» »Unlabelled » Bebasaka pemutus Kourt, angkat ari tanah kami BorneoPost Online | Borneo , Malaysia, Sarawak Daily News » Berita Iban - New 2 Borneo

05:02:00

Bebasaka pemutus Kourt, angkat ari tanah kami BorneoPost Online | Borneo , Malaysia, Sarawak Daily News » Berita Iban - New 2 Borneo

Bebasaka pemutus Kourt, angkat ari tanah kami

Posted: 14 Apr 2014 02:53 PM PDT

Sekat ba pintu penama di Bukit Engkarit majak enti sida enda ngetu ngembuah sawit nitihka letak Kourt

KUCHING: Komiti (AJK) Bertindak Kampung Lebur Jalai Gedung, Serian ngansak sebengkah kompeni sawit bebasaka pemutus kededua Kourt Tinggi enggau Kourt Apil, Kuching lalu nyerahka tanah NCR sida ti udah dikereja enggau nadai pemendar kenyau ari taun 1997.

Berengkah ari 11 April tu tadi, lebih 100 iku peranak kampung Lebur ke mega orang bempu tanah NCR ngaga sekat ba jalai penama ngagai ladang, minta kompeni badu ngembuah sawit sereta nyerahka kuasa tanah ngagai sida.

Nitihka penerang ari seiku kaban AJK Kampung Lebur, Mamat anak Ambas ,62, sekat diadu enggau likun lalu ukai deka ngelaban sesapa baikka nya perintah.

"Kami semina minta kompeni ninggalka ladang tu nitihka pemutus sereta perintah ari Kourt Tinggi ba taun 2012 enggau pemutus Kourt Apil ba taun 2013.

"Seagi kompeni mengkang enda angkat ari ladang, sekat ba pintu penama di Bukit Engkarit (Sg Tapang) enda diketu,"ku iya lebuh dikerandau Utusan Borneo kemari.

Mamat nambah, urung 3,000 hektar tanah NCR ke diempu peranak Kampung Lebur dikereja kompeni enggau nadai pemendar ba taun 1997.

Ku iya, pengudah kayu kampung ditebang sereta diperesi, kompeni berengkah nanam sawit ba taun 2003 lalu buah sawit dikembuah kompeni nyentukka diatu.

"AJK Bertindak Kampung Lebur mai kes tu ngagai kourt ba taun 2002 lalu pechara tembu ba taun 2006. Pengudah 6 taun, Kut Tinggi ba taun 2012 netapka pemutus kompeni nya alah pechara lalu tanah diserah ngagai kami.

"Taja pia, kompeni sekali agi mai kes tu ngagai kut Apil ba taun 2013 tang pemutus kut mengkang sama iya nya kami ke nyadi orang bempu tanah menang.

Diatu kami ninga kompeni deka mai kes tu ngagai 'Mahkamah Persekutuan', tandu iya.

Mamat enggau kaban AJK Bertindak bukai kemari betemu enggau luya sida, YB See Chee How di Opis Parti Keadilan Rakyat (PKR) berandauka pengawa kompeni ti deka mai kes ngagai Mahkamah Persekutuan.

Penemuai sida ngagai opis PKR betuaika chairman Jengga anak Jeli enggau penyanding penemu AJK ex-Tr Nyutan anak Jambi sereta empat iku agi kaban bukai.

Mamat mega madah siti aum begulai enggau pengari kompeni diadu tengahari kemari berundingka chara mutar kes.

"Kami sigi nadai penanggul enti dibai berandau, sebarang pemutus patut ngemeratka kami ti ngempu tanah nitihka penetap Kut Tinggi enggau Kut Apil,"ku Mamat.

Print Friendly

Bangkai Ex-Tuai Rumah Alfonso udah temu

Posted: 14 Apr 2014 02:50 PM PDT

MARUDI : Ex- Tuai Rumah panjai Padang Kerbau B di Poyut/Lubok Nibong ke diripot lenyau dalam pejalai ke kebun lada ti ngenyauh lima minit pejalai ari rumah panjai sida kena Hari Dua minggu nyin tadi, udah ditemu parai ba kandang rumah panjai nya.

Raban Penginga enggau Penyelamat nemu bangkai iya urung pukul 1.15 ngalih hari kena Hari minggu udah bekau ke begigaka iya dalam kandang tiga malam empat hari.

Ex- Tuai Rumah Alfonso Deli Sigah, 69, dipechaya nitihka bini iya , Bejau Rimong, 58, enggau anak indu tuai iya , Seniah Deli ke kebun lada sehari nya, ke alai iya lalu ditemu lelang.

Ku Seniah lebuh ti dikerandau pemberita The Borneo Post , niang api iya enda bepengerai tegal kala ngidap penyakit strok beberapa taun ke udah.

Taja pia iya ulih bejalai ngena tungkat.

Ku iya baru, sebedau bangkai apai iya ditemu, sida nguji ngiga iya ngena mayuh macham chara nyengkaum bemanang sereta begawai ti ngujungka bangkai apai iya lalu ditemu.

Pengelebang iya ngenakutka komuniti Iban ba kandang menua nya, laban nya meh kedua kali orang udah lelang ke alai sebedau tu bisi seiku orang tuai ari Rumah Entika Maoh, Sg Poyut ke benama Kanang Empikau, mengkang lebang nyentuk ke diatu lebuh ngetan bubu ba sungai.

Nengah awak tu, Seniah ngarika sida sebilik beterima kasih ngagai semua orang ti udah mantu begigaka apai iya baka raban Polis, Bomba enggau bala ari rumah panjai Lugan Tungga, Lobang Kompeni, Sg Poyut, rumah panjai Rumah Baran enggau Padang Kerbau A sereta bala kaban belayan bukai, ku iya.

Print Friendly

PIBG SK Lichok mujur ngatur licha peransang nembia kena 12 April

Posted: 14 Apr 2014 02:50 PM PDT

SARATOK: Gerempung Apai Indai enggau Pengajar (PIBG) SK Lichok udah mujur ngatur licha peransang ungkup nembiak ari Primeri Satu ngagai Primeri Enam kena 12 April tu tadi.

Kepala pengajar sekula nya, Melintang Liban madah, licha nya diatur laban deka meri peransang enggau ngembing nembiak berengkah ari umur ke biak ngambika sida ngembuan juluk ati.

"Nambahka nya kami mega deka nyintalka agi kaul antara raban sekula ba tuju nempa nembiak sekula ti mujur ba pelajar," pia ku iya madah.

Ba pengawa nya, sida bisi ngangauka Sapit Chairman Sarawak Dayak Graduates Association (SDGA) Dr Charlie Dudang meri licha peransang.

Maya nya, Dr Charlie bisi bekunsika cherita pengidup iya nyengkaum cherita maya iya sekula suba.

Iya mega bisi madah, enti deka mujur nembiak meseti ngembuan juluk ati enggau pengeransing ba diri empu.

"Kelimpah ari nya, nembiak anang enda mendingka jaku pengajar, semampai bebendar deka belajar sereta ngembuan ulah ti manah ba sekula," pia ku iya.

Pengawa sehari nya digulu kira bisi 120 iku nyengkaum nembiak sekula nya empu.

Print Friendly

Bangkai udah ditanam, ripot buntastasat nadai kait jenayah

Posted: 14 Apr 2014 02:49 PM PDT

KUCHING: Pemutus buntastasat ba seiku anak mit indu beumur 6 taun, Elysha Natasha Shukri, ari Simunjan dijangka nadai kait enggau pengawa salah nya kena penyati tauka jamah .

Kepala Polis Pelilih Menua Simunjan Sapit Supritendan Choo Yin Kok madah, nitihka ripot pengerai, nadai sebarang abi ke tau munuh tauka bekau charik ba pemalu ditemu ba bangkai anak mit nya, tang anak mit nya dipelaba bisi ngidap penyakit.

"Anak mit nya ditemu bisi kena rampit penyakit ba organ dalam ke ngujungka darah pansut ari kanda kemi.

"Nadai sebarang bakal ke tau ngeruga ati. Nadai mega sebarang bekau charik ba (private part) anak mit nya," ku iya madah dalam teks pesan jaku pandak ngagai pemberita, kemari.

Choo madah, sekeda pakar ngeli ari Hospital Kuala Lumpur ke bisi dibai kitu, mantu dalam pengawa tasat nya tetemuka bekau kena gigit di lengan anak mit nya ukai enggi orang besai tuai.

"Bekau gigit nya baka digaga anak mit," ku iya.

Iya madah, polis mega udah ngelepaska ibu enggau aya anak mit nya ke kena riman polis.

Hari Lima tu tadu, anak mit nya ke besekula ba prasekula di Sekolah Kebangsaan Sageng ditemu mati enggau bekau darah pansut ari (private part) sereta bekau gigit ba lengan iya.

Polis lalu nangkap aya anak mit nya ke beumur 46 taun ke gawa nyadi pembantu am rendah di sebuah sekula, udah sida iya nerima ripot ari Hospital Simunjan bekait enggau penusah ke nyadi nya dalam urung pukul 9.45 malam.

Udah nya, indai tuai anak mit nya, ke gawa nyadi pengajar, berumur 44 taun, ditangkap di rumah sida iya dalam urung pukul 10.30 pagi hari Minggu tu tadi laban deka ditasat.

Anak mit nya diau enggau aya enggau ibu laban indai iya empu, Norliza Mustafa, 45, ti mega indai tunggal gawa sereta diau di Serian.

Bangkai anak mit nya udah dituntut sida sebilik ngambika ulih ditumbak, pagi kemari.

Print Friendly

Titi nali pengawa tuai ke dulu

Posted: 14 Apr 2014 02:48 PM PDT

Bala TR dikeandal ulih nampung pengawa ngemansangka peranak ngambika enda tinggal ari arus pemansang  

LUNDU: Tuai Rumah (TR) ke baru dichiri dikearap ulih nampung pengawa ngemansangka genturung pendiau ke ari baruh pegai sida.

Ex-Tr Genturung Pendiau Sileng Dayak, Stindi Nyua madah,sida patut ulih nampung pengawa ngemansang peranak genturung pendiau nya ngambika sida ulih ngasaika semua pemansang ke di bai perintah.

"Aku arap Tuai Rumah ke baru dichiri ulih nampung pengawa ngemansangka raban bansa Iban di Pelilih Lundu tu," pia ku iya lebuh ke enggau betemu ba pengerami 'Jasamu Dikenang' Ketuai Iban Lundu ti diatur Komiti Raban Bansa Tuai Iban Lundu (KRBTIL) ba Dewan Genturung Pendiau Sungai Limo, ditu ensana.

Kelimpah ari nampung ngemansangka genturung pendiau, ku Stindi, tanggungpengawa ke deka dikemeratka iya nya ngumpul sereta ngerejista peranak genturung pendiau nya dalam e-Kasih.

"Ngerejister sida dalam senarai e-Kasih nya beguna amat ngambika sida tu ulih nerima bantu," pia ku iya seraya madahka diri nyukung sereta deka mantu Tuai Rumah ke  baru dichiri nya.

Berebak enggau nya, Tuai Rumah baru Genturung Pendiau Stunggang Ulu, Joseph Jiken Noyit lebuh ke berandau enggau pemberita madahka iya besemaya deka nampung ngemansangka peranak menua ke ari baruh pegai iya.

"Mengkang mayuh perengkaguna ti bedau bisi ditu nyengkaum jalai nuju ke rumah enggau Balai mensia mayuh ditu.

"Kami arapka perintah nyendiaka belanja ungkup genturung pendiau kami, ngambika kami ditu ulih ngasaika perengkaguna ti disediaka perintah," ku iya.

Beserimbai enggau pengeami nya, 18 ketuai bansa Iban pelilih Lundu udah ngangkat sumpah nyadi Tuai Rumah.

Seraban 15 iku Tuai Rumah ke ngetu mangku pengawa nya, nerima setipikit basa.

Print Friendly

Puan Sri Julia ngenataika penyinu ati ngagai penusah ke nuntung Kaunsilor Monica

Posted: 14 Apr 2014 02:47 PM PDT

LIMBANG: Bini Menteri Pemansang Rama Puan Sri Julia Mawan udah ngawakka jam nemuai ngagai Chairman Indu  SPDP Bukit Kota Kaunsilor Monica Usun Tingang ditu.

Lebuh ke nemuai nya, iya ngenataika penyinu ati ngagai  Monica laban anak iya, Branson Del Duncan, 17, udah parai ba penusah bot karam lebuh ti mulaika diri ngagai kampung sida di Kuala Baram ujung bulan March tu tadi.

Nyempulang iya Kaunsilor Barbara Mawan, Kaunsilor Julia Guwen, Chairman Indu SPDP Batu Danau Itil Galis, Josephine Tuah enggau bala komiti Indu enggau Puteri SPDP Bukit Kota sereta Batu Danau.

Monica meri terima kasih semua ke udah nyaup ba pengawa ngiga enggau nyelamat anak iya sereta mega ke udah nyuaka pemeri enggau bantu ba pengawa nguburka anak iya.

Print Friendly
We encourage commenting on our stories to give readers a chance to express their opinions; please refrain from vulgar language, insidious, seditious or slanderous remarks. While the comments here reflect the views of the readers, they are not necessarily that of Borneo Post Online. Borneo Post Online reserves the right not to publish or to remove comments that are offensive or volatile. Please read the Commenting Rules.