisi ngulu pengawa tu mega 15 iku bala pegawai ari Curtin University Miri betuaika Audrey Palance, iya nya Manijer Pemela Nembiak.

Lebuh berandau enggau bala pegawai ari Curtin Universiti pegawai ari opis Miri Caring Society (MCS) Charles Soo madah, semua ungkus belanja dikena ngaduka program nya dipelabaka manggai ngagai RM10 juta. Tu nyengkaum rega tanah, pengawa nyambung karan, nyambung bekal ai beresi, gis enggau perengka guna ti bukai.

"Aku meri besai terima kasih ngagai bala pegawai ari Curtin University ti sanggup kiruh muai hari mantu pengawa beripai tu," ku iya.

Sebedau KPP ditumbuhka kena 29 September, 2013 tu tadi, Kampung Damai tu dikumbai Kampung Sealine Atas, iya nya sebagi ari kandang menua Miri ti dikumbai Senadin Jaya ti dipansa Jalai Lutong-Kuala Baram. Diatu Kampung tu benung dalam program ti alai pendiau orang dalam genturung pendiau nya ditusun baru.

Urung 70 pintu diri sebilik kena ba tusun baru tu. Naka kediatu semina 42 pintu diri sebilik aja udah diberi tanah lot (TOL), lalu ke bukai nya nganti diri diberi enda lama da agi.

Sepengudah KPP ditumbuhka, mayuh aum diatur bejuraika chara dikena ngemansangka genturung pendiau nya.

Siti ari jurai tu iya nya pengawa ti ngupas tanah ti kena pansa jalai genturung pendiau enggau ngiga tiang entara siti-siti lot ti udah disukat ulih Opis Tanah enggau Survei (JTS) enggau tuju ngambika ngemuntangka pengawa ti ngaga jalai genturung pendiau enda lama da agi nitihka perambu dikena ngemansangka genturung pendiau nya.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

TR patut chakah mantu peranak rumah panjai

Posted: 30 Nov 2013 11:10 AM PST

Tanggamka kaul enggau pemesai perintah kena ngulihka penerang penyungkak tikas pengidup

SARIKEI: Bala Tuai Rumah (TR) dilalau chakah agi bejalaika tanggungpengawa mantu peranak rumah panjai nuju jalai pemansang.

Chairman Penyanding Penemu Kaunsil 1Malaysia Sarawak Datuk Joseph Salang Gandum madah, tanggungpengawa nya patut disan semua Tuai-tuai Rumah di nengeri tu baikka sida udah sah dipadu tauka benung mangku pengawa tuai rumah.

"Timpuh kitai (perintah) deka teulihka komuniti ba menua tu bepenatai pemisi tinggi semina urung tujuh taun agi maya nuju Wawasan 2020.

"Kitai patut nyikap diri ari diatu nyadi sebengkah komuniti ke bepenatai pemisi tinggi kelebih agi nengah pengawa betanam betupi chara dagang," ku iya ba pengerami Ketuai Begulai enggau Rayat di Rumah Papit Brandi, Sungai Kuap (Sungai Rusa) semak ditu, kemari.

Sama bisi datai bini iya Datin Lucy enggau Residen Sibu Sim Kok Kee.

Nyerumba pengerami nya, Salang mega bejadika jalai semin enggau ngelancharka pengerami mandangka mayuh bansa buah ba rumah panjai nya.

Salang ke mega Kaban Parlimen Julau ngansak Tuai-tuai Rumah ngambika suah agi betemu sereta ngerapatka kaul enggau Residen, Pemesai Opis Pelilih Mit enggau mega Pemesai Opis Betanam Betupi kena ngulihka penerang bekaul enggau polisi pemansang ke benung diatur sereta perambu perintah kena nyungkakka penatai pemisi rayat kelebih agi ba menua pesisir.

Ku iya, antara program kena nyungkakka penatai pemisi rayat ke diberi kelala perintah baka getah (belabuh nanam enggau nanam baru), lada enggau sekim nanam kelapa sawit.

"Enti peranak menua pesisir agi idup ba tikas penyeranta 10 taun ari diatu, nya berindik ari sida ti ngenggaika pemansang dibai perintah kena mantu sida.

"Pekara tu enda patut nyadi lalu enda patut diasuh nyadi," ku tandu iya.

Salang madah, berebak enggau nya mega, Tuai Rumah mesti ngenataika semua penanggul ke bekaul enggau peranak rumah panjai ngagai Pemesai Opis Pelilih Mit ngambika diputar enggau jampat.

"Tu beguna bendar ngambika semua pemesai tu nemu penanggul ke ditapi peranak rumah panjai. Sida ulih mantu mutarka penanggul nya," ku iya.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Peranak menua pesisir semakin sedar isu bekaul enggau rampa menua

Posted: 30 Nov 2013 11:09 AM PST

MARUDI: Peranak menua pesisir majak nemu, kelimpah ari penanggul rama enggau ekonomi ke ditapi sida, pekara ke bekaul enggau rampa menua sereta pengerai mega patut dikemeratka perintah enggau rayat.

Berindik ari nya, Program ke dikumbai 'Rakan Alam Sekitar' ke dikena ngiri penemu ti diatur ungkup peranak di menua pesisir nyengkaum di Marudi, beguna amat sereta patut dipejalaika belama.

Ku Kaban Parlimen Baram, Anyi Ngau program sentang rampa menua nya patut dikemayuhka agi taja pan ukai enda tau enda dipejalaika nengah program RAS.

"Aku meransang sekeda ijinsi perintah bejalaika  inisiatif sereta regas agi ngatur program nya,ukai semina dalam sitak Parlimen Baram aja tang mega ba sitak bukai ngambika rayat bisi penerang ke pemadu baru seraya nyungkak tikas rampa menua enggau penemu sida empu.

"Semua ijinsi patut begempung nyadi siti tim ngambika ulih meri penguntung ke besai agi ngagai rayat di nengeri ba pekara  ke bekaul enggau rampa menua," ku iya bejaku munyi tu lebuh bejadika 'Program Jelajah Jejak Mesra Rakan Alam Sekitar (RAS) 1Malaysia' tikas nengeri di Dataran Marudi kena Hari Lima tu tadi.

Teks jaku iya dibacha pengari iya, SAO Marudi, Rose Edward Tarang.

Ku Anyi,Kaunsil Rampa enggau Pesaka Asal (NREB) sereta Kaunsil Sungai-sungai Sarawak (LSS)bisi meri licha bekaul enggau kualiti sereta pengelikun sungai.

"Pekara tu beguna amat ngagai rayat di Marudi laban sida bepanggai ba sungai ngulihka penatai pemisi,tambah mega sungai mengkang nyadi jalai ke ditengah sida besehari-sehari.

"Pemeresi sungai patut diintu belama ngambika ikan enggau pemanah  ai semampai beresi belama. Ungkup orang ke betengahka sungai,sida patut seruran ngemeratka pengelikun," ku Anyi.

Ku iya baru, semua penusah ke nuntung menua tu baka ampuh bah,sebun asap,tanah tusur enggau penusah bukai ke bendar bepun ari ulah mensia ke ngachau rampa menua.

Penusah nya patut nyadika lalau ngagai semua orang, tambah mega raban ke bekaul patut bejalaika pengawa ngintu rampa menua.

"Kitai patut nyeliahka penanggul nya ngambika enda majak nyadi laban pengawa ngemanah enda ulih dipejalaika nengah ajih tang begunaka belanja ke besai.

"Manah agi nyeliah ari ke ngemanah," ku Anyi.

Berebak enggau nya, licha sentang rampa menua dikenataika Pemesai Ngintu Rampa Menua Ba Kandang Menua Bagi Miri, Joseph Uyo udah nya ditangkanka licha sentang Pengelikun Sungai dikenataika Pemesai Menguasa LSS Marudi, Wan Hurang.

Sama bisi dia maya nya, Sapit Kontroler Kanan NREB Sarawak Justin Juk Jau.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Penatai kami ukai deka ‘ngachau daun’: Zainuddin

Posted: 30 Nov 2013 11:09 AM PST

KUCHING: Parti Progresif Demokratik Sarawak (SPDP) endang mai ati ke lurus  deka mantu komponen parti Barisan Nasional (BN) bukai ba sekeda sitak ke ukai diempu sida.

Mandal Presiden parti nya, Kapten Zainuddin Tan Sri Hamdan Sirat madah, penemu bala sekeda kaban enggau ketuai parti komponen BN ti madahka penatai sida ba sekeda sitak nya deka 'ngachau daun' amat salah.

"Kami kia ukai deka 'ngachau daun', tang deka nyaup ngenegapka BN ba sitak nya. Kami deka mantu kaban kami dalam BN (PBB, PRS enggau SUPP)," pia ku Zainnuddin bejaku lebuh ti bejadika Unit SPDP Kota Padawan ba Taman Landeh kena malam Hari Lima tu tadi.

Zainuddin bejaku munyi tu lebuh ke ngenang jaku tuduh sekeda ketuai nembiak redak enggau bala kaban  parti komponen BN ke enda lantang ati enggau SPDP sereta madahka parti nya deka ngerembaika sayap ngagai sitak ke ukai diungkup ngagai parti nya.

Ku iya, taja pan sitak parlimen Mambong ke mungkur sitak Kunsil Nengeri Bengoh enggau Tarat ukai ari baruh pegai SPDP, tang parti nya deka majak nyaup ngenegapka BN dia.

Sitak parlimen Mambong diarika Datuk Seri Dr James Dawos Mamit ari Parti Pesaka Bumiputera Bersatu (PBB), lalu sitak Kunsil Nengeri Bengoh diarika Datuk Dr Jerip Susil ari Parti Sa'ati Rayat Sarawak (SUPP).

"Sesapa ke nganu kami (SPDP), patut ngetuka pengawa nya laban kami endang nyaup sida engagu ati ke lurus, sereta nadai ngembuan akal jai. Kitai patut berakup nyatup penyakal," ku Zainuddin.

Ba pengerami nya, Zainuddin udah nerima ngelui ari 300 iti pom peminta nyadi kaban SPDP.

Ku Zainddin baru, naka ke diatu SPDP ngembuan ngelui ari 5,000 iku kaban ba sitak Parlimen Mambong.

Berebak enggau nya, Kennedy Si-Uni udah dipilih nyadi protem chairman unit nya lalu  Satem Sanggeng dipilih nyadi sapit chairman.

Bala kaban komiti bukai iya nya Devi Rijek (sekretari), Adnan Husni (sapit sekretari), Jeffrey Jehon Senong (tukang wang), Jerome Salleh (sapit tukang wang). Kaban komiti bukai nyengkaum Berry, Hamilton Jeffrey Jehon, George Jimbai Marik, Bennet Naeng, Jipas Lagun, Federick Dirom, Derin Dosara enggau Julis Ponit.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.