Posted: 29 Apr 2014 09:16 AM PDT

Sebengkah repot ti baru bisi dikeluarka OXFAM ti madahka kompeni WTK ari Sarawak bisi ngeruga kuasa pengelantang bmensia enggau berusakka kampung di Papua New Guinea

Sebengkah repot ti baru ari NGO entarabansa, OXFAM, udah ngamatka pengawa kroni penebang kayu batang ari menua Sarawak, WTK, nyadika sebuah kompeni pengerampas tanah enggau betebangka kampung bungas di menua Papua New Guinea lalu nerumpak tanah enggau pengidup orang bansa asal di endur nya.

Repot nya enggau nyemetak udah ngutuk beberapa buah bank di menua Australia laban bekaul pengawa nyali duit ngagai WTK dikena sida nyukung pengawa ngrusak rampa menua. Pengawa tu ukai semina ngelanggar pemerti ati ti dipejalaika semua bank ti suah dipegendangka sida ngelama tu, tang sida mega ngelanggar undang-undang menua.

Semua bank endang ditanggam tanggungpengawa lalu nentuka sida enda melanja tauka nyukung pengawa makai suap tauka bisi kaul dalam pengawa ngubah duit kamah.

Tang mayuh bank dunya nya majak nyeliahka diri ari tanggungpengawa lalu nutup mata sepiak ngagai pengawa ngeruga pengelantang orang bansa asal enggau pesaka rampa menua dunya baka Papua New Guinea ti dikereja kompeni-kompeni apek bayat baka sida WTK.

WTK udah balat bendar dikutuk laban ngeruga rampa menua enggau raban orang bansa Turubu dipelilih Sepik Timur di menua Papua New Guinea

WTK nya nyadika sebuah ari kompeni kroni kayu batang ti bisi kaul tegap enggau Abdul Taib Mahmud, ti endur sida bulih penguntung kamah ari pengawa ngerusak rampa menua di Sarawak lalu diatu sida ngerembaika pengawa sida begigaka laluh kampung bungas di menua bukai di sebelah dunya tu.

Pelilih endur ti dikeruga nya bisi diuan raban orang bansa asal ti enda ulih ngelindung diri empu sereta mudah bendar napi keruga kompeni kayu batang enggau kompeni kebun dandang besai berengkah ari Indonesia ngagai Congo lalu nyentuk ngagai Amazon.

Sida nyadi kaya nengah pengawa ngeruga rampa menua di Sarawak lalu sida ngereja pengawa nya ngena belanja ti besai dikena sida nyuap opis penerit adat dikena sida ngulihka lisin kampung, ti mayuh agi nya pelesu.

Sebuah kompeni ti dikemataka petunggal Taib Mahmud, iya nya kepala Ta Ann, Abdul Hamed Sepawi, udah mujur bulih semak sesuku ari laluh kampung pemadu besai di menua Liberia, sebedau penyalah nya diserungkai lalu ngujungka kompeni sida nya diburu Presiden menua Liberia pulai. Hamed Sepawi mega bisi kaul enggau beberapa iti pengawa dagang ti enda meruan di Tasmania, ti endur kompeni iya nya dikumbai chakah ngerusak kampung bungas.

Bala orang ti ngetanka rampa menua ngayanka bantah sida ba pengawa ngerusak rampa kampung bungas di Tasmania

Beserimbai enggau nya, kompeni Samling udah bejalaika pengawa salah sida di menua Guyana ti endur siku pengarah sida bebansa Amerika, Denis Melka, bisi ditemu meri duit bantu dikena nyukung pengawa ngeruga kampung di menua Peru. Kompeni Rimbunan Hijau mega benung chakah bendar bekerugaka kampung di Papua New Guinea lalu kompeni-kompeni Malaysia diatu benung nganti peluang endur sida tau belabuh nebang kampung sereta muka kebun dandang besai di Kalimantan, Indonesia.

Tu nyadika sebagi ari chunto pengawa bekerugaka kampung lalu ba maya ti deka datai Sarawak Report deka mansutka siti rintai nama dikena mantaika pengawa salah betebangka kampung ti dikereja kompeni-kompeni ari Sarawak ti endur sida nyau deka tembu betebangka kayu batang di menua sida empu di Sarawak, lalu belabuh ngatur diri pansut bekerugaka kampung di menua bukai.

Besrimbai enggau nya, enda salah-salah baka siku emplawa ti duduk ba tengah-tengah pukat pengerusak kampung serata dunya nya Apai Pengeruga Rampa Kampung empu, Abdul Taib Mahmud. Kepala menteri ti dulu suba nya seruran nentuka syer besai iya enggau enggi sida sebilik meruan bisi, awakka lebuh bala kroni sida bejalaika pengawa sida di menua bukai, sida sebilik mengkang agi bulih bagi ari pengawa nya.

Kepala Menteri ti dulu suba, Abdul Taib Mahmud deka nentuka iya enggau sida sebilik seruran bulih bagi syer ari pengawa bala kroni sida ti bekerugaka rampa kampung di menua Sarawak

Aram kitai sama beratika bala orang ti megai syer dalam kompeni WTK, chunto iya lalu peratika baka ni dua iku anak indu Taib, Jamilah enggau Hanifah (bulih pengeraja nengah kompeni Majaharta sida) bulih syer ti mayuh bendar dalam WTK. Arap kitai ke jaku Jamilah ti madahka diri beranakka puku dagang iya ngena 'dagang pasif', tauka kitai tentu deka ingatka penatai pengeraja iya nya bisi kaul enggau penyalah makai suap ti diatur Apai iya empu?

Repot ari NGO entarabansa OXFAM "Banking On Shaky Ground" tau dibacha enggau lenak agi ditu

NYENGALA! RTM Malaysia Dikaitka Enggau Pengawa Nyekat Program Radio RFS

Posted: 29 Apr 2014 03:56 AM PDT

Datuk Norhayati Mohd Ismail – nyekat program RFS laban takut alah besemekih?

Raban pengeluar program radio di menua Britain ti mantu ngeluarka program radio gelumbang angin pandak ngagai Radio Free Sarawak (RFS) udah balat bendar ngutuk ulah bala lanun radio, ti ngelanggar undang-undang pengeluar program radio entarabansa laban nyekat tiap iti program ninting lemai RFS.

Endang amat ngenyitka ati, penerang ti digempuruka raban pengemata ba pengawa ti dikereja stesyen radio nya empu udah tetemuka program radio ari Malaysia RTM (Radio Televisyen Malaysia) nyadika orang ti betanggungpengawa ngereja keruga nya.

Ba ujung minggu tu, kompeni penabur program radio WRN ti bepalan di London bisi ditemu nuliska surat komplen ofisyel ngagai Pengarah RTM ti asal ari Sarawak, Norhayati Mohd Ismail, pasal pekara nya.

Sida mega udah madahka pekara nya ngagai Gerempung Bansa (UN), Gerempung Telekomunikasyen Entarabansa (ITU) ti nyadika penguasa ke semua gerempung penabur program di dunya lalu mega ngagai Gerempung Penabur Program Asia, ti bepalan di Kuala Lumpur.

Komplen ti nangkanka nya deka ditujuka ngagai Gerempung Penabur Program Komanwel ti bepalan di UK, laban keruga nya dikereja ba stesyen penabur ti bisi diberi kuasa (bepelasarka undang-undang) tau bejalaika pengawa ari menua bukai lalu nyekat nya salah ba undang-undang baka ti ditetapka ba tikas entarabansa ti endur menua Malaysia mega nyadika kaban gerempung nya.

Pengawa kamah RTM nya dilancharkan beberapa hari sebedau Hari Kebebasan Media Sedunya PBB, ti deka dirami kena 3 haribulan tu ila lalu mega nyerumba penemuai Presiden Amerika Obama, ti endur menua iya endang ngemeranka atur bebasaka kuasa bebas bejaku mensia, kuasa bebas ngulihka penerang enggau mega kuasa media ti enda betapis.

Pemacha berita RFS Peter John Jaban benung berandauka siku bakih ti sama bekereja enggau iya bekaul enggau program ti deka ditaburka sida

Pengawa nyekat ti disengajaka atas program RFS (iya ti mega menyadi blog tu) nya belabuh dikereja kenyau ari dua minggu ti udah, enda lama udah bekau stesyen nya ngelancharka baru gaya enggau chura program sida, ti udah mujur narit ati mayuh peninga ti mega majak betambah ba pemayuh peninga.

RFS udah mertika keruga nya kenyau ari iya ditumbuhka lalu ngambikira timpuh jam enggau chura keruga, ti suah agi dikereja sereta program RFS ditaburka nyentukka program tembu.

Lebuh RFS ngubah gelumbang angin sida dikena nyeliahka keruga ti bukai sida meratika bala penyerang nya enggau jampat ngena gelumbang angin ti sebaka enggau ti dikena sida, sebengkah pengawa ti sengaja dikena nagang kuasa bebas media ari ti dipejalaika.

Keruga ti ngena munyi ti enda menuku, ditambahka enggau munyi bukai. Tang RFS tetemuka perengka ti dikena ngachau program sida nya diuji ba program sida empu, iya nya program Wai FM jaku Iban, dikena ngujika keruga nya.

Siku ari bala orang ti landik ba chara ngelancharka serang ti baka nya bisi madahka Sarawak Report nya endang penyaru ti suah nyadi. "Beberapa hari ke terubah serang dilancharka enda tetap lalu munyi ti enda menuku nya enda tentu inggar" ku iya.

Diatu, ngena sistem penabur program RTM ti udah 'dikemetulka' nya, sida ngena mayuh macham munyi keruga dikena sida nyekat RFS. Tang kami udah mujur ngerekod baka ni, dalam kandang beberapa hari ke terubah serang diatur, gelumbang angin ti dikena Wai FM RTM nya ditemu kami sebaka enggau gelumbang angin ti endang ditagaka ngagai stesyen RFS kami nya.

Program Wai FM RTM ditaburka ngena gelumbang angin 15420 kHz ti endang udah diagihka ngagai Radio Free Sarawak

Chura serang nya terang bendar nunjukka RTM bisi perengka penabur ti endang ditagaka dikena ngatur serang lalu perengka nya disadang dipasang ba opis penabur RTM Kajang.

Pengeluar RFS senari tu madahka chara serang atas stesyen nya sebengkah chara ti beli dikena besemekih
"Ditu kami deka enchabar RTM, enti kita ngasaika kami bulih mayuh agi raban peninga enti dibandingka enggau pemayuh peninga ti ulih batak kita, giga mih chara ti manah agi awakka bala peninga rinduka program kita. Bala peninga tentu enggai ningaka program RTM laban RTM nya semina perengka penabur propaganda dikena ngemanahka nama rejim perintah BN".

Siti pekara ti enda disadang nya Kepala RTM nya empu datai ari menua Sarawak lalu ditemu kala belajarka pekara pengeluar program di menua Australia.

Orang bansa asal auska penerang alternatif bekaul enggau penanggul tanah kena rampas ba menua-menua sida.

Norhayati patut nemu baka ni sebuah media ti bebas dipejalaika lalu iya mega patut nemu pengawa nyekat enggau ngachau arus gelumbang angin stesyen radio bukai ti mit baka RFS nya, ti semina bepeluang naburka program sida dalam pengelama sejam setengah ninting hari bekaul enggau berita-berita pasal pekara ti nyadi kemaya hari tu, perintah BN udah nemu diri balat kena chabar tauka keruga.

Sekali agi kami deka nanya enti perintah BN ngumbai diri sebuah perintah ti betul sereta nadai penimpang bekaul enggau pekara ti dikenang dalam program RFS, nama kebuah BN enda nimbal jaku kenang bala peninga RFS kelimpah ari ti nyekat program stesyen ti mit baka RFS lalu nagang pengeluar program radio nya tama ngagai menua sida?

Deka tauka enggai perintah ngaku diri bisi pengelemi enggau chara nyekat sada nyawa bala penyakal sida ari didinga orang mayuh?

Terang bendar perintah BN ngasaika diri enda ulih napi jaku kenang enggau jaku kutuk orang mayuh. Tang enggau chara ngereja pengasar dikena nyeliahka raban penyakal lalu nyekat penerang ari menua bukai tama, perintah udah ngerusak laluh pengarap ba demokrasi ti agi bisi tinggal.

Tibak cherita tu nyadika rintai pengawa nyekat program RFS lalu nya udah nyadika kelai perintah menua lalu mega perintah besai udah berasai takutka program nya deka naburka sada nyawa enggau kenang bala orang di menua pesisir Sarawak, ti endur penaluk bala pengundi endang besai bendar guna dikena perintah BN terus bekuasa.

Tuai rumah tu madahka BN mai undi ngagai rumah panjai lalu udah nya chek BN nya kena tendang bank! Sida bepeluang agi bejaku nengah RFS

Keruga enggau serang ti dulu ari tu suah agi ditumpuka ba maya bepilihbesai. Bisi kala diatur keruga ti udu ba PRU13 lalu Sarawak Report bisi nerima penerang ti endur bepilihbesai Sarawak taun 2011 suba, perintah Malaysia bisi ngupah gerempung broker pengeluar program ari menua Belgium dikena ngatur serang lalu ngenyauhka menua Malaysia ari tindak nya.

Diatu, terang bendar perintah bisi nudukka sebengkah perengka ti dikena nyekat pengerembai program bukai di Malaysia.

Perintah disadang bejalaika atur masang sebengkah perengka transmitter tu besai bendar ungkus ba semua perengka pengeluar program sida ke menua Sarawak ti beduduk di Kajang di Semenanjung Malaysia.

Baka ni pemalat keruga ti diatur stesyen RFS ti mit nya ngagai kuasa BN? Enggau chara ngatur serang ba RFS perintah BN ngasaika sida enda arapka diri empu sereta takut ke pengamat ti enda betapis.

Radio Free Sarawak deka seruran ngiga chara ngambika program sida ulih terus diterima lalu didinga, laban orang di menua pesisir di Sarawak endang bisi kuasa ngulihka penerang enggau penemu orang bukai kelimpah ari ti mendingka jaku ari parti perintah ti udu kena balut makai suap, lalu sida mega bisi kuasa ke sada nyawa sida didinga orang bukai enggau enda takut kena emba sapa-sapa.

Kami minta ngagai Presiden Obama awakka nangkan Menteri Besai Najib Razak pasal kuasa-kuasa beserimbai enggau penemuai iya ke menua Malaysia ba ujung minggu tu.

BN nuduh RFS ngerachun runding rayat – RFS madahka sida ngelepaska runding rayat ti lama udah kena kungkung perintah

Timpuh Maya Ti Mar Ba Raziah & Robert?

Posted: 29 Apr 2014 03:47 AM PDT

Perambu ngerumpang rumah ti udah bisi lalu diganti enggau sebuah tu

Siku pemacha ti taluk ngagai laman blog Sarawak Report udah ngenyitka ati kami enggau berita pengawa dagang ti dipejalaika menyadi indu Gabenor Sarawak, Raziah Mahmud, bekaul enggau sekeda reta iya ti beungkus bejuta-juta dollar ba pelilih menua Vaucluse di Sydney, Australia.

Rumah besai nya ba Lumur 38 Collong Road ti mungkus kandang endur ba pemesai 1,000 kaki besegi.

Dikena ngeregaska agi pengawa nyual rumah nya Robert Geneid enggau bini iya Raziah udah bulih pemendar merambu ngerumpang rumah nya lalu ngayanka pelan ke rumah ti besai agi, enggau chara ngayanka pelan rumah ti ditengkebang kompeni arkitek tebilang di menua nya, Ercole Palazzetti.

Pelan nya nyengkaum semua tukuh enggau gaya rumah besai berega mar: "perabung telenga ti besai"; "ruang temuai ti besai"; "kebun bungai ti besai"; "ruang endur ngelantangka ati ti manah"; "sebuah lif enggau endur ruang begembar endur ngengkahka kerita" lalu disadang bisi sebuah pegung endur nyemerai ti besai, munyi ti diterangka kontraktor tin gaga rumah nya.

Munyi ti ditusui media, rega rumah nya manggai AUS$6.5 juta, baka ti dipadahka dalam timpuh beberapa hari bulan nyin kemari. Rega ti nyampau nya mar dua kali lipat ke rega rumah bukai ba pelilih menua Vaucluse di Teluk Sydney nya.

Pegung endur nyemerai ti patut bisi, semina beberapa singkang ari tebing tasik Teluk Sydney

Beserimbai enggau nya, repot dalam suratberita di Australia bisi madahka penerang pasal Geneid melaki-bini nya, ti udah bulih pengeraja bejuta-juta ringgit asil ari pengawa ngeruga sereta ngerampas tanah enggau skandal kontrak bekroni di Sarawak kenyau ari beberapa taun ngena penuduk benepostistik Robert Geneid dalam kompeni Cahya Mata Sarawak (CMS) Housing.

Iya ti bendar nya suratberita The Canberra Times madahka rumah besai enggi Geneid nya "sebuah rumah Vacluse enggi raban pemerintah ari menua Malaysia". Raziah Mahmud mega dikenang dalam suratberita nya nyadika "tuai dalam industri pengaga rumah" lalu laki iya Robert Geneid nyadika "Pengarah dalam Royal Mulu Resort".

Baka ni suratberita The Canberra Times mantu bala pemacha ngelala sesebengkah pekara enggau lenak agi

Rayat Sarawak deka nangkan orang di Australia, Raziah nya semina menyadi orang politik di Sarawak – lalu iya ti pemadu korup ba penuduk nya. Enggau chara ti nyadi Gabenor, Taib Mahmud enda agi megai pengawa ofisyel ti beeksekutif lalu iya mega ukai datai ari raban orang diri sebilik ti megai perintah.

Robert enggau Raziah – orang diri bini ti ditemu rindu bengepan sereta ngulu pengerami ti besai-besai

Lalu bekaul enggau pengawa dagang Raziah dalam industri pengaga rumah, orang indu nya nadai ngembuan sebarang kerita mangkuk, kereban dikena betukang tauka tupi pengelikun. Iya semina ngulihka untuk ari sub-kontrak pengawa ngaga rumah ti diterima iya ari menyadi iya, ngagai kontraktor ti bukai ti endang landik agi.

"Royal" Mulu Resort nya sebengkah perengka dalam dagang hotel ti digaga ngena duit menua Sarawak atas tanah ti dirampas ari raban bansa Berawan, ti diatu lalu bedau dibayar pampas kelimpah ari di kala dibayar pampas RM80 ke sepintu ruang bilik dulu menya.

Geneid diri melaki bini nya bisi didinga udah nyual pengawa dagang kunsi sida ti mai pengerugi ngagai kompeni Marriott Hotel Group, ti puntan ngatur pengawa bedagangka projek ti korup nyadika produk "eko-temuai".

Bisi siti jaku tanya ditu nya, nama kebuah Geneid diri melaki bini nya sanggup nyual tugung reta seduai pia aja?
Dalam sekeda artikel ti ayan ba suratberita di menua Australia madahka seduai melaki bini nya benung ngentapka diri di Sarawak. Tang bala orang di Sarawak belabaka seduai nya udah pindah ari Kuching, udah bekau ti enda besenutuk penemu ke pengerami nikah Taib enggau siku ari sida Geneid sebilik dalam taun 2011 suba.

Tikah entara tuai menua beumur 76 taun nya enggai bini baru iya ti beumur 30 taun nya udah ngenataika ati ti enda lantang dalam ruang bilik sida.

Nitihka penerang ari orang ti meri penerang ngagai Sarawak Report "injin duit ATM nya enda beguna agi dikena melanja Raziah enggau Robert" lalu sida enda ulih agi bepintaka tauka nerima sebarang kontrak ti besai-besai baka ti dulu suba.

Munyi ti suah dikenang orang mayuh ti madahka Taib enda agi arapka menyadi bunsu iya nya ti rangka, ti dituduh udah ngujungka iya balat ngereja penyalah makai suap sekumbang iya mangku pengawa kepala menteri beberapa taun tu udah. Raziah udah nitihka chara menyadi iya, Onn Mahmud, ti endang dikerinduka Taib Mahmud tang diatu udah beserekang penemu enggau iya lalu dipechat iya, sama ngentapka diri di Vaucluse, Sydney.

Enda dikerinduka agi?

Sarawak Report mega udah mujur mungkar sebengkah penerang ti mai empas ti balat ba bala orang ti taluk ngagai 'sultan' Taib, ti enda direpotka. Sebuah ari bank pemadu besai di dunya udah ngasuh sida Taib sebilik nya badu agi bejalaika pengawa dagang enggau bank nya.
Pekara nya nyadi ba pun taun tu udah bekau bank HSBC mansutka jaku gerah sida ti madahka diri matak semua pengawa dagang sida di menua Sarawak – sebengkah chunto matak pulai pengawa dagang ti jarang bendar dikereja sebarang bank tebilang di dunya tu.

Taja pan enggau puku duit bejuta-juta ringgit ti ditugungka dalam projek SCORE ari duit injau ari asuh Taib, bank HSBC nya bisi meri ketegal ti enda nyengala nama kebuah operasyen sida diketuka, lalu sida semina madahka pengawa dagang sida kurang diterima orang mayuh di Sarawak!

Bala orang ti bekereja ba bank nya tekenyit bendar ke atur bank nya ngetuka pengawa sida lalu udah nya sida ngayanka pengeringat diri, tang berita tu enda ditusui enggau silik nama kebuah ti bendar bank nya matak diri ari bedagang di Sarawak.

Iya ti bendar bank HSBC balat bendar napi pengawa orang ti nyerungkai resia sida ti bisi bekaul dalam dagang enggau tuai menua ti balat ngereja penyalah makai suap lali iya ti patut diukum setipak enggau penyalah iya nya ke dudi hari ila.

Sebengkah repot ari NGO Global Witness ba bank HSBC taun nyin kemari udah mantaika baka ni bank nya bisi melanja pengawa bala kroni Taib, ti balat ngerusak rampa menua sereta ngelanggar atur kuasa pengelantang orang bansa asal – lebih agi nyali duit ngagai kompeni kayu batang ti tumam baka sida Shin Yang.

Sarawak Report mega bisi mantaika kaul HSBC enggau pengawa ngubah duit kamah bejuta-juta ringgit ti mega dikereja Kepala Menteri Sabah Musa Aman.

Diatu terang bendar bank nya ngiga ruang dikena ngurangka pengerusak lalu meresi pengawa dagang sida di pelilih menua di Asia ditu.

Siti ari rumah ti agi endur sida diau, rumah besai raban Geneid sebilik di Miri

Dalam konteks tu Sarawak report bisi nerima penerang ari dalam bank HSBC nya empu ti madahka semua raban sida Taib sebilik nya disadang enda agi diasuh megai sebarang akaun dalam bank nya.

Ke bendar iya, semua bank patut ngerepotka sebarang akaun bala penyimpan duit ti ngalitka ati lebih agi bala orang politik ti benung dipansik baka sida Taib sebilik, ukai semina ngasuh sida mai duit simpan sida nya ngagai endur bukai.

Laban, sekumbang ti ngantung pegai akaun nya, bank semina ngasaika pengerugi ti mimit, nadai tentu meri empas ti balat ba dagang sida, enti dibandingka enggau empas ti diasaika bala orang ti diketuka ari pengawa sida.

Sarawak Report (enggau mega bala pemacha kami) deka meratika tiap pengawa raban Taib Mahmud sekumbang sida nguji ngelelaka reta sida ba mua perati entarabansa.

Bala orang ti gawa ba bank ti dibuai ari pengawa ngayanka pengeringat sida ba luar opis bank ti udah puang

Kompeni WTK Ari Sarawak Balat Dikutuk Ketegal Berampaska Tanah Orang Asal Di Menua Papua New Guinea

Kompeni WTK Ari Sarawak Balat Dikutuk Ketegal Berampaska Tanah Orang Asal Di Menua Papua New Guinea

Recent Comments

Archive