» »Unlabelled » RMK11 ngemeratka pemansang menua pesisir BorneoPost Online | Borneo , Malaysia, Sarawak Daily News » Berita Iban - New 2 Borneo

05:04:00

RMK11 ngemeratka pemansang menua pesisir BorneoPost Online | Borneo , Malaysia, Sarawak Daily News » Berita Iban - New 2 Borneo

RMK11 ngemeratka pemansang menua pesisir

Posted: 20 Apr 2014 09:03 AM PDT

Sarawak minta penggi mayuh agi ungkup belanja dikena nyikap pengurang: Kepala Menteri Sarawak

SRI AMAN: Sarawak minta perintah besai ngemeratka pemansang menua pesisir di nengeri tu dalam Atur Pe­mansang Malaysia Lumpar Ke-11.

Kepala Menteri Sarawak, Tan Sri Datuk Amar Adenan Satem madah, nya sebengkah ari chara kena ngedutka seraka ekonomi ba rakyat Bumi Ken­yalang ke diatu.

"Rayat Sarawak ke nguan menua pesisir mengkang mayuh pengurang ba pen­yikap perengkaguna baka jalai alun, karan enggau ai. beresi diatu.

Nya meh kebuah kami minta ungkup belanja ke mayuh agi ari perintah besai, ngambi pulaika pengelantang rayat di menua pesisir dudi ila," ku iya.

Iya bejaku munyi tu lebuh bejadika Pengerami Ket­uai Begulai enggau Rayat di Dewan Suarah, ditu ensana.

Urung 1,000 iku mensia ngulu pengerami ke berebak enggau keterubah Adenan mangku pengawa nyadi Kepa­la Menteri Sarawak ti Ke-5.

Ku iya, chara bukai kena ngedutka seraka ekonomi nyengkaum ngemeratka pe­mansang pengelandik kelebih agi dalam bidang indus­tri enggau teknologi ke ulih nyen­diaka pe­luang teulihka pengawa ti manah agi sereta gaji ke besai, ku iya.

"Chara nya mega setipak enggau pemansang ba SCORE ila, " pia ku iya.

Berebak enggau nya, Tan Sri Adenan sekali agi madahka diri deka nampung semua polisi pe­mansang ti udah dipejalaika Kepala Menteri ke sebedau tu, Pehin Sri Abdul Taib Mahmud.

Ku iya, polisi nya endang manah sereta pa­tut ditam­pung taja pan men­ua diiring ketuai ke baru.

Bela bisi ngulu pengerami nya Sapit Kepala Menteri ke mega Menteri Betanam Betupi Moden enggau Pe­mansang Menua Pesisir, Datuk Patinggi Tan Sri Dr Alfred Jabu anak Numpang, Menteri Muda Pemansang Menua Pesisir enggau Pen­gawa Berumah Sarawak Datuk Francis Harden anak Hollis enggau Menteri Muda Betanam Betupi Moden, Datuk Mong Dagang, Kaban Parlimen enggau Kunsil Nengeri Sri Aman.

Print Friendly

Tanah NCR Ulu Paku udah disukat, dituku pengempu

Posted: 20 Apr 2014 09:02 AM PDT

BETONG: Inisiatif Baru Tan­ah Adat Bansa Asal (NCR), tanah komunal ungkup bansa Iban ba kandang menua Ulu Paku, Spaoh udah disukat perimeter sereta dituku ari baruh tanah NCR Sarawak.

Kepala Opis Tanah enggau Survei Betong Anthony Aboi madah, tanah ba kandang menua nya udah dituku nyadi tanah Rizab Guna Sama Bansa Asal ari baruh Seksyen 6 Undang-Undang Tanah Menua.

"Salin gazet nya udah disua ke kami bala tuai rumah apin lama ke udah.

"Nya mandangka perintah ngaku tanah NCR ke dipinta nya, sereta nadai ngerampas tanah rayat nengah seksyen nya.

"Nya mega sebengkah ari chara Opis Tanah enggau Sur­vei (JTS) Betong nyendiaka diri, enggaika tanah NCR ba kandang menua Ulu Paku, Spaoh diperambu disukat nengah atur Inisiatif Baru NCR ti kedua ila.

"Pemesai kandang menua nya urung 4,142.6 hektar," ku iya lebuh ke meri penerang pandak sentang atur kedua Inisiatif Baru NCR, ditu.

Seraban 30 iku tuai rumah ari Hulu Paku, Spaoh ari baruh pegai niang Pengulu Christopher Ngadan ngulu pengawa meri penerang nya.

Ku Anthony, ukai mudah bejalaika pengawa nyukat ba kandang menua ke besai sereta bebukit, enti nadai sukung ari semua orang ti ngempu tanah nya.

"JTS minta bala ketuai ra­ban bansa ke ngulu pengawa meri penerang nya, nyadung penerang ke betul ngagai bala nembiak redak sida," pia ku iya.

Iya minta bala tuai rumah anang mudah tekuing runding ningaka petenah sekeda orang ti madahka JTS Sarawak semina bejalaika pengawa nyukat tanah nyerumba pen­gawa bepilih aja.

Berebak enggau nya, Tuai Rumah Mathew Lemada madahka iya minta pengawa nyukat nya dikejampat, la­ban nya meh ke dianti rayat ngelama tu.

"Nadai orang bukai ulih mutarka penanggul kami kelimpah ari perintah.

"Nya alai, sukung meh Ini­siatif Baru NCR tu," ku iya.

Print Friendly

Jeneral Dato’ Muhammad Daniel nerima gelar DIMP

Posted: 20 Apr 2014 09:02 AM PDT

SIBU: Bisi 400 iku raban 9 Briged ngulu pengerami en­dur ngayanka pengaga ati ke Panglima 9 Briged Brigadier Jeneral Dato' Muhammad Daniel @ Damien Abdullah ke udah nerima gelar Pingat Darjah Indera Mahkota Pa­hang (DIMP).

Pengerami nya udah diatur ba kem nya empai lama ke udah.

Muhammad Daniel udah nerima gelar DIMP (ke mai gelaran Dato') ba Istana Balairung Seri, Istana Abu Bakar, Pekan kena 5 April tu tadi.

Pengerami nya dipun eng­gau pengawa ngajat sereta disempulang palu kompang. Pengerami nya nyadi besai agi reti nengah penatai indai Muhammad Daniel, Ma­laya Munggu enggau sida sebilik.

Lebuh bejaku, Muhammad Daniel meri terima kasih ngagai raban 9 Briged sereta arapka semua sida ngem­eratka tanggungpengawa ti udah diberi ngagai sida.

Muhammad Daniel mega arapka raban 9 Briged se­mampai nemu pekara ke nyadi diatu.

Print Friendly
We encourage commenting on our stories to give readers a chance to express their opinions; please refrain from vulgar language, insidious, seditious or slanderous remarks. While the comments here reflect the views of the readers, they are not necessarily that of Borneo Post Online. Borneo Post Online reserves the right not to publish or to remove comments that are offensive or volatile. Please read the Commenting Rules.

Adenan, ketuai ti taluk ke rayat, ku Rayong

Posted: 20 Apr 2014 09:02 AM PDT

SRI AMAN: Kaban Kunsil Nengeri (ADUN) Engkilili Dr Johnnical Rayong anak Ngipa madah, penemuai Kepala Menteri Sarawak Tan Sri Datuk Amar Haji Adenan Bin Haji Satem keterubah pengudah dichiri mangku pengawa nyadi Kepala Menteri ti Ke-5 ke Sri Aman ngelaika iya seiku ketuai ti taluk ke rayat.

Nya mega mandangka Adenan seiku ketuai ti deka ngenyemakka diri enggau rayat sereta deka nemu penanggul ke ditapi rayat ba menua pesisir ngambi diputarka enggau jampat, ku iya.

"Rayat di Sri Aman lebih agi ba sitak DUN Engkilili berasai gaga endar nyambut penemuai Adenan, lalu nya mandang ngagai rayat ditu iya Kepala Menteri ti taluk ke rayat," ku iya.

Iya bejaku munyi tu lebuh dikerandau pember­ita ba Pengerami Ketuai Begulai enggau Rayat ti dipenyadika Adenan ba DewanSuarah Sri Aman, ditu ensana.

Kelimpah ari nya, Dr Rayong mega madah, rayat ba sitak DUN Engkilili meri sukung ke penuh ngagai Adenan ti dipaduka nyadi Kepala Menteri Sarawak ti Ke-5, apin lama ke udah.

"Rayat ba sitak aku ny­ukung sereta gaga endar ati meda Adenan dichiri nyadi Kepala Menteri Sarawak ke baru," ku iya.

Print Friendly
We encourage commenting on our stories to give readers a chance to express their opinions; please refrain from vulgar language, insidious, seditious or slanderous remarks. While the comments here reflect the views of the readers, they are not necessarily that of Borneo Post Online. Borneo Post Online reserves the right not to publish or to remove comments that are offensive or volatile. Please read the Commenting Rules.

Etnik minoriti bukai mega bulih penguntung ari kes tanah NCR

Posted: 20 Apr 2014 09:02 AM PDT

MIRI: Kes tanah Adat Bansa Asal (NCR) ukai semina mangka tauka nyadi ba ra­ban bansa Melayu, Dayak tauka Orang Ulu aja tang nyengkaum bansa bukai di nengeri tu.

Baru Bian ti nyadi luyar madah, raban minoriti Jatti Miriek enggau Kedayan mega bulih penguntung ari pengelebih NCR nya.

"Bisi dua kes kot ti ny­engkaum seiti kes bekaul enggau raban etnik Kedayan enggau seiti kes raban Jatti Miriek, lalu kededua nya kes NCR," ku iya maya baum enggau pengarang berita.

Nitihku iya, kededua kes nya ti keterubah bekaul kededua piak raban etnik ke nyengkaum Kampung Bakam enggau Kampung Selanyau.

Baru ti mega penyanding penemu undang-undang ba kededua kes nya madah, maya bechara keterubah ba kot tinggi sida iya alah.

Taja pia iya madah, sida ngapil baru lalu kededua plaintif menang kes nya.

Kelimpah ari nya, ked­edua kes NCR ngelaban defendan ti sama.

"Aku amat gaga ati enggau pemenang kes nya lalu aku deka terus bebendar meri servis dalam pekara ti sama jemah ila," ku iya.

Sama bisi ba aum penga­rang berita iya nya plaintif: Abu Bakar Pangis, Salim Ebrahim, Sapar Ismail, Karim Enur, Madani Wahat enggau Asin Bujang.

Print Friendly

Sitak Ngemah udah diungkupka RM1.5 miliun

Posted: 20 Apr 2014 09:02 AM PDT

KANOWIT: Perintah menua udah ngemendarka belanja RM1.5 miliun ungkup sitak Kunsil Nengeri (DUN) Ngemah ngambika bisi dikena bejalaika projek pemansang.Kaban Kunsil Nengeri (ADUN) Ngemah Alexander Vincent madah, ungkup be­lanja nya udah dikemendarka taun tu ngambika bisi dikena bejalaika penyikap perengka­guna di menua pesisir enggau projek perengkaguna mensia mayuh .

"Kami bisi belanja kena ngaga pemansang ditu.

"Diatu sekeda pemansang nya benung digaga ba sekeda endur ba kandang menua Ngemah.

"Projek pemansang nya dipejalaika enggau ati ke lurus, enda bechiping sereta enda ngira penemu politik enggau bansa.

"Perintah Barisan Nasional (BN) di menua tu nadai be­chiping ati enggau semua rayat," ku iya lebuh bejadika Jalai ba Genturung Pendiau Kapitan Lee Poh Sin di Pedai ditu kemari.

Bela bisi ngulu pengerami nya Pemancha Spencer Ku­dang, Pemancha Chia Chua Fa, Pengulu Bernabas Ang­kis, Pengulu Ijam Tuah, Pen­gulu Ugap Seribu sereta 35 iku tuai rumah sereta kapitan ba kandang menua Pedai, Jih, Tuah, Bawan, Mapai enggau Tada.

Tembu bejadika jalai nya, Alexander enggau raban sereta bala bukai lalu ngulu pengerami gaga ati ke Pen­gulu Lee Foh Nun enggau Kapitan Lee Poh Sin ke udah dichiri mangku pan­gku pengawa nya ba rumah Foh Nun enggau Poh Sin di Pedai.

Kapitan Poh Sin dipadu nyadi kapitan ngarika bansa China di Bawan.

Nengah awak nya, Alex­ander meransang rayat ba sitak iya begempung enggau perintah ngambika projek pemansang ti dipejalaika dudi ila meri penguntung ngagai rayat.

"Kami amat begunaka sukung ari kita ngagai perintah BN ngambika ulih ngemujurka pemansang ti udah diperambu ngelama tu.

"Kitai begunaka pemansang belama ngambika Ngemah enda tinggal pemansang," ku iya.

Ku iya nandu, kelimpah ari sukung ngagai perintah BN, rayat mega dipinta be­gempung enggau perintah ngemajuka kandang endur ti lama udah tinggal ari pe­mansang.

"Langgur penemu kita diguna kami. Mata enggau pending kita beguna amat ngambika ulih madah pen­anggul ke ditapi kita ngagai aku ke nyadi pengari rayat DUN Ngemah .

"Tanka pemanah kaul tu sereta besaup enggau aku nge­mansangka menua Ngemah," lalau iya.

Print Friendly