» »Unlabelled » Seraka Industri otomotif Sarawak enggau Semenanjung Malaysia numbas BorneoPost Online | Borneo , Malaysia, Sarawak Daily News » Berita Iban - New 2 Borneo

05:14:00

Seraka Industri otomotif Sarawak enggau Semenanjung Malaysia numbas BorneoPost Online | Borneo , Malaysia, Sarawak Daily News » Berita Iban - New 2 Borneo

Seraka Industri otomotif Sarawak enggau Semenanjung Malaysia numbas

Posted: 13 Apr 2014 02:55 PM PDT

by Chris Bishop. Posted on April 14, 2014, Monday

Di Semenanjung enda kurang jalai, peminta ba kereban pengangkut nambah

KUCHING: Gerempung Pengimpot enggau Orang Dagang Perengka Pengangkut Melayu Malaysia (PEKEMA) Sarawak ulih nyaup perintah nengeri nagih belanja ke besai agi ari perintah besai dikena nyendiakka atur penyambung ngagai tiap kandang endur di Sarawak.

Menteri Kanan Tan Sri Dr James Masing madah nyadi siti gerempung ti megai tanggung pengawa ngerembai industri otomotif, atur penyambung ti menyana deka nentuka industri nya teulihka penguntung.

"Bantu aku, sereta pia mega bantu perintah nengeri nengah chara minta mayuh agi belanja ari perintah besai dikena kitai ngaga jalai ngagai tiap kandang endur di Sarawak.

"Mayuh agi jalai dibuka, mayuh mega entukar. Reti nya PEKEMA ulih nyual mayuh agi entukar lalu teulihka mayuh agi penguntung ari ke udah,"ku iya.

Masing mansutka jaku tu ba pengerami Makai Lemai Ninting Taun PEKEMA Sarawak ke diatur nyerumba Aum Besai Ninting Taun ke 26 di siti hotel tebilang ditu, malam ensanus.

Masing ke mega Menteri Pemansang Tanah nambah, industri otomotif di Sarawak mengkang tinggal enti dibandingka enggau kaling sida di Semenanjung Malaysia.

Ku iya, di Semenanjung Malaysia semua kandang endur diau udah datai jalai lalu tu ngujungka pinta ba perengka pengangkut baka ke entukar sigi seruran bisi sereta majak nambah.

"Di Sarawak, ba kandang endur ke enda datai jalai baikka nya dikampung tauka rumah panjai kelebih agi di menua Ulu, sida enda kiruh deka bebelika entukar taja pan sida bisi duit.

"Pekara tu ngerugi industri otomotif di Sarawak ke diintu PEKEMA. Gerempung ulih ngadu kerejasama enggau perintah nengeri minta agih belanja ke besai agi ari perintah besai ungkup pengawa ngaga jalai,"ku iya.

Nitihka penerang ari pemesai Opis Kereja Raya (JKR), naka ke diatu pemanjai jalai di serata Sarawak diatu semina 30,000 KM aja, tandu iya.

Print Friendly

Badu ngereja utai tu, polis ngemba ‘luri antu’

Posted: 13 Apr 2014 02:53 PM PDT

KUCHING: Polis agi nganti pemutus peresa buntastasat Sepital Besai Sarawak (HUS) kebuah anak mit ke berumur 6 taun, di Simunjan parai ke dipelaba kena penyati.

Kepala Polis Menua Datuk Mohd Sabtu Osman madahka, saspek, iya nya apai tuai anak mit nya ke berumur, 46 taun lalu gawa di sebuah sekula di Simunjan, teparuk dalam kes tu diatu udah kena riman 7 hari belabuh ari hari iya ditangkap, ngambika ulih ditasat enggau silik agi.

Anak mit nya dipelaba kena penyati berindik ari ditemu bisi bakal ba pemalu enggau jari iya, disah parai maya datai di Sepital Simunjan, kena Hari Empat tu tadi.

"Tu ukai pengawa mensia ke meruan runding. Anti dulu pemutus buntastasat sepital baru kitai nemu enti saspek maya nyamah nya laban bisi udah makai dadah tauka enda gerai untak.

"Pemutus pansik buntastasat bedau diterima ke dijangka digaga sehari tu (kemari)…Kami agi nganti. Tang, dijamin undang-undang deka meri ukum nitihka pematut ngagai orang ke ngereja pengawa salah nya," ku Mohd Sabtu madah maya dikerandau sepengudah bejadika Hari Terbuka Raban Gerakan Udara (PGU) Polis Diraja Malaysia di Padang Merdeka ditu, kemari.

Ari tasat sebedau nya, nembiak mit nya ke diau enggau aya enggau ibu iya, di Kampung Sageng lalu besekula di kelas pra sekula di Sekolah Kebangsaan (SK) Sageng ditemu balat bakal ba pemalu kelimpah ari bisi ditemu bekau kena gigit di jari iya.

Anak mit nya enda diau enggau indai iya empu laban ke gawa sereta diau di Serian, enda jauh ari tu.

Kes tu diatu benung ditasat di baruh Seksyen 302 Kanun Keseksaan.

Ba atur pengawa nya kemari, Mohd Sabtu ditanya pasal 'luri antu' ke enda belisin sereta seruran berangkutka kayu ari sitak Bakun ngujungka mensia mayuh ke diau di sitak nya suah endar bebadi.

Iya madah, enti sida ke mai luri tauka bisi 'orang' ke ngasuh ngambi kayu dia ke enda nitihka atur undang-undang, sereta ngerusakka perengkaguna dia, polis deka ngambi atur ke terit .

"Kami deka bejuraika pasal pekara tu lalu ngasuh sida ke ngachau sereta ngerusakka perengka guna dia, badu agi ngereja pengawa nya. Polis deka nasat pekara tu, lalu polis mega benung merati pekara nya.

"Enti orang-orang tu enda ngasi, kami ngambi atur undang- undang," ku iya.

Penanggul bansa tu kala dibantai ulih Menteri Pemansang Tanah, Tan Sri James Masing, ke udah meda gaya jalai nya empu sereta penanggul ke ditapi ulih mensia mayuh ke diau di sitak nya ke enda berani ngerara 'luri antu' ke kuang kuit masuk ke dalam sitak nya.

Masing madahka Jalai Bakun nya digaga ke mensia mayuh ke diau di sitak nya, nyengkaum genturung pendiau baru Sg Asap enggau pemansang tekat ai kuasa Bakun-Hidro, lalu ukai digaga ungkup luri kayu.

"Bulan March taun tu, aku beratika luri-luri tu ke tama kia, nyau baka sida ke bempu kuasa. Nyauka tiap-tiap minit bisi luri. Dalam kandang berapa taun tu ke udah, sekeda ari orang mayuh ke diau di sitak tu parai laban bebadi ketegal nyeliah luri tauka kena lubang jalai ke bebesai.

"Enti pekara tu enda dikemutar enggau manah, aku enda tekenyit ninga berita ila, orang ditu deka ngambi atur kediri empu," ku iya, lalu nambah kompeni kayu bekenaka jalai ke digaga ke orang ke diau di sitak nya enggau pechuma, ngiga pengeraja kediri empu.

Masing madahka opis kandang menua ke bekuasa dalam pekara tu patut beratika penanggul tu, lalu ukai semina ngudahka utai aja, tang beratika penanggul tu enggau berat , ku iya.

Print Friendly

PEKEMA neruska program CSR taja dagang ngusut

Posted: 13 Apr 2014 02:52 PM PDT

KUCHING: Baka taun ke udah, Gerempung Pengimpot enggau Orang Dagang Perengka Pengangkut Melayu (PEKEMA) Sarawak deka majak bejalaika tanggung pengawa rama (CSR) di nengeri tu, Ku Presiden Datuk Abang Khalid Tan Sri Datuk Amar Abang Marzuki.

Jamin tu dipansutka iya ba pengerami Makai Lemai Ninting Taun PEKEMA Sarawak ke diatur nyerumba Aum Besai Ninting Taun ke 26 di siti hotel tebilang ditu, malam ensanus.

"Taja pan dipeda gaya dagang industri enda tentu manah maya ke diatu, PEKEMA deka majak bejalaika program CSR baka taun ke udah.

"Kitai merambu mantu sereta meri sepunsa ngagai 10,000 iku nembiak di Pelilih Kuching ngambika sida tau masuk kelas, tuisyen, licha enggau program bukai ke bekaul enggau pelajar.

"Kitai mega deka meri bantu ngagai pelajar di menua pesisir ke alai nya nyengkaum sida ke diau di Pelilih Simunjan, Kapit, Lundu sereta sekeda pelilih bukai,"ku iya.

Ba kaul ke sama, nyukung pengeran PEKEMA Sarawak, Sapit Presiden PEKEMA (Menua) Datuk Wan Zaid Wan Abdullah netapka deka ngeluarka belanja besai ba taun 2014 dikena nyaup program CSR gerempung di nengeri tu.

Ku iya, aku ke nyadi sapit presiden deka ngena semua daya ke ulih nentuka program CSR di Sarawak dikemujur.

"Kitai beratika program CSR udah nyapai juluk ti ditetap kenyau dipejalai ngelamatu. Pemujur tu mulaika pemaik ngagai komuniti,"ku iya.

Ba pengerami malam nya, PEKEMA bisi nyuaka bantu ngagai dua buah gerempung ti disua Temuai Pemadu Dipebasa Menteri Kanan Tan Sri Dr James Masing.

Gerempung Rurun Kelabit Sarawak (Unit Pelajar) nerima RM15,000 lalu Gerempung Powerboat Pelilih Kapit nerima RM25,000.

Print Friendly

Ali: Pemidang Endawie pengelenyau besai ungkup komuniti Dayak

Posted: 13 Apr 2014 02:51 PM PDT

SARATOK: Niang Datuk Amar Dunstan Endawie udah nadai maya umur 78 taun di Sepital Saratok kena Hari Lima tu tadi nya seiku tuai Dayak ti dipebasaka kenyau ari menua Malaysia ditumbuhka.

Kaban Kunsil Nengeri sitak Krian, Ali Biju ke bisi datai meri basa ke penudi endar seraya ngenataika penyinu ati ngagai sida niang sebilik di Letong Sawa ensana , madahka niang Endawie tu ` hall mark of Sarawak' kenyau ari menua tu ngatika diri dalam taun 1963.

" Iya seiku ketuai Dayak ti dipebasaka sereta mar deka disilih. Pemidang iya pengerugi besai ke komuniti Dayak," ku iya.

Maya ke agi nyadi orang politik, niang Endawie kala dipadu mangku pengawa nyadi Sapit Kepala Menteri sereta amat dipebasaka bala pangan enggau lawan, laban ari segi politik iya endang manah enggau kededua piak raban politik, sekalika nya enggau bala ari Sarawak empu tauka Malaysia, pia ku Ali.

Nitihka penerang autobiografi ti dipansutka sida niang sebilik, niang Endawie belabuh gawa nyadi pengajar.

Iya ngajar ba St. Augustine junior Secondary School berengkah ari taun 1956 nyentuk ke taun 1957 lalu nangkanka nya ngajar ba St. James School, Bangkit Spaoh.

Udah nya, iya lalu masuk ba pengawa betanam betupi ke alai iya dipaduka nyadi Kaunsilor ba Kaunsil Pelilih Mit Kalaka.

Lebuh ke mangku pengawa nya, iya dikearap nyadi chairman tauka penyanding penemu kaunsilor ungkup Bagi Menua Kedua di Sarawak (Diatu Bagi Menua Betong enggau Sri Aman) Pengawa politik iya berangkah dalam taun 1963, pengudah iya menang ba pengawa bepilihka pangku Kaunsilor ba Pelilih Mit Kalaka .

Iya lalu dichiri nyadi chairman Kaunsil ke mega Kaban Kunsil Nengeri Sarawak.

Dalam taun ke sama mega, iya lalu masuk Sarawak National Party (SNAP) ti betuaika Datuk Stephen Kalong Ningkan, sereta lalu dipilih nyadi kaban Kunsil Besai parti nya.

Keterubah endar SNAP numbuhka kabinet dalam taun 1963, iya dipilih nyadi Menteri Kandang Nengeri nyentuk ke taun 1966.

Dalam taun 1975, iya lalu nyadi ketuai SNAP mangku pengawa nyadi Presiden nyilih Ningkan sereta berunding numbuhka perintah begempung enggau parti bukai nyengkaum PBB ti betuaika Tun Abdul Rahman Yaakub.

Lebuh perintah champur nya mujur ditumbuhka dalam taun 1976 betuaika Tun Rahman, niang dichiri nyadi Menteri Kandang Nengeri, ke alai enda lama udah nya iya lalu dipadu nyadi Sapit Kepala Menteri.

Ketegal pemanah pengawa ti dikereja iya ba nengeri tu enggau menua Malaysia, iya diberi gelar Panglima Negara Bintang Sarawak (PNBS) ke mai gelar `Datuk' dalam taun 1965 enggau Bintang Kenyalang (DA) ke mai gelar `Datuk Amar' dalam taun 1977.

Print Friendly

SSPCA melanja RM30,000 sebulan dikena nginang jelu tupi: Dona

Posted: 13 Apr 2014 02:50 PM PDT

by Rengenyan Labang. Posted on April 14, 2014, Monday

KUCHING: Taja pan udah belisin ukai reti tuan empu ukui nya ulih sepeneka ati ngelepas jelu tupi sida ari payung rumah, ku Presiden Gerempung Nagang Mensia Mayuh Merinsa Jelu Sarawak (SSPCA) Dona Drury-Wee.

Iya madahka orang ti nupi ukui nya patut ngembuan tanggungpengawa ngambika pengelikun enggau pengelantang orang ngelingi sida lebih agi di kandang genturung pendiau.

"Kami deka ngelalau orang ti bisi jelu tupi baka ukui, taja pan ukui nuan udah belisin ukai reti nuan ulih ngelepas ukui nya diluar kandang rumah kita.

"Laban ukui nya tau nganu orang, kitai enggai meda pekara enda manah nyadi baka anak mit tauka orang digigit ukui lebih agi ukui lelang.

"Tang enti dipeda ari pemanah iya nupi ukui nya ulih mantu ngurangka penusah (baka kes enchuri enggau kebukai), laban ukui nya ngelala sapa bagi orang ti enda dikelala tauka baru," ku iya.

Dona dikerandau pengarang berita ba Kimpin Meriri Mayau enggau Ngiru Mayau ti diatur enggau kerejasama Dewan Bandaraya Kuching Utara (DBKU) ti diatur ba palan paking kerita di mua opis bebayar DBKU Satok, Pusat Komersial Al-Idrus ditu kemari.

Kelimpah ari nya lebuh ditanya bekaul enggau pemayuh jelu tupi baka mayau enggau ukui ti ditupi ba SSPCA, iya madahka, pemayuh mayau enggau ukui ngelui ari penyampau ke tempat ke bisi.

Iya madahka SSPCA nerima mayau enggau jelu ti dianjung DBKU, Dewan Bandaraya Kuching Selatan (DBKS) sereta Majlis Perbandaran Padawan (MPP) lalu nguji nyeliah ari nerima ti dianjung orang mayuh.

"Naka ke diatu dalam sangkar kami urung 250 iku mayau ke besai enggau 270 anak mayau sereta urung 80 iku ukui besai enggau anak ukui, sangkar tauka endur kami endang enda tetangkupka pemayuh jelu ke bisi.

"Dikena terus nyaga, pengerai, pemakai enggau ke bukai kami ngena belanja urung RM30,000 sebulan ungkup 180 iku ukui enggau mayau, taja pan kami pindah ngagai endur baru ila.

"Taja pan kami bisi nerima ungkus belanja mimit ari piak perintah sereta ari atur program ke dipejalaika SSPCA, kami mega ari ngarapka bantu ari orang mayuh," ku iya seraya madahka sida agi nganti pemendar ari perintah bekaul enggau palan baru SSPCA.

Orang mayuh ke deka mantu kami tau telefon ngagai kami ba lumur) 082-618200 tauka email ngagai sarawakspca@gmail.com.

Print Friendly

Peranak menua Ulu Tau nagih kuasa karan, ku Jan

Posted: 13 Apr 2014 02:50 PM PDT

Peranak minta dikesinu dibekal karan 24 jam, perambu projek nya udah dipesetuju semina nganti projek nyadi aja 

TATAU: Peranak rumah panjai ba kandang Ulu Tau, Anap ditu minta raban ke bekaul jampat agi ngaga projek mini hidro ba kandang menua sida.

Ku seiku peranak menua nya, Tuai Rumah Jan Jelian, sida ditating ungkus belanja ke besai laban meli minyak diesel ti dikena injin api, ngambika bisi karan ninting hari.

"Penanggul besai kami ditu, nadai karan tang bisi injin api ke semina dikena maya malam hari aja laban ke deka ngelimat ungkus minyak diesel.

"Enti sema dipasang sepemanjai hari ngelama 24 jam dalam kandang 30 hari, tentu ungkus nya besai. Taja pan semina dipasang muak ke malam aja, tang kami tetap berasai ditating ungkus minyak ke mar, kelebih agi baka kami ke jauh ba menua pesisir," ku iya madah ngagai Utusan Borneo, empai lama ke udah.

Ku iya, nyauka semua sida serumah bisi injin api ngemansutka belanja enda kurang ari RM300 sebulan kena meli minyak diesel.

"Udah ga menua kami jauh di ulu entigis, rega minyak mar ketegal dibansi enggau rega ungkus perengka pengangkut. Segilin minyak diesel dijual RM10 enda umbas dikena sehari. Bisi sekeda meli setung besai, nya baru chukup dikena sebulan.

"Rega setung besai nya RM300 nyentuk ke RM400. Enti nadai penatai penatai pemisi ke tetap, dini deka ngiga duit ngemayuh nya," pia ku iya.

Ku Jan, dalam taun 2010 bisi seraban orang datai kia madahka perambu deka ngaga projek mini hidro ngambika peranak rumah panjai di Ulu Tau, Anap bisi kuasa karan.

Ku iya, perambu projek nya udah dipesetuju lalu kandang menua endur bejalaika projek nya udah disukat, semina nganti projek nya dipejalaika aja.

"Projek mini hidro kami nya deka digaga ba Wong Separai di Nanga Tau. Ku raban nya, projek nya ila deka meri pengelantang ngagai semilan buah rumah panjai ba kandang menua Ulu Tau.

"Dipelabaka lebih ari 200 iku peranak menua nya deka ngasaika pengelantang ari projek nya. Taja pia, nyentuk ke diatu, udah empat taun projek nya diperambu, tang lalu nadai bisi kelai projek nya deka digaga. Nya alai, kami ditu ngansak raban nya jampat agi ngaga projek mini hidro ba kandang menua kami ditu.

"Lama agi kami nganti, majak berasai kami ngenatka tating belanja ungkup minyak injin api. Enti projek nya udah digaga, kami ulih ngena karan ke enda bebayar," pia ku iya.

Seiku agi peranak menua nya, Kam Balang minta pengasih ari wakil rayat sitak nya ngambi berundingka sida di Ulu Tau.

Ku iya, pekara ke beguna amat iya nya, pemansut kuasa karan tauka projek mini hidro ti udah dipesetuju sereta disemayaka suba.

"Udah empat taun disemaya, tang kami agi ngarapka ari projek nya. Kami mengkang ditating ungkus meli minyak injin api.

"Ukai semina nya aja, tambang pulai mansang ari tu ke pasar Tatau, RM60 seiku nepan kerita suwa 4WD. Tambah mega, kami apin temu selamat laban ke nengah jalai lori kayu batang sekalika maya kemarau tauka ujan.

"Kami beterima kasih laban ke bisi jalai luri kayu ti, ngemudahka pejalai kami. Taja pia, kami ditu betapi enggau ungkus pengidup ke besai nyengkaum minyak diesel ungkup injin api kami, tambang ke pekan, barang ke dijual, penanggul telekomunikasi ti enda ngemuaska ati enggau sekeda penanggul bukai.

"Enti ulih penanggul nadai karan nya diputarka dulu, laban mar kami deka beridup enti nadai kuasa karan. Semua begunaka karan enti dibanding enggau penanggul bukai ti tau tinggal dulu," pia ku iya.

Taja pia, Jan enggau Kam madahka diri berasai gaga ati enggau gaya pengidup di Ulu Tau, Anap ke mayuh udah berubah enti dibanding enggau ke suba, sekumbang ari baruh pegai perintah Barisan Nasional (BN), taja pan jauh di ulu entigis.

"Taja pan mayuh udah berubah, tang kami amat begunaka karan. Kami udah bisi ai paip enggau jalai, tang kami begunaka karan laban ti enda tan agi ditating ungkus meli minyak diesel ti dikena injin api kami.

"Kami mengkang ngarapka raban nya tauka perintah ulih ngenerangka kandang menua di Ulu Tau, Anap ngambi pulaika pengelantang ngagai kami semua, sereta mega anak uchu kami ti ngarapka pemansang ari perintah BN belama," pia ku seduai.

Print Friendly