» »Unlabelled » Pemidang nuan tetap dikeingatka belelama BorneoPost Online | Borneo , Malaysia, Sarawak Daily News » Berita Iban - New 2 Borneo

05:04:00

Pemidang nuan tetap dikeingatka belelama BorneoPost Online | Borneo , Malaysia, Sarawak Daily News » Berita Iban - New 2 Borneo

Pemidang nuan tetap dikeingatka belelama

Posted: 18 Apr 2014 09:17 AM PDT

SARATOK: Sapit Kepala Menteri ke dulu suba Datuk Amar Dunstan Endawie Enchana ke nadai maya umur 78 di Sepital Saratok kena 11 April tu tadi dikubur ba Saratok Memorial Hill kemari.

Kenyau seminggu pengudah pemidang niang Endawie, kaban belayan enggau kaling ari jauh tauka semak datai meri basa ke penudi endar ba rumah iya di Letong Sawa, kelimpah ti meri sukung ngagai sida sebilik.

Entara sekeda ke datai maya niang disembiang ba Gerija St Peter sereta nganjung ngagai Saratok Memoral Hill, Bukit Perabun iya nya Sapit Kepala Menteri Tan Sri Alfred Jabu, Chairman Tenaga Nasional, Tan Sri Leo Moggie, Res iden Betong, Datuk Romie Sigan Daniel, Dato Dr. Henry Shiing enggau ADUN Krian Ali Biju. Jabu ngarika perintah nengeri diberi basa bejaku ba pengawa sembiang nya.

"Ngarika Perintah Nengeri enggau Kepala Menteri, Tan Sri Datuk Amar Adenan Satem, aku ngemanjaika jaku basa enggau penyiru ngagai ruang bilik niang Endawie," pia ku Jabu.

Ku Jabu, Endawie chukup regas ba pengawa rama maya iya ke agi biak ke alai dalam taun 1954 Kepala Pengajar sekula mission nyiri iya nyadi seiku ketuai, ti ngujungka niang dichiri nyadi pengajar.

Pengudah iya ngaulka diri ba pekara politik kenyau ari taun 1965, Endawie udah mayuh mai ubah ukai semina ba Saratok, Betong enggau Sri Aman, tang mega ba serata menua Sarawak kelebih agi di Malaysia, pia ku Jabu.

Iya udah meri servis nyadi sapit kepala menteri ari baruh kuasa Kepala Menteri ti keterubah, Datuk Stephen Kalong Ningkan sereta mega nyadi Ambassador ke menua New Zealand, tandu Jabu.

Tembu besembiang ba Gerija St. Peter, lungun niang  dibai meling pasar Saratok sebedau nuju Saratok Memorial Hill.

Print Friendly

Anak reta ke berega, tiang menua jemah ila

Posted: 18 Apr 2014 09:17 AM PDT

SRI AMAN: MP Sri Aman, Masir Kujat (gambar) madah, bala anak nya reta menua ke pemadu berega, ke alai pemansang menua tu bepanggai amat ba sida jemah ila.

"Kitai sama nemu juluk perintah Barisan Nasional (BN) deka nukar pikir rayat ngambika berani maju sereta chakah gawa ngemansangka diri, diri sebilik, rayat enggau menua.

"Nya alai kitai meda mayuh tadika, sekula, kolej, universiti dibuka endur nempa modal mensia ke bekualiti nguna ungkup belanja ti mayuh tiap taun kena ngemansangka pelajar di menua kitai tu," ku iya.

Iya bejaku munyi nya ba Program MEMBARA (Mantu Rayat) 'Kembali Ke Sekolah' sambil nyerahka Bantu Besekula ti diatur Opis Hal Ehal Khas (JASA) Sarawak Bagi Menua Sri Aman enggau Sekula Primari (SK) Batu Lintang Undop di Dewan Sri Kelingkang, sekula nya empai lama ke udah.

Dulu ari nya,pengerami nya udah dilancharka Menteri Muda Pemansang Menua Peisisir enggau Pengawa Berumah Sarawak ke mega ADUN Simanggang, Datuk Francis Harden Hollis.

"Aku ngelalau bala anak kita ngambika terus nyaga penyerakup enggau pengelikun pupu raban bansa di nengeri tu sereta anang mudah tepejuh runding ningaka petenah enggau propaganda ari sekeda piak nyentuk ke bisi asai benchika ketuai ke bisi diatu.

" Aku mega meransang sida nguna perengkaguna ke bisi nya memanah, guna ngereja aktiviti ke manah sereta anang mudah tepejuh runding enggau adat barat ke ulih ngerusak kita sereta berap meh jalai pengarap ngambi nyadika lalau pengidup belama," ku iya.

"Anak kita mega anang mudah tepejuh runding ningaka penyakal ti nadai meri sebarang penguntung ngagai kita semua," ku iya baru.

Bela bisi ngulu pengerami nya, Kepala Pengajar SK Batu Lintang, Leonard Libau, Pegawai JASA, Sri Aman, Whelthon Lumpoi, Pegawai Khas Masir, Edmund Pirang, Pengulu Micheal John sereta bala bukai.

Berebak enggau pengerami nya, Harden ngungkupka belanja sama bela RM 10,000 ngagai PIBG SK Batu Lintang enggau Kunsil Kepala Pengajar Zon Undop ditangkanka Masir meri RM 5,000 ngagai PIBG SK Batu Lintang Undop, Sri Aman.

Seramai 153 iku nembiak Prasekula, primari satu ngagai primari tiga ari SK Batu Lintang Undoo, Sri Aman, SK Nanga Klassen, SK Paku Undop enggau Sekula Jenis Kebangsaan (SJK) Chung Hua Undop nerima pemeri beg sekula ari JASA Sri Aman.

Print Friendly

Beribu iku besembiang Hari Paska di Gerija St Thomas

Posted: 18 Apr 2014 09:17 AM PDT

by Chris Bishop. Posted on April 19, 2014, Saturday

KUCHING: Ngingat sereta nitihka utai ke udah dikereja Jesus seiti ari chara ke pemadu manah ungkup raban kristin ngintu Hari Paska, pia ku St Thomas Cathedral Dean The Very Revr Micheal Buma.

Nitihka penerang ari Micheal raban kristin patut berundingka pemerinsa kristus ke udah mati dikayu regang ketegal ti nebus dosa mensia.

"Baka ni kitai ngintu Hari Paska, iya nya kitai nitihka utai ti udah dikereja kristus, kitai ngingatka pengawa iya ke penudi dalam pejalai nuju regang.

Taja pan diperinsa nyentuk ke seput ke penudi, kristus agi besembiang nebus dosa kitai mensia,"ku iya.

Iya ngasaika pemedis diperinsa laban kristus endang mensia, tandu iya lebuh dikerandau pengudah tembu sembiang jalai regang kemari.

Sembiang jalai regang kemari diatur meling Kathedral St Thomas berengkah pukul 12 tengahari lalu digulu beribu iku raban kristin ke diau ngelingi mengeri Kuching.

Sembiang nya ngetu ba 14 'Station of Cross' nundaka pejalai kristus ngesan kayu regang di Bukit Golgota.

Dulu agi ari nya, muak ke pagi di Gerija St Thomas, raban orang kristin ngulu sembiang komuni kudus berengkah pukul 8 pagi lalu disempulang enggau pengawa bebasaka regang.

Print Friendly

Karpal Singh penyura politik Malaysia, ku Dorris

Posted: 18 Apr 2014 09:17 AM PDT

MIRI: Ketuai Indu Parti Rakyat Sarawak (PRS), Senator Datuk Doris Brodie madah, Kaban Parlimen Bukit Gelugor, Karpal Singh seiku orang ti talukka politik.

Ku iya, niang Karpal kebendar bepuluh taun udah nyura politik di Malaysia kelebih agi nyadi orang kuat penyakal.

"Karpal dikelala nengah mayuh bengkah singkang dalam pengidup rayat Malaysia sekalika nya dalam politik tauka profesyen nyadi luyar," pia ku Doris.

Ku Doris, pemarai Karpal ba penusah bebadi di jalai alun udah nengenyitka semua rayat Malaysia, laban iya seiku orang ke tegap penemu lebuh ti mantaika mayuh bengkah pekara.

Ku iya baru, Karpal mega udah mandangka tikas  ke tinggi lebuh ti belabanka penemu lebuh ti mantaika sekeda pekara di Parlimen, ti kekadang ngeringatka pengari ari BN enggau penyakal.

Pengeliat ati Kaban Parlimen Bukit Gelugor tu udah meri mayuh macham peneleba ba iya betapi enggau mayuh macham pekara ba karier politik nyengkaum gawa ari baruh beberapa iku Menteri Besai.

"Karpal Singh endang seiku orang ti amat talukka politik sereta pengawa iya ke nyadi luyar. Taja pan kami enda sepenemu dalam politik, tang YB Karpal udah nyura politik di Malaysia ngelama bepuluh taun," pia ku Doris.

Ku Doris, pemidang iya deka ninggalka kenang ba Dewan Parlimen.

Pulai meh nuan enggau likun Karpal, ke mega digelar "Harimau Jelutong" lalu nengah awak tu aku deka ngenataika penyinu ati ngagai kita sebilik, pia ku iya.

Print Friendly

Kelas ngajat SADIA nerima sukung ke manah ari mensia mayuh

Posted: 18 Apr 2014 09:17 AM PDT

KUCHING: Bisi 73 iku udah ngerejista diri masuk kelas belajar ngajat ke diatur Indu Opis SADIA (Serakup Dayak Iban) ti deka berengkah bulan Mei tu.

Mabong Unggang ti pengepun enggau pengatur kelas belajar ngajat nya madahka, sida nerima sukung ti amat manah ari mensia mayuh.

"Kemari (ensanus) hari ke penudi endar kami nerima orang ke deka masuk kelas belajar ngajat, lalu naka maya baum malam nya (ensanus) bisi 73 iku udah ngerejista deka masuk kelas tu.

"Enda disadang orang ngemayuh tu masuk kelas belajar ngajat, taja pan bisi bayar. Bisi 73 iku udah ngerejista diri masuk kelas ngajat tu.

"Bayar masuk kelas belajar ngajat tu RM50 ungkup orang ke beumur 18 taun ke atas, lalu RM40 ungkup orang ti beumur 18 taun ke baruh.

"Bekaul enggau bayar nya, aku deka agi nyebut iya upah pengasih ari ke dikumbai bayar," ku iya seraya madah ngagai Utusan Borneo ke alai nya sebengkah ari pekara dikerandauka sida malam ensanus.

Lebuh ditanya sekalika SADIA agi deka nerima, enti sema agi bisi orang deka masuk kelas belajar ngajat nya, iya madahka sida deka seruran ngambi orang ke bisi pengerindu belajar ngajat.

Juluk sida kami ku Mabong, deka ngemansangka kelas belajar ngajat nyentukka ke deka jemah ila.

"Kami semampai nerima orang ti bisi ati deka belajar ngajat, laban program tu ukai naka tu aja tang deka diteruska belama.

"Sida ke udah ngerejista diri deka dibagi ngagai dua raban tauka sesi. Enda ulih mayuh ba seiti sesi," ku iya.

Kelas belajar ngajat tu dibuka ngagai mensia mayuh, ke lebih agi ke diau di pelilih menua Kuching enggau Kota Samarahan.

Tuju kelas belajar ngajat tu dibuka ngambi nyadika palan bekunsika pengelandik sereta penemu ngajat ngagai bala mayuh, kelebih agi ngagai sida ke selalu mindah kin kitu sereta nemuai ngagai rumah panjai maya bisi pengerami tauka pengawa

Nambahka nya, tuju kelas belajar ngajat diatur ngambika raban nembiak kelebih agi kitai Iban, ngambika ulih nampung sereta ngembuan pengelandik ngajat.

Peluang nya mega manah ke sida ti suah bejalaika pengawa perintah ke rembus ngagai menua kitai Iban, ti madahka diri malu amat maya dibatak ngajat laban ti enda nemu ngajat, ku iya.

Nitihku Mabong, kelas belajar ngajat deka diatur Hari Satu enggau Hari Empat pukul 7.30 lemai nyentuk ke pukul 9.30 malam ba Indu Opis SADIA di Kota Sentosa (berimbai enggau UNACO Kota Sentosa).

Sebarang orang ti bisi pekara deka ditanya bekaul enggau kelas ngajat ke diatur SADIA, tau betanya ngagai Mabong Unggang ba lumur 012-6925562 tauka email ngena HYPERLINK "mailto:mabong98@hotmail.com "mailto:mabong98@hotmail.com tauka telefon ngagai Henry Guya (0138494370) tauka email ngena HYPERLINK "mailto:hen3g@ymail.com " mailto:hen3g@ymail.com

Print Friendly

Niang Karpal Singh berani mansutka penemu diri: Masing

Posted: 18 Apr 2014 09:17 AM PDT

KAPIT: Menteri Pemansang Tanah Sarawak, Tan Sri Datuk Amar Dr James Jemut Masing madahka niang Kaban Parlimen Karpal Singh seiku orang ti berani mansutka penemu diri.

Ku Masing, iya tekenyit endar ati kena pagi Hari Empat  (17 April) lebuh ti ninga berita Karpal Singh parai ba penusah bebadi di jalai alun.

"Sebengkah pekara kami nemu pasal Karpal Singh, iya berani bejakuka sesebengkah pekara. Aku udah beberapa kali belabanka penemu sentang beberapa pekara enggau iya.

Taja pia, pemidang niang Karpal Singh, nyadika pengerugi ngagai menua Malaysia laban iya seiku orang ke berani mansutka penemu diri. Dalam politik, sesiku nya anang nangi sereta patut berani bejakuka sesebengkah pekara. Enti kitai ngereja pengawa orang politik, kitai enda tau bechiping  ati  enggau  komuniti", pia ku iya lebuh ke dikerandau RTM kena lemai Hari Empat tu tadi di Meligai Hotel ditu.

Masing berasai sinu endar ati lalu ngenataika penyinu nya ngagai sida niang Karpal sebilik.

Karpal Singh ke mega digelar 'Harimau Jelutong'udah nyadi Kaban Parlimen kenyau ari taun 1970.Iya mega kala mangku pengawa nyadi presiden DAP.

Sama bela bisi dia maya nya, Sapit Menteri Pemansang Menua Pesisir enggau Kandang Menua, Datuk Alexander Nanta Linggi , Kaban Parlimen Ulu Rajang, Wilson Ugak Kumbong Sekretari Politik Kepala Menteri Sarawak; Wilson Nyabong enggau Jefferson Jamit.

Print Friendly