» »Unlabelled » Pengelebang bilun MH370 enda ngeruga kaul Malaysia enggau China BorneoPost Online | Borneo , Malaysia, Sarawak Daily News » Berita Iban - New 2 Borneo

05:15:00

Pengelebang bilun MH370 enda ngeruga kaul Malaysia enggau China BorneoPost Online | Borneo , Malaysia, Sarawak Daily News » Berita Iban - New 2 Borneo

Pengelebang bilun MH370 enda ngeruga kaul Malaysia enggau China

Posted: 21 Apr 2014 02:38 PM PDT

KUCHING: Konsul General menua China di Kuching, Liu Quan pechaya kes pengelebang bilun MH370 ti terbai ari Kuala Lumpur ke Beijing enda ngeruga penegap kaul entara Malaysia enggau China.

Lebuh dikerandau pemberita pengudah nemuai betemu Kepala Menteri Tan Sri Adenan Satem, Quan madah kaul entara kededua menua mengkang manah sereta tegap.

"Pangka ari penusah bilun MH370 ke lenyau enda ngeruga pemanah kaul entara menua Malaysia enggau China.

"Pengeringat sekeda rayat China asai aku enda lama lalu kes nya semina mai pangka ke mit nya ngagai kaul kededua menua.

"Malaysia enggau China ngembuan kaul ke tegap lalu Malaysia entara siti menua ti keterubah ngadu kaul diplomatik enggau China ba taun 1974,"ku iya.

MH370 ke dipelaba labuh ba laut Hindi kenaka pagi 8 Mac ditepan 153 iku peranak China ari penyampau 227 iku orang numpang.

Ba kaul ke sama, iya nambah, taun tu genap 40 taun kaul entara kededua menua sereta ngarap kaul ke tegap nya deka diintu enggau manah ba taun ke datai.

Ngenang senentang penemuai iya betemu enggau Adenan, Quan madah randau seduai ngemeratka kaul dagang entara kededua menua.

"Kitai meransang mayuh agi peranak ari menua China datai ngambi bagi ba atur dagang di Sarawak kelebih agi di palan SCORE.

"Nengah randau kami duai sehari tu, kitai ngarap kaul manah ti udah lama digenggam ulih dikelaku ngagai tiap peranak menua Malaysia enggau China,"ku iya.

Print Friendly

MB Perlis ngenataika surat undang SUKMA Ke-17 ngagai Adenan

Posted: 21 Apr 2014 02:38 PM PDT

KUCHING: Tuai Rumah Sukan Malaysia ti Ke-17, Nengeri Perlis sedia nerima penatai semua kontinjen bepekit ba main enggau lumba nya ti disadang berengkah ari 24 Mei nyentuk 4 Jun 2014.

Menteri Besai (MB) Perlis, Azlan Man madah, maya manggai ba maya nya ila, semua palan endur ngatur main enggau lumba SUKMA deka tembu digaga.

"Diatu, tiap palan endur ngatur lumba enggau main udah sedia. Semina empat palan aja mengkang digaga diatu lalu kitai nyadang pengawa nya deka tembu ba pengujung bulan April tu.

"Empat palan ke benung digaga iya nya, balai badminton, Skuash, palan aquatik enggau padang golf. Kunteriktor nyamin semua empat palan nya deka tembu ba pengujung bulan tu,'ku iya.

Iya mansutka penerang tu ngagai pemberita pengudah nemuai ngenataika surat undang ngagai Kepala Menteri Tan Sri Adenan Satem, perintah nengeri sereta kontinjen Sarawak di Wisma Bapa Malaysia Petra Jaya ditu, kemari.

Penemuai Azlan bela disempulang sekeda raban exco Perlis lalu bela digulu Menteri Pemansang Rama Tan Sri William Mawan enggau Menteri Muda Lumba enggau Main Datuk Dr Lee Kim Shin.

Azlan nambah, urung 9,500 iku orang ke nyengkaum raban atlit, raban teknikal sereta volunteer ari sereta nengeri deka begempuru ba mayuh bengkah palan di Perlis dalam timpuh dua minggu SUKMA diatur.

Ngenang senentang penemuai sida seraban, Azlan madah penemuai nyadi siti pekara tradisional ke patut diadu tiap tuai rumah SUKMA kenyau dipun ba taun 1986.

"Penemuai ngenataika surat undang rasmi ngagai tiap nengeri sigi pekara ti dikemeran kenyau SUKMA dipungkal.

"Aku ngarika Nengeri Perlis nampung pengawa tu,"ku iya.

Kelimpah ari nya, Azlan mega madah SUKMA ukai semina deka ngiga atlit baru ke chakah tang mega deka negapka penyerakup rayat Malaysia ti diarika bemacham bansa sereta jalai pengarap.

Ba kaul ke sama, Mawan ti nimbal jaku undang ari Perlis madah siti pengerami ngintu Hari Gawai deka diadu di Perlis rambau SUKMA nya ila.

"Ketegal main nya diadu maya kitai Dayak di Sarawak ngintu Hari Gawai, raban kontinjen ari Sarawak deka dinah ba siti pengerami Gawai di Perlis kena 1 Jun.

"Kitai mega ngundang tuai rumah SUKMA ke 17, Perlis datai berami ke alai kontinjen ari nengeri bukai mega bela diundang,"ku iya.

SUKMA Ke-17 nyendiakka 396 midul emas, 396 midul perak sereta 473 midul engkeraju diperebut semua atlit.

Sarawak disadang nyadi tuai rumah SUKMA Ke-18 ba taun 2016.

Print Friendly

DBP benung mansik jaku genap pupu bansa

Posted: 21 Apr 2014 02:37 PM PDT

by Chris Bishop. Posted on April 22, 2014, Tuesday

Ari nya opis tu deka ngeluarka sepuluh iti bup serebareti ngundan jaku bansa asal di Sarawak

KUCHING: Dewan Bahasa dan Pustaka (DBP) nagit ngeluarka sepuluh iti bup serebareti bansa asal Sarawak ba taun 2014, ku Direktor Besai DBP Malaysia, Datuk Dr Awang Sariyan.

Lebuh dikerandau pengudah nemuai betemu enggau Kepala Menteri Tan Sri Adenan Satem di Wisma Bapa Malaysia kemari, iya madah pansik benung dipejalai diatu bekaul enggau jaku tiap pupu bansa di Sarawak.

Ba kaul ke sama, Pemangku Direktor DBP Sarawak Dr Hazami Jahari ke bela nyempulang penemuai nya madah renggat keterubah pengawa ngeluarka bup sereba reti ti dipun ba taun 2013 nya nyengkaum pengawa ngempuruka leka jaku, cherita rayat enggau bup sereba reti Jaku Iban edisi pansik.

"Sepenyampau RM125, 690 agih ari perintah nengeri udah diterima ungkup pengawa ngeluarka sepuluh iti bup serebareti ti ngundan leka jaku bansa asal Sarawak.

"DBP Sarawak mega merambu ngeluarka bup ensiklopedia jaku bansa asal di Sarawak,'ku iya.

Perambu nya benung dikerandau ke alai kitai deka ngiga imput ke senutuk kelimpah ti ngiga belanja bukai ari ijinsi ke bekaul, tandu iya.

Print Friendly
We encourage commenting on our stories to give readers a chance to express their opinions; please refrain from vulgar language, insidious, seditious or slanderous remarks. While the comments here reflect the views of the readers, they are not necessarily that of Borneo Post Online. Borneo Post Online reserves the right not to publish or to remove comments that are offensive or volatile. Please read the Commenting Rules.

Rayong: Anang ngenggaika tanah NCR disukat

Posted: 21 Apr 2014 02:35 PM PDT

SKRANG: Rayat di menua pesisir dalam sitak Kunsil Nengeri (DUN) Engkilili dilalau anang ngenggaika pengawa nyukat perimeter tanah Adat Bansa Asal (NCR) sida.

ADUN Engkilili Dr Johnnical Rayong anak Ngipa madah, pengawa nyukat perimeter ti dipejalaika Opis Tanah enggau Survei (JTS)nya beguna amat ngambika tanah NCR sida ulih dituku nengah Seksyen 6 Undang – undang Tanah Menua.

"Pengudah rayat bulih surat ari perintah dikena ngaku tanah NCR, nya baru tanah nya amat di empu kita semua," pia ku iya.

Iay bejaku munyi tu lebuh bejadika Pengerami Merarau Begulai enggau Rayat ba rumah panjang Francis Buyong Baru, Lidong, kena Hari Enam minggu nyin tadi.

Nengah awak nya, Dr Rayong ngungkupka Belanja Projek Mit Pemansang Menua Pesisir (MRP) RM10, 000 ngagai JKKK Rh Francis Buyong Baru, lalu RM3000 ngagai Biro Indu sida.

Ku Dr Rayong, sepengudah bulih surat nya, rayat tau minta saup ijinsi perintah baka MPOB enggau RISDA ngemansangka tanah nya ngena projek betanam betupi nengah chara komersil.

Iya mega minta rayat di DUN Engkilili terus meri sukung ke penuh ngagai Barisan Nasional (BN) ngambika sida bulih pemansang belama ari BN.

Ku iya, rayat menua pesisir mengkang begunaka saup perintah ari segi nyungkak tikas pengidup nyengkaum penyikap perengkaguna, pelajar enggau penyambung.

"DUN Engkilili diatu majak berubah lalu projek pan deka sereta benung dipejalaika ditu. Nya alai aku minta semua rayat majak nyukung perintah laban semina perintah aja ulih nyaup nyungkak tikas pengidup rayat," pia ku iya.

Print Friendly

Bujang dara diperansang masuk Pekit Keling, Kumang Gawai kena 17 Mei tu

Posted: 21 Apr 2014 02:34 PM PDT

SIBU: Bala bujang dara ke beumur 18 taun ke atas lalu enda ngelui 30 taun sitak tu ditesau ngambi bagi ba Pekit Keling enggau Kumang Gawai Dayak 2014 Sitak Sibu ke diatur kena 17 Mei tu ba Hotel Kingwood pukul 7 lemai.

Pekit tu diatur beserimbai enggau Pengerami Makai Lemai Gawai Dayak Sitak Sibu ke diatur begulai Sarakup Indu Dayak Sarawak (SIDS) pampang Sibu, Sarakup Dayak Sarawak (SDNU) Pampang Sibu, SDNU Pati Rajang, SDNU Pati Sibu Jaya enggau Gerempung Orang Ulu (OUNA) Pampang Sibu.

Chairman Komiti Pekit Keling, Barieng Balai madah, pekit tu nadai bebayar.

"Taja pan baka nya, bala pemekit deka dipilih dulu ba Hotel Tanahmas kena 11 Mei pukul 1 lemai," pia ku iya madah kemari.

Iya madah, champian pekit deka mai pulai perais mata duit RM1,000 lalu disempulang trupi enggau hamper.

"Penuduk lumur dua mega mai perais mata duit RM800, trupi enggau hamper lalu pia mega penuduk lumur tiga mai perais mata duit RM600, trupi enggau hamper.

"Penuduk lumur empat mai perais mata duit RM400," ku iya madahka baru.

Kelimpah ari nya, penuduk lumur lima mega mai perais mata duit RM250 lalu ditangkan penuduk lumur enam ngagai 10 bela mai perais saguati RM150.

Ba pekit Kumang, chairman komiti pekit tu Angelyn Uchi Maseng madah, pekit nya sebaka enggau pekit keling.

Tang kenu ku iya, perais ungkup champian pekit nya deka disempulang selampai enggau 'mahkota'.

"Perais mata duit ungkup champian nyentukka saguati deka sebaka enggau pekit Keling," pia ku iya nerangka.

Pom dua bengkah pekit tu tau diambi ba Barieng Balai nengah lumur 013-8107234, Angelyn Uchi Maseng (016-8825861), Rose Chukan (013-8313990) enggau Senorita Salleh (013-8025652).

Pom enda tau laun dianjung ngelui 8 Mei ti deka datai.

Print Friendly

Lima iku Tuai Rumah ngayanka bantah kompeni ngereja kuari di Sri Aman

Posted: 21 Apr 2014 02:33 PM PDT

KUCHING: Peranak ke diau ngelingi menua Melugu, Panggil enggau Klauh, Sri Aman tetap mantah pengawa ssebengkah kompeni ti deka numbuhka kuari ba bukit ke besemak enggau genturung pendiau sida.

Semilan buah rumah panjai, kenyau kelia sigi bepanggai ba bukit nya endur ngulihka bekal ai nengah sistem graviti kelimpah endur begiga pemakai.

Irauka kompeni majak ngeruga pemanah rampa menua ba bukit nya, 5 iku tuai rumah (Tr) ngerandau pekara nya enggau Chairman DAP Sri Aman Leon Jimat Donald di opis iya kemari.

"Pengawa numbuhka kuari tau ngeruga pengidup peranak ari semilan buah rumah panjai ke diau ngelingi bukit nya kelebih agi di Melugu, Pangil enggau Klauh.

"Kuari deka ngeruga pengidup kami kelebih agi ngeruga pun penatai bekal ai kami diatu. Pengawa ngulihka batu nya mega deka ngeruga penatai pemisi kami.

"Kami enda setuju lalu deka mantah,' ku Tr Brown anak Sedok. Tr Kusam ke bela datai berandau enggau Leon madah sida udah ngempang ba jalai penama nuju bukit.

Ku iya, kami udah nagang kompeni ngadu kereja sereta nagang sida tama ketegal sida mansa tanah ke diempu kami.

Kelimpah ari nya, iya mega madah 3 iti ripot polis udah digaga lalu sida mega minta Leon mai pekara tauka penusah sida ngambika ditemu semua.

Nimbal pinta sida tiga, Leon besemaya deka mai pekara ngagai ejensi ke bekaul nyengkaum ngagai opis Kepala Menteri.

"Ketegal bukit nya nyadika pun penatai bekal ai ngagai 163 iti ruang bilik, pengawa numbuhka kuari ba bukit nya patut diketu.

"Aku deka nulis surat ngagai Kepala Menteri ke megai kuasa nyadi Menteri Pengatur Pengeraja Asal ngambika tau nagang pengawa numbuhka kuari di bukit nya.

"Surat ke sama mega deka dituju ngagai ijinsi perintah ke bekaul sereta nuju Chairman DAP Nengeri Chong Chieng Jen ke alai iya ulih mai pekara tu dikerandau di parlimen enggau DUN,"ku Leon ke mega Mandal Chariman DAP Sarawak.

Print Friendly